ལག་ཏུ་སྙུག་གུ་བཟུང་ནས་སྐད་ཆ་བཤད་མཁན་ཞིག་ཡིན་པའི་ཆ་ནས། སྐད་ཆ་དྲང་པོར་མ་བཤད་ན་འགྲིག་ཐབས་མེད།
སོག་སྨོན་ལམ།
ངས་སྲིད་འབྱོར་རིག་གསུམ་ལྡན་པའི་མི་རིགས་ཤིག་གི་མ་འོངས་པའི་རྒྱུད་འཛིན་པ་རྣམས་ཀྱི་སློབ་གསོའི་སེམས་ཁམས་དང་ཀུན་སྤྱོད་སྤུས་ཚད་འདི་མཐོང་དུས་བློ་ཕམ་ཧ་ཅང་ལྕི། ཕྱོགས་གཞན་ཞིག་ནས་བསམ་བློ་བཏང་ན། སྤྱིར་བཏང་རྒྱུས་མེད་ཀྱི་སྤྱི་ཚོགས་དང་ཁོར་ཡུག་གཞན་ཞིག་ནས་གསར་དུ་གཞིས་ཆགས་པའི་གནས་སྟངས་ལ་བསམ་བློ་བཏང་ན། རིག་གཞུང་གི་ཆ་ནས་གནའ་བོའི་སྲོལ་རྒྱུན་ཤེས་རིག་ངོ་སྤྲོད་དང་རྒྱུན་འཛིན་བྱེད་ཐབས་ཙམ་ལས་མ་བྱུང་ཡང་དེ་ཙམ་སྐྱོན་མེད་པར་བརྩི་ཆོག ཡིན་ནའང༌། ང་ཚོའི་སློབ་གྲྭའི་ཁོར་ཡུག་ཟེར་བ་འདི་མི་རིགས་ཀྱི་འདུ་ཤེས་དང་ཆབ་སྲིད་གོ་རྟོགས། རིག་གནས་སྙིང་སྟོབས་བསྐྱེད་སྲིང་བྱེད་ས་ཞིག་ནས་ཡིག་ཚད་སྦྱོང་བརྡར་བྱེད་ས་ཙམ་གྱི་ངོ་བོར་གནས་འདུག དེ་ཡང་ཆུང་དུས་ནས་ཕྲུ་གུ་ལ་ཕ་མ་དང་དགེ་རྒན་སོ་སོས་ལམ་སྟོན་སློབ་གསོ་མ་ནོར་བ་ཞིག་བྱེད་ཐུབ་མིན་ལ་རག་ལས་པའི་གནད་དོན་ཞིག་རེད། དེང་སང་བཙན་བྱོལ་སྤྱི་ཚོགས་ཁྲོད་ལས་ཞུགས་གོ་སྐབས་ཐོབ་ཟིན་པའི་གཞོན་སྐྱེས་དེ་ཚོས་འཛམ་གླིང་གི་ཤེས་བྱ་རགས་པ་ཙམ་ལས་ཅི་ཡང་ཤེས་ཀྱི་མེད། ཁོ་ཚོའི་བསམ་པར། མི་ཚེའི་རིན་ཐང་ནི་བག་ཡངས་དང་རྩེད་འཇོ་ཁོ་ནས་དུས་འདའ་བར་བྱེད་རྒྱུ་དེ་ཡིན་པའི་སྣང་བ་སྐྱེས་ཡོད་ལ། རྒྱལ་ཁབ་གཞན་ལ་སྐྱབས་བཅོལ་ནས་བསྡད་ཡོད་པའི་རང་གི་གནས་སྟངས་ལ་དཔག་པའི་བསམ་བློ་གཏོང་ཤེས་མཁན་རེ་གཉིས་ལས་མེད། རང་དབང་འཐབ་རྩོད་ཀྱི་སེམས་ཤུགས་དང་དམིགས་ཡུལ་ཅི་ཡང་མེད་པའི་མི་རབས་གསར་བ་འདིའི་སེམས་ཁམས་ལ་རྟོག་འཇུག་བྱེད་ཐེངས་རེ་རེ་བཞིན། སློབ་གྲྭ་དང་ཁྱིམ་ཚང་སློབ་གསོའི་ནང་དོན་གཟས་ཕྱོགས་ལ་གཡོན་ཐལ་ཆེ་བའི་བསམ་བློའི་ནོར་འཁྲུལ་གང་མང་ཞིག་ཡོད་པ་མཐོང་ཡོང་གི་ཡོད།
སློབ་གཞི་བཅོས་སྒྲིག་སྐོར་གྱི་བསམ་འཆར།
རྣམ་པ་གསར་བའི་སྤྱི་ཚོགས་ཀྱི་འཕོ་འགྱུར་ལ་བསྟུན་ནས་སློབ་གཞི་བཅོས་སྒྲིག་བྱེད་དགོས་པ་སྟེ། གཙོ་བོ་ཤེས་ཡོན་སློབ་དེབ་དང་ལས་ཞུགས་བྱེད་སྒོ་གཉིས་ཀྱི་བར་ཐག་ཇེ་ཉེ་རུ་གཏོང་ཐབས་དེ་དམིགས་ཡུལ་དུ་འཛིན་དགོས་པ་ནི་གཡོལ་ཐབས་བྲལ་བའི་གནད་དོན་གཅིག་རེད། ཉིན་ཤས་རིང་དུས་བཀག་ཡིག་ཚད་ཅིག་གཏོང་སྲོལ་ཡོད་པ་དེ་རྩ་མེད་བཏང་ནས། དཔྱད་གླེང་དང་རྩོམ་འབྲིའི་ལག་ལེན་དངོས་ཀྱི་ཐོག་ནས་སྦྱངས་པའི་ཡོན་ཏན་དང་བསམ་བློའི་སྨིན་ཚད་ལ་བལྟས་ཏེ། སློབ་གྲྭའི་ལག་ཁྱེར་གྱིས་སློབ་ཐོན་པའི་ཤེས་ཡོན་གྱི་ཚད་གཞི་འཇལ་ཐུབ་པ་ཞིག་གམ། ཡང་ན་སློབ་མའི་ཤེས་ཚད་དང་སློབ་ཐོན་ལག་ཁྱེར་གཉིས་དོ་མཉམ་ཡོད་པ་ཞིག་དགོས་གལ་ཆེ། གནས་སྟངས་ཀྱི་ཆ་ནས་མི་རིགས་ཀྱི་འདུ་ཤེས་དང་ཆབ་སྲིད་འཐབ་རྩོད་ཀྱི་སེམས་ཤུགས་སློང་ཐབས་གཙིགས་སུ་འཛིན་དགོས་སྟབས། སློབ་གསོའི་ཁ་ཕྱོགས་དང་ནང་དོན་ཐད་ལ་འགྱུར་བ་ངེས་ཅན་ཞིག་གཏོང་དགོས་པའི་དུས་ལ་བབ་ཡོད་པར་མ་ཟད། སྲིད་དོན་རིག་པ་དང་བྱིས་པའི་སེམས་ཁམས་རིག་པ་བཅས་ནི་འཛིན་གྲྭ་དྲུག་པ་ནས་འཛིན་རིམ་སོ་སོའི་གནས་ཚད་དང་འཚམ་པའི་སྒོ་ནས་ཟུར་ལྟའི་སློབ་ཚན་ནང་འཇོག་དགོས་གལ་ཆེ། འཛིན་རིམ་དང་པོ་ནས་ལྔ་བ་བར་དུ་འབྲི་ཀློག་ཉན་བཤད་གཙོས་པའི་སྐད་ཡིག་གི་རྨང་གཞིའི་ཤེས་བྱར་སྦྱོང་བརྡར་གནད་དུ་ཁེལ་བ་བྱེད་དགོས་པའི་སྐབས་ཡིན་སྟབས། བོད་ཡིག་དང་དབྱིན་ཡིག རྩིས་རིག་སློབ་ཚན་གསུམ་ལས་ཚན་རིག་དང་སྤྱི་ཚོགས་རིག་གནས་གཉིས་དངོས་གཞིའི་སློབ་ཚན་ནང་མ་བཞག་ན་དགེ་མཚན་ཆེ་བར་སྣང༌།
