རྒྱ་གར་བ་དང་བོད་པའི་མི་ཚང་མང་པོས་བྱིས་པ་གཡོག་པོར་ཉར་ཏེ་བྱིས་པར་རང་དབང་དང་ཐོབ་ཐང་སྤྲོད་ཀྱིན་མེད་པའི་རིགས་དེ་ངེས་པར་དུ་མཚམས་འཇོག་བྱས་ཏེ། དེའི་རིགས་ལ་སློབ་སྦྱོང་གི་མཐུན་རྐྱེན་བསྐྲུན་དགོས་ཟེར།
དེ་རིང་ཞོགས་པར་འགྲོ་བ་མིའི་གོམ་སྟབས་ཚོགས་པའི་གོ་སྒྲིག་འོག་བཞུགས་སྒར་མེག་ལོར་རླངས་འཁོར་ས་ཚིགས་ནས་ཐེག་ཆེན་ཆོས་གླིང་གཙུག་ལག་ཁང་བར་ངྷ་སའི་ཉེ་འགྲམ་དུ་ཡོད་པའི་རྒྱ་གར་གྱི་སློབ་གྲྭ་ཁག་གསུམ་གྱི་སློབ་འབྲིང་དང་སློབ་ཆུང་གི་དགེ་སློབ་དང་། བོད་ཁྱིམ་ཉིན་མོ་སློབ་གྲྭའི་དགེ་སློབ་བཅས་མི་གྲངས་ ༤༠༠ ལྷག་འདུ་འཛོམས་བྱས་ཏེ་སྐད་འབོད་ཀྱི་ལས་འགུལ་ཞིག་སྤེལ་ཡོད་ལ། ཐེངས་འདིའི་ལས་འགུལ་འདི་ནི་སང་ཉིན་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་གྱི་ཉིན་མོ་དང་སྟབས་བསྟུན་ཏེ་སྤེལ་བ་ཞིག་ཡིན་འདུག ལས་འགུལ་གྱི་དམིགས་ཡུལ་ཐད་འདི་གའི་གསར་འགོད་པས་ཚོགས་པ་འདིའི་འབྲེལ་མཐུད་པ་དང་ལས་འགུལ་གྱི་སྣེ་ཁྲིད་པ་འཕྲིན་ལས་ལགས་སུ་བཀའ་འདྲི་ཞུས་པར། ཁོང་གིས། ང་ཚོས་ད་ལྟའི་བར་བྱིས་པའི་ངལ་རྩོལ་དང་འབྲེལ་བའི་སྦྱར་ཡིག་དང་འཕྲེད་དར་སོགས་གང་སར་བཀྲམས་ཏེ་ལས་འགུལ་ཐེངས་མང་སྤེལ་བ་ཡིན་མོད། དམིགས་བསལ་གྱི་གྲུབ་འབྲས་མ་བྱུང་སྟབས། ཐེངས་འདིར་ང་ཚོས་ལས་འགུལ་གྱི་གཞི་རྒྱ་སྔོན་མ་ལས་ཆེ་རུ་བཏང་སྟེ། རྒྱ་གར་དང་བོད་པའི་སློབ་གྲྭ་ཁག་ཅིག་གི་དགེ་སློབ་རྣམ་མཉམ་རུབ་ཀྱིས་ངལ་རྩོལ་ལ་བཀོད་བཞིན་པའི་ལོ་ཆུང་བྱིས་པ་རང་ལ་ཡོད་བསྡད་པའི་འགྲོ་བ་མིའི་ཐོབ་ཐང་ལོངས་སྦྱོད་བྱ་རུ་འཇུག་རྒྱུ་དང་། བྱིས་པ་དེའི་རིགས་ལ་སློབ་སྦྱོང་གི་གོ་སྐབས་སྤྲོད་དགོས་པའི་འབོད་སྐུལ་གནང་བ་དང་འབྲེལ། སྲུང་སྐྱོབ་བྱ་རྒྱུ་དེ་ཡིན་ལ། དེ་བཞིན། རྒྱ་གར་དང་བོད་པའི་མི་ཚང་མང་པོ་ཞིག་གིས་བྱིས་པ་གཡོག་པོར་ཉར་ཏེ་བྱིས་པར་རང་དབང་དང་ཐོབ་ཐང་སྤྲོད་ཀྱིན་མེད་པའི་རིགས་དེ་ངེས་པར་དུ་མཚམས་འཇོག་བྱ་དགོས་པའི་འབོད་སྐུལ་དང་མི་མང་ནང་ཁུལ་ཏུ་དེའི་སྐོར་གྱི་གོ་རྟོགས་སྤེལ་ཆེད་ཡིན་ཞེས་བརྗོད་བྱུང་།
