ཡུལ་ཤུལ་ནང་ཆེན་གྱི་སྦྱར་ཡིག

ཕྱི་ཟླ་ ༢ ཚེས་མགོ་ཞིག་ལ་མཚོ་སྔོན་ཡུལ་ཤུལ་ནང་ཆེན་གཙོས་ས་ཁུལ་ ༣༠ ཙམ་གྱི་ནང་དུ་ཡིག་ཆ་མང་པོ་ཞིག་སྦྱར་འགྲེམས་བྱས་ཡོད་སྟབས། ལོ་གསར་ཚེས་གཉིས་ཡས་མས་སུ་ནང་ཆེན་ས་ཆའི་བོད་རིགས་ཚོང་བ་ ༥ ཙམ་རྒྱ་གཞུང་གིས་འཛིན་བཟུང་བྱས་ཡོད་འདུག དེ་ནི་སྦྱར་ཡིག་དེར་ནང་ཆེན་ས་ཁུལ་གྱི་བོད་རིགས་ཚོང་པ་ཐུན་མོང་གིས་འགྲོ་སོང་བཏང་སྟེ། སྤྱི་ནོར་༧གོང་ས་མཆོག་ལ་ཞབས་བརྟན་བསྒྲུབ་རྒྱུ་དང་། བོད་རིགས་ཡོངས་ཀྱིས་མཐུན་ལམ་རྡོག་རྩ་གཅིག་སྒྲིལ་བྱ་དགོས་སྐོར་བཀོད་ཡོད་པས་ཡིན་འདུག སྦྱར་ཡིག་དེའི་མཇུག་ཏུ་ཟླ་ ༢ ཚེས་ ༢ ཞེས་བཀོད་ཡོད་ཀྱང་། དངོས་སུ་སྦྱར་འགྲེམས་བྱས་པའི་དུས་ཚོད་གསལ་བོ་ཤེས་རྟོགས་མི་འདུག་ལ། འཛིན་བཟུང་བྱས་ཟིན་པའི་ཚོང་བ་དེ་དག་གི་མིང་དང་ད་ལྟའི་གནས་སྟངས་སོགས་ཀྱང་ཤེས་རྟོགས་མི་འདུག

སྦྱར་ཡིག་དེའི་ནང་དོན་གཤམ་གསལ་ལྟར་ཡིན། རྒྱལ་ཀུན་སྙིང་རྗེའི་རང་གཟིགས་མིག་མ་ཟུམ། བརྩེ་ཆེན་ཐུགས་རྗེའི་གཡར་དམ་མི་ལྷོད་པར། །ཉམ་ཐག་འགྲོ་བའི་སལ་སྣང་འདི་གཟིགས་ལ། །སྡུག་བསྔལ་འདམ་ལས་དྲོངས་ཤིག་པད་དཀར་འཆང་། །

གསན་མཁན་རྣམ་པ། ད་ལྟར་སྙིགས་མ་ལྔ་ཡི་རང་རྟགས་མངོན་དུ་གྱུར་ཅིང་། ཕྱི་ནང་གི་མི་དང་མི་མིན་རྣམས་ཀྱི་བསམ་སྤྱོད་ངན་པའི་སྦྱོར་བས། འཛམ་གླིང་གོ་ལའི་ཁྱོན་ལ་ཡ་ང་བའི་གནས་ཚུལ་མི་ཉུང་བ་ཞིག་ཐོན་དང་འཐོན་བཞིན་ཡོད་པའི་སྒང་འདིར། ང་ཚོ་སྨྲ་ཤེས་དོན་གོ་མི་ཡི་རིགས་སྤྱི་དང་། ལྷག་པར་བྱམས་ལྡན་བོད་མི་ཡོངས་ནས་འཛམ་གླིང་སྤྱི་དང་བྱེ་བྲག་གི་སྐྱིད་སྡུག་ལ་དོ་སྣང་ཆེན་པོས་འགལ་སྤོང་མཐུན་སྒྲིལ་གྱི་སྣེ་ཁྲིད་བྱ་དགོས། དེར་བརྟེན། ང་ཚོ་སྒོམ་སྡེ་ནང་ཆེན་པའི་ཚོང་བ་རྣམས་ཀྱིས་སྣེ་ཁྲིད་བྱས་ཏེ། འཛམ་གླིང་སྤྱི་དང་། བྱེ་བྲག་རྒྱལ་བསྟན་ཡོངས་རྫོགས་ཀྱི་འབྱུང་ཁུངས་གངས་ཅན་བོད་ཀྱི་སྐྱབས་མགོན་འཛམ་གླིང་ཞི་བདེ་དེད་དཔོན་སྤྱི་ནོར་༧གོང་ས་ཡིད་བཞིན་ནོར་བུ་མཆོག་གིས་གཙོས་བོད་མི་ས་ཡ་དྲུག་གི་སྐུ་རིམ་དུ། ཚེ་སྙིང་དུང་ཕྱུར་གཅིག་གི་ཇོ་དར་བླུས་ཏེ། རྟ་ཟླའི་ཚེས་བཅོ་ལྔ་ཉིན་གནས་ཆེན་དང་གདན་ས་ཁག་སོ་སོར་སྒྲོན་རྒྱུ་ཡིན། དེ་ལ་ཇོ་དར་བླུ་ཡོན་ནི་འདི་ལོ་ང་ཚོ་ཚོང་པ་རྣམས་ཀྱི་སྤྱི་སྒྲིག་ལྟར། བོད་སྐད་གཙང་མ་མ་ཕོག་པའི་ཆད་དངུལ་སྒོར་སུམ་སྟོང་ལྷག་ཙམ་ཡོད་པ་དེ་མ་དངུལ་དུ་གཏོང་རྒྱུ་དང་། དེའི་འཕྲོའི་འགྲོ་གྲོན་ཆ་ཚང་ངེད་ཚོང་པ་རྣམས་ཀྱིས་གཏོང་རྒྱུ་ཡིན། ཁྱེད་རྒྱ་ཆེའི་ཆོས་དད་ནང་ཚོགས་རྣམས་ཀྱིས་རྒྱ་མཚོར་ཆུ་ཐིགས་ཀྱི་དཔེ་ལྟར། ཞལ་འདེབས་འབུལ་འདོད་ཡོད་ཚེ་དུས་ཚོད་ལས་མི་ཡོལ་བ་མཁྱེན།

མཇུག་གི་གཏམ། ང་ཚོ་རང་རེའི་སྤུན་ཟླ་ཚང་མ་རང་རིགས་ལ་ཤ་ཞེན་བྱེད་པ་དང་། རང་ཡུལ་ལ་སྲུང་སྐྱོབ་བྱེད་པ། རང་སྐད་ལ་དོ་སྣང་བྱེད་པར་སྐུལ་འདེད་རིམ་པས་བྱེད་པ་ལེགས་ན། རྣམ་པ་ལྷན་རྒྱས་ཀྱིས་མཐུན་འབྲེལ་གྱི་རྡོག་རྩ་གཅིག་ཏུ་སྒྲིལ་ནས་སྙིང་སྟོབས་ཀྱི་དམ་བཅའ་ནམ་ཡང་མི་འདོར་བར་མཛད་འཚལ། སྒོམ་སྡེ་ནང་ཆེན་ཤོར་མདའ་རྫོང་བའི་འབུ་ཚོང་བ་ལྷན་ནས། ༢༠༡༠ ཟླ་ ༢ ཚེས་ ༢ ཉིན། ཞེས་བཀོད་འདུག