དགེ་རྒན་ལ་ཕེབས་རོགས།

 
སྐབས་བཞི་པའི་ནོར་གླིང་མཐོ་སློབ་ཀྱི་མཐར་ཕྱིན་མཛད་སྒོ་དེ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་འཚོགས་ཡོད་འདུག
 
 ཚེས་ ༡༨ ཉིན་ནོར་གླིང་མཐོ་སློབ་ཀྱི་སྐབས་བཞི་པའི་ལེགས་བྱང་མཐོ་རམས་པའི་སློབ་ཐོན་མཛད་སྒོ་དེ་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་གི་ཉམས་ཞིབ་ཚོགས་ཁང་དུ་འཚོགས་ཡོད་ལ། མཛད་སྒོའི་སྐུ་མགྲོན་དུ་བཀའ་ཟུར་སྐལ་བཟང་ཡེ་ཤེས་མཆོག་ཆེད་ཕེབས་ཀྱིས་འཛིན་རིམ་བཅོ་ལྔའི་སློབ་ཐོན་པ་ཚོར་ལག་འཁྱེར་གནང་ཡོད་པ་རེད། མཛད་སྒོའི་ཐོག་བཀའ་ཟུར་མཆོག་གིས་གསུངས་དོན། འདས་པའི་ཟླ་ངོ་ ༨  ནང་མཐོ་སློབ་འདིའི་སློབ་ཕྲུག་  ༨ ཙམ་ལ་དྭགས་དང་སྤི་ཏི བཅས་སུ་ཕྱིན་ཏེ་ཡུལ་དེའི་བཙུན་དགོན་ཁག་ཏུ་དགེ་རྒན་གྱི་ཕྱག་ལས་གནང་་ཡོད་ལ། གནང་བ་བཞིན་གྲུབ་འབྲས་ཀྱང་གང་འཚམ་ཞིག་བྱུང་ཡོད་པས་ཐུགས་རྗེ་ཆེ་ཞུ་རྒྱུ་ཡིན། ལ་དྭགས་སུ་དགེ་རྒན་གཏོང་རྒྱུ་དེ་༧གོང་ས་མཆོག་གི་དགོངས་གཞི་ཡིན་སྟབས། ཁ་སྔོན་ཁྱེད་ཚོ་འགྲོ་ཁར་༧གོང་ས་མཆོག་ལ་གཟིམ་ཆུང་མཇལ་ཁ་ཞུ་ཐུབ་ཡོད། ནང་པའི་རིག་གཞུང་གི་ཐོག་ནས་བཤད་ན་ཧི་མ་ལ་ཡའི་རི་རྒྱུད་དེ་ང་ཚོ་བོད་པའི་བུ་ཕྲུག་ལྟ་བུར་ཆགས་ཡོད་དུས་ངེས་པར་དུ་གསོ་སྐྱོང་ལེགས་པོ་བྱ་དགོས་ཀྱི་རེད། གལཏེ་རྒྱ་དམར་གྱི་གཏོར་བཤིག་གི་རྐྱེན་པས་བོད་ཀྱི་རིག་གཞུང་རྦད་དེ་ཉམས་ཆག་ཏུ་ཕྱིན་པ་ཡིན་ན་ས་ཁུལ་དེ་དག་ནས་བོད་ཀྱི་རིག་གཞུང་རྒྱུན་འཛིན་བྱ་དགོས། དེ་ཡིན་དུས་ས་ཁུལ་དེར་ས་བབ་དང་མཐུན་རྐྱེན་སོགས་ཕྱོགས་གང་ཐད་ནས་ཧ་ཅང་སྐྱོ་བོ་ཡིན་ནའང་ཁྱེད་རང་ཚོས་མུ་མཐུད་ཤུགས་རྒྱག་རོགས་གནང་ཞེས་གསུངས་སོང་ལ། ཡང་ཁོང་གིས་ང་ཚོར་དེང་སྐབས་ཆབ་སྲིད་ཀྱི་དཀའ་ངལ་ཆེན་པོ་ཞིག་འཕྲད་ཀྱི་ཡོད་ཀྱང་རིག་གཞུང་ཐོག་ནས་ཧི་མ་ལ་ཡའི་རི་རྒྱུད་དང་སོག་པོ་ཚོར་རིན་མེད་དུ་མཐུན་འགྱུར་རོགས་རམ་གནང་གིན་ཡོད་ལ། ལྷག་པར་དུ་༧གོང་ས་མཆོག་བཙན་བྱོལ་དུ་ཕེབས་རྗེས་འཛམ་གླིང་ཐོག་བོད་ཀྱི་རིག་གཞུང་གི་རིན་ཐང་མངོན་པར་བྱས་ཡོད། དེ་ནི་༧གོང་ས་མཆོག་གི་བཀའ་དྲིན་ཉག་ཅིག་རེད་ཅེས་གསུངས་སོང་།

