བུ་ཆུང་ཚེ་རིང་།
བཀའ་ཟུར་ང་ཕོད་ངག་དབང་འཇིགས་མེད་འདས་གྲོངས་སུ་ཕྱིན་པ་དེ་ནི་བོད་ཀྱི་དེང་རབས་ལོ་རྒྱུས་ནང་གི་མི་སྣ་གྲགས་ཅན་ཞིག་མེད་པར་ཆགས་པ་རེད། གུས་རང་༧གོང་ས་མཆོག་གི་སྐུ་ཚབ་ལྷན་ཏུ་བཅར་རྒྱུའི་གོ་སྐབས་བྱུང་བས་ ༢༠༠༢ ལོར་སྐུ་ཚབ་ཚོས་བཀའ་ཟུར་ང་ཕོད་ལ་མཇལ་འཕྲད་ཞུ་སྐབས་སུ་ལྷན་དུ་ཡོད། མཇལ་འཕྲད་དེ་ནི་པེ་ཅིང་གི་ཁོང་གི་གཟིམ་ཤག་ཏུ་གནང་བ་རེད་། ང་ཚོ་དེར་བཅར་སྐབས་བཀའ་ཟུར་ང་ཕོད་དང་ཁོང་གི་སྲས་མོ་གཅིག་མ་གཏོགས་མི་འདུག སྐུ་ཚབ་ཚོར་གསོལ་ཇ་འདེགས་འབུལ་ཞུ་མཁན་ནི་སྲས་མོ་དེ་རེད། ཁོང་དེ་དུས་ནས་དགུང་ལོ་དགུ་བཅུའི་ནང་ཕེབས་ཚར་རུང་བཀའ་མོལ་གནང་རྒྱུར་སྐུ་ངལ་མེད་པ་ལྟ་བུ་འདུག
ཕྱི་ལོ་ ༡༩༥༩ ལོའི་རྗེས་ནས་བོད་ནང་གི་མི་སྣ་གྲགས་ཅན་ཆེ་ཤོས་གསུམ་བདམས་གནང་བ་ཡིན་ན་གཅིག་ནི་བཀའ་ཟུར་ང་ཕོད་ཡིན་དགོས་ཀྱི་རེད། གཞན་གཉིས་ནི་ཀུན་གཟིགས་པཎ་ཆེན་རིན་པོ་ཆེ་སྐུ་གོང་མ་དང་སྐུ་ཞབས་ཕུན་ཚོགས་དབང་རྒྱལ་རེད་བསམ་གྱི་འདུག ཁོང་གསུམ་ནི་བོད་ཀྱི་ལོ་རྒྱུས་ཐོག་དུས་མཉམ་ཡིན་པ་གང་ཞིག་ལ་རྒྱབ་ལྗོངས་འདྲ་མིན་འོག་ནས་ཕེབས་ཡོད། ཁོང་གསུམ་གྱི་སྟེང་ལ་བོད་མིའི་སྤྱི་ཚོགས་ནང་དུ་དུས་འདྲ་མིན་ལ་བསམ་ཚུལ་སྣ་ཚོགས་བྱུང་ཡོད། འོན་ཀྱང་ཀུན་གཟིགས་པཎ་ཆེན་རིན་པོ་ཆེས་དུས་དང་རྣམ་པ་ཀུན་ཏུ་བོད་མིའི་གཞི་རྩའི་ཁེ་ཕན་ཆེད་སྐུ་ངལ་སྐྱོན་གནང་བ་གསལ་པོ་ཆགས་ཡོད། ལྷག་པར་དུ་དངོས་གསལ་དོད་པོ་དང་ཡིག་ཐོག་ཏུ་ཡོད་པ་ནི་ཁོང་གི་ཡིག་འབྲུ་ཁྲི་བདུན་གྱི་སྙན་ཞུ་ཞེས་པའི་བོད་དོན་ཐད་ཀྱི་དགོངས་ཚུལ་དང་ ༡༩༨༠ གྱ་གྲངས་ནང་ཡོང་བསྒྲགས་གསུང་བཤད་གནང་བ་རྣམས་ནས་ཁོང་གི་དགོངས་པ་བཞེས་ཕྱོགས་གང་འདྲ་ཡིན་པ་བསྟན་ཡོད།
