བོད་གཞིས་ཀ་རྩེ་རུ་ཚོན་ལྡན་ཤོག་སྦག་ཕོན་ཆེན་སྤར་ཏེ་བོད་མཐོ་སྒང་གི་ཁོར་ཡུག་དང་སེམས་ཅན་ལ་གནོད་སྐྱོན་བཟོས་བར་མི་མང་གིས་སྐྱོན་བརྗོད་ཤུགས་ཆེན་བྱས་རྐྱེན་དགོངས་སེལ་ཞུས་འདུག
ཟླ་འདིའི་ཕྱི་ཚེས་ ༡༩ ཉིན་གྱི་ཕྱི་དྲོར་བོད་རྒྱལ་རྩེ་རྫོང་ར་ལུང་གྲོང་སྡེའི་རི་ངོས་ཤིག་ཏུ། སྒྱུ་རྩལ་དང་རང་བྱུང་ཁོར་ཡུག་གི་དུས་སྟོན་ཟེར་བའི་མིང་ཐོག་ནས་རྒྱ་རིགས་སྒྱུ་རྩལ་བ་ཚའེ་གོ་ཆང་ (Cai Guo-qiang)ཟེར་བ་ཞིག་དང་། ཁེ་ན་ཌའི་གྱོན་ཆས་བཟོ་ཚོང་ཁང་ (Arc’teryx)གཉིས་མཉམ་འབྲེལ་ཐོག་འབྲུག་གི་དབྱིབས་སུ་ཚོན་མདངས་སྣ་ལྔའི་ཤོག་སྦག་ཕོན་ཆེན་སྤར་ཡོད་པར་བརྟེན། བོད་ནང་དང་རྒྱ་ནག་ནང་ལོགས་སོགས་ནས་མི་མང་གིས་སྲོག་རླུང་ཉུང་བའི་བོད་མཐོ་སྒང་གི་ཁོར་ཡུག་ལ་གསོ་ཐབས་བྲལ་བའི་གནོད་སྐྱོན་འབག་བཙོག་བཟོས་བ་དང་། རི་སྐྱེས་སེམས་ཅན་གྱི་འཚོ་གནས་ལ་གནོད་པ་བཟོས་པའི་སྐྱོན་བརྗོད་ཤུགས་ཆེན་བྱེད་ཀྱི་འདུག་ལ། ས་གནས་གཞུང་གིས་གནད་དོན་དེར་ཞིབ་འཇུག་བྱེད་བཞིན་ཡོད་སྐོར་བརྗོད་ཡོད་འདུག
ཤོག་སྦག་སྤར་བའི་ཡུལ་དངོས་ཐད་གཏོང་བྱས་ཏེ་ཚའེ་གོ་ཆང་གིས། ཡུལ་དངོས་ཐད་གཏོང་ལ་ལྟ་མཁན་ཚོས་ཧ་ལས་པ་རེད་ཅེས་འཕྲིན་ཐུང་བར་མེད་དུ་བཏང་ནས་ངས་བཤད་དགོས་པའི་སྐད་ཆ་འགག་སོང་། འཁྲབ་སྟོན་གསར་པ་འདི་ངོ་སྤྲོད་ཅིག་བྱས་ན། སྤྱིར་བཏང་ངས་ཆུའི་ནང་དུ་དུ་བའི་རི་མོ་འདི་འབྲི་ཡི་ཡོད་པས་ཐོག་མར་ཆུའི་འོག་ཏུ་ཕྱིན་ནས་ནམ་ཁར་མཛེས་སྡུག་ལྡན་པའི་ངང་འཕྱུར་གྱི་ཡོད། ཅེས་དང་། ས་གནས་འབྲོག་མང་གི་མཉམ་འབྲེལ་དང་། སྤྱང་གྲུང་ལྡན་པའི་སེམས་ཅན་རྣམས་ཀྱི་རོགས་འདེགས་ལ་བརྟེན་ནས་ཤོག་སྦག་གི་རྒྱུད་སྐུད་ལ་འགོག་རྐྱེན་མེད་པར་འགྲོ་ཐུབ་སོང་བས་བཀའ་དྲིན་ཆེ་ཞུ་ཞེས་དང་། ཡུལ་དངོས་སུ་ཡོད་པ་རྣམས་ཀྱིས་ང་དང་མཉམ་དུ་ངའི་གཞོན་དུས་ཀྱི་རྨི་ལམ་མངོན་འགྱུར་བྱུང་དུ་བཅུག་པར་བཀའ་དྲིན་ཆེ། འགྲོ་བ་མིའི་རིགས་ཀྱིས་ལོ་རྒྱུས་ལ་ཁ་ལོ་བསྒྱུར་བཞིན་པའི་དུས་སྐབས་འདིར་མཁའ་ལམ་སྙེག་པའི་ཤོག་སྦག་གི་གསེར་འབྲུག་འདིས། འཛམ་གླིང་ལ་སྟོབས་ཤུགས་དང་སྨོན་འདུན། རེ་བ་བཅས་བསྐྲུན་ཐུབ་པའི་རེ་བ་ཡོད་སྐོར་དང་། ད་ལན་གྱི་འགྲེམས་སྟོན་དེས་མ་འོངས་པར་མུ་མཐུད་ནས་འགྲེམས་སྟོན་འདི་རིགས་བྱེད་པར་བློ་སྤོབས་བརྙེད་ཡོད་སྐོར་དང་། ཤོག་སྦག་འགྲེམས་སྟོན་ལ་རྒྱལ་རྩེ་རྫོང་གི་མགོ་འཁྲིད་དང་ཉེན་རྟོག་ཁང་། མེ་འགོག་ལས་ཁུངས། འཕྲོད་བསྟེན་ལས་ཁུངས། གློག་འདོན་ལས་ཁུངས། དྲིལ་བསྒྲགས་ལས་ཁུངས་སོགས་ཀྱིས་དུས་ཐུང་ནང་ལས་དོན་ལམ་ལྷོངས་ཡོང་བར་རྒྱབ་སྐྱོར་བྱས་པར་བཀའ་དྲིན་ཆེ་སྐོར་བརྗོད་འདུག
ཁེ་ན་ཌར་ཡོད་པའི་གྱོན་ཆས་བཟོ་ཚོང་ཁང་ (Arc’teryx) ཞེས་པ་དེས་སྤྱི་ཚོགས་དྲ་ལམ་བརྒྱུད་དགོངས་སེལ་གྱི་ཡི་གེ་ཞིག་སྤེལ་བའི་ནང་། བོད་ཀྱི་ཧི་མ་ལ་ཡའི་ས་ཁུལ་དུ་ཤོག་སྦག་སྤར་ཏེ། བོད་ཀྱི་རང་བྱུང་ཁོར་ཡུག་དང་སྐྱེ་ཁམས་ལ་ཤུགས་རྐྱེན་ངན་པ་ཐེབས་སྲིད་པའི་གནད་དོན་དང་འབྲེལ་ནས་དགོངས་དག་ཞུ་རྒྱུ་ཡིན་ལ། རྒྱ་རིགས་སྒྱུ་རྩལ་བ་ཚའེ་ཟེར་བས་གནད་དོན་དེ་དང་འབྲེལ་ནས་དགོངས་དག་ཞུས་པ་དང་། ཁོང་གིས་འགན་འཁུར་བླངས་པའི་ཐོག་ནས་ད་ལྟའི་ཆར་ཤོག་སྦག་སྤར་བའི་རྐྱེན་གྱིས་ཁོར་ཡུག་ལ་དོ་ཕོག་བྱུང་བ་རྣམས་བསྐྱར་གསོ་བྱ་རྒྱུ་ཡིན་ཚུལ་བརྗོད་འདུག དགོངས་སེལ་ཡི་གེའི་འོག་ཏུ་མི་མང་གིས་དཔྱད་མཆན་བཀོད་འདུག་ལ། མང་པོ་ཞིག་གིས་ཡིག་ཆུང་གཅིག་གིས་གུ་ཡངས་དང་དགོངས་པ་དག་པའི་གནས་སྟངས་ཤིག་མ་རེད། ཅེས་དང་། དུས་ཡུན་རིང་པོར་ཁོར་ཡུག་ལ་གནོད་སྐྱོན་ཐེབས་ངེས་ཡིན་པས། རང་བྱུང་ཁོར་ཡུག་ལ་དོ་ཕོག་དང་ཉམས་ཉེས་བྱུང་བར་འགན་འཁུར་དགོས་པའི་སྐུལ་མ་བཏང་འདུག་ལ། ས་གནས་མི་མང་གིས་ཤོག་སྦག་སྤར་ཤུལ་གྱི་རྫས་ངན་འབག་བཙོག་རིགས་གཙང་བཟོ་བྱེད་ཀྱི་ཡོད་པའི་བརྙན་ཐུང་དེ་འདྲ་མཐོང་རྒྱུ་འདུག
