ཁ་ལན་སློག་པ་ལས་ཀྱང་ལྟ་བ་མི་མཐུན་པ་དེ་ཞེད་སྣང་ཆེ་ཤོས་རེད། ཆབ་བྲག་ལྷ་མོ་སྐྱབས།

ད་ནི་ཉལ་སའི་ནང་ནས་ཡང་བསྐྱར་མགོ་བཀྱགས་ནས་མཆན་འབྲི་གི་ཡོད། མཚན་གྱི་དུས་ཚོད་ ༡༡ དང་སྐར་མ་ ༢༥ རེད།

གསར་བརྗེ་སྐྱབས་་ལགས་ཀྱི་མཆན་འདིའི་ནང་ན་ང་ལ་ཐད་ཀར་གོ་རྒྱུ་ཡོད་པའི་དོན་དག་གཉིས་འདུག དང་པོ་དེ། ང་ལྷང་ལ་བུད་པའི་སྐད་ཆ་རེད། འདི་གསལ་བསྒྲགས་བྱ་རྒྱུ་ཞིག་ཡིན་མིན་དང་གསལ་བསྒྲགས་བྱ་རིན་ཡོད་མེད་ཀྱང་ཉིད་ཀྱིས་ལྟོས། ལྷང་ལ་བུད་ཅེས་པ་འདི་ནི་དངོས་གནས་ཁྱད་མཚར་ཞིག་རེད། ད་བར་དུ་སེམས་ལ་མ་འཁོར་བའི་སྐད་ཆ་ཞིག་ཀྱང་རེད།

གཉིས་པ་དེར། རྩོམ་སྒྲིག་པ་དང་རང་དབང་ཅན་གྱི་བརྒྱུད་ལམ་གྱི་མི་ཞིག་ཡིན་ན་ལྷང་ལ་འབུད་མི་རུང་བའི་ལྐོང་བརྡ་ཞིག་བརྒྱབ་སོང་། འདི་ནི་རྗེས་མ་བསམ་བློ་གཏོང་རྒྱུ་ཞིག་ལ་ཉར་གི་ཡིན།

གོང་གི་དོན་དག་དེ་གཉིས་སྐད་ཆའི་གོ་རིམ་ལ་མ་ལྟོས་པར་ནང་དོན་ལ་བསྟུན་ནས་བཤད་པ་ཡིན།

གཞན་པ་དག་ནི་ཐུགས་རྗེ་ཆེ། དོ་སྣང་བྱ་དགོས་ས་མང་པོ་འདུག ངོས་ལེན་དང་གུས་བརྩི་ཡོད།

དེ་དགོང་འདི་ཙམ་ཡིན།

ཁང་གསར་གྱི་ཟིན་བྲིས་དེའི་ནང་ནས་མུ་མཐུད་དུ་སྦྱང་བཤད་ཡོང་བའི་རེ་བ་ཆེ།

ཨ་ཨ་ཨ། གསར་བརྗེ་སྐྱབས་ལགས། གནས་ལུགས་ཟེར་བ་འདི་ལ་མཚམས་རེར་ཉིན་ཕྱོགས་དང་སྲིབ་ཕྱོགས་གཉིས་ཀ་ཡོད་ས་རེད། དེ་རིང་ང་སྲིབ་ཕྱོགས་ལ་ཁེལ་སོང་། འདི་འཁོར་ཕྱོགས་ཙམ་རེད་མ་གཏོགས་གནས་ལུགས་མ་རེད་ཟེར་གི་མེད།

ཕྱི་ཟླ་ ༢ ཚེས་ ༢༣ ཉིན་གྱི་ཟིན་བྲིས་དེས་ཐ་ན་ཁྱེད་ལྟ་བུ་ཞིག་ལ་གོ་བ་དེ་འདྲ་ཞིག་སྤྲོད་ཀྱི་ཡོད་ཚེ། གཞན་པ་མང་པོ་ཞིག་ལ་གོ་བ་ཅི་འདྲ་ཞིག་བྱུང་ཡོད་མེད་བསམ་ཚོད་ལས་བརྒལ་སོང་།

ཊི་ཝེ་ཊར་གྱི་ནང་དུ་དབྱིན་ཚིག་ལ་ Follow ཞེས་བྲིས་ཡོད་པ་རེད། འདིའི་གོ་དོན་ནི་རྗེས་འདེད་ཞེས་པ་ཞིག་ལ་གོ་བ་བླངས་པ་ཡིན། ནམ་རྒྱུན་རྗེས་འཇུག་པ་ཞེས་པ་དེར་ཡང་ནང་ཆོས་ཀྱི་འགྱུར་ནང་དུ་ Follower ཞེས་པའི་ཚིག་འདི་འདྲ་ཞིག་སྤྱོད་ཀྱི་འདུག་བསམ་སོང་། འདི་ཚིག་གི་འབྱུང་ཁུངས་དེ་རེད། འདི་ནི་རིག་གནས་དེའི་མཆེད་ཁོངས་ཀྱི་ཚིག་ལའང་འབྲེལ་བ་ཡོད།

གཉིས་པ་དེར། ཊི་ཝེ་ཊར་ཞེས་པ་དེ་ཉིན་རེ་རེ་དང་དུས་ཚོད་རེ་རེ་བཞིན་གསར་དུ་སྤེལ་ནས་ཡོང་གི་ཡོད་པ་སྐུ་ཉིད་ཀྱིས་མཁྱེན་གསལ་རེད། ངའི་སྐབས་ཐོག་གི་ནང་དོན་ཡང་དེ་ག་རང་ཡིན། དེ་མ་གཏོགས་ཁྱེད་ཀྱི་ཚིག་དོན་བཞིན་གོ་བ་བླངས་ཏེ་ང་རང་ཡང་དེ་བཞིན་དུ་འགྲོ་རྒྱུ་བྱུང་ན་དེ་ནི་ད་ལྟའི་ཆར་ང་མི་སྒེར་བ་ཞིག་གི་ངོས་ནས་བཤད་ན་ང་རྒྱལ་མེད་ནའང་གནོང་འགྱོད་ནི་དེ་བས་ཀྱང་མེད་ཞུ་རྒྱུ་ཡིན།

འདི་ཙམ་གྱིས་ངའི་སྐད་ཆའི་རྐང་དེ་དྲོད་ལྷང་ལྷང་སྐུ་ཉིད་ཀྱིས་རོལ་ཐུབ་པའི་རེ་བ་ཡོད།

ཞབས་ཆེན་འོག་མ་དེའི་ནང་དུ་ཚིག་རེ་འགར་དག་བཅོས་མ་བྱས་པར་ལག་ཤོར་བྱུང་བས། དགོངས་དག

ང་ཁྱོད་ཚོའི་རྩོད་པ་དེ་ལ་འཐད་ཀི་མེད།

ཁ་སང་དེ་རིང་ཁྱེད་ཅག་གིས་གོང་ས་ཡིད་བཞིན་ནོར་བུ་རྩོམ་གྱི་བརྗོད་བྱ་དང་ཁ་བྱང་ལ་བཞག་ནས་ཚ་ཚ་འུར་འུར་བྱེད་ཀྱིན་འདུག་མོད། ང་དེ་ལ་འཐད་ཀི་གཏན་ནས་མེད། རྒྱུ་མཚན་ཏིལ་ཙམ་ཞིག་ཡོད་དུ་སྲིད་མོད་དགེ་བ་རི་བོ་འདྲ་ཞིག་ལྟག་པར་བཞག་འདུག་པའི་ངང་ཚུལ་བརྗེད་འདུག འདི་ཡང་ནོར་གན་ཡང་ནོར་ཞེས་པའི་ལམ་རྐྱང་བར་ཞུགས་ན་མི་རིགས་ཤིག་གམ་རྒྱལ་ཁབ་ཅིག་ལ་མགོ་གཏད་ས་ཞིག་དང་། གྲོས་མགོ་འདོན་མཁན་ཞིག་གཏན་ནས་མ་དམིགས་ཤིང་ཁ་ཐོར་ཡ་ཐོར་གྱི་གནས་སུ་རང་ཉིད་ཀྱིས་རང་རིགས་བསྐྱལ་བར་ཐེ་མི་ཚོམ། གོང་ས་ཆོག་ནི་མ་མཐའ་མི་རུ་འཛིན་མཁན་དག་ལ་མཚོན་ན་ཡང་མིའི་རྒྱལ་བོ་ཞིག་ཏུ་ངོས་འཛིན་དགོས་ཤིང་། སྐབས་ཀྱི་དམངས་སེམས་གཅིག་བསྡུས་བྱེད་མཁན་གྱི་མི་བོ་ཞིག་ཡིན་པ་འང་ངོས་ཟིན་རྒྱུ་དེ་རེད། སྐྱ་ཟད་སྔོ་རྡུགས་ཀྱི་སྐབས་འདི་ལ་སྐབས་ཀྱི་དགེ་བ་འདོར་རིགས་པ་ཞིག་མ་རེད། སྤྱིར་རིག་གཞུང་རྐྱང་བ་ཞིག་དང་རིག་གནས་རྐྱང་བ་ཞིག་གི་ངོས་ནས་འདང་བརྒྱབས་ན་འཇིག་རྟེན་ན་ཡིད་ཚིམས་པའི་རྒྱལ་ཁབ་ཅིག་དང་རྒྱལ་བོ་ཞིག་ཡོད་པ་མ་རེད། དོན་འདིའི་ངང་ཚུལ་ལ་གཞི་བཅོལ་ནས། འཚོ་བ་ནི་ནམ་ཡང་སྔོ་ཐང་ཐང་། རིག་གཞུང་ནི་ནམ་ཡང་སྐྱ་ཐང་ཐང་ཞེས་པའི་ལེགས་བཤད་འདི་བྱུང་བར་སྙམ་མོ།།

བློ་བཟང་ལགས་ཀྱིས་བོད་ལྗོངས་ཆ་འཕྲིན་སྟེང་གི་རྩོམ་ཡིག་ཅིག་དྲངས་ནས་དེ་ལ་ལན་འདེབས་དགོས་པའི་སྐུལ་མ་གནང་འདུག སྤྱིར་བཏང་འདིའི་རིགས་ལ་ལན་འདེབས་བྱས་མྱོང་ལ། བྱེད་ཀིན་ཡང་ཡོད། དེ་བཞིན་གནས་དོན་འདི་རིགས་ལ་ལན་འདེབས་བྱ་རྒྱུ་ད་དུང་མང་མེད་ན་ཉུང་ཚོད་མིན་པ་འདས་པའི་ལོ་རྒྱུས་ལས་ཤེས་གསལ་རེད། ལན་འདེབས་དང་དགག་སྒྲུབ་རེ་རེ་སྐབས་ང་ཚོ་གང་ནས་གསལ་བོ་ཆགས་ཤིང་ལྷང་ལ་བུད་མྱོང་ཡོད། རྒྱ་ནག་གི་གཞུང་འབྲེལ་དང་གཞུང་འབྲེལ་མིན་པའི་ཡིག་ཆ་དང་རྩོམ་ཡིག་རེ་རེ་བཞིན་ལན་བཏབས་ཀྱང་ཆོག འདེབས་བཞིན་པ་ཡིན་ནའང་འགྲིག ད་དུང་ལན་འདེབས་འགྱུར་ཡིན་རུང་ཁྱད་པར་གང་ཡང་མི་འདུག ཡིག་ཐོག་གི་ལན་འདེབས་དང་རྩོད་པ་རྩོད་ལན་དེས་རང་གཞན་གཉིས་ལ་སྨན་པའི་ཆ་གང་ཞིག་བྱུང་མྱོང་ཡོད། ཁ་རྩོད་ཚིག་རྩོད་ཙམ་ལས་གང་ཡང་བྱུང་མྱོང་མེད་ལ། འབྱུང་རྒྱུའང་ཁག་པོ་རེད། དེ་ལས་དེ་ཚོ་ལ་ཤེས་ཡོན་དང་རྒྱུ་ཤུགས། དུས་ཚོད་སོགས་ཀྱི་འགྲོ་གྲོན་གཏོང་རྒྱུ་ལ་བསམ་བློ་བསྐྱར་མ་ཞིག་བཏངས་ནས་ངེས་ཤེས་རྙེད་རྒྱུ་གལ་ཆེན་པོ་རེད། མ་གཞི་བོད་རྒྱའི་གནད་དོན་ཁ་རྩོད་ཚིག་རྩོད་ཙམ་གྱི་གནད་དོན་ཞིག་མ་རེད།

འཇིགས་བྲལ་ལགས་ཀྱིས་རྒན་ལྷ་མོ་ལ་དྲི་བ་མང་པོ་ཞིག་བཀོད་འདུག དྲི་བའི་ནང་གཙོ་བོ་གནས་སྟངས་མང་པོ་ཞིག་གསལ་བཤད་གནང་འདུག སྤྱིར་བཏང་བོད་རིགས་ཡོངས་ལ་རང་སྐྱོང་ཡོངས་ཐབས་ཀྱི་ཡིག་ཆ་དེ་སྐུ་མདུན་གྱི་དགོངས་གཞི་ཡིན་མིན་གང་ལྟར་ཡང་། སྐུ་མདུན་ནས་དེ་ལ་མོས་མཐུན་དང་རྒྱབ་སྐྱོར་ཡོད་པ་གྲོས་ཚོགས་ཀྱི་གསུང་འཕྲིན་ལས་གསལ་བོ་ཤེས་ཀི་རེད། དེ་ལས་ལྷག་གསལ་བོ་ཆགས་སྟངས་ཤིག་ཡོད་པ་མ་རེད། མ་གཞི་བོད་མི་ཚོས་གསལ་བོ་ཤེས་དང་མ་ཤེས་ཡང་གལ་ཆེན་མ་རེད། དབང་ཆ་ཡོངས་རྫོགས་༼ ཡེ་ཤེས་དབྱིངས་དཔྱད་་། ༽ལ་ཕུལ་ཚར་རྗེས་ངས་ཤེས་མ་སོང་དང་། ངས་གོ་མ་སོང་ཟེར་ས་ཡོད་ནི་མ་རེད། ལྷག་པར་དུ་༼ དུས་དང་རྣམ་པ་ཀུན་ཏུ་༽ཞེས་པ་ཞིག་འདུག་པ། འདི་མང་མོས་འོས་བསྡུ་སྐབས་ཀྱི་ཚིག་དོན་ངོ་མ་ཡིན་མིན་གང་ལྟར་ཡང་ད་ལྟ་འདི་ཁྲིམས་མཐུན་གྱི་ངོ་བོའི་ཐོག་ནས་བེད་སྤྱོད་གནང་གི་འདུག

རྒན་ལྷ་མོ་ཡིན་ན་རེད། ལུང་རིགས་ཡིན་ན་རེད། དེ་ལས་གཞན་ལམ་དབུ་མར་འཇུག་མཁན་མང་ཤོས་ཀྱིས་བོད་ལ་བསམ་བློ་གཏོང་གི་མི་འདུག བོད་དོན་ལ་བསམ་བློ་གཏོང་གི་མི་འདུག ཁོང་ཚོས་བསམ་བློ་གཏོང་ས་ངོ་མ་དེ་བླ་མ་དང་སློབ་མ་ཞེས་པ་འདི་རེད། ཁོང་ཚོར་མཚོན་ན་བླ་སློབ་ཀྱི་དམ་ཚིག་གཙང་ན་དེ་གས་འགྲིག་སྡད་པ་ཞིག་ལ་ངོས་འཛིན་གནང་གི་འདུག བསམ་བློའི་རྒྱབ་ལྗོངས་འདི་འོག་ནས་ཁོ་ཚོས་སུ་ཡིན་ནའང་ཁ་བཏང་ཆོག་ཆོག་དང་། ནག་ཉེས་བཙུགས་ཆོག་ཆོག་ཅིག་ལ་ངོས་འཛིན་གནང་གི་འདུག དྲན་གསོ་གཏོང་རོགས་གནོངས། རིག་གནས་གསར་བརྗེ་སྐབས་༼ སྔོན་ཐོན་པ་ ༽ མང་པོ་བྱུང་མྱོང་ཡོད་པ་རེད་དོ།

གོང་དུ་ ༣ བྲིས་པ་དེ་ ༢ པར་བཅོས་རོགས་ཞུ།
༣ གཞན་ཡང་གོང་དྲིས་ལྟར་གལ་ཏེ་རིམ་འགྱུར་ཆབ་སྲིད་ཀྱི་འགྱུར་འགྲོས་འོག་ཐོག་མ་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་དེ་གང་འདྲ་ཞིག་ཡོད་མེད་དང་། ད་ལྟ་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པ་དེ་ལ་འཕེལ་གྲིབ་གང་བྱུང་ཡོད་མེད་དང་། ད་ལྟ་དེ་དོན་དངོས་སུ་གང་ལ་འཛུབ་མོ་འཛུགས་དགོས་མིན་བཅས་ལ་རྒྱུ་མཚན་ཞིབ་ཚགས་ཀྱི་ལམ་ནས་འགྲེལ་བཤད་དང་། མི་མང་གི་དོགས་འདྲིར་དངོས་ཡོད་རྒྱུ་མཚན་དེ་དང་འདི་ཟེར་བའི་སྒོ་ནས་ལན་འདེབས་དང་། དོགས་འདྲི་གལ་གནད་ཆེ་ཁག་ཚིག་ཐོར་བཀོད་དེ་བཀའ་སྤྱི་གཉིས་ལ་ཕུལ་ན། ད་གཟོད་ཁྱོད་རང་མི་རིགས་ས་གནས་རང་སྐྱོང་གི་ལངས་ཕྱོགས་ཁྱེར་མཁན་མིང་དོན་མཚུངས་པ་ཟེར་བ་དེ་ཆགས་པ་རེད། དེ་ལས་ལྡོག་སྟེ་མི་རིགས་ས་གནས་རང་སྐྱོང་གི་ལམ་ལ་མ་ཕྱིན་ན་༸གོང་ས་མཆོག་གི་བཀའ་དགོངས་དང་འགལ་རབས་བཤད་པས་མི་མང་ལ་མི་རིགས་ས་གནས་རང་སྐྱོང་གི་བསྟན་དོན་གོ་རྟོགས་སད་པར་ག་རེ་ཕན་གྱི་རེད། མི་མང་ལ་ག་རེ་ངོ་སྤྲོད་ཐོབ་ཀྱི་རེད། ད་སྐབས་བོད་མི་མང་པོ་ཞིག་གིས་སོ་སོ་མི་རིགས་ས་གནས་རང་སྐྱོང་གི་ལམ་དུ་འགྲོ་མཁན་ཡིན་ཚུལ་བརྗོད་ཀྱི་ཡོད་ལ། དེའི་དོན་ནི། ང་༸གོང་ས་མཆོག་གི་བཀའ་བསྒྲུབ་མཁན་ཡིན་ཟེར་གྱི་ཡོད་པ་རེད། བོད་མི་ཚོ་འདི་འདྲའི་ཁོར་ཡུག་ཅིག་གི་ནང་དུ་བཅུག་བཞིན་པ་འདི་༸གོང་ས་མཆོག་གི་དགོངས་གཞི་རྩ་བ་ནས་མིན་པ་ཚིག་ཐག་བཅད་ནས་བཤད་ཐུབ་པ་ཞིག་རེད། གང་ཡིན་ཟེར་ན། ༸གོང་ས་མཆོག་གིས་ཕྱི་ལོ་ ༡༩༦༠ ནང་བོད་ཀྱི་འཐབ་རྩོད་འདི་བོད་མི་མང་གིས་འགན་ཁུར་རྐང་ལེན་གྱིས་བོད་དོན་མཐའ་མའི་ཐག་གཅོད་ཐུབ་པ་ཞིག་ཡོང་ཆེད་མང་གཙོའི་ལམ་དུ་སྐབས་དེའི་བོད་མིའི་གནས་སྟངས་ལ་མི་འཚམ་བཞིན་ཨུ་ཚུགས་ཀྱིས་བསྐྱོད་བཅུག་པ་མ་རེད་དམ། མི་རིགས་ས་ཁོངས་རང་སྐྱོང་ལག་བསྟར་ཡོང་བའི་རེ་སྐུལ་བྱེད་པ་ལས་འཕྲོས་པའི་བསམ་ཚུལ་ལེའུ་དང་པོ་རེ་ཞིག་རྫོགས་སོ།

(སྔ་ལོ་རྡ་སར་དབུ་མའི་ལམ་གྱི་ལས་འགུལ་ཚོགས་ཆུང་ཚུགས་སྐབས་དང་། རྗེས་སུ་ལྷོ་ཕྱོགས་སུ་ཕྱི་ཟླ་ ༦ ཟླ་འཇུག་ཏུ་བཀའ་བློན་ཐུབ་བསྟན་ལུང་རིགས་ཀྱི་ལ་གཏམ་བཤད་ལ་དོགས་འདྲི་བྱས་པའི་སྔ་རྗེས་སུ་སྐབས་དེའི་བསམ་ཚུལ་བཞིན་རྩོམ་ཡིག་འདིའི་མ་གཞི་༸གོང་ས་མཆོག་རྒྱབ་ཤེད་དུ་ཁུར་ནས་དབུ་མའི་ལམ་སྨྲ་མཁན་ཚོར་ཟེར་བ་ཞིག་བྲིས་ཡོད་པ་བཟོ་བཅོས་ཀྱི་ཁ་ཇེ་གསལ་དུ་བཏང་བའི་ཐོག་ཁ་བྱང་ཡང་༸གོང་ས་མཆོག་རྒྱབ་ཤེད་དུ་ཁུར་ནས་མི་རིགས་ས་ཁོངས་རང་སྐྱོང་གི་ལམ་དུ་ཁྲིད་པ་ཟེར་བར་བསྒྱུར་ཏེ་ ༢༠༡༠/༠༣/༢༥ ལ་སྤེལ།)

ལྷ་མོ་སྐྱབས་ཀྱི་བསམ་ཚུལ་དང་འབྲེལ་ཆགས་པའི་གུས་པའི་བསམ་ཚུལ་ཐུང་ཐུང་ཞིག་བྲིས་ཡོད་པ་འདྲེན་བཀོད་བྱེད་ཀྱི་ཡིན།

