དབུས་བོད་མིའི་སྒྲིག་འཛུགས་ཀྱིས་རྒྱ་གར་གྱི་འཚེ་མེད་ཞི་བའི་དེད་དཔོན་བདག་ཉིད་ཆེན་པོ་གྷན་དྷི་མཆོག་གི་འཁྲུངས་སྐར་སྲུང་གཙི་གནང་སོང་།
དེ་རིང་སྔ་དྲོའི་ཆུ་ཚོད་ ༩།༣༠ ཐོག་བོད་མིའི་སྒྲིག་འཛུགས་ཀྱི་མདུན་ཐང་དུ། སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས་དབུས་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་རྣམ་པ་དང་ལྷན་ཁང་ཁག་གི་དྲུང་ཆེ་རྣམ་པ་སོགས་དང་། བཀའ་དྲུང་ཡིག་ཚང་གི་སྲི་ཞུའི་ལས་བྱེད་བཅས་འཛོམས་ཏེ། རྒྱ་གར་གྱི་རང་བཙན་འཐབ་རྩོད་པ་དང་རྒྱལ་ཁབ་ཀྱི་ཡབ་ཆེན་དམ་པ་གྷན་དྷི་མཆོག་གི་འཁྲུངས་སྐར་ཐེངས་ ༡༥༦ པ་སྲུང་གཙིའི་གཞུང་འབྲེལ་མཛད་སྒོ་ཞིག་འཚོགས་སོང་། སྐབས་དེར་སྲིད་ཚབ་མཆོག་གིས། ང་ཚོ་བདེན་པའི་འཐབ་རྩོད་བྱེད་མཁན་གྱི་རིགས་ཤིག་ཡིན་པས་གང་མགྱོགས་བདེན་པ་འཐོབ་རྒྱུའི་སྨོན་ལམ་རྒྱག་གི་ཡོད་སྐོར་གསུངས་སོང་།
དབུས་བོད་མིའི་སྒྲིག་འཛུགས་ཀྱི་སྲིད་ཚབ་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་གིས། དེ་རིང་རྒྱ་གར་འཕགས་པའི་ཡུལ་གྱི་ཡབ་ཆེན་མ་ཧ་ཌི་མཱ་གྷན་དྷི་མཆོག་གི་སྐུའི་འཁྲུངས་སྐར་རྒྱ་གར་རྒྱལ་ཡོངས་སུ་སྲུང་གཙི་གནང་བའི་དུས་འདིར། དེ་རིང་བོད་མིའི་སྒྲིག་འཛུགས་ཀྱི་ངོས་ནས་གྷན་དྷི་མཆོག་ལ་དྲན་གསོ་བྱེད་པ་དང་། རྒྱ་གར་མི་མང་ལ་མཉམ་ཞུགས་བྱས་ཏེ་གྷན་དྷི་མཆོག་གི་འཁྲུངས་སྐར་སྲུང་གཙི་ཞུ་བའི་ཉིན་མོ་ཞིག་ཆགས་ཀྱི་ཡོད། ང་ཚོས་མཁྱེན་གསལ་ལྟར། གྷན་དྷི་མཆོག་གི་དབུ་ཁྲིད་པའི་རྒྱ་གར་གྱི་རང་བཙན་འཐབ་རྩོད་འདི་འཛམ་བུ་གླིང་གི་ནང་ལ་འཚེ་མེད་ཞི་བའི་ཐོག་ནས་འཐབ་རྩོད་ངོ་མཚར་ཅན་ཞིག་དང་། དུས་ད་ལྟའང་རྒྱ་གར་གྱི་རང་བཙན་རྩོད་གླེང་བྱེད་ཕྱོགས་ཀྱི་དཔེ་མཚོན་བྱས་ནས་ (Satyagraha) བདེན་པའི་ཨུ་ཚུགས་ཀྱི་ཐོག་ནས་བདེན་པའི་དགེ་རྩ་འཐོབ་རྒྱུའི་ལམ་འདིའི་སྒང་ལ་འགྲོ་ཡི་ཡོད་པ་རེད། ཅེས་གསུངས་བྱུང་།
