དེ་རིང་བོད་མིའི་སྒྲིག་འཛུགས་ནས་དཔལ་འབྱོར་བཀའ་ཟུར་ཚེ་རིང་དོན་གྲུབ་མཆོག་གི་ཆེད་དུ་མཆོད་འབུལ་སྨོན་ལམ་འཚོགས་པ་དང་སྦྲགས་མྱ་ངན་གུས་འདུད་མཚོན་སླད་བོད་མིའི་སྒྲིག་ཉིན་ཕྱེད་རིང་ལས་མཚམས་བཞག་སོང་།
བོད་ཀྱི་དུས་བབ་གསར་ཁང་གི་པར། ༢༠༢༥།༩།༨
ཟླ་འདིའི་ཕྱི་ཚེས་ ༧ ཉིན་དཔལ་འབྱོར་བཀའ་ཟུར་ཚེ་རིང་དོན་གྲུབ་མཆོག་སྙུང་གཞིའི་རྐྱེན་གྱིས་དྷ་རམ་ས་ལའི་རང་ཁྱིམ་དུ་འདས་གྲོངས་སུ་ཕྱིན་པ་ལྟར། དེ་རིང་ཕྱི་ཚེས་ ༨ ཀྱི་ཉིན་རྒྱབ་ཆུ་ཚོད་ ༢ སྟེང་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། བོད་མིའི་སྒྲིག་འཛུགས་ནས་བཀའ་ཟུར་མཆོག་གི་ཆེད་དུ་མཆོད་འབུལ་སྨོན་ལམ་འཚོགས་ཏེ། དམ་པ་ཁོང་ལ་མྱ་ངན་གུས་འདུད་མཚོན་སླད་བོད་མིའི་སྒྲིག་འཛུགས་ཉིན་ཕྱེད་རིང་ལས་མཚམས་བཞག་སོང་།
བཀའ་ཟུར་ཚེ་རིང་དོན་གྲུབ་མཆོག་ནི་རྒྱ་ནག་གིས་བོད་ལ་བཙན་བཟུང་བྱས་པའི་ཕྱི་ལོ་སྟེ། ཁོང་གི་ཕ་མ་གཉིས་རྒྱ་གར་ནང་སྐྱབས་བཅོལ་དུ་འབྱོར་རྗེས་ཕྱི་ལོ་ ༡༩༦༠ ལོར་སྐྱེས་ཤིང་། ཁོང་གིས་མ་སུ་རི་བོད་ཁྱིམ་དང་མ་སུ་རི་གཏན་སློབ་གཉིས་ནང་ཕྱི་ལོ་ ༡༩༨༡ བར་སློབ་གཉེར་བྱས། ཕྱི་ལོ་ ༡༩༨༣ ལོར་པན་ཇབ་གཙུག་ལག་སློབ་ཆེན་དུ་དཔལ་འབྱོར་རིག་པའི་ཐོག་ཉེ་བའི་གཙུག་ལག་རབ་འབྱམས་པ་ཐོན། སྐབས་དེར་ཁོང་ཅན་དྷི་གྷར་དུ་བོད་མིའི་རང་དབང་ལས་འགུལ་གྱི་ཚོགས་གཙོ་ཡང་ཡིན་འདུག
ཕྱི་ལོ་ ༡༩༨༤ ཟླ་ ༡༢ ནང་དབུས་བོད་མིའི་སྒྲིག་འཛུགས་ཀྱི་རྩིས་ཞིབ་སྤྱི་ཁྱབ་ལས་ཁུངས་སུ་དྲུང་གཞོན་གྱི་ལས་གནས་ཐོག་འཛུལ་ཞུགས་བྱས་ཏེ་ཕྱི་ལོ་ ༡༩༩༡ ལོར་དྲུང་གཞོན་དུ་གནས་སྤར་གནང་བ་དང་། ཕྱི་ལོ་ ༡༩༩༣ ཟུང་དྲུང་གི་གནས་རིམ་དུ་བསྐོ་གཞག་བྱུང་བ་དང་ལྷན་དུ། ལོ་དེར་ཧི་མ་ཅལ་གཙུག་ལག་སློབ་གཉེར་ཁང་ནས་དཔལ་འབྱོར་རིག་པའི་ཐོག་གཙུག་ལག་རབ་འབྱམས་པ་ཐོན་ཡོད། ཕྱི་ལོ་ ༡༩༩༣ ལོའི་སྟོན་ཁར་ཨ་རིའི་མངའ་སྡེ་མོན་ཊ་ནའི་གཙུག་ལག་སློབ་གཉེར་ཁང་དུ་སློབ་སྦྱོང་བྱེད་པའི་སློབ་ཡོན་ཐོབ་སྟེ་ལོ་གཅིག་རིང་ཚོང་ལས་འཛིན་སྐྱོང་གི་སློབ་སྦྱོང་བྱས།
ཕྱི་ལོ་ ༡༩༩༤ ཟླ་ ༡༠ ནང་ཕྱིར་རྒྱ་གར་དུ་ཕེབས་ཏེ་དབུས་བོད་མིའི་སྒྲིག་འཛུགས་ཀྱི་སྤྱི་ཁྱབ་རྩིས་ཞིབ་ལས་ཁུངས་སུ་མུ་མཐུད་ཟུང་དྲུང་གནས་རིམ་ཐོག་ཕྱག་ལས་གནང་། ཕྱི་ལོ་ ༡༩༩༨ ཟླ་ ༤ ནང་སྤྱི་ཁྱབ་རྩིས་ཞིབ་ལས་ཁུངས་ཀྱི་དྲུང་འཕར་དུ་གནས་སྤར་གནང་། ཕྱི་ལོ་ ༢༠༠༠ ཟླ་ ༣ ནས་ལས་གནས་རང་ཐོག་ཤེས་རིག་ལས་ཁུངས་སུ་དྲུང་ཆེའི་ལས་འགན་བཞེས་ཏེ་ཕྱི་ལོ་ ༢༠༠༠ ཟླ་ ༧ ནང་དངོས་སུ་དྲུང་ཆེར་གནས་སྤར་གནང་ཡོད། ཕྱི་ལོ་ ༢༠༠༢ ཟླ་ ༤ ནས་ནང་སྲིད་ལས་ཁུངས་སུ་དྲུང་ཆེའི་ལས་འགན་བཞེས། ཕྱི་ལོ་ ༢༠༠༢ ཟླ་ ༤ ནས་ཕྱི་ལོ་ ༢༠༠༧ བར་ནང་སྲིད་ལས་ཁུངས་སུ་དྲུང་ཆེའི་ལས་འགན་བཞེས།
ཕྱི་ལོ་ ༢༠༠༧ ལོར་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེ་མཆོག་གི་སྐབས་བཅུ་གསུམ་པའི་བཀའ་ཤག་གིས་འདས་པོ་དམ་པ་ཁོང་དཔལ་འབྱོར་བཀའ་བློན་དུ་བསྐོ་གཞག་གནང་། ཕྱི་ལོ་ ༢༠༡༣ ལོར་སྲིད་ཟུར་བློ་བཟང་སེང་གེ་མཆོག་གི་བཀའ་ཤག་སྐབས་བཅུ་བཞི་པས། ཁོང་ཉིད་བསྐྱར་དུ་དཔལ་འབྱོར་བཀའ་བློན་དུ་བསྐོ་གཞག་གནང་།
གསར་འགོད་པ། སྐལ་བཟང་སྦྱིན་པ།