སློབ་དེབ་རྙིང་པ་ཁག་ཏུ་སློབ་མས་སྦྱང་བྱ་མང་ཆེ་བ་དངོས་ཡོད་འཚོ་བ་དང་ཁ་ཐག་ཆེས་རིང་ཞིང༌། ལྟ་སྤྱོད་གང་གི་ཆ་ནས་སློབ་མ་ཞིག་གིས་དང་ལེན་བྱེད་མི་ཕོད་པའི་ནང་དོན་གཏིང་ཟབ་ལ་དམིགས་ཡུལ་རྒྱ་ཆེ་དྲགས་པའི་སློབ་གསོའི་སྐྱོན་གནད་དེ་གང་ནས་འབྱུང་གིན་ཡོད་མེད་འཚོལ་ཞིབ་དང་ངོས་འཛིན་གསལ་བོ་ཞིག་མ་བྱུང་བར་དུ་སྐད་ཡིག་གི་རྨང་གཞི་བརྟན་པོ་བཟོ་བའི་གོ་སྐབས་ཕྲ་ཞིང་རེ་བ་མི་ཆེ། སློབ་མ་ཞིག་ལ་མཚོན་ན། སྐད་ཡིག་གི་རྨང་གཞིའི་ཤེས་བྱ་ལྡང་ངེས་ཅན་ཞིག་གི་ཚད་དུ་མ་སླེབས་གོང་ནས། ཀླད་པ་སྟོང་པའི་མི་ཞིག་ལ་ལྟ་བ་གཏིང་ཟབ་པོ་ཞིག་དང་རྩོམ་ཡིག་འབྲི་འཇུག་གི་ཡིན་ཟེར་བ་ནི། མ་རྩ་མེད་པའི་མི་ཞིག་ཚོང་རྒྱག་ཏུ་མངགས་པ་ལས་མ་འདས། བོད་ཡིག་སློབ་ཚན་མང་ཆེ་བ་བྱིས་པའི་སེམས་ཁམས་དང་ཀུན་སྤྱོད་སོགས་ལ་ཐད་ཀར་ཤུགས་རྐྱེན་ཐེབས་དཀའ་བའི་རིགས་ཡིན་པར་མ་ཟད། བློ་ཁ་ཆོས་ལ་ཕྱོགས་པའི་ཐབས་འབའ་ཞིག་ལ་དམིགས་ནས་སློབ་གཞི་བཅོས་སྒྲིག་བྱས་ཡོད། དཔེར་ན། མགོ་མཇུག་བར་གསུམ་གྱི་བྱུང་རིམ་དང་སྒྲིག་གཞི་སོགས་གནའ་སྒྲུང་འབྲི་སྲོལ་ལྟར་གཅིག་རྗེས་གཉིས་མཐུད་ཀྱི་ཚུལ་དུ་བྲིས་ཡོད་པའི་སྟག་མོར་ལུས་སྦྱིན་དང་རྫ་ཙིག་གཏམ་རྒྱུད། སྤྲེའུ་བྱང་ཆུབ་སེམས་དཔའི་སྒྲུང་སོགས་སློབ་ཚན་དུ་བཞག་ཡོད་པ་འདི་དག་གིས། སློབ་ཕྲུག་ཚོས་རྩོམ་ཡིག་སློབ་ཚན་དེ་དག་བཀླགས་རྗེས་ཡིད་འགུལ་ཐེབས་པའི་ཚབ་ཏུ་ཡི་ཆད་དང་སུན་སྣང་སྐྱེས་ཏེ། སྤྱིར་བོད་ཡིག་ཐོག་བྲིས་པའི་དེབ་རིགས་ཡོད་ཚད་ཀློག་མི་འདོད་པའི་ཚོར་བ་འབྱུང་བཅུག་གི་ཡོད། དཔེར་ན། སྐབས་ཤིག་ང་ལ་དྭགས་ཀྱི་ས་ཆ་གང་སར་གནས་མཇལ་དང་གནས་ཚུལ་རྒྱུས་ལོན་བྱེད་དུ་སོང་བ་ཡིན། སྐབས་དེར་བོད་ཁྱིམ་སློབ་གྲྭའི་སློབ་ཕྲུག་བུ་མོ་ཞིག་གྲོགས་པོ་བརྒྱུད་ནས་ངོ་ཤེས་བྱུང༌། བུ་མོ་དེ་འཛིན་རིམ་བཅུ་བ་རེད་འདུག ཁོ་མོའི་བོད་ཡིག་ཟིན་བྲིས་འབྲི་དེབ་ནང་ཚིག་དུམ་རེ་ཟུང་གིས་སྣོན་འཕྲི་བྱས་ཡོད་པ་མ་གཏོགས་སི་ཏུའི་ཞལ་ལུང་གི་རྩ་ཚིག་དང་འགྲེལ་བཤད་ཇི་མ་ཇི་བཞིན་ངོ་བཤུས་བརྒྱབ་འདུག སྐབས་དེར་ངེད་གཉིས་ཀྱི་སྐད་ཆ་རྣམས་འདིར་བཀོད་ན། ༼སློབ་དེབ་ནང་གི་ཚིག་དོན་ཇི་བཞིན་འབྲི་དེབ་ནང་བཤུས་ནས་ག་རེ་བྱེད་རྩིས་ཡིན།༽ ༼དེ་རྒན་ལགས་ཀྱིས་ནག་པང་ཐོག་བྲིས་ནས་ང་ཚོར་བཤུས་བཅུག་པ་རེད། ཤེས་ཡོན་རྟོག་ཞིབ་པ་ཕེབས་དུས་འབྲི་དེབ་སྟོང་པ་ཡིན་ན་བཀའ་བཀྱོན་གནང་གི་རེད་གསུངས་སོང༌།༽ ༼ཚིག་དོན་ཧ་གོ་ཡི་ཡོད་དམ།༽ ༼ཚིག་དོན་ཁ་ཤས་མ་གཏོགས་ཧ་གོ་ཡི་མེད། རྒན་ལགས་ཀྱིས་འགྲེལ་བཤད་བརྒྱབ་མ་སོང༌། སློབ་ཚན་ཚར་ས་མ་རེད་གསུང་གི་འདུག༽ཟེར། ད་དུང་བཤེས་སྤྲིངས་དང་ལེགས་བཤད་བློ་གསར་མིག་འབྱེད་ཀྱི་དེབ་ཅིག་ཁྱེར་ཡོང་ནས། ༼དེབ་འདི་ཡང་ང་ཚོའི་སློབ་ཚན་རེད། ཚིག་དོན་གོ་དཀའ་བའི་སློབ་ཚན་འདི་འདྲའི་རིགས་མཐོང་ཡོང་དུས། སྤྱིར་བཏང་བོད་ཡིག་སྦྱང་རྒྱུའི་འདོད་པ་བརླགས་འགྲོ་ཡི་འདུག༽ ཅེས་བོད་ཡིག་སློབ་ཚན་དང་དགེ་རྒན་གཉིས་ཀྱི་ཐད་ནས་དཀའ་ངལ་མི་ཉུང་བ་ཞིག་འཕྲད་མྱོང་ཚུལ་ང་ལ་བཤད་བྱུང༌།
སློབ་དེབ་ནི། ཤེས་བྱ་རིག་པའི་གནས་མཐའ་དག་གི་ནང་དོན་ངོ་འཕྲོད་པ་ལ་སྐད་ཡིག་གི་རྨང་གཞིའི་ཤེས་བྱ་ཁོང་དུ་ཆུད་པའི་མཐུན་ཕྱོགས་སུ་འགྲོ་བ་ཞིག་དགོས་གལ་ཆེ་བར་མ་ཟད། སློབ་དེབ་གསར་བཟོ་བྱེད་པའི་བརྒྱུད་རིམ་ནང་རིགས་གང་དུ་མཁས་པའི་མི་རེ་རེ་བློ་འདྲི་སའམ་རྩོམ་སྒྲིག་པར་འཇོག་དགོས་པ་ལས། མི་གཅིག་སློབ་སྟོན་པར་བཞག་ན་ཐམས་ཅད་མཁྱེན་པ་འདྲ་ཡིན་ན་མ་གཏོགས་ཕྱོགས་གང་ཐད་ནས་སྐྱོན་འབྱུང་ངེས་ཡིན། ལྷག་པར་དུ་རྩོམ་རིག་གསར་བའི་གཞུང་ལུགས་ལ་རྒྱུས་མངའ་ཆུང་ཞིང་ལོ་མང་བསགས་པའི་རྩོམ་འབྲིའི་སྒྱུ་རྩལ་གྱི་ཁྱད་ཆོས་དང་ཉམས་མྱོང་མེད་མཁན་རེ་ཟུང་ཞིག་མཁས་པའི་མིང་གིས་སློབ་དེབ་རྩོམ་སྒྲིག་པ་དང་སློབ་སྟོན་པར་འཇོག་སྲོལ་ཡོད་པ་འདི་དག་གི་ཐད་འགྱུར་བ་ངེས་ཅན་གཏང་དགོས་པར་སེམས།
གལ་ཆེན་པོ་ཡིན་ཚད་སློབ་ཚན་དུ་འཇོག་དགོས་སམ།
བོད་ཀྱི་སྲོལ་རྒྱུན་རིག་གནས་ཀྱི་ཁོངས་གཏོགས་ཡིན་ཚད་སློབ་ཚན་དུ་བཞག་ནས་སྦྱངས་དགོས་པའི་ལྟ་ཚུལ་འཛིན་མཁན་ཡང་ཡོད། གཏམ་རྒྱུད་ཐུང་ངུ་ཞིག་བཤད་ན། བོད་ཀྱི་མཐོ་རིམ་སློབ་གྲྭ་ཞིག་ཏུ་ཡིག་གཟུགས་སྣ་ཚོགས་སློབ་མཁན་གྱི་དགེ་རྒན་ཞིག་ཡོད། དགེ་རྒན་དེས་ཡིག་གཟུགས་དྲི་ཤོག་ནང་ཡིག་གཟུགས་འབྲི་སྟངས་བསླབས་ན་ཕན་ཐོགས་ཡོད་མེད་སྐོར་ལ་བསམ་ཚུལ་རེ་འབྲི་དགོས་ཞེས་བཀོད་ཡོད་པ་ལྟར། སློབ་མ་ཞིག་གིས་ཡིག་གཟུགས་རིགས་གཅིག་རྐང་འཛིན་པ་ཞིག་མིན་ཚེ། བོད་ཀྱི་ཡིག་གཟུགས་འབྲི་སྟངས་ཡོད་ཚད་སྦྱང་དགོས་པའི་ངེས་པ་མེད་པའི་བསམ་ཚུལ་བྲིས་པ་དེར་ཡིག་གཟུགས་དགེ་རྒན་མ་འཐད་ནས། ༼ཡིག་གཟུགས་ཀྱང་བོད་ཀྱི་རིག་གཞུང་ཡིན་པའི་ཆ་ནས་སློབ་ཚན་གཞན་དག་དང་འདྲ་བར་སྦྱང་དགོས་ཚུལ་དང་་ཡིག་གཟུགས་སློབ་ཚན་དུ་འཇོག་མི་དགོས་པའི་བསམ་ཚུལ་འདོན་མཁན་དེ་ངས་སློབ་སྤྱི་ལ་རྩིས་སྤྲོད་ཀྱི་ཡིན་༽ ཞེས་འཇིགས་སྣང་སྐུལ་མཁན་ཡང་དངོས་སུ་བྱུང་མྱོང་ཡོད་པ་ལྟ་བུ་རེད།
གཞི་རིམ་སློབ་གྲྭའི་དགེ་རྒན་རྣམས་ཀྱིས་ཉིན་རེའི་སློབ་ཁྲིད་ཀྱི་བརྒྱུད་རིམ་ཁྲོད། ཆེས་སྤྲོ་སྣང་ཆེ་ཤོས་ནི། ནག་པང་ཐོག་ཚིགས་བཅད་ཤོ་ལོ་ཀ་རེའམ་གོང་ས་མཆོག་གི་བཀའ་སློབ་ཐིག་ཕྲེང་རེ་གཉིས་ཤར་མར་བྲིས་ཏེ། སློབ་ཕྲུག་ཚོའི་ཡིག་གཟུགས་འབྲི་སྟངས་ཐད་ལམ་སྟོན་གནང་བ་དང༌། གལ་སྲིད་ཤེས་བྱ་ཡོན་ཏན་ཕུན་སུམ་ཚོགས་པ་ཡོད་ཀྱང་ཡིག་གཟུགས་ཡག་པོ་འབྲི་མི་ཤེས་མཁན་དེ། དཔེར་ན། དཔའ་བོ་ལག་རྡུམ་ལྟ་བུ་རེད། ཅེས་རྒྱུན་དུ་ཁ་བརྡ་སློབ་གསོ་གནང་རྒྱུ་སོགས་ཡིན། ངས་ཤེས་ཚོད་ལྟར་ན། ཕལ་ཆེར། འཛིན་རིམ་དང་པོ་ནས་བཅུ་བ་བར་དུ་ཚུགས་རིང་དང་ཚུགས་ཐུང་ལ་སོགས་པའི་ཡིག་གཟུགས་ཆེ་ཆུང་མི་འདྲ་བ་རེ་རེ་ལོ་རེ་བཞིན་གསར་དུ་སྦྱོང་དགོས་པའི་དཀའ་ངལ་འདིས། སློབ་ཕྲུག་ཚོའི་ཡིག་གཟུགས་འབྲི་སྲོལ་རབ་རིབ་སབ་སིབ་ཅིག་ཏུ་འགྱུར་འགྲོ་གི་ཡོད་པ་འདྲ། ད་ལྟའི་ཆར་འཛིན་རིམ་དང་པོ་ནས་ལྔ་བ་བར་གྱི་བོད་ཡིག་སློབ་དེབ་སོགས་ཀྱི་ཡིག་གཟུགས་དབུ་མེད་ཐོག་བྲིས་པར་དགོས་པ་དམིགས་བསལ་བ་ཞིག་ཡོད་མེད་ཁ་མཚོན་ཆོད་དཀའ་ནའང༌། གལ་སྲིད་འཛིན་གྲྭ་དང་པོ་ནས་བཟུང་སློབ་ཕྲུག་ཚོའི་རྒྱུན་སྤྱོད་ཀྱི་ཡིག་གཟུགས་དབུ་ཅན་གཅིག་པོ་གཙོར་བཟུང་གིས་ལོ་རེར་ཡིག་གཟུགས་མི་འདྲ་བ་རེ་སྦྱངས་མི་དགོས་པའི་དབང་དུ་བཏང་ན། མ་མཐའ་ཡང་སློབ་མ་སྤྱིའི་ཡིག་གཟུགས་ཀྱི་གནས་ཚད་ཁམས་གཙང་ཞིང་སྤུས་དག་པོ་ཞིག་ཡོང་རྒྱུར་ཤུགས་གནོན་ངེས་ཅན་ཐེབས་ཡོད་པ་གཏན་ཁེལ་ཆོག་ལ། འཛིན་རིམ་བཞི་བ་དང་ལྔ་བའི་སློབ་མ་ཚོས་དབུ་ཅན་གྱིས་བྲིས་པའི་ཚགས་པར་ཙམ་ཡང་ཀློག་མི་ཤེས་པའི་དཀའ་ངལ་འདི་འདྲ་ང་ཚོའི་མགོ་ཐོག་ཏུ་བབས་ཨེ་ཡོད་སྙམ།
ངས་བལྟས་ན། ཆོས་ལུགས་གྲུབ་མཐའ་ཁག་གི་གནད་འགག་གང་མང་ཞིག་ཟུར་འདོན་བྱས་ཏེ་སློབ་ཆུང་སློབ་མའི་སློབ་ཚན་ནང་བཞག་དགོས་དོན་ཡང༌། བོད་ཀྱི་རིག་གཞུང་ཡིན་པའི་རྒྱུ་མཚན་ལ་ཐུག་ཡོད་ཚོད་འདུག་ཀྱང༌། སྐད་ཡིག་སློབ་ཁྲིད་ཀྱི་དམིགས་ཡུལ་ནི། འབྲི་ཀློག་ཉན་བཤད་ཀྱི་སྦྱོང་བརྡར་གནད་དུ་ཁེལ་ཞིང་རང་རྐྱ་ཐུབ་པའི་རྨང་གཞི་ནས་མགོ་བརྩམས་ཏེ། ༼བསམ་གཞིགས་ཀྱི་ནུས་པ༽དང་༼དབྱེ་ཞིབ་ཀྱི་ནུས་པ།༽ ༼གནད་དོན་ཐག་གཅོད་ཀྱི་ནུས་པ་༽གསོ་སྐྱོང་རྒྱུ་བཅས་ཡིན་ལ། འདི་ནི་སློབ་མའི་རང་འགུལ་གྱི་འདུ་ཤེས་ལ་སྒུལ་ཤུགས་སློང་མཁན་དང་ཀླད་པའི་ངལ་རྩོལ་བརྒྱུད་ནས་བསམ་བློ་གསར་བའི་སྒོ་མོ་འབྱེད་བྱེད་ཀྱི་གསེར་གྱི་ལྡེ་མིག་ལྟ་བུ་ཞིག་ཀྱང་ཡིན། སློབ་མའི་རང་འགུལ་གྱི་འདུ་ཤེས་ནི་སློབ་སྦྱོང་དང་གོམས་གཤིས་ཟུང་དུ་སྦྲེལ་དགོས་པའི་གཞི་རྩའི་ཆ་རྐྱེན་ཡིན། རྒྱ་ཆེ་ས་ནས་བཤད་ན། མི་ཚེ་དང་སློབ་སྦྱོང་ཟུང་འབྲེལ་བྱེད་པ་ལ་ཡང་རང་འགུལ་གྱི་འདུ་ཤེས་མེད་ན་དགོས་མཁོ་དང་གནོན་ཤུགས། ཁྲིམས་ཀྱི་བཙན་སྐུལ་ལ་བརྟེན་ནས་མཐའ་འཁྱོངས་པ་ཞིག་ཡོང་ཐབས་མེད།
ཡང་དགོན་པ་གྲྭ་ཚང་ཁག་གི་འདོན་རྟ་དབྱངས་དང་ཐིག་རྡུལ་ཚོན། རྡུང་ཕྱག་ལེན་ཡོད་ཚད་སློབ་གྲྭའི་ཁོར་ཡུག་ལ་ཁྱེར་ཡོང་ནས་སློབ་ཕྲུག་ཚོར་འདོད་མོས་མེད་བཞིན་དུ་བོད་ཀྱི་རིག་གཞུང་ཡིན་པའི་ཆ་ནས་སྦྱངས་དགོས་པའི་ཨུ་ཚུགས་རྒྱག་མགོ་རྩོམ་བཞིན་ཡོད་པ་འདི་ཚོ་ནི། ཁོང་ཚོ་ཐེག་ཆེན་པའི་གང་ཟག་འགའ་རེ་མ་གཏོགས་ང་དང་ང་འདྲ་བའི་སོ་སྐྱེས་ཕལ་བ་ཞིག་གི་བློ་ངོར་ཆེས་ཤོང་དཀའ་བའི་གནད་དོན་ཞིག་ཅིས་མ་ཡིན།
