རྩོམ་པ་པོ། བློ་བཟང་ཆོས་འབྱོར།(ཤར་ཕྱོགས་ཁུག་རྟ།)
རྩོམ་ཁུངས། བོད་ཀྱི་དུས་བབ།
༈ ཇི་སྐད་དུ། སེམས་ཅན་ཀུན་གྱི་བྱ་བ་ལ།། ཁྱེད་ནི་དུས་ལས་མི་འདའ་བས།། མཛད་པ་རྟག་ཏུ་དོན་མཛད་པ།། མི་བསྙེལ་ཁྱེད་ལ་ཕྱག་འཚལ་ལོ།།
དང་པོ། སྔོན་གླེང་།
༄༅།། ཉེ་སྔོན་ ༢༠༢༥ ཟླ་ ༧ ཚེས་ ༢ ཉིན། འདི་ལོའི་ཟླ་ ༥ ཚེས་ ༢༡ ལ་མཛད་གྲུབ་པའི་༸གོང་ས་༸སྐྱབས་མགོན་ཆེན་པོའི་ཡང་སྲིད་རྒྱུན་མཐུད་ཕེབས་རྒྱུ་ཞལ་བཞེས་སྩལ་ཐོབ་བཀའ་དྲིན་བསྐྱངས་པའི་བཀའ་ཡིག་སྲིད་གསུམ་ཟིལ་གནོན། ༸རྒྱལ་བ་སྐུ་དངོས་ཀྱིས་གསལ་བསྒྲགས་མཛད་པའི་བརྙན་ལ་མཇལ་རྗེས། དམ་ལྡན་གཞིས་བྱེས་ལྷ་མི་རྣམས་སྐྱེ་ཀུན་འཕགས་མཆོག་སྤྱན་རས་གཟིགས་ཀྱིས་༸རྒྱལ་བ་ན་རིམ་གྱི་རྣམ་པས་མུ་མཐུད་མཉེས་བཞིན་རྗེས་འཛིན་ཞལ་བཞེས་བསྐྱར་ནན་ཐོབ་པ་ཡིན་སྟབས། བཀྲ་ཤིས་དགའ་བའི་དཔལ་ནི་བསྒྲུན་དུ་མེད་ཅིང། ཆབས་ཅིག་དམ་ལྡན་བོད་མི་ཚོར་བསྒྲུབ་བྱའི་དོན་ཡང་གཉིས་ལས་མེད་པ་གསལ་བོ་ཆགས། གཅིག སྤྱི་སྒེར་གྱི་ལས་དོན་ཆེ་ཕྲ་གང་ཡང་༸རྒྱལ་བའི་བཀའ་དགོངས་དང་འགལ་མེད་ཤར་བསྐྱོད་སྔར་ལྷག་དམ་དོན་བྱ་རྒྱུ་དང་། གཉིས། སྐྱེ་བ་རྗེས་མ་རྣམས་སུ་ཡང་༸གང་གི་མཛད་ཆེན་འཁོར་ལོས་བསྒྱུར་པའི་དཀྱིལ་འཁོར་ཆེན་པོར་མི་ལུས་ཙམ་དང་བོད་མི་ཙམ་མིན་པར། དལ་འབྱོར་གྱི་ཆོས་རྣམས་ཡོངས་རྫོགས་ཚང་བའི་བོད་མིའི་ལུས་ཤིག་ཐོབ་སྟེ། ཞབས་འདེགས་རླབས་ཆེན་ཐུབ་ངེས་ཀྱི་ཚོགས་གསོག་སྐལ་བཟང་གོ་སྐབས་དུས་ལྟར་ལེན་རྒྱུ། རླབས་ཆེན་གྱི་ཚོགས་བསགས་དེ་གཉིས་ལ་འབད་རྒྱུ་ཕུད། ད་ལྟའི་ཆར་བོད་ཀྱི་རྩ་དོན་ལ་ཕན་པའི་ལས་དོན་གཞན་གང་ཡང་མེད། ལྷག་པར་༸གོང་ས་མཆོག་གི་ཡང་སྲིད་སྐོར་སྐད་ཆ་བཤད་རན་པའི་དུས་ཚོད་ཁྱོན་ནས་སླེབས་མེད་ཀྱང་། བོད་མི་རིགས་ལ་༸གོང་ས་མཆོག་ལས་གལ་ཆེ་བ་གཞན་མེད་པ་ལོང་པས་བལྟས་ཀྱང་རྒྱལ་ཁམས་ཀྱི་དཔེར་སོང་གཤིས། ད་ལྟའི་ཆར་ཞུ་འོས་ཤིང་རན་པ་འགའ་ལྷང་ཙམ་ཞུས་ན།
གཉིས། ངོས་འཛིན།
