བཙན་བྱོལ་བོད་མི་རྣམས་བོད་ནང་གཉེན་འཕྲད་དུ་ཕྱིན་སྐབས་རྒྱ་ནག་གི་དྲིལ་བསྒྲགས་རིགས་ཀྱི་བརྙན་ཐུང་སྤེལ་རྒྱུ་མེད་པའི་ལམ་སྟོན་གནང་།

བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས་ཕྱིའི་གསར་འགྱུར་བརྒྱུད་ལམ་ཁག་གིས་རྒྱ་ནག་གི་དྲིལ་བསྒྲགས་རིགས་སྤེལ་གྱི་མེད་པས་བཙན་བྱོལ་བོད་མི་བོད་ལ་གཉེན་འཕྲད་དུ་འགྲོ་མཁན་ཚོས་ཀྱང་དེ་རིགས་སྤེལ་རྒྱུ་མེད་པའི་ལམ་སྟོན་གནང་།

ཉེ་ལམ་ནས་བོད་ནང་གཉེན་འཕྲད་དུ་འགྲོ་མཁན་ཁག་ཅིག་གིས་ཞིང་འབྲོག་མང་ཚོགས་ཀྱི་སྡོད་ཁྱིམ་དང་སློབ་གྲྭ་སོགས་ཀྱི་ནང་ཕྱིན་ཏེ་བརྙན་ཐུང་སྣ་ཚོགས་བླངས་ནས་སྤྱི་ཚོགས་དྲ་ལམ་དུ་སྤེལ་རྐྱེན། བཙན་བྱོལ་སྤྱི་ཚོགས་ཁྲོད་རྙོག་གླེང་སྣ་ཚོགས་འབྱུང་བཞིན་ཡོད་པ་དང་། ཟླ་འདིའི་ཕྱི་ཚེས་ ༢ ཉིན་ཨ་རིའི་མངའ་སྡེ་མི་ནི་སོ་ཊར་བོད་ཀྱི་མང་གཙོ་ཉིན་མོ་དང་བསྟུན། བྱང་ཨ་རིའི་བོད་རིགས་སྤྱི་མཐུན་ཚོགས་པའི་ཚོགས་ཆེན་ཐེངས་ ༢༣ པ་མཇུག་སྒྲིལ་བའི་ཚོགས་འདུའི་ཐོག་བྱང་ཨ་རིའི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ལགས་ཀྱིས།  དེང་སང་བོད་ནང་གི་བོད་མི་ཚོའི་ཁོག་པའི་ནང་དུ་མེ་འབར་བཞིན་ཡོད་ཀྱང་། ཁ་ནང་ནས་དུ་བ་འདོན་མ་ཐུབ་པའི་ཛ་དྲག་གི་གནས་སྟངས་ཤིག་ཆགས་ཡོད། དེ་ཡང་རིག་གནས་གསར་བརྗེ་ལྟར་མངོན་སུམ་དོད་པོའི་ཐོག་ནས་གཏོར་བཅོམ་གསོད་གསུམ་བྱེད་བཞིན་མེད་ཀྱང་། ཕྱི་ལོ་ ༢༠༠༨ ནས་བཟུང་བོད་ནང་དམ་དྲག་བྱེད་བཞིན་པ་གསལ་བོ་རེད། དེའི་ཐོག་རྒྱལ་སྤྱིའི་རང་དབང་ཁང་པས་ལོ་བསྟུད་མར་རྒྱ་ནག་ནི་འཛམ་གླིང་ཐོག་རང་དབང་མེད་པའི་རྒྱལ་ཁབ་ཅིག་ཡིན་པའི་སྙན་ཐོ་བཏོན་ཡོད། ཉེ་ལམ་རྒྱ་ནག་གི་མགོ་ཁྲིད་ཞི་ཅིན་ཕིང་བོད་རང་སྐྱོང་ལྗོངས་ཟེར་བ་བཙུགས་ནས་ལོ་ ༦༥ འཁོར་བའི་མཛད་སྒོའི་ཐོག་ཡོང་དགོས་དོན་གྱིས་ག་རེ་མཚོན་གྱི་ཡོད་རེད་ཟེར་ན། རྒྱ་ནག་གཞུང་གིས་བོད་དེ་བཙན་བཟུང་བྱས་ཏེ་ལོ་ ༦༥ འགོར་བཞིན་ཡོད་ཀྱང་། ད་དུང་རྒྱ་ནག་གཞུང་ལ་གདེང་སྤོབས་མེད་པ་དང་། བོད་མི་ཚོའི་བློ་སེམས་རྒྱ་ནག་གཞུང་ལ་གཏད་ཀྱི་མེད་པ་གསལ་བོ་སྟོན་གྱི་ཡོད་པ་རེད། མཚམས་རེར་བོད་ནང་གི་གནས་སྟངས་གསལ་བོ་གོ་རྒྱུ་མེད་དུས། བོད་ཀྱི་གནད་དོན་ཡལ་འདུག་བསམ་གྱི་ཡོད་ཀྱང་། བོད་ཀྱི་གནད་དོན་རྩ་བ་ཉིད་ནས་ཡལ་ཡོད་པ་མ་རེད། ཐེངས་འདིར་རྒྱ་ནག་གི་གནད་ཡོད་མི་སྣ་བོད་ནང་བསླེབས་ཡོད་པ་བོད་ཀྱི་གནད་དོན་སེལ་ཐུབ་མེད་པ་གསལ་བོ་སྟོན་གྱི་ཡོད། དེ་ནི་རྒྱ་ནག་གིས་བོད་ཐོག་འཛིན་པའི་སྲིད་ཇུས་ཀྱི་ཐོག་འགྲོ་ཐུབ་ཀྱི་མེད་པས་གནས་སྟངས་ཤིག་རེད། ཅེས་བརྗོད་སོང་།

ཡང་ཁོང་གིས། བོད་ནང་གཉེན་འཕྲད་དུ་འགྲོ་མཁན་རྣམས་ལམ་ལུགས་ཤིག་ཐོག་ནས་འགྲོ་བཞིན་ཡོད་ཀྱང་།  དེ་དག་ལ་དཀའ་ངལ་མང་པོ་ཞིག་ཡོད་པའང་ཤེས་ཀྱི་ཡོད། ཚོགས་པ་ཁ་ཤས་བཙུགས་ཏེ་གནས་སྐོར་དང་། ཡུལ་སྐོར་སྤྲོ་འཆམ། ཤེས་ཡོན་བཅས་ཀྱི་མིང་ཐོག་ནས་བོད་ནང་དུ་འགྲོ་བཞིན་ཡོད་པར་བསམ་བློ་ངེས་པར་དུ་གཏོང་དགོས་ཀྱི་འདུག ང་ཚོས་རྒྱ་གཞུང་གིས་བོད་ནང་དུ་དམ་དྲག་བྱས་ཏེ་རང་དབང་མེད་པ་བཤད་ཀྱི་ཡོད་ཀྱང་། རྒྱ་ནག་འཐབ་ཕྱོགས་གཅིག་གྱུར་ཁང་གིས་བོད་མི་རྣམས་གཉེན་འཕྲད་དུ་འཁྲིད་པའི་དགོས་པ་ཤེས་རྒྱུ་ཧ་ཅང་གལ་ཆེན་པོ་རེད། དཔེར་ན་༧གོང་ས་མཆོག་གི་གྱ་སྟོན་སྐབས་སུ་རྒྱ་གར་གྱི་གསར་འགྱུར་བརྒྱུད་ལམ་གྱི་མི་སྣ་ཁག་ཅིག་བོད་ནང་དུ་འཁྲིད་དེ། བོད་ནང་དུ་ཡར་རྒྱས་ཆེན་པོ་ཕྱིན་ཡོད་པའི་སྐོར་ལ་དྲིལ་བསྒྲགས་བྱས་ཡོད། ད་ལོར་ཡང་རྒྱ་ནག་གཞུང་གིས་རྒྱ་གར་གྱི་གསར་ལམ་ཁག་དང་སྤྱི་ཚོགས་དྲ་ལམ་གཉེར་མཁན་མི་གྲངས་ ༡༠ བོད་དུ་འཁྲིད་ཡོད། ཡིན་ནའང་ཁོང་ཚོས་བོད་ནང་དུ་ཡར་རྒྱས་ཕྱིན་པའི་སྐོར་གནས་ཚུལ་གང་ཡང་སྤེལ་མེད། ཕྱི་རྒྱལ་གྱི་གསར་འགོད་པ་ཚོས་རྒྱ་ནག་གཞུང་གི་དྲིལ་བསྒྲགས་ཀྱི་གནས་ཚུལ་སྤེལ་གྱི་མེད་ཚེ། རྒྱ་ནག་འཐབ་ཕྱོགས་གཅིག་གྱུར་ཁང་གི་གོ་སྒྲིག་འོག་བོད་ནང་དུ་འགྲོ་མཁན་ཚོས་སྤྱི་ཚོགས་དྲ་ལམ་དུ་རྒྱ་ནག་གི་དྲིལ་བསྒྲགས་གནས་ཚུལ་སྤེལ་གྱི་ཡོད་པ་དོ་སྣང་བྱེད་དགོས་ཀྱི་འདུག ང་ཚོས་བོད་ནང་གི་གནས་སྟངས་ཛ་དྲག་ཆགས་པར་བཤད་ཀྱི་ཡོད་ཀྱང་། རྒྱ་ནག་འཐབ་ཕྱོགས་གཅིག་གྱུར་ཁང་གི་གོ་སྒྲིག་འོག་བོད་དུ་འགྲོ་མཁན་ཚོས་བསམ་ཤེས་བྱ་དགོས་པ་ཞིག་རེད། བོད་ཀྱི་རྩ་དོན་ལ་གནོད་ཀྱི་ཡོད་མེད་བསམ་བློ་གཏོང་དགོས། ལས་གཞི་འདིའི་རིགས་ལ་རྒྱལ་སྤྱིའི་བདེ་འཇགས་ཐོག་ནས་ལྟ་སྟངས་མང་པོ་ཞིག་ཡོང་གི་ཡོད། ཅེས་བརྗོད་སོང་།

ཕྱི་ལོ་ ༢༠༢༤ ཟླ་ ༩ ཚེས་ ༩ ཉིན་བོད་མིའི་སྒྲིག་འཛུགས་ཀྱིས་བཙན་བྱོལ་བོད་མི་རྣམས་བོད་ནང་བསྐྱོད་ཕྱོགས་ཐད་ལམ་སྟོན་དོན་ཚན་བདུན་གནང་ཡོད་པའི་ནང་། ༡། བོད་མིའི་སྒྲིག་འཛུགས་ཀྱི་མཛད་གཙོ་དང༌། ལས་ཁུངས་མ་ལག་གི་ལས་བྱེད་པ་ལས་ཐོག་རྣམས་དང་། ལས་འགན་འཁྱུར་བ་རྣམས་བདེ་སྲུང་ལས་ཁུངས་ལ་སྙན་གསན་མ་ཞུས་པར་བོད་ནང་བསྐྱོད་ཐལ་མེད་པ་དགོས་རྒྱུ།                  ༢། བོད་མི་སྒེར་པ་སུ་ཡིན་རུང་བོད་དང་རྒྱ་ནག་ཏུ་བསྐྱོད་པར་བོད་མིའི་སྒྲིག་འཛུགས་ནས་དགག་ཆ་མེད་ནའང་། རང་རང་གནས་ཡུལ་གྱི་སྐུ་ཚབ་དོན་གཅོད་དམ་ས་གནས་འགོ་འཛིན་ལ་ངོ་ཐུག་གམ། གློག་འཕྲིན་ནམ་ཁ་པར་བརྒྱུད་ཕྱོགས་བསྐྱོད་འཆར་གཞི་སྙན་གསན་ཞུ་དགོས་པ་དང་། སྐུ་ཚབ་དོན་གཅོད་དམ་ས་གནས་འགོ་འཛིན་ལ་ཞུ་སྟབས་འགྲིག་མིན་བྱུང་ཚེ། ཐད་ཀར་བདེ་སྲུང་ལས་ཁུངས་ལ་སྙན་གསན་ཞུ་འཐུས། སྙན་གསན་མེད་རིགས་ལ་བོད་མིའི་སྒྲིག་འཛུགས་ནས་ངོས་སྦྱོར་རྒྱབ་གཉེར་དང་མཐུན་འགྱུར་རོགས་རམ་སྦྱོར་སྤྲོད་མི་བྱེད།