སྐུ་ཞབས་ཕུན་ཚོགས་དབང་རྒྱལ་ལགས་ཀྱིས་ཀྱང་ཁོང་གི་ཕྱག་དེབ་༼བོད་མི་གསར་བརྗེ་བ་ཞིག་༽དང་། རྒྱ་ནག་གི་དཔོན་རིགས་རྣམས་ལ་ཕུལ་བའི་སྙན་ཞུ་ཁག་ནས་དགོངས་ཚུལ་གསལ་པོ་བཟོས་ཡོད།
གོ་གསལ་ལ་བཀའ་ཟུར་ང་ཕོད་ཀྱིས་རང་རྣམ་ཞིག་བརྩམས་གནང་ཡོད་པའི་གནས་ཚུལ་འདུག དེ་ནི་གནད་འགག་ཆགས་ཀྱི་ཡོད། ད་ཆ་དེབ་དེའི་གནས་སྟངས་ག་རེ་ཡིན་མིན་གསལ་པོ་མི་འདུག ཕྱོགས་གཅིག་ནས་དེ་འདྲ་བའི་རང་རྣམ་ཞིག་ཡོད་ཚེ་ཁོང་གི་དགོངས་ཚུལ་ཤེས་ཐུབ་པ་དང་། དེ་ལས་གནད་འགག་ཆེ་བ་ནི་ལོ་རྒྱུས་ཀྱིས་བཀའ་ཟུར་ང་ཕོད་ཁོང་ལ་ལྟ་སྟངས་དང་གདེང་འཇོག་གང་འདྲ་ཞིག་བྱ་མིན་ལ་བག་ཆགས་འཇོག་ཐུབ་ཀྱི་རེད།
གཅིག་བྱས་ན་བཀའ་ཟུར་ང་ཕོད་ཀྱི་རང་རྣམ་ཐོག་གོ་རྒྱུ་མེད་པ་ནི་རྒྱ་ནག་གཞུང་གིས་དེར་ཞིབ་འཇུག་བྱེད་བཞིན་པ་ཡིན་སྲིད། གལ་ཏེ་གནས་སྟངས་དེ་འདྲ་ཡིན་ན། ངའི་བསམ་པར་དོ་བདག་ཞིག་གི་རང་རྣམ་དེ་ནི་དོ་བདག་དེ་ག་རང་གིས་བཟོ་རྒྱུ་ནི་དྲང་བདེན་གྱི་གནས་ཚུལ་ཡིན་པར་མ་ཟད། མཐའ་མར་དེབ་དེ་པར་འགྲེམས་གནང་རྗེས་ཆ་འཇོག་ཡོང་རྒྱུར་གལ་ཆེན་པོ་ཆགས་ཀྱི་རེད། དེ་མ་གཏོགས་སྒེར་གྱི་ལོ་རྒྱུས་ཐོག་གཞུང་གིས་ཐེ་བྱུས་གནང་ན་ཕུགས་སུ་གཞུང་དེ་ལ་ཡང་ཕན་ཐོགས་མེད་པར་ཆགས་རྒྱུ་ཡིན།
ས་དབང་དམ་པ་ང་ཕོད་ང་ཚོ་དང་གཏན་དུ་ཞལ་བྲལ་ཟིན་པ་རེད། བོད་དུ་རཁྱིམ་མཚེས་རྒྱ་མི་དམར་པོས་དྲག་པོའི་བཙན་འཛུལ་བྱས་པ་དེ་ནི་ལོ་རྒྱུས་སྟེང་ནས་ཧ་ཅང་གསལ་ཤོས་སུ་མཐོང་རྒྱུ་ཡོད་པ་ཞིག་རེད། འོན་ཏེ་ད་ལྟ་ང་ཕོད་ས་དབང་དམ་པ་གྲོངས་པའི་རྗེས་སུ་དེའི་ཉེན་འགན་ཡོངས་རྫོགས་འདི་ང་ཕོད་དམ་པའི་རྗེས་སུ་གཡོག་སྟེ་ཁ་བརྡུང་གཏོང་བ་འདི་ནི་ཅོལ་ཆུང་གི་བྱེད་སྟངས་ཤིག་རེད། བོད་ས་མ་ཤོར་གོང་གི་བོད་ཀྱི་གཞུང་ཞབས་ཟུར་པ་ཞིག་དང༌། བོད་ཀྱི་ལོ་རྒྱུས་སྟེང་གི་གལ་ཆེའི་མི་སྣ་ཁོང་ལྟ་བུ་སྐུ་འཚོ་ཞུབས་སུ་ཁོང་གི་གསུངས་མྱོང་བའི་བཀའ་མོལ་ཚིག་གཅིག་དང༌། ཆིངས་ཡིག་དོན་ཚན་བཅུ་བདུན་སྐོར་སོགས་ལ་ད་ལྟའི་ཁ་གཏོང་མཁན་སྤྱི་འཐུས་གསེར་རྟ་ཚུལ་ཁྲིམས་སོགས་ནས་ཚིག་གཅིག་ཀྱང་ལུང་འདྲེན་གྱིས་ཁ་ བརྡུང་གཏོང་གི་ཕོད་ཀྱི་མེད། ད་ལྟ་ཁོང་གྲོངས་ཟིན་རྗེས་ལོ་རྒྱུས་ཀྱི་ཉེས་ཅན་པ་ལྟ་བུའི་ཁ་བརྡུང་བྱེད་པ་འདི་ནི་དྲང་པོ་ཞིག་མིན་པས་དེའི་ཐོག་ནས་ཁ་བརྡུང་གཏོང་མཁན་ཚོ་བདཟིེན་པ་ཞིག་མེད་པ་ཧ་ཅང་གསལ་པོ་མཚོན་གྱི་ཡོད།
་ གལ་སྲིད་དེ་ལྟ་བུའི་ཁུངས་དང་ལྡན་པའི་རྒྱུ་མཚན་བཤད་རྒྱུ་ཡོད་ན་ཁོང་མི་ལོ་དགུ་བཅུ་གོ་དགུ་ཙམ་འཚོ་བཞིན་བཞེས་པའི་དུས་སུ་ཚིག་གཅིག་ཀྱང་ཤོད་མི་ནུས་པ་གང་ཡིན་ནམ་འདྲི་བ་འདི་ནི་ཁ་བརྡུང་གཏོང་མཁན་ཚོར་ཕུལ་བ་ཡིན་པས་བསམ་བློ་ཡག་པོ་ཞིག་བཏང་སྟེ་ལན་འདེབས་ན་རང་ཉིད་མགོ་ན་རྒྱུ་ལས་མེད་པས་དེ་ཙམ་ཡིན་ནོ༎
ནད་པ་ལགས་ཀྱིས་ཀུན་ལ་དྲན་གསོ་བཏང་བ་ཐུགས་ཆེ།
༸ རྒྱལ་མཆོག་སྐུ་ཕྲེང་བཅུ་གསུམ་པ་ཆེན་པོས་བོད་དེ་གནའ་དེང་ཟུང་འབྲེལ་གྱི་རྒྱལ་ཁབ་གཅིག་ཏུ་བཅོས་བསྒྱུར་ལེགས་བཅོས་གནང་རྒྱུའི་ཐུགས་རེ་ཚད་མེད་ཅིག་གནང་བ་ལྟར་བོད་ཕྲུག་འགའ་ཤས་ཤིག་དབྱིན་ཇིར་ཚན་རིག་སོགས་དེང་རབས་ཀྱི་སློབ་སྦྱོང་བྱེད་པར་གཏོང་རྒྱུ་དང་དེ་ནས་བོད་དུ་སློབ་གྲྭ་གསར་འཛུགས་བྱེད་རྒྱུ་སོགས་བོད་འབངས་སྤྱིའི་གནས་སྟངས་ལ་ལེགས་བཅོས་གནང་རྒྱུའི་ཐུགས་རེ་ཆེན་པོ་མཛད་ཡོད།