འགྲོ་བ་མིའི་གོམ་སྟབས་ཚོགས་པ་འདི་ནི། ༢༠༠༥ ལོར་སུད་སིར་རྒྱལ་ཁབ་ནང་གསར་དུ་བཙུགས་པའི་ཚོགས་པ་ཞིག་ཡིན་འདུག་ལ། མི་ལོ་ ༦ རིང་གི་ནང་ཚོགས་པ་འདིས་མི་ཚང་སྐྱོ་བོའི་རིགས་དང་ངལ་རྩོལ་ལས་གྲོལ་བའི་བྱིས་པའི་ཆེད་ཕྱི་གླིང་ཡུལ་གྲུ་ཁག་ཏུ་སློབ་གྲྭ་གསར་འཛུགས་གནང་ཡོད་པར་མ་ཟད། རྒྱ་གར་ཝ་རཱ་ན་སི་དང་རྡོར་གདན་ཁུལ་ཏུ་ཡན་ལག་སློབ་གྲྭ་གསར་འཛུགས་ཀྱིས་ངལ་རྩོལ་ལས་གྲོལ་བའི་བྱིས་པ་དག་ལ་སློབ་སྦྱོང་གི་གོ་སྐབས་བསྐྲུན་གྱིན་ཡོད་འདུག ཐེངས་འདི་ནི་ཚོགས་པ་འདིས་བཞུགས་སྒར་དུ་སྤེལ་བའི་གཞི་རྒྱ་ཆེ་བའི་ལས་འགུལ་ཐོག་མ་དེ་ཡིན་འདུག་ལ། སང་ཉིན་ཚོགས་པ་འདིས་གོ་སྒྲིག་འོག་ངྷ་ས་ཉིན་མོའི་སློབ་གྲྭའི་རྒྱལ་ཡུམ་ཆེན་མོའི་ཚོགས་ཁང་དུ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་ཤེས་རིག་བཀའ་བློན་ཐུབ་བསྟན་ལུང་རིགས་མཆོག བོད་ཀྱི་འགྲོ་བ་མིའི་ཐོབ་ཐང་དང་དམངས་གཙོ་འཕེལ་རྒྱས་ལྟེ་གནས་ཁང་གི་འགན་འཛིན་དང་ཉམས་ཞིབ་པ་འཇམ་དཔལ་སྨོན་ལམ་བཅས་གདན་ཞུའི་ཐོག་བཙན་བྱོལ་བོད་ཀྱི་ངལ་རྩོལ་གླེང་བ་ཞེས་པའི་བརྗོད་གཞིའི་ཐོག་གསུང་བཤད་དང་བགྲོ་གླེང་གནང་རྒྱུ་ཡིན་འདུག
གསར་འགོད་པ་དོན་གོ།
ན་ཆུང་བྱིས་པའི་བདེ་སྡུག་ལ་བསམ་གཞིགས་ངེས་པར་དུ་བྱེད་དགོས་མ་ཟད་བརྩོད་ལན་ཡང་མཐའ་གཅིག་ཏུ་བྱེད་དགོས་་་་གང་ཡིན་ཟེར་ན་་་ན་ཆུང་བྱེས་པའི་སེམས་ཁུངས་སུ་ཞི་བདེ་དང་རང་དབང་མ་སྤྲད་ན་བྲན་གཡོག་ལམ་ལུགས་འཇུག་མ་སྒྲིལ་བའི་རྟགས་སུ་མངོན་པ་རེད།གལ་སྟེ་དེ་དག་ཡོང་བ་ལ་རང་རང་གི་མི་ཐེག་པའི་ངལ་གཙོ་བྱེད་དུ་མ་གཅུག་པར་གུ་ཡང་ངང་མ་འོང་པའི་མདུན་ལམ་ཆེད་སློ་སྦྱངས་བྱེད་དུ་གཅུག་དགོས་་་་་དེ་ནི་བ་ཆུང་རང་ལ་དབང་བའི་བྱ་བཞག་རེད།
