ལོ་ངོ་ ༧༦རིང་རྒྱ་གཞུང་གིས་ཤར་ཏུར་ཀི་སི་ཐན་ནང་མི་སེར་སྤེལ་ཡུལ་གྱི་སྲིད་ཇུས་ལག་བསྟར་བྱས་ཏེ་ཡུ་གུར་མི་རིགས་ལ་གདུག་རྩུབ་མནར་གཅོད་བཏང་བར་ངོ་རྒོལ་བྱས།
ཟླ་འདིའི་ཕྱི་ཚེས་ ༢༢ ཉིན་ཨ་རིའི་ཕོ་བྲང་དཀར་པོའི་མདུན་དུ། ཤར་ཏུར་ཀི་སི་ཐན་བཙན་བྱོལ་གཞུང་དང་ཤར་ཏུར་ཀི་སི་ཐན་རྒྱལ་ཡོངས་ལས་འགུལ་ཚོགས་པ་གཉིས་ཀྱི་གོ་སྒྲིག་འོག རྒྱ་ནག་གཞུང་གིས་ཤར་ཏུར་ཀི་སི་ཐན་ནང་བཙན་འཛུལ་བྱས་ཏེ་ལོ་ ༧༦ འཁོར་བའི་དུས་དྲན་དང་བསྟུན། རྒྱ་གཞུང་གིས་ཤར་ཏུར་ཀི་སི་ཐན་ནང་མི་སེར་སྤེལ་ཡུལ་གྱི་སྲིད་ཇུས་ལག་བསྟར་བྱས་ཏེ་ཡུ་གུར་མི་རིགས་དམར་གསོད་དང་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་ངོ་རྒོལ་བྱས་ཡོད་འདུག
ཨ་རིར་རྟེན་གཞི་བྱས་ཡོད་པའི་ཤར་ཏུར་ཀི་སི་ཐན་བཙན་བྱོལ་གཞུང་གི་ཕྱི་སྲིད་བློན་ཆེན་སཱ་ལི་ཧ་ཧུ་ཌ་ཡར་(Salih Hudayar)ལགས་ཀྱིས། ཕྱི་ལོ་ ༡༩༤༩ ལོ་ནས་བཟུང་རྒྱ་ནག་གཞུང་གིས་མི་སེར་སྤེལ་བའི་དབང་སྒྱུར་འོག་ནས་ཤར་ཏུར་ཀི་སི་ཐན་མི་མང་ལ་བསམ་ཡུལ་ལས་འདས་པའི་གདུག་རྩུབ་བཏང་ཡོད་ཅིང་། སྐབས་དེའི་མི་གྲངས་ས་ཡ་མང་པོ་དམར་གསོད་དང་། བཙོན་འཇུག བྲན་གཡོག་ཏུ་བཀོལ་བ་སོགས་ཀྱི་ཐོག་ནས་མནར་གཅོད་ཚད་མེད་བཏང་ཡོད། དེ་ནི་མི་རིགས་གཉའ་གནོན་དང་འགྲོ་བ་མིའི་ཐོབ་ཐང་རྡོག་རོལ་བཏང་བ་ཙམ་མ་ཡིན་པར། རྒྱ་གཞུང་གིས་འཆར་གཞི་ལྡན་པའི་ཐོག་ནས་མི་རིགས་སྡེབ་གསོད་བྱས་པ་རེད། ཤར་ཏུར་ཀི་སི་ཐན་མུ་མཐུད་གནས་ཐུབ་པའི་ཐབས་ལམ་གཅིག་པུ་ནི་རང་བཙན་དང་བདག་དབང་སླར་གསོ་བྱ་རྒྱུ་དེ་རེད། ཅེས་བརྗོད་འདུག
དེ་བཞིན་ཁོང་གིས། ཤིན་ཅང་ཟེར་བ་ནི་རྒྱ་ནག་གཞུང་གིས་ཤར་ཏུར་ཀི་སི་ཐན་མི་སེར་སྤེལ་ཡུལ་ལ་བསྒྱུར་ཆེད་བེད་སྤྱོད་བྱེད་བཞིན་པའི་མིང་ཞིག་རེད། ཐ་སྙད་དེ་བེད་སྤྱོད་བྱས་པ་དེས་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་བཙན་འཛུལ་བྱས་པའི་ལོ་རྒྱུས་དང་ཆབ་སྲིད་ཀྱི་དོན་དངོས་དག་སྦས་སྐུང་བྱས་ཡོད་པ་མ་ཟད། ཤར་ཏུར་ཀི་སི་ཐན་རང་བཙན་རྒྱལ་ཁབ་ཅིག་ཡིན་པའི་ལོ་རྒྱུས་ནག་གསུབ་བཏང་ཡོད། ང་ཚོས་ལོ་ངོ ་ ༧༠ ལྷག་གི་རིང་རྒྱ་གཞུང་གི་དྲག་གནོན་ལ་ངོ་རྒོལ་བྱས་ཡོད་ལ། ཤར་ཏུར་ཀི་སི་ཐན་ནང་རང་དབང་དང་རང་བཙན་མ་འཐོབ་བར་དུ་མུ་མཐུད་དུ་ངོ་རྒོལ་བྱ་རྒྱུ་ཡིན། ཞེས་དང་། དེ་བཞིན་རྒྱལ་ཚོགས་དང་རྒྱལ་ཁབ་ཁག་གིས་རྒྱལ་སྤྱིའི་ཁྲིམས་ལུགས་ལྟར་རྒྱ་ནག་གཞུང་ལ་གནོན་ཤུགས་སྤྲོད་དགོས་པའི་འབོད་སྐུལ་ཞུས་ཡོད་འདུག
ཤར་ཏུར་ཀི་སི་ཐན་བཙན་བྱོལ་གཞུང་གི་སྲིད་འཛིན་མཱམ་ཌི་མན་(Dr. Mamtimin Ala)ལགས་ཀྱིས། རྒྱ་ནག་གཞུང་གིས་ཤར་ཏུར་ཀི་སི་ཐན་བཙན་བཟུང་བྱས་པ་དེས་ཤར་ཏུར་ཀི་སི་ཐན་མི་མང་གི་འཚོ་གནས་ཙམ་མ་ཡིན་པར་རྒྱལ་སྤྱིའི་བརྟན་ལྷིང་ལའང་ཉེན་ཁ་བཟོ་བཞིན་ཡོད། རྒྱ་ནག་གཞུང་གི་རྒྱ་སྐྱེད་བྱེད་བཞིན་པའི་སྲིད་ཇུས་ལག་བསྟར་ལ་ཁ་གཏད་གཅོག་གི་མེད་པར་བརྟེན། འཛམ་གླིང་ཡོངས་ཀྱི་རང་དབང་ལ་འཇིགས་སྐུལ་བྱེད་པའི་ཉེན་ཁ་ཆགས་ཡོད། ཤར་ཏུར་ཀི་སི་ཐན་གྱི་འཐབ་རྩོད་ལ་རྒྱབ་སྐྱོར་བྱེད་པ་ནི་སྒྲིག་གཞི་ལྡན་པའི་རྒྱལ་སྤྱིའི་སྒྲིག་ལམ་སྲུང་སྐྱོབ་བྱེད་པའི་ཀུན་སྤྱོད་ཀྱི་འོས་འགན་དང་འཐབ་ཇུས་ཀྱི་དགོས་མཁོ་ཞིག་ཡིན། ཞེས་བརྗོད་འདུག
ཕྱི་ལོ་ ༢༠༡༨ ལོ་ནས་བཟུང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་རྒྱ་ནག་གཞུང་གིས་ཡུ་གུར་ནང་ངལ་རྩོལ་སྒྱུར་བཀོད་ཁང་ཆེད་འཛུགས་ཀྱིས་ཡུ་གུར་བ་ས་ཡ་གཅིག་མ་ཟིན་ཙམ་སྒྱུར་བཀོད་ཁང་ནང་བཀག་སྐྱིལ་བྱས་ཡོད་པའི་གནས་ཚུལ་ཐོན་ཡོད་པ་དང་། རྒྱལ་སྤྱིའི་སྤྱི་ཚོགས་ནས་གནད་དོན་དེའི་ཐད་རྒྱ་ནག་ལ་བསྟུད་མར་སྐྱོན་བརྗོད་བྱས་ཡོད་ཀྱང། རྒྱ་ནག་གཞུང་གིས་ཡུ་གུར་མི་རིགས་རང་སྐྱོང་ཁུལ་དུ་ལག་ཤེས་སྦྱོང་བརྡར་བྱེད་ས་ཡོད་པ་མ་གཏོགས་ངལ་རྩོལ་བསྒྱུར་བཀོད་ཁང་ངམ་བཀག་སྐྱིལ་ཁང་ཟེར་བ་ཞིག་མེད་ཅེས་ངོས་ལེན་བྱས་མེད་པ་རེད། ཕྱི་ལོ་ ༢༠༡༨ ཟླ་ ༡༢ ནང་འཛམ་གླིང་ས་ཕྱོགས་གང་སར་གནས་པའི་རྒྱལ་ཁབ་ ༢༦ གི་མཁས་དབང་ ༣༠༠ ལྷག་ཅིག་གིས་ཡུ་གུར་མི་རིགས་ཀྱི་གནད་དོན་ཐད་རྒྱ་ནག་གཞུང་ལ་ཐུན་མོང་གི་བསྒྲགས་གཏམ་ཞིག་སྤེལ་ཡོད་པའི་ནང་། རྒྱ་ནག་ནང་གི་ཡུ་གུར་མི་རིགས་ཀྱི་གནས་སྟངས་དེ་ནི་རྒྱལ་སྤྱིའི་སེམས་འཚབ་རང་བཞིན་ཞིག་ཆགས་བཞིན་ཡོད་པ་དང་། དམིགས་བསལ་ས་ཁུལ་བྱེ་བྲག་པ་དང་ཚོ་ཁག་གི་གནད་དོན་གྱི་ཐོག་ནས། སྲིད་གཞུང་གིས་བཙིར་གནོན་བྱེད་བཞིན་པའི་གནས་སྟངས་དེ་ལྟ་བུ་འབྱུང་འགྱུར་མི་རིགས་གང་གིས་ཀྱང་ངོས་ལེན་བྱེད་ཐབས་མེད་སྐོར་བརྗོད་ཡོད་པ་རེད།
ཕྱི་ལོ་ ༢༠༢༠ ཟླ་ ༥ ཚེས་ ༡༤ ཉིན་ཨ་རིའི་གྲོས་ཚོགས་གོང་མས་རྒྱ་ནག་གཞུང་གིས་ཤར་ཏུར་ཀི་སི་ཐན་ཁུལ་གྱི་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་རྣམས་ཀྱི་འགྲོ་བ་མིའི་ཐོབ་ཐང་རྡོག་རོལ་དང་དྲག་གནོན་མནར་གཅོད་བྱེད་བཞིན་པ་མཚམས་འཇོག་ཡོང་སླད། ༢༠༢༠ ལོའི་ཡུ་གུར་གྱི་འགྲོ་བ་མིའི་ཐོབ་ཐང་དང་སྲིད་བྱུས་ཁྲིམས་འཆར་ལ་སྤྱི་མོས་ཀྱི་ཐོག་ནས་རྒྱབ་སྐྱོར་གཏན་འབེབ་གནང་ཡོད་པ་རེད། ཁྲིམས་ཡིག་དེའི་ནང་ཤིན་ཅང་ཁུལ་དུ་ཡུ་གུར་གཙོས་པའི་ཁ་ཆེ་གྲངས་ཉུང་མི་རིགས་ཐོག་དྲག་གནོན་བྱེད་མཁན་གྱི་རྒྱ་ནག་གི་མགོ་འཁྲིད་ཚོ་ངོས་འཛིན་བྱས་ཏེ། ཁོ་ཚོ་ཨ་རིར་བསྐྱོད་རྒྱུ་དང་། དེ་བཞིན་ཨ་རིར་ཡོད་པའི་ཁོ་ཚོའི་རྒྱུ་དངོས་རྣམས་གཞུང་བཞེས་གཏང་རྒྱུ་དང་། གཞན་ཡང་ཨ་རིའི་འཛིན་སྐྱོང་ངོས་ནས་རྒྱ་ནག་གཞུང་གིས་ཡུ་གུར་ཁ་ཆེ་གྲངས་ཉུང་མི་རིགས་ཅི་ཙམ་བཀག་སྐྱིལ་ཁང་དུ་བཅུག་ཡོད་མེད་སོགས་ཁུལ་དེའི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་སྙན་ཐོ་འདོན་དགོས་པ་སོགས་བཀོད་ཡོད་པ་རེད།
གསར་འགོད་པ། བྱམས་པ་ཚེ་རིང་། རྩོམ་སྒྲིག་བྱེད་མཁན། པདྨ་མཚོ།
