ཕ་མར་གཡོག་པོ་བཞག་སྟེ་གཞན་གྱི་བུ་རྫིར་རྒྱུག

ཕ་མས་ཕྲུ་གུར་ལྟ་སྐྱོང་བྱེད་པ་དང་། ཕྲུ་གུས་ཕ་མར་གཉོར་སྐྱོང་བྱེད་པའི་དུས་ཚོད་ཅིག སྤོ་པོ་རྨོ་མོས་ཚ་བོ་ཚ་མོ་སྐྱོང་བ་དང་། ཚ་བོ་ཚ་མོས་སྤོ་པོ་རྨོ་མོ་གཉོར་པའི་དུས་ཚོད་ཅིག་ཡོད། སྲོལ་བཟང་རྩ་ཆེན་འདི་དག་གི་དབང་གིས་གནའ་ནས་ད་བར་བོད་པའི་སྤྱི་ཚོགས་ནང་ལས་མེད་ཟེར་བ་དང་། རྒན་གསོ་ཁང་ཟེར་བ། བུ་བཅོལ་ཁང་ཟེར་བ་སོགས་བྱུང་མྱོང་མེད་ཟེར།

ད་ལོའི་རྒྱལ་སྤྱིའི་བྱིས་པའི་ངལ་རྩོལ་ངོ་རྒོལ་ཉིན་མོ་དང་འབྲེལ་ཏེ། ངྷ་རམ་ས་ལའི་འགྲོ་བ་མིའི་གོམ་སྟབས་ཚོགས་པའི་གོ་སྒྲིག་འོག ངྷ་ས་ཉིན་མོའི་སློབ་གྲྭ་རུ་བྱིས་པའི་ངལ་རྩོལ་སྐོར་ལ་བགྲོ་གླེང་ཞིག་གོ་སྒྲིག་བྱས་ཡོད། གཏམ་བཤད་གནང་མཁན་གཙོ་བོ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་དང་ཤེས་རིག་བཀའ་བློན་ཐུབ་བསྟན་ལུང་རིག་མཆོག འགྲོ་བ་མིའི་ཐོབ་ཐང་གི་འགན་འཛིན་ལས་རོགས་བྱམས་པ་སྨོན་ལམ་ལགས་བཅས་ཕེབས་འདུག བགྲོ་གླེང་གི་ཐོག་མར་བྱམས་པ་སྨོན་ལམ་ལགས་ཀྱིས་རྒྱལ་སྤྱིའི་ཁྲིམས་ཐོག་གི་བྱིས་པའི་ཐོབ་ཐང་སྐོར་གསུངས་དོན། ཐོག་མར་རྒྱལ་ཚོགས་མ་བཙུགས་སྔོན་ལ། ༡༩༡༢ ལོར་མནའ་འབྲེལ་མཐུན་ཚོགས་ཀྱིས་བྱིས་པའི་ཐོབ་ཐང་གི་བསྒྲགས་ཡིག་ཅིག་བཀྲམས་ཡོད། ༡༩༥༩ ལོར་མཉམ་འབྲེལ་རྒྱལ་ཚོགས་ཀྱིས་བྱིས་པའི་ཐོབ་ཐང་ཡོངས་ཁྱབ་གསལ་བསྒྲགས་གནང་བ་རེད། འོན་ཀྱང་ཡོངས་ཁྱབ་གསལ་བསྒྲགས་དེ་འབོད་སྐུལ་ཙམ་ལས་ཁྲིམས་ཆགས་མེད་སྟབས། ཕྱི་ལོ་ ༡༩༧༩ ཙམ་ནས་མཉམ་འབྲེལ་རྒྱལ་ཚོགས་ནང་བྱིས་པའི་ཐོབ་ཐང་སྐོར་ལ་ཁྲིམས་འཆར་བཟོས་ཤིང་། ༡༩༨༩ ལོར་ཁྲིམས་འཆར་དེ་མང་མོས་གཏན་འབེབས་བྱུང་ཡོད། ད་བར་མཉམ་འབྲེལ་རྒྱལ་ཚོགས་ཀྱིས་ཁྲིམས་ཡིག་མང་པོ་བཟོས་པ་ལས་རྒྱབ་སྐྱོར་གནང་མཁན་མང་ཤོས་དེ་བྱིས་པའི་ཐོབ་ཐང་སྐོར་གྱི་ཁྲིམས་ཡིག་དེ་ཆགས་ཡོད་པ་མ་ཟད། ༡༩༩༠ ལོ་ནས་རྒྱལ་ཁབ་ཉེར་གཉིས་ཙམ་གྱིས་དངོས་སུ་ལག་བསྟར་བྱ་རྒྱུ་ཁས་ལེན་བྱས་འདུག ཅེས་གསུངས་བྱུང་།

