གནོད་འཚེ་དང་གོ་སྐབས། ༧གོང་ས་མཆོག་ས་ཡོམ་གནོད་ཁུལ་དུ་ཆིབས་བསྒྱུར་གནང་ཐུབ་བམ།
དཔལ་ལྡན་རྒྱལ།
༧གོང་ས་མཆོག་ས་ཡོམ་གྱི་གནོད་འཚེ་ཕོག་ཡུལ་ལ་ཆིབས་བསྒྱུར་གནང་ནས་འདས་པོར་བསྔོ་སྨོན་དང་། གསོན་པོར་སེམས་གསོ་གནང་རྒྱུ་ནི། གནོད་ཁུལ་མི་མང་གི་རེ་འདོད་ཡིན་ལ། ༧གོང་ས་མཆོག་གི་ཐུགས་འདོད་ཡང་ཡིན། ཡིན་ནའང་རེ་འདོད་དེ་ལེགས་འགྲུབ་ཡོང་མིན་ཕྱོགས་གཉིས་ཀར་ནུས་པ་གང་ཡང་མེད་པར་རྒྱ་ནག་གཞུང་གི་ལག་ཏུ་ཡོད།
ས་གཡོ་ཐེངས་གཅིག་གིས་མི་སྟོང་ཕྲག་མང་པོའི་ཚེ་སྲོག་འཕྲོག་པ་དང༌། མི་ཁྲི་ཕྲག་མང་པོར་བློ་ཡུལ་ལས་འདས་པའི་འཇིགས་སྣང་སྤྲད་བྱུང་ལ། མི་འབུམ་ཕྲག་མང་པོའི་སེམས་རྒྱུད་ལ་བྱམས་དང་སྙིང་རྗེ་སྐྱེ་རུ་བཅུག་སོང༌། ས་ཡོམ་གྱི་གོད་ཆག་བྱུང་མ་ཐག་ས་གནས་མི་མང་གིས་འཐུས་ཚབ་ཀྱིས་རྒྱ་ནག་གི་སྲིད་འཛིན་ཧུའུ་ཅིན་ཐའོ་དང་། སྲིད་བློན་ཝུན་ཅ་པའོ་གཉིས་ཀྱི་མཚན་ཐོག་ཏུ་ཡི་གེ་ཞིག་བྲིས་ནས། ༧གོང་ས་མཆོག་གནོད་ཁུལ་ལ་ཕེབས་སུ་འཇུག་དགོས་པའི་རེ་སྐུལ་ཞུས་འདུག་ལ། གནོད་ཁུལ་དུའང་མི་མང་གིས་ས་འོག་ནས་མི་རོ་བསྔོག་བཞིན། “རྒྱལ་བ་བསྟན་འཛིན་རྒྱ་མཚོ།”ཞེས་མཚན་ནས་འབོད་བཞིན། ༧གོང་ས་མཆོག་ལ་གསོལ་འདེབས་དང༌། མི་མང་གི་སྡུག་བསྔལ་སེལ་ཐུབ་རྒྱུར་རེ་བ་བཅིངས་ཡོད། ༧གོང་ས་མཆོག་གིས་ཀྱང་ཚེས་ ༡༧ ཉིན་གསར་འགོད་ལྷན་ཚོགས་ཞིག་གི་ཐོག་ “མཆོག་གསུམ་རྒྱལ་བ་རྒྱ་མཚོར་གསོལ་འདེབས་སྨོན་ལམ་བྱ་རྒྱུ་ཙམ་ལས། ས་ཁད་ཀྱིས་འགྱངས་པས་དངོས་སུ་རོགས་ཕན་བྱ་ཐབས་དབེན།” ཞེས་ཐུགས་ཕམ་དང་མཉམ་དུ་གནོད་ཁུལ་ལ་ཕེབས་ཐུབ་རྒྱུ་ཐུགས་རེ་གནང་ཡོད། ༧གོང་ས་མཆོག་གིས་“། ངོས་རང་ངོ་བསྐྱོད་ཀྱིས་མང་ཚོགས་ཀྱི་རེ་འདོད་བསྐངས་ཏེ་སེམས་གསོ་བྱ་རྒྱུའི་འདུན་པ་ཤིན་ཏུ་ཆེ།”གསུངས་ཡོད།