སྐབས་དེར་༸ རྒྱལ་བའི་བཀའ་དགོངས་ལ་ལྷག་བསམ་རྣམ་དག་གིས་སྲི་ཞུར་གཏོགས་པའི་བོད་སྡེ་པ་གཞུང་གི་རྩིས་པ་ལུང་ཤར་ལ་མ་ཉེས་ཁ་གཡོག་བྱས་ཏེ་སྤྱི་ཚོགས་ཁྲོད་དུ་ཁོང་གི་རྐུབ་ལ་རྭ་ཅོ་ཡོད་སྐད་བསྒྲགས་ཏེ་མཐར་པོ་ཏྭ་ལའི་བཙོན་ཁང་ནང་མིག་གཉིས་བཏོན་ནས་སྐུ་ཀྲོངས་ཡོད།
བོད་ས་མ་ཤོར་གོང་དུ་མདོ་སྨད་ཀྱི་མཁས་དབང་ཆེན་པོ་དགེ་འདུན་ཆོས་འཕེལ་མཆོག་ལ་མ་ཉེས་ཁ་གཡོག་བྱས་ཏེ་ཁོང་ཉིད་དབྱིན་ཇིས་བཟུང་བའི་རྒྱ་གར་སྲིད་གཞུང་དང་། ཕྱི་རྒྱལ་བཙན་འཛུལ་རིང་ལུགས་ཀྱི་གསང་མྱུལ་བ་སོགས་ཡིན་རབས་བཤད་དེ་མཐར་ཤེས་རབ་ཅན་གྱི་རླབས་ཆེན་མི་སྣ་དེ་མུན་ནག་གི་བཙོན་དུ་བཅུག་ནས་མཐར་སྨྱོན་པ་བཟོས་ནས་སྐུ་གཤེགས་ཡོད།
ཕྱི་ལོ་༡༩༤༩ ། ༡༠། ༠༡ ཉིན་རྒྱ་ནག་གི་རླབས་ཆེན་གཙོ་འཛིན་མའོ་ཙེ་ཏུང་གིས་རྒྱལ་ཁབ་དབུ་བརྙེས་པ་དང་སྦྲགས་བོད་ལ་བཅིངས་གྲོལ་གཏོང་རྒྱུའི་ཁྱབ་བསྒྲགས་བྱས་རྗེས་སུ་ལོ་རབས་ལྔ་བཅུའི་ནང་འབའ་པ་ཕུན་ཚོགས་དབང་རྒྱལ་མཆོག་གིས་བོད་ལ་བཅོས་བསྒྱུར་ལེགས་བཅོས་གཏོང་འདོད་ཀྱི་ཐད་ལ་སྐུ་ལས་ཚད་མེད་ཅིག་བསྐྱོན་ཡོད་ཀྱང་ཁོང་ལ་རྒྱ་མི་བོད་དུ་འཁྲིད་ཡོང་མཁན་གྱི་ཉེས་ཞྭ་གཡོག་ནས་རླབས་ཆེན་གྱི་བོད་རིགས་རྒྱལ་གཅེས་རིང་ལུགས་པ་དེ་ནག་པོར་བཟོ་བཞིན་ཡོད་པ་རེད།
ཕྱི་ལོ་༡༩༥༩ ལོར་༸ རྒྱལ་བ་དང་པཎ་ཆེན་གཉིས་ཟློག་ཏུ་མེད་པའི་དྲག་ཆར་རླུང་རྩུབ་འཁྲོད་ཞལ་དགྱེས་ནས་༸ གོང་ས་སྐྱབས་མགོན་ཆེན་པོས་བཙན་བྱོལ་དུ་བོད་ཀྱི་ཆོས་དང་། སྲིད་དང་། དཔལ་འབྱོར། རིག་གཞུང་། དེང་རབས་ཀྱི་ཤེས་རིག ལྷག་ཏུ་འཛམ་གླིང་ས་ཡི་གོ་ལར་ཞི་བདེའི་དེད་དཔོན་གྱིས་ཁ་ལོ་བསྒྱུར། ཀུན་ཁྱབ་འགྲོ་བ་སེམས་ཅན་གྱི་བྱམས་བརྩེའི་རིནཐང་གོང་དུ་སྤེལ་གནང་མཛད། བོད་མི་རིགས་ཟེར་བ་འདི་ད་ཆ་འཛམ་གླིང་སྟེང་ངོ་གནོང་མི་དགོས་པའི་ཡ་རབས་དང་། བཟང་སྤྱོད། དྲང་བདེན། འཚེ་མེད། སྙིང་རྗེ་ཅན་གྱི་ཕུལ་བྱུང་གི་མི་རིགས་བཟང་པོ་ཞིག་ཏུ་མངོན་འགྱུར་མཛད་ཡོད་སྟབས་ ༸ རྒྱལ་བ་རིན་པོ་ཆེའི་བཀའ་དྲིན་ནི་ང་ཚོ་བོད་འབངས་ཡོངས་ཀྱིས་སྟོང་གསུམ་གསེར་གྱིས་བཀང་ཏེ་ཕུལ་ཡང་བཀའ་དྲིནགཞལ་དུ་མེད་ཀྱང་བསམ་སྤྱོད་ལས་འདས་པ་ཞིག་ལ་བོད་རིགས་བསོད་ནམས་དམན་པའི་སྐྱེ་བོ་ཉུང་ཤས་ཤིག་གིས་ཁོང་ལ་མཚན་སྨད་ཞུ་བཞིན་ཡོད།
ལོ་རབས་ ༥༠ དང་ལོ་རབས་ ༦༠ ནང་བོད་ཀྱི་ལོ་རྒྱུས་ཁྲོད་བྱུང་མ་མྱོང་བའི་བཀྲེས་ལྟོག་དང་། ངལ་རྩོལ། བཙོན་འཇུག མནར་གཅོད། དམར་གསོད། རང་ཤི་བརྒྱབ་པ་སོགས་སྡུག་བསྔལ་ཚད་ལས་འདས་པ་ཞིག་མྱངས་དགོས་བྱུང་བ་དེ་ཐུགས་ལ་མ་གཟོད་པར་རང་ཉིད་བློས་བཏང་མཛད་དེ་༸ པཎཆེན་སྐུ་ཕྲེང་བཅུ་པ་མཆོག་གིས་ཡི་འབྲུ་ཁྲི་བདུན་གྱི་སྙན་ཞུ་སྲིད་བློན་ཀྲའོ་ཨེ་ལེན་བརྒྱུད་མའོ་ཙེ་ཏུང་ལ་ཕུལ་རྐྱེན་མཐར་ལོ་དགུ་ལྷག་ཙམ་བཙོན་དུ་བཅུག བཙན་གྲོལ་ཐོབ་རྗེས་སུ་ཆོལ་གསུམ་ཡོངས་ལ་ཞབས་ཀྱིས་བཅག་ཏེ་བོད་ཀྱི་ཆོས་ལུགས་དང་། རིག་གནས། སྐད་ཡིག སྤྱི་ཚོགས་སོགས་ཁྱོན་ཡོངས་ལ་བཀའ་དྲིན་གྱི་ཕུང་པོ་ལྷག་ཏུ་མེད་པ་ཞིག་ལེགས་སྐྱེས་སུ་ཕུལ་ཡང་ ༸ པཎ་ཆེན་མཆོག་ལ་རྒྱལ་ཁབ་བཙོང་མཁན་གྱི་མ་ཉེས་ཁ་གཡོག་བྱས་ཏེ་ཚོང་པ་རྒྱག་པ་ཞེས་མཚན་སྨད་ཚད་ལས་འདས་པ་ཞིག་བྱས་ཏེ་མཐར་ཐུགས་ཕམ་ཚད་མེད་ཅིག་གི་ངང་བསོད་བདེ་དམན་པའི་བོད་རིགས་དམངས་དང་གློ་བུར་དུ་བསྐལ་བས་དབེན་ཏེ་དགོངས་པ་རྫོགས་ཡོད།