དེའི་རྗེས་ཤེས་རིག་བཀའ་བློན་ཐུབ་བསྟན་ལུང་རིག་མཆོག་གིས་བྱིས་པའི་ངལ་རྩོལ་སྐོར་ལ་བཙན་བྱོལ་བོད་གཞུང་ལ་སྲིད་བྱུས་གང་ཡོད་སྐོར་གསུངས་དོན། རྒྱལ་སྤྱིའི་ཐོག་བྱིས་པའི་ངལ་རྩོལ་སྐོར་ལ་ཁྲིམས་སྒྲིག་གང་ཡོད་པ་དེ་ལ་བཙན་བྱོལ་བོད་གཞུང་གིས་ཀྱང་བརྩི་བཀུར་བྱ་དགོས་པ་ཞིག་ཆགས་ཡོད། ཕྱི་ལོ་ ༡༩༩༤ ཙམ་ནས་བཀའ་ཤག་གིས་བྱིས་པའི་ངལ་རྩོལ་བཀག་འགོག་སྐོར་གྱི་གསལ་བསྒྲགས་ཤིག་བཏང་འདུག གསལ་བསྒྲགས་དེའི་ནང་། ཡུལ་ཁྲིམས་དང་མི་མཐུན་པའི་ལས་ཀ་བྱེད་པ་དང་། རྐྱེན་ཆུང་ཆུང་གིས་བོད་མི་རིགས་ལ་གནོད་པའི་གནས་ཚུལ་ཡོང་གིན་ཡོད་སྟབས། རྒྱལ་སྤྱིའི་སྟེང་བོད་པར་ཤ་ཞེན་ཡོད་པ་ཚོས་ཀྱང་༧གོང་ས་མཆོག་ལ་མཇལ་ཁའི་སྐབས། བོད་པ་ཚོས་ཕྲུ་གུ་ཆུང་ཆུང་ལས་ཀར་བཀོལ་ཏེ། རྒྱལ་སྤྱི་དང་རྒྱ་གར་གྱི་ཁྲིམས་དང་འགལ་བའི་ལས་ཀ་བྱེད་ཀྱིན་འདུག་ཅེས་སྙན་གསེང་ཞུས་འདུག མུ་མཐུད་འདི་ལྟར་ཕྱིན་པ་ཡིན་ན་བོད་པའི་ཐོག་ལ་ལྟ་སྟངས་ངན་པ་ཡོང་བ་དང་། བོད་པར་རྒྱབ་སྐྱོར་བྱེད་མཁན་ལ་ཤུགས་རྐྱེན་ཐེབས་གི་རེད། ལས་ཀ་འདི་རིགས་རྒྱལ་སྤྱིའི་ཁྲིམས་དང་། ས་གནས་ཡུལ་ཁྲིམས་སོགས་ལ་འགལ་གྱི་ཡོད་པ་མ་ཟད། མིའི་བཟང་སྤྱོད་ལའང་འགལ་གྱི་ཡོད། ཅེས་བཀོད་འདུག