ཆོས་བརྒྱུད་ཁག་གི་བླ་ཆེན་རྣམས་གཙོས། ཐ་ན་ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་ལས་ཀྱང་༸རྒྱལ་མཆོག་སྐུ་ཕྲེང་རིམ་བྱོན་ནི་བོད་མི་རིགས་ལ་གལ་འགངས་ཤིན་ཏུ་ཆེ་བ་ཡིན་པ་འཇིག་རྟེན་ཧྲིལ་པོར་གསལ་བོ་ཆགས་ཡོད། བོད་བརྒྱུད་ནང་བསྟན་གྱི་མདུན་ལམ་སྤྱི་དང་། བོད་ཀྱི་ཆོས་བརྒྱུད་སོ་སོའི་བསྟན་པའི་འཕེལ་རྒྱས། བོད་མི་རིགས་ཀྱི་སྐད་དང་རིག་གཞུང་། ཆིག་སྒྲིལ། ལར་ཞེན། སྙིང་སྟོབས། བོད་གཞུང་དགའ་ལྡན་ཕོ་བྲང་ཕྱོགས་ལས་རྣམ་རྒྱལ་གྱི་ཕབ་རྒྱུན་ཁྲིམས་མཐུན་བོད་མིའི་སྒྲིག་འཛུགས་ཀྱི་བརྟན་གནས། ནུབ་ལ་དྭགས་ནས་ཤར་མོན་བར་གྱི་ཧི་མ་ལ་ཡའི་རི་བརྒྱུད་དུ་འབོད་པ་རྣམས་ཀྱི་ཆོས་དང་སྐད་ཡིག ཡུལ་གྱི་གོམས་པའི་གཤིས་ལུགས། རྒྱལ་སྤྱིའི་སྟེང་གི་ནང་པ་ཡོངས་ཀྱི་གནས་བབ་བཅས་པ་སྲ་བརྟན་ཕུགས་འཕེར་ཡོང་མིན་གྱི་ཡལ་འདབ་མཐའ་དག་༸གོང་ས་མཆོག་གི་རླབས་ཆེན་མཛད་འཕྲིན་གྱི་རྩ་བ་དཔག་བསམ་གྱི་ལྗོན་བཟང་ཁོ་ནར་བརྟེན་སྟབས། བཅའ་ཁྲིམས་རིན་པོ་ཆེའི་དོན་ཚན་དང་པོར་གསལ་བ་བཞིན། ༸གོང་ས་མཆོག་ལས་བོད་དང་བོད་རིགས་ཡོངས་ཀྱི་རྩོད་མེད་སྲོག་རྟེན་དུ་གྱུར་བ་གཞན་མེད་པ་ངོས་འཛིན་གསལ་བོ་དགོས་པ་ཡིན།
གསུམ། ༸གོང་ས་ཆེན་པོས་ཡང་སྲིད་སྐོར་ལམ་སྟོན་གང་མཛད་ཁག
༡། བཙན་བྱོལ་དུ་འབྱོར་མ་ཐག་ནས་འབྱུང་འགྱུར་ཏཱ་ལའི་བླ་མས་དབུ་ཁྲིད་པའི་གཞུང་དང་དེའི་ཡང་སྲིད་རྒྱུན་མཐུད་དགོས་མིན་མང་ཚོགས་ཀྱིས་ཐག་གཅོད་བྱ་དགོས་པ་རིམ་གསུངས་མཛད་དེ། བྱིས་པ་ལག་འཁྲིད་ལྟར་བོད་མི་ཚོའི་བློ་ན་རྒྱས་རིམ་དང་བསྟུན་གནང་མཛད།
༢། ངོས་ཀྱི་མི་ཚེ་འདིར་བོད་དོན་བདེན་མཐའ་མ་གསལ་ཚེ་ཡང་སྲིད་རང་དབང་ལུང་པ་ཞིག་ཏུ་སྐྱེས་ངེས་ཤིང་བུད་མེད་ཅིག་གི་རྟེན་དུའང་སྐྱེ་སྲིད། ཡང་སྲིད་ཡོང་དགོས་དོན་སྐུ་གོང་མའི་ལས་དོན་རྗེས་སྐྱོང་བྱ་ཆེད་ཡིན་པ་བཅས་གསལ་གསུངས་མཛད།
༣། ངོས་རང་རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་སོན་སྐབས་ཆོས་བརྒྱུད་བླ་ཆེན་ཁག་དང་། བོད་མིས་མཚོན་འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་རྒྱལ་དབང་སྐུ་ཕྲེང་རྒྱུན་མཐུད་དགོས་མིན་མིན་བསྐྱར་ཞིབ་བྱ་འཆར་ཡིན་པ་ཡོངས་བསྒྲགས་མཛད།
༤། རྒྱལ་དབང་སྐུ་ཕྲེང་རྗེས་མའི་སྐོར་དོགས་གཞི་འཁྱོག་བཤད་བྱ་ཡུལ་མེད་པའི་ཚིག་ཐག་ཆོད་པོའི་ལམ་སྟོན་གསལ་པོ་ཞིག་ངོས་རང་ལུས་སེམས་གཉིས་ཀ་ཧ་ཅང་བདེ་ཐང་ཡོད་པའི་སྐབས་འདིར་ངེས་པར་བྱེད་དགོས་པར་གཟིགས་པ་བཞིན་རིམ་གནང་མཛད།