ཕྱི་ལོ་ ༡༩༥༩ སྔོན་ལ་བོད་སྡེ་པ་གཞུང་གི་ཞབས་སྡོད་པ། བཤེར་དཔང་། རྩིས་པ། ནང་བློན། ཆབ་མདོའི་མདོ་སྤྱི། གྲོས་མདུན་དོན་ཚན་ ༡༧ ལ་མིང་རྟགས་བཀོད་མཁན། བོད་ས་ཤོར་རྗེས་སུ་བོད་རང་ལྗོངས་གྲ་སྒྲིག་ཨུ་ཡོན་ལྷན་ཁང་། རྒྱལ་ཡོངས་མི་དམངས་འཐུས་ཚོགས་ཀྱི་སྐབས་མང་པོའི་རྒྱུན་ལས། ཆབ་སྲིད་གྲོས་ཚོགས་ཀྱི་མི་སྣ། ༸ པཎ་ཆེན་ཨི་ཏི་ཎི་ཆོས་ཀྱིས་རྒྱལ་མཚན་མཆོག་དང་ལྷན་བོད་ཀྱི་རིག་གནས་མཐུན་ཚོགས་ཚོགས་གཙོ། བོད་རྒྱལ་ཡོངས་གྲངས་ཉུང་མི་རིགས་ཀྱི་ཆོས་ལུགས་དང་། རིག་གཞུང་། སྐད་ཡིག ཚན་རྩལ། སྤྱི་ཚོགས། དཔལ་འབྱོར། ཞིང་འབྲོག་སོགས་ཕྱོགས་པོའི་ཐད་ལ་མཛད་ཇུས་དང་སྤྱི་ཚོགས་ཀྱི་བླང་བྱ་བཏོན་གནང་མཛད་མཁན་གྱི་བོད་རིགས་ཆབ་སྲིད་མཁས་དབང་ཅན། བོད་ཀྱི་ལོ་རྒྱུས་དཀྱོག་མཚམས་འཁྲོད་རླབས་ཆེན་གྱི་མི་སྣ་ཞིག་ལ་ད་ཆ་ང་ཚོས་མ་ཉེས་ཁ་གཡོག་བྱས་ཏེ་རྒྱལ་ཚོང་བ་ཞིག་དང་། ཐ་ན་ལྷ་དང་བླ་མས་ལུང་དུ་བསྟན་ནས་བདུད་བློན་ཞིག་ཡིན་པའི་སྒྲུབ་བྱེད་བཀོད་ནས་བོད་རིགས་རླབས་ཆེན་གྱི་མི་སྣ་ཆེན་པོ་དེ་ལོ་རྒྱུས་ཁྲོད་དུ་ནག་པོར་གཏོང་རྩིས་བྱེད་བཞིན་ཡོད།
འདི་ལྟ་བུའི་གནས་ཚུལ་དག་ལ་བསམ་བློ་ཞིབ་ཏུ་བཏང་ཚེ་ངོ་མ་ང་ཚོ་བོད་རིགས་ཚོས་བོད་རིགས་འདི་མེད་པར་བཟོས་ཡོད་ལ་དུས་ད་ལྟའང་རང་རིགས་རང་གིས་མེད་པར་བཟོ་བཞིན་ཡོད་སྟབས་སེམས་སྐྱོ་དགོས་པ་ཞིག་མ་ཡིན་ནམ།
ང་ཕོད་ལ་རེ་བ་མེད་པ་དེ་ཁོའི་ལོ་རྒན་བརྒྱའི་ལས་ཀས་གསལ་སྟོན་བྱས་ཡོད་པ་རེད། ད་རང་རྣམ་ཡིན་ནམ་དེ་ལ་རེ་བ་སྟོང་པ་མ་རྒྱག བོད་རེ་བས་ཕུང་ཟེར་བ་དེ་འདི་འདྲ་ལ་ཟེར་བ་ལོས་ཡིན།
སྐབས་དེར་བོད་ཤར་ཕྱོགས་སུ་ཡོད་པའི་གཞུང་དམག་དང་ཁམས་པའི་ཡུལ་དམག་གཉིས་ཀར་གོ་མཚོན་མི་ལྡང་བའི་དཀའ་ངལ་ཤིན་ཏུ་ཡོད་པ་ཧ་གོ་བཞིན་དུ་ཁྱི་ངན་འདིས་གོ་མཛོད་མེར་སྲེག་བཏང་སྟངས་འདི་ཁོ་ན་ལ་གཅིག་གཟིགས་དང་ད་དུང་རང་རྣམ་ཨེ། དེ་རང་རྣམ་མ་རེད་སྡུག་རྣམ་རེད་། སྐྱེས་ཆེན་ཚོའི་ལོ་རྒྱུས་ལ་མ་གཏོགས་རྣམ་ཐར་མི་ཐོབ་བོ།