༡ ༸གོང་ས་མཆོག་རྒྱབ་ཤེད་དུ་ཁུར་ནས་མི་རིགས་ས་ཁོངས་རང་སྐྱོང་གི་ལམ་དུ་ཁྲིད་པ།

རྒྱ་ནག་གཞུང་ལ་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པ་ནི་བོད་རིགས་ཀྱི་གནད་དོན་ཐག་གཅོད་བྱེད་ཆེད་བཏོན་པའི་ཐབས་ལམ་ཞིག་ཡིན་མིན་ལ་བོད་རིགས་ཚོས་དོགས་པ་གང་ཡང་བྱེད་མི་སྲིད་ལ། བོད་རིགས་མང་ཆེ་བས་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པའི་བསྟན་དོན་གསལ་པོ་དང་ཞིབ་ཚགས་པོ་ཤེས་ཀྱི་མེད། ཡིན་ནའང་བཀའ་བློན་དང་། སྤྱི་འཐུས་མི་ཉུང་བ་ཞིག་གིས་མི་རིགས་ས་གནས་རང་སྐྱོང་གི་འགྲེལ་བཤད་སྐབས་འདི་༸གོང་ས་མཆོག་གི་དགོངས་གཞི་ཡིན་པས་ཤར་བསྐྱོད་བྱེད་དགོས་ཚུལ་དང་། ཤར་བསྐྱོད་མ་བྱས་པ་ཡིན་ན་༸གོང་ས་མཆོག་གི་དགོངས་པ་དང་འགལ་ཚུལ་སོགས་གསུངས་ཏེ་ཆབ་སྲིད་ཀྱི་ཤེས་ཚད་ཧ་ཅང་སྐྱོ་བའི་མི་མང་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པའི་ལམ་དུ་ཁྲིད་ཀྱི་ཡོད། དེ་ཡང་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པའི་དགོངས་དོན་ཡང་དག་པ་ཡིན་པའི་སྒྲུབ་བྱེད་དུ་༸གོང་ས་མཆོག་རྒྱབ་ཤེད་དུ་འདྲེན་པ་ལས་ལྷག་པའི་ངོ་སྤྲོད་གང་ཡང་བྱེད་ཐུབ་ཀྱི་མེད། དེ་བཞིན་འཚེ་མེད་ཞི་བ་གླེང་སྐབས་ཞི་བའི་ལས་འགུལ་སྤེལ་ཕྱོགས་མི་གསུངས་པར་ནང་ཆོས་ངོ་སྤྲོད་བྱེད་པ་(བཀའ་བློན་ཐུབ་བསྟན་ལུང་རིགས་དང་འདྲ་བའི་མི་སྣ་སྐོར་ཅིག)སོགས་ལས་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་ལ་འགྲེལ་བཤད་གནང་ཐུབ་ཀྱི་ཡོད་མ་རེད། ཁོང་ཚོའི་བརྗོད་དོན་མདོར་བསྡུས་ན། བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པ་ཡག་པོ་རེད། གང་ཡིན་ཟེར་ན། དེ་༸གོང་ས་མཆོག་གི་ལངས་ཕྱོགས་རེད་ཟེར་གྱི་ཡོད། དྲང་པོ་བཤད་ན་མི་མང་གིས་མི་རིགས་ས་ཁོངས་རང་སྐྱོང་ཟེར་བ་གང་འདྲ་ཞིག་ལ་ཟེར་གྱི་ཡོད་པ་ཅི་ཡང་ཤེས་ཀྱི་མ་རེད་ཟེར་ན་ཧམ་པར་འགྱུར་གྱི་མ་རེད། དེ་བཞིན་གསུང་སྟངས་འདི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་གྱི་འགྲེལ་བཤད་ཡིན་ནམ། ཡང་ན་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་ལ་འགྲེལ་བཤད་གཞན་ཞིག་ཡོད། འཚེ་མེད་ཞི་བའི་ལམ་གྱི་ལས་འགུལ་སྤེལ་སྟངས་ནང་ཆོས་ངོ་སྤྲོད་བྱས་ན་ཡོང་བ་ཞིག་ཡིན་དང་མིན། གལ་གནད་ཆེ་བའི་དྲི་བ་འདི་བསམ་བློ་ཞིབ་ཚགས་པོའི་ཐོག་ནས་གཏོང་དགོས་པ་ཞིག་རེད་བསམ་གྱི་འདུག ད་དུང་ང་ཚོའི་མདུན་དུ་དྲི་བ་ཞིག་ལྷག་ཡོད་པ་ནི། དོན་དངོས་སུ་མི་རིགས་ས་གནས་རང་སྐྱོང་གི་ལངས་ཕྱོགས་འདོན་མཁན་སུ་ཡིན་མིན་གལ་ཆེ་བ་ཡིན་དང་། རིམ་འགྱུར་ཆབ་སྲིད་ཀྱི་འགྱུར་འགྲོས་འོག་ད་ལྟ་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་ཆ་རྐྱེན་ཁག་ལག་བསྟར་དགོས་པའི་རེ་སྐུལ་བྱེད་པ་དེ་གང་འདྲ་ཞིག་ཡོད་མེད་གལ་ཆེ་བ་རེད།
འཕྲོ་ཡོད།

དྲ་གྲོགས་ཚོ།བློ་བཟང་ལགས་ཀྱིས་བོད་ལྗོངས་ཆ་འཕྲིན་ལྟེ་གནས་ནས་དྲངས་པ་དེ་ལ་ལན་ཞིག་རྒྱོབ་དང་།ནམ་རྒྱུན་ཡིན་ན་ང་མཁས་པ་ཡིན་།ང་ཁ་བདེ་པོ་ཡིན་ཟེར་མཁན་མང་པོ་ཞིག་ཡོང་གི་འདུག།ད་ག་རེ་བྱས་སོང་།

བོད་ལྗོངས་ཆ་འཕྲིན་ལྟེ་གནས་ལ་དྲངས། ཉེ་བའི་ལོ་ཤས་རིང་། སྨྱུག་འཛིན་པས་ཏཱ་ལའི་བླ་མ་སྐུ་ཕྲེང་བཅུ་བཞི་པའི་དབུ་མའི་ལམ་ཞེས་པའི་ཁ་བྲལ་རིང་ལུགས་ཀྱི་ངོ་བོ་དང་། ཁོ་རང་བོད་རྙིང་པའི་བཀས་བཀོད་རྒྱུད་འཛིན་ཞིང་བྲན་བདག་པོའི་སྤྱིའི་འཐུས་ཚབ་པ་ཡིན་པའི་ཐོག་མ་ཉིད་ཀྱི་ངོ་བོ། ཕྱི་རྒྱལ་གྱི་ཟིང་འཁྲུག་པ་དང་《ཤར་གྲུ་གུའི་》མི་སྣ་དང་ངན་འབྲེལ་བྱས་ཚུལ། དེ་བཞིན་འཆལ་གཏམ་སྣ་ཚོགས་སྤེལ་བ་བཅས་ཀྱི་སྐོར་ལ་སྐྱོན་བརྗོད་ ཐེངས་མང་བྱས་མོད། འོན་ཀྱང་ཏཱ་ལའི་ནས་དེའི་ཐད་ཡ་ལན་ཚིག་གཅིག་ཀྱང་མེད་པ་རེད། དེའི་ཐོག་ནས་ཁོང་ལ་བཟོད་བསྲན་གྱི་ནུས་པ་ཆེན་པོ་ཡོད་པ་མཐོང་ཐུབ། ཡིན་ན་ཡང་ད་ལོའི་ཟླ་༢ཚེས་༡༩ཉིན། སྨྱུག་འཛིན་པས་བྲིས་པའི་《ཏཱ་ལའི་ནས་ཕྱི་རྒྱལ་གྱི་སྟོབས་ཤུགས་ལ་བརྟེན་ནས་རང་ཉིད་ཆེ་མདོག་བྱེད་པ་དེ་ཕམ་ཉེས་འགྲོ་ངེས་རེད་》ཅེས་པའི་རྩོམ་ཡིག་ནང་། ཏཱ་ལའི་ནས་རང་གི་འབྱུང་རྩ་བརྗེད་ཏེ་རྒྱ་གར་གྱི་བུ་ཕྲུག་ཡིན་ཞེས་ཐེངས་མང་བརྗོད་པར་ཐེར་འདོན་བྱས་པས། ཏཱ་ལའི་ནས་མཐར་ཐུག་བཟོད་སྒོམ་བྱེད་ཐུབ་མེད་པ་རེད། ཕྱི་རྒྱལ་གྱི་གསར་འགྱུར་ལས་ཁུངས་ནས་གནས་ཚུལ་བཀོད་པ་ལྟར་ན། ཟླ་༣ཚེས་༩ཉིན། ཏཱ་ལའི་ནས་རྒྱ་གར་རྡ་རམ་ས་ལར་གསར་འགོད་པའི་བཅར་འདྲི་དང་ལེན་བྱེད་སྐབས། སྐད་ཆ་སྙན་པོའི་ཐོག་ནས་རང་ཉིད་ཀྱི་རྒྱུ་མཚན་གསེད་བཀྲོལ་བྱས་ཡོད་པ་དང་། རྒྱུ་མཚན་གསུམ་གྱི་ཐོག་ནས་ང་རང་རྒྱ་གར་གྱི་བུ་ཕྲུག་ཡིན་པའི་ངོས་འཛིན་བྱེད་ཀྱི་ཡོད་ཅེས་བཤད་ཡོད་པ་རེད། ཏཱ་ལའི་ལ་གཞི་ནས་རང་གིས་བཤད་མྱོང་བའི་སྐད་ཆ་ཁས་ལེན་བྱེད་པ་སྙིང་སྟོབས་ཡོད་པ་མ་ཟད་རྒྱུ་མཚན་གསེད་བཀྲོལ་བྱེད་པའི་སྤོབས་པ་ཡོད་པར་ང་རང་ནས་ཡི་རང་བྱེད་ཀྱི་ཡོད།

