འདས་པའི་ཟླ་འགའ་ནི་རྒྱ་ནག་གིས་ཚ་ཚ་འུར་འུར་གྱིས་བོད་གསར་པ་འཛུགས་སྐྲུན་གྱི་སྐོར་གླེང་ཞིང་། གང་མགྱོགས་སྒོས་བོད་འདི་སྔར་དང་གཏན་ནས་མི་གཅིག་པའི་འཕེལ་རྒྱས་དང་དེང་རབས་ཅན་ལ་བསྒྱུར་ཏེ། བོད་རིགས་མང་ཚོགས་ལ་བདེ་སྐྱིད་ཀྱི་འཚོ་བ་གསར་བ་ཞིག་རོལ་དུ་འགྱུར་འཇུག་རྒྱུ་དང་བོད་སྤྱི་ཚོགས་བརྟན་ལྷིང་ངང་གནས་རྒྱུར་འབད་བརྩོན་བྱ་རྒྱུ་ཡིན་ཟེར།
ཕྱི་ཚེས་ ༡༥ ཉིན་རྒྱ་ནག་ཞིན་ཧྭ་གསར་ཁང་གིས་གནས་ཚུལ་སྤེལ་བ་ལྟར་ན། ཉེ་ཆར་པདྨ་འཕྲིན་ལས་ལ་གསར་འགོད་པའི་བཅར་འདྲི་ཞིག་གི་སྐབས་སུ་ཁོས་འདི་ལོ་ནི་ ༼ ལོ་ལྔ་ཚན་བཅུ་གཅིག་པའི་ ༽ འཆར་འགོད་ཁྱོན་ཡོངས་ནས་ལེགས་སྒྲུབ་བྱེད་པའི་ཐག་གཅོད་ལོ་ཞིག་ཡིན་པས། དམིགས་ཚད་ཁག་ལེགས་སྒྲུབ་བྱེད་པའི་ལས་འགན་ལ་དཀའ་ཚེགས་ཆེ་བ་དང་དོན་སྙིང་འགངས་ཆེན་ལྡན་ཡོད། ༼ ལོ་ལྔ་ཚན་བཅུ་གཅིག་པའི་ ༽ འཆར་འགོད་ལས་འགན་ལེགས་སྒྲུབ་བྱེད་པར་གཞི་ཚུགས་པ་དང་། ༼ ལོ་ལྔ་ཚན་བཅུ་གཉིས་པའི་ ༽ འཕེལ་རྒྱས་འཆར་འགོད་བྱེད་པར་དམིགས་ནས་བདེ་སྡོད་ལས་བརྩོན་ཚད་བརྒལ་བྱེད་པའི་སྤྱི་ཚོགས་རིང་ལུགས་ཀྱི་གྲོང་གསེབ་གསར་པ་འཛུགས་སྐྲུན་ལ་སྐུལ་འདེད་དང་། མ་འཇོག་གི་འཛད་སྤྱོད་ཆེ་རུ་གཏོང་རྒྱུ་གཙོ་གནད་དུ་བྱེད་པའི་དཔལ་འབྱོར་འཕེལ་རྒྱས་ལ་སྐུལ་འདེད། དམངས་འཚོ་ལེགས་སུ་གཏོང་རྒྱུ་གཙོ་གནད་དུ་བྱེད་པའི་སྤྱི་ཚོགས་འཛུགས་སྐྲུན་ལ་སྐུལ་འདེད། སྒྲིག་སྲོལ་གྱི་ལམ་སྲོལ་འཐུས་ཚང་དུ་གཏོང་རྒྱུ་གཙོ་གནད་དུ་བྱེད་པའི་སྒྱུར་བཅོས་སྒོ་དབྱེར་སྐུལ་འདེད། ཁ་བྲལ་ལ་ངོ་རྒོལ་བྱེད་པའི་འཐབ་རྩོད་གཙོ་གནད་དུ་བྱེད་པའི་ཡུན་རིང་བདེ་འཁོད་ལ་སྐུལ་འདེད་བཅས་གཏོང་གང་ཐུབ་བྱས་ཐོག་འབྱོར་འབྲིང་བོད་ལྗོངས་དང་། དུས་བདེའི་བོད་ལྗོངས། མཐུན་སྦྱོར་ལྡན་པའི་བོད་ལྗོངས། སྣོད་བཅུད་བཟང་བོའི་བོད་ལྗོངས་བཅས་ཧུར་ཐག་བསྐྲུན་དགོས་ཞེས་བརྗོད་འདུག
