དེ་རིང་ཉིན་རྒྱབ་བྱེས་ཀྱི་གདན་ས་བཀྲ་ཤིས་འཁྱིལ་དགོན་པར་རིགས་གྲྭ་རིག་པའི་རལ་གྲི་སྐུ་ཕྲེང་བཞི་པ་རྗེ་སྐལ་བཟང་བསྟན་པ་རབ་རྒྱས་མཆོག་དགུང་གྲངས་བརྒྱའི་སྟེང་སྐུ་ཞི་བར་གཤེགས་ཡོད་པའི་གནས་ཚུལ་ཐོན།
དེ་རིང་ཉིན་རྒྱབ་ཆུ་ཚོད་ ༢ ཙམ་ལ་རྒྱ་གར་བྱང་ཕྱོགས་ལྡེ་ར་རྡུན་དུ་རྟེན་གཞི་བྱས་པའི་བཀྲ་ཤིས་འཁྱིལ་དགོན་པར་རིགས་གྲྭ་རིག་པའི་རལ་གྲི་རྗེ་སྐལ་བཟང་བསྟན་པ་རབ་རྒྱས་མཆོག་དགུང་གྲངས་བརྒྱའི་སྟེང་སྐུ་ཞི་བར་གཤེགས་ཡོད་པའི་གནས་ཚུལ་ཐོན། འདི་ལོའི་ཕྱི་ཟླ་ ༣ ཚེས་ ༤ ཉིན་བྱེས་ཀྱི་གདན་ས་ཆེན་པོ་བཀྲ་ཤིས་འཁྱིལ་དུ་རྗེ་སྐལ་བཟང་བསྟན་པ་རབ་རྒྱས་མཆོག་དགུང་གྲངས་བརྒྱ་ལ་ཕེབས་པའི་བརྒྱ་སྟོན་མཛད་སྒོ་འཚོགས་གནང་བ་དང་བསྟུན། བླ་བྲང་བཀྲ་ཤིས་འཁྱིལ་གྱི་ལྷ་སྡེ་མི་སྡེ་ཡོངས་ནས་བླ་མ་མཆོད་པའི་ཆོ་གའི་སྒོ་ནས་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་ཡོད།
བླ་བྲང་བཀྲ་ཤིས་འཁྱིལ་དུ་༧ཀུན་མཁྱེན་ཆེན་པོ་འཇམ་དབྱངས་བཞད་པའི་རྡོ་རྗེ་མཆོག་གི་དབུས་པའི་གསེར་ཁྲི་རྣམ་པ་བཞི་དང་། མཁན་པོ་རྣམ་པ་བརྒྱད། གྲུབ་ཆེན་རྣམ་པ་བཞི་སོགས་བཞུགས་པའི་རིགས་སྨྲའི་ཁྱུ་མཆོག་རིགས་གྲྭ་རིག་པའི་རལ་གྲི་སྐུ་ཕྲེང་བཞི་བ་རྗེ་སྐལ་བཟང་བསྟན་པ་རབ་རྒྱས་མཆོག་ནི་ཕྱི་ལོ་༡༩༢༦ ལོར་བླ་བྲང་བཀྲ་ཤིས་འཁྱིལ་གྱི་ལྷ་སྡེ་ནང་མ་ཁོ་ཚེ་རུ་ཡབ་རིན་ཆེན་དང་ཡུམ་ཀླུ་སྨན་གཉིས་ཀྱི་སྲས་སུ་སྐུ་འཁྲུངས། སྤྲུལ་སྐུར་ངོས་འཛིན་མ་གནང་བའི་གོང་དུ་མཚན་ལ་རྟ་མགྲིན་སྐྱབས་ཞུ་ཡི་ཡོད་ཅིང་། ཁོང་ཚང་ལ་བུ་སྤུན་ཆེ་བ་བློ་བཟང་དང་འབྲིང་བ་གཅོད་པ་བཅས་ཡོད་འདུག ཕྱི་ལོ་ ༡༩༣༤ ལོར་ཁོང་དགུང་ལོ་བརྒྱད་ཀྱི་སྟེང་ནས་ཀུན་མཁྱེན་སྐུ་ཕྲེང་ལྔ་པ་བསྟན་པའི་རྒྱལ་མཚན་མཆོག་གིས་རིགས་གྲྭ་སྐུ་གོང་མ་འཇམ་དབྱངས་བསྟན་འཛིན་རྒྱ་མཚོ་མཆོག་གི་ཡང་སྲིད་དུ་ངོས་འཛིན་གནང་རྗེས། བླ་བྲང་བཀྲ་ཤིས་འཁྱིལ་དུ་གདན་འདྲེན་བགྱིས་ཏེ་ཁྲི་འདོན་གནང་།
