བསྟན་ འཛིན་ཉིན་བྱེད།
ད་ག་རེ་བྱེད་དགོས་རེད། བོད་ཀྱི་རང་དབང་འཐབ་རྩོད་ཐོག་བསམ་བློ་གཏོང་སྐབས་འདི་དྲན་ཡོང་གི་འདུག སྐད་འབོད་ནི་རྒྱག་གི་ཡོད་པ་རེད། དམག་ནི་བརྒྱབས་ཡོད་པ་རེད། སློབ་སྦྱོང་ནི་བྱེད་ཀྱི་ཡོད་པ་རེད། ཞི་མོལ་ནི་བྱས་ཡོད། ཕྱི་རྒྱལ་རང་དབང་ཡུལ་གྲུ་ཁག་ཏུ་བོད་དོན་དྲིལ་བསྒྲགས་ནི་བྱས་ཡོད། ལུས་སྲོག་ནི་མང་པོ་ཤོར་ཡོད།
ད་བྱེད་རྒྱུ་མེད་ན་མ་གཏོགས་ཚང་མ་བྱས་ ཚར་འདུག ཡིན་ནའི་བོད་ཀྱི་གནས་བབ་འདི་ཛ་དྲག་ཏུ་དྲག་ཏུ་འགྲོ་གི་འདུག བོད་ནང་རྒྱ་མི་མང་དུ་མང་དུ་འགྲོ་གི་འདུག བཙན་བྱོལ་ནང་བོད་རིགས་མང་དུ་མང་དུ་འགྲོ་གི་འདུག གཞིས་ལུས་དང་བཙན་བྱོལ་གཉིས་ཀའི་ནང་ར་མ་ལུག་མང་དུ་མང་དུ་འགྲོ་གི་འདུག
གཞིས་ཆགས་ནང་ལའང་སེམས་པ་མ་ཆགས། བཙན་བྱོལ་གྱི་རྒྱལ་ས་རྡ་རམ་ས་ལར་ཡང་སེམས་པ་མ་ཆགས། ཨ་རི་བདེ་བ་ཅན་གྱི་ཞིང་ཁམས་སུ་སླེབས་ཀྱང་སེམས་པ་མ་ཆགས། རྒྱ་གུང་བྲན་ཏང་གི་བཙན་རྒྱལ་རིང་ལུགས་འོག་གནས་པའི་བོད་གངས་ཅན་ལྗོངས་སུ་ འགྲོ་འདོད་མེད་ལ། འགྲོ་ཀྱང་མི་ཐུབ།
སྐྱེས་ས་རྒྱ་གར་ལ་སྐྱེས། ཕ་མ་བོད་ནས་ཡོང་། ད་ལྟ་ཨ་རིར་སྡོད། སང་ཉིན་གར་ཡོད་མི་ཤེས། སྐབས་རེར་བསམ་བློ་ཞིབ་མོར་གཏོང་སྐབས་བླ་སྲོག་མེད་པ་ལྟ་བུར་ཚོར།
དེ་ ཡང་བཙན་བྱོལ་གྱི་ངོ་བོའི་རང་བཞིན་ནི་དབང་ཤུགས་མེད་པ་དང་། བྱེད་ཐབས་མེད་པ་དེ་རེད། ངོ་བོའི་དཀའ་ངལ་ནི་དུས་རྟག་ཏུ་འཕྲད། འཛམ་གླིང་གི་མཁས་དབང་དང་རྩོམ་པ་པོ། དབུ་འཁྲིད་སུ་འདྲ་ཞིག་དང་མཉམ་དུ་མགྲོ་གླེང་བྱེད་རྒྱུའི་ཁེངས་པ་ཡོད་ནའང་། གཞུང་ལམ་དུ་འཕྲད་པའི་མི་དཀྱུས་མ་ཞིག་གིས་ཁྱེད་ག་ནས་འོང་ཞེས་པའི་དྲི་བ་སླ་ པོ་འདིར་ལན་ཚད་དང་ལྡན་པ་ཞིག་རྒྱག་མི་ཐུབ། དྲི་བ་འདིས་བོད་མི་རིགས་ཀྱི་ལོ་རྒྱུས་དང་བོད་མི་རིགས་ཀྱི་རིག་གཞུང་གི་བྱས་ཤུལ། ལོ་ངོ་མང་པོའི་རིང་སློབ་སྦྱོང་བྱས་ཏེ་བསྒྲུབས་པའི་གདེང་སྤོབས་དེ་སྐར་ཆ་ཁ་ ཤས་ནང་རྩ་མེད་དུ་བཏང་།