བོད་ཀྱི་ཟློས་གར་སློབ་ཚན་ལ་མཚོན་ནའང་གཅིག་མཚུངས་རེད། ཕྱི་དྲོ་ས་མ་རུབ་པའི་སྔོན་ཙམ་ལ་ལྷ་ས་གཙུག་ལག་ཁང་གི་མདུན་ཐང་དུ་ལྷ་ས་གྲོང་ཁྱེར་གཡས་གཡོན་གྱི་གྲོང་གསེབ་ཁག་ནས་ཡོང་བའི་སློང་མོ་བ་དང་རྒན་འཁོགས་མང་པོ་ལག་རྡང་སྦྲེལ་ནས་འཁྲབ་སྟོན་བྱེད་བཞིན་ཡོད་པའི་གནའ་སྔ་མོའི་འཁྲབ་གཞས་དེ་ཚོ་ཡང་བོད་ཀྱི་རིག་གཞུང་ཡིན་པའི་ཆ་ནས་སློབ་ཕྲུག་ཚོར་འདོད་པ་མེད་བཞིན་དུ་སྦྱོང་འཇུག་གི་ཡོད། འཛམ་གླིང་ཐོག་གནའ་སྔ་མོའི་དུས་གླུ་གར་འཁྲབ་སྟོན་བྱེད་མྱོང་མེད་པའི་རྒྱལ་ཁབ་དང་མི་རིགས་ཤིག་ཡོད་མི་སྲིད་ཀྱང༌། དུས་རབས་གསར་བའི་ནང་མི་རབས་གསར་བའི་སེམས་ཁམས་མཚོན་ཐུབ་པའི་གླུ་གར་གསར་གཏོད་བྱེད་མི་ཤེས་པའི་མི་རིགས་ནི་བཙན་བྱོལ་སྤྱི་ཚོགས་འདི་གཅིག་པུ་ཡིན་ན་ཐང༌། མཁས་དབང་དོན་གྲུབ་རྒྱལ་གྱིས། “ཁ་སང་གིས་དེ་རིང་གི་ཚབ་བྱེད་མི་ཐུབ།” ཅེས་གསུངས་དོན་ཡང་གནད་འགག་འདི་འདྲ་ལ་ཐུག་ཡོད། རང་ལ་གླུ་གཞས་གསར་རྩོམ་གྱི་ཤེས་འཇོན་མེད་པ་ཁོག་ཏུ་སྦས་ཏེ་བོད་ཀྱི་སྲོལ་རྒྱུན་རིག་གཞུང་གལ་ཆེན་པོ་ཡིན་པའི་ཁ་གཡང་སྟོང་པ་རླུང་ལ་སྐུར་བཞིན་པའི་ཟློས་གར་དགེ་རྒན་དེ་ཚོས། མི་རབས་འདིའི་འགན་ཁུར་ནས་དུས་རབས་རང་བཞིན་གྱི་མི་རབས་གསར་བ་ཞིག་སྐྱེད་སྲིང་བྱེད་ཐུབ་ན་ཅི་མ་རུང་ཨང༌།
ཀུན་སྤྱོད་དང་ལག་ཁྱེར་ཤེས་ཡོན་གྱི་ཚབ་ཏུ་བེད་སྤྱོད་གཏོང་མི་རུང༌།
རྩོམ་ཡིག་འབྲི་བ་ནི། “སྦྱངས་ཟིན་པའི་ཤེས་བྱ་སློབ་མའི་རང་སྟོབས་ཀྱི་ནུས་པ་ཞིག་ཏུ་བསྒྱུར་ཆེད་ཡིན”པས། ཚང་མས་ཁ་གཅིག་གྲགས་ཀྱི་ཚུལ་དུ་སློབ་ཕྲུག་ཚོའི་རྩོམ་འབྲིའི་སྦྱོང་བརྡར་ཡར་རྒྱས་གཏོང་དགོས་རབས་གླེང་གི་ཡོད་ཀྱང༌། སློབ་མའི་རྩོམ་འབྲིའི་བྱང་ཚད་ཡར་རྒྱས་འགྲོ་བ་ལ་མེད་དུ་མི་རུང་བའི་དགེ་རྒན་རྣམ་པའི་ཁྲོད་ན། རྩོམ་འབྲིའི་གཞུང་ལུགས་སློབ་ཁྲིད་བྱེད་ཤེས་མཁན་དང་ལག་ལེན་དངོས་ཀྱི་སྟེང་ནས་རྩོམ་འབྲིའི་ཉམས་མྱོང་དང་གྲུབ་འབྲས་གང་འཚམ་ཡོད་མཁན་ཙམ་ཡང་རེ་ཟུང་ལས་མེད། དགེ་རྒན་རང་གིས་རྩོམ་ལུགས་འཆད་མི་ཤེས་ཤིང་རྩོམ་ཡིག་འབྲི་ཤེས་ཀྱི་མེད་ན་སློབ་མ་ལ་ཁ་ཚ་དགོས་གཏུགས་ཀྱི་ལམ་སྟོན་རྣལ་མ་ཞིག་ཇི་ལྟར་བྱེད། སྐད་ཡིག་སློབ་ཁྲིད་དང་བསམ་བློའི་སློབ་གསོ་བཅས་ལ་གོ་བསྐོན་བློ་འགུག་གི་ནུས་སྟོབས་ཆེ་ཤོས་སུ་བརྩི་འོས་པའི་དགེ་རྒན་རྣམ་པའི་ཞན་ཆ་དང་ལོ་ངོ་སུམ་ཅུའི་རིང་གི་ཤེས་ཡོན་འཐུས་ཤོར་གྱི་རྒྱུ་རྐྱེན་གཙོ་བོ་ཞིག་ནི། དངོས་གཙོ་རྩོད་སྒྲུབ་རིག་པའི་ལག་ལེན་གྱི་ལྟ་བ་རྒྱུན་འཁྱོངས་བྱེད་རྒྱུར་དམིགས་དཔེ་མི་བལྟ་བར་དངོས་མེད་ལྐོག་གྱུར་རིང་ལུགས་པའི་ལྷ་སྒྲུང་གིས་སེམས་རྒྱུད་བསླུས་ཤིང༌། གཞན་དབང་གི་ལྟ་སྤྱོད་ཁོ་ནར་ཡིད་ཆེས་མི་བྱེད་ཀ་མེད་ངང་རང་ཉིད་ལ་སྒེར་ཚུགས་རང་བཞིན་གྱི་རང་མཚན་པའི་ལྟ་བ་དང་བསམ་བློའི་ལངས་ཕྱོགས་ཏིལ་འབྲུ་ཙམ་ཡང་མེད་པ་འདི་དང༌། ཤེས་ཡོན་གྱི་ཚབ་ཏུ་ལག་ཁྱེར་དང་ཀུན་སྤྱོད་ཉམས་མྱོང་བེད་སྤྱོད་གཏོང་བཞིན་པའི་དགེ་རྒན་རྣམ་པའི་རྩོམ་འབྲིའི་ཉམས་མྱོང་དང་ཤེས་ཚད་ཀྱིས་ལྡང་གིན་མེད་པ་འདིས་ཀྱང་ཤུགས་རྐྱེན་ངེས་ཅན་ཐེབས་ཡོད་ངེས་རེད།
སློབ་གྲྭའི་ཁོར་ཡུག་ན་དམངས་གཙོ་ཡང་མེད།
ཁོར་ཡུག་གང་འདྲ་ཞིག་ལ་མཚོན་ན། ལས་དོན་ཅི་ཞིག་སྒྲུབ་དགོས་ཀྱང་རྩ་བའི་ཆ་རྐྱེན་ཞིག་ལ་བརྟེན་ནས་ཁྲིམས་དང་སྒྲིག་གཞིའི་ནང་དོན་ཐད་ཀར་བ་དེ་རང་དབང་དང་གུ་ཡངས་ཀྱི་ངོ་བོར་གཏན་འབེབ་བྱེད་དགོས། སློབ་གྲྭའི་ཁོར་ཡུག་ནས་མི་ཚང་མར་བསམ་བློ་བཏང་ནས་ལས་ཀ་བྱེད་རྒྱུའི་དབང་ཆ་ཡོད་པས། ཡོད་ཚད་རང་གི་འདོད་པ་དང་བསྟུན་ནས་ཁྲིམས་དང་སྒྲིག་གཞིར་བཅོས་མི་རུང༌། སློབ་གྲྭའི་འཛིན་སྐྱོང་གི་དམིགས་ཡུལ་གཏད་ཕྱོགས་ལ་གང་ཟག་སྒེར་གྱི་འདུ་ཤེས་འཛིན་སྟངས་ཀྱིས་ཤན་ཤུགས་ཐེབས་མི་རུང་བས། སློབ་གྲྭའི་ཉིན་རེའི་བྱེད་སྒོ་དང་མ་འོངས་པའི་ལས་འཆར་ཡོད་ཚད་ཐུན་མོང་དང་འདྲ་མཉམ་གྱི་རྣམ་པའི་ཐོག་ནས་གྲོས་མོལ་བྱེད་དགོས་པ་ལས། སློབ་སྤྱིའམ་དབུ་འཛིན་སུས་ཀྱང་དབང་ཆ་བེད་སྤྱོད་བཏང་ནས་ཐག་གཅོད་བྱེད་མི་ཆོག སློབ་གྲྭ་ནི་སློབ་གྲྭ་ཉིད་ཡིན་པས་སློབ་གྲྭའི་ཁོར་ཡུག་ནས་མི་སུས་ཀྱང་རང་གི་དགའ་མོས་འདོད་ཕྱོགས་ལྟར་བྱེད་སྒོ་སྤེལ་བར་དགག་བྱ་འདོན་པའི་དབང་ཆ་ཡོད། དཔེར་ན། འཛིན་གྲྭ་འཚོགས་རྒྱུ་བློས་གཏོང་གིས་དགེ་སློབ་ལས་གསུམ་དང་བཅས་པ་དབང་ཞུ་བ་དང་ཆོས་ཉན་དུ་གཏོང་བ། རང་གི་འདོད་མོས་ལྟར། རིན་པོ་ཆེའི་རིགས་འདྲ་མིན་གདན་འདྲེན་ཞུས་ཏེ་གསུང་ཆོས་གནང་དུ་འཇུག་པ། རང་ལ་འདོད་མོས་མེད་པའི་ལས་འཆར་ཅི་རིགས་ཀྱིས་གཞུང་སྒེར་དང་འཕྲལ་ཕུགས་གང་ལ་ཕན་ཐོགས་ཀྱི་ཡོད་རུང་དེ་འདྲའི་བསམ་ཚུལ་འདོན་མཁན་ལ་ཁ་རྡུང་དང་གནོན་ཤུགས་དྲག་པོ་གཏོང་བ། གོང་རིམ་ལ་ཆོག་མཆན་ཞུ་མི་དགོས་པར་སློབ་གྲྭ་གཞུང་ལ་རིན་གོང་ཆེས་མཐོ་བའི་མཆོད་ཆས་སྣ་ཚོགས་རང་སྣང་གང་དྲན་གྱིས་ཉོ་སྒྲུབ་བྱེད་པ་བཅས་ནི། སློབ་སྤྱི་ཞིག་གི་དབང་ཚད་ལས་བརྒལ་ཞིང་དམངས་གཙོའི་སྤྱི་འགྲོས་དང་འགལ་བའི་སྒེར་གཅོད་ཀྱི་བྱ་སྤྱོད་ལག་ལེན་བསྟར་བ་ཡིན།
