༧པཎ་ཆེན་སྐུ་ཕྲེང་བཅུ་བ་མཆོག་སྐུ་བཞུགས་སྐབས་བོད་རིགས་རྣམས་ཀྱིས་བྱ་བ་སྒྲུབ་བདེ་བོ་དང་སྲིད་ཇུས་བཟང་བོ་ཡོད་ནའང་། ཁོང་སྐུ་གཤེགས་རྗེས་བྱ་བ་སྒྲུབ་བདེ་བོ་མེད་པར་མ་ཟད་བོད་ཀྱི་སྐད་ཡིག་འཛིན་སྐྱོང་སྤེལ་གསུམ་ཐད་ས་ཆ་འགར་ལྟག་ཆུ་ཆད་པའི་རྫིང་བུ་ལྟར་གྱུར་འདུག་ཟེར།
བོད་ཀྱི་ན་གཞོན་གསར་བའི་དྲ་རྒྱའི་སྟེང་གཙང་ཁུ་ལུང་པ་ལོ་རྒྱུན་བཟང་པོས་གནས་ཚུལ་སྤེལ་བ་ལྟར་ན། ཟླ་སྔོན་མའི་ཚེས་ ༢༦ ཉིན་གྱི་དགུང་མོར་ཀྲུང་དབྱང་མི་རིགས་སློབ་གླིང་དུ། ༧པཎ་ཆེན་རིན་པོ་ཆེ་སྐུ་ཕྲེང་བཅུ་བ་རྗེ་བཙུན་བློ་བཟང་ཆོས་ཀྱི་རྒྱལ་མཚན་མཆོག་དགོངས་པ་གཞན་དོན་དུ་གཤེགས་ནས་མི་ལོ་ ༢༠ འཁོར་བར་མྱ་ངན་རྗེས་དྲན་གྱི་ཚོགས་འདུ་ཞིག་བསྡུས་པ་དང་། ཚོགས་འདིའི་སྟེང་རྒན་ཐུབ་བསྟན་ཕུན་ཚོགས་ལགས་ཀྱིས། རླབས་ཆེན་གྱི་བླ་མ་ཁོང་ནི་སྐུ་ཚེ་ཧྲིལ་བོར་བོད་མི་རིགས་ཀྱི་སྲིད་འབྱོར་རིག་གསུམ་དར་རྒྱས་ཀྱི་ཆེད་དུ། རྒྱལ་ཁབ་ཀྱི་རྩ་ཁྲིམས་ཚད་དུ་བཟུང་ནས་སྐུ་ལས་དཔག་མེད་བསྐྱོན་མཁན་ཞིག་དང་། བོད་མི་རིགས་ཀྱི་དོན་དུ་ཆེ་བ་རྒྱལ་ཁབ་ཀྱི་དཔོན་པོ་དང་དམའ་བ་བཙོན་པ་གནང་མྱོང་མཁན་གྱི་བླ་ཆེན་ཞིག་དང་རྒྱལ་གཅེས་པ་ཞིག མི་རིགས་ཀྱི་སྐྱབས་མགོན་ཞིག་ཡིན་པ་སོགས་ཀྱི་ངོ་སྤྲོད་གསུང་བཤད་གནང་འདུག་པར་མ་ཟད། ཁོང་གིས་སློབ་ཆེན་པ་ཚོས་རྗེས་ཕྱོགས་རིན་པོ་ཆེ་ཁོང་གི་རླབས་ཆེན་གྱི་མཛད་བཟང་ལ་སློབ་སྦྱོང་ཞུ་དགོས་པའི་བཀའ་སློབ་ཀྱང་གནང་ཡོད་འདུག
དེ་བཞིན་རྒན་མགོན་པོ་ལགས་ཀྱིས་རིན་པོ་ཆེ་མཆོག་གིས་བོད་ཅེས་པ་ནི་སྟོད་མངའ་རིས་སྐོར་གསུམ་དང་། བར་དབུས་གཙང་རུ་བཞི། སྨད་མདོ་ཁམས་སྒང་དྲུག་ཡོངས་སུ་འདུས་པའི་སྤྱི་ལ་ཟེར་བར་མ་གཏོགས་བོད་ལྗོངས་དང་མཚོ་སྔོན། ཀན་སུའུ། ཡུན་ནན་ལ་སོགས་པའི་ཡུལ་རང་