གནམ་ས་གོ་འབྱེད་ཀྱི་དཔེ་དེབ་དབུ་འབྱེད་དང་བགྲོ་གླེང་།

“ རྩོམ་ཡིག་འདི་བཀྲམ་པའི་རྗེས་ལ། ནམ་ཞིག་མི་ཡུལ་གྱི་ཚ་དམྱལ་དང་གྲང་དམྱལ་དུ་སྡོད་ལོས་དགོས་སྙམ་སྟེ་འཇིགས་སྐྲག་ཆེ་མོད། ཁ་ཡི་རྐྱེན་ལས་མགོ་བོ་ཤོར་ནའང་ལམ་འདི་རང་གིས་བདམས་པ་ཡིན་ཕྱིར་རང་འགན་རང་གིས་འཁུར་རྒྱུ་ཡིན་ནོ ” ཞེས་རྩོམ་པ་པོ་སྐུ་ཞབས་ཞོགས་དུང་ལགས་ཀྱིས་ས་བྱི་ཞི་རྒོལ་ཆེན་མོར་ཆེད་དུ་བྲིས་པའི་དཔེ་དེབ་༼ གནམ་ས་གོ་འབྱེད ༽ ཞེས་པའི་ནང་བཀོད་ཡོད།

དེ་རིང་སྔ་དྲོའི་ཆུ་ཚོད་ ༩ སྟེང་གངས་སྐྱིད་སྤྱི་ཐབ་ཐོག་ཁང་དུ། མདོ་སྨད་བཙན་རྒོལ་བདེན་རྒྱབ་མནའ་འབྲེལ་དང་། ངྷ་ས་མདོ་སྨད་ས་གནས་རྒྱུན་ལས་མཉམ་འབྲེལ་ཐོག རྩོམ་པ་པོ་སྐུ་ཞབས་ཞོགས་དོང་ལགས་ཀྱིས་བརྩམས་པའི་༼ གནམ་ས་གོ་འབྱེད ༽ ཅེས་པའི་དཔེ་དེབ་བསྐྱར་དཔར་དབུ་འབྱེད་དང་དེའི་སྐོར་ལ་བགྲོ་གླེང་ཞིག་གོ་སྒྲིག་གནང་ཡོད། དཔེ་དེབ་དབུ་འབྱེད་ཀྱི་སྐུ་མགྲོན་གཙོ་བོར་བོད་གཞུང་ཕྱི་དྲིལ་བཀའ་བློན་སྟག་ལྷ་སྐལ་བཟང་དབྱངས་སྐྱིད་མཆོག་དང་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག བགྲོ་གླེང་སྟེང་ཆེད་དུ་གདན་ཞུའི་སྐུ་མགྲོན་དུ་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་དང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་འགན་འཛིན་རྡ་རྗེ་དབང་ཕྱུག བོད་ཀྱི་དཔེ་མཛོད་ཁང་གི་དཔར་སྐྲུན་འགན་འཛིན་ན་གཱ་སངས་རྒྱས་བསྟན་དར་ལགས་བཅས་ཕེབས་འདུག

མཛད་སྒོ་དབུ་འཛུགས་ཀྱི་ཐོག་མར་ངྷ་ས་མདོ་སྨད་ས་གནས་རྒྱུན་ལས་ཚོགས་གཙོ་ཨ་ལོ་ལགས་ཀྱིས་མཛོད་སྒོ་ངོ་སྤྲོད་གནང་དོན། དེ་རིང་དབུ་འབྱེད་གནང་རྒྱུའི་དཔེ་དེབ་གནམ་ས་གོ་འབྱེད་འདི་ཕྱི་ལོ་ ༢༠༠༨ ལོའི་ས་བྱི་ཞི་རྒོལ་ཆེན་མོ་བརྗོད་བྱར་བཟུང་བའི་དཔེ་དེབ་ཅིག་ཡིན་ཞིང་། འདིའི་མཚོན་པའི་གཞིས་བཞུགས་ཤེས་ལྡན་མི་སྣ་སྙིང་སྟོབས་ཅན་དག་གིས་བརྩམས་གནང་མཛད་པའི་ཡིག་འབྲུ་ཁྲི་བདུན་གྱི་སྙན་ཞུ་ནས་མགོ་བཙུགས་ཏེ། དེ་རིང་གི་གནམ་ས་གོ་འབྱེད་བར་རྩོམ་ཡིག་རིང་ཐུང་སྣ་ཚོགས་དང་། དཔེ་དེབ་ཆེ་ཆུང་འདྲ་མིན་འདོན་སྤེལ་བྱས་ཡོད་པ་ཚང་མས་མཁྱེན་གསལ་ལྟར་རེད། བོད་ནང་ནས་འདི་དང་འདི་ལྟ་བུའི་རྩོམ་ཡིག་དང་གཏམ་བཤད་གནང་སྐབས། ཐོག་མ་ནས་སོ་སོའི་ཁེ་ཕན་བློས་གཏོང་དང་ཉེན་ཁ་རྒྱབ་བསྐྱུར་བྱས་ཡོད་པ། པཎ་ཆེན་སྐུ་ཕྲེང་བཅུ་བ་དང་འབའ་པ་ཕུན་ཚོགས་དབང་རྒྱལ་སོགས་མཁས་པ་རྒན་རབས་པ་མང་པོ་ཞིག་བཙོན་དུ་བཅུག་པ་དང་། ད་ཆར་ཡང་བོད་ཆོལ་ཁ་གསུམ་ནས་རྩོམ་པ་པོ་བཞི་བཅུ་ཞེ་གྲངས་ཀྱིས་མནར་གཅོད་མྱོང་གིན་ཡོད་པ་འདི་དག་གིས་མཚོན་ཐུབ། རླབས་ཆེན་གྱི་རྒྱལ་གཅེས་པ་འདི་དག་གི་ཕྱག་རྩོམ་ཁག་བོད་ནང་དཔར་སྐྲུན་གྱི་གོ་སྐབས་མེད་སྟབས། མདོ་སྨད་བཙན་རྒོལ་བདེན་རྒྱབ་མནའ་འབྲེལ་གྱིས་མ་སྐུལ་དང་བླང་ཐོག ༼ ས་བྱི་ཞི་རྒོལ་ཆེན་མོའི་དེབ་ཕྲེང་ ༽ གི་ངོ་བོར་ཕྱོགས་བསྒྲིགས་གི་ལས་གཞི་མགོ་འཛུགས་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་བྱུང་།

དེའི་རྗེས་སྐུ་མགྲོན་གཙོ་བོ་སྟག་ལྷ་སྐལ་བཟང་དབྱངས་སྐྱིད་མཆོག་གིས་དཔེ་དེབ་དབུ་འབྱེད་གནང་ཞིང་། བོད་མི་མང་སྤྱི་འཐུས་རྒྱ་རི་སྒྲོལ་མ་མཆོག་གིས་གསུང་བཤད་གནང་དོན། དཔེ་དེབ་འདིའི་ནང་དུ་བཀོད་པ་ལྟར། ༢༠༠༨ ལོར་བོད་ཆོལ་ཁ་གསུམ་གྱི་ས་ཁྱོན་ཡོངས་སུ་ཞི་རྒོལ་ཆེན་མོ་བྱུང་ཞིང་། རང་དབང་དང་འདྲ་མཉམ། ཐོབ་ཐང་དང་དམངས་གཙོ། ས་ཁོངས་དང་མི་རིགས་ཀྱི་འདུ་ཤེས་ཆེན་པོ་སྐྱེས་ཏེ་རང་སྲོག་བློས་གཏོང་བྱས་ཡོད། ལོ་ལྔ་བཅུ་འདིའི་རིང་བོད་ནང་རང་སྲོག་ལ་མ་འཛེམ་པར་གཞས་གཏོང་མཁན་དང་རྩོམ་འབྲི་མཁན་མང་པོ་ཞིག་གིས་མི་རིགས་ཀྱི་ཆེད་དུ་ཕྱག་ལས་གནང་བར་བོད་མི་དམངས་སྤྱི་འཐུས་ལྷན་ཚོགས་ཀྱིས་གུས་འདུད་དང་བཅས་ཐུགས་རྗེ་ཆེ་ཞུ་རྒྱུ་ཡིན། བོད་ནང་གི་རྒྱལ་གཅེས་པ་འདི་དག་གིས་གོམ་པ་གང་རེ་བྱས་ཏེ་མདུན་དུ་སྐྱོད་སྐབས། ཕྱི་ལོགས་སུ་ཡོད་པ་དག་གིས་ཀྱང་མཉམ་སྐྱོད་བྱ་ཐུབ་རྒྱུར་འབད་བརྩོན་བྱ་རྒྱུ་ཧ་ཅང་གལ་ཆེན་པོ་རེད། བོད་ནང་ནས་ཤེས་ཡོན་ཅན་དང་འཇོན་ཐང་ཅན། ལ་ཞེན་ཅན་མང་པོ་ཞིག་བཙན་བྱོལ་དུ་ཕེབས་ཡོད། ང་ཚོས་ཁོང་ཚོ་དང་མཉམ་རུབ་ཐུབ་ཀྱི་ཡོད་མེད་ཐེ་ཚོམ་དང་བློ་འཚབ་སྐྱེ་གཞི་ཞིག་རེད། ད་ལོའི་ཕྱི་ཟླ་ ༨ ནང་སྤྱི་འཐུས་ལྷན་ཚོགས་ཀྱི་གོ་སྒྲིག་འོག བྷེལ་ཀོབ་ཏུ་བོད་གཞུང་དམངས་རྒྱལ་ཡོངས་ཚོགས་ཆེན་ཚོགས་འཆར་ཡོད། དེའི་སྟེང་མི་ ༢༥ ཙམ་དང་བླང་ཐོག་ཕེབས་རྒྱུའི་ལམ་ཁ་ཡོད་ཀྱང་། དེ་དག་ནང་ངས་གོང་དུ་བཤད་པའི་བོད་ནས་ཕེབས་པའི་མི་སྣ་གལ་ཆེན་དེ་དག་དང་། དེ་རིང་འདིར་ཕེབས་ཡོད་པའི་རྩོམ་པ་པོ་དག་མི་འདུག འོན་ཀྱང་། བཙན་བྱོལ་གཞུང་གི་བྱེད་སྟངས་སྤྱོད་སྟངས་ཐད་དགོངས་འཆར་གསར་པ་ཡོད་ན་ངེས་པར་དུ་སྤྱི་འཐུས་ལྷན་ཚོགས་ལ་གནང་རོགས། ང་ཚོས་གང་ཐུབ་ཀྱིས་ཚོགས་ཆེན་ནང་ཚུད་ཐབས་བྱ་རྒྱུ་ཡིན། ཞེས་གསུངས་བྱུང་།

དེའི་རྗེས་སྟག་ལྷ་སྐལ་བཟང་དབྱངས་སྐྱིད་མཆོག་གིས་བདེན་པའི་གནས་ཚུལ་ཡི་གེར་བཀོད་ཡོད་པ་དག་ལ་ཉར་ཚགས་གནང་བར་ཡི་རངས་གནང་དོན། འདས་པའི་ལོ་ངོ་ལྔ་བཅུ་ནས་དྲུག་ཅུའི་རིང་གི་བོད་ནང་གི་གནས་སྟངས་དེ་འཛམ་གླིང་གི་དཀའ་ངལ་ཆེ་ཤོས་ཤིག་ཆགས་ཡོད། དེ་བཞིན་སྐྱབས་བཅོལ་ནང་ཡོད་མཁན་ཚོ་མིའི་ལུང་པར་ཆ་རྐྱེན་ཐད་དཀའ་ངལ་ཆེ་ཡང་། གཞིས་ཀྱི་མི་མང་དང་བསྡུར་ན། ང་ཚོ་རང་དབང་ལུང་པར་སྐྱིད་པོ་དང་གོ་སྐབས་བཟང་པོ་ཡོད། བོད་ཀྱི་ལོ་རྒྱུས་ལ་ཕྱིར་མིག་བལྟས་ན། དཀའ་ངལ་མང་དག་ཅིག་གི་འབྱུང་ཁུངས་དེ་སོ་སོའི་ལོ་རྒྱུས་མ་ཤེས་པ་དང་། ལོ་རྒྱུས་དཔེ་དེབ་དཔར་སྐྲུན་འགྲེམས་སྤེལ་མ་ཐུབ་སྟབས། རྒྱལ་སྤྱིའི་ཐོག་བོད་ཀྱི་ལོ་རྒྱུས་ཤེས་མཁན་དཀོན་པོ་ཡིན་པའི་རྒྱུ་མཚན་གྱིས་བྱུང་བ་ཞིག་ཆགས་ཡོད། ཕྱི་རྒྱལ་གྱི་མི་རེ་ཟུང་གིས་བོད་ཐོག་ཉམས་ཞིབ་ཀྱི་དཔེ་དེབ་རེ་ཟུང་བྲིས་ཡོད་པའི་བཀའ་དྲིན་གྱིས་བོད་ཀྱི་ལོ་རྒྱུས་ཕྲན་བུ་ཕྱི་ལོགས་སུ་ཁྱབ་པ་རེད། ད་ཆར་ཆ་རྐྱེན་འཛོམས་ཀྱང་། བོད་ནང་ལ་མཚོན་ན་ལས་དོན་ཞིག་བསྒྲུབ་རྒྱུར་སོ་སོའི་སྲོག་གི་བདག་པོ་ཡང་སོ་སོ་བྱེད་མ་ཐུབ་པའི་གནས་སྟངས་འོག་ཡོད། གནས་སྟངས་དེའི་འོག་སོ་སོའི་མི་རིགས་ཀྱི་བདེན་པའི་གནས་ཚུལ་ཡིག་ཐོག་དུ་ཕབ་ཡོད་པ་འདི་དག་ཁྱེད་ཅག་གིས་ཉར་ཚགས་དང་དཔར་སྐྲུན་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས་ཏེ་མཛད་སྒོའི་དངོས་གཞི་གྲུབ་རྗེས་བགྲོ་གླེང་མགོ་འཛུགས་གནང་ཡོད།