བོད་རེ་བས་ཕོངས། རྒྱ་དོགས་པས་ཕོངས་ཞེས་བསླབ་བྱ་གཏིང་ཟབ་ཡོད་ནའང་། བཙན་བྱོལ་ནང་སྡོད་སྐབས་རེ་བ་ཞིག་མ་རྒྱག་ཀ་མེད་ཆགས། རེ་བ་དེ་གཏོང་ཟད་དུ་འགྱུར་རྒྱུ་ཡིན་ནའང་རེ་བ་མ་རྒྱག་ཀ་མེད་ཆགས། ཨ་རིས་བོད་རང་བཙན་བསྐྲུན་པའི་རེ་བ་བརྒྱབ། རྒྱ་གར་གྱིས་བོད་རང་བཙན་བསྐྲུན་པའི་རེ་བ་བརྒྱབ། རྒྱ་ནག་ཐོར་གཞིགས་སུ་འགྲོ་བའི་རེ་བ་བརྒྱབ། རྒྱ་ནག་དམངས་གཙོར་འགྱུར་བའི་རེ་བ་བརྒྱབ།
སྒེར་ལ་མཚོན་ན། གོ་གནས་ཞིག་རེག་རྒྱུའི་རེ་བ་བརྒྱབ། ཚོང་ཞིག་རྒྱག་སྟེ་དཔལ་འབྱོར་ཞིག་གསོག་རྒྱུའི་རེ་བ་བརྒྱབ། ཨ་རིར་སོང་སྟེ་ཨ་སྒོར་གསོག་སྟེ་ཨ་རིའི་མི་སེར་ཆགས་རྒྱུའི་རེ་བ་བརྒྱབ། དཀའ་ལས་རྒྱག་མཁན་དང་བསོད་ནམས་ཅན་འགའ་ཤས་ལ་རེ་བ་དེ་རིགས་བསྒྲུབ་དང་སྒྲུབ་ བཞིན་ཡོད་ནའང་། གཞུང་ལམ་དུ་ཕྱི་མི་དཀྱུས་མ་ཞིག་གིས་ཁྱོད་ག་ནས་རེད་ཅེས་པའི་དྲི་བ་འདིར་ སྤོབས་པ་ལྡན་པའི་ཐོག་ནས་ལན་རྒྱག་ཐུབ་པ་ཞིག་ཨེ་བྱུང་། གལ་ཏེ་ལན་ཞིག་བརྒྱབ་ཀྱང་གང་ཟག་དེ་བོད་ག་པར་ཡོད་རེད། ངས་གོ་མ་མྱོང་ཞེས་བརྗོད་སྐབས་ཚོར་བ་གང་འདྲ་ཞིག་འདུག
གང་ ལྟར་བོད་ཀྱི་དབུ་འཁྲིད་རྣམས་རྒྱལ་སྤྱིའི་དབུ་འཁྲིད་མཉམ་འདྲ་མཉམ་གྱིས་ བསྐྱོད་མི་ཐུབ། བོད་ཀྱི་རྩོམ་པ་པོ་རྣམས་རྒྱལ་སྤྱིའི་རྩོམ་པ་པོ་མཉམ་འདྲ་མཉམ་གྱིས་འགྲན་མི་ ཐུབ། བོད་པའི་ཚོང་པ་རྣམས་རྒྱལ་སྤྱིའི་ཚོང་པ་མཉམ་འགྲན་མི་ཐུབ། བོད་པའི་མཛངས་མ་རྣམས་རྒྱལ་སྤྱིའི་མཛངས་མ་མཉམ་འགྲན་མི་ཐུབ། བོད་ཀྱི་རྒྱལ་དར་རྒྱལ་ཁབ་གཞན་གྱི་རྒྱལ་དར་དང་མཉམ་དུ་འཕྱར་མི་ཐུབ། བོད་མི་དཀྱུས་མ་ཞིག་རྒྱལ་ཁབ་ཚད་ལྡན་གྱི་མི་སེར་དཀྱུས་མ་ཞིག་དང་མཉམ་དུ་འགྲན་ མི་ཐུབ།
རང་ ཉིད་རང་ལ་སྤོབས་པ་ཞིག་ཡོད་མདོག་བྱེད་ཀྱང་སྐབས་རེ་ངོ་རེ་ཚ། སྐབས་རེ་འཛམ་གླིང་བཙན་བྱོལ་བའི་གྲས་ནས་ལེགས་ཤོས་སུ་ཡིན་པའི་སྤོབས་པ་སྐྱེས། སྐབས་རེ་རང་ཉིད་ལུང་མེད་བཙན་བྱོལ་བ་ཞིག་ཆགས་པར་ངོ་རེ་ཚ། སྐབས་རེ་བཙན་བྱོལ་ཞིག་ཡིན་ཅིང་རིག་གཞུང་འདྲ་མིན་ནང་སིམ་འཛུལ་བྱུང་ཡོད་སྟབས་ འཛམ་གླིང་གི་མི་སེར་ཡིན་མདོག་གིས་རང་གིས་རང་ལ་སེམས་གསོ་བཏང་། ཡིན་ནའི་བོད་རིགས་མ་ཡིན་པ་ཞིག་གིས་ཁྱོད་ག་ནས་འོང་ཞེས་བརྗོད་སྐབས་བསམ་བློ་ འདི་བྱབས་ཆུང་ཞིག་ཏུ་མཐོང་།
ཡང་ སྐབས་རེ་བོད་བཙན་པོའི་གདུང་རྒྱུད་དེ་མདོང་དམར་ཤ་གཟན་གྱི་མི་རྒྱུད་ཡིན་མདོག་ གིས་སེམས་གསོ་བཏང་། ཡང་སྐབས་རེ་བོད་ཆོས་ལྡན་ཞིང་ཁམས་ཏེ་ཞི་བདེར་དགའ་ཕེབས་ཅན་ཞིག་ཡིན་མདོག་གིས་ སེམས་གསོ་བཏང་། ཁྱེད་རྒྱ་གུང་བྲན་ཏང་ལ་གཏིང་ནད་དང་འཁོན་སེམས་ཡོད་དམ་ཞེས་བརྗོད་སྐབས། དེ་འདྲ་མེད། ཁོང་ཚོ་ཡང་འགྲོ་བ་མི་ཞིག་རེད། ཉོན་མོངས་དུག་གསུམ་གྱིས་བླུས་པ་ཞིག་རེད། ཁོང་ཚོར་སྙིང་རེ་རྗེ་ཞེས་བརྗོད་དེ་བཟང་སྤྱོད་ཀྱི་ཡོན་ཏན་ཚད་མཐོ་པོ་ཡོད་ མདོག་བྱས། ཡང་ཕྱོགས་གཞན་ཞིག་ནས་གུང་བྲན་ཏང་གིས་བོད་བཙན་བཟུང་བྱས། བོད་རིགས་དམར་གསོད་བཏང་དང་གཏོང་བཞིན་པ། རང་ཉིད་བཙན་བྱོལ་དུ་གྱར་དགོས་བྱུང་བ་སོགས་བཟོས་ཡོད་ནའང་གཏིང་ནད་དང་མཁོན་ སེམས་མེད་པའམ་མེད་མདོག་བྱས་པ་འདིར་རང་ཉིད་རང་ལ་ངོ་རེ་ཚ།
ད་ བྱེད་ཡག་དམིགས་བསལ་ཞིག་འདུག་གས། དེབ་འདྲ་ཀློག གློག་བརྙན་འདྲ་བལྟས། མ་ནི་འདྲ་གསོག ཁ་འདོན་འདྲ་བྱེད། སྐོར་བ་འདྲ་བརྒྱབ། དབུ་མའི་ལམ་དང་རང་བཙན་འཐབ་རྩོད་པ་ཚོར་ཁ་རེ་བཏང་། ཨ་རི་མཐོང་ཆེན་རེག་རྒྱུའི་དཀའ་ལས་འདྲ་རྒྱག སྐབས་རེ་སྐད་འབོད་དང་ཟད་བཅད་ངོ་རྒོལ་འདྲ་རྒྱག སྦིར་རག་འདྲ་འཐུང་། བུ་མོར་བརྙས་འདྲ་བཟོ། མཚན་ཚོགས་གོ་སྒྲིག་བྱས་ཏེ་ཕྱི་ལུགས་ཞབས་དྲོ་འདྲ་རྒྱག ཚོང་འདྲ་བརྒྱབ། རྩོམ་དང་སྙན་ངག་ཐེབས་ལྕག་རེ་བྲིས། གྲོས་ཚོགས་འདྲ་ཚོགས། ཤོ་འདྲ་བརྒྱབ། སྐྱིད་པོ་སོགས་བཏང་། མི་ཚེ་དཀྱུས་མ་ཞིག་སྐྱེལ་ཏེ་ཕྱིན།
ཡིན་ ནའི་བོད་ནང་རྒྱ་མི་མང་དུ་ མང་དུ་ཕྱིན། བཙན་བྱོལ་ནང་བོད་རིགས་མང་དུ་མང་དུ་ཕྱིན། དཔལ་འབྱོར་དང་ཟ་རྒྱུ་མཐུང་རྒྱུ་དང་གྱོན་རྒྱུ་འབེལ་པོ་དང་། བོད་སྐད་དང་དབྱིན་སྐད། ཧིན་སྐད་དང་རྒྱ་སྐད། འཇར་མན་སྐད་སོགས་རྒྱག་རྒྱུ་ཡོད་ནའང་མི་མིན་ཁྱི་མིན། ར་མིན་ལུག་མིན། བོད་མིན་རྒྱ་མིན། ཡར་མེད་མར་མེད། ཕར་མིན་ཚུར་མིན། གང་ལྟར་གཏན་ཆགས་ཀྱི་བར་དོ་འདྲ་པོ་ཞིག་ནང་ལྷུང་སོང་།།
བོད་ཀྱི་ད་ལྟའི་གནས་སྟངས་ལ་བལྟས་ན་སྐབས་རེ་རེ་བ་མེད་མ་པ་ལྟ་བུ་རེད། འོན་ཀྱང་ཕྱོགས་གཞན་ཞིག་ནས་བསམ་བློ་བཏང་ན་འདི་ནི་ལོ་རྒྱུས་ཀྱིས་ང་ཚོར་སྤྲད་པའི་དྲག་པོའི་སྡུག་རྩུབ་ཀྱི་དབང་འཛིན་པར་ཞི་བའི་ལམ་ནས་རྒོལ་བའི་གཟི་བརྗིད་ཀྱི་གོ་སྐབས་ཞིག་ཀྱང་ཡིན། བོད་མིའི་ཞི་བའི་ཐབས་རྩོད་ཀྱིས་རྒྱལ་སྤྱིའི་འགྲོ་བ་མིའི་རང་དབང་འཐབ་རྩོད་ཀྱི་ལོ་རྒྱུས་ནང་བསུབ་ཐབས་མེད་པའི་གཟི་བརྗིད་ལྡན་པའི་ལོ་རྒྱུས་བྲིས་བཞིན་ཡོད། དི་ནི་ང་ཚོས་སྤོབས་པ་བྱེད་འོས་པ་ཞིག་རེད། བོད་རེ་བས་ཕོངས་ཟེར་བའི་བསླབ་བྱ་བཟང་ཡང་དོན་སྙིང་ལྡན་པའི་སྤྱི་སྒེར་གྱི་བྱ་བ་གང་ཞིག་བསྒྲུབ་ཀྱང་རེ་བ་ནི་མེད་དུ་མི་རུང་ཞིག་ཡིན། དྲང་བདེན་གྱི་གཞི་ལ་བཅོལ་བའི་ཐབས་རྩོད་ནི་དམའ་མཐར་ཡང་སྡུག་རྩུབ་དབང་བསྒྱུར་ལས་ཀྱང་རྒྱུན་གནས་ཐུབ་པ་ནི་འདས་པའི་ལོ་རྒྱུས་ནང་མང་པོ་མོང་རྒྱུ་ཡོད། ང་ཚོས་ད་ལྟའི་མི་རབས་སམ་རྗེས་མའི་མི་རབས་གསར་པའི་དུས་ཡུན་ནང་རང་དབང་སླར་གསོ་ཙམ་མ་ཡིན་པར་མི་རབས་གསུམ་བཞི་སོང་ཡང་བོད་མིའི་ཐབས་རྩོད་དེ་རྒྱུན་གནས་ཐབས་པའི་བསམ་བློ་ཞིག་གཏོང་དགོས་གལ་ཆེ་བ་མཐོང། ཨ་ཕྷི་རི་ཀའི་རྒྱལ་ཁབ་ཁག་གི་རང་དབང་ཐབས་རྩོད་ནང་སྔར་གཅོ་བོ་ཨ་རི་སོགས་རྒྱལ་ཁབ་ཁག་ནང་དྲན་གཡོག་ཏུ་བཙོངས་པའི་མི་རིགས་ནག་པོའི་མི་རབས་གསར་པས་ནུས་པ་མི་ཆུང་བ་ཞིག་ཐོན་ཡོད། དེར་བརྟེན་བཙན་བྱོལ་རང་དབང་ལུང་པའི་ནང་ཡོད་པའི་བོད་མི་ཚོས་མི་རབས་གསར་པའི་སློབ་གསོའི་བྱ་བཞག་ལ་ཐུབས་གཟབ་ཡོད་པ་མཁྱེན་ཞུ།
བསྟན་འཛིན་ཉིན་བྱེད་ལགས། མི་སུ་འདྲ་ཞིག་ཡིན་ཀྱང་འབྲི་དུས་ལས་སླ་མོས་ལས་དུས་དཀའ་མོ་མཐོང་གི་འདུག ད་ཕན་དཔེ་དེབ་མང་པོ་བཀླགས་པའི་ཉམས་མྱོང་ལ་གཞིགས་ན། རྩོམ་པ་པོས་རང་གི་དཔེ་དེབ་ནང་གི་བྲིས་པའི་སེམས་ཤུགས་དང་རྒྱལ་གཅེས་ལྷག་བསམ་དེ་ལག་ལེན་མེད་པ་མང་པོ་མཐོང་བྱུང།
ཁྱེད་ལ་བོད་གཞུང་གི་ཐུགས་རྗེ་བཀའ་དྲིན་ལ་བརྟེན་ནས་སློབ་སྦྱོང་གོ་སྐབས་ཡོད་པ་མ་ཟད། གོང་གི་རྩོམ་ཡིག་ནང་གསལ་ལྟར་ལགས་ན། བོད་དོན་ཆེད་བྱེད་རྒྱུ་མེད་པ་མ་རེད། ལྷག་པར་དུ་ཁྱེད་དང་ཁྱེད་འདྲ་བ་རྣམས་ལ་བྱེད་རྒྱུ་མང་པོ་ཡོད་རེད། དཔེར་ན་གཞིས་བཞུགས་མཁྱེན་ལྡན་བཀྲ་ཤིས་ཚེ་རིང་ལགས་ཁོང་ཡང་ཁྱེད་དང་འདྲ་བར་ཨ་རི་ནས་སློབ་སྦྱོང་ཐོབ་པ་རེད། འོན་ཀྱང་ཁོང་གིས་སློབ་སྦྱོང་གི་གོ་སྐབས་རྫོགས་རྗེས་ལམ་སེང་བོད་གསར་འཛུགས་བསྐྲུན་ཆེད་བོད་ནང་ཕེབས་པ་(The Struggle for Modern Tibet)ཞེས་པའི་ཁོང་གི་མི་ཚེ་ལོ་རྒྱུས་ལས་གསལ་པོ་མཁྱེན་ངེས།
དེས་ན་ཁྱོད་ལ་དེ་འདྲའི་ཆོད་སེམས་ཡོད་དམ།
བྱེད་རྒྱུ་མེད་པ་མ་ཡིན་པར་བྱེད་དགོས་པ་རེད།།
སྙིང་ཆུང་དམར་པོའི་དཀྱིལ་ནས་བཞུར་བའི་སྡུག་ཆུ་དྭངས་མོ་དེ་ང་ཚོ་ཀུན་ལ་ཡོད་པའི་གཟུགས་མེད་ཀྱི་ཚོར་བ་ཞིག་རེད།ང་རང་ལ་ཆ་བཞག་ན་རྩོད་བསམ་རུང་ཡོན་ཏན་མེད།འཛིང་བསམ་རུང་འཚེར་མེད་ཞུ་བ་ཡིན་ཟེར།ད་ག་རེ་བྱེད་དགོས་མི་ཤེས་དུ།
སྐད་ཆ་དྲང་མོ་རེད།། ཚོར་སྣང་ངོ་མ་རེད།།
དངོས་ཡོད་གནས་ཚུལ་འདི།། བསྒྱུར་ཐབས་ཅི་ཞིག་ཡོད།།
བོད་མི་སྒྱིད་ལུག་རེད།། འཐབ་རྩོད་མགོ་རྙོག་རེད།།
རེ་བ་སྟོང་ཟད་དེ།། བསྒྱུར་ཐབས་ཅི་ཞིག་ཡོད།།
བཤད་ན་མཁས་པ་ཡིན།། ལས་ན་རྗེས་ལུས་ཡིན།།
ལག་ལེན་སྟོང་བ་འདི།། བསྒྱུར་ཐབས་ཅི་ཞིག་ཡོད།།
བོད་སྐད་ར་མ་ལུག། ཆ་ལུགས་ཡ་མ་ཟུང་།།
རང་ཚུགས་མེད་པ་འདི།། བསྒྱུར་ཐབས་ཅི་ཞིག་ཡོད།།
བསྟན་འཛིན་ཉིན་བྱེད་ཀྱིས་སེམས་ཚོར་ངོ་མ་ཞིག་བྲིས་འདུག
བསྟན་འཛིན་ཉི་བྱེད་ལགས་ནས་གསུང་པ་དེ་དངོས་གནས་སྙིང་ཁུང་ནས་བཏོན་བའི་སྐད་ཆ་ཞིག་ཡིན་པ་ངོས་འཛིན་ཐུབ།།
གྲོགས་བྱམས་རྒྱལ་དང་ཀུན་དགའ་གཉིས་ཀྱི་བཤད་པ་བདེན་ཁྱོད་ཚོ་ཚང་མ་བོད་ལ་དགའ་སྡུག་དང་ན་ཚ་ཡོད་པའི་དབང་གའི་སོ་སོའི་བསམ་ཚུལ་བཤད་པ་རེད་འོད་ཀྱང་ང་ཚོ་སེམས་ཤུགས་ནམ་ཡོང་མ་ཞུ་་་་་་་་མི་གཞན་ལ་ལྟར་ནས་མི་འདུག་བ་བོད་ལ་ཕན་པའི་སོ་སོའི་ལསདོན་འདྲ་བྱེད་ན་གང་འདྲ་འདུག་་་་་་་་་
ཁྱོད་སུ་ཡིན་ལབ་ན་ང་བོད་པ་ཡིན་ལབ་ཁྱོད་གང་ནས་འོངས་ཞེས་འདྲི་ན་ང་བོད་ནས་འོངས་ལབ་་་བོད་ག་བ་ཡོད་པ་རེད་ལབ་ན་མཚན་ཉིན་ཚང་བའི་ས་བཀྲའི་སྟེང་དུ་མཛུབ་མོ་འཛུགས་དགོས་པ་ཡིན་འདི་ལས་ལྷག་པ་མེད་་་བོད་ནི་རྒྱ་ཡིའི་འོག་ཏུ་ལོ་ལྔ་བཅུ་འདི་ནི་ལོ་ཚད་རིང་པོ་ཡིན་ལ་ཐུང་ཐུང་ཡོང་ཡིན་་དཔེ་ན་རྒྱ་གར་དབྱིན་འོག་ཏུ་ལོ་གཉིས་བརྒྱ་་་ང་ཚོ་བཙན་བྱོལ་ནང་ཡོད་པའི་བོད་རིགས་རྣམས་སེམས་ཤུགས་དང་སྡུག་སྐད་མ་ཤོར་་་་བོད་ནང་ཡོད་པའི་བོད་རིགས་རྣམས་ཀྱིས་སེམས་ཤུགས་ལ་ང་ཚོས་དམིགས་དཔེ་ལྟར་དགོས
སྤོགས་པ་མཐའ་ཡས་ལགས། དེ་འདྲའི་གུ་དོགས་པོ་བཤད་དགོས་དོན་མེད་ང་རྒྱ་ནག་ནས་འོངས་བ་ཡིན་ཅེས་ཟེར་ན་མ་འདྲིག་པ་གང་ཡང་ཡོད་མ་རེད། དབུས་མའི་ལམ་མཁས་ལེན་ན་དེ་བས་མ་འགྲིག་པ་མི་འདུག་སྙམ
བསྟན་འཛིན་ཉིན་བྱེད་ལགས།