ཁོས་ད་དུང་ ༢༠༠༩ ལོར་རང་སྐྱོང་ལྗོངས་ཀྱི་དམངས་གཙོའི་ཐད་མ་དངུལ་གཏོང་ཚད་རྒྱ་སྒོར་དུང་ཕྱུར་ ༡༡༠ ལས་བརྒལ་ནས་ཞིང་འབྲོག་པའི་བདེ་སྡོད་ལས་གྲྭ་བསྐྲུན་རྒྱུའི་ལས་འགན་ལོ་གཅིག་སྔ་སྣུར་ཐུབ་པ་དང་སྲིད་འཛིན་གྲོང་ཚོ་བརྒྱ་ཆ་ ༨༠ ལ་གཞུང་ལམ་ཤར་གཏོང་ཐུབ་པའི་དམིགས་ཚད་ལོ་གཅིག་སྔ་སྣུར་དུ་མངོན་འགྱུར་བྱུང་ནས་མི་དམངས་མང་ཚོགས་ལ་མིག་མཐོང་ལག་ཟིན་ཐུབ་པའི་དངོས་ཕན་ཐོབ་ཡོད། འདི་ནི་བདེ་སྡོད་ལས་གྲྭ་འཛུགས་སྐྲུན་གྱི་འཆར་འགོད་ལས་འགན་ལོ་གཅིག་སྔ་སྣུར་ལེགས་གྲུབ་བྱུང་བའི་རྨང་གཞིའི་ཐོག་ང་ཚོས་སླར་ཡང་ལོ་གཅིག་འབད་བརྩོན་བྱེད་པ་བརྒྱུད། སྡོད་ཁང་དཀའ་ངལ་ཡོད་པའི་ཞིང་འབྲོག་པ་ཡོངས་ཀྱི་བདེ་སྡོད་གནད་དོན་ཐག་གཅོད་བྱེད་དགོས། དུས་མཚུངས་སུ་ས་ཡོམ་རྒྱག་མང་བའི་ས་ཁུལ་གྱི་ཞིང་འབྲོག་པའི་སྡོད་ཁང་ཐད་ཡོམ་འགོག་བརྟན་གཏོང་དང་གསར་སྐྲུན་བྱས་པའི་སྡོད་ཁང་དུས་མཚུངས་སུ་བརྟན་གཏོང་བྱེད་དགོས། གཏོང་ཆ་གཏོང་ཤུགས་སྔར་བས་ཆེ་རུ་བཏང་ནས་སྤྱི་ཚོགས་ཀྱི་བྱ་བཞག་མགྱོགས་མྱུར་འཕེལ་རྒྱས་འགྲོ་བར་སྐུལ་འདེད་བཏང་ཐོག གཞི་རྩའི་སྤྱི་པའི་ཞབས་ཞུ་དོ་སྙོམས་ཅན་དུ་སྐུལ་འདེད་གཏོང་དགོས། ༼ གཞི་རྩའི་ཆ་གཉིས་ ༽ ཀྱི་འགག་སྒྲོལ་ཕན་འབྲས་སུ་བརྟན་དུ་བཏང་ནས་འོས་འགན་སློབ་གསོ་ཁྱབ་བརྡལ་གཏོང་བའི་ཆུ་ཚད་གོང་མཐོར་གཏོང་དགོས། ཞིང་འབྲོག་པའི་བདེ་ཐང་ལ་སྐུལ་འདེད་གཏོང་བའི་བྱ་སྤྱོད་ཤུགས་ཆེན་སྤེལ་བ་དང་གཞི་རིམ་སྨན་བཅོས་འཕྲོད་བསྟེན་ཞབས་ཞུའི་མ་ལག