ག་བ་ཞིག་ལ་བརྗོད་པ་མིན་པ་དང་། བོད་ཀྱི་འདས་དང་ད་ལྟ། འབྱུང་འགྱུར་སོགས་གང་གི་ཐད་ནས་བཤད་ནའང་། བོད་མི་རིགས་འདི་ཉིད་རང་གི་སྐད་དང་ཡི་གེར་བརྟེན་ནས་འཕེལ་རྒྱས་སུ་འགྲོ་དགོས་པ་ལས། དེ་ལས་ལྡོག་པའི་འཕེལ་རྒྱས་ཀྱི་ཐབས་ལམ་གང་ཡང་མེད་པའི་ལམ་སྟོན་གནང་འདུག་ལ། རྒན་ཚེ་དབང་ལྷ་མོ་ལགས་ཀྱིས། རླབས་ཆེན་གྱི་སྐྱེས་ཆེན་དམ་པ་ཁོང་གིས་མི་རིགས་ཀྱི་ཆེད་དུ་ངལ་བ་བརྒྱ་ཕྲག་ཁུར་དུ་བཞེས་ཤིང་། ཞུམ་མེད་ཀྱི་སྙིང་སྟོབས་ལ་བརྟེན་ནས་རྒྱལ་ཁབ་ཀྱི་རྩ་ཁྲིམས་དང་བསྟུན་ཏེ། བོད་ཀྱི་སྲིད་འབྱོར་རིག་གསུམ་དར་རྒྱས་ཡོང་བར་བླ་མེད་ཀྱི་མཛད་རྗེས་བཞག་གནང་མཛད་པར། ང་ཚོས་ཤེས་རྟོགས་དང་སློབ་སྦྱོང་བྱས་ཏེ་དམ་པ་གང་གི་མཛད་བཟང་མུ་མཐུད་རྒྱུན་སྐྱོང་ཐབས་བྱེད་དགོས་ཏེ། རིན་པོ་ཆེ་མཆོག་གིས་སྐུ་ཚེ་ཧྲིལ་བོར་སྐུ་ངལ་དང་ཐུགས་ངལ་ཚད་མེད་གནང་བ་ལྟར་མི་འཁྱོངས་ནའང་། བོད་ཀྱི་སྐད་ཡིག་དང་རིག་གཞུང་སྤྱི་དང་བྱེ་བྲག་ལ་འབད་པ་ལྷོད་མེད་བྱ་རྒྱུ་དང་། ལྷག་པར་དུ་རང་གི་ཕ་སྐད་གཙང་མ་དང་ཁྲག་རྒྱུན་གཙང་མ་ཞིག་ཡོང་བ་བྱ་རྒྱུ་དེ་གལ་ཆེའི་ནང་གི་དོན་ཆེན་ཡིན་པའི་བཀའ་སློབ་གནང་། གཞན་ཡང་རྒན་བཀྲ་བྷ་ལགས་ཀྱིས་ཁོང་ལ་རྗེས་དྲན་ཞུ་བ་ནི་ཧ་ཅང་གི་དོན་སྙིང་ཆེ་བ་ཞིག་ཡིན་པས་མ་ཚད། བྱེད་སྒོ་དེ་ལས་ཀྱང་རྒྱས་པ་དང་དེ་ལས་ཟབ་པའི་ཐོག་ནས་རྗེས་དྲན་ཞུ་འོས་པ་ཡིན་ལ། ངེས་པར་དུ་རྗེས་དྲན་ཞུ་དགོས་པར་མ་ཟད་རིན་པོ་ཆེ་ཁོང་གི་མཛད་པ་དང་སྙིང་སྟོབས་ལ་སློབ་སྦྱོང་བྱས་ཏེ་སླད་ཕྱིན་རང་མི་རིགས་ཀྱི་སྲིད་འབྱོར་རིག་གསུམ་ཕྱོགས་ཡོངས་ནས་འཕེལ་རྒྱས་གཏོང་དགོས་ཞེས་གསུངས་ཡོད་འདུག