སྤྱིར་བཏང༌། ཟང་ཟིང་གི་འཚོ་བར་ཕུགས་རེ་བཅོལ་ཞིང་འཁོར་བ་བློས་གཏོང་གི་གྲལ་དུ་མ་ཚུད་པའི་བོད་མི་སློབ་གྲྭ་བ་ཞིག་ལ་ཆ་བཞག་ནའང༌། འཚོལ་འདོད་པའི་ཕུགས་བསམ་དང་བགྲོད་འདོད་པའི་ལམ་ཁ་ནི། ཆེས་བདེ་འཇགས་ཤིག་མིན། ཕལ་ཆེར། གང་ཟག་གི་དབང་སྒྱུར་འོག་ན་ལྟ་བ་གཅིག་དང་སྐད་ཆ་གཅིག་ལས་བཤད་མི་ཆོག་པའི་ཚད་ཐིག་ཅིག་ཡོད་པས་ཡིན་སྲིད། སློབ་གྲྭའི་ཁོར་ཡུག་ན་འདུར་རྒྱུག་དང་འཚག་འཕག་གིས་བྲེལ་བའི་བྱིས་པ་སྣབས་བླུག་ཚོ་གཙོས་པའི་ན་གཞོན་སློབ་ཕྲུག་རྣམས་ཀྱི་དགོས་མཁོ་དང་བསམ་བློའི་རང་དབང་ལ་ཀླད་རྙིང་མཁྲེགས་འཛིན་པ་དང་དབང་ཆ་ལོག་སྤྱོད་པ། དཔོན་ཉམས་རིང་ལུགས་པ་སོགས་ཀྱི་སྒེར་གཅོད་ཀྱི་བྱ་སྤྱོད་ལག་ལེན་བསྟར་མུས་ཡིན། འདིའི་དཔེ་མཚོན་ཡག་ཤོས་གཅིག་ནི། ༢༠༠༨ ལོའི་ཕྱི་ཟླ་བཅུ་གཅིག་པའི་ནང་ང་གཞུང་འབྲེལ་ལས་དོན་ཞིག་གི་ཆེད་མ་སུ་རི་བོད་ཁྱིམ་སློབ་གྲྭར་འགྲོ་དགོས་བྱུང༌། སྐབས་དེར་སུ་ཇ་སློབ་གྲྭའི་སློབ་མ་ཞིག་གིས་སྐད་ཆ་འདི་འདྲ་ཞིག་བཤད་མྱོང༌། “སློབ་མའི་ཤེས་ཡོན་ཡར་རྒྱས་འགྲོ་བ་ལ་དགེ་རྒན་ཡག་པོ་དགོས་ཀྱི་འདུག ལྷག་པར་དུ་བོད་ཡིག་དགེ་རྒན་ཚད་ལྡན་དགོས་ཀྱི་འདུག ཅེས་བསམ་འཆར་ཡང་ཡང་བཏོན་མྱོང་ཡོད། ཡིན་ནའང༌། ང་ཚོའི་སློབ་སྦྱོང་ཡར་རྒྱས་འགྲོ་གི་ཡོད་པའི་སྒྲུབ་བྱེད་དུ། བོད་ཡིག་གི་ཕྱོགས་ནས་ཁྱེད་ཚོ་སློབ་གྲྭ་གཞན་གྱི་སློབ་ཕྲུག་ལས་སློབ་སྦྱོང་ཚད་མཐོ་བ་དང་ཡག་པོ་ཡོད་པ་ནི། ད་ལྟའི་དགེ་རྒན་རྣམ་པའི་བཀའ་དྲིན་རེད། ཅེས་བཀའ་གནང་བ་ཙམ་ལས། དགེ་རྒན་ཚད་ལྡན་ཞིག་འཚོལ་ཆོག་པའི་ཁས་ལེན་གཏན་ནས་གནང་གི་མི་འདུག” ཅེས་ང་ལ་སྙིང་གཏམ་གྱི་ཚུལ་དུ་བཤད་པའི་སྐད་ཆ་འདི་དག་ནི། དོན་ངོ་མའི་ཆ་ནས༌། སློབ་མའི་ཤེས་ཡོན་དང་མི་ཚེའི་མདུན་ལམ་སོགས་ལ་ཐད་ཀར་འབྲེལ་བ་ཡོད་སྟབས། སློབ་མའི་ཁ་གཅོད་ཐབས་ཙམ་གྱི་ལན་ཞིག་བརྒྱབ་ནས་རང་དགར་འཇོག་འོས་པ་ཞིག་ག་ལ་ཡིན། སློབ་གྲྭའི་དབང་འཛིན་པ་རེ་འགས། དགེ་སློབ་ལས་གསུམ་གྱི་བསམ་འཆར་ལ་རང་གི་ཞེ་འདོད་ལྟར་འགྲེལ་བཤད་རྒྱག་པ་དང་ཉམས་མྱོང་བཤད་པ། དཔེ་མཚོན་ལོ་རྒྱུས་སྣ་ཚོགས་བགྲངས་ནས། མཐར་དབྱེ་ཞིབ་དང་གྲོས་བསྡུར་བྱེད་མི་དགོས་པར་གནད་དོན་ཡོད་ཚད་རང་གིས་ཐག་ཆོད་པར་བྱེད་པས་ན། སློབ་གྲྭའི་ཁོར་ཡུག་ན་དམངས་གཙོ་ཡང་མེད། མ་གཞི་ཡིན་རྒྱུ་རེད། ཤེས་རིག་མེད་པའི་མི་ལ་རྨོངས་དད་རང་རློམ། ཨུ་ཚུགས་ལས་རེ་ས་གཞན་མེད། ཡང་གཅིག་བཤད་ན། སློབ་སྤྱི་འགའ་རེས། སློབ་གྲྭའི་ཁོར་ཡུག་ནི་རང་གིས་ཚོགས་བསགས་སྒྲིབ་སྦྱོང་བྱེད་སའི་དགོན་པ་ཆུང་ཆུང་ཞིག་གི་ངོ་བོར་སྒྱུར་བཞིན་པའི་གནས་བབ་དངོས་ལ་ཞིབ་འཇུག་གིས་ཐག་གཅོད་དང་དོ་དམ་ནན་པོ་བྱེད་མཁན་གཅིག་ཀྱང་འབྱུང་གིན་མེད་པ་འདི་ཅི་འདྲའི་ཡིན་མདོག་ཁ་བ་ལ།
མདོར་ན། གཏོང་ཡིག་འབྲི་མི་ཤེས་མཁན་དེ་སློབ་ཕྲུག་གཅིག་པུ་མིན།
ཁྱོན་ཡོངས་ནས་འགྱུར་བ་ཞིག་གཏོང་རྒྱུ་གལ་ཆེན་པོ་རེད། འགྱུར་བ་འདི་མཐོ་རིམ་གནད་ཡོད་མི་སྣའི་ཤེས་ཡོན་ཡར་རྒྱས་གཏོང་ཕྱོགས་དང་ཀླད་པར་བཤགས་བཅོས་བྱེད་སྟངས་ནས་རིམ་བཞིན་མགོ་འཛུགས་དགོས་པ་ཞིག་ཡིན། རྒྱུ་མཚན། བོད་ཀྱི་སྐད་དང་ཡི་གེ་བེད་སྤྱད་ནས་གཏོང་ཡིག་ཙམ་ཡང་འབྲི་མི་ཤེས་མཁན་དེ་སློབ་ཕྲུག་གཅིག་པུ་མ་རེད། དེང་སང་དགེ་རྒན་གྱི་ཕྱག་ལས་གནང་བཞིན་པའི་དགེ་རྒན་གསར་རྙིང་གཉིས་ཀའི་ནང་ན་སློབ་ཚན་འཁྲིད་མི་ཤེས་མཁན་དང་གཏོང་ཡིག་འབྲི་མི་ཤེས་མཁན་ཡོད་པར་མ་ཟད། སྙན་ཞུ་དང་མི་སྣ་ངོ་སྤྲོད། ལོ་འཁོར་ལས་བསྡོམས་སོགས་ཀྱིས་མཚོན་པའི་རྒྱུན་སྤྱོད་ཡིག་རིགས་ཙམ་ཡང་འབྲི་མི་ཤེས་པའི་དབུ་འཛིན་དང་སློབ་སྤྱི། དྲུང་ཡིག