ཁུངས་ལྡན་གནས་ཚུལ་ལྟར་ན། ༧གོང་ས་མཆོག་གི་ངོས་ནས་རྒྱ་ནག་གཞུང་ལ་ཐད་ཀར་འབྲེལ་བ་གནང་ནས་ཁོང་གནོད་ཁུལ་ཏུ་ཕེབས་ཐུབ་རྒྱུར་རེ་སྐུལ་གནང་ཡོད་པ་རེད། ཚེས་ ༢༠ ཉིན་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཅང་ཡི་ལ་པེ་ཅིན་དུ། གསར་འགོད་པ་ཞིག་གིས་༧གོང་ས་ཏཱ་ལའི་བླ་མ་གནོད་ཁུལ་ལ་ཕེབས་འདུན་ཡོད་པའི་ཐད་དྲི་བ་འདྲི་སྐབས། “ང་ཚོས་ས་གནས་ཀྱི་ཆོས་ལུགས་དང༌། གོམས་སྲོལ་ལ་བརྩི་བཀུར་བྱེད་རྒྱུ་མ་ཟད། ད་ལྟའི་ཆར་གནོད་ཁུལ་དུ་ཆོས་ཕྱོགས་ཀྱི་ཆོ་ག་ཕྱག་ལེན་བྱེད་བཞིན་ཡོད།”ཟེར་བ་ཙམ་ལས། དྲི་བར་ཐད་ཀར་ལན་འདེབས་གང་ཡང་བྱས་མི་འདུག་ལ། ༧གོང་ས་མཆོག་ལ་སྐྱོན་བརྗོད་དང༌། དམའ་འབེབས་ཀྱང་ཞུས་མེད། བྱེད་སྟངས་འདིར་བལྟས་ན། རྒྱ་ནག་གཞུང་གིས་ད་ཐེངས་ས་ཡོམ་གོད་ཆག་ལ་རོགས་སྐྱོར་བྱེད་མཁན་གྲྭ་བཙུན་གཙོས་པའི་བོད་མི་སྟོང་ཕྲག་མང་པོ་སྐྱེ་རྒུ་མདོར་འཛོམས་ནས་བརྩེ་སེམས་གཞི་གཅིག་ཏུ་འཁྱིལ་ཡོད་པའི་སྟོབས་ཤུགས། རྒྱ་རྒོལ་སྟོབས་ཤུགས་སུ་མི་འགྱུར་བ་གཙོར་བཟུང་ནས་བྱས་ལས་ཀ་བྱེད་བཞིན་ཡོད་པ་རེད།
༧གོང་ས་མཆོག་གནོད་ཁུལ་ཏུ་ཕེབས་ཐུབ་རྒྱུ་ས་གནས་མི་མང་གི་རེ་བ་ཡིན་ནའང༌། རྒྱ་ནག་གཞུང་ལ་མཚོན་ན། བོད་ཀྱི་མདུན་ལམ་ཐག་གཅོད་བྱེད་མིན་གྱི་གནད་འགག་ཅན་གྱི་གནད་དོན་ཞིག་ཡིན།
རྒྱ་ནག་གཞུང་གིས་འདས་པའི་ལོ་ཁ་ཤས་རིང་བོད་ཐོག་ལག་བསྟར་བྱེད་བཞིན་པའི་སྲིད་ཇུས་ལ་བལྟས་ན། ད་ཐེངས་ཡང་“བོད་རེ་བས་ཕོངས། རྒྱ་དོགས་པས་ཕོངས།”ཅེས་པ་བཞིན་གནོད་ཁུལ་མི་མང་གཙོས་པའི་བོད་མི་མང་གི་རེ་འདོད་འགྲུབ་ཐུབ་མིན་བློ་དོགས་བྱེད་འོས་པ་ཞིག་ཡིན།
རྒྱ་ནག་གཞུང་ཡིད་ཆེས་ཡོད་ཀྱང་མེད་ཀྱང༌། “༧གོང་ས་མཆོག་ནི་རྒྱལ་ཁབ་ཁ་བྲལ་དང༌། བོད་ཀྱི་སྤྱི་ཚོགས་བདེ་འཇགས་ལ་གནོད་སྐྱོན་བཟོ་མཁན་ཞིག་རེད།”ཅེས་པ་ནི། ཁོང་ཚོས་༧གོང་ས་མཆོག་ལ་འཛིན་པའི་སྲིད་ཇུས་རེད། དེ་བས་༧གོང་ས་མཆོག་གནོད་ཁུལ་ལ་ཕེབས་སུ་བཅུག་མིན་རྒྱ་ནག་གཞུང་ལ་མཚོན་ན། མ་འོངས་པར་༧གོང་ས་མཆོག་དང་། བོད་ཐོག་འཛིན་པའི་སྲིད་ཇུས་ལ་འགྱུར་བ་གཏོང་མིན་གྱི་གནད་དོན་ཡིན། གལ་ཏེ་རྒྱ་ནག་གཞུང་ལ་༧གོང་ས་མཆོག་དང༌། བོད་ཀྱི་གནད་དོན་ཐོག་འཛིན་པའི་སྲིད་ཇུས་ལ་འགྱུར་བ་གཏོང་འདོད་ཡོད་ན། ད་ཐེངས་༧གོང་ས་མཆོག་ས་ཡོམ་གྱི་གནོད་འཚེ་ཕོག་ཡུལ་དུ་ཆིབས་བསྒྱུར་གནང་དུ་བཅུག་ནས་འདས་པོར་བསྔོ་སྨོན་དང་། གསོན་པོར་སེམས་གསོ་གནང་ནས་བོད་མི་མང་གི་སྐབས་ཐོག་གི་སེམས་སྡུག་བསྔལ་སེལ་རྒྱུ་དང་། མ་འོངས་བོད་ཀྱི་གནད་དོན་ཐག་གཅོད་བྱེད་རྒྱུའི་སྲིད་ཇུས་ལ་འགྱུར་བ་གཏོང་བའི་གོ་སྐབས་ཡག་ཤོས་ཞིག་ཡིན།
གལ་ཏེ་རྒྱ་གཞུང་གིས་སྡུག་བསྔལ་དང༌། མྱ་ངན་ཁྲོད་ཡོད་པའི་བོད་མི་མང་གི་འཕྲལ་གྱི་གདུང་སེམས་སེལ་རྒྱུ་དང་། ཕུགས་སུ་བོད་དོན་ཐག་གཅོད་བྱེད་རྒྱུའི་འདོད་པ་ཡོད་ཚེ། བོད་ཀྱི་སྲོལ་རྒྱུན་ལུགས་སྲོལ་ལྟར། ས་ཡོམ་གྱི་་གོད་ཆག་ཁྲོད་འདས་གྲོངས་སུ་གྱུར་བ་རྣམས་ཀྱི་བདུན་ཚིགས་བདུན་པ་སྟེ། དགོང་ཞག་བཞི་ཅུ་ཞེ་བདུན་ཚང་པའི་ཉིན་མོ་ནི། བོད་ཟླ་བཞི་བའི་ཚེས་ ༢༠ དང་སྤྱི་ཟླ་དྲུག་པའི་ཚེས་ ༢ ལ་འཁེལ་ཡོད། ཉིན་དེར་གནོད་འཚེ་ཕོག་ཡུལ་ཏུ་༧གོང་ས་མཆོག་གིས་འདས་པོར་བསྔོ་སྨོན་དང་། གསོན་པོར་སེམས་གསོ་གནང་རྒྱུའི་གོ་སྐབས་སྤྲད་ནས་བོད་ཀྱི་གནད་དོན་ནམ། བོད་མིའི་འཐབ་རྩོད་ལ་སྣང་ཆུང་མི་བྱེད་པར་བསྐྱར་ཞིབ་ཀྱིས། ལྷག་བསམ་རྣམ་དག་གིས་བོད་དོན་ཐག་གཅོད་ཀྱི་ལམ་སུ་ཞུགས་རྒྱུ་གོ་སྐབས་ལེགས་ཤོས་དེ་ཡིན།
གསར་འགོད་པ་ལགས། ཞུ་ཡིག་འདི་སྐུ་སྒེར་དྲུང་ཆེ་ཚེ་རྒྱམ་ལ་འཕྲོད་ཐངས་གནང་རོགས།།
ཞུ་མི་ཕོད་ཀྱང་མི་ཞུ་བ་བསྡོད་མི་ཐུབ་འདུག ༧གོང་ས་མཆོག་ལ་བརྟན་བཞུགས་འབུལ་བ་དེ་ལ་དགའ་པོས་པ་ཞིག་ཡིན་ཡང་ཇོ་ནང་གི་ཐོབ་ཐང་རག་ཡག་གིས་ཆེད་དུ་ཡིན་དུས་དགོངས་པ་བཞེས་རོགས་ཞུ། ས་སྐྱ་ནང་ཁུལ་ལ་ད་ལྟའི་ཆར་རྙོག་གྲ་མེད། དེ་ལ་གཞི་མ་བཞག་རོགས། སྔོན་མི་རྩོམ་དགུ་རྩོམ་ཇོནང་སྨོན་ལམ་སྐབས་འདོན་ཡག་གཞན་སྟོང་པ་ཡི་བསྟན་པ་འབར་འགྱུར་ཅིག་ཞེས་བྲིས་ཡོད་དེ་ནི་པཎ་ཆེན་ཤཀྱ་མཆོག་ལྡན་གི་དགོངས་པ་ཡིན་དུས་པཎ་ཆེན་ཤ་མཆོག་ཁོང་ས་སྐྱ་པའི་སྐྱེས་ཆེན་མ་ཡིན་པ་ཁོངས་གང་ཡོད་ལ། སྐུ་ཚེ་རིང་དགོངས་པ་བཞེས་རོགས་ཞུ།།