དེའི་རྗེས་སློབ་མའི་སྙན་དབྱངས་གྱེར་འདོན་སྐབས་ཞིབ་འཇུག་སློབ་མ་བྱམས་ཕྲུག་ལགས་ཀྱིས་ ༼ ང་ཚོས་ཁོང་བརྗེད་ཀྱིན་འདུག ༽ ཅེས་པའི་སྙན་ངག་ཅིག་གྱེར་བ་དང་། རིན་པོ་ཆེའི་གསུང་གི་བསླབ་བྱ་རྣམས་རང་གི་མི་ཚེའི་ཁ་ཕྱོགས་སྟོན་པའི་སྒྲོན་མེ་བྱ་རྒྱུར་དམ་བཅའ་བཞག་སོང་བར་ཁོ་བོ་ཡང་ཁོང་དང་མཉམ་དུ་ཞེ་སེམས་པའི་གཏིང་ནས་རླབས་ཆེན་གྱི་སྐྱེས་ཆེན་ཁོང་གི་མཛད་བཟང་བརྒྱ་ཕྲག་ལས་ཆ་ཤས་ཙམ་ཞིག་བསྐྱངས་ཏེ། ལུས་བསྐྱེད་དྲིན་ཅན་ཕ་མའི་ཡང་ཕ་མར་གྱུར་བའི་མཐོ་སྒང་གི་ཕ་ཁྱིམ་འདི་དང་ཉག་ཕྲ་བའི་ཕ་སྐད་འདིའི་ཆེད་དུ་རང་གི་མི་ཚེ་མར་རྩམ་ཙམ་གྱི་བཀའ་དྲིན་གསོ་བའི་དོད་ཙམ་དུ་འབུལ་རྒྱུའི་དམ་བཅའ་བཞག་པ་ཡིན་ཞེས་བཀོད་འདུག་ལ། གཞན་ཡང་སློབ་མའི་རྩོམ་ཡིག་སྒྲོགས་སྦྱངས་ལས་ཀུན་གཟིགས་༧པཎ་ཆེན་རིན་པོ་མཆོག་སྐུ་བཞུགས་དུས་བོད་རིགས་རྣམས་ལ་ཅི་འདྲའི་སྲིད་ཇུས་བཟང་པོ་དང་། བྱ་བ་སྒྲུབ་བདེ་པོ། ཕ་སྐད་ལ་སྦྱང་བརྩོན་བྱེད་པའི་ཁོར་ཡུག་དང་རྒྱབ་སྐྱོར་ཅི་འདྲ་ཡོད་ནའང་། ཁོང་སྐུ་གཤེགས་རྗེས་ཐམས་ཅད་སྔར་ལྟར་སྒྲུབ་བདེ་པོ་དང་། རྒྱབ་སྐྱོར་བྱེད་མི་མེད་པ་མ་ཟད། བོད་སྐད་ཡིག་གི་འཛིན་སྐྱོང་སྤེལ་གསུམ་ཐད་ལའང་ས་ཆ་འགར་ལྟག་ཆུ་ཆད་པའི་རྫིང་བུ་བཞིན་དུ་སྐམ་པར་གྱུར་བ་དང་། རླབས་ཆེན་གྱི་སྐྱེས་ཆེན་ཁོང་ལྟ་བུ་མེད་ན་ད་ལྟའི་ཆར་བོད་མི་ཧ་ཅང་མང་པོ་ཞིག་གིས་བོད་ཀྱི་རིག་གཞུང་ཕར་ཞོག ཐ་ན་ཕ་སྐད་ཙམ་ཡང་བཤད་མི་ཤེས་པའི་ཚད་དུ་སླེབས་ཡོད་པར་རང་གི་དངོས་བརྒྱུད་ཀྱི་ལོ་རྒྱུས་དང་འབྲེལ་ནས་བསྒྲགས་ཡོད་འདུག
མཇུག་ཏུ་གཙོ་སྐྱོང་བ་རྒན་ཤར་གཞོན་ཚེ་རིང་ཟླ་བ་ལགས་ཀྱིས་༧པཎ་ཆེན་རིན་པོ་ཆེ་མཆོག་གི་བཀའ་སློབ་རྣམས་ནི་རྩ་ཆེའི་ནོར་བུ་འགྲན་ཟླ་མེད་པ་ཤ་སྟག་ཡིན་པས་ང་ཚོ་ཕྱི་རབས་པ་ཚོས་ཁོང་གི་གསུང་ལ་གསན་འཇོག་དང་གོ་བ་ལོན་པར་བྱས་ཏེ་རིན་པོ་ཆེའི་བཀའ་སློབ་དང་སྙིང་སྟོབས་དག་ལ་སློབ་སྦྱོང་བྱས་ནས་ཁ་བ་བོད་པའི་བར་ལ་ཆོལ་གསུམ་གྱི་དབྱེ་བ་མེད་པར་ཁྱིམ་ཚང་གཅིག་གི་འདུ་ཤེས་ཀྱིས་ཕ་སྐད་གཙང་མའི་ལག་ལེན་ནས་མགོ་འཛུགས་དགོས་པའི་བཀའ་སློབ་གནང་ཡོད་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