གཞུང་ཞབས་པ་སོགས་ཆེས་མང་པོ་ཞིག་གཞུང་གི་རྐུབ་བཀྱགས་སྟེང་སྟག་ནང་བཞིན་འགྱིང་བསྡད་ཡོད། འདི་དག་ལས་གཅིག་ལ་དཔེ་མཚོན་ལོ་རྒྱུས་ཐུང་ངུ་ཞིག་ཞུས་ན། འདི་ལྟར། སློབ་ཕྲུག་གྲངས་འབོར་གཅིག་སྟོང་ཟིན་གྲབས་ཡོད་པའི་སློབ་གྲྭ་ཞིག་ཡོད། སློབ་གྲྭ་དེའི་སློབ་སྤྱི་ནི་སྤྱིར་བཏང་སྐད་ཆ་མཐོ་དམའ་ཅི་ཞིག་བཤད་དགོས་ཀྱང་ཁ་ཤོམ་ཆེ་ཞིང་དབང་སྡུད་ཅན་ཞིག་ཀྱང་ཡིན། ཉིན་ཞིག་ལས་དོན་ཞིག་ཤེས་རྟོགས་འབྱུང་ཆེད་གསལ་བསྒྲགས་ཐུང་ངུ་ཞིག་བྲིས་ནས་བཀྲམས་ཡོད་ལ། བོད་ཡིག་དགེ་རྒན་ཞིག་གིས་སེམས་ཀྱིས་མ་བཟོད་པར་མི་མང་པོ་ཡོད་ས་ནས་གསལ་བསྒྲགས་དེའི་ནང་ཡིག་ནོར་ཧ་ཅང་མང་པོ་ཡོད་པ་གསལ་བཤད་བྱས། དེ་ནས་དུས་ཡུན་ཅུང་མ་འགོར་བར་སློབ་སྤྱིས་བོད་ཡིག་དགེ་རྒན་དེ་ཡིག་ཚང་དུ་སྐད་བཏང་ནས། ༼རྒན་ལགས་ཀྱིས་གསལ་བསྒྲགས་ཤོག་ལྷེ་འདི་ཡིག་ནོར་གྱིས་ཁེངས་འདུག ཅེས་གསུངས་ཡོད་ས་རེད། གསལ་བསྒྲགས་འདིའི་ནང་ཡི་གེའི་དག་ཆ་ནོར་བ་ཞིག་ཡོད་ན་སྙུག་གུ་དམར་པོས་ནོར་རྟགས་དགོད་རོགས་༽ཞེས་ཅི་མི་སྙམ་པར་སྒམ་ཚུགས་ཀྱིས་གླེང༌། བོད་ཡིག་དགེ་རྒན་གྱིས་གསལ་བསྒྲགས་ཀློག་ཞོར་ནོར་རྟགས་འགོད་ཞོར་གྱིས་དག་ཆ་ནོར་བ་མི་ཉུང་བ་ཞིག་ཡོད་པ་རེ་རེ་བཞིན་ངོ་འཕྲོད་པར་བྱས་པ་ན། སློབ་སྤྱི་ཅུང་ཟད་ཡིད་མ་འཐད་པའི་ཚུལ་དུ་རྗེས་མ་ནས་དོན་དག་འདི་འདྲའི་རིགས་འབྱུང་སྐབས་ང་ལ་ཐད་ཀར་འབྲེལ་བ་གནང་དགོས་པ་ལས། མི་མང་པོ་ཡོད་ས་ནས་ཁྱབ་བསྒྲགས་བྱེད་མི་ཆོག་པའི་བཀའ་རྒྱ་བཏང་ཡོད་ལ། བོད་ཡིག་དགེ་རྒན་གྱིས་གསལ་བསྒྲགས་དེ་འབྲི་མཁན་དྲུང་ཡིག་ཡིན་ཤག་བྱས་ཡོད་པའི་གསལ་བཤད་དང་སློབ་སྤྱི་ལ་དགོངས་དག་ཞུ་དགོས་བྱུང་བའི་གནས་ཚུལ་ཡ་ང་ཞིང་ཉན་མི་སྤྲོ་བ་འདི་འདྲ་ཡང་གོ་རྒྱུ་འདུག མདོར་ན། བཙན་བྱོལ་སྤྱི་ཚོགས་འདི་ནི་སྐུ་ངོ་དང་སྐུ་སྲས་རྣམ་པའི་དབང་འཛིན་སྲིད་བྱུས་འོག་ཡོད་སྟབས། གཞུང་གི་ལས་དོན་ཐོག་ཤེས་ཡོན་དང་ལྷག་བསམ་ཤ་ཚ་ཞེན་ཁོག་གིས་ལྡང་གིན་མེད་པའི་འཐུས་ཤོར་རབས་དང་རིམ་པ་འབྱུང་མུས་ཡིན་པ་ཤེས་བཞིན་དུ། ༧གོང་ས་མཆོག་མ་ཡིན་པའི་མི་སུ་ཞིག་གིས་བཤད་ཀྱང་ངོས་ལེན་བྱེད་སྲོལ་མེད། གལ་སྲིད་གནས་སྟངས་འདི་ལ་འགྱུར་བ་ཞིག་གཏང་མ་ཐུབ་ཚེ། རིགས་གཅིག་རྐང་འཛིན་པ་དང་ཡིག་ངག་གཉིས་ཐོག་ནས་བོད་ཀྱི་སྐད་ཡིག་བེད་སྤྱོད་བཏང་ནས་སྔར་སྲོལ་རྒྱུན་འཛིན་དང་སྔར་མེད་གསར་གཏོད་བྱེད་ཕྱོགས་ལ་ནུས་པ་ཐོན་པའི་མི་རབས་གསར་བའི་དཔུང་ཁག་ཅིག་སྐྱེད་སྲིང་བྱེད་རྒྱུ་ཡིན་ཟེར་བ་ནི། རྨི་ལམ་ནང་ནས་ཀྱང་འགྲུབ་མི་སྲིད་པའི་གནད་དོན་ཞིག་ཁ་ནས་གླེང་བ་ཙམ་དུ་ཟད་དོ།།
སོག་སྨོན་ལགས་ཀྱིས་དུས་ཡུན་རིང་མོ་ཞིག་གི་རྗེས་སུ་རང་ཉིད་དགེ་རྒན་བྱེད་པའི་ཉམས་མྱོང་ལས་གྲུབ་པའི་བསམ་ཚུལ་འགའ་ངེད་ཚོའི་སྤྱན་ལམ་འབུལ་བ་འདིར་སྙིག་ཐག་པ་ནས་ཐུགས་རྗེ་ཆེ་དང་། ཁྱེད་ཀྱི་བཅོས་མིན་གྱི་བསམ་ཚུལ་རྣམས་ངོ་མ་ང་རང་ཚོའི་སྤྱི་ཚོགས་ཀྱི་སྟེང་འཕྲད་དང་འཕྲད་བཞིན་ཡོད་ལ། མ་འོངས་པར་ཡང་དེ་ལྟ་བུའི་དཀའ་ངལ་རྣམས་དོར་ཕྱིར་ཁྱེད་ཀྱི་བསམ་ཚུལ་རྣམས་ལམ་སྟོན་གྱི་སྒྲོན་མེ་ལྟ་བུ་ཞིག་ཀྱང་རེད་འདུག་
ཁྱེད་ཀྱི་བསམ་ཚུལ་འདི་བཞིན་སྤེལ་ནས་སྤྱི་ཚོགས་ཀྱི་ནང་ཁྱེད་ལ་མཐོང་སྟངས་མི་འདྲ་བ་ཞིག་འགྱུར་སྲིད་ཀྱང། ཁྱེད་ཀྱིས་ཞུམ་པ་མེད་པར་སྙིང་སྟོབས་གསར་བ་ཞིག་སྐྱེས་ནས་མ་འོངས་པར་ཡང་བོད་མི་རིགས་དང། ལྷག་པར་རྩ་ཆེའི་སྐད་ཡིག་དེ་མི་ཉམས་རྒྱུན་འཛིན་དང་ཉམས་པ་སླར་གསོའི་ཆེད་ཞབས་འདེགས་ཞུ་ཐུབ་རྒྱུའི་ངའི་རེ་བ་དང་སྨོན་ལམ་ཉག་གཅིག་དེ་ཡིན།
བཀྲ་ཤིས་བདེ་ལེགས།
དོན་ངོ་མ་བཤད་ན་ཡག་པོ་བྲིས་འདུག སོག་ཚང་ཟེར་བའི་མྱི་ལྡང་འདི་སྔོན་མ་ཞིག་ནས་གོ་མྱོང་དང་ཐོས་མྱོང་ཡོད། ད་ལྟ་གང་ནཡོད་་ཧ་གོ་མེད། འདི་ཚོ་བོད་གཞུང་གིས་བདག་རྒྱག་དགོས་པའི་གྲས་ཡིན་ཁོ་ཐག་རེད། ངས་བལྟས་ན་ཕལ་ཆེར་ཧི་མ་ལ་ཡི་རི་རྒྱུད་ཅིག་ན་ལོས་ཡོདབསམ་གི གནས་མཆོག་རྡོ་གདན་ནས། ས་འདིར་བོད་ཡིག་སྐོར་ཡག་པོ་ཞིག་མེད་པས་འབྲི་ས་མི་འགྲོ་གི