ཏཱ་ལའི་བླ་མ་སྐུ་ཕྲེང་བཅུ་བཞི་པ་བསྟན་འཛིན་རྒྱ་མཚོའི་ཐོག་མའི་མིང་ལ་ལྷ་མོ་དོན་གྲུབ་ཟེར་བ་དང་། དེ་ཡང་༡༩༣༥ལོར་མཚོ་སྔོན་ཞིང་ཆེན་ཧོང་ཀྲུང་རྫོང་ཁོངས་སྟག་འཚེར་ཞེས་པའི་སར་ཞིང་དུད་དཀྱུས་མ་ཞིག་གི་ཁྱིམ་དུ་སྐྱེས་ཤིང་། ཕའི་མིང་ལ་ཆོས་མཆོག་ཚེ་རིང་དང་མའི་མིང་ལ་བདེ་སྐྱིད་ཚེ་རིང་ཟེར། ༡༩༣༩ལོའི་ཟླ་༡༠ཚེས་༧ཉིན། ལྷ་མོ་དོན་གྲུབ་ཀྲུང་གོའི་གོ་མིན་སྲིད་གཞུང་གིས་དམག་མི་བཏང་ནས་ལྷ་སར་སྲུང་སྐྱེལ་ཞུས་ཐོག ཏཱ་ལའི་བླ་མ་སྐུ་ཕྲེང་བཅུ་གསུམ་པའི་ཡང་སྲིད་འོས་སྤྲུལ་ལ་གཏན་འཁེལ་བྱས་པ་རེད། ༡༩༤༠ལོའི་ཟླ་༢ཚེས་༥ཉིན། གོ་མིན་སྲིད་གཞུང་གིས་བཀའ་རྒྱ་བསྒྲགས་ནས་ཏཱ་ལའི་བླ་མ་སྐུ་ཕྲེང་བཅུ་བཞི་པར་ངོས་འཛིན་ཆོག་མཆན་སྤྲད་པ་རེད། ༡༩༥༩ལོའི་ཟླ་༣ཚེས་༡༠ཉིན། ཏཱ་ལའི་ནས་གཙོས་པའི་བོད་ལྗོངས་ཀྱི་མཐོ་རིམ་ལོག་སྤྱོད་པས་དྲག་པོའི་ངོ་ལོག་ཟིང་འཁྲུག་བསླངས་པ་ཕམ་ཉེས་ཤོར་རྗེས་རྒྱ་གར་ལ་བྲོས་བྱོལ་དུ་ཕྱིན་པ་རེད། གོང་གསལ་གནས་ཚུལ་འདིའི་ཐོག་ནས་ང་ཚོས་ཏཱ་ལའི་ལོ་རྒྱུས་གསལ་པོར་ཤེས་ཐུབ་པས། གང་འདྲ་བྱས་ཏེ་གློ་བུར་དུ་རྒྱ་གར་གྱི་བུ་ཕྲུག་ལ་གྱུར་བ་ཡིན་ནམ། ཏྭ་ལའི་ནས་དེའི་སྐོར་འགྲེལ་བཤད་གང་འདྲ་རྒྱག་གི་ཡོད་པ་ང་ཚོས་གཟིགས་ཙམ་གནང་དང་།

ཏཱ་ལའི་རྒྱུ་མཚན་དང་པོ་ནི། ང་རང་ནང་པ་སངས་རྒྱས་པའི་རྗེས་འཇུག་པ་ཞིག་ཡིན་ཞིང་། ངའི་ནང་པའི་ཤེས་ཡོན་དང་མིའི་རིགས་ཀྱི་རིན་ཐང་ལྟ་བ་ཡོད་ཚད་ཀྱི་འབྱུང་ཁུངས་རྒྱ་གར་ཡིན་པས། ངས་ཐོག་མཐའ་བར་གསུམ་དུ་རྒྱ་གར་འདི་ཉིད་ང་རང་གི་སློབ་དཔོན་ཡིན་པ་དང་། བོད་བརྒྱུད་ནང་བསྟན་གྱི་རྗེས་འཇུག་པ་ཚང་མ་རྒྱ་གར་གྱི་སློབ་མ་ཡིན་པའི་ངོས་འཛིན་བྱེད་ཀྱི་ཡོད་ཅེས་པ་དེ་རེད། ནང་པ་སངས་རྒྱས་ཆོས་ལུགས་ཀྱི་ འབྱུང་ཡུལ་རྒྱ་གར་ནས་ཡིན་པ་སྨོས་ཅི་དགོས། དེ་རྗེས་འཛམ་གླིང་ཡོངས་དང་ལྷག་པར་དུ་ཨེ་ཤ་ཡ་ཤར་མ་དང་། ལྷོ་མའི་ས་ཁུལ་དུ་དར་ཁྱབ་བྱུང་བ་དང་། རྒྱལ་ཁབ་མི་ཉུང་བར་དད་པ་བྱེད་མཁན་མང་པོ་ཡོད་མོད། འོན་ཀྱང་བོད་བརྒྱུད་ནང་བསྟན་གྱི་རྗེས་འཇུག་པ་ཚུད་པའི་རྒྱལ་ཁབཁག་གི་ནང་བསྟན་ཆོས་ལུགས་ཀྱི་རྗེས་འཇུག་པ་ཚོས་སངས་རྒྱས་ཆོས་ལུགས་དེ་རྒྱ་གར་ནས་བྱུང་བའི་རྒྱུ་མཚན་གྱིས་རང་ཉིད་རྒྱ་གར་གྱི་བུ་ཕྲུག་ལ་ངོས་འཛིན་བྱེད་མཁན་ག་ལ་ཡོད། དོན་དངོས་ཐོག་ཆོས་ལུགས་དེ་རྒྱལ་ཁོངས་བརྒལ་ནས་དར་ཁྱབ་ཏུ་འགྲོ་བ་ནི་ཡོངས་ཁྱབ་ཀྱི་སྣང་ཚུལ་ཞིག་ཡིན་ལ། ཆོས་དད་པ་རྒྱལ་ཁབ་གང་ཞིག་གི་ཁོངས་སུ་གཏོགས་མིན་དེ་རང་གིས་དད་མོས་བྱེད་སའི་ཆོས་ལུགས་ཀྱི་འབྱུང་ཁུངས་རྒྱལ་ཁབ་གང་ཞིག་ནས་ཡིན་པ་དང་འབྲེལ་བ་མེད། དཔེར་ན། ཡེ་ཤུ་ཆོས་ལུགས་དང་། དབྱི་སི་ལན་ཆོས་ལུགས་ཀྱི་འབྱུང་ཁུངས་དབུས་ཤར་ས་ཁུལ་ཡིན་ཞིང་། ད་ཆ་འཛམ་གླིང་ཡོངས་སུ་ཆོས་དད་པ་དུང་ཕྱུར་༣༠ཙམ་ཡོད། ཆོས་དད་པ་དེ་དག་ཚང་མ་རྒྱལ་ཁབ་མི་འདྲ་བའི་ཁོངས་གཏོགས་ཡིན་ཞིང་། རང་རྒྱལ་ཁབ་ཀྱི་ལ་རྒྱ་དང་ཁེ་ཕན་སྲུང་སྐྱོབ་བྱེད་རྒྱུ་དེ་རང་ཉིད་ཀྱི་གི་འགན་འཁྲིར་བརྩི་གི་ཡོད་པ་ལས། ཡེ་ཤུ་ཆོས་ལུགས་སམ་ཡང་ན་དབྱི་སི་ལན་ཆོས་ལུགས་ལ་དད་པ་ཡོད་པའི་དབང་གིས་རང་ཉིད་དབུས་ཤར་ས་ཁུལ་གྱི་རྒྱལ་ཁབ་ག་གེ་མོ་ཞིག་གི་བུ་ཕྲུག་ཡིན་ཞེས་བརྗོད་མཁན་སུ་ཞིག་ཀྱང་མཐོང་རྒྱུ་མེད། ཚང་མས་མཁྱེན་གསལ་ལྟར། ཏཱ་ལའི་ཡི་ནུབ་ཕྱོགས་ཀྱི་རྒྱབ་སྐྱོར་པའི་ཁྲོད་མང་པོ་ཞིག་ནི་ཡེ་ཤུའི་་ཆོས་པ་རྣམ་དག་ཡིན་ཞིང་། ཏཱ་ལའི་གཏན་ཚིགས་ལྟར་ན། ཡེ་ཤུའི་་ཆོས་དད་པ་དེ་དག་གི་སློབ་དཔོན་ཡང་དབུས་ཤར་ས་ཁུལ་གྱི་རྒྱལ་ཁབ་གང་རུང་ཞིག་ཡིན་དགོས་པ་མ་ཡིན་ནམ།

ཏཱ་ལའི་རྒྱུ་མཚན་གཉིས་པ་ནི། ངའི་གཟུགས་ཀྱི་ཕུང་པོ་འདི་རྒྱ་གར་གྱི་ཟས་རིགས་ལ་བརྟེན་ནས་མི་ལོ༥༡འཚོ་སྐྱོང་བྱས་ཡོད། ་ རྒྱ་གར་གྱི་ཟས་རིགས་དང་རིག་གཞུང་ལ་བརྟེན་ནས་རང་ཉིད་འཚོ་སྐྱོང་བྱས་པར་བརྟེན་ང་རང་རྒྱ་གར་གྱི་བུ་ཕྲུག་ཡིན་ཞེས་བརྗོད་པ་དེ་རེད། དེ་ཡང་འདིའི་ཐོག་ནས་ཇི་སྐད་དུ་ནུ་འོ་སྟེར་ན་ཨ་མར་བརྩི་ཞེས་པའི་ངག་རྒྱུན་དེ་་མི་རྣམས་ཀྱི་སེམས་ནང་དབང་མེད་དུ་དྲན་སྲིད། དངོས་གནས་ཏྭ་ལའི་ནས་བཤད་པ་བཞིན། ཁོ་རང་ནས་མེས་རྒྱལ་ལ་རྒྱབ་གཏོད་བྱས་ནས་མི་ལོ༥༡སོང་རིང། གཙོ་བོ་རྒྱ་གར་གྱི་ཟས་རིགས་ལ་བརྟེན་ནས་འཚོ་སྡོད་བྱས་པ་ཞིག་་ཡིན་ཞིང་། ཏཱ་ལའི་ནས་་ལོ་རེ་བཞིན་་རྒྱ་གར་ལ་ཐུགས་རྗེ་ཆེ་ཞུ་གི་་ཡོད་ཅིང་། དེ་ཡང་གནས་ལུགས་དང་མཐུན་པ་ཞིག་རེད། འོན་ཀྱང་དེ་ལ་བརྟེན་ནས་གློ་བུར་དུ་“རྒྱ་གར་གྱི་བུ་ཕྲུག”་ཞིག་ཏུ་འགྱུར་བ་ནི་རྒྱུ་མཚན་གསལ་པོ་་ཞིག་མེད་པ་མངོན་གསལ་རེད། དེང་དུས་ཀྱི་འཛམ་གླིང་འདིར། རྒྱུ་རྐྱེན་སྣ་ཚོགས་ཀྱི་དབང་གིས་མི་རྣམས་རྒྱལ་ཁབ་གཞན་ཏུ་འཚོ་སྡོད་བྱེད་པ་ནི་ཡོངས་ཁྱབ་ཀྱི་སྣང་ཚུལ་ཞིག་ཡིན། འོན་ཀྱང་རྒྱལ་ཁབ་གཞན་གྱི་ཟས་རིགས་བཟས་པའི་དབང་གིས་རྒྱལ་ཁབ་དེའི་་བུ་ ཕྲུག་ཡིན་ཞེས་ཁྱབ་བསྒྲགས་བྱེད་པ་ནི་ད་ལྟའི་བར་དུ་སྔོན་དཔེ་མེད་པ་ཞིག་རེད། གནད་དོན་གཞན་དུ་ད་དུང་མི་ལོ་༥༡རིང་ཏཱ་ལའི་ནས་རྒྱ་གར་གྱི་ཟས་རིགས་བཟས་པ་ཕུད་ད་དུང་རྒྱལ་ཁབ་གཞན་དག་གི་ཟས་རིགས་ཀྱང་མང་པོ་བཟས་ཡོད་པ་དང་། རྒྱལ་ཁབ་གཞན་དག་མང་པོ་ཞིག་གི་དངུལ་བླངས་ཡོད་པ་རེད། དུས་རབས་གོང་མའི་ལོ་རབས་༦༠པའི་ནང་། ཏཱ་ལའི་ནས་རྒྱལ་ཁབ་ག་གེ་མོའི་གསང་འཕྲིན་ཅུད་ཀྱིས་སྤྲད་པའི་ཨ་སྒོར་ཁྲི༡༨ཀྱི་ལོ་ཕོགས་བླངས་ཤིང་རྒྱལ་ཁབ་དེའི་ཙུང་ཐུང་གི་ཕོགས་ལས་ཀྱང་མཐོ་བ་ཡོད་པ་རེད། ཏཱ་ལའི་གཏན་ཚིགས་ལྟར་ན། སུ་ཞིག་གིས་ལུས་ཕུང་གསོས་ན་དེ་དེའི་བུ་ཕྲུག་ཡིན་དགོས་པ་རེད། དེས་ན་ཁོང་ནས་་ད་དུང་རང་ཉིད་དུས་མཚུངས་སུ་རྒྱལ་ཁབ་གཞན་དག་གང་རུང་ཞིག་གི་བུ་ཕྲུག་ཡིན་ཞེས་ཁྱབ་བསྒྲགས་བྱེད་རྩིས་ཡོད་དམ། དེ་ལྟར་མིན་ཚེ་གཡས་་པར་སྤྱན་དང་་གཡོན་པར་མིག་ཅེས་པའི་དཔེ་ལྟར་ངོ་ཆེ་ཆུང་དུ་མི་འགྱུར་རམ།