དེ་ལ་ཧམ་སང་དགོས་པ་མི་འདུག་ག སྐུ་རྟེན་རྣམས་ལ་དྲི་ན་གསལ་པོ་ཤེས་མི་ཡོང་ངམ།
ཡང་མིན་ན་རྒྱ་ལོ་ལ་མགོ་རྟགས་ཞུ་རྒྱུ་རེད་ཡ།
ཡང་མིན་ན་རྒྱ་རི་ལ་ལན་བསྐུར་ན།
ཡང་མིན་ན་འཇུ་ཆེན་ལ་གྲོས་བྱེད་ན།
ཡང་མིན་ན་ཡང་བསྐྱར་ཆུ་བཞི་ལྒང་དྲུག་ལ་སྐྱེལ་རོགས་ལབ་ན།
ཡིན་ན་ཡང་དེ་ནི་བོད་གཞུང་གི་གཉིས་བཟོ་སོང་བ།
ད་གང་དྲག
དྲང་མོར་བཤད་ན་༧གོང་ས་མཆོག་ཕེབས་རྒྱུ་ཡིན་གསུངས་ན་དེ་ཙམ་གྱིས་ཕེབས་རོགས་ཟེར་ནི་མ་རེད། གལ་སྲིད་བོད་ནང་གི་སྤུན་ཟླ་ཚོས་ངེས་པར་ཕེབས་དགོས་ཞེས་འབོད་སྐུལ་ཞུས་ན། རྒྱ་ནག་ཀྱང་འུ་ཐུག་ཐབས་ཟད་དང་ལྷག་པར་བོད་མི་རྣམས་སྡུག་བསྔལ་གྱི་གཟེར་སྐབས་ཡིན་པས་ལམ་སང་ངུ་ཆོག་ཆོག་དང་སྐད་རྒྱག་ཆོག་ཆོག་ཡོད་པ་ཤེས་ནི་རེད། གང་ལྟར་ས་ཡོམ་བརྒྱབ་པ་འདི་ཡང་ཆབ་སྲིད་ཀྱི་ངོ་བོར་བསྒྱུར་རྒྱུ་ཡོད་ཚད་བསྒྱུར་དགོས་མིན་མི་ཤེས་པ་ཞིག་རེད།
གྲོགས་བསྟན་འཛིན་ཤེས་རབ་དང་རང་བཙན་གཉིས་ཀྱི་གསུང་པ་ལདགོས་པ་འདུག་རྒྱ་ནག་གི་དཔོན་པོ་རྣམས་ནི་ཝ་མོ་དང་གཅིག་མཚུངས་ཡིན་པས་ཡིད་ཆེས་སུ་ཡིས་བྱེད་་་་་ཨོ་བོད་མི་ཚོ་འདས་པའི་ལོ་རྒྱུན་ལ་ཡོང་ཡོང་གཟིགས་དགོས་་་་དཔེར་ན་པཎ་ཆེན་རིན་པོ་ཆེན་དང་མཁན་པོ་འཇིག་མེད་ཕུན་ཚོགས་སོགས་བོད་ཀྱི་བླ་མ་རྣམས་ལ་གཟིགས་དང་དེ་འདྲ་བྱུང་ན་རང་རིགས་གང་བྱེད་དེ་སུ་ཡིས་འགན་ཁུར་་་་
རྒྱ་ནག་ཏུ་ཕེབས་ཀྱང་༸གོང་ས་མཆོག་གི་ཡོད་ཚད་རྒྱ་གཞུང་ལ་འབུལ་དགོས་ཀྱི་མ་རེད། ཡང་ཅིག་བཤད་ན་འདི་ལྟའི་ལམ་སྲོལ་ལ་རྒྱལ་སྤྱིའི་ཁྲིམས་ལུགས་ཀྱི་འགྲོ་སྟངས་ཤིག་ཀྱང་ཡོད་སྲིད། ཡིད་ཆེས་འཕེལ་བའི་ཆ་རྐྱེན་ཞིག་མེད་ཚེ་མ་ཕེབས་ན་བཟང་བར་སྙམ།
སྐུ་ཕྱྭ་ལ་དཀའ་ངལ་ཡོང་གི་མ་རེད་འདོད།
གལ་སྲིད་༸གོང་ས་མཆོག་གནོད་ཐེབས་ས་ཁུལ་དུ་ཕེབས་པ་ཡིན་ན། སྐུ་ཕྱྭའི་ཕྱོགས་ལ་རྣམ་པ་ཚོས་བསམ་བློ་ཨེ་བཏང་། རྒྱ་ནག་ལ་ཡིད་ཆེས་བྱེད་ཐུབ་བམ། འདི་ཡང་གནད་དོན་གལ་ཆེན་ཞིག་རེད། གནའ་ནས་ད་བར་གྱི་རྒྱ་ནག་གི་གཡོ་ཇུས་བྱེད་སྟངས་རིགས་རྣམ་པ་ཚོ་ཚང་མས་ཤེས་ལོས་ཡོད།