སྐབས་དེར་བོད་མི་མང་སྤྱི་འཐུས་རྒྱལ་རོང་ཟླ་བ་ཚེ་རིང་མཆོག་གིས་བགྲོ་གླེང་དབུ་འཛུགས་ཀྱི་གཏམ་བཤད་གནང་དོན། གནམ་ས་གོ་འབྱེད་སྐོར་ལ་བགྲོ་གླེང་གནང་དགོས་པའི་དམིགས་ཡུལ་གང་ཡིན་ཟེར་ན། བོད་ཀྱི་ལོ་རྒྱུས་སྟེང་བྱུང་མ་མྱོང་བའི་ཆིག་སྒྲིལ་སྟོབས་ཤུགས་ཕྱིར་མངོན་བྱེད་སྟངས་གཞི་རྒྱ་ཆེ་ཤོས་ཡིན་པའི་ས་བྱི་ཞི་རྒོལ་ཆེན་མོ་ནི། ཇི་སྲིད་བོད་མི་རིགས་གནས་པ་དེ་སྲིད་དུ་ལོ་རྒྱུས་ཀྱི་སྟེང་ནས་གསལ་པོར་གནས་དགོས་པ་ཞིག་ཡིན་ནའང་། རྒྱ་གཞུང་གིས་ཞི་རྒོལ་ཆེན་མོའི་སྐོར་འདི་ལོ་རྒྱུས་ཀྱི་སྟེང་ནས་རྩ་བརླག་ཕྱིན་ན་བསམ་པའི་ནང་བྱུས་འོག ཞི་རྒོལ་བ་མང་པོ་ཞིག་དམར་གསོད་དང་བཙོན་འཇུག ཞི་རྒོལ་སྐོར་གྱི་རྩོམ་ཡིག་དང་གཏམ་གླེང་རིགས་བཀག་སྡོམ་བྱེད་ཀྱིན་ཡོད་པ་དེར་ཡ་ལན་སྤྲོད་པ་དང་། བགྲོ་གླེང་འདི་བརྒྱུད་དེ་གཞིས་བྱེས་ཕན་ཚུན་བར་དམ་ཚིག་རྡོག་རྩ་གཅིག་སྒྲིལ་དང་། གཞིས་བྱེས་ཤེས་ཡོན་པ་ཕན་ཚུན་བར་གདེང་འཇོག་དང་ཡིད་ཆེས་ཀྱི་གཞི་རྩ་དེར་ཞི་དྲག་གི་གནོན་ཤུགས་གང་གིས་ཀྱང་ཉམས་དམས་སུ་གཏོང་ཐུབ་ཐབས་རྩ་བ་ནས་མེད་པའི་རྣམ་འགྱུར་གསལ་པོ་བསྟན་པ་ཞིག་ཡིན། བགྲོ་གླེང་འདི་བརྒྱུད་ནས། ད་ལྟའི་ཆར། རྒྱ་གཞུང་གིས་གནམ་ས་གོ་འབྱེད་འདི་བོད་ནང་ནས་བཀག་སྡོམ་བྱས་ཡོད་པའི་གནས་སྟངས་དེ་དང་། རྩོམ་པ་པོ་ཁོང་འཛིན་བཟུང་བྱས་ཡོད་པའི་གནས་སྟངས་དེ་ནི། དྲང་བདེན་གྱི་ཐག་གཅོད་ཅིག་རྩ་བ་ནས་ཆགས་མེད་སྟབས། དྲང་བདེན་གྱི་ཐག་གཅོད་ཅིག་ཡོང་བའི་འབོད་སྐུལ་དང་ཆབས་ཅིག གནམ་ས་གོ་འབྱེད་ཀློག་མཁན་བརྒྱ་ཕྲག་ནས་སྟོང་ཕྲག་དང་། སྟོང་ཕྲག་ནས་ཁྲི་ཕྲག་ཏུ་འཕེལ་བ་དང་། ས་བྱི་ལོའི་ཞི་རྒོལ་ཆེན་མོ་འདི་བཞིན་དུས་གཏན་དུ་བོད་མི་རིགས་ཀྱི་ངོས་ནས་མི་རབས་ནས་མི་རབས་བར་སྙིང་སྟོབས་ཀྱི་འབྱུང་ཁུངས་སུ་ངོས་འཛིན་ཐོག མི་རབས་ནས་མི་རབས་བར་རྒྱུད་འཛིན་དར་སྤེལ་བྱེད་པའི་གཞེན་སྐུལ་ཞུ་བཞིན་ཡོད། ཅེས་གསུངས་བྱུང་།