　　ཏཱ་ལའི་རྒྱུ་མཚན་གསུམ་པ་ནི། ང་རང་གི་ཆོས་ལུགས་འཆམ་མཐུན་དང་འཚེར་མེད་ཞི་བའི་བསམ་བློ་དེ་དག་རྒྱ་གར་ནས་ཡོང་བ་ཞིག་ཡིན་ཞིང་། འཚེར་མེད་ཞི་བ་དང་ཆོས་་ལུགས་འཆམ་མཐུན་ནི་རྒྱ་གར་གྱི་སྲོལ་རྒྱུན་ཡིན། ང་རང་གང་དུ་སོང་ནའང་སྲོལ་རྒྱུན་དེ་འཁྱེར་ནས་འགྲོ་གི་ཡོད། དེ་ནི་ང་རང་རྒྱ་གར་གྱི་བུ་ཕྲུག་ཅིག་ཡིན་ཞེས་བརྗོད་པའི་རྒྱུ་མཚན་གསུམ་པ་དེ་ཡིན་ཟེར་བ་དེ་རེད། ཏཱ་ལའི་ནས་ཡང་རྫུན་གཏམ་བཤད་པ་རེད། ༡༩༥༩ལོའི་དྲག་པོའི་ངོ་ལོག་ཟིང་འཁྲུག་འགོ་ཚུགས་པ་ནས་བཟུང་། ཁོང་གི་མི་ལོ་བཅུ་ཕྲག་རིང་གི་ཁ་བྲལ་རིང་ལུགས་ཀྱི་བྱེད་སྒོ་དེ་ཐོག་མཐའ་བར་གསུམ་དུ་རྩུབ་སྤྱོད་འཇིགས་སྐུལ་དང་འབྲེལ་བ་ཡོད་ཅིང་། འཚེར་མེད་ཞི་བའི་བསམ་བློ་དང་རྦད་དེ་ཕྱིན་ཅི་ལོག་ཡོད་པ་རེད། ཚང་མས་མཁྱེན་གསལ་ལྟར། འཆམ་མཐུན་དང་། འཚེར་མེད་ཞི་བ་ནི་མིའི་རིགས་ཀྱིས་སྔར་ནས་ད་བར་བརྩོན་ལེན་བྱེད་པའི་ཡོངས་ཁྱབ་ཀྱི་རེ་འདུན་ཞིག་ཡིན་ཞིང་། རྒྱ་གར་གྱི་སྲོལ་རྒྱུན་ནང་དུ་ཡོད་ལ། རྒྱལ་ཁབ་གཞན་དག་དང་། མི་རིགས་གཞན་དག་གི་སྲོལ་རྒྱུན་ནང་དུའང་ཡོད་པ་ལས། རྒྱལ་ཁབ་ག་གེ་མོ་ཞིག་གི་གཅིག་བདག་ཁེ་དབང་ག་ལ་ཡིན། ཏཱ་ལའི་ནས་རྒྱ་གར་ལ་བསྟོད་བསྔགས་བྱེད་ཆོག་མོད་། འོན་ཀྱང་རྒྱལ་ཁབ་གཞན་དག་དང་མི་རིགས་གཞན་དག་གི་རིག་གནས་ལ་གང་བྱུང་དམའ་འབེབས་བྱེད་པའི་དབང་ཆ་མེད། གནའ་ནས་ད་བར། མིའི་རིགས་ཀྱི་རིན་ཐང་ཡོད་པའི་བསམ་བློ་དང་། རིག་གནས་ཚང་མ། རྒྱལ་ཁབ་མི་འདྲ་བ་དང་མི་རིགས་མི་གཅིག་པའི་མི་ཚོགས་ཀྱིས་ཚད་གཞི་མི་འདྲ་བའི་སྒོ་ནས་ཐུན་མོང་དུ་ལོངས་སྤྱོད་བྱེད་ཀྱི་ཡོད་མོད། ཡིན་ནའང་རྒྱུ་མཚན་དེ་ལ་བརྟེན་ནས་བསམ་བློ་དང་། རིག་གནས་དེ་་དག་གི་འབྱུང་ཁུངས་སུ་གྱུར་པའི་རྒྱལ་ཁབ་དང་དེ་ལོངས་སྤྱོད་བྱེད་མཁན་རྒྱལ་ཁབ་གཞན་དག་བར་ལ་ཕ་དང་བུ་ཡི་འབྲེལ་བ་ཡོད་པར་ངོས་འཛིན་བྱེད་མཁན་ད་བར་མཐོང་རྒྱུ་མེད། ཏཱ་ལའི་རྒྱུ་མཚན་ཟེར་བ་དེ་ནི་རྦད་་དེ་མིའི་རིགས་ཀྱི་བསམ་བློའི་རིག་གནས་རྒྱུད་སྤེལ་བྱེད་སྟངས་ལ་འཁྱོག་བཤད་དང་དམའ་འབེབས་བྱེད་པ་ཞིག་རེད།

ཏཱ་ལའི་“རྒྱ་གར་གྱི་བུ་ཕྲུག”སྨྲ་བ་དེ་ཁུངས་ལུང་མེད་པ་དང་། ཚུལ་དང་མི་མཐུན་པ། ངོ་གནོངས་དགོས་པ་བཅས་ཡིན་པར་བརྟེན། ད་བར་ཏཱ་ལའི་རུ་ཚོགས་ཀྱི་ནང་ཁུལ་དུའང་དང་ལེན་བྱེད་མཁན་ཉུང་ཞིང་། གདོང་དུ་ལངས་ནས་ཏཱ་ལའི་ལ་དག་འབུད་བྱེད་མཁན་དེ་བས་ཀྱང་ཉུང་ཉུང་ཡིན་པ་དང་། ཁོང་གི་ནུབ་ཕྱོགས་ཀྱི་རྗེས་འབྲང་པ་མང་པོ་དེ་དག་ཀྱང་སྐསབས་འདིར་ཚང་མ་ཁུ་སིམ་མེར་བསྡད་ཡོད་ཅིང་། ཐ་ན་ཏཱ་ལའི་ནས་ངོ་བསྟོད་བྱ་ཡུལ་རྒྱ་གར་དུའང་གནས་ཚུལ་དེ་སྣངབ་མེད་དུ་འཇོག་པ་ལས་རང་ཉིད་ལ་བུ་ཕྲུག་ཅིག་མང་དུ་ཕྱིན་པའི་དབང་གིས་དགའ་སྤྲོ་ཚད་མེད་བྱེད་མཁན་མེད་པ རེད།

ཏཱ་ལའི་ལ་རྒྱ་གར་གྱི་བུ་ཕྲུག་བྱེད་འདོད་ཡོད་ན། བྱ་སྤྱོད་ངོ་མ་ཡོད་དགོས་པ་སྨོས་ཅི་དགོས། སྤྱི་ལོ༡༩༨༦ལོའི་སྤྱི་ཟླ༤པར། ཏཱ་ལའི་ནས་སྐབས་དེའི་རྒྱ་གར་གྱི་ཙུང་ལི་ལཱ་ཅི་ཧྥུ་གནྡི་ལ་ཕུལ་བའི་བརྗེད་ཐོ་ཡི་གེའི་ནང་དུ། འཛེམ་ཟོན་སྤུ་ཙམ་ཡང་མེད་པའི་ཐོག་ནས་རང་གི་ཕ་མེས་ཀྱི་ས་ཆ་སྟེ་བོད་ཀྱི་ལྷོ་རྒྱུད་ཀྱི་ས་ཁུལ་དེར“ཨ་རོལ་སྣ་ཆའི་མངའ་སྡེ”ཞེས་བརྗོད་ཡོད། སྤྱི་ལོ༡༩༩༩ལོར་ཏཱ་ལའི་ནས་ཐའེ་ཝན་གྱི《ཀྲུང་གོའི་སྐབས་དོན་ཚགས་པར་》ཞེས་པའི་གསར་འགོད་པའི་ཆེད་དོན་བཅར་འདྲི་དང་ལེན་བྱེད་སྐབས། ཁོང་གིས“ང་རང་ལ་དྭགས་དང་མོན་རྟ་དབང་དུ་བསྐྱོད་སྐབས་ལས་འགན་གང་ཡང་མེད། གངས་ལགས་ཤེ་ན། དེ་ནི་རྒྱ་གར་གྱི་ས་ཆ་ཞིག་རེད་”ཅེས་བརྗོད་ཡོད། ཉེ་བའི་ལོ་ཤས་ནང་། ཏཱ་ལའི་ནས་དེ་བས་ཀྱང་བོད་ཀྱི་ལྷོ་རྒྱུད་ས་ཆ་དེ་“རྒྱ་གར་གྱི་མངའ་ཁོངས་ཡིན་”ཞེས་ནམ་རྒྱུན་དུ་བཤད་ཀྱི་ཡོད་པ་རེད། ཏཱ་ལའི་ནས་གཙོ་བོ་བྱེད་པའི་ཀྲུང་གོ་ཁ་བྲལ་དུ་གཏོང་རྒྱུ་དམིགས་ཡུལ་དུ་བཟུང་བའི་ཁྲིམས་འགལ་གྱི་ཆབ་སྲིད་ཡུལ་གྱར་ཚོགས་པ་དེར། རང་ཉིད་ལ་སྟོབས་ཤུགས་གང་ཡང་མེད་སྟབས། བོད་རང་བཙན་ཟེར་བའི་རེ་བ་དེ་ཕྱི་རྒྱལ་གྱིས་རྒྱབ་སྐྱོར་བྱེད་རྒྱུར་མི་བརྟེན་ཀ་མེད་ཡིན་པ་རེད།