ཚོར་བ་དེ་ཁོ་བོ་ལ་ཡང་ཡོད་། འཁྲུགས་པ་རྐྱང་རྐྱང་རྒྱག་དགོས་པའི་རྩོམ་མ་ཡིན་པ་ སྐབས་རེ་དངོས་སུ་མྱོང་བཞིན་པའི་ཚོར་བ་རྣམས་གསུངས་པ་འདི་སེམས་འགུལ་མང་བ་ཐེབས་ཀྱི་འདུག་ ཁྱེད་སེམས་མ་ཆུང་ཕ་བཟང་གི་བུ་ རྨོག་རུ་བསྟན་པའི་སྐད་ཆ་དེ་སེམས་ལ་ཞོགས་ བདེན་མཐའ་གསལ་རྒྱུ་ལུས་ཡོད་ འོན་ཀྱང་དཀའ་ལས་རྒྱག་དགོས་འདུག་། མིག་དཔེ་ལྟ་ས་ཞིག་འདུག་པ་དེ་ནི་བསྟན་འཛིན་བརྩོན་འགྲུས་རེད་ ཁོང་དཔའ་བོ་ཁེར་རྒྱུག་རེད་ དཔུངས་གྲོགས་དགོས་ཀྱི་འདུག་། ང་ཚོ་གནད་དོན་འདི་ད་ལྟ་ངོ་ཚ་དགོས་ཡ་རེད་འདུག་ཀྱང་ རྗེས་སུ་འཛམ་བུ་གླིང་གིས་བོད་མི་རིགས་འདི་ལ་ཁ་མིག་ཡ་ལྟ་བྱེད་ས་ཞིག་དང་ གུས་བརྩི་བྱེད་ས་ཞིག་དུ་ཆགས་སྲིད་།
བསམ་ཚུལ་འདིས་ངའི་ཡིད་དབང་འཕྲོག་སོང་། བསམ་ཚུལ་འདིས་དངོས་ཡོད་སྤྱི་ཚོགས་ཀྱི་འཚོ་བ་དམར་རྗེན་དུ་བཏང་ཡོད་པས་ཀློག་པ་པོའི་སེམས་པ་དཀྲུགས་ཐུབ་སོང་། མུ་མཐུད་ནས་བསམ་ཚུལ་འདི་ལྟར་འབྲི་བའི་ཐབས་ལ་འབད་རོགས།
ཨོ་བསྟན་འཛིན་ཉིན་བྱེད་ལགས།
སྐྱིད་སྡུག་བཤད་ན་ངོ་མ་དེ་འདྲ་ཞིག་རེད། ཡིན་ཡང་། མི་རིགས་ཤིག་གི་རང་དབང་འཐབ་རྩོད་ནི་བུ་རྒོད་ཞིག་གི་གོ་སྐབས་ཡག་ཤོས་ཤིག་རེད། དཔའ་བོའི་ལག་རྗེས་འཇོག་སའི་སྡིངས་ཆ་ཞིག འདི་ཕྱི་གཉིས་ཀྱི་དོན་ཆེན་བསྒྲུབ་སའི་ལམ་ཆེན་ཞིག་རེད།
མི་རབས་གསར་བའི་བོད་མི་གཞོན་སྐྱེས་ཤིག་ཡིན་ན། ཚོར་བ་གསུམ་གྱི་མཏའ་ལས་གྲོལ་ཏེ་བདེན་དོན་འཏབ་རྩོད་ཀྱི་དབུ་མར་ཞུགས་རྒྱུ་ཅིའི་ཀྱང་གལ་ཆེེ།
ཚོར་བ་གསུམ་ནི། ཆོས་ལུགས་ལ་ཞེན་པའི་ཚོར་བ། ཆོལ་ཁར་ཞེན་པའི་ཚོར་བ། དབུ་མ་དང་རང་བཙན་གྱི་ཕྱོགས་སུ་ལྷུང་བའི་ཚོར་བ་བཅས་ཡིན།
མི་ཚོས་ང་ལ་ཁྱོད་གང་ནས་འོངས་ཞེས་འདྲི་སྐབས་ངས་བོད་ནས་འོངས་ཞེས་ལན་འདེབས། ས་བཀྲའི་སྟེང་དུ་མཛུབ་མོ་འཛུགས་དགོས་དུས་རྒྱ་ནག་མི་མང་སྤྱི་མཐུན་རྒྱལ་ཁབ་ཀྱི་དཀྱིལ་དུ་འཛུགས་དགོས་ཐུག་དུས་མི་བདེ་བ་ཞིག་རང་ཤུགས་ཀྱིས་ཡོང་གིན་འདུག ལྷག་པར་ཡང་རྒྱ་ནག་སྐམ་སའི་མི་ཞིག་དེར་ཡོད་སྐབས་དེ་ལས་ཀྱང་མི་བདེ་བ་ཞིག་ཡོང་གིན་འདུག