༣། རྒྱ་ནག་གཞུང་ནས་བོད་ནང་བསྐྱོད་རྒྱུའི་ཐོངས་མཆན་སྤྲོད་སྐབས་ཆ་རྐྱེན་སྣ་ཚོགས་འཇོག་བཞིན་པ་དང་། ལྷག་པར་དེང་སྐབས་རྒྱ་གཞུང་གི་བཀོད་བྱུས་འོག་མི་ཉུང་ཤས་ལ་བོད་རིགས་སམ་བོད་འབྲེལ་གྱི་མིང་ཐོག་ནས་ཚོགས་པ་བཟོ་རུ་བཅུག་སྟེ། ཚོགས་པ་དེ་རིགས་ཀྱི་རྒྱབ་གཉེར་མེད་པར་ཐོངས་མཆན་མི་སྤྲོད་པའམ། ཚོགས་པ་འདྲ་མིན་གྱི་མིང་ཐོག་ནས་བོད་དུ་གནས་སྐོར་དང་། ལྟ་སྐོར། མཁས་པའི་འགྲུལ་བཞུད་ཟེར་བ་སོགས་གོ་སྒྲིག་བྱེད་བཞིན་པ་དེ་དག་ནི་ཕ་རོལ་པོའི་ཆབ་སྲིད་ཀྱི་དགོས་མཁོར་དམིགས་པའི་ངན་བྱུས་ཡིན་ངེས་ལ་སོང་། ཚོགས་པ་དེ་དག་ནང་མཉམ་ཞུགས་སམ། དེ་རིགས་ཀྱི་བསླུ་བྲིད་འོག་མ་ཚུད་པ་དགོས་གལ།                    ༤། རྒྱ་གཞུང་གི་བསླུ་བྲིད་འོག་ནས་བོད་ནང་སྐྱོད་མཁན་རྣམས་མཐའ་གཅིག་ཏུ་བོད་ཀྱི་རྩ་དོན་ལངས་ཕྱོགས་དོར་ཟིན་པར་ཁ་ཚོན་གཅོད་མི་ནུས་ནའང་། བོད་ནས་ཚུར་འཁོར་རྗེས་རྒྱ་གཞུང་གི་སྲིད་ཇུས་ལངས་ཕྱོགས་བརྒྱུད་བསྒྲགས་དང་། བོད་མིའི་ཁེ་ཕན་ལ་གནོད་པའི་ལས་ཀ་བྱེད་མཁན་བྱུང་ན། བོད་མི་རིགས་དང་། བོད་མིའི་སྒྲིག་འཛུགས་ལ་རྒྱབ་གཏོད་བྱས་པར་ངོས་འཛིན་བྱེད་དགོས་པ་ཡིན་པས། དེ་རིགས་གང་ན་སུ་ཡོད་ལ་བོད་མི་ཚང་མས་སྐབས་མཚམས་འབྲེལ་ཡོད་ལ་གནས་ཚུལ་སྙན་གསན་དང་། ཐེར་འདོན་གདོང་ལེན་དགོས་གལ།

༥། རྒྱ་གཞུང་གིས་བོད་ནང་སྐྱོད་མཁན་སྒེར་སོ་སོར་མཉམ་ལས་མཉམ་འབྲེལ་དང་། མུ་མཐུད་འབྲེལ་འཇོག་དགོས་ལུགས་སོགས་དངུལ་དངོས་ཀྱི་བསླུ་བྲིད་དང་། དབང་ཤེད་དང་། སྡིགས་བསྐུལ། ཐ་ཚིག་སྒྲོག་པ་སོགས་ཀྱི་སྒོ་ནས་ཁས་ལེན་འདྲ་མིན་བྱེད་དུ་འཇུག་རྒྱུའི་གཡོ་བྱུས་འོག་ཏུ་མ་ཚུད་པར་རང་ཚུགས་བརྟན་པོར་འཛིན་དགོས་རྒྱུ་གལ་ཆེན་ཡིན་པས། བོད་ནང་ཐོན་བསྐྱོད་མ་བྱས་གོང་དུ་འབྲེལ་ཡོད་ནས་ལམ་སྟོན་ལེན་ཐབས་བྱེད་དགོས་ཤིང་། ཕྱི་རྒྱལ་ཡུལ་གྲུ་ཁག་ཏུ་གནས་སྡོད་རང་རིགས་རྣམས་ཀྱིས་གནས་ཚུལ་དེ་རིགས་སྔོན་འགོག་སླད། རྒྱ་ནག་ཏུ་བཅའ་སྡོད་སོ་སོའི་གཞུང་ཚབ་ལ་འབྲེལ་གཏུག་གི་ཁ་པར་ཨང་གྲངས་སོགས་སྔོན་ཚུད་གྲ་སྒྲིག་ཨང་གསར་དགོས་གལ།   ༦། རྒྱ་གཞུང་གི་བསླུ་བྲིད་ཀྱི་ཆ་རྐྱེན་ལ་ཁས་ལེན་བྱེད་ཐལ་ཤོར་ཚེ། གནས་ཡུལ་རྒྱལ་ཁབ་ལ་ཕྱིར་འཁོར་རྗེས་བསུན་པོ་དང་གནོན་ཤུགས་འདྲ་མིན་སྤྲད་རྒྱུའི་ལམ་ཁ་བཤངས་པ་ལྟ་བུ་ཡིན་སྟབས། དེ་འདྲའི་དཀའ་ངལ་ཇི་བྱུང་སྐབས་མཚམས་སོ་སོར་བདེ་སྲུང་ལས་ཁུངས་ལ་སྙན་གསན་ཞུས་ཏེ་རྒྱ་གཞུང་གི་རྒྱ་རྙི་ལས་ཐར་ཐབས་བྱེད་དགོས། འོལ་ཚོད་བྱས་ནས་བསྡད་པའམ་ཡང་ན་ལྐོག་འབྲེལ་བྱས་ན། འབྱུང་འགྱུར་རང་ཉིད་ལ་གནས་ཡུལ་རྒྱལ་ཁབ་ཀྱི་ཁྲིམས་ཐོག་ནས་དཀའ་ངལ་ཅི་རིགས་འཕྲད་སྲིད།

༧། དེང་སང་རྒྱ་གཞུང་གིས་བཙན་བྱོལ་བོད་མི་ཚོར་རྩ་དོན་ལས་འགུལ་དང་ཆབ་སྲིད་ལས་འགུལ་ནང་མཉམ་ཞུགས་མི་ཆོག་པ་དང༌། རྒྱ་གཞུང་ལ་མཉམ་འབྲེལ་དང་མཐུན་འགྱུར་དགོས་ལུགས་རྒྱལ་མཚམས་བརྒལ་ནས་གནོན་ཤུགས་སྤྲོད་བཞིན་པ་དེ་ནི་རྒྱལ་སྤྱིའི་ཁྲིམས་ལུགས་དང་འགལ་གྱི་ཡོད་སྟབས། དེ་ལྟའི་གནོན་ཤུགས་ཡོང་སྐབས་གསར་འགྱུར་བརྒྱུད་ལམ་ཁག་ཏུ་བློ་སྤོབས་ཆེན་པོས་དཔང་རྟགས་དང་བཅས་ཡོངས་བསྒྲགས་བྱེད་ཐུབ་ན་རབ་དང་། དེ་མིན་སོ་སོའི་གནས་ཡུལ་གཞུང་ངམ། སྐུ་ཚབ་དོན་གཅོད། ས་གནས་འགོ་འཛིན། བདེ་སྲུང་ལས་ཁུངས་བཅས་གང་རུང་ལ་གནས་ཚུལ་ཁུངས་འཕེར་འདོན་སྤྲོད་བྱེད་གལ་ཆེ་བ། ཞེས་བཀོད་འདུག

གསར་འགོད་པ། བྱམས་པ་ཚེ་རིང་། རྩོམ་སྒྲིག་པ། པདྨ་མཚོ།