གལ་ཏེ་ཏཱ་ལའི་ནས་སེམས་ཐག་གཙང་བཅད་ཀྱིས་“རྒྱ་གར་གྱི་བུ་ཕྲུག་”་བྱེད་འདོད་ན། དེ་ནི་ཁོང་རང་ཉིད་ཀྱི་བྱ་བ་ཞིག་ཡིན་པས། མི་གཞན་གྱིས་དེར་ངོ་རྒོལ་བྱེད་པའི་དབང་ཆ་མེད། ཡིན་ནའང་ཁོང་གིས་ད་ནས་བཟུང་རང་ཉིད་“བོད་མི་ཡོངས་ཀྱི་ཁེ་ཕན་གྱི་འཐུས་ཚབ་”ཡིན་ཟེར་བར་ཁ་གཡར་ནས་གང་སར་མགོ་སྐོར་མི་གཏོང་བའི་གསལ་འདེབས་བྱ་རྒྱུ་ཡིན། བོད་ཀྱི་བྱ་དོན་རྦད་དེ་ཀྲུང་གོའི་ནང་སྲིད་ཡིན་པས། “རྒྱ་གར་གྱི་བུ་ཕྲུག་”ཡིན་པའི་ངོས་ནས་དེའི་ཐད་མཐོ་བཤད་དམའ་བཤད་བྱེད་པའི་ཐོབ་ཐང་་མེད། དེ་ལས་ལྡོག་ཏེ་ཏྭ་ལའི་ནས་རྒྱ་གར་གྱི་ནང་སྲིད་བྱ་དོན་ལ་ཐེ་གཏོགས་བྱེད་རྒྱུའི་ཚོད་ལྟ་བྱེད་ཆོག འོན་ཀྱང་དེ་ཡང་རྒྱ་གར་ནས་བུ་ཕྲུག་ཡིན་པར་ཁས་ལེན་བྱེད་མིན་ལ་ལྟ་དགོས།

སྨྱུག་འཛིན་པས་ཏཱ་ལའི་དང་ཁོང་གི་རྗེས་འབྲང་པ་ཚོས་རྩོམ་ཡིག་འདི་ལ་དམིགས་ནས་བསྐྱར་དུ་རྒྱུ་མཚན་གསེད་བཀྲོལ་བྱེད་རྒྱུའི་རེ་བ་དང་བཅས།

གསར་བརྗེ་སྐྱབས་ཡོད་ས་ན་གསར་བར་རྒྱུས་ལོན་བྱེད་མ་ཐུབ་པར་ལྷག་སོང་བ་ཞིག་ཡོད་མི་སྲིད། དེ་བས། སློབ་སྦྱོང་ཡག་པོ་ཞིག་སྤྲད་སོང་ཐུགས་རྗེ་ཆེ།

མི་ཆུང་འདི་མི་ཆེན་ཞིག་ཡིན་པ་འདྲ། ཡིན་ནའང་། དགོངས་ཚུལ་ནོར་འདུག དེང་སྐབས་ཀྱང་དོན་ཚན་བཞི་དེ་རྒས་ཡོད་པ་མ་རེད་ལ། ཚོང་དོན་གྱི་མ་རྩ་གལ་ཆེན་ཞིག་ཏུ་གྱུར་ཡོད་པ་རེད། དོ་སྣང་ཅུང་ཙམ་ཡོད་མཁན་ཞིག་ཡིན་ན། དབྱེ་ཞིབ་ཏོག་ཙམ་གྱི་རྗེས་ནས་གསལ་ཁ་བཏོད་ཐུབ་ཀྱི་ཡོད།

དབུ་མའི་ལམ་ལ་གཞུང་ལུགས་རང་བཞིན་གྱི་རིན་ཐང་ཡོད་པ་ལས་སྲིད་དོན་རང་བཞིན་ནམ་བོད་དོན་རང་བཞིན་གྱི་ནུས་པ་ཉམས་ཟིན་ལ། དེའང་ཚང་མ་ལོས་ཧ་གོ་ཟིན་པའི་རྒྱུ་རྐྱེན་དེ་དག་ལ་ཐུག་ཡོད། དེ་བས། གལ་སྲིད་འདི་ལྟར་ཕྱིན་པ་ཡིན་ན། ལོ་ངོ༥༠ལྷག་ལ་ཕྱི་ལོགས་སུ་བསྡད་པ་འདིའང་ཁྲིམས་འགལ་ཆགས་སྲིད་པའི་ཁར། དེ་ནི་རང་ཉིད་རང་གིས་ཤི་ལམ་དུ་དེད་པ་ཤ་སྟག་ཅིག་མ་ཡིན་ནམ།

དམངས་གཙོའི་སྤྱི་ཚོགས་ནང་འོས་བསྡུ་སྐབས་བརྒྱ་ཆ་དྲུག་ཅུ་རེ་བཞིས་རྒྱབ་སྐྱོར་ཞིག་གྲ་དང་ཟུར་གང་ནས་བཙལ་ཀྱང་རྙེད་ཀི་མ་རེད། འདི་ལས་ལྷག་པའི་རྒྱབ་སྐྱོར་ཞིག་འཐོབ་རྒྱུའང་ཡོད་པ་མ་རེད། འདིའི་རིན་ཐང་ཤེས་ན་ཡག་གི་རེད། ཨུ་ཚུགས་མཐར་བསྐྱལ་དང་དོགས་པ་རྣམ་རྟོག་གིས་རང་ཉིད་འགེབ་ཐུབ་ཀི་མ་རེད། གདོང་པར་ཆུ་ཞིག་བརྒྱབ་སྟེ། ཡང་བསྐྱར་བསམ་བློ་ཐོངས།

ལམ་དབུ་མས་མཐའ་མ་དེར་བོད་རིགས་ཡོངས་རྫོགས་ལ་རང་སྲིད་རང་སྐྱོང་ཞིག་ཡོང་ཐབས་ཀྱི་བསམ་འཆར་ཡིག་ཆ་སྤྲད་པ་རེད། དེར་རྒྱ་ནག་གཞུང་གིས་ཞིབ་འཇུག་བྱས་རྗེས་དོན་ཚན་བདུན་གྱི་སྒང་ནས་རང་བཙན་དང་ཕྱེད་རང་བཙན། རྣམ་པ་འགྱུར་བའི་རང་བཙན་པའི་ངེས་ཤེས་རྙེད་ཡོད་ཅེས་ཕྱི་གསལ་ནང་གསལ་གྱི་ལམ་ནས་གསལ་བསྒྲགས་བྱས་པ་རེད། འདིའི་བཀག་རྡོ་བཙལ་སྐབས་རང་སྟེང་ནས་མི་རྙེད་ན་རྒྱ་ནག་གཞུང་ཐོག་ནས་བཙལ་དགོས་པ་རེད། དེ་མི་བཙལ་བར་ནང་ཁུལ་གྱི་མི་རེ་འགའ་ལ་ཁ་གཡོགས་ནས་ཉེས་པ་འཚོལ་དོན་མི་འདུག་འདོད།

གཤམ་ལ་རྒྱབ་ལྗོངས་ཞིག་ངོ་སྤྲོད་བྱེད།

དང་པོ། ཏླ་ལའི་བླ་མ་མེས་རྒྱལ་དུ་ཕྱིར་ལོག་གི་བརྩོན་ལེན་དེ་བོད་ལྗོངས་ཀྱི་བདེ་འཇགས་དང་། མི་རིགས་གཅིག་གྱུར་ལ་ཕན་གྱི་ཡོད། དེ་བཞིན་བོད་མི་རྣམས་ཀྱི་བསམ་པ་ཕྱི་རོལ་ཏུ་མ་ཕྱོགས་པར་ནང་དུ་ཚུད་ཐུབ་ཀྱི་རེད།

གཉིས་པ། རུ་སུ་ནས་ཤུགས་གང་ཡོད་བཏོན་ནས་ཏྰ་ལའི་བླ་མར་བརྩོན་ལེན་བྱེད་ཀྱི་ཡོད་པ་རེད། གལ་སྲིད་ཏྰ་ལའི་བླ་མ་རུ་སུས་བརྩོན་ལེན་བྱས་ཚེ་ང་ཚོར་འཇིགས་སྣང་ཆེན་པོ་སྐུལ་གྱི་རེད། གནས་བབས་དེ་ནི་ཤིན་ཏུ་ཚབས་ཆེན་དང་། ཤིན་ཏུ་རྙོག་འཛིངས་ཅན་དུ་འགྱུར་གྱི་རེད། འོན་ཀྱང་དེ་སྔོན་གྱི་གནས་ཚུལ་ལ་བལྟས་ན། ཏྰ་ལའི་ཚོགས་ཁག་གིས་རུ་སུ་ལ་དྭོགས་ཟོན་བྱེད་སྟངས་ལ་བལྟས་ན་འབྲེལ་བ་བྱེད་འདོད་ཨེ་ཡོད་སྙམ། དེར་བརྟེན་དུས་སྐབས་དེ་དམ་འཛིན་གྱིས་ཏྰ་ལའི་བླ་མ་ཕྱིར་ལོག་གི་བརྩོན་ལེན་བྱེད་དགོས་གལ་ཆེ། གལ་སྲིད་ཏྰ་ལའི་བླ་མ་ལམ་སེང་ཕྱིར་མ་ལོག་མ་ཐུབ་ནའང་སྒོ་རྒྱག་མི་རུང་།

གསུམ་པ། ཏྰ་ལའི་བླ་མ་མེས་རྒྱལ་དུ་ཕྱིར་ལོག་གི་བརྩོན་ལེན་བྱ་རྒྱུ་དེ་རྒྱལ་སྤྱིའི་ཐོག་དོན་སྙིང་གཏིང་ཟབ་ཡོད། དེང་སྐབས་ང་ཚོས་ཧོང་ཀོང་དང་། ཐའི་ཝན་གྱི་སྐོར་ཐག་གཅོད་བྱ་རྒྱུ་དེ་མི་ཚོས་བོད་དོན་ལ་ལྟ་གི་ཡོད། གལ་སྲིད་བོད་དོན་སྐོར་ཕུན་སུམ་ཚོགས་པའི་ཐག་གཅོད་བྱུང་ཚེ་ཧོང་ཀོང་དང་། ཐའི་ཝན་གཉིས་ཀྱི་གནད་དོན་ཡང་བདེ་བླག་ཏུ་ཐག་གཅོད་བྱེད་ཐུབ་ཀྱི་རེད། དེ་ལྟར་ཐག་གཅོད་ཐུབ་པའི་སྐུལ་འདེད་ཀྱི་གནད་དོན་ལ་ཕན་ནུས་ཆེན་པོ་ཡོད་པ་རེད།

བཞི་བ། དེང་སང་ཏྰ་ཚོགས་ཁག་རང་ལ་དམག་ཁྲི་གཅིག་གཉིས་ཙམ་ཡོད་པ་རེད། དམག་དཔུང་དེ་དག་ལ་རྒྱ་གར་དང། རུ་སུའི་རྒྱབ་སྐྱོར་ཡོད་པར་བརྟེན་ང་ཚོའི་རྒྱལ་མཚམས་སུ་འཇིགས་སྐུལ་གྱིས་རྐྱེན་པས་བོད་ལྗོངས་ནང་ཁུལ་གྱི་བདེ་འཇགས་དང་། མི་དམངས་ཀྱི་ལུས་སྲོག་རྒྱུ་ནོར་བཅས་ལ་གནོད་སྐྱོན་ཡོང་གི་རེད། གལ་སྲིད་ང་ཚོས་ཏྰ་ལའི་ཕྱིར་ལོག་ཐུབ་པའི་བརྩོན་ལེན་བྱེད་ཐུབ་ཚེ་འཇིགས་སྐུལ་དེ་རིགས་མཐར་ཕྱིན་པའི་རྩ་མེད་བཟོ་ཐུབ་ཀྱི་རེད། ཏྰ་ལའི་གནས་སྐབས་རིང་ཕྱིར་ལོག་མ་ཐུབ་ནའང་ང་ཚོས་མུ་མཐུད་ནས་ལས་དོན་གྲུབ་ཐབས་བྱས་ན་དམག་དཔུང་དེ་དག་བེད་སྤྱོད་བྱ་རྒྱུར་སྔོན་འགོག་ཐུབ་ཀྱི་རེད་ཅེས་གསལ་འདུག