བཅུ་ཕྲག་གཉིས་རྗེས་རྗེས་སུའང་པཎ་ཆེན་དྲན། །
ཐུགས་རྗེས་རྗེས་སུ་བཟུང་ན་ད་བཟུང་རན། །
མཁྱེན་ནོ་མཁྱེན་ནོ་པཎ་ཆེན་ཐམས་ཅད་མཁྱེན། །
གཟིགས་དང་གཟིགས་ཤིག་ད་ལྟའི་བོད་རིགས་ཚོར། །
བོད་ཕྱི་ནང་གཉིས་ཀ་ནས་ཀུན་གཟིགས་༧པཎ་ཆེན་རིན་པོ་ཆེ་སྐུ་ཕྲེང་བཅུ་པ་རྗེ་བཙུན་བློ་བཟང་ཆོས་ཀྱི་རྒྱལ་མཚན་མཆོག་དགོངས་པ་གཞན་དོན་དུ་གཤེགས་ནས་མི་ལོ་ ༢༠ འཁོར་བར་མྱ་ངན་རྗེས་དྲན་གྱི་ཚོགས་འདུ་བསྡུས་ཡོད་པར་ཐུགས་འཁུར་གནང་མཁན་ཚང་མར་ཐུགས་རྗེ་ཆེ་ཞུ། མགོན་པོ་གང་ཉིད་སྐུ་འཚོ་བཞུགས་རིང་འགལ་རྐྱེན་ཇི་སྙེད་ཅིག་འཕྲད་མིན་ལ་མ་ལྟོས་པར་བོད་ནང་མི་རིགས་རིག་གཞུང་དང་བཅས་པ་ཉམས་དམས་སུ་འགྲོ་བཞིན་པའི་དུས་ཞལ་གསངས་ཏེ་བོད་མི་རིགས་དོན་དུ་བཀའ་མོལ་གནང་མཁན་ཞིག་ཡིན་པ་ཀུན་གྱི་ཡོངས་གྲགས་ཡིན་པའི་ཆ་ནས་གང་ཉིད་ཀྱི་བཀའ་དྲིན་འདི་ནི་རྡོ་ལ་རི་མོ་བརྐོས་པ་ཇི་བཞིན་བོད་མི་བསམ་ཡོད་ཀུན་གྱི་སེམས་གཏིང་ནས་དུས་ནམ་ཡིན་ཡང་བརྗེད་ཐབས་མེད་པར་གྱུར་ཡོད།
་ ད་ལྟའི་ཆར་མགོན་པོ་གང་གི་བཀའ་དྲིན་བསམ་བཞིན་དྲན་པའི་ཐོག་ནས་ང་ཚོར་དྲན་རྟེན་དུ་བཞག་པའི་བཀའ་སློབ་ཀྱི་བདུད་རྩི་དེ་དག་ལག་ལེན་དུ་བསྟར་རྒྱུ་དང༌། ལྷག་པར་དུ་ཡང་སྲིད་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་ག་ད་ལྟའི་གནས་སྟངས་གང་ཡིན་ཐད་སྤྱི་སྒེར་ཚང་མས་གདུང་ཤུགས་གཅིག་བསྒྲིལ་གྱིས་ནུས་པ་བཏོན་ཏེ་གནས་སྟངས་ཁ་གསལ་སྔ་ཙམ་ཤེས་རྟོགས་བྱ་རྒྱུ་ནི་ཧ་ཅང་གལ་ཆེན་པོ་ཡིན་ནོ༎