བུ་ཆུང་ཚེ་རིང་ལགས། རྒྱ་དམར་བོད་ནང་ཕེབས་བསུ་སྣེ་ལེན་ཐོག་མ་བྱེད་མཁན་འབའ་པ་ཕུན་ཚོགས་དབང་རྒྱལ་དང་རྒྱ་དམར་ལ་གུས་བཀུར་དང་པོ་བྱེད་མཁན་སྙིང་མེད་ང་ཕོད་གཉིས་ལ་ཆབ་སྲིད་གནས་ལུགས་གཅིག་གི་ཐོག་བོད་གཞུང་ནས་ཁ་རྡུང་ངོ་རྒོལ་བྱེད་སྟངས་མ་བདེ་བ་ཡོད་ནའང་ང་ཚོས་དངོས་ཡོད་གནས་སྟངས་རང་གི་ཐོག་ནས་དྲང་བདེན་གྱི་གཏམ་བཤད་ཅིག་མ་གནང་ན་བཟང་ངེས་དབྱེར་འབྱེད་མི་ཤེས་པ་ཞིག་ཆགས་པ། དུས་དེ་ནས་བོད་དོན་ཟེར་བ་དེ་རང་དོན་རེད་ལ། བོད་མི་སུ་ཞིག་གིས་རྒྱ་ནག་ལ་ངོ་རྒོལ་གནང་བ་སོགས་བྱེད་ཚེ་ལམ་འགྲོ་རྒྱུགས་ན་དཔའ་བོ་རེད་ཟེར། དེ་ལྟར་མ་བྱུང་ན་དོན་མེད་ཤི་སོང་ཅེས་བརྗོད་ན། ཆོས་དང་འཇིག་རྟེན་གཉིས་ཀའི་ཐོག་མ་འགྲིག་པ་གསལ་པོ་རེད། སྐུ་ཉིད་ལ་མཚོན་ན་༧གོང་ས་མཆོག་གི་སྐུ་ཚབ་རྣམས་གཉིས་ཀྱི་ཕྱག་རོགས་ཡིན་པ་འདྲ། ངའི་རེ་བར་དོན་འདྲ་ཞིག་ངེས་པར་ཏུ་གླེང་དགོས་ན་བསྐྱར་ཏུ་འབྲེལ་མོལ་བྱུང་སྐབས་རྒྱ་ནག་དཔོན་རིགས་ཚོ་ལ་སོ་སོ་སྒེར་གྱི་ལམ་ཕྱོགས་གསལ་སྟོན་གནང་རོགས་ཅེས་ཞུ་རྒྱུ་ཡིན།
གཞན་ཅི་ཡང་གླེང་དགོས་དོན་མི་འདུག ༢༠༠༢ ལོར་སྐུ་ཚབ་ཚོ་དང་ལྷན་དུ་ང་ཕོད་སར་བཅར་སྐབས་ང་ཕོད་ཀྱིས་ཅི་ཞིག་གླེང་མོལ་བྱས་པའི་གནས་ཚུལ་གཅིག་པོ་དེ་ཞིབ་གསལ་བྲིས་ན་འགྲིག་བསམ། དེ་ནས་ཀྱང་ང་ཕོད་ཀྱི་བསམ་བློའི་ཟུར་ཙམ་ཤེས་རྟོགས་ཡོང་རེ་ཆེའོ།།
ང་ཕོད་ཀྱིས་རང་རྣམ་ཞིག་བྲིས་ཡོད་པའི་དབང་དུ་བཏང་ཡང་། དེ་ནི་བོད་མི་རིགས་ཀྱི་ཆེད་དུ་མ་ཡིན་པར་ཁོ་རང་གི་བདེ་འཇགས་དང་ཁེ་ཕན་ཨང་དང་པོ་བྱས་ནས་བྲིས་ཡོད་པ་ནི་ཤེས་ཤེས་པ་རེད། གཅིག་བྱས་ན་གང་ཡང་བྲིས་མེད་པར་བུ་ཕྲུག་ཚོས་ཚོད་ཚོད་ཚོང་དོན་ཆེད་རྫུན་གཏམ་འདྲ་འབྲི་སྲིད།