བཀའ་བློན་མཆོག་གིས་རྒྱལ་སྤྱིའི་བྱིས་པའི་ཐོབ་ཐང་གལ་ཆེན་ཡིན་ཡང་། བོད་པའི་སྲོལ་རྒྱུན་ཕ་མ་བུ་ཕྲུག་གི་མཛའ་བརྩེ་དེ་བས་གལ་ཆེན་ཡིན་སྐོར་གསུངས་དོན། ང་ཚོ་སྐྱབས་བཅོལ་བ་ཞིག་ཡིན་སྟབས། སྐྱབས་བཅོལ་བའི་འདུག་སྟངས་ཤེས་དགོས། རང་དབང་ཡོད་པ་དང་སྟོབས་འབྱོར་ཅན་གྱི་རྒྱལ་ཁབ་ལྟར། སོ་སོའི་གནས་ཚང་གི་བྱིས་པ་གཡོག་པོར་ཉར་ཏེ་ཉེས་རྡུང་བཏང་ན། གནས་ཚང་རྒྱ་གར་བར་བསམ་ཚུལ་ག་འདྲ་ཡོང་གི་རེད། བྱིས་པ་དེ་དག་ཚར་ལོངས་བྱུང་ཡོང་སྐབས། སྡུག་པོ་བཏང་ཚད་སེམས་ནས་འདུག་གི་རེད། སྐབས་དེར་གནས་སྟངས་ག་འདྲ་ཆགས་གི་རེད། དེ་བསམ་བློ་གཏོང་ས་གཅིག་རེད། སྤྱིར་བྱིས་པའི་ཐོབ་ཐང་དང་ངལ་རྩོལ་ཐད། ཕྱི་རྒྱལ་ཁག་ཏུ་ཕ་མས་སོ་སོའི་བྱིས་པར་བཀའ་སྐྱོན་གཏོང་ཆོག་གི་མེད། ལོ་བཅོ་བརྒྱད་ནས་བྱིས་པ་ཕ་མའི་ས་ནས་འཐོན་དགོས་པ་རེད། དེ་དག་ཅུང་ཚད་ལས་བརྒལ་སོང་བ་རེད། ང་ཚོ་ཚད་རན་པོ་ཞིག་ཏུ་འདུག་དགོས། བོད་པ་ཚོར་འཛམ་གླིང་རྒྱལ་ཁབ་གཞན་ན་མེད་པའི་སྲོལ་བཟང་ཞིག་ཡོད། ཕ་མས་ཕྲུ་གུར་ལྟ་སྐྱོང་བྱེད་པ་དང་ཕྲུ་གུས་ཕ་མར་གཉོར་སྐྱོང་བྱེད་པའི་དུས་ཚོད་ཅིག་དང་། སྤོ་པོ་རྨོ་མོས་ཚ་བོ་ཚ་མོ་སྐྱོང་བ་དང་། ཚ་བོ་ཚ་མོས་སྤོ་པོ་རྨོ་མོ་གཉོར་པའི་དུས་ཚོད་ཅིག་བཅས་ཡོད། སྲོལ་བཟང་རྩ་ཆེན་འདི་དག་འོག གནའ་ནས་ད་བར་བོད་པའི་སྤྱི་ཚོགས་ནང་ལས་མེད་ཟེར་བ་དང་རྒན་གསོ་ཁང་ཟེར་བ། བུ་བཅོལ་ཁང་ཟེར་བ་སོགས་བྱུང་མྱོང་མེད། ཅེས་གསུངས་བྱུང་།

ཁོང་གིས་མུ་མཐུད་དུ་གསུངས་དོན། བོད་པ་ཚོས་ཕྱི་རྒྱལ་ལ་བལྟ་རྒྱུར་དགའ་དྲགས་པའི་དབང་གིས་ད་ཆར་ཕ་མས་ལས་ཀ་བྱེད་ཐུབ་ཀྱི་མེད་སྐབས། རྒན་གསོ་ཁང་ལ་འཕུད་རྒྱག་གཏོང་བ་དང་། ཕྲུ་གུ་ནར་མ་སོན་གོང་ནས་བུ་བཅོལ་ཁང་ལ་བསྐྱལ་བའི་དུས་ཚོད་ཅིག་ཤར་ཡོད། ཕྲུ་གུར་ལྟ་མཁན་རྒྱ་གར་བ་དེ་དག་གྲོང་གསེབ་སྐྱོ་བོ་ནས་ཡིན་སྟབས། སྐད་ཆ་བཤད་སྟངས་དང་སྤྱོད་ལམ་འཁྱེར་སྟངས་ག་འདྲ་ཡོད་པ་རེད། དེ་འདྲ་ཞིག་གི་ལག་ནས་སོ་སོའི་ཕྲུ་གུ་འཚར་ལོངས་བྱུང་ན་རྗེས་མ་ག་འདྲ་ཆགས་གི་རེད། འདི་ལ་བསམ་བློ་ཡག་པོ་གཏོང་དགོས། ཕ་མ་གཉོར་མཁན་ལ་རྒྱ་གར་ཡུལ་མིའི་གཡོག་པོ་བཞག་སྟེ། སོ་སོ་ཕྱི་རྒྱལ་གྱི་ཕྲུ་གུར་གཡོག་བྱེད་དུ་འགྲོ་བཞིན་ཡོད། སྤྱིར་མི་གཞན་ལ་གཡོག་བྱེད་པ་དེ་འགྲོ་བ་མིའི་བཟང་སྤྱོད་ཅིག་ཡིན་ཡང་། སྔོན་ལ་སོ་སོའི་ལས་འགན་འགྲུབ་དགོས་པ་རེད། སོ་སོ་ཕྲུ་གུ་ཡིན་པས་ཕ་མར་ཞབས་ཞུའི་ལས་འགན་དང་། སོ་སོ་ཕ་མ་ཡིན་པས་ཕྲུ་གུར་གཉོར་སྐྱོང་གི་ལས་འགན་འགྲུབ་དགོས། ཡང་རེ་ཟུང་གིས་ཕྱི་རྒྱལ་དུ་ཕྱིན་པ་བུ་ཕྲུག་ཚོའི་ཆེད་ཡིན་ཟེར། ཐོག་མར་དེ་འདྲའི་བསམ་ཚུལ་ཡོད་སྲིད་ཀྱང་། ཕྱི་རྒྱལ་དུ་ཕྱིན་རྗེས་འདོད་པ་བཞིན་མ་འགྲུབ་པའི་མི་ཚད། ཉི་མ་བར་ནས་སོ་སོའི་ཕྲུ་གུ་འཕྲོ་བརླག་ཏུ་གཏོང་གིན་ཡོད། ཞེས་གསུངས་སོང་།