་འཛུགས་སྐྲུན་ལ་ཤུགས་སྣོན་བརྒྱབ་ནས་རྫོང་རིམ་པའི་འཕྲོད་བསྟེན་ཞབས་ཞུའི་ལྟེ་གནས་དང་ཞིང་གྲོང་འཕྲོད་བསྟེན་ཁང་ཚད་ལྡན་ཅན་དུ་འགྱུར་བའི་འཛུགས་སྐྲུན་བྱེད་མགྱོགས་སུ་གཏོང་དགོས། ཞིང་འབྲོག་ཁུལ་གྱི་སྨན་བཅོས་ལམ་ལུགས་ཟམ་མི་ཆད་པར་འཐུས་ཚང་དུ་བཏང་ནས་ཞིང་འབྲོག་པའི་སྨན་རིན་མི་དགོས་པའི་སྨན་བཅོས་ཀྱི་ཁ་གསབ་ཚད་གཞི་མཐོ་རུ་གཏོང་དགོས། གྲོང་གསེབ་ཀྱི་སྨན་པ་གསོ་སྦྱོང་བྱེད་པར་ཤུགས་སྣོན་བརྒྱབ་ནས་སྒྲིག་གཞི་ཚང་བའི་གྲོང་ཚོ་རེར་གྲོང་ཚོའི་སྨན་པ་གཉིས་རེ་བཀོད་སྒྲིག་ཐུབ་པའི་བརྩོན་ལེན་བྱེད་དགོས། རྫོང་ཕྱོགས་བསྡུས་རིག་གནས་བྱེད་སྒོའི་ལྟེ་གནས་དང་རྫོང་རིག་གནས་ཆ་འཕྲིན་ཐོན་ཁུངས་མཉམ་སྤྱོད་ལས་གྲྭ ཞིང་གྲོང་ཕྱོགས་བསྡུས་རིག་གནས་ས་ཚིགས། ཞིང་པའི་བདེ་ཁང་བཅས་འཛུགས་སྐྲུན་བྱེད་པར་ཤུགས་སྣོན་བརྒྱབ་ནས་གཞི་རིམ་གྱི་རིག་གནས་ཐད་ཀྱི་སྒྲིག་ཆས་ཆ་རྐྱེན་ལེགས་སུ་ཏན་ཏིག་གཏོང་དགོས། བརྒྱ་ཆ་ ༢༠ ཡི་གྲོང་གསེབ་གསར་བའི་སྤྱི་ཚོགས་རྒན་གསོའི་འགན་བཅོལ་ལམ་ལུགས་ཀྱི་ཚོད་ལྟའི་ལས་འགན་ལེགས་གྲུབ་ཟིན་ནས་ ༢༠༡༠ ལོར་སླེབས་སྐབས་ཁྱོན་ཡོངས་ཀྱི་ཁྱབ་རྒྱ་རྩ་བའི་ཆ་ནས་མངོན་འགྱུར་ཐུབ་པ་བྱེད་དགོས་ཞེས་བརྗོད་འདུག
དེ་བཞིན་བོད་ལྗོངས་ཉིན་རེའི་ཚགས་པར་གྱིས་གནས་ཚུལ་སྤེལ་བ་ལྟར་ན། བོད་དུ་མི་རིགས་ཁག་གི་མང་ཚོགས་དང་མཉམ་དུ་དཔྱིད་གསར་དུས་ཆེན་དང་བོད་ཀྱི་ལོ་སར་ལོ་ལྔར་བསྟུད་མར་བཏང་མྱོང་བའི་ཧྲུའུ་ཅི་ཀྲང་ཆིང་ལིས། མྱོང་ཚོར་ཟབ་མོའི་ངང་བོད་དུ་མ་བསླེབ་ན་བོད་ཀྱི་མི་སེར་ཚོ་ཇི་འདྲའི་བབ་ཆགས་པ་དང་གཅེས་སུ་འོས་པ་ཞིག་ཡོད་པ་ཤེས་མི་ཐུབ། ད་ཕན་ལོ་ཤས་རིང་ཞིང་འབྲོག་པའི་བདེ་སྡོད་ལས་གྲྭ་ལག་ལེན་དུ་ཤུགས་ཆེན་བསྟར་བ་བརྒྱུད་རྒྱ་ཆེའི་ཞིང་འབྲོག་མང་ཚོགས་ཚང་མ་བདེ་འཇགས་ལྡན་ལ་སྤྱོད་གོ་ཆོད་པའི་ཁང་པའི་ནང་སྡོད་རྒྱུ་བྱུང་ཡོད། ཁང་པ་གསར་པར་བསྡད་པའི་མེ་སེར་ཡིན་ཕྱིན་ཚད་ཚང་མས་རང་རྟོགས་ངང་དམར་མདངས་བཀྲ་བའི་སྐར་ལྔའི་དར་དམར་གཅིག་ཉོས་ཏེ་རང་ཁྱིམ་གྱི་ཐོག་ཁར་བཙུགས་ནས་བོད་རིགས་སྤུན་ཟླ་ཚོས་ཏང་དང་ང་ཚོའི་སྐྱེས་མ་རླབས་ཆེན་མེས་རྒྱལ་ལ་བཅངས་པའི་དམིགས་བསལ་གྱི་བརྩེ་སེམས་ཟབ་མོ་དེ་མཚོན་པར་བྱེད་པའི་གནས་ཚུལ་འདི་འདྲའི་ཐོག་ནས་ང་ཚོའི་ཏང་གི་མི་རིགས་སྲིད་ཇུས་ནི་འཛམ་གླིང་ཐོག་ཡག་ཤོས་ཡིན་ལ་ལེགས་གྲུབ་བྱུང་ཆེ་ཤོས་ཡིན་པ་མཐོང་ཐུབ་ཅེས་གསུངས་པ་རེད། ཁོས་ད་དུང་བོད་ཀྱི་རང་བྱུང་ཆ་རྐྱེན་ཞན་པ་དང་འཕེལ་རྒྱས་འགྲོ་ཕྱི་རུང་དུས་ཐུང་ལོ་བཅུ་ཕྲག་ཁ་ཤས་ནང་ལོ་སྟོང་ལས་ལྷག་པ་བྱུང་བ་དང་འཕེལ་རྒྱས་དང་འགྱུར་ལྡོག་མགྱོགས་པོ་འདི་འདྲ་བྱུང་བ་ནི་ང་ཚོས་སྲིད་ཇུས་མི་སེམས་ལ་གཏིང་ཟབ་ཟུག་པའི་དབང་གིས་ཡིན་པའི་ནང་གལ་ཆེ་ཤོས་ནི་ཏང་གི་མི་རིགས་སྲིད་ཇུས་བཟང་པོ་དེ་རེད་ཅེས་བརྗོད་འདུག གསར་འགྱུར་དེའི་ནང་མུ་མཐུད་བཀོད་དོན། ༢༠༠༩ ལོར་བོད་དུ་ཡུལ་སྐོར་དུ་ཡོང་མཁན་མི་ཁྲི་ ༥༦༡ ཟིན་ནས་ལོ་རྒྱུས་ཐོག་གི་མི་གྲངས་མང་ཤོས་བཏོད་ཡོད། མི་མང་བོ་སླེབས་པའི་ཐོག་ནས་དར་རྒྱས་ཆེན་པོ་མཚོན་ཐུབ་པ་དང་། དེའི་ཐོག་ནས་བོད་ཀྱི་དཔལ་འབྱོར་འཕེལ་རྒྱས་སོང་བ་དང་། སྤྱི་ཚོགས་བརྟན་ལྷིང་བྱུང་བ། མི་དམངས་ལ་བདེ་འཇགས་ཀྱི་ཚོར་བ་དེ་བས་བྱུང་བ། འཚོ་བའི་ཆ་རྐྱེན་ཡང་ལེགས་སུ་ཕྱིན་པ། ༼ ཟ་སྡོད་སྐྱོད་གསུམ་དང་ཡུལ་སྐོར། ཉོ་སྒྲུབ། རོལ་རྩེད། ༽ བཅས་རྒྱུ་རྐྱེན་ཆེན་པོ་དྲུག་ཚང་མ་འཛོམས་པའི་གསལ་བཤད་བྱུང་བ་དེ་ནི་བོད་ཀྱི་ཕྱོགས་བསྡུས་དར་རྒྱས་རྣམ་པའི་བསྡུར་གྲངས་མཚོན་པ་ཞིག་རང་རེད། དེ་ལས་གལ་ཆེ་བ་ནི་ཡུལ་སྐོར་ལས་རིགས་མྱུར་དུ་གོང་འཕེལ་སོང་བའི་དབང་གིས་ཞིང་འབྲོག་མང་ཚོགས་སྔར་བས་ལས་མང་བ་ཞིག་གིས་ཡུལ་སྐོར་ལ་བརྟེན་ནས་འཚོ་བ་སྐྱེལ་བ་དང་རྒྱུ་ནོར་འཕེལ་ཐུབ་པ་བྱུང་ཡོད་ཅེས་བརྗོད་འདུག
ཀྲང་ཆིས་ལིས་ཀྲུང་དབྱང་གིས་བོད་ཀྱི་ལས་དོན་ལ་སྔ་ཕྱི་བར་གསུམ་དུ་ཚད་མཐོའི་མཐོང་ཆེན་གནང་བ་དང་། བོད་མི་དམངས་ལ་ཐུགས་ཁུར་ཆེན་པོ་གནང་སྟེ་ད་ལོའི་ལོ་མགོར་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་འཚོགས་པ་རེད། ད་རེབ་ཀྱི་ཚོགས་འདུ་ནི་གལ་འགངས་ཤིན་ཏུ་ཆེ་བས་བོད་འཕེལ་རྒྱས་དང་ཡར་རྒྱས་འགྲོ་བའི་འཕེལ་རིམ་ནང་གལ་ཆེའི་ལོ་རྒྱུས་རང་བཞིན་ནུས་པ་ཐོན་ངེས་ཡིན་པ་དང་། དེ་ནི་དུས་རབས་འབྱེད་པའི་དོན་སྙིང་ལྡན་པའི་གལ་ཆེའི་ལམ་ཚད་རྡོ་རིང་གཞན་ཞིག་རེད། དེང་སྐབས་བོད་འདི་ལོ་རྒྱུས་ཀྱི་མགོ་འཛུགས་ས་གསར་པར་གནས་པ་དང་ཐོབ་པར་དཀའ་བའི་རྩ་ཆེའི་གོ་སྐབས་འཕྲད་ཡོད་པས་ང་ཚོས་ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་ལྔ་པ་ལག་བསྟར་དོན་འཁྱོལ་བྱ་རྒྱུ་དེ་གོ་སྐབས་ལ་བརྩིས་ཏེ། རྩ་ཆེའི་གོ་སྐབས་དམ་པོར་བཟུང་ནས་དཔལ་འབྱོར་འཛུགས་སྐྲུན་ལྟེ་བར་བྱེད་པ་དང་། མི་རིགས་མཐུན་སྒྲིལ་གྱི་འགན་ལེན་བྱེད་པ། དམངས་འཚོ་ལེགས་སུ་གཏོང་རྒྱུ་དེ་མགོ་འཛུགས་ས་དང་དོན་ལ་འབབ་སར་བརྩི་བ་བཅས་བྱས་ཏེ་འཕེལ་རྒྱས་དང་བརྟན་ལྷིང་གི་དོན་ཆེན་གཉིས་པོ་དེ་དམ་བཟུང་གིས་དཔལ་འབྱོར་དང་སྤྱི་ཚོགས་ལ་མཆོང་སྐྱོད་ལྟ་བུའི་འཕེལ་རྒྱས་ཡོང་རྒྱུ་འགན་ལེན་ཏན་ཏིག་དང་། རྒྱལ་ཁབ་ཀྱི་བདེ་འཇགས་དང་བོད་ཡུན་རིང་བདེ་འཁོད་ཡོང་བར་འགན་ལེན་ཏན་ཏིག