སོག་སྨོན་ལགས། ཁྱེད་རང་གི་ལྟ་ཕྱོགས་ནོར་འདུག བཙན་བྱོལ་ཁྲོད་ཀྱི་་སློབ་གྲྭ་གང་གི་ནང་དུ་ཡང་དགོན་པ་གྲྭ་ཚང་གི་འདོན་རྟ་དབྱངས་དང་། ཐིག་རྡུལ་ཚོན། རྡུང་ཕྱག་ལེན་ཡོད་ཚད་སློབ་གྲྭའི་ཁོར་ཡུག་ལ་ཁྱེར་ཡོང་ནས་སློབ་ཕྲུག་ཚོར་འདོད་མོས་མེད་བཞིན་དུ་བོད་ཀྱི་རིག་གཞུང་རེད་ཅེས་བཙན་གྱིས་སྦྱང་སུས་བཅུག་སོང༌བཅུག་མེད། དེ་ནི་ཁྱེད་རང་གིས་བཙན་བྱོལ་བོད་གཞུང་དང་ཤེས་རིག་ལས་ཁུངས་ལ་མི་འདོད་པའི་སྐད་ཆ་བཤད་པ་ཞིག་རེད། དོན་དམ་པའི་ཁྱེད་རང་གིས་ཁ་གཡས་སྐོར་གཡོན་སྐོར་ཅི་ཙམ་བྱས་ཀྱང༌། ༸གོང་ས་སྐྱབས་མགོན་ཆེན་པོ་མཆོག་གིས་སློབ་གྲྭ་ཚོས་ཚད་མའི་རིགས་ལམ་སྦྱང་དགོས་ཞེས་བཀའ་ཡང་ཡང་གནང་བ་དེར་དགག་པ་རྒྱག་གི་ཡོད་པ་རེད་ལ། དེ་ནི་བློ་གཟུར་བོར་གནས་པའི་སྐད་ཆ་མ་རེད། ཁྱེད་རང་ལ་སློབ་སྦྱོང་དེ་མེད་པས་རེད། གལ་སྲིད་ཁྱེད་རང་ལ་སློབ་སྦྱོང་དེ་ཡོད་ན་དེ་ཡག་རབས་དང་བཟང་རབས་མང་པོ་ཞིག་བཤད་རྒྱུ་ཡོད་པ་རེད་སྙམ།
དགེ་རྒན་ཡིག་གཟུགས་མི་ཤེས་མཁན་ཚོས་ཤེས་རིག་ཚོགས་ཆེན་ཐེངས་ལྔ་པའི་གྲོས་ཆོད་ཁག་ལ་ཞིབ་ཀློག་གྱིས་མ་མཐར་ཡང་ཡིག་གཟུགས་རེ་སྦྱོང་དགོས་པ་ལས་དེ་མུར་གཞུང་གི་གླ་ཕོག་རྐྱང་པར་བསམ་ནས་སྡོད་ཐབས་མེད། ཡིག་གཟུགས་གལ་ཆེ་མིན་དང་ཕན་འབྲས་སོགས་ཀྱི་སྐོར་ཤེས་རིག་ཚོགས་ཆེན་ཐེངས་ལྔ་པའི་གྲོས་ཆོད་ནང་དམིགས་བསལ་ཡིག་གཟུགས་སྐོར་གྲོས་ཆོད་ཅིག་འཇོག་གནང་མཛད་འདུག་པ་ལས་གསལ་བས་འདིར་བསྐྱར་འབྲི་མ་བྱས། དགེ་རྒན་ཡིག་གཟུགས་སློབ་མི་ཐུབ་མཁན་ཚོས་ཧམ་བཤད་བྱས་ཏེ་ཁུངས་འཁྱོལ་དཀའ་བས་དེ་ལུགས་མཛོད།
དགེ་རྒན་གྱི་འགན་འཁུར་དང་ཤེས་རྟོགས་གཉིས་ཀྱི་གང་གལ་ཆེ་བ་འདུག་གམ།
ཟ་དང་ཚོང་ཁང་།མགྲོན་ཁང་སོགས་ཀྱི་སྒོ་བྱང་འབྲི་དགོས་ན་ངའི་རྩར་ཤོགཐ་ན་སུམ་རྐང་སྤེལ་དགོས་ནའང་ངས་ལཎྫ་དང་ཝ་ཏི་སོགས་ཡག་པོ་འབྲི་ཤེས་ཀྱི་ཡོད།
ཡིག་གཟུགས་སྙིང་རྗེ་བོ་འབྲི་མཁན་ཞིག་དངོས་གནས་ཡོད་ན་ད་ནི་སྨྱུ་གུ་བཟུང་ནས་ཡོང་རན་རེད། རྡ་རམ་ས་ལ་གཙོས་པའི་བོད་མི་གནས་སྡོད་ཀྱི་ས་ཁུལ་གང་སར་སོང་ནས་སྒོ་བྱང་དེ་དག་ཀྱང་སྙིང་རྗེ་བོ་དང་དག་མོ་ཞིག་འབྲི་དགོས་པར་འདུག
བཞུགས་སྒར་གྱི་ཟ་ཁང་ཚོང་ཁང་དག་གི་སྒོ་ཁར་བཀལ་བའི་ཡི་གེ་འཁྱར་རེ་འཁྱོར་རེ་དེ་དག་ཕལ་ཆེ་བ་ནི་རྡ་ཤོད་བོད་ཁྱིམ་སློབ་གྲྭར་འགྲོ་སའི་ལམ་བར་གྱི་རྒྱ་གར་བ་དེ་དག་གིས་བྲིས་པ་རེད།
བོད་པ་ཚོར་ག་དུས་ཡིན་ནའང་། ཁ་བཤད་དང་ལག་ལེན་གཉིས་ཀྱི་བར་ཐག་ལོ་ཟླས་ཆོད་ཡོད།
ཤེས་རིག་ཚོགས་ཆེན་ཞིག་འགུལ་ནས་འཇམ་ཅག་གེར་བུད་འགྲོ་ནི་རེད། ཚོགས་ཆེན་བཀོད་་སྒྲིག་གནང་མཁན་ཚོས་ཚོགས་ཆེན་ཞིག་ཚོགས་པས་ལས་འགན་འགྲུབ་སོང་སྙམ་ནས་བསྡད་ཡོད་ནི་རེད། ལག་ལེན་བསྟར་བའི་གོ་རིམ་དང་ཆོད་སེམས་ཤིག་མེད་ན་དཀའ་མོ་རེད། ཤེས་ཡོན་དང་སྐད་ཡིག་གི་ཆེད་དུ་སེམས་ནས་ངུ་འབོད་བྱེད་མཁན་ཚོ་ལ་དབང་ཆ་ང་གོ་སྐབས་གང་ཡང་མེད་ཙ་ན་ཤེས་ཡོན་དང་སྐད་ཡིག་གི་གནས་བབ་འདི་སུས་ཐག་གཅོད་དགོས་ནི་རེད།
སོག་སྨོན་ལམ་ལགས་ཀྱིས་བཤད་པ་ཤིན་ཏུ་བདེན། ལོ་འགའི་ཡར་སྔོན་ལ་ངས་སློབ་གྲྭ་ཞིག་ནས་སློབ་དགེ་བྱེད་བཞིན་པའི་སྐབས་སུ། དགེ་རྒན་འགས་ནང་ལས་ནག་བང་སྟེང་བྲིས་ཏེ། སློབ་ཕྲུག་ཚོར་ཕབ་བཤུས་བྱེད་བཅུག་ནས་མིག་གིས་ལྟ་ཙམ་ཡང་མི་བྱེད་པར་འགྲིག་རྟགས་རྒྱག་བཞིན་པ་མཐོང་ནས་བློ་ཕམ་བྱུང་སོང་། ཡིན་ནའང་སློབ་ཕྲུག་མང་ཆེ་བ་དེ་ལ་དགའ་གི་ཡོད་པ་རེད། ཤ་ཚ་ཚ་བྱས་ནས་སྟངས་འཛིན་བྱེད་མཁན་གྱི་བོད་དགེ་ཚོ་ཁོང་ཚོའི་མིག་ནང་གི་ལིང་ཏོག་ནང་བཞིན་ཆགས་ཀྱིན་འདུག
བོད་ཀྱི་བུ་ཕྲུག་རྣམས་ལ་འཇིག་རྟེན་འཁོར་བ་ཡར་རྒྱས་གཏོང་ཐུབ་པའི་རིག་གནས་མ་བསླབ་པ་འཇིག་རྟེན་འཁོར་བ་རྩ་མེད་བཟོ་རྐྱེན་གྱི་རིག་གནས་བསླབ་སྡོད་པ་ཡིན་ན་མི་རིང་བ་ཁ་བ་རི་པའི་འཇིག་རྟེན་འཁོར་བ་སྟོང་ངེས་རེད།
གྲྭ་པ་དང་ཨ་ནེ་ཚང་མས་འཇིག་རྟེན་འཁོར་བ་སྤངས་གང་ཐུབ་བྱས་མ་ཟད་སློབ་མ་རྣམས་ཀྱིས་ཀྱང་འཇིག་རྟེན་འཁོར་བ་སྤངས་རྐྱེན་གྱི་རིག་གནས་ལ་བསླབ་པ་སློབ་གཉེར་བྱེད་སྡོད་པ་ཡིན་ན། འོ་ན་ད་སུ་ཡིས་ཁ་བ་རི་པའི་འཇིག་རྟེན་འཁོར་བ་སྒྲུབ་དགོས་སམ་སམ་སམ་སམ། འཇིག་རྟེན་ཕ་ཆོས་ནི་ངེས་པ་དུ་ཡར་རྒྱས་གཏོང་དགོས།