གོང་གསལ་འདི་༡༩༧༩ ལོ་འགོར་ཀྲུང་གོ་གུང་ཁྲན་ཏང་དབུས་ཆབ་སྲིད་ཅུས་ཀྱི་ཚོགས་འདུའི་ཐོག་དམིགས་བཀར་ཀྱིས་ཏྰ་ལའི་བླ་མ་ཕྱིར་ཕེབས་སྐོར་ལ་བཟུང་བའི་གཞི་རྩའི་སྲིད་བྱུས་དེ་རེད། ཚོགས་འདུ་དེའི་གྲོས་ཆོད་གཞིར་བཟུང་དབུས་འཐབ་ཕྱོགས་གཅིག་གྱུར་གྱི་འབྲེལ་ཡོད་ལས་ཁུངས་ཁག་ལ་འགྲེམས་སྤེལ་བྱས་པའི་དོན་ཚན་བཞི་མ་དེ་རེད། ཏིང་ཞོ་ཕིན་གྱི་རང་བཙན་མ་གཏོགས་ག་རེ་ཡིན་ཡང་གྲོས་མོལ་བྱས་ཆོག་ཟེར་བའི་སྐད་གྲགས་ཅན་གྱི་གསུང་ཚིག་དེའི་དམིགས་ཡུལ་དང་ཚད་གཞི་ཡང་འདི་ལས་གཞན་མེད། བོད་རྒྱ་ཞི་མོལ་དང་དབུ་མའི་ལམ་གྱི་འགོ་འཛུགས་ཀྱང་འདི་ནས་རེད། དེ་ནས་ད་བར་གྱི་འགྱུར་རིམ་ངོ་སྤྲོད་བྱེད་དགོས་བསམ་མོད། ཡིག་ཉོག་ལ་དོགས་ནས་བཞག་པ་ཡིན། གང་ལྟར་ལམ་དབུ་མའི་བཀག་རྡོ་རང་གཞན་གང་ཆགས་ཡོད་མེད་གསལ་བོ་བཟོ་སླད་ཡིན།

དྲ་གྲོགས་ཚོས་དགོངས་ཚུལ་མང་པོ་གསུངས་འདུག འདིར་བགྲོ་གླེང་མུ་མཐུད་དེ་ཡོང་སླད་ཚིག་འགའ་སྣོན་མ་བྱེད།

༡༽དམངས་གཙོ་ལ་བོད་མི་གང་མང་ཞིག་གིས་འགལ་འདུའི་ཚོར་བ་ཞིག་གི་སྟེང་ནས་བལྟ་གི་འདུག རྒན་ལྷ་མོ་དང་མི་ཆུང་གཉིས་རྩོམ་ཡིག་འདི་དང་འབྲེལབའི་འགལ་འདུའི་ཚོར་བ་འཁུར་མཁན་གྲས་རེད། དམངས་གཙོའི་སྤྱི་ཚོགས་ནང་བསམ་ཚུལ་མི་མཐུན་པ་ཡོང་སྐབས་ཁོང་ཚོས་དེ་ལ་༼ བློ་གྲོས་དང་ལྟ་བ་༽གཉིས་སུ་ཕྱེ་ནས་ལྟ་གི་འདུག དཔེ་ཙམ་བཀོད་ན། བོད་མིའི་གཞི་རྩའི་ཆབ་སྲིད་གནས་བབ་རྩོད་སྐབས། ༧གོང་ས་མཆོག་དང་བོད་གཞུང་གི་ལངས་ཕྱོགས་དང་མཐུན་པའི་བསམ་ཚུལ་རིགས་ལ་༼ བློ་གྲོས་ ༽ཞེས་པའི་ཚིག་འདི་བཀོལ་གི་འདུག ཁོང་ཚོར་མཚོན་ན་དོན་དམ་གྱི་དམངས་གཙོའི་སྨྲ་བརྗོད་རང་དབང་ཞེས་པ་འདི་ཙམ་རེད། སྐུ་མདུན་དང་བོད་གཞུང་གི་ལངས་ཕྱོགས་དང་མི་མཐུན་པའི་བསམ་ཚུལ་ལ་ཁོང་ཚོས་ ༼ ལྟ་བ་ ༽ཞེས་པ་འདི་བེད་སྤྱོད་གཏོང་གི་འདུག ལྟ་བ་མི་མཐུན་མཁན་ཚོ་ད་ལྟའི་ཆར་ཁོང་ཚོ་རྒྱ་ནག་ལས་ཀྱང་ཞེད་སྣང་སྐྱེས་ས་ཆགས་ཡོད་པ་རེད། དམངས་གཙོ་དངོས་ཀྱི་ནང་སྨྲ་བརྗོད་རང་དབང་ལ་ཁོ་ཚོ་ནང་བཞིན་༼བློ་གྲོས་དང་ལྟ་བ་༽ལ་གཉིས་ལ་ཁྱད་པར་ཡོད་མེད་ཚང་མས་ཤེས་གསལ་རེད།
༢༽སྔོན་མ་བོད་རང་བཙན་རྩོད་མཁན་དང་གླེང་མཁན་ཚོ་བོད་མི་རིགས་ཀྱི་དཔའ་བོར་བརྩི་བཞིན་ཡོད་པ་རེད། ཉེ་བའི་ལོ་འགའི་སྔོན་ནས་བོད་རང་བཙན་རྩོད་མཁན་དང་གླེང་མཁན་རྣམས་གླེན་པར་༼ ཆབ་སྲིད་པ་མིན་པ། གནས་བབ་མི་ཤེས་མཁན། རང་ལྟ་མཆོག་འཛིན་བྱེད་མཁན། རང་གི་ནོར་འཁྲུལ་ངོས་ལེན་མི་བྱེད་མཁན། ༽རྩིས་བཞིན་ཡོད་པ་རེད། ཁོ་ཚོ་ལ་ད་དུང་ནག་ཉེས་མིང་ཆེན་པོ་ཞིག་གིས་སྒུག་ནས་བསྡད་ཡོད་པ་རེད། ནམ་གཞི་ལམ་དབུ་མར་ཕམ་ཁ་བྱུང་ཉིན་ཁོ་ཚོ་ནི་འོ་མས་བཀྲུས་ཀྱང་མི་དག་པའི་ལོ་རྒྱུས་ཀྱི་ཉེས་ཅན་པ་ཆགས་ཀི་རེད། འདི་ད་ལྟའི་ཆར་དང་ལྷག་པར་དུ་རྩོམ་ཡིག་འདིའི་བསམ་བློའི་རྒྱབ་ལྗོངས་ནང་གསལ་གསལ་ཐིང་ཐིང་གིས་མཐོང་ཐུབ་པ་ཞིག་རེད། ཡིན་ནའང་ཁོ་ཚོས་༼དེང་གི་ཆུང་ཕྱོགས་པ་མང་པོ་ཞིག་གིས་རིགས་ཞེན་གྱི་དབང་གིས་རྒྱ་ཆེ་བའི་རྒྱ་རིགས་མི་མང་ལའང་དགྲར་བཟུང་ནས་༽ཅེས་རང་ཉིད་བོད་རང་བཙན་རྩོད་མཁན་དང་གླེང་མཁན་ལས་གང་ཞིག་ལ་སེམས་ཐག་ཉེ་ཤིང་ཞེད་སྣང་མེད་པ་དངོས་ཤུགས་བརྒྱུད་ནས་སྟོན་གང་ཐུབ་བྱེད་ཀྱིན་ཡོད།

༣༽ལམ་དབུ་མ་ལ་དང་པོ་མང་མོས་འོས་བསྡུ་ནང་བརྒྱ་ཆ་དྲུག་ཅུ་རེ་བཞིས་རྒྱབ་སྐྱོར་ཐོབ་ཡོད་པ་རེད། ད་བར་མི་ལོ་བཅུ་ཕྲག་ལྷག་ལ་རྒྱབ་སྐྱོར་འདི་ལ་འགྱུར་བ་གང་ཡང་ཕྱིན་མེད། ༼ ༢༠༠༨ ལོའི་བོད་རྒྱལ་ཡོངས་ཚོགས་ཆེན་སྒང་ནས་ཀྱང་ཛ་དྲག་གི་གནས་སྟངས་ལ་མ་བལྟས་པར་ལམ་ཁ་འདིར་མུ་མཐུད་ནས་རྒྱབ་སྐྱོར་བྱས་ཡོད། ༽ མི་མང་གིས་རྒྱབ་སྐྱོར་མུ་མཐུད་ནས་ཡོད་བཞིན་དུ་མི་ཁ་ཤས་ཀྱི་ལྟ་བ་མི་མཐུན་པར་ཞེད་སྣང་ག་རེ་ཡོད་པ་རེད། དགོངས་པ་རླབས་ཆེན་དང་གནས་བབ་དང་མཐུན་པོ་ཡོད་ན་ད་ནི་གྲུབ་འབྲས་ཡོང་དགོས་པ་གནས་སྟངས་རེད། ད་བར་དུ་དོན་ཕན་ལྡན་པའི་གྲུབ་འབྲས་གང་ཡང་མེད་པ་འདི་མི་མང་གིས་ལན་པ་རེད། རང་བཙན་རྩོད་མཁན་ཚོའི་ལན་པ་རེད། རང་བཙན་རྩོད་མཁན་ཚོ་ལོ་རྒྱུས་ཀྱི་ཁ་དང་ལག་པ་འཕྱི་ས་མ་རེད། འདི་མི་རིགས་ཀྱི་ལས་འབྲས་ལའང་རུང་གི་མ་རེད།

ད་རིང་འདི་ཙམ་ཡིན།

རྒན་ལྷ་མོ་སྐྱབས་ལགས་ཀྱིས། ༼སྔོན་ཆད་མི་དམངས་ལ་རང་དབང་མེད་སོང་བས་དམངས་གཙོ་མེད་པ་རེད། དེང་སང་རང་དབང་ལྡན་སོང་བས་དམངས་གཙོ་ཡོད་པ་རེད། ༽ ཅེས་གསུངས་པ་འདི་ཡང་མགོ་ཉོག་ཆུང་ཆུང་ཅིག་རེད།

སྔོན་ཆད་དམངས་གཙོ་མེད་སྟབས་རང་དབང་མེད་པ་རེད། དེང་སྐབས་དམངས་གཙོ་ཡོད་སྟབས་རང་དབང་ཡོད་པ་རེད་ཅེས་པ་ནི་སྤྱིར་བཏང་གི་བཤད་སྟངས་ཤིག་རེད། གོང་གི་རྒན་ལྷ་མོ་སྐྱབས་ལགས་ཀྱི་བཤད་སྟངས་འདི་བཙན་བྱོལ་བོད་མི་ཚོར་དམིགས་པའི་སྡོམ་ཚིག་ཅིག་ཡིན་ཀྱང་སྲིད།

འདི་གདན་ས་ཁག་ནས་རྟགས་གསལ་བཏང་སྟེ་རྩོད་པ་བྱས་ན་དེ་བས་ཀྱང་ཉམས་མཚར་པོ་ཞིག་ཡོད་སྲིད།

ནང་མི་གཅིག་གི་ནང་དུ་ལྟ་བ་མི་མཐུན་ན། སྤྱི་ཚོགས་ཀྱི་ལྟ་བ་ག་ལ་མཐུན། འདི་ནི་འཇིག་རྟེན་ཆོས་ཤིས་རེད་ཡ།

Dear respectful teacher la,
Tashi DElek!