པཎ་ཆེན་རིན་པོ་ཆེའི་བཀའ་སློབ་གློག་རྡུལ་པར་མ་ཕབ་ལེན་གནང་རོགས།
http://tibetsharing.googlecode.com/files/pen_chen_renpoche.rar
རྨོངས་པ་སྨག་ན་ཡོད་དུས་སུ།།
དྲན་འཛིན་ཉི་མ་ཡེ་མ་་མཐོང།།
སྨུག་པ་རབ་རིབ་དྭངས་དུས་སུ།།
བྲང་ཁོག་སླར་ཡང་སྡུག་གིས་བཏུམས།།
དྲན་དྲན་པན་ཆེན་བླ་མ་སྙིང་ནས་དྲན།
དྲན་པའི་གདུང་བས་མིག་མཐའ་མཆི་མས་བརླན།
འབོད་དོ་ཁ་བའི་མགོན་ཁྱོད་སྙིང་ནས་འབོད།
ཐུགས་རྗེའི་གཟི་འོད་བོད་དང་འབྲལ་མེད་ཤོག
གཞིས་བྱེས་གཉིས་ནས་འདི་ལྟའི་རྗེས་དྲན་སེམས་འགུལ་ཐེབས་པ་རེ་གནང་རྗེས། རང་རང་གི་སེམས་ངོགས་ནས་ཁོང་གི་བཀའ་གསུང་ཅི་སྒྲུབ་ཞུ་སྒོ་ཁག་རང་གི་མི་ཚེའི་ལག་ལེན་དུ་འཁྱོལ་བ་ཞིག་བྱུང་ན། ཇི་སྲིད་འཚོ་བའི་བར་དུ་ང་ཚོས་ཁོང་ལ་རྗེས་དྲན་ཞུས་པ་བརྩི་ཆོག་ལ། ང་ཚོས་རང་ཉིད་བོད་པ་ཡིན་པ་མ་བརྗེད་པའི་དྲན་སྐུལ་ཞིག་ཀྱང་རང་ཉིད་ཀྱིས་རང་ཉིད་ལ་བཏང་བ་ཞིག་ཀྱང་རེད།
གོང་དུ་པེ་ཅིན་དུ་རྗེས་དྲན་ཚོགས་སྐབས་རྒན་ལགས་རྣམས་ཀྱི་བཀའ་སློབ་ཀྱི་ཚིག་གི་ཟུར་དང་ངོས་ནས་ཁོང་རྣམས་ཀྱིས་མི་རིགས་དང་སྐད་ཡིག་བཅངས་པའི་ལྷད་མེད་པའི་ཐུགས་འདུན་དེ་ཡང་རྟོགས་བྱུང་། བཀའ་དྲིན་ཆེ།
པཎ་ཆེན་བཅུ་པ་ས་བཅུའི་སེམས་དཔའ་ལ།།
བོད་པས་ངན་སྨྲས་བྱས་པ་མཐོལ་ལོ་བཤགས།།
བཀླགས་རྗེས་སེམས་ཤུགས་འཕེལ་སོང་།
འདི་འདྲ་མང་ཙམ་ཡོད་ན།
མ་འོངས་ཁ་བ་ཅན་ལ་མ།
བདེ་སྐྱིད་ཉི་མ་འཆར་ངེས།
རྗེས་དྲན་འདི་འདྲ་གནང་བ་ཤིན་ཏུ་ལེགས།བཀའ་སློབ་གནང་མཁན་རྒན་ལགས་རྣམས་པ་དང་སློབ་མ་རྣམས་ཀྱི་སྙན་ངག་དང་གཞས་ཚིག་སོགས་ཕྱོགས་གང་མི་ཐད་ནས་སེམས་འགུལ་ཧ་ཅང་ཐེབས་བྱུང།
བཀླགས་རྗེས་སེམས་འགུལ་ཐེབས་སོང་། །
མཆི་མས་མིག་མཐའ་བརླན་སོང་། །
རང་མགོ་གང་ཐོན་བྱེད་རྒྱུའི། །
བསམ་བློར་འགྱུར་བ་ཐེབས་སོང་། །
དངོས་གནས་ཡག་པོ་རེད།