བགྲོ་གླེང་གི་ཐོག་མར་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་འགན་འཛིན་རྡོ་རྗེ་དབང་ཕྱུག་ལགས་ཀྱིས་༼ གནམ་ས་གོ་འབྱེད་དང་ངོས་འཛིན་ལྟ་ཚུལ་སྐོར་གླེང་བ ༽ ཞེས་པའི་བརྗོད་གཞིའི་ཐོག་གཏམ་བཤད་གནང་བ་ལས་ཕྱོགས་བསྡུས་བྱས་པ། ཉེ་བའི་ལོ་ངོ་བཅུ་གྲངས་ཤིག་གི་རིང་ལ། ཞོགས་དུང་གིས་བོད་ཀྱི་བསམ་བློ་དང་སྤྱི་ཚོགས་གནས་སྟངས་གཉིས་བསྡུར་ཏེ་རང་ཉིད་ཀྱི་བསམ་ཚུལ་དང་དྲན་ཚུལ་ཁ་གསལ་པོས་བྲིས་ཤིང་བཤད་པ་རེད། དེ་ཡང་ཕྱི་ལོ་ ༢༠༠༡ ཟླ་ ༧ ནང་༼དཔྱོད་ཤེས་རྒྱང་འབོད༽དང༌། ཕྱི་ལོ་ ༢༠༠༥ ལོར་༼དོགས་སློང་སྙིང་སྟོབས༽ ཕྱི་ལོ་ ༢༠༠༨ ལོར་༼རིགས་ཤེས་ཀུན་གྲོལ༽བཅས་སྔ་རྗེས་སུ་དཔར་སྐྲུན་བྱས་པ་དེས། ཉེ་བའི་ལོ་ངོ་བཅུའི་རིང་ལ་ཞོགས་དུང་དང་ཁོང་གི་དེབ་དེ་དག་གི་སྐོར་གླེང་མཚམས་མ་ཆད་པ་ལྟ་བུ་ཆགས་ཡོད་ཅིང༌། དེ་དག་ལ་དགག་ལན་གྱི་རྩོམ་ཡིག་དང་དགག་ལན་གྱི་དེབ་སྤེལ་བའི་གྲངས་ཀ་ནི་ཁོང་གི་རྩོམ་ཡིག་དང་དེབ་དག་ལས་བརྒལ་བ་བྱུང་ཡོད་སྟབས། དེང་རབས་བོད་ཀྱི་རྩོམ་རིག་གནས་བབ་ལ་ཞིབ་འཇུག་གནང་མཁན་མང་པོས། འདས་མ་ཐག་པའི་ལོ་ངོ་བཅུའི་རིང་དེ་ནི་ཞོགས་དུང་གི་རྩོམ་རིག་དང་བརྗོད་གཞི་ལ་དབང་བར་གྱུར་པའི་ལོ་བཅུ་ཆགས་ཡོད་པ་རེད་ཅེས་གླེང་གིན་ཡོད། ཡིན་ནའང༌། ལོ་ངོ་བཅུ་དེའི་ནང༌། ཞོགས་དུང་གི་སྐོར་གླེང་སྟངས་དེ་ནི། དམའ་འབེབས་བྱེད་མཁན་དང་ཁྱད་གསོད་བྱེད་མཁན་མང་བ་ལས། ཞོགས་དུང་གི་ལྟ་ཚུལ་ལ་གདེང་འཇོག་བྱེད་མཁན་ཆེས་ཉུང་ངུ་ཞིག་ཡོད་པ་དེ་ཡང་སློབ་ཆེན་དང་སློབ་འབྲིང་གི་སློབ་མ་དང༌། གཞི་རིམ་གྱི་ཤེས་ཡོན་པ་ཁག་ཅིག་ཆགས་ཡོད་པ་ལས། བོད་ཕྱི་ནང་ན་གདེང་འཇོག་གི་ཚད་གཞི་ངེས་ཅན་ཡོད་པའི་མཁས་པ་དང་ཤེས་ཡོན་པའི་རིགས་ཀྱིས་དེ་ཙམ་གྱི་གདེང་འཇོག་ཅིག་བྱས་མ་མྱོང་བ་ལྟ་བུ་རེད། བོད་པའི་ཤེས་ཡོན་པའི་སྤྱི་ཚོགས་ནང༌། ཞོགས་དུང་ལ་གདེང་འཇོག་སྤྱི་སྙོམས་བྱེད་པ་དེ་ཁོང་བཙོན་ཁང་དུ་བཅུག་པའི་ཕྱི་ཉིན་དེ་ནས་མགོ་ཚུགས་པ་ལྟ་བུ་ཞིག་རེད། དེ་ནི་གཞན་གང་ཡང་མ་རེད། བོད་ཀྱི་ལོ་རྒྱུས་ལ་ཕྱིར་མིག་བལྟས་པ་ཡིན་ནའང༌། མཁས་པ་དང་འཇོན་ཐང་ཅན་གང་ཞིག་སྐུ་འཚོ་བཞུགས་ཀྱི་སྐབས་ལ་འགྲན་སེམས་བྱེད་པ་ལས། གདེང་འཇོག་བྱེད་སྲོལ་དེ་ཙམ་མེད་པས་ཡིན་ནམ་གང་ལྟར། མཁས་པ་འཇོན་པོ་ཚོ་གཤེགས་ཤུལ་ཤིག་ལ་དེའི་མཛད་རྗེས་གླེང་སྲོལ་དང་གདེང་འཇོག་བྱེད་སྲོལ་ཞིག་སྔོན་ནས་ད་བར་ལུགས་སྲོལ་ལྟ་བུར་འདུག