ཕྱི་ནང་གི་ཁོར་ཡུག་ཉམས་ཞིབ་པ་མང་པོས་ད་ལྟ་བོད་མཐོ་སྒང་གི་ས་བབ་ཆགས་ཡུལ་དང་ཁོར་ཡུག་གི་གནས་སྟངས་འདི་ཉག་ཕྲ་ཞིང་གཉན་ཕྲང་ཅན་དུ་གྱུར་ཏེ་འཛམ་གླིང་གི་དཀའ་ཉེན་ཆེ་ཤོས་ཏུ་ངོས་འཛིན་བྱེད་ཀྱི་ཡོད་ཀྱང་། རྒྱ་ནག་གཞུང་གིས་དཔྱད་ཞིབ་གང་ཡང་མ་བྱས་པར་ཤོག་སྦག་གི་འགྲེམས་སྟོན་དེ་འདྲར་ཆོག་མཆན་སྤྲད་པ་ནི་བོད་མཐོ་སྒང་གི་ཁོར་ཡུག་ལ་འགན་རྩ་བ་ནས་འཁུར་གྱི་མེད་པའི་རྟགས་མཚན་གསལ་ཤོས་ཤིག་ཡིན་སྐོར་དང་། རྒྱ་ནག་གཞུང་གིས་བོད་ནང་གི་གཞི་རྩའི་འགྲོ་བ་མིའི་ཐོབ་ཐང་རྡོག་རོལ་དུ་གཏོང་གི་ཡོད་པ་མ་ཟད། ཆོས་དང་རིག་གཞུང་། ཁོར་ཡུག་བཅས་ལ་གཏོར་སྐྱོན་ཚབས་ཆེན་གཏོང་གི་ཡོད་པའི་སྐྱོན་བརྗོད་བྱེད་ཀྱི་འདུག
རྒྱ་ནག་ནང་གནས་སྡོད་བོད་ཀྱི་རྩོམ་པ་པོ་ཚེ་རིང་འོད་ཟེར་ལགས་ཀྱིས་སྒེར་གྱི་ངོ་དེབ་སྟེང་། རྒྱ་རིགས་སྒྱུ་རྩལ་བ་ཚའེ་ཡིས་ཁེ་ན་ཌའི་གྱོན་ཆས་བཟོ་ཚོང་ཁང་དང་མཉམ་འབྲེལ་གྱིས་བཟོ་སྐྲུན་བྱས་པའི་ཤོག་སྦག་ཕོན་ཆེན་དེའི་རྒྱུ་ཆ་རྣམས་རང་བཞིན་གྱིས་རུལ་སླ་བ་ཞིག་བཀོལ་སྤྱོད་བྱས་ཡོད་སྐོར་བརྗོད་ཡོད་ཀྱང་། གཉན་འཕྲང་ཆེ་བའི་བོད་ཀྱི་ས་བབ་ཀྱི་གནས་སྟངས་དང་ཁོར་ཡུག་གི་གནས་བབ་ཁྲོད་གཞི་རྒྱ་ཆེ་བའི་ཤོག་སྦག་སྦར་ཏེ་འཁྲབ་སྟོན་བྱས་པ་དེས་རང་བྱུང་ཁོར་ཡུག་གི་ལྷིང་འཇགས་དཀྲུག་པ་དང་། རི་དྭགས་སེམས་ཅན་རིགས་ལ་འཇིགས་སྣང་བསླངས་ཡོད་པ་མ་ཟད། རི་ལུང་འདར་འགུལ་དང་། རྫས་འགྱུར་གྱི་ལྷག་རོ་གང་སར་འཐོར་ནས་ཁོར་ཡུག་ལ་གནོད་སྐྱོན་ཆེན་པོ་བཟོས་ཡོད་སྐོར་བརྗོད་འདུག
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