༥། བོད་གཞུང་མང་ཚོགས་ཆེན་དང་། ཆོས་བརྒྱུད་ཁག་གི་དབུ་ཁྲིད་བླ་ཆེན་ཁག། ཧི་མ་ལ་ཡའི་རི་རྒྱུད། ཆེན་པོ་ཧོར་དང་རུ་སུའི་ཁོངས་ཀྱི་ནང་པའི་ཡུལ་དགོན། རྒྱ་ནག་སྐམ་ས་སོགས་རྒྱ་རིགས་དང་ཨེ་ཤ་ཡའི་ནང་པའི་རྒྱལ་ཁབ་ཁག་གི་དད་ལྡན། འཛིན་སྐྱོང་དང་གཞུང་འབྲེལ་མིན་པའི་ཚོགས་ཁག་གིས་མཚོན། གཙོ་བོ་གཞིས་ལུས་བོད་མི་དད་ལྡན་སེར་སྐྱ་སྤྱི་སྒེར་མང་པོས་ ༢༠༡༡ ལོར་ཡང་སྲིད་སྐོར་གྱི་བཀའ་ཡིག་ཕེབས་པ་ནས་ཕྱི་ལོ་ ༢༠༢༥ བར་ཏེ་མི་ལོ་ ༡༤ རིང་ཇི་ལྟར་གསོལ་བ་ཕུར་ཚུགས་སུ་ཡང་ཡང་བཏབ་པ་བཞིན། རྒྱལ་དབང་གི་སྐུ་ཕྲེང་རྒྱུན་མཐུད་སྔར་སྲོལ་བཞིན་གནང་རྒྱུའི་བཀའ་བཞེས་ཟབ་མོ་སྤྱི་བོའི་མཛེས་རྒྱན་དུ་སྩལ།
༦། ནམ་ཞིག་སྐུ་ཕྲེང་བཅོ་ལྔ་པ་ངོས་འཛིན་བྱ་དགོས་ཀྱི་དུས་སྐབས་ཤིག་ཤར་ཚེ། དེའི་བྱེད་སྒོའི་འགན་འཁུར་གཙོ་བོ་ཏཱ་ལའི་བླ་མའི་བླ་བྲང་དགའ་ལྡན་ཕོ་བྲང་ཡིད་ཆེས་དགེ་རྩའི་དབང་ལྡན་འགན་འཛིན་རྣམས་ལ་ཡོད་པ་དང་། ཁོ་ཚོས་བོད་བརྒྱུད་ནང་བསྟན་ཆོས་བརྒྱུད་ཁག་གི་དབུ་ཁྲིད་བླ་ཆེན་རྣམ་པ་དང་། རྒྱལ་དབང་སྐུ་ཕྲེང་ན་རིམ་དང་ལུས་དང་གྲིབ་མ་བཞིན་འགྲོགས་པའི་དམ་ལྡན་ཆོས་སྲུང་ཁག་ལ་སྐབས་བསྟུན་ལམ་སྟོན་ཞུས་ཏེ་ཡང་སྤྲུལ་རྩད་གཅོད་སྔར་སྲོལ་བཞིན་བྱེད་དགོས་པའི་ལམ་སྟོན་གསལ་པོ་མཛད།
༧། ཡང་སྲིད་ངོས་འཛིན་གྱི་མཚམས་ལ་ཉེ་དུས་“ངོས་ནས་ཀྱང་བྱེད་ཕྱོགས་དེ་དག་ལ་ལམ་སྟོན་གསལ་བཀོད་ཀྱི་ཡིག་འཇོག་བྱ་རྒྱུ་ཡིན་པ།”གསལ་གསུངས་མཛད།
གོང་གསལ་བཀའ་སློབ་དང་བཀའ་ཡིག་རིམ་པར་སྩལ་ཁོངས་དོན་ཚན་ ༥ པའི་བར་ཆ་ཚང་ཕྱག་བསྟར་གྲུབ་ཟིན་པ་ལྟ་བུ་ཆགས་ཡོད།
བཞི་པ། ཡང་སྲིད་འཚོལ་ལུགས་སྲོལ་རྒྱུན་ནང་ཅི་ཡོད།
བོད་ཀྱི་སྤྲུལ་སྐུའི་ངོས་འཛིན་བྱེད་སྲོལ་དུ། ཤེས་རྒྱུད་གཅིག་པའི་སྤྲུལ་སྐུ་དང་། ལས་སྨོན་གྱིས་འབྲེལ་བའི་སྤྲུལ་སྐུ། བཀའ་བབས་པའམ་བྱིན་གྱིས་བརླབས་པའི་སྤྲུལ་སྐུ། མ་འདས་སྤྲུལ་སྐུ། གདུང་རྒྱུད་སྤྲུལ་སྐུ་སོགས་ཡོད་ཅིང་། གདུང་རྒྱུད་སྤྲུལ་སྐུ་ནི་དུས་ཚོད་ཡོལ་ཟིན་པའམ། རྗེས་ལུས་ཅན། དེང་ཡིད་ཆེས་བྱེད་མཁན་ཆེས་ཉུང་དུ་འགྲོ་བཞིན་ཡོད་པ་དང། མི་མང་གི་དད་འདུན་གྱི་དགོས་མཁོའི་རེ་བའང་ཚད་འཕེར་སྐོང་ཐུབ་ཀྱི་མེད། དེ་ནི་མི་མང་གི་ཤེས་ཡོན་ཡར་རྒྱས་ཕྱིན་པ་དང་སྦྲགས་ཆོས་པ་སྤུས་དག་ཚུལ་ཁྲིམས་ཚུལ་བཞིན་སྲུང་མཁན་ཇེ་མང་དུ་འགྲོ་རྒྱུའི་རེ་བས། ཆོས་བྱེད་དགེ་འདུན་པའི་གྲལ་མགོར་བུད་མེད་བསྟེན་མཁན་གྱི་བླ་སྤྲུལ་སྡོད་པ་མང་པོས་བློས་འཆུན་དཀའ་བར་སོང་། དེ་རིགས་ཉུང་ངུ་ནས་མེད་པ་ཆགས་ཏེ་རྒྱལ་བསྟན་སྤྱི་དང་། འདུལ་བསྟན་སྲ་བརྟན། བསྟན་རྩ་དགེ་འདུན་གྱི་འདུས་སྡེ་རིན་པོ་ཆེའི་འདུལ་ཁྲིམས་གཙང་མ་ཡོང་དགོས་གལ་གྱི་སྤྱི་སྨན་ཤ་ཚའི་བསམ་བློ་འདི་བོད་མི་ཕལ་མོ་ཆེར་ཡོད་པ་རེད་སྙམ།
ཡང་སྲིད་ངོས་འཛིན་བྱེད་ལུགས་སྲོལ་རྒྱུན་དུ་འཇགས་པ་རྣམས་ལས་གཙོ་ཆེ་ཤོས། གོང་མའི་འདའ་ཁའི་ཞལ་གདམས་དང་། ལམ་སྟོན་ནམ་བརྡ་མཚོན་བསྟན་པ། ཡང་སྲིད་སོ་སོས་ཆུང་དུས་ནས་སྔོན་གནས་རྗེས་དྲན་གྱི་གཏམ་ཚད་འཕེར་བཤད་པ། གོང་མའི་ཅ་དངོས་དང་ཉེ་འཁོར་ངོས་འཛིན་བྱས་པ། ཚད་ལྡན་གྱི་སྐྱེས་བུ་དམ་པར་ཐུགས་དམ་བརྟགས་ཞུ། གཞུང་བསྟེན་ལྷ་སྲུང་ཁག་ལ་བཀའ་ལུང་ཞུ་བ། ཟན་རིལ་བསྒྲིལ་བ། ལྷ་མོའི་བླ་མཚོར་མཚོ་མཇལ་བརྟག་དཔྱད་ཞུ་བ་སོགས་སྣ་མང་ཡོད་པ་ལས།
༸གོང་ས་༸སྐྱབས་མགོན་ཆེན་པོའི་ཡང་སྲིད་ངོས་འཛིན་གནང་ལུགས་སྔོན་སྲོལ་བཞིན་བྱ་རྒྱུ་ལས། རྒྱ་ནག་གི་ངན་གཡོའི་རེ་འདུན་ལྟར་གསེར་བུམ་ཁ་འཁྱེར་སྲིད་དོན་གྱི་དགོས་མཁོ་ལྟར་རྩ་ནས་འགྲོ་མི་དགོས་པ་དོན་གྱི་བདག་པོས་ ༢༠༢༥ ཟླ་ ༧ ཚེས་ ༢ ལ་ཡོངས་བསྒྲགས་མཛད་པའི་བཀའ་ཡིག་ཏུའང་བསྐྱར་ནན་གནང་ཡོད།
ལྔ་པ། སྔར་སྲོལ་ཞེས་པ་གང་ཡིན།
༸གོང་ས་༸སྐྱབས་མགོན་ཆེན་པོ་ཏཱ་ལའི་བླ་མ་སྐུ་ཕྲེང་རིམ་བྱོན་གྱི་ཡང་སྲིད་ཕེབས་སྟངས་ནི། སྐུ་གོང་མ་ཞིང་གཞན་དུ་གཤེགས་རྗེས། སྐབས་ཐོག་སོ་སོའི་འགན་འཁུར་པས་ཆོས་ཕྱོགས་ཀྱི་རྩད་གཅོད་ཞུ་ལམ་སྟེ། མཁས་གྲུབ་གཉིས་ལྡན་བླ་མ་ཚད་ལྡན་ལ་ལུང་ཞུ། ལྷ་མོའི་བླ་མཚོར་མཚོ་མཇལ་བརྟག་ཞུ་དང་། གཞུང་བསྟེན་ཆོས་སྐྱོང་ཁག་ལ་ལུང་ཞུ། སྔོན་གནས་རྗེས་དྲན་དང་ཅ་དངོས་ཉེ་འཁོར་ངོས་འཛིན་སོགས་རྟགས་མཚན་ཁྱད་པར་ཅན་ལ་གཞིགས་ཏེ་ཐག་གཅོད་གནང་ལམ་ནི་སྔར་སྲོལ་ཡིན་ཡང་། ༸གོང་ས་༸རྒྱལ་མཆོག་སྐུ་ཕྲེང་བཅུ་བཞི་པ་ཆེན་པོས་ “རྡོ་རྗེ་འཆང་ཏཱ་ལའི་བླ་མའི་སྐྱེ་ཕྲེང་བཅུ་བཞི་པ་ཤཱཀྱའི་དགེ་སྦྱོང་ཆོས་སྨྲ་བ་བསྟན་འཛིན་རྒྱ་འཚོར་འབོད་པའི་གཏམ།” ༢༠༡༡ ཟླ་ ༩ ཚེས་ ༢༤ ཉིན་ཕེབས་པའི་ནང་། ཡང་སྲིད་ངོས་འཛིན་བྱ་དགོས་ཀྱི་དུས་སྐབས་དེར་འགན་འཁུར་པ་རྣམས་ལ། “ངོས་ནས་ཀྱང་བྱེད་ཕྱོགས་དེ་དག་ལམ་སྟོན་གསལ་བཀོད་ཀྱི་ཡིག་འཇོག་བྱ་རྒྱུ་ཡིན་ཞིང་”ཞེས་གསལ་བོ་ཕེབས་ཡོད་སྟབས། སྐུ་ཕྲེང་སྔ་མ་དག་གི་མཛད་རྗེས་གཅིག་ཏུ་བསྡོམས་པའི་༸རྒྱལ་མཆོག་ཁམས་གསུམ་དབང་འདུད་གསུངས་སྲོལ་ཡོད་པ་བཞིན། སྐུའི་ཡང་སྲིད་ཐད་ཀྱང་དུས་ཀྱི་དགོས་མཁོ་དང་། རྒྱ་ནག་གི་གཡོ་ཇུས་ལ་གཞིགས་ཏེ། དེའི་འགན་འཁུར་བྱེད་པོའི་དབང་ལྡན་འགན་ལྷན་ལ་སྐབས་མཚམས་ཡིག་འཇོག་གམ། བརྙན་ལམ་ནས་ལམ་སྟོན་གསལ་བོ་ཕེབས་ངེས་པར་སྙམ་ཞིང་། གཅིག་བྱས་ན་ད་ལྟ་ནས་ཐུགས་གདེང་གཏོད་སའི་སློབ་མའམ་ཐུགས་སྲས་ཁྱད་པར་དུ་འཕགས་པ་གཅིག་གཉིས་ལ་བཀའ་མངགས་ཀྱང་གནང་ཡོད་སྲིད།
དྲུག་པ། རྒྱ་ནག་གི་གཡོ་ཇུས་རེ་སྟོང་དུ་འགྱུར་ངེས་པ།
མན་ཇུའི་སྐབས་ནས་བཟུང་རྒྱ་ནག་གི་སྲིད་དོན་དབང་འཛིན་པ་ན་རིམ་གྱིས་བོད་ཐོག་ཐེ་བྱུས་སླད་ཆོས་དང་བླ་སྤྲུལ་སྲིད་དོན་གྱི་ལག་ཆར་བཟུང་སྟེ་གཡོ་ཐབས་རིམ་སྤེལ་བྱས་པ་དང་། གསེར་བུམ་དཀྲུགས་འདོན་ཟེར་བ་སོགས་སྤྱད་ནས་བོད་ཀྱི་བདག་དབང་ཐད་གཡོ་ཇུས་སྣ་མང་བརྩམས་ཡོད་ཀྱང་། བོད་ཕྱོགས་ནས་རྒྱུ་མཚན་ཚད་ལྡན་སྔ་ཕྱིར་ཡིག་ངག་གཉིས་ནས་དྲངས་ཏེ་དོན་དམ་གྱི་ལན་འདེབས་མེད་པའི་གནས་སུ་བསྐྱལ་ཡོད། མཆོད་ཡོན་འབྲེལ་བའི་ལོ་རྒྱུས་ཀྱི་གནས་བབ་འདི་རྩོད་པའི་ངོ་བོར་བསྒྱུར་མཁན་རྒྱ་ནག་གཞུང་ཡིན་ལ། མ་འོངས་པར་རང་གི་རྒྱལ་ཁབ་ཁོ་ནའི་ཁེ་ཕན་གྱི་ཆེད་དུ། ལྟོས་མེད་མཁྲེགས་འཛིན་དང་ཧམ་ཤེད་ཉག་ཅིག་གིས་༸རྒྱལ་དབང་གི་ཡང་སྲིད་ཅེས་ཕྲུ་གུ་ཞིག་ལ་མིང་བཙན་འདོགས་བྱ་ངེས་པ་ཀུན་གྱིས་ཚོད་དཔག་བྱེད་ཀྱང། ༸རྒྱལ་མཆོག་ཐམས་ཅད་མཁྱེན་པ་ཏཱ་ལའི་བླ་མ་མཆོག་ནི་བོད་མི་རིགས་ཀྱི་བླ་སྲོག་གཅིག་པུ་ཡིན་སྟབས། ངན་ཇུས་གཏན་དུ་ལམ་ལྷོང་ཡོང་དཀའ། རྒྱུ་མཚན་གཅིག་རྒྱ་ནག་གཞུང་གིས་བཟོས་པའི་པཎ་ཆེན་རྒྱལ་མཚན་ནོར་བུའི་གནས་བབ་ལས་ཤེས་ཐུབ་པ་ཞིག་ཡིན། ད་ལྟ་པཎ་ཆེན་རིན་པོ་ཆེར་བཟོས་པ་རྒྱལ་མཚན་ནོར་བུ་འཚར་ལོངས་བྱུང་རིམ་བཞིན། རྒྱ་ནག་གཞུང་གིས་ཁོང་ལ་དམ་བསྒྲགས་ཇེ་ཆེ། རང་དབང་མེད་པ། ཡིད་ཆེས་མེད་པའི་ཚད་ནི་ཚང་མའི་མཐོང་གསལ་དུ་གྱུར་ཡོད་པས། རྒྱལ་མཚན་ནོར་བུས་རང་གི་གནས་སྟངས་ངོ་མ་ཤེས་མཚམས་ཅི་བྱ་ཚོད་ཐིག་རྒྱུ་ཧ་ཅང་དཀའ་བ་ཞིག་ཡིན། ད་བར་བོད་ཀྱི་ས་གནས་ཁག་ཏུ་ཕེབས་པའི་རྣམ་པ་བསྟན་པ་དག་ལའང་ས་གནས་ཀྱི་བླ་སྤྲུལ། དགེ་འདུན་པ། དད་ལྡན་མང་ཚོགས་བཅས་པ་མི་འདོད་བཞིན་དུ་ཕེབས་བསུར་བཅར་བཅུག མི་འདོད་བཞིན་དུ་ཆོས་ཞུ་རུ་བཅུག་ཡོད་པ་གསལ་བོ་ཆགས་ཡོད་པས། པཎ་ཆེན་བཙན་བཟོ་བྱས་པའི་གནས་བབ་འདི་གད་ལ་ཉེ་བའི་འབར་རྫས་ལྟ་བུ་ཞིག་ཆགས་ཡོད།
མ་འོངས་པར་ “སྲིད་དོན་གྱི་དགོས་མཁོ་ལ་བརྟེན་ནས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆབ་སྲིད་དབང་འཛིན་པས་མཚོན། སྲིད་དབང་འཛིན་པ་སུ་ཞིག་གིས་ཡང་སྤྲུལ་འདེམས་སྒྲུག་བྱས་པ་བྱུང་ཚེ་དེ་ལ་རྒྱལ་བའི་ཡང་སྤྲུལ་དུ་ངོས་འཛིན་དང་དད་མོས་བྱེད་མི་དགོས་པ་ཡིད་འཇགས་དགོས་”ཞེས་དོན་གྱི་བདག་པོས་ཚིག་ཐག་བཅད་ནས་བཀའ་ཕེབས་ཡོད་པས།
རྒྱ་ནག་གཞུང་གིས་༸གོང་ས་མཆོག་སྐུ་འཚོ་བཞུགས་རིང་གི་གོ་སྐབས་བཟང་པོ་དམ་འཛིན་གྱིས་བོད་མིའི་མངོན་འདོད་སྒྲུབ་ཐབས་ཀྱི་ཡང་དག་པའི་ཐབས་ལམ་ཞིག་བཙལ་ན་ལས། དེ་མིན་༸རྒྱལ་བའི་ཡང་སྲིད་ཅེས་ཕྲུ་གུ་ཞིག་ལ་མིང་འདོགས་ཐུབ་རྒྱུ་ལྟ་ཅི། ཐ་ན་དུས་མཚམས་ལོ་དུས་གང་འདྲ་ཞིག་ཏུ་མིང་འདོག་དགོས་མིན་ཡང་ཤེས་དཀའ་བ་ཞིག་ཆགས་ངེས་སྟབས། ངལ་བ་འབྲས་མེད་ཀྱི་ལས་དོན་དག་མཇུག་བསྡུས་ཏེ། རྒྱ་བོད་མི་རིགས་གཉིས་ཀྱི་ཕུགས་རྒྱང་རིང་པོར་སྨན་པའི་ལས་ཀ་ཚད་ལྡན་ཞིག་འགོ་རྩོམ་ཐུབ་པར་ཆབས་ཅིག་སྐུལ་མ་ཡང་ཞུ་འདོད་བྱུང་།
བདུན། བོད་ཕྱོགས་ནས་སྲོལ་རྒྱུན་གང་ལྟར་ངོས་འཛིན་བྱེད་དམ།
གོང་དུ་ཞུས་པ་བཞིན། རྒྱ་ནག་གི་གཡོ་ཇུས་དང་། བོད་མི་གཙོས་དད་ལྡན་ནང་པ་ཡོངས། ལྷག་པར་བོད་མི་རིགས་ཀྱི་རྩ་དོན་དང་འཛམ་གླིང་ཞི་བདེའི་ཆེད། ༸གོང་ས་མཆོག་གི་ཡང་སྲིད་ངོས་འཛིན་འགན་འཁུར་བྱེད་པོ་ལྷན་རྒྱས་ནས། སྲིད་གཞུང་གང་གིའང་ཐེ་བྱུས་མེད་པ། ཁྱད་པར་རྒྱ་ནག་གིས་༸རྒྱལ་བ་རྫུན་བཟོའི་ལས་ཀ་ལམ་དུ་མི་འགྲོ་བར་གདོང་ལེན་རྩལ་འདོན་གྱིས་དུས་ལ་དཔག་པའི་སྔར་སྲོལ་ཚད་ལྡན་ཞིག་ལག་བསྟར་གནང་རྒྱུ་ནི་གདོན་མི་ཟ་བ་རེད། སྔར་སྲོལ་ཁག་ལས་ཡོངས་གྲགས་ཡིན་པའི་ཐབས་ལམ་དང་། དེ་མིན་སྐབས་མཚམས་ཐབས་ལམ་རྣོ་ངར་ལྡན་པའང་ལག་བསྟར་བྱ་ངེས་པ་རེད།