ཁ་སང་དེ་རིང་ཞོགས་དུང་ལ་གདེང་འཇོག་བྱེད་སྟངས་འདི་ཡང་ལམ་དང་ལུགས་སྲོལ་འདིའི་གཡས་གཡོན་ལ་ཐག་ཉེ་བ་ལྟ་བུ་ཞིག་རེད། ཅེས་གསུངས་བྱུང་།

དེའི་རྗེས་བོད་མི་མང་སྤྱི་འཐུས་དགེ་བཤེས་སྨོན་ལམ་མཐར་ཕྱིན་མཆོག་གིས་༼ གནམ་ས་གོ་འབྱེད་ཀྱི་དེབ་ནང་། བོད་དོན་བདེན་མཐའ་གསལ་བའི་ཐབས་ལམ་སྐོར་དང་དེའི་རིན་ཐང་ ༽ ཞེས་པའི་བརྗོད་གཞི་ལས་གནམ་ས་གོ་འབྱེད་ཀྱི་རིན་ཐང་དང་བསམ་ཚུལ་ཞེས་པའི་ཚན་པའི་ནང་བཀོད་དོན། གནམ་ས་གོ་འབྱེད་ནང་། “ རྩོམ་ཡིག་འདི་བཀྲམ་པའི་རྗེས་ལ། ནམ་ཞིག་མི་ཡུལ་གྱི་ཚ་དམྱལ་དང་གྲང་དམྱལ་དུ་སྡོད་ལོས་དགོས་སྙམ་སྟེ་འཇིགས་སྐྲག་ཆེ་མོད། ཁ་ཡི་རྐྱེན་ལས་མགོ་བོ་ཤོར་ནའང་ལམ་འདི་རང་གིས་བདམས་པ་ཡིན་ཕྱིར་རང་འགན་རང་གིས་འཁུར་རྒྱུ་ཡིན་ནོ ” ཞེས་གསལ་བ་ལྟར། རང་དབང་ཏིལ་འབྲུ་ཙམ་ཡང་མེད་པའི་སྒེར་གཅོད་དབང་བསྒྱུར་བའི་འོག་གནས་པའི་བོད་དོན་འཐབ་རྩོད་པ་ཞིག་གིས་རང་སྲོག་ལོངས་སྤྱོད་དང་བཅས་པ་བློས་བཏང་སྟེ། ཕྱི་ལོ་ ༢༠༠༨ ལོའི་ཞི་རྒོལ་ཆེན་མོ་ལས་འཕྲོས་ཏེ་བོད་ཀྱི་གནད་དོན་ཐག་གཅོད་ཡོང་ཐབས་དང་འབྲེལ་བའི་ཐད། གོ་རིམ་དང་རྒྱུ་མཚན་འགྲེལ་བརྗོད་ལྡན་པའི་རྩོམ་ཡིག་འདི་ཉིད་རིན་ཐང་ཆེན་པོ་ལྡན་པ་ཞིག་ཏུ་ངོས་འཛིན་བྱེད་ཀྱིན་ཡོད། ཡིན་ནའང་དེབ་འདིའི་ནང་དཔེ་དོན་དུ་མའི་སྒོ་ནས་འཚེ་མེད་ཞི་བའི་ལྟ་གྲུབ་སྐོར་ལ་རྒྱས་བཤད་མང་པོ་བྱས་འདུག་ཀྱང་། ༧གོང་ས་མཆོག་ལ་ནོ་སྦེལ་ཞི་བདེའི་གཟེངས་རྟགས་དང་ཨ་རིའི་གསེར་གྱི་རྟགས་མ་སོགས་འཛམ་གླིང་དུ་གྲགས་ཆེ་པའི་ཞི་བདེ་གཟེངས་རྟགས་བརྒྱ་ཕྲག་མང་པོ་ཕུལ་ཡོད་པ་དང་། དེ་ལྟ་བུ་ཐོབ་མཁན་གྱི་བོད་མི་ཞིག་བྱུང་ཡོད་པའི་སྐོར་དང་། རྒྱུ་རྐྱེན་བཅས་བགྲངས་མི་འདུག་པ་ནི་དགོས་དབང་གིས་དཀའ་ཚེགས་ལ་བརྟེན་ཏེ་ཡིན་མོད་