དེ་རིང་གི་ལས་འགུལ་དངོས་གནས་ཡགས་པོ་རེད་འདུག་མི་མང་པོ་ཞིག་གི་སོ་སོར་གཅིག་པུས་ཆད་དུ་བྱེས་པ་མང་པོ་ཞིག་མ་འོངས་སོ་སོས་མི་ཚེ་སོ་སོས་སྐྱོང་དབང་མེད་པའི་མིས་ལག་འོག་དུ་སྡུད་དགོས་བྱུང་བ་ཆགས་ཡོང་གི་འདུག་་
ལས་འགུལ་འདི་ལ་རྒྱབས་སྐྱོར་ཡོད།
བོད་པ་རྣམས་ནས་བོད་རིགས་ན་གཞོན་ལས་མེད་དག་ལ་ལས་ཀ་སྤྲོད་པ་ལས་རྒྱ་གར་བར་ལས་ཀ་སྤྲོད་བཟང་བར་ཤོག་དག་གི་རྣ་རྩེར་རྡོ་ཆུང་ཆུང་ཞིག་བཞུས་པ་རེད་དངོས་གནས་ཡག་པོ་རེད་གོ་ཤེས་ཡོད་ན་གོ་ཐོབ་ངེས།
གསར་འགོད་པ་ལགས།
སང་ཉིན་གྱི་བགྲོ་གླེང་གི་ས་གནས་ནོར་འདུག་ལགས། དེ་ནི་མེག་གྷན་ཉིན་སློབ་ཀྱི་རྒྱལ་ཡུམ་ཆེན་མོའི་ཚོགས་ཁང་རེད།
འདི་ནི་དུས་ཀུན་དགོས་ངེས་ཀྱི་བྱ་འགུལ་ཞིག་རེད་ལབ་ན་མ་འགྲིག་པ་གང་ཡང་མེད་ནའང། བྱ་འགུལ་འདིའི་ཁྲོད་རང་ཉིད་ཐེ་ཡོད་ན་ངོ་གནོང་དགོས་པ་ཞིག་མ་རེད་དམ།
ང་ལྷོ་ཕྱོགས་སུ་ཡོད་སྐབས་དོ་སྣང་ཆེན་པོ་གཅིག་བྱུང་།
དེ་ནི་བོད་མིའི་ལག་འོག་ནས་ལག་ཆགས་པ་དང་བོད་སྐད་འཐོག་རྒྱུ་མེད་པའི་རྒྱ་གར་བ་རེ་འགའ་བོད་ལ་ཁྱོན་ནས་མི་དགའ་བ་དེ་ཡིན། ཡིན་ནའང་། མཇུག་ཏུ་ངས་རྒྱ་གར་བ་དེ་ཚོ་ཆུང་བྱིས་དུས་ནས་བོད་མི་ཚོས་སྡུག་ལས་སྣ་དགུ་མྱངས་སུ་བཅུག་ཐོག ཁོང་ཚོར་མི་ཞིག་གི་འདུ་ཤེས་ཀྱང་མ་བཞག་པར་གསོ་སྐྱོང་གནང་བས་ཡིན་འདུག
ངོ་མ་ཐུགས་རྗེ་ཆེ་ཞུ།ཡིན་ནའང་།འུ་ཚང་གིས་རྒྱ་གར་གྱི་བྱིས་པའི་ཐོབ་ཐང་དང་ཁེ་དབང་འཕྲོག་པའི་གནས་ཚུལ་ཚད་རྒལ་འདི།ངོ་མ་དེ་རིང་གི་ངོ་རྒོལ་འདིའི་ཁ་གཏད་ས་གཙོ་བོ་རེད་བསམ་གི།འུ་ཚང་གིས་དུས་རྒྱུན་ཁ་ལག་ངོ་མི་འཕྲོད་པའི་བྱ་འགུལ་སྤེལ་བར་ཧ་ཅང་འཚང་ཁ་རེད།དེའི་ཕྱིར་ཁ་ཕྱིར་ལ་འཁོར་ནས་རང་ཉིད་ཀྱི་འགྲོ་འདུག་སྤྱོད་གསུམ་ལ་ཕྱིར་རྟོག་རེ་བྱེད་རྒྱུ་ཧ་ཅང་གལ་ཆེན་རེད་འདོད་གི།དེ་ལྟ་བུའི་བྱ་སྤྱོད་དེ་རིགས་ངེས་པར་དུ་མཚམས་འཇོག་བྱེད་དགོས།།
དེ་ནི་དངོས་གནས་བྱེད་དགོས་པ་ཞིག་བྱས་འདུག དེ་ནི་མཐར་གཏུགས་ན་ང་ཚོ་རང་གི་དོན་དག་རེད། རྒྱ་གར་གཡོག་ཕྲུག་བཀོལ་རྒྱུ་མང་མེད་ན་ཉུང་མེད། ད་རྒྱ་གར་བ་རྣམས་ཀྱིས་མིག་ཕྱེ་ཡི་ཡོད།