རྒྱ་ནག་གིས་རྔ་པ་འབར་ཁུལ་འབར་ཁམས་མི་རིགས་དགེ་འོས་སློབ་གྲྭའི་དགེ་རྒན་བསྟན་མེ་སྐྱབས་ལགས་འཛིན་བཟུང་བཀག་ཉར་བྱས་འདུག
ལྷོ་ཕྱོགས་འབྲས་སྤུངས་སྒོ་མང་གྲྭ་ཚང་རྫོང་ཆུ་ཁང་ཚན་གྱི་གྲྭ་གསུང་རབ་ལགས་ཀྱིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། ཟླ་གཅིག་གི་སྔོན་དུ་རྒྱ་གཞུང་གིས་རྔ་པ་ཁུལ་འབར་ཁམས་རྫོང་མི་རིགས་དགེ་འོས་སློབ་གྲྭའི་བོད་སྐད་ཡིག་གི་དགེ་རྒན་བསྟན་མེ་སྐྱབས་ལགས་ལ། ཆབ་སྲིད་དང་འབྲེལ་བའི་དེབ་བརྩམས་ཏེ་སློབ་མ་ཚོར་བཀྲམས་ཡོད་ཚུལ་དང་། སློབ་མ་ཚོར་ཆབ་སྲིད་དང་འབྲེལ་བའི་སློབ་གསོ་སྤྲད་པའི་ནག་ཉེས་བཀལ་ཏེ་འཛིན་བཟུང་བྱས་ཡོད་པ་དང་། འཛིན་བཟུང་བྱས་ཏེ་ཟླ་གཉིས་ལྷག་འགོར་ཡང་རྒྱ་ནག་གིས་ཁོང་གི་ནང་མིར་བརྡ་ལན་ཅི་ཡང་སྤྲད་མེད་པར་བཀག་ཉར་བྱས་ཡོད་འདུག་ལ། ཉེ་ཆར་ཁོང་གི་ནང་མིས་ཁོང་རྔ་བ་ཁུལ་རྐ་ཁོག་རྫོང་གི་བཀག་ཉར་ཁང་ཞིག་ཏུ་བཙོན་འཇུག་བྱས་ཡོད་ཚུལ་ཤེས་རྟོགས་ཐུབ་ཡོད་པ་ལས། ཁོང་ཉིད་གློད་གྲོལ་ཐད་བྱ་ཐབས་ཅི་ཡང་མེད་པའི་གནས་སུ་ལྷག་ཡོད་འདུག དེ་བཞིན། རྒྱ་ནག་གཞུང་གིས། ད་ལྟའི་ཆར་ཡང་ ༢༠༠༨ ལོའི་ས་བྱི་ཞི་རྒོལ་ཆེན་མོའི་ཁྲོད་རྔ་པ་རྫོང་གཙོས་ཉེ་ཁུལ་གྱི་བོད་རིགས་ཡོངས་ཀྱིས་ངོ་རྒོལ་གྱི་ལས་འགུལ་སྤེལ་བར་རྐྱེན་བྱས་ཏེ། འབར་ཁམས་དགེ་འོས་སློབ་གྲྭ་གཙོས་པའི་རྔ་པ་ཁུལ་གྱི་མི་རིགས་སློབ་གྲྭའི་བོད་རིགས་དགེ་རྒན་མང་པོ་ཞིག་བཀག་ཉར་དང་འདྲི་གཅོད་བྱས་ཏེ་སུན་གཙེར་དང་གནོན་ཤུགས་གང་མང་སྤྲོད་ཀྱིན་ཡོད་འདུག་ལ། བོད་ཕྱི་ནང་གཉིས་ཀྱི་བརྒྱུད་ལམ་གང་མང་ལའང་དམ་དྲག་དང་ཞིབ་བཤེར་ནན་མོ་བྱེད་ཀྱིན་ཡོད་འདུག
རང་ལོ་ ༣༠ ཡིན་པའི་བསྟན་མེ་སྐྱབས་ལགས་ནི། རྔ་སྟོད་སྔོ་ཤུལ་ཚོ་འདུ་སྙན་གྲགས་ཚང་གི་ཁྱིམ་དུ་སྐྱེས་ཤིང་། ཕྱིས་སུ་སློ་གྲྭ་རིམ་གྱིས་འགྲིམས་ཏེ་ནུབ་བྱང་མི་རིགས་སློབ་གྲྭ་ཆེན་མོའི་ཞིབ་འཇུག་སློབ་མའི་སློབ་མཐར་ཕྱིན་ཡོད་པ་དང་། ༢༠༠༦ ལོའི་ཡས་མས་ནས་བཟུང་རྔ་བ་འབར་ཁམས་མི་རིགས་དགེ་འོས་སློབ་གླིང་དུ་བོད་ཡིག་དགེ་རྒན་གྱི་ཕྱག་ལས་གནང་ཡོད་འདུག
གསར་འགོད་པ་དོན་གོ།
རེད་དེ་ཨེ་རླུང་ཚང་གི་ཟླ་སྔོན་མའི་ཚེས་ལྔ་ཉིནགྱི་ཨམ་སྐད་ལེ་ཚན་ནང་བཤད་སོང་། ད་དུང་དགེ་རྒན་ཀིརྟི་སྐྱབས་སོགས་དགེ་རྒན་བཞི་དང་སློབ་མ་བཞི་བཟུང་བ་ནས་གློད་དཀྲོལ་མ་བཏང་བར་བཀག་གཉེར་བྱས་བསྡད་ཡོད།།