ཀྱང་། རང་སྲོག་ལོངས་སྤྱོད་དང་བཅས་པ་བློས་བཏང་ཟིན་དུས་ཅུང་ཆ་མ་ཚང་པའི་རྣམ་པ་ཞིག་ཏུ་མཐོང་། ད་དུང་དེབ་འདིའི་ནང་གི་གནད་དོན་མང་པོ་ཞིག་གི་ཐད་བསམ་ཚུལ་མི་མཐུན་པ་འདུག་ཀྱང་། རང་ཉིད་དང་བསམ་ཚུལ་མི་མཐུན་པ་ཡོད་པ་རྒྱུ་མཚན་དུ་བྱས་ཏེ། དེབ་འདིར་རིན་ཐང་མེད་པ་དང་དེབ་འདིའི་རྩོམ་པ་པོ་ཚད་དང་མི་ལྡན་པར་ངོས་འཛིན་རྩ་བ་ནས་བྱེད་ཀྱི་མེད། དེབ་འདིའི་ནང་བཀོད་པའི་རང་ཉིད་དང་བསམ་ཚུལ་མི་མཐུན་པ་རྣམས་ནི་སྲིད་དོན་ཚན་རིག་དང་འབྲེལ་བའི་གལ་ཆེའི་དཔྱད་གཞི་ལའང་ངོས་འཛིན་བྱེད་ཀྱིན་ཡོད། ༢༠༠༨ ལོར་བོད་མི་རྣམས་ཀྱིས་རླབས་ཆེ་བའི་ཞི་རྒོལ་རྔམ་སྟོན་བྱས་སྐབས། ཁོང་དང་ཁོང་ལྟ་བུའི་ཤེས་ལྡན་པ་རྣམས་ཀྱིས་ལས་དོན་གང་ཡང་བྱེད་ཐུབ་མེད་པར་ངོས་འཛིན་གྱིས་འཁང་ར་བྱས་འདུག་ཀྱང་། ད་ལྟའི་དཔེ་དེབ་འདི་ཉིད་མཐོང་ན་སྐབས་དེར་འཕྲལ་མར་ལས་དོན་སྤེལ་བ་ལས་ཀྱང་གནད་དོན་ཞིབ་ཕྲ་འཁོད་པའི་དཔེ་དེབ་འདི་ཉིད་འབྲི་ཐུབ་པ་ནི་དེ་ལས་ལྷག་པའི་རིན་ཐང་དང་ལྡན་པ་ཞིག་ལ་ངོས་འཛིན་བྱེད་ཀྱིན་ཡོད། ཅེས་བཀོད་འདུག

དེའི་རྗེས་བོད་ཀྱི་དཔེ་མཛོད་ཁང་གི་དཔར་སྐྲུན་འགན་འཛིན་ན་གཱ་སངས་རྒྱས་བསྟན་དར་ལགས་ཀྱིས་༼ ས་བྱི་ཞི་རྒོལ་ཆེན་མོའི་བྱུང་རྐྱེན་ངོས་འཛིན་སྐོར་དང་དེའི་རིན་ཐང་སྐོར ༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན། ནམ་ས་གོ་འབྱེད་ཀྱི་དཔེ་དེབ་འདི་ག་འདྲ་ཞིག་རེད་ཟེར་ན། དེ་སྔ་རྒྱ་ནག་གིས་མནར་བཅོད་བཏང་བའི་དཔེ་དེབ་མང་པོ་ཡོད། དེ་དག་ཕལ་ཆེ་བར་ལྟ་གྲུབ་ཀྱི་རྒྱབ་ལྗོངས་རྩལ་དུ་བཏོན་ཡོད་པ་མེད། གནམ་ས་གོ་འབྱེད་དེ་དག་དང་བསྡུར་ན་གནད་དོན་གལ་ཆེན་གཉིས་མཐོང་གི་འདུག དང་པོ། བོད་མི་ཚོ་རྒྱ་ནག་གི་སྡུག་རྩུབ་འོག་ལོ་མང་པོར་མྱང་པའི་ལོ་རྒྱུས་ཀྱི་དཔེ་མཚོན་དང་། རང་དབང་དང་འདྲ་མཉམ་ཐོབ་ཐང་སོགས་མེད་པའི་སྤྱི་ཚོགས་སྒེར་ལངས་བྱེད་སྐབས། ལྟ་གྲུབ་ཅིག་ལ་གཞི་མ་བཅོལ་ན་མུ་མཐུད་སྡུག་བསྔལ་མྱོང་རྒྱུ་ཉག་ཅིག་ཡིན་པ་དེ་རེད། ལེའུ་ལྔ་པ་ནས་དམིགས་སུ་བཀར་ཏེ་གྷན་ངྷི་ཡི་ལྟ་གྲུབ་མང་པོ་ལུང་འདྲེན་བྱས་འདུག