སྐྱབས་རྗེ་འཁྲུལ་ཞིག་རིན་པོ་ཆེ་མཆོག་སྔ་འགྱུར་རྙིང་མའི་དབུ་འཛིན་ཁྲི་ཐོག་ལྔ་བར་བསྐོ་བཞག་གནང་ཡོད་འདུག
ཕྱི་ཚེས་ ༡༥ ཉིན་བོད་གཞུང་དྲ་རྒྱའི་ཐོག་གནས་ཚུལ་སྤེལ་བ་ལྟར་ན། རྙིང་མའི་སྤྱི་འཐུས་སློབ་དཔོན་བསོད་ནམས་བསྟན་འཕེལ་ལཊ་དང་རྒྱ་རི་བུ་ཕྲུག་གཉིས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན། སྔ་འགྱུར་རྙིང་མའི་དབུ་འཛིན་ཁྲི་ཐོག་བཞི་པ་སྐྱབས་རྗེ་སྨིན་གླིང་ཁྲི་རིན་པོ་ཆེ་མཆོག་དགོངས་པ་གཞན་དོན་དུ་གཤེགས་རྗེས་གནས་དུས་ཀྱི་རྐྱེན་པས་དབུ་འཛིན་གསར་པ་ཞིག་ད་ལྟའི་བར་གཏན་འཁེལ་བྱུང་ཐུབ་མེད་པས། ཉེ་སྔོན་རྙིང་མའི་སྨོན་ལམ་ཆེན་མོ་ཐེངས་ ༢༡ སྐབས་གནས་མཆོག་རྡོ་རྗེ་གདན་དུ་རྙིང་མའི་དགོན་སྡེ་ཁག་གི་བླ་ཆེན་དང་། བླ་ཆེན་ཁག་གི་སྐུ་ཚབ། རྙིང་མའི་སྤྱི་འཐུས། སྨོན་ལམ་གྱི་འགན་འཛིན་ལྷན་ཚོགས་བཅས་ལྷན་འཛོམས་ཀྱིས་བཀའ་བསྡུར་ཐག་གཅོད་གནང་བར། རྙིང་མའི་བླ་ཆེན་སྐྱབས་རྗེ་སྐུ་བགྲེས་ཁག་བཞི་ལ་སྙན་སེང་གིས་ཐུགས་འགན་མཚན་བཞེས་སུས་མཛད་རོགས་གནང་ན། བདག་ཅག་སློབ་འབངས་རྣམས་ལ་ཁྱད་པར་གཏན་ནས་མེད་པ་དང་། སྐྱབས་རྗེ་རྣམ་པ་བཞི་ལ་རྙིང་མ་བ་སྤྱི་ཡོངས་ནས་རྟེན་གསུམ་འདེགས་འབུལ་ཞུ་རྒྱུའི་ཐུགས་མཐུན་གཙང་བཅད་གནང་། སྙན་སེང་ཞུ་སྟངས་དགུང་ན་བགྲེས་གཞོན་ལྟར་གནང་རྒྱུ་བྱས་པས། དང་པོ་སྐྱབས་རྗེ་བྱ་བྲལ་རིན་པོ་ཆེ་མཆོག་དང་། སྐྱབས་རྗེ་འཁྲུལ་ཞིག་རིན་པོ་ཆེ། སྐྱབས་རྗེ་རྡོ་གྲུབ་རིན་པོ་ཆེ། སྐྱབས་རྗེ་སྟག་ལུང་སྤྲུལ་རྩེ་རིན་པོ་ཆེ་བཞི་ལ་སྙན་སེང་རིམ་པས་ཞུས་པ་བཞིན། དང་པོ། སྐྱབས་རྗེ་བྱ་བྲལ་རིན་པོ་ཆེ་མཆོག་ལ་གསོལ་འདེབས་ཞུས་ཀྱང་ཞལ་བཞེས་མ་གནང་བ་དང་། གཉིས་པ། སྐྱབས་རྗེ་འཁྲུལ་ཞིག་རིན་པོ་མཆོག་ལ་གསོལ་འདེབས་ཞུས་པ་ལྟར་ཞལ་བཞེས་ལེགས་ཐོབ་བྱུང་བ་རེད། རྙིང་མའི་དབུ་འཛིན་ཁྲི་ཐོག་ལྔ་བ་སྐྱབས་རྗེ་འཁྲུལ་ཞིག་རིན་པོ་ཆེ་མཆོག་གིས་ཞལ་བཞེས་གནང་མཚམས། ༧གོང་ས་མཆོག་དང་རང་གཞུང་ཆོས་རིག་ལས་ཁུངས་སུའང་དེ་དོན་སྙན་སེང་ཞུ་ཡིག་ཕུལ་ཡོད་འདུག
གསར་འགྱུར་འདི་ཁ་སང་གི་དེ་དང་གཅིག་པ་རེད་མི་འདུག་གམ།