ཕྱི་ཚེས་ ༡༤ ཉིན་གྱི་ངོ་རྒོལ་གྱི་དབང་གིས་རྨ་ཆུ་རྫོང་བོད་རིགས་སློབ་འབྲིང་སྒོ་བརྒྱབ་ཡོད་འདུག
རྨ་ཆུའི་སྒྲོལ་དཀར་སྐྱབས་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཕྱི་ཟླ་ ༣ ཚེས་ ༡༤ ཉིན་རྨ་ཆུ་རྫོང་བོད་སློབ་འབྲིང་གི་སློབ་ཕྲུག་གི་སྣེ་ཁྲིད་འོག་བོད་མི་ ༢༠༠ ལྷག་གིས་ ༣་༡༤ དུས་དྲན་སྲུང་གཙི་དང་འབྲེལ་རྒྱ་གཞུང་ལ་ཞི་བའི་ངོ་རྒོལ་བྱས་སྟབས་རྨ་ཆུ་རྫོང་བོད་རིགས་སློབ་འབྲིང་སྒོ་བརྒྱབ་ཡོད་འདུག
རྨ་ཆུ་རྫོང་བོད་རིགས་སློབ་འབྲིང་ནི་ཕྱི་ལོ་༡༩༨༥ ལོར་གསར་འཛུགས་བྱས་ཤིང་དེང་སློབ་ཕྲུག་༡༥༠༠ ལྷག་ཡོད། ཟླ་འདིའི་ཚེས་༡༥ ཉིན་རྒྱ་གཞུང་གི་བཙན་བཀའི་འོག་ཟླ་གཅིག་རིང་སློབ་མཚམས་བཞག་སྟེ་ཆབ་སྲིད་དང་ཁྲིམས་ལུགས་ཀྱི་སློབ་གསོ་འགོ་བཙུགས་ཡོད་འདུག རྫོང་སྲིད་གཞུང་གིས་སློབ་གྲྭའི་ཡིག་ཚང་ལ་སློབ་ཕྲུག་ཚོ་ཕྱི་མིར་ཐུག་འཕྲད་དང་སློབ་གྲྭའི་ལྕགས་རིའི་ཕྱི་ལོགས་སུ་འགྲོ་བསྐྱོད་བྱ་མི་ཆོག་པའི་བཀའ་རྒྱ་བཏང་སྟེ་བཟང་བཙོན་དུ་ཉར་ཡོད་འདུག
ད་ལོའི་ཕྱི་ཟླའི་དང་པོའི་ནང་རྨ་ཆུ་རྫོང་བོད་སློབ་འབྲིང་དང་བོད་སློབ་ཆུང༌། དམངས་ཁྲོད་ཕ་སྐད་ཚོགས་པ། མ་ཎི་ཚོགས་བཅས་ཀྱིས་བོད་མིའི་སྐྱིད་སྡུག་ཉམས་མྱོང་ཞེས་པའི་བརྗོད་གཞིའི་ཐོག་བོད་ཁུལ་གྱི་མཁས་པ་ཁག་ཅིག་གདན་འདྲེན་གྱིས་བགྲོ་གླེང་ཚོགས་འཆར་སྐབས། ས་གནས་རྫོང་རིམ་པ་ཁག་གི་འབྲེལ་ཡོད་མི་སྣས་བགྲོ་གླེང་ཚོགས་འདུ་བཀག་འགོག་དང་སློབ་གྲྭའི་དགུན་གནང་བཙན་གྱིས་སྔ་བསྣུར་ཐོག་སློབ་མཚམས་འཇོག་དགོས་བྱུང་ཡོད།
དེང་རྨ་ཆུ་རྫོང་དུ་དྲག་དམག་༥༠༠༠ ལྷག་འགྲེམས་འཇོག་གིས་རྫོང་གི་འདབས་འབྲེལ་ལམ་སྣེ་ཁག་ཏུ་དམག་མིས་འགྲུལ་བཞུད་བྱེད་མཁན་ཚོར་ཚོད་མེད་སྔོགས་བཤེར་བྱེད་བཞིན་ཡོད་ལ། རྫོང་མཁར་དུ་དམག་མིས་ཉིན་མཚན་མེད་པར་དྲག་མཚོན་ཐོགས་ཏེ་སྐོར་གཡེང་དམ་དྲག་དང༌། དེ་བཞིན་ཟླ་འདིའི་ཕྱི་ཚེས་༡༤ ནས་རྨ་ཆུ་རྫོང་ཁོངས་ཀྱི་ཤང་༼ཡུལ་ཚོ་༽ཏུ་དམག་དཔུང་ཆེད་གཏོང་བྱས་ཡོད་འདུག
དེ་རིང་ཁ་སང་བོད་ཀྱི་དུས་བབ་སྔར་རྒྱུན་ལྟར་དྲ་སྒོ་ཕྱེ་ཐུབ་ཀྱི་མི་འདུག
དུས་བབ་ཀྱི་དྲ་བྱང་དང་ཁ་བྱང་གཅིག་པ་གཅིག་ཐོན་ཡོང་གི་འདུག
ང་ལ་མཚོན་ན་སུན་སྣང་སྐྱེ་རུ་འཇུག་གི་འདུག་པས།
དེར་ཞིབ་འཇུག་ཅིག་གནང་རོགས། །