སུད་སི་ལྟ་བུར་ཆ་མཚོན་ན་ཀམ་པུང་དྲའི་ནང་དུ་པར་རྒྱག་པའི་ཡིག་གཟིགས་མ་གཏོགས་ལག་པས་བྲིས་པའི་ཡིག་གཟིགས་དེ་ལས་ཁུངས་རྣམས་ཀྱིས་ངོས་ལེན་བྱེད་ཀྱི་མེད། དེང་རབས་རྙིང་པའི་སྐབས་སུ་ལག་བྲིས་དེ་གལ་ཆེན་པོ་ཡིན་ཀྱང་དེང་སང་ཀམ་པུང་དྲའི་དུས་རབས་འདིར་ལག་བྲིས་ཡིག་གཟིགས་དེར་དེ་ཙམ་དོན་དག་མི་འདུག་སྙམ།
ཡིག་གཟུགས་སྣ་གཅིག་ཡག་ན་ཆོག ཡིག་གཟུགས་ཚང་མ་ཤེས་དགོས་པའི་ངེས་པ་མེད། ཡིག་གཟུགས་ནི་ཐང་ཀ་འབྲི་རྒྱུ་དེ་མ་རེད། ཡིག་གཟུགས་ནི་རི་མོ་རིགས་གཅིག་གི་ལམ་ནས་དོན་དག་ཅིག་སྟོན་རྒྱུ་དེ་རེད།
སོག་སྨོན་ལམ་ལགས་ཀྱིས་གསུངས་དང་ལ་དག་བུ་མོ་དེས་ལབ་པ་བརྒྱ་ཆ་བརྒྱ་བདེན་པ་རེད།དེ་ལྟ་བུ་སློབ་གྲྭ་ཁག་ཏུ་མང་པོ་ཡོད།ཤེས་རིག་བཀའ་བློན་དང་བཀའ་བློན་ཁྲི་པ་གཉིས་ཀྱི་ངོ་མ་ལག་ལེན་་་་་་་་་་་་་་་
སོག་སྨོན། ངས་གནད་དོན་མང་པོ་ཞིག་གཞིར་བཞག་ནས་འདང་རྒྱག་སྐབས། བོད་ཡིག་གི་དགེ་རྒན་ནི་བཟང་བཙོན་ལ་གནས་པའི་བཙོན་མ་ལྟ་བུ་ཞིག་རེད། ་་གང་ལྟར་བོད་ཡིག་གི་དགེ་རྒན་དེ་ནུས་པ་འདོན་མི་ཐུབ་པའི་ར་བ་ཞིག་ཏུ་ལྷག་འདུག་པའི་མྱོང་ཚོར་ཤིན་ཏུ་ཆེ། དེའི་ཕྱིར་ལོ་གསར་པ་འདི་དང་བསྟུན་ནས་ངས་སློབ་དཔོན་ཐོན་མིའི་མཛད་རྗེས་དང་ལོ་རྒྱུས་ལ་ཕྱོགས་ཡོངས་ནས་རྗེས་དྲན་བྱེད་འོས་པའི་གླེང་བརྗོད་ཅིག་འབྲི་ཁུལ་བྱས་ཡོད་་་་་་འདི་ཡང་ཕྱོགས་གཅིག་ནས་ཨུ་ཐུག་པའི་སྐད་ཆ་ཡིན།
རྩོམ་ཡིག་འདི་ལ་ཞིབ་ཚགས་པོ་དང་རྣོ་བསམ་གྱི་གཤིས་ཤིག་འདུག་པས་ང་ཚོས་ངེས་པར་དཔྱད་གཞི་བྱ་འོས་པ་ཤིག་འདུག
རྩོམ་ཡིག་འདི་བཀླག་རྗེས་འདང་རེ་བརྒྱག་རྒྱུ་ཡོང་གི།ངོ་མ་དཔྱད་བརྗོད་ཡག་པོ་བྲིས་འདུག
ཐུགས་རྗེ་ཆེ་ཞུ།
ཡིག་གཟུགས་སྦྱོང་རྒྱུར་མི་དགའ་བའི་རྒྱུ་མཚན་དེ་སོ་སོ་དགེ་རྒན་གྱི་གོ་སར་ཞུགས་ཏེ་ཡིག་གཟུགས་ཤིག་ཀྱང་ཤེས་མེད་པའི་རྟགས་རེད། ད་དུང་མི་འདི་ཚོས་རང་ཉིད་དགེ་རྒན་མིན་པའི་སྐབས་སུ་དགེ་རྒན་གྱིས་མ་འཇོན་པ་ཤས་གཅིག་བཤད་མཁན་དེ་རེད། ད་ལྟ་སོ་སོ་དགེ་རྒན་གྱི་གོ་སར་འགྱིངས་པའི་སྐབས་ཅི་ཞིག་འཇོན་ཡོད་ཞིབ་རྩིས་ཤིག་རྒྱོབ་དང། དགེ་རྒན་ཞིག་གིས་ཡིག་གཟུགས་འབྲི་མ་ཤེས་པར་ཉིན་ལྟར་འཛིན་ཁང་དུ་ཡོང་ནས་ནག་པང་ཐོག་ཅི་ཞིག་འབྲི་རྒྱུ་ཡིན། དགེ་རྒན་རང་ཉིད་ཀྱིས་མ་ཤེས་པ་དེ་མི་གླེང་བར་ད་དུང་ཡིག་གཟུགས་སློབ་རྒྱུར་ཕན་ཐོག་མེད་པ་བཤད་པ་འདི་ངོ་མི་ཚའམ།
དེང་སང་བཙན་བྱོལ་ཁྲོད་འདི་འདྲའི་དགེ་རྒན་ཞིག་ཡོད་པ་སེམས་ལའང་དྲན་མ་མྱོང་།གོང་གི་རྩོམ་ཡིག་སྤེལ་མཁན་གྱི་དགེ་རྒན་འདི་སུ་རེད།སོག་སྨོན་ལམ་ཟེར་བ་ནི་གང་ནས་རེད།ནམ་ཞིག་ལ་གང་ཞིག་ཏུ་དགེ་རྒན་གནང་གི་ཡོད།འདིའི་གོང་གི་ཚན་པ་རེ་རེའི་ལྗིད་ཁོག་ཅན་གྱི་སྐད་ཆས་ང་རང་དྲངས་སོང་།ད་དུང་སློབ་གྲྭའི་ཁོར་ཡུག་ན་དམངས་གཙོ་ཡང་མེད་ཅེས་པ་ཤིན་ཏུ་ནས་དགའ་འོས་པའི་སྐད་ཆ་ཞིག་རེད་འདོད་སོང་།
ཉིན་ཁ་ཤས་གཞུང་དམངས་ཀུན་པོས་གསར་འགྱུར་འདི་གླེང་གི་རེད། དེ་ནས་ཉིན་ཤས་རྗེས་སླར་ཡང་རྒྱུན་ལྡན་ཆགས་ཡོང་གི་རེད།
ཡ ཡ པར་དུ་བཏབ་ནས་ཁྱེར་རྒྱུ་ཡིན། དགོང་མོར་ཞིབ་ཀློག་ཅིག་བྱ་ཡ།
དེ་རིང་གློ་བུར་དུ། སོག་ཚང་གིས་རྩོམ་ཡིག་ལྗིད་ཏིག་ཏིག་ཅིག་ཁྱེར་བྱུང་ཡ། ངོ་མ་རེད་ང་རང་ཡང་སློབ་གཞི་བཅོས་བསྒྱུར་གྱི་སྐོར་ལ་སེམས་ཚོར་ཡོད་མཁན་ཞིག་ཡིན་ལ། དེ་སྔོན་ནས་བསམ་ཚུལ་ཁག་འགའ་ཤས་སྟོན་མྱོང་། འོན་ཀྱང་ཁ་དང་ཞལ་ཐུག་པ་དང་། གཉིས་ནས་བོད་ཡིག་ལ་རིན་ཐང་མེད་དུས་དེའི་སྐོར་གྱི་སློབ་གསོ་ལའང་། བརྩི་མཐོང་མེད་པར་སྣང་། འོན་ཀྱང་དགེ་རྒན་བྱེད་མྱོང་བ་ཞིག་གིས་ངོས་ནས་འདི་ལྟར་བྲིས་ན། དོན་དངོས་དང་རྦད་དེ་འཚམས་པ་ཡོད། འདི་ཚོར་ངེས་པར་དུ་ཤེས་རིག་ནས་དོ་ཁུར་གཟབ་བཞེས་གནང་དགོས་སྙམ།
ཤེས་རིག་གི་ཚོགས་ཆེན་འདི་ཡིས་རྒན་ལགས་ཚོ། ཅུང་ངར་ཡོད་ཚོད་འདུག གང་ལྟར་དོན་དངོས་དང་འཚམས་པའི་རྩོམ་ཡིག་ཡག་པོ་ཞིག་བྲིས་འདུག་པས་རྒྱབ་སྐྱོར་བརྒྱ་ཆ་བརྒྱ་ལྷག་ཡོད་དོ།།