བོད་མིའི་སྒྲིག་འཛུགས་ཀྱི་ལས་ཁུངས་མ་ལག་དང་བཅས་པའི་རྩིས་ལོ་ ༢༠༢༦་་་༢༠༢༧ ལོའི་དགོས་དངུལ་བཀའ་འཁྲོལ་ཐོབ་པའི་ཕྱོགས་བསྡོམས་ཧིན་སྒོར་ ༣,༤༠༨,༨༣༦,༣༠༤ རེད་འདུག
བོད་མི་མང་སྤྱི་འཐུས་ལྷན་ཚོགས་ཀྱི་པར།
དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་གཅིག་པའི་ལས་ཉིན་ ༡༣ པའམ་མཐའ་མར་ཚོགས་གཞོན་སྒྲོལ་མ་ཚེ་རིང་མཆོག་གིས་རྩིས་ལོ་ ༢༠༢༥་་་༢༠༢༦ སྔོན་རྩིས་བཀའ་འཁྲོལ་ཐོག་བར་བརྒལ་བཀའ་འཁྲོལ་ཞུས་བསྩལ་བསྣན་པའི་མཐའ་མའི་ཕྱོགས་བསྡོམས་དང་ ༢༠༢༦ ་་་ ༢༠༢༧ ཡི་གཏོང་ལེན་ཁྲིམས་ཡིག་སྒྲོག་སྦྱངས་གནང་བར་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་ཆོས་གྲགས་རྒྱ་མཚོ་ལགས་ཀྱི་རྒྱབ་སྐྱོར་འོག བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༦་་་༢༠༢༧ ལོའི་ལས་ཁུངས་མ་ལག་དང་བཅས་པའི་སྔོན་རྩིས་མ་དངུལ་ནས་རྒྱུན་གྲོན་དང་དམིགས་བསལ་འགྲོ་འཆར་ཧིན་སྒོར་ ༡,༢༨༨,༢༨༠,༡༢༩དང་། ཟུར་བཀོལ་རྩིས་ཁོངས་ནས་འགྲོ་འཆར་ཧིན་སྒོར་ ༢,༡༢༠,༥༥༦,༡༧༥ བཅས་ཁྱོན་བསྡོམས་ཧིན་སྒོར་ ༣,༤༠༨,༨༣༦,༣༠༤ བཀའ་འཁྲོལ་གཏན་འབེབས་གནང་སོང་། དེ་བཞིན། སྦེང་ལོར་ལྷོ་སྤྱི་ལས་ཁུངས་དང་ས་འཐུས་མེད་པའི་ས་གནས་ཁག་བདུན་གྱི་སྔོན་རྩིས་འགྲོ་འཆར་ཧིན་སྒོར་ ༥༦,༠༥༡,༧༨༣ དང་། འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭ་དང་། སྨན་ཁང་ཁག་གསུམ་བཅས་ཀྱི་སྔོན་རྩིས་འགྲོ་འཆར་ཧིན་སྒོར་ ༡༠,༡༤༧,༧༨༢བཅས་ཕྱོགས་བསྡོམས་མ་དངུལ་ནང་མ་ཚུད་པའི་ཁྱོན་བསྡོམས་ཧིན་སྒོར་ ༦༦,༢༠༡,༥༦༥བཀའ་འཁྲོལ་གཏན་འབེབས་གནང་སོང་།
གཞན་ཡང་། རྩིས་ལོ་ ༢༠༢༦ ་་་ ༢༠༢༧ ལོའི་ནང་སྔོན་རྩིས་མ་དངུལ་ནས་ཡོང་འཆར་སྒོར་ ༡,༢༣༥༢,༣༨༧,༥༤༩ དང་། ཟུར་བཀོལ་ནས་ཡོང་འཆར་ཧིན་སྒོར་ ༡,༧༩༡,༠༦༠,༠༦༡ བཅས་ཁྱོན་བསྡོམས་ཧིན་སྒོར་ ༣,༠༢༦,༤༤༧,༦༡༠ ཆགས་ཡོད་ཅིང་། སྦེང་ལོར་ལྷོ་སྤྱི་ལས་ཁུངས་དང་ས་གནས་འཐུས་མིའི་ཚོགས་འདུ་མེད་པའི་ས་གནས་ཁག་བདུན་གྱི་སྔོན་རྩིས་ཡོང་འཆར་ཧིན་སྒོར་ ༦༤,༡༢༧,༤༥༦དང་། འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭ་དང་། སྨན་ཁང་ཁག་གསུམ་བཅས་ནས་སྔོན་རྩིས་ཡོང་འཆར་ཧིན་སྒོར་ ༡༦,༠༤༡,༣༢༠ བཅས་རྩིས་ལོའི་ནང་ཁྱོན་བསྡོམས་ཡོང་འཆར་ཧིན་སྒོར་ ༨༡,༡༦༨,༧༧༦ རེད་འདུག
གསར་འགོད་པ། དཔལ་ལྡན། བྱམས་པ་ཚེ་རིང་། རྩོམ་སྒྲིག་བྱེད་མཁན། སྐལ་བཟང་སྦྱིན་པ།