I am not comfortable about what you said:”ཁ་ལན་སློག་པ་ལས་ཀྱང་ལྟ་བ་མི་མཐུན་པ་དེ་ཞེད་སྣང་ཆེ་ཤོས་རེད། ”

The contrast of ལྟ་བ་མི་མཐུན་པ་is གཅིག་སྡུད་ཀྱི་ལྟ་བ.

I am sorry! Sir.

རྭ་རྒྱ་བློ་དབང་མིང་ཅན་གྱིས་གུས་མོར་སྤྱན་གྱིས་གཟིགས་མ་གཟིགས་སོགས་སྙན་ངག་མང་པོ་ཞིག་བྲིས་འདུག གུས་མོ་ཤེས་ཚད་སྐྱོ་སྟབས་གོ་བ་ཆ་ཚང་ལོན་མ་སོང་། ཡིན་ནའང་གུས་མོས་ཆབ་སྲིད་གླེང་སར་སྙན་ངག་འབྲི་བའི་ལུགས་སྲོལ་མེད་པ་ཤེས་ཀྱི་ཡོད། ཡིན་ནའང་གུས་མོས་བསམ་ཚུལ་ལ་སྐྱོན་བརྗོད་པའི་ཞོར་དུ་ཁྱོད་རང་ལ་ཡང་སྐྱོན་ཞིག་འབབ་ཀྱི་འདུག དེ་ནི་གུས་མོས་མཐོང་ཚུལ་རྨི་ལམ་ཡིན་པར་བརྗོད་བཞིན་བོད་ཚར་རྒྱུ་ཡིན་པའི་ལུང་བསྟན་གཅིག་ཀྱང་གསུངས་འདུག ཡིན་ནའང་བོད་མ་ཚར་གོང་དུ་རྒྱ་ནག་ཚར་ཡང་སྲིད་ཅེས་ལབ་ན་ག་རེ་གསུངས་རྩིས་ཡོད། གང་ལྟར་ཚོད་དཔག་གི་མ་འོངས་པ་ཡིན་སྟབས་ངེས་པ་གང་ཡང་མེད་ལ་རྒྱ་ནག་དོན་དངོས་ཀྱི་འགྱུར་བ་བསམས་ན་དེ་ལྟར་མི་ཡོང་བའི་ཚིག་ཐག་གཅོད་རྒྱུ་སྔ་དྲག་པ་རེད།

རྭ་བློ། གོ་སོང་ངམ།

རྭ་རྒྱ་བློ་དབང་ཟེར་བ་འདིས་མི་རིགས་ས་ཁོངས་རང་སྐྱོང་གི་རྗེས་སུ་མི་འབྲངས་མཁན་ཚོར་ནུས་ཤུགས་དང་གནས་བབ་གཉིས་ཤེས་དགོས་ཞེས་བཤད་འདུག དོན་དངོས་སུ་བོད་ཀྱི་ལོ་རྒྱུས་ནི་བོད་ཀྱི་ནུས་ཤུགས་ཡིན་ལ། ལོ་རྒྱུས་ཀྱི་དོན་དངོས་གཞི་ལ་བཞག་ནས་བོད་ཀྱི་གནས་བབ་རང་བཙན་རྩོད་མིན་ལ་མ་ལྟོས་པར་ལོ་རྒྱུས་ཀྱི་གཞི་རྐང་མ་བརླག་པ་ཞིག་རྩོད་ལེན་བྱེད་དགོས་པ་ལས་གཞི་མེད་སར་གཞི་འཛུགས་ཐབས་བྱས་ན་བོད་ནང་གི་ཕུགས་བསམ་ལྡན་པའི་མི་ཚོས་ངོས་ལེན་བྱེད་ཀྱི་མ་རེད། དེ་བོད་ཀྱི་དོན་དངོས་ཀྱི་ནང་གི་གནས་བབ་རེད། ཡང་ན་རྒྱ་ནག་དམར་པོའི་གཞུང་གིས་ཁས་བླངས་རུང་ད་ལྟའི་རྒྱ་ནག་གི་གནས་བབ་དེ་གང་འདྲ་ཞིག་ཡོད་རེད། གཅིག་སྡུད་དམར་པོའི་ལམ་ལུགས་ཀྱི་སྟོབས་ཤུགས་དེ་གང་འདྲ་ཞིག་ཏུ་འགྱུར་བཞིན་པ་ཤེས་ཀྱི་ཨེ་ཡོད། འཐོར་གྲབ་འདུག་ཟེར་གྱི་མེད་དེ་གཏིང་ཟབ་པའི་དཀའ་ངལ་གཅིག་གི་ནང་ལྷུང་ཡོད་པས་ཇི་ལྟར་བྱས་ཀྱང་ཚེ་ཐག་ག་ཚོད་བརྟན་གྱི་རེད། དེ་བས་གནས་བབ་ལ་འགྱུར་བ་ཡོང་མིན་དོགས་པ་མེད་ལ། ལོ་རྒྱུས་ཀྱིས་གནང་བའི་ནུས་ཤུགས་ཀྱང་གོམ་གང་མདུན་བསྐྱོད་ཡོང་ངེས་པ་ནི་རྒྱ་ནག་དཔལ་འབྱོར་སྟོབས་ལྡན་དུ་འགྱུར་བཞིན་པའི་འོག་རུལ་གྱིན་པ་དེས་བརྗོད་བཞིན་འདུག

དམངས་གཙོ་ནི་སྒེར་གཅོད་ཀྱི་ཁ་གཏད་དུ་བསྐྲུན་པ་ཞིག་ཡིན། དམངས་གཙོ་ནི་དམངས་ཕལ་བའི་རེ་འདུན་ལྡོག་མེད་ཅིག་ཡིན། དམངས་གཙོ་ནི་དུས་ཀྱིས་སྤྲད་པའི་ཁེ་དབང་ཞིག་ཡིན། དམངས་གཙོ་ནི་རྒྱལ་ཁབ་བམ་ཚོགས་སྡེ་གང་ཞིག་ཡིན་ཀྱང་ཆ་ཤས་ཐམས་ཅད་ཀྱི་ཐུན་མོང་ལ་དབང་བར་བྱེད་མཁན་ཞིག་ཡིན། མདོར་ན་དམངས་གཙོ་ནི་ཡང་དག་པ་ཞིག་ཡིན། དམངས་གཙོ་ཡང་དག་པ་ཞིག་ཡིན་པ་ཇི་བཞིན་དུ་༸གོང་ས་མཆོག་གིས་གསོལ་རས་གནང་བའི་དམངས་གཙོ་ཡང་ཧ་ཅང་ཕུལ་དུ་ཕྱིན་པ་ཞིག་ཡིན། རྒྱུ་མཚན་ནི། འཛམ་གླིང་འདིར་བོད་མི་དམངས་ལ་ཡོད་ཆོག་ཆོག་གི་ལོངས་སྤྱོད་མང་པོ་ཞིག་རིམ་གྱིས་འགུགས་པ་དང་། ཐབས་ཀྱིས་འདྲེན་པའི་ཐུགས་དགོངས་གཏིང་ཟབ་ཅིག་དང་། བྱམས་བརྩེ་རྨ་མེད་ཅིག འགན་ཁུར་འདོར་མེད་ཅིག་གིས་ཀུན་ནས་བསླངས་ཏེ་དམངས་གཙོ་གསོལ་རས་གནང་བྱུང་། འོན་ཀྱང་། ལོ་རྒྱུས་འགྱུར་ལྡོག་གི་ཆོས་ཉིད་རྨོངས་ཤིང་། དུས་རབས་རེ་རེའི་མི་རྣམས་ལ་གནས་བབ་དང་བསྟུན་པའི་འགན་འཁྲི་རེ་ཡོད་པའང་ཡོངས་སུ་བརྗེད་དེ། དམངས་གཙོའི་དབང་ཐང་ལ་ཁག་བཏགས་ཏེ། ཅི་ཡང་བརྗོད་པ་དང་། ཅི་ཡང་སྒྲུབ་པ་ལྟ་བུའི་སྣང་ཚུལ་མཐོང་རྒྱུ་འདུག འདི་དག་གིས་ཐོག་མར་བསམ་དགོས་པ་ནི། ནུས་ཤུགས་དང་གནས་བབ་གཉིས་ཡིན། མདོར་ན། ཁེ་དབང་ནི་ལས་ཀྱི་འབྲས་བུ་ཡིན་སྟབས། ང་ཚོས་ཐོག་མར་བརྩོན་ལེན་བྱ་འོས་པ་ནི་ལས་དོན་ཡིན་གྱི་ཁེ་དབང་གཏན་ནས་མིན་ནོ། །

རྒན་ལྷ་མོའི་རྩོམ་ཐུང་འདི་བཀླགས་རྗེས་ང་ལ་དོགས་པ་འགའ་སླེབས་སོང་། དེ་དང་མཉམ་དུ་རེ་ཆད་ཀྱང་གང་འཚམ་བྱུང་། གང་ལྟར་བསམ་ཚུལ་འགའ་འདོན་པར་བརྩོན་པ་བསྟེན། དང་པོ་དོགས་པ་ནས་འགོ་འཛུགས་བྱེད།

༡༽ རྒན་ལགས་ཀྱིས་ལྟ་བ་མི་མཐུན་པ་ཇི་ལྟར་མང་ན་དེ་ཙམ་གྱི་ཉེན་ཁ་ཆེ་ཚུལ་མི་སྒེར་ནས་ཁྱིམ་ཚང་དང་། ཁྱིམ་ཚང་ནས་ཚོགས་སྡེ། དེ་ནས་སྤྱི་ཚོགས་དང་། རྒྱལ་ཁབ་བར་གྱི་འབྲེལ་གྲུབ་ཀྱི་སྟེང་ནས་གསུངས་འདུག དམངས་གཙོའི་རང་དབང་ཆ་ཚང་ཡོད་པའི་ཕྱིའི་ལུང་པའི་ནང་ལྟ་བ་མི་མཐུན་པ་ཇི་ཙམ་གྱིས་མང་ན་དེ་ཙམ་གྱིས་ཡར་རྒྱས་ལ་འགྲོ་བཞིན་པ་འདི་གང་ནས་བྱུང་བ་རེད། གཞན་དག་ལ་ཆ་རྐྱེན་ཆགས་པའི་རྩ་ཆེའི་དངོས་པོ་འདི་བོད་ལ་འཁོར་དུས་ཉེན་ཁ་ཆགས་དོན་གང་ཡིན་ནམ། འདི་སྤྱི་ཡོངས་ཀྱི་ངོས་ནས་དོགས་པ་ཙམ་ཡིན།

རྒན་ལྷ་སྐྱབས་ལགས། བཀྲ་ཤིས་བདེ་ལེགས།