གཅིག ལོ་མང་རྗེས་དུས་སྐབས་དེ་ལྟ་བུ་ཞིག་ཤར་མཚམས་ཡོངས་གྲགས་ཀྱི་ལམ་ནས་ལམ་སྟོན་ལྟར་གྱི་ལས་དོན་རྣམས་བསྒྲུབ་རྒྱུ་དང་།
གཉིས། ཡང་ན་དུས་སྐབས་དེར་གསང་རྒྱའི་ལམ་ནས་༸གོང་ས་ལྔ་བ་ཆེན་པོའི་སྐབས་སྡེ་སྲིད་རིན་པོ་ཆེས་གནང་བ་ལྟར་ཕྱག་བསྟར་མཛད་སྲིད། གསང་རྒྱ་མཛད་དབང་དུ་བཏང་ན། ལོ་གཅིག་གཉིས་ལས་མི་དགོས། རྒྱ་ནག་གི་གཡོ་ཇུས་ལ་གཞིགས་ན། གསང་རྒྱའི་སྲོལ་རྒྱུན་གྱི་འགྲོ་སྟངས་འདིར་བོད་མི་མང་གིས་རྒྱབ་སྐྱོར་བསམ་ཤེས་སྔར་ལྷག་གནང་ངེས་པ་ཞུ་ག་ལ་དགོས།
གསུམ། གཞན་ཡང་སྐབས་མཚམས་༸གོང་ས་མཆོག་གིས་དགག་དགོས་ལ་དགོངས་ཏེ་དམིགས་བསལ་ཐབས་ལམ་གསར་པ་འགྲོ་ཀུན་ཡིད་ཆེས་འདྲེན་པ་དེ་འདྲ་ཡང་གནང་སྲིད།
བཞི། མ་འོངས་ལོ་མང་རིང་གཅིག་བྱས་ན་རྒྱ་ནག་གཞུང་ལ་འགྱུར་བ་ཤུགས་ཆེ་ཕྱིན་ཏེ་ཕྱོགས་གཉིས་རྩེ་མཐུན་གྱི་ལམ་ནས་ཐག་གཅོད་བྱ་རྒྱུའི་ལམ་དུའང་འགྲོ་སྲིད།
ལྔ། ཡང་སྲིད་ཐག་གཅོད་ཀྱི་དོན་གྱི་བདག་པོ་༸རྒྱལ་མཆོག་རང་ཉིད་ཁོ་ན་ཡིན་སྟབས། རྒྱལ་སྤྱིའི་སྲིད་གཞུང་ཁག་གི་ངོས་འཛིན་ལ་དེ་ཙམ་ཁྱད་པར་མེད་ནའང་། ཨ་རི་གཙོས་སྲིད་གཞུང་ཁག་དང་། ནང་པའི་ཡུལ་ལུང་ཁག་གི་ཆོས་ཀྱི་སྒྲིག་འཛུགས་དང་བླ་ཆེན་ཁག གཞན་ཡང་ཆོས་ལུགས་རིས་མེད་ཀྱི་བླ་ཆེན་པོབ་སོགས་ནས་ཀྱང་བོད་ཕྱོགས་ནས་ཐག་གཅོད་གཙང་མ་གནང་བའི་༸རྒྱལ་བའི་ཡང་སྲིད་གང་དེ་༸གོང་ས་ཏཱ་ལའི་བླ་མ་དེ་ཆོས་དད་རང་དབང་དང་། བོད་བརྒྱུད་ནང་བསྟན་གྱི་ཆོས་ཀྱི་འགྲོ་སྲོལ་ཚད་ལྡན་བཞིན་གཏན་འཁེལ་མཛད་པ་ཡིན་པར་ངོས་ལེན་བརྩི་བཀུར་ཞུ་རྒྱུ་ཡིན་པ་བཤད་ག་ལ་དགོས། འཚིང་ཁ་ཤིག་ཤིག་ཡོང་ངེས།
བརྒྱད། བོད་མིའི་སྒྲིག་འཛུགས་དང་བོད་མི་མང་ལ་འགན་ཅི་ཡོད།