དེའི་རྗེས་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་རྒྱལ་སྤྱིའི་སྟེང་དུ་བྱིས་པའི་ངལ་རྩོལ་ངོས་འཛིན་གནང་ཕྱོགས་སྐོར་འགྲེལ་བཤད་གནང་དོན། ང་ཚོ་སོ་སོའི་ཐོབ་ཐང་རྩོད་མཁན་ཞིག་དང་། ལྷག་པར་དུ་འགྲོ་བ་མིའི་ཐོབ་ཐང་རྩོད་མཁན་གྱི་མི་རིགས་ཤིག་ཡིན་སྟབས། རྒྱལ་སྤྱི་དང་ས་གནས་ཡུལ་ཁྲིམས་ལ་བརྩི་བཀུར་བྱ་རྒྱུ་གལ་ཆེན་པོ་རེད། བྱིས་པའི་ངལ་རྩོལ་ཟེར་བ་དེ་ག་འདྲ་ཞིག་ལ་ངོས་འཛིན་གནང་དགོས་པ་རེད་ཟེར་ན། ལོ་ཚད་ཀྱི་ཆ་ནས་མཉམ་འབྲེལ་རྒྱལ་ཚོགས་ཀྱིས་ལོ་ ༡༨ ཚད་འཛིན་བྱས་ཡོད་ཀྱང་། རྒྱལ་ཁབ་སོ་སོར་ཚད་འཛིན་མི་འདྲ་བ་བྱུང་ཡོད། རྒྱ་གར་ལ་མཚོན་ན། ལོ་ ༤ ནས་ ༡༦ བར་བྱིས་པར་ངོས་འཛིན་བྱས་ཡོད། ལོ་ཚད་འདིའི་ནང་དུ་བྱིས་པ་དེའི་སྲོག་ལ་ཉེན་ཁ་ཡོད་པ་དང་། འཕྲོད་བསྟེན་ལ་ཉེན་ཁ་ཡོད་པ། ཤེས་ཡོན་སློབ་སྦྱོང་ལ་བར་ཆད་ཡོད་པའི་ལས་ཀའི་རིགས་བྱིས་པའི་ངལ་རྩོལ་ལ་ངོས་འཛིན་བྱེད་ཀྱི་ཡོད། ༧གོང་ས་མཆོག་གི་ཐུགས་རྗེ་དང་རྒྱ་གར་གཞུང་གི་རྒྱབ་སྐྱོར། རྒྱལ་སྤྱིའི་རོགས་རམ་བཅས་ལ་བརྟེན་ཏེ། ང་ཚོ་སྐྱབས་བཅོལ་ལ་ཐོག་མར་འབྱོར་བ་ནས་བྱིས་པར་སློབ་སྦྱོང་སྤྲོད་རྒྱུ་ཨང་དང་པོར་བཞག་ཡོད། ཡུལ་ཆུ་འཐུང་ན་ཡུལ་ཁྲིམས་བརྩི་དགོས་ཞེས་གསུངས་རྗེས། དྲི་བ་དྲིས་ལེན་དང་ཟུར་ཞུགས་པ་དག་གིས་སོ་སོའི་བསམ་ཚུལ་བཤད་པ་དང་། བགྲོ་གླེང་གོ་སྒྲིག་པ་འཕྲིན་ལས་ལགས་ཀྱིས་རྒྱལ་སྤྱི་དང་རྒྱ་གར་གྱི་བྱིས་པའི་ཐོབ་ཐང་དང་ངལ་རྩོལ་བཀག་སྡོམ་སྐོར་གྱི་ཁྲིམས་གཞི་འགའ་ངོ་སྤྲོད་དང་། བྱེ་བྲག་གིས་སྐྱབས་བཅོལ་བོད་མིའི་ངལ་རྩོལ་གྱི་ཐོང་ཐང་ཁྲིམས་སྒྲིག་སྐོར་ཞིག་ངོ་སྤྲོད་གནང་བྱུང་།

གསར་འགོད་པ། དོན་འགྲུབ་བཀྲ་ཤིས།