རྒྱ་གར་ལྷོ་ཕྱོགས་མེ་སོར་གཙུག་ལག་སློབ་གཉེར་ཁང་གི་ངོས་འཛིན་འོག་སེར་བྱེས་ཆེད་སྦྱོང་ཉེ་བའི་གཙུག་ལག་རབ་འབྱམས་སྐབས་དང་པོའི་དགེ་འདུན་པ་ཞལ་གྲངས་ ༣༧ བསླབ་པ་མཐར་སོན་པའི་མཛད་སྒོ་འཚོགས།
དེ་རིང་ཕྱི་ཚེས་ ༡༧ ཉིན་༧གོང་ས་རྒྱལ་བ་རིན་པོ་ཆེ་མཆོག་ལ་ཨ་རིའི་གསེར་གྱི་གཟེངས་རྟགས་འབུལ་བཞེས་ཀྱི་ཉིན་མོ་དང་། ༧སྐུའི་གོ་སྟོན་གྱི་བྱམས་བརྩེའི་ལོ་སྲུང་གཙིའི་ཆེད། རྒྱ་གར་ལྷོ་ཕྱོགས་སེར་བྱེས་བཀྲ་ཤིས་ཆོས་གླིང་ཤེས་ཡོན་ལྟེ་གནས་ཁང་དུ། སེར་བྱེས་མཁས་སྙན་གྲྭ་ཚང་གི་གོ་སྒྲིག་འོག མེ་སོར་གཙུག་ལག་སློབ་གླིང་གིས་ངོས་འཛིན་གནང་བའི་སེར་བྱེས་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་སྐབས་དང་པོའི་བསླབ་པ་མཐར་སོན་གྱི་མཛད་སྒོ་འཚོགས་ཡོད་ཅིང་། མཛད་སྒོའི་སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཁ་ན་ཊ་ཀ་མངའ་སྡེའི་ཤེས་རིག་བློན་ཆེན་མཱ་ལཱ་པཱ་ལི་ཆོ་དྷ་རེ་ཌི་སུ་དྷ་ཀཱར་( Malapalli Chowdareddy Sudhakar)མཆོག དེ་བཞིན་ཤར་བ་ཆོས་རྗེ་ངག་དབང་ཆོས་ལྡན་དཔལ་བཟང་པོ་མཆོག སེར་བྱེས་མཁས་སྙན་གྲྭ་ཚང་གི་མཁན་རིན་པོ་ཆེ་བཀྲ་ཤིས་ཚེ་དར་མཆོག བོད་མི་མང་སྤྱི་འཐུས་ཁག་ཅིག་ཕེབས་ཡོད་འདུག མཛད་སྒོའི་ཐོག་མེ་སོར་གཙུག་ལག་སློབ་གླིང་གི་ངོས་འཛིན་འོག་གཙུག་ལག་རབ་འབྱམས་པའི་བསླབ་པ་མཐར་སོན་པའི་དགེ་འདུན་པ་ཞལ་གྲངས་ ༣༧ ལ་ཕྱག་འཁྱེར་ཕུལ་སོང་།
སེར་བྱེས་མཁས་སྙན་གྲྭ་ཚང་གི་མཁན་རིན་པོ་ཆེ་བཀྲ་ཤིས་ཚེ་དར་མཆོག་གིས། ༧གོང་ས་རྒྱལ་བ་རིན་པོ་ཆེ་མཆོག་གི་ཐུགས་བསྐྱེད་དམ་བཅའ་བཞི་ལས་རྒྱ་གར་གྱི་གནའ་བོའི་རིག་གཞུང་ཉམས་པ་སོར་ཆུད་ཀྱི་དགོངས་པ་བཞེས་ཏེ། སེར་བྱེས་མཁས་སྙན་གྲྭ་ཚང་དང་མེ་སོར་མཐོ་སློབ་གཉིས་ཟུང་འབྲེལ་གྱི་ཐོག་ནས། ཕྱི་ལོ་ ༢༠༢༢ ནས་བཟུང་མེ་སོར་མཐོ་སློབ་ཀྱི་སྒྲིག་གཞི་བཞིན་ནང་པའི་ལྟ་གྲུབ་དང་། སེམས་ཁམས་རིག་པ། བོད་ཀྱི་སྐད་ཡིག་བཅས་ཀྱི་ཐོག་ངོས་འཛིན་ཐོབ་ཡོད། དེ་རིང་དགེ་འདུན་པར་ཚད་ལྡན་གྱི་མཐོ་སློབ་ནས་ཉེ་བའི་གཙུག་ལག་རབ་འབྱམས་པའི་ལག་འཁྱེར་ཐོབ་པ་ཞིག་ཆགས་ཡོད། བཙན་བྱོལ་སྤྱི་ཚོགས་ཀྱི་ལོ་རྒྱུས་ཁྲོད་ཐོག་མ་ཆགས་ཀྱི་ཡོད། དེ་ཡང་༧གོང་ས་རྒྱལ་བ་རིན་པོ་ཆེ་མཆོག་གི་བཀའ་གསུངས་ཅི་སྒྲུབ་ཞུས་པ་ཞིག་ཡིན། རྒྱ་གར་དབུས་གཞུང་མང་དང་ཁ་ན་ཊ་ཁ་མངའ་སྡེའི་གཞུང་མང་གཉིས་ཀྱིས་བོད་པ་སྤྱི་དང་གྲྭ་ཚང་འདིར་བཀའ་དྲིན་བསྐྱངས་པར་ཐུགས་རྗེ་ཆེ་ཞུ། དེ་རིང་འདིར་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་ཕྱིན་གྱི་མཛད་སྒོ་ཡིན། དེ་བཞིན་མུ་མཐུད་ནས་གཙུག་ལག་རབ་འབྱམས་པ་དང་འབུམ་རམས་པའི་ངོས་སྦྱོར་ཐོབ་ཡོད་པས། ༧གོང་ས་མཆོག་གི་བཀའ་དགོངས་བཞིན་མུ་མཐུད་དུ་འགྲོ་ཐུབ་པ་བྱ་རྒྱུ་གལ་ཆེན་པོ་ཆགས་ཡོད། གདན་ས་འདིའི་དགེ་འདུན་པ་རྣམས་ཀྱིས་གཞུང་ཆེན་མོར་ཐོས་བསམ་སློབ་གཉེར་བྱས་པའི་དམིགས་ཡུལ་གཙོ་བོ་ནི་གཞན་ལ་ཕན་ཐོགས་བསྒྲུབ་རྒྱུ་དེ་རེད། གཞན་དོན་བསྒྲུབ་པར་གནའ་བོའི་རིག་གཞུང་གཅིག་པུ་མིན་པར་དུས་རབས་དང་མཐུན་པའི་ཐོག་ནས་ཕན་བདེ་སྒྲུབ་དགོས་དུས། དེང་དུས་ཀྱི་མཐོ་སློབ་ཀྱི་ངོས་ལེན་ཡོད་པའི་ལག་འཁྱེར་དགོས་པ་རེད། དེ་ལ་མི་མང་གི་ངོས་ནས་བརྩི་མཐོང་ཡོད་པ་མ་ཟད་ནུས་པ་དང་ཕན་ཐོགས་ཡོད་པ་རེད། ཅེས་གསུངས་སོང་།
ཁ་ན་ཊ་ཀ་མངའ་སྡེའི་ཤེས་རིག་བློན་ཆེན་མཱ་ལཱ་པཱ་ལི་ཆོ་དྷ་རེ་ཌི་སུ་དྷ་ཀཱར་མཆོག་གིས། བོད་པ་རྣམས་བཙན་བྱོལ་དུ་འབྱོར་རྗེས་རྒྱ་གར་ཁ་ན་ཊ་ཁ་མངའ་སྡེ་གཞུང་གིས་ས་ཆ་མཁོ་སྤྲོད་གནང་སྟེ་བོད་པ་གཞིས་ཆགས་འཛུགས་པར་རོགས་སྐྱོར་བྱས་ཡོད་པ་མ་ཟད། ད་ལྟ་བར་དུ་སྦེལ་ཀོབ་ཁོངས་སུ་བོད་པ་ཁྲི་བདུན་ཙམ་གནས་སྡོད་བྱས་ཡོད། དེའི་ཁྲོད་གྲྭ་པ་དང་བཙུན་མ་སྟོང་ཕྲག་མང་པོས་སློབ་གཉེར་བྱེད་བཞིན་ཡོད། འདི་ནི་བཙན་བྱོལ་ཁྲོད་ཀྱི་བོད་པའི་གཞིས་ཆགས་ཆེ་ཤོས་ཤིག་ཡིན། མངའ་སྡེའི་གཞུང་ནས་སྲིད་དོན་གཅིག་པུའི་ཐོག་རྒྱབ་སྐྱོར་བྱས་པ་མིན་པར་རིག་གཞུང་སྲུང་སྐྱོབ་ཀྱི་ནུས་པ་ཆེན་པོ་ཐོན་ཡོད། སེར་བྱེས་གྲྭ་ཚང་གིས་དུས་རབས་བཅོ་ལྔ་པའི་དཔལ་ན་ལེནྜའི་གཙུག་ལག་ཁང་ནང་བཞིན་ཕྱི་ལོ་ ༡༩༥༩ ལོའི་རྗེས་སུ་སྦེབ་ཀོབ་ཏུ་གནའ་བོའི་རིག་གཞུང་སྲུང་སྐྱོབ་བྱས་ཡོད། དེ་རིང་མེ་སོར་གཙུག་ལག་སློབ་གཉེར་ཁང་གི་ངོས་འཛིན་འོག་སེར་བྱེས་ཀྱི་དགེ་འདུན་པ་ ༣༧ གྱིས་ལོ་གསུམ་རིང་གི་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན་ཡོད། འདི་ནི་སྲོལ་རྒྱུན་གྱི་ནང་བསྟན་རིག་གཞུང་དེ་དེང་རབས་ཀྱི་གཙུག་ལག་རིག་པའི་སློབ་གཉེར་ཐོག་ཏུ་ངོས་འཛིན་བྱུང་བ་ཞིག་རེད། འདི་ནི་ཁྱེད་ཚོའི་རེ་བ་བཞིན་རྒྱལ་ཁབ་དང་ཚོགས་སྡེ་ཁག་གིས་ཀྱང་ངོས་འཛིན་ཡོད་པ་ཞིག་རེད། འདི་ལོར་ང་ཚོས་༧གོང་ས་རྒྱལ་བ་རིན་པོ་ཆེ་མཆོག་གི་༧སྐུའི་གོ་སྟོན་སྲུང་གཙི་བྱེད་བཞིན་ཡོད་པ་རེད། ༧གོང་ས་མཆོག་གིས་འཛམ་གླིང་གི་མི་མང་ས་ཡ་མང་པོར་ལམ་སྟོན་གནང་བཞིན་ཡོད། ཁོང་ནི་བོད་ཀྱི་བླ་ན་མེད་པའི་དབུ་ཁྲིད་དང་ནོ་སྦེལ་ཞི་བདེ་གཟེངས་རྟགས་བཞེས་མཁན་ཡིན་པ་མ་ཟད། ཨེ་ཤ་ཡ་ནང་བསྟན་མཐུན་ཚོགས་ཀྱིས་༧གོང་ས་མཆོག་ནི་འཛམ་གླིང་ཞི་བདེའི་དེད་དཔོན་དུ་ངོས་འཛིན་གནང་ཡོད། ཅེས་གསུངས་སོང་།
ཤར་བ་ཆོས་རྗེ་ངག་དབང་ཆོས་ལྡན་དཔལ་བཟང་པོ་མཆོག་གིས། ཐེངས་འདིའི་བསླབ་པ་མཐར་སོན་ནི་༧གོང་ས་རྒྱལ་བ་རིན་པོ་ཆེ་མཆོག་གི་དགོངས་གཞི་སྨད་དུ་བྱུང་བ་མང་པོ་ཡོད་པའི་ཁྲོད་ཀྱི་གཅིག་ཆགས་ཡོད། དེ་ཡང་ན་ལེནྜའི་ཆོས་བརྒྱུད་དྲི་མ་མེད་པའི་འཛམ་གླིང་སྤྱི་ལ་ཞབས་འདེགས་ཞུ་བའི་རིག་གཞུང་ཞིག་རེད། བོད་བརྒྱུད་ནང་བསྟན་དེ་ཉམས་ལེན་དང་། ཚན་རིག སེམས་ཁམས་བཅས་སྡེ་ཚན་གསུམ་ལ་དབྱེ་བ་ཡོད་པ་དང་། ཕྱི་མ་དེ་གཉིས་འཛམ་གླིང་སྤྱི་ལ་དགོས་མཁོ་ཡོད་པའི་ཁྱད་ནོར་ཆགས་ཡོད། ༧གོང་ས་མཆོག་ནས་བོད་ཀྱི་གདན་ས་ཁག་དེང་དུས་གཙུག་ལག་སློབ་གཉེར་ཁང་གི་མིང་དོན་མཚུངས་པ་དགོས་པའི་བཀའ་རིམ་པར་ཕེབས་ཡོད་པ་ལྟར། རྒྱལ་སྤྱིའི་དགེ་འདུན་ལྷན་ཚོགས་ཀྱིས་ཀྱང་དེའི་ཐོག་ཚོད་ལྟ་བྱས་ཡོད་ཀྱང་གྲུབ་འབྲས་སོན་པ་བྱུང་མེད། ཅེས་དང་། ད་ལན་མེ་སོར་གཙུག་ལག་སློབ་གཉེར་ཁང་གི་ངོས་འཛིན་ཡོད་པའི་ཉེ་བའི་གཙུག་ལག་རབ་འབྱམས་པའི་བསླབ་པ་མཐར་སོན་བྱུང་བ་ཧ་ཅང་དགའ་འོས་པ་ཞིག་རེད། གལ་ཆེ་ཤོས་ཤིག་ནི་མ་འོངས་བར་མུ་མཐུད་ལས་གཞི་ལེགས་སྤེལ་ངན་འགོག་བྱ་དགོས། ཅེས་གསུངས་སོང་།