ཡང་སྲིད་ཚབ་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་ནས་ནོ་སྦེལ་ཞི་བདེའི་གཟེངས་རྟགས་ཞལ་བཞེས་མཛད་པའི་སྐབས་༧མགོན་པོ་གང་ཉིད་མཆོག་གིས། ང་ཚོ་བོད་པ་རྣམས་ཀྱིས་རྒྱ་གར་གྱི་ཆོས་དང་རིག་གཞུང་། ལྷག་པར་དུ་གྷན་དྷི་མཆོག་གི་འཐབ་རྩོད་ཀྱི་ལམ་དེ་འཚེ་མེད་ཞི་བའི་ཐོག་ནས་ཕེབས་རྒྱུའི་ལམ་འདིའི་ཐོག་ནས་བོད་རང་དབང་སླར་གསོ་ཡོང་རྒྱུའི་ལམ་དེ་ག་རང་ཐོག་ལ་འགྲོ་བཞིན་ཡོད་པ་རེད་ལ། འཛམ་གླིང་ནང་དུ་འཐབ་རྩོད་བྱེད་མཁན་མང་པོ་ཡོད་རེད་དེ། ༧རྒྱལ་བ་རིན་པོ་ཆེ་མཆོག་གི་ཐུགས་རྗེ་བཀའ་དྲིན་དང་༧མགོན་པོ་གང་ཉིད་ཀྱི་དགོངས་གཞི་ལ་བརྟེན་མཁན་ང་ཚོ་གཅིག་པོ་ཡིན་གྱི་རེད། སོ་སོའི་བཅའ་ཁྲིམས་ནང་དུ་དམག་འཐབ་སྤངས་ནས་རང་དབང་འཐབ་རྩོད་དེའང་འཚེ་མེད་ཞི་བའི་ཐོག་ནས་འགྲུབ་རྒྱུའི་མི་རིགས་ཤིག་དང་རྒྱལ་ཁབ་ཅིག་ཆགས་ཀྱི་ཡོད་པ་རེད། དེར་བརྟེན་ང་ཚོར་དམིགས་བསལ་གྱིས་འབྲེལ་བ་ཆེན་པོ་ཞིག་ཡོད་རེད། ང་ཚོ་བོད་པ་རྣམས་ཀྱིས་རྒྱ་གར་ལ་དགའ་ཞེན་ཆེན་པོ་ཡོད་པ་རེད། ཅེས་དང་། རྒྱ་གར་གྱི་རྒྱལ་ཁབ་འདི་སྟོབས་ཆེན་གྱི་རྒྱལ་ཁབ་ཅིག་དང་། འཛམ་གླིང་གིས་དཔེ་མཚོན་འཇོག་སའི་རྒྱལ་ཁབ་ཅིག་ཡོང་རྒྱུར་སྨོན་འདུན་ཞུ་ཡི་ཡོད། དེ་རིང་གི་ཉིན་མོ་འདིར་ང་ཚོའང་བདེན་པའི་འཐབ་རྩོད་བྱེད་མཁན་གྱི་མི་རིགས་ཤིག་ཡིན་པར་བརྟེན། ང་ཚོར་གང་མགྱོགས་དང་མྱུར་དུ་བདེན་པ་འཐོབ་རྒྱུའི་སྨོན་ལམ་རྒྱག་གི་ཡོད་ལ། རྒྱ་གར་ནང་ཉིན་མོ་འདི་སྲུང་གཙི་ཞུ་མཁན་རྣམས་ལ་འཚམས་འདྲི་ཞུ་ཡི་ཡོད། ཅེས་གསུངས་སོང་།
བདག་ཉིད་ཆེན་པོ་གྷན་དྷི་མཆོག་ནི་ཕྱི་ལོ ༡༨༦༩ ལོའི་ཟླ་བ་བཅུ་པའི་ཚེས་གཉིས་ཉིན་རྒྱ་གར་གྱི་གྲོང་ཁྱེར་ཕོར་བྷན་དྷར་(Porbandar) འཁྲུངས། ཕྱི་ལོ ༡༩༤༨ ལོའི་ཟླ་བ་དང་པོའི་ཚེས་སུམ་ཅུ་ཉིན་ལྡི་ལིར་སྐུ་གཤེགས། ཁོང་ནི་རྒྱ་གར་གྱི་ཁྲིམས་རྩོད་པ་དང་། ཆབ་སྲིད། སྤྱི་ཚོགས་ཀྱི་ལས་འགུལ་བ། རྩོམ་པ་པོ་བཅས་ཡིན་ཞིང་། ཁོང་ནི་དབྱིན་ཇིའི་དབང་སྒྱུར་ལ་ངོ་རྒོལ་བྱེད་མཁན་གྱི་རྒྱ་གར་གྱི་རང་བཙན་ལས་འགུལ་གྱི་དབུ་ཁྲིད་དུ་གྱུར་བས། རྒྱ་གར་གྱི་ཡབ་ཆེན་དུ་ངོས་འཛིན་བྱེད་ཀྱི་ཡོད་པ་རེད། ཆབ་སྲིད་དང་སྤྱི་ཚོགས་ཡར་རྒྱས་ཀྱི་ཆེད་དུ་བདེན་པ་གཙིགས་སུ་བཀུར་དགོས་པའི་ཁོང་གི་ལྟ་བ་དེར་རྒྱལ་སྤྱིའི་ཐོག་གུས་བཀུར་ཞུ་བཞིན་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན་པདྨ་མཚོ།