གལ་སྲིད་ང་ཕོད་ཀྱིས་རང་རྣམ་ཞིག་བྲིས་ཡོད་དབང་དུ་བཏང་ཡང་། དེའི་ནང་བོད་མི་མང་ཁྲོད་ཁོ་རང་དཀར་འདོན་བྱེད་ཐབས་ཤིག་གཙོ་འདོན་བྱེད་རྒྱུ་ལས། སྐབས་དེའི་ལོ་རྒྱུས་ཁག་དྲང་པོ་དྲང་བཞག་གིས་བརྗོད་ཡོད་ཀྱི་མ་རེད་བསམ།
ང་ཕོད་ཀྱིས་རང་རྣམ་ཞིག་བྲིས་ཡོད་དུ་ཆུག་ཀྱང་། ད་ནི་འདས་གྲོངས་ཀྱི་རྗེས་ལ་འདོན་དགོས་ཆགས་པ་འདིས། ལོ་རྒྱུས་ཀྱི་དཔང་རྟགས་ཆགས་རྒྱུ་དཀའ། རྣམ་པ་གཅིག་ཏུ་ན། རྒྱ་མི་ལོ་ཙུང་རན་ཟེར་བ་ཞིག་གིས་ང་ཕོད་ཀྱི་ལོ་རྒྱུས་གླེགས་བམ་སྟོད་སྨད་གཉིས་ཡོད་པ་ཞིག་བྲིས་ཡོད་ཚོད་དེ་ནི། ང་ཕོད་ཀྱིས་ངོས་ལེན་མ་བྱས་པ་རེད་ཟེར། འདི་ནི་ཡོངས་གྲགས་རེད། ད་ནི་དེ་ཡང་ཐོན་གྱི་རེད། མ་གཞི་རང་རྣམ་ཞིག་ཀྱང་ཡོད་སྐད་ལ། དེར་རྒྱ་གཞུང་གིས་ཞིབ་འཇུག་བྱས་པ་སྐད་ཀྱང་འདུག གསོན་པའི་རིང་ལ་གོ་རྒྱུ་གྲགས་རྒྱུ་ཞིག་བྱས་བྱས་ནས་བཏོན་ཡོད་པ་ཡིན་ན་ནི། རིན་ཐང་ཆེན་པོ་རེད། དེ་ནི་མ་བྱུང་ཚར་བ་རེད། ད་ནི་ཕན་ཐོགས་རྒྱུ་ཞིག་ཁག་པོ་རེད། ཁྱོན་ནས་བལྟ་ས་འཚོལ་ས་མེད་པ་ལས། འདས་མཇུག་འདིར་ལོ་རྒྱུས་ཀྱི་དེབ་རེ་བྱུང་ནའང་ཡག་པོ་རེད་སྙམ་དུ་འདོད་དོ།།
ང་ཕོད་གྲོངས་པའི་རྗེས་ལ་ཁོང་གི་གོ་ས་འདིར་ཕེབས་མཁན་གྱི་བོད་རིགས་དེ་སུ་ཡིན་རྒྱུ་རེད།
གང་ལྟར་འུ་ཅག་གི་ལག་པར་རེག་དུས། ད་ནི་བརྩབ་རལ་དུ་གྱུར་བའི་ལོ་རྒྱུས་ཤིག་ལས་གང་ཡང་མེད་ངེས་ཡིན། རྒྱའི་དབང་འོག་ན་སྐད་ཆ་དྲང་མོ་ཞིག་བཤད་ས་མེད་པ་འུ་ཅག་གིས་ཤེས་གསལ་རེད།
ཨོ་ཁོང་གི་རང་རྣམ་དེར་དགྱ་ནག་གི་བསེ་བསླད་མ་བཅུག་པ་ཞིག་ལག་ཏུ་ཡོང་ན་ཡག་པོ་རེད།དེར་བལྟ་རྒྱུ་ཞིག་ཡོད་ངེས་ཡིན།