འཚེ་མེད་ཞི་བའི་ཐོག་ནས་མི་རིགས་ཤིག་གི་རང་དབང་དང་དམངས་གཙོ། ཐོབ་ཐང་དང་འདྲ་མཉམ་སོགས་རྩོད་ཕྱོགས་སྐོར་བཀོད་འདུག ཞི་རྒོལ་སྐབས་རྒྱ་གཞུང་གིས་སྐྱོན་འཛུགས་བྱས་ཏེ། བོད་པས་དྲག་སྤྲོད་བྱས་སོང་ཟེར་བ་དེའི་ཐད། ཐེའུ་རང་གིས་བརྩམས་པའི་༼ ཁྲག་ཡིག ༽ ནང་བོད་མི་ཚོའི་ལས་འགུལ་དེ་འཚེ་མེད་ཞི་བ་ཡིན་པ་དང་། དྲག་པོའི་རྣམ་པ་ཕྲན་བུ་བྱུང་ཡོད་པ་ཡང་རྒྱ་གཞུང་གི་ལྐོག་གཡོ་ཡིན་ཚུལ། གནས་ཚུལ་བཞི་ཡིས་བདེན་དཔང་བྱས་འདུག གནམ་ས་གོ་འབྱེད་ཟེར་བའི་ཐ་སྙད་འདིའི་ཐད། ང་རང་གི་བསམ་ཚུལ་བྱས་ན། གནམ་ཟེར་སྐབས་ཆོས་ཟེར་བ་དང་ལྷ་ཟེར་བ། ཚེ་ཕྱི་མ་ཟེར་བ་སོགས་ལ་གོ་བ་ལེན་དགོས་པ་དང་། ས་ཟེར་སྐབས་འཇིག་རྟེན་མི་དང་རང་དབང་། ཐོབ་ཐང་སོགས་ལ་ཟེར་བ་རེད་དྲན་ཡོད། ཆོས་དང་སྲིད། ལྷ་དང་མི་ཁ་ཁ་བྱས་པའི་ཐོག་ནས་མིའི་བདེ་བ་སྡུག་བསྔལ་བསྒྲུབ་པར་མི་རང་གིས་བརྩོན་ལེན་བྱ་དགོས་པ་ལས་མི་མ་ཡིན་པ་ཞིག་ལ་སྐྱབས་བཅོལ་ན། དོན་དག་འགྲུབ་པ་ཞིག་དེ་སྔ་བྱུང་མེད་ལ་མ་འོངས་པར་ཡང་འབྱུང་གི་མ་རེད་གསུངས་འདུག་སྙམ། སྲིད་དོན་ཚན་རིག་ནང་ཆོས་དང་སྲིད་ཟེར་བ་དེ་ག་དུས་ཡིན་རུང་ལོགས་སུ་ཕྱེས་ཡོད། སྐྱེས་བུ་སྒེར་བ་ཞིག་དང་དཀོན་མཆོག་གཉིས་ཀྱི་འབྲེལ་བ་དེ་ཆོས་ཀྱི་གནས་ཚུལ་རེད། སྤྱི་ཚོགས་ནང་གི་སྐད་ཆ་ཚང་མ་སྲིད་ཀྱི་གནས་ཚུལ་རེད་ཅེས་བསྟན་ཡོད། ཞོགས་དུང་གི་དཔེ་དེབ་ནང་སྒེར་གྱི་གནས་ཚུལ་མིན་པར་སྤྱི་བའི་གནད་དོན་རེད། བོད་པ་ལོ་ངོ་ལྔ་བཅུའི་རིང་དབང་སྒྱུར་དང་གཉའ་གནོན་དེ་ལས་ཐར་ཐུབ་བྱེད་དགོས་ན། ཐོག་མར་མི་སོ་སོའི་སེམས་ནང་རང་དབང་གལ་ཆེན་ཡིན་པ་དང་། བདེན་པ་གལ་ཆེན་ཡིན་པ། དམངས་གཙོ་དང་འདྲ་མཉམ་གལ་ཆེན་དུ་རྩི་དགོས་པ་དེབ་འདིས་ཁ་གྲགས་འདུག ཅེས་གསུངས་རྗེས། དྲི་བ་དྲིས་ལན་དང་ཟུར་ཞུགས་པ་ ༢༡ ཙམ་གྱིས་ཞོགས་དུང་ཐད་བཟུང་བའི་རང་རང་གི་ལྟ་ཚུལ་དང་། ཞོགས་དུང་གིས་བོད་མི་རིགས་ལ་བཅངས་པའི་ཤ་ཞེན་གྱི་ཟབ་ཚད། གནམ་ས་གོ་འབྱེད་དཔེ་དེབ་ཀྱི་ལྗིད་ཚད་སོགས་གླེང་ཡོད།

གསར་འགོད་པ་དོན་འགྲུབ་བཀྲ་ཤིས།