མི་རིགས་ཁག་གི་མི་དམངས་ཚོའི་དངོས་པོ་དང་རིག་གནས་འཚོ་བ་ཆུ་ཚད་རྒྱུན་ཆད་མེད་པར་མཐོ་རུ་འགྲོ་རྒྱུ་འགན་ལེན་ཏན་ཏིག སྣོད་བཅུད་ཁོར་ཡུག་བཟང་པོ་ཡོང་རྒྱུ་འགན་ལེན་ཏན་ཏིག་བཅས་བྱས་ཏེ་གཙོ་གནད་དུ་གྲོང་གསེབ་གསར་པ་འཛུགས་སྐྲུན་དང་། རྨང་གཞིའི་སྒྲིག་བཀོད་འཛུགས་སྐྲུན། ལེགས་ཆེ་དང་ཁྱད་ཆོས་ལྡན་པའི་ཐོན་ལས་སྐྱེད་སྲིང་། དམངས་འཚོ་ལེགས་བཅོས། སྣོད་བཅུད་ཁོར་ཡུག་འཛུགས་སྐྱོང་། མི་རིགས་མཐུན་སྒྲིལ་ཡར་ཐོན། སྤྱི་ཚོགས་བརྟན་ལྷིང་སྲུང་སྐྱོབ། ཏང་འཛུགས་སྐྱོང་སོགས་ཀྱི་ཐད་ཚད་བརྒལ་གསར་པ་ཡོང་བ་བྱས་ཏེ་ལྗོངས་ཚན་རིག་དང་མཐུན་པའི་འཕེལ་རྒྱས་ཀྱི་དུས་མཚམས་གསར་པར་སླེབས་རྒྱུར་སྐུལ་འདེད་གཏོང་རྒྱུ་ཡིན་ཞེས་བརྗོད་འདུག
སྐད་ཆ་བསྙན་མོ་ཙམ་ལས། དོན་ལ་རྒྱ་ནག་གཞུང་གིས་དངུལ་ག་ཚོད་གཏོང་རུང་རྒྱ་གཞུང་གི་མགོ་ཁྲིད་ཚོའི་ལག་ཏུ་འགྲོ་རྒྱུ་ལས་གཤམ་གྱི་མི་མང་ཚོར་ཕན་ཐོག་མེད་པ་ངས་ཉམ་མྱོང་གི་ཐོག་ནས་བཤད་ཐུབ།
ཁོ་ཚོ་ངོ་མ་བདེན་པ་རེད། ད་ལོ་ན་ནིང་བོད་འདི་གཞན་མི་འདྲ་བའི་དྲག་གནོན་དང་གདུག་རྩུབ་ཀྱིས་སྐྱོང་གིན་འདུག།
ཁོ་ཚོ་ངོ་མ་བདེན་པ་རེད། ད་ལོ་ན་ནིང་བོད་འདི་གཞན་མི་འདྲ་བའི་དྲག་གནོན་དང་གདུག་རྩུབ་ཀྱིས་སྐྱོང་གིན་འདུག།
ཡང་ཁ་སྙན་མོ་ཞིག་བཤད་ཀྱིན་འདུག་ག་་་་ཁོ་ཚོའི་བཟོ་གྲྭ་དང་མི་རིགས་དང་ཡང་ཁོ་ཚོ་ངོ་དགའ་བྱེད་མཁན་སོགས་ཡར་རྒྱས་གཏོང་རྒྱུ་ལས་བོད་པ་དངོས་གནས་པ་ཞིག་གི་ལག་ཏུ་འབབ་རྒྱུ་ཁག་པོ་རེད་་་་་དེ་ལས་ཅི་ཡང་མེད་ན་ཡག་ཤོས་རེད་ཡ
ད་རེས་ལ་དརེབ་འབྲི་རྒྱུ་དེ་ཡང་ཏང་གི་བཙན་འཛུལ་ཡིན་པ་འདྲ།