པཎ་ཆེན་སྐུ་ཕྲེང་བཅུ་པ་ངོས་འཛིན་སྐབས། རྒྱ་ཕྱོགས་ནས་བོད་ཀྱི་བླ་སྤྲུལ་མཚན་གནས་ཡོད་མཁན་མང་པོ་བེད་སྤྱོད་བཏང་ཡང་། རེ་ཟུང་ལས་རྒྱ་ནག་ལ་ཉན་མེད། དེ་དག་ལ་བོད་མདོ་དབུས་ཁམས་གསུམ་དུ་དོན་དམ་གྱི་ཆེ་མཐོང་གང་ཡང་མེད་པ་ཆགས་ཡོད་པ་མ་ཟད། བླ་སྤྲུལ་དེ་རིགས་འཁོར་དང་ཕྱོགས་གཏོགས་ཀྱི་ཞེན་ཁོག། དངུལ་དངོས་ཀྱི་ཐབས་ལམ་ལ་བརྟེན་ནས་བོད་མིའི་སྤྱི་ཚོགས་ནང་ཆེ་མཐོང་ལྟ་བུའི་ས་ཁོད་ཕྲན་བུ་རེ་ཡོད་ན་ལས། ཁོང་ཚོའི་གྲས་བོད་མི་མང་འདུས་སྡོད་ཆེ་སར་ཞེ་ལྷོད་པོའི་ངང་འགྲོ་རྒྱུའང་ཉེན་ཁ་ཆགས་ཡོད་ལ། བོད་མི་ལར་ཞེན་ཅན་གཉིས་ནས་གསུམ་འཛོམས་ནའང་ལྐོག་ཏུ་བླ་དཔོན་དེ་རིགས་ཞབས་འདྲེན་རེད་ཅེས་ཡིག་ངག་གཉིས་ན་གཤེ་གཤེ་བཏང་དང་གཏོང་གི་ཡོད། དེང་༸རྒྱལ་བའི་ཡང་སྲིད་ཐད་རྒྱ་ནག་གཞུང་གིས་ཚོགས་ཆུང་འདྲ་མིན་བཙུགས་པའི་ནང་བོད་ཀྱི་བླ་སྤྲུལ་རེ་ཟུང་བེད་སྤྱོད་གཏོང་འགོ་བཙུགས་ཡོད། གལ་སྲིད་དེ་དག་གིས་རྒྱ་ནག་གཞུང་གི་མངོན་འདོད་བཞིན་༸རྒྱལ་བའི་ཡང་སྲིད་ཐད་ཀུན་གཟིགས་མཆོག་གི་ཡིག་འབྲུ་ཁྲི་བདུན་གྱི་སྙན་ཞུར་འཁོད་པའི་ཧུར་བརྩོན་ཅན་ཇི་བཞིན་གྱི་ལས་ཀ་མུ་མཐུད་བྱས་ཚེ།
༡། བོད་ཀྱི་བླ་སྤྲུལ་སུ་ཞིག་གིས་རྒྱ་ནག་གཞུང་གི་དགོས་མཁོ་སྒྲུབ་རྐྱང་བྱས་ཚེ་དེས་བོད་མི་རིགས་ཀྱི་རྩ་དོན་གཡོ་ཚོང་བྱས་པ་ཡིན་སྟབས། གཞིས་བྱེས་བོད་མི་ཚང་མས་ཐེར་འདོན་རྣམ་འགྱུར་ཡན་པོར་མ་སོང་བ་སྟོན་དགོས།
༢། དེ་སྔ་ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་ངོས་འཛིན་སྐབས། བོད་ཀྱི་བླ་སྤྲུལ་ཆེ་ཁག་ཕལ་མོ་ཆེས་རྒྱ་གཞུང་གི་དགོས་འདུན་བསྒྲུབ་ན་བོད་མི་རིགས་གཡོ་བཙོང་བྱས་པ་ཤེས་ཏེ་དགོངས་ཞུ་ཨུ་ནན་གནང་ཡོད་ལ། རང་སྲོག་གཏའ་མར་བཞག་སྟེ་ཡོངས་འཛིན་སོགས་སུ་མ་བསྡད་པ་སྐྱབས་རྗེ་ཨ་ཀྱཱ་རིན་པོ་ཆེ་ལྟ་བུ་སོགས་བྱུང་ཡོད་པ་མཁྱེན་བཞིན་དུ། བླ་སྤྲུལ་རེ་ཟུང་གིས་བོད་མི་རིགས་ཀྱི་རྩ་དོན་ལ་ལྟོས་མེད་བྱས་ཚེ། བོད་གཞུང་ངམ་བོད་མིའི་སྒྲིག་འཛུགས་བཀའ་ཤག་གིས་སྤྱི་བསྒྲགས་ཀྱི་ལམ་ནས་ཐེར་འདོན་བྱ་རྒྱུ་དང་།
༣། དཔལ་ལྡན་བཀའ་ཤག་ནས་བླ་སྤྲུལ་དེ་རིགས་ཀྱི་ཡང་སྲིད་མ་འོངས་པར་ཡོང་ཆོག་མིན། བོད་མི་མང་གིས་བླ་སྤྲུལ་གྱི་མཚན་གནས་སྤྲོད་དགོས་མིན་སོགས་སྐབས་བབ་ལ་གཞིགས་ཏེ་ཐག་གཅོད་གསལ་བསྒྲགས་ནན་པོ་རྒྱ་ཁྱབ་ཏུ་གནང་དགོས་སོ།། །།
༢༠༢༥ ཟླ་ ༧ ཚེས་ ༢༥ ནས་འགོ་བཙུགས་ཏེ་གུང་གསེང་གི་སྐབས་དང་བསྟུན་བྲིས་པ་དགེའོ།།