དེ་ནས་རིམ་བཞིན་ཨ་ལགས་ཡོངས་སྐུ་གོང་མ་ཚང་དབུས་པའི་དགེ་བའི་བཤེས་གཉེན་དུ་མར་བསྟེན་ནས་ཐོས་བསམ་སྒོམ་གསུམ་གྱི་བསླབ་པ་སློབ་གཉེར་དབུ་ཚུགས། དགུང་ལོ་ཆུང་དུས་ནས་སློབ་གཉེར་གྱི་བརྒྱུད་རིམ་ཁྲོད་དུ་རི་མོ་འབྲི་རྒྱུར་ཐུགས་སྣང་ཡོད་ཅིང་གྲུབ་ཆེན་ཉི་མ་འཛིན་དང་རྗེ་བཙུན་མི་ལ་རས་པ་སོགས་ཀྱི་སྐུ་ཐང་བྲིས་གནང་མྱོང་། བླ་བྲང་དུ་གུང་ཐང་འཇམ་པའི་དབྱངས་དང་བརྒྱ་སྟོན་ལྷ་རམས་པ། ཨ་ལགས་བྲག་དཀར་ཚང་སོགས་དུས་མཉམ་དུ་འཛིན་གྲྭར་བཞུགས་ཏེ། ཁ་དོག་དཀར་དམར་ནས་དབུ་ཚུགས་ཏེ་གཞུང་ཆེན་ཁག་ལ་རིམ་བཞིན་སློབ་གཉེར་མཛད་ཅིང་། ཕྱིས་སུ་ཀུན་མཁྱེན་རིན་པོ་ཆེའི་བཀའ་དགོངས་འོག་ནས་ཙ་ཡས་དགའ་ལྡན་ཆོས་འཁོར་གླིང་དང་དམུ་དགེ་བཀྲ་ཤིས་འཁོར་ལོ་དགོན། ཤིས་ཚང་སྒར་གསར་སོགས་ཀྱི་ཁྲི་པར་ཕེབས་ཏེ་བསྟན་འགྲོའི་དོན་རྒྱ་ཆེར་མཛད།
ཕྱི་ལོ་ ༡༩༥༦ ལོར་རྒྱ་གར་དུ་ཕེབས་ཏེ་ཐོག་ཀ་ལིམ་པོང་དུ་ཕེབས་འབྱོར་བྱུང་རྗེས། རྒྱ་གར་འཕགས་ཡུལ་གྱི་གནས་མཆོག་རྡོ་རྗེ་གདན་དང་ཝཱརཱཎསཱི། ཡངས་པ་ཅན་དང་མཚོ་པདྨ་སོགས་ནང་པའི་གནས་ཆེན་ཁག་ལ་གནས་གཟིགས་མཛད་གྲུབ་མཚམས་རི་ཁྲོད་དུ་ཕེབས། ཕྱིས་སུ་རྡེ་ར་ལྡུན་དོན་འགྲུབ་གླིང་དུ་ཕེབས་ནས་ཐང་བྲིས་རྟེན་བཞེངས་སོགས་ཀྱི་མཛད་འཕྲིན་བསྐྱངས་གནང་བ་མ་ཟད། བྱེས་ཀྱི་བཀྲ་འཁྱིལ་དགོན་པ་བཞེངས་བསྐྲུན་གྱི་ཕྱག་ལས་རྒྱ་ཆེར་མཛད་ཡོད་ཅིང་། དམིགས་བསལ་༧གོང་ས་རྒྱལ་བ་རིན་པོ་ཆེ་མཆོག་ལ་རང་ནུས་ཅི་ལྕོགས་ཀྱིས་དབུ་འོག་དཔུང་འདེགས་ཞུས་ཏེ། བོད་ཀྱི་ཆོས་རིག་གང་ཐད་ལ་དངོས་ཤུགས་བརྒྱུད་གསུམ་ནས་ཞབས་འདེགས་གང་མང་ཞུས་མྱོང་ཞིང་། ལྷག་པར་དུ་ཐང་བྲིས་སྒྱུ་རྩལ་ཐོག་མཛད་རྗེས་བླ་མེད་བཞག་ཅིང་བོད་ཕྱི་ནང་གཉིས་སུ་ཐང་བྲིས་སྒྱུ་རྩལ་གྱི་རྒྱུན་འཛིན་སློབ་མ་བསྐྱངས་གནང་། མདོར་ན་རིགས་གྲྭ་རིག་པའི་རལ་གྲི་རྗེ་སྐལ་བཟང་བསྟན་པ་རབ་རྒྱས་མཆོག་གིས་བོད་དུ་གཞུང་ཆེན་ཁག་ལ་སློབ་གཉེར་བགྱིས་ཏེ་བསྟན་འགྲོའི་དོན་དུ་མཛད་འཕྲིན་བསྐྱངས་པ་དང་བཙན་བྱོལ་དུ་སྐུ་ཚེ་ཧྲིལ་པོ་ཆེས་དཀྱུས་མར་སྙེག་སྟེ་༧གོང་ས་མཆོག་གི་དབུ་འོག་དཔུང་འདེགས་ཞུས་ཏེ་བཀྲ་ཤིས་འཁྱིལ་དང་འབྲས་སྤུངས་སྒོ་མང་སོགས་སུ་མཛད་འཕྲིན་བསམ་གྱིས་མི་ཁྱབ་པ་བསྐྱངས་གནང་ཡོད་འདུག
གསར་འགོད་པ། སྐལ་བཟང་སྦྱིན་པ།
