ཨ་རིའི་ཁེ་རི་བྷེ་ཡན་གླིང་ཕྲན་དུ་མཚོ་རླུང་ཚད་རིམ་ ༡༧༥ ཅན་ཞིག་བརྒྱབ་ཡོད་ཀྱང་ད་ལྟའི་ཆར་མི་རྒྱུ་གཉིས་ལ་གནོད་སྐྱོན་ཚབས་ཆེན་ཐེབས་བཞིན་འདུག
ཨ་རིའི་ཧྥི་ལོ་རི་ཌ་ (Florida) མངའ་སྡེ་རུ་ཡོད་པའི་རྒྱལ་ཡོངས་མཚོ་རླུང་ལྟེ་གནས་ཁང་ (National Hurricane Center) གིས། མཚོ་རླུང་གི་ཤུགས་ཚད་ཇེ་ཆེར་འགྲོ་ཉེན་ཡོད་པས་རང་ཁྱིམ་ནས་ཕྱི་རོལ་དུ་འགྲོ་སྐྱོད་མི་ཆོག་པའི་ལམ་སྟོན་གནང་བ་དང་། ཕྱི་ཚེས་ ༢༨ ཉིན་གྱི་དགོང་མོར་ཁུ་བྷ་ (Cuba) དང་། ཕྱི་ཚེས་ ༢༩ ཉིན་བྷ་ཧ་མ་སི་ (Bahamas) རྒྱལ་ཁབ་སོགས་ལ་མཚོ་རླུང་འཕྱུར་ཏེ། ཆུ་ལོག་དང་ས་རུད་ཀྱི་གོད་ཆག་བྱུང་ཡོད་འདུག་ལ། ཁུ་བྷ་རུ་གནས་སྡོད་ཡུལ་མི་ ༧༣༥,༠༠༠ ལྷག་ཛ་དྲག་གི་གནས་སྟངས་འོག་ས་གནས་གཞན་དུ་གནས་སྤོས་བྱེད་དགོས་བྱུང་ཡོད་འདུག
དེ་འབྲེལ་ཇ་མ་ཡེ་ཀའི་སྲིད་བློན་ཨེན་ཌི་རི་ཡུ་ (Andrew Holness) ལགས་ཀྱིས། མི་མང་རྣམས་ཀྱིས་མཚོ་རླུང་བྱུང་བའི་སྐབས་རང་ཁྱིམ་དུ་སྡོད་དགོས་པ་དང་། གཞུང་གི་ལམ་སྟོན་ལྟར་ས་གནས་གཞན་དུ་གནས་སྤོར་བྱེད་དགོས་པའི་འབོད་སྐུལ་གནང་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཆེད་མཁས་པ་ཚོས་ད་ལན་གྱི་མཚོ་རླུང་དེས་ཇ་མ་ཡེ་ཀ་རྒྱལ་ཁབ་ནང་ཆུ་ལོག་དང་ས་རུད་ཀྱི་གོད་ཆག་ཆེན་པོ་བྱུང་སྟེ། མི་རྒྱུ་གཉིས་ལ་དོ་ཕོག་ཆེན་པོ་འབྱུང་ཉེན་ཡོད་སྐོར་དང་། མཚོ་རླབས་ཧྥི་ཊི་ ༡༣ འཕར་རྒྱུ་ཡིན་སྐོར། དུས་ཡུན་རིང་པོར་གློག་ཆད་པའི་དཀའ་ངལ་འཕྲད་རྒྱུར་གྲ་སྒྲིག་དགོས་སྐོར་སོགས་བརྗོད་འདུག
ཕྱི་ལོ་ ༢༠༡༧ ཟླ་ ༩ ཚེས་ ༦ ཉིན་ཨ་རིའི་ཁེ་རི་བྷི་ཡན་གླིང་ཕྲན་དུ་ཨིར་མཱ་ (Irma) ཞེས་པའི་མཚོ་རླུང་ཚད་རིམ་ ༡༨༥ ཅན་ཞིག་བརྒྱབ་སྟེ། མི་གྲངས་ ༣༧ རྐྱེན་འདས་སུ་གྱུར་ཞིང་། རྒྱལ་ཁབ་དེའི་བྷར་བྷོ་ཌ་ (Barbuda) ཞེས་པའི་གླིང་ཕྲན་ཆུང་ཆུང་ཞིག་མཚོའི་ནང་དུ་ནུབ་ཡོད་འདུག་ལ། མཚོ་རླུང་དེ་ནི་དུས་རབས་གཅིག་གི་རིང་ལ་བྱུང་མ་མྱོང་བའི་ཨེ་ཊི་ལན་ཊིག་ (Atlantic) རྒྱ་མཚོའི་ཤུགས་ཚད་ཆེས་ཆེ་ཤོས་ཤིག་ཆགས་ཀྱི་ཡོད་པ་རེད།
གསར་འགོད་པ། བསྟན་འཛིན་ཕུར་བུ། རྩོམ་སྒྲིག་བྱེད་མཁན། པདྨ་མཚོ།