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས། དེ་རིང་འདིར་མེ་སོར་གཙུག་ལག་སློབ་གཉེར་ཁང་ནས་སེར་བྱེས་ཀྱི་ཉེ་བའི་གཙུག་ལག་རབ་འབྱམས་པའི་ཐོག་ཐེངས་དང་པོ་བསླབ་པ་མཐར་སོན་ཡོད་པ་རེད། ཤེས་ཡོན་ཐོག་མཐུན་སྦྱོར་བྱ་རྒྱུ་གལ་ཆེན་པོ་ཞིག་ཆགས་ཡོད། རྒྱ་གར་དབུས་གཞུང་དང་ཁ་ན་ཊ་ཁ་མངའ་སྡེའི་གཞུང་གཉིས་ང་ཚོར་བཀའ་དྲིན་ཆེན་པོ་ཆགས་ཡོད། ཁ་ན་ཊ་ཁ་མངའ་སྡེའི་ཤེས་རིག་བློན་ཆེན་མཆོག་དེ་རིང་མཛད་སྒོར་ཕེབས་ཐུབ་པ་དེ་དམིགས་བསལ་གཟི་བརྗིད་ཅིག་རེད། དུས་དྲན་འདི་ལོ་རྒྱུས་ཐོག་ནས་ཧ་ཅང་གལ་ཆེན་པོ་ཞིག་ཆགས་ཡོད། ༧གོང་ས་མཆོག་གི་ཐུགས་བསྐྱེད་དམ་བཅའ་བཞི་ལས་མི་ཞིག་ཡིན་པའི་ཆ་ནས་མིའི་སྤྱི་ཚོགས་ནང་དུ་བྱམས་བརྩེ་སྤེལ་བ་དང་། ཆོས་པ་ཞིག་ཡིན་པའི་ཆ་ནས་ཆོས་ལུགས་ཕན་ཚུན་མཐུན་སྒྲིལ་གོང་མཐོར་གཏོང་བ། བོད་མི་ཞིག་ཡིན་པའི་ཆ་ནས་བོད་པའི་ཆོས་དང་རིག་གཞུང་ངོ་སྤྲོད་དང་མགྲིན་ཚབ་པ་གནང་བ། རྒྱ་གར་གྱི་གནའ་བོའི་རིག་གཞུང་གི་རྗེས་འབྲངས་བ་ཞིག་ཡིན་པའི་ཆ་ནས་གནའ་བོའི་ལྟ་གྲུབ་དང་། སེམས་ཁམས་རིག་པ། ཚད་མ་རིག་པ་བཅས་སུ་དམིགས་བསལ་མཐོང་ཆེན་གནང་ཡོད། དེང་སང་གི་ཐ་སྙད་ལ་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ཡོང་ས་གཙོ་བོ་ལྟ་གྲུབ་དེ་དག་ནས་ཡོང་བསྡད་ཡོད། དེ་བཞིན་མེ་སོར་གཙུག་ལག་སློབ་གཉེར་ཁང་གི་བསླབ་གཞིར་མཚོན་ན། གནའ་བོའི་ལྟ་གྲུབ་དང་། སེམས་ཁམས་རིག་པ། བོད་ཀྱི་སྐད་ཡིག་ཆགས་ཡོད། དེ་དག་༧གོང་ས་མཆོག་གི་དགོངས་གཞི་དང་མཐུན་པའི་ཞབས་འདེགས་ཤིག་ཆགས་ཡོད། བསླབ་པ་མཐར་སོན་པ་རྣམས་ལ་དམིགས་བསལ་བཀྲ་ཤིས་བདེ་ལེགས་ཞུ་རྒྱུ་དང་། ལག་འཁྱེར་འདིའི་ཐོག་ནས་དམིགས་བསལ་ཕན་ཐོགས་སྒྲུབ་ཐུབ་པའི་གོ་སྐབས་ཤིག་ཡོང་གི་རེད་བསམ་གྱི་འདུག ཅེས་གསུངས་སོང་།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