དེ་བཞིན་ཁོང་གིས་ཀུན་སྤྱོད་སྐོར་ལ་གསུངས་དོན། ཁྱེད་རང་ཚོ་ཕར་འགྲོ་དུས་བོད་པའི་ཚབ་བྱེད་དགོས་དུས་ཕྱོགས་གང་ས་ནས་་སྤྱོད་པ་ཡག་པོ་བྱ་དགོས་རྒྱུ་ལས། དེ་གར་བཙུན་མའི་གྲོད་ཁོག་ནང་ཕྲུ་གུ་བཟོས་འདུག་ལབ་ན་ཡག་པོ་ཁྱོན་ནས་ཡོད་མ་རེད། དེ་ཡིན་དུས་དེའི་ཕྱོགས་ལ་གཟབ་གཟབ་བྱ་དགོས་ཞེས་དང་། ཡང་སློབ་མའི་མདུན་ལམ་ཐད་གསུངས་དོན། ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་དུ་མཐོ་སློབ་སྡེ་ཚན་ཞིག་གསར་དུ་བཙུགས་པ་ནས། ད་རག་བར་སློབ་ཐོན་པ་ཚོས་བོད་ཀྱི་སྤྱི་ཚོགས་ནང་ཞབས་ཞུ་བསྒྲུབ་བཞིན་པ་ཤ་སྟག་ལས་དོན་མེད་འཁྱམ་ཉུལ་བྱེད་མཁན་ཧ་ལམ་མེད་ལ། ཁྱེད་ཚོ་ཡིན་ནའང་ཕྱི་རབས་པར་མིག་དཔེ་བཟང་པོ་ཞིག་སྟོན་དགོས་པ་རེད་ཅེས་གསུངས།

གསར་འགོད་པས་མཐོ་སློབ་ཀྱི་ལས་འཆར་འགན་འཛིན་རྒན་ལྷ་མོ་སྐྱིད་པ་ལགས་སུ་ད་ལོའི་མཛད་སྒོ་སྔོན་དང་མི་འདྲ་བར་སྟབས་བདེ་བཟོ་དགོས་དོན་ཅི་ཡིན་དྲིས་པར་ཁོང་གིས།  ནམ་རྒྱུན་མཐོ་སློབ་ལག་འཁྱེར་དེ་ནོར་གླིང་མཛད་སྒོ་དང་སྟབས་བསྟུན་ནས་སྤྲོད་ཀྱི་ཡོད་མོད། ད་ལོར་བོད་དུ་ས་ཡོམ་བརྒྱབ་སྟེ་མི་མང་པོ་ཞིག་འདས་གྲོངས་སུ་སོང་ཡོད་དུས་མཛད་སྒོར་དེ་གྲ་རྒྱས་པོ་ཞིག་མི་བྱེད་རྒྱུར་ཐག་གཅོད་བྱས་པ་ཡིན་ཞེས་བརྗོད་སོང་།
གསར་འགོད་པས་སློབ་མ་བསྟན་འཛིན་རབ་བསྟན་ལགས་སུ་ལ་དྭགས་ཟངས་དཀར་དུ་འགྲོ་དོན་སྐོར་ཅི་ཡིན་དྲིས་སྐབས་ཁོང་གིས། ང་ཚོར་ཆབ་སྲིད་ཀྱི་དཀའ་ངལ་ཡོད་པ་རེད་དེ། རང་ཉིད་བོད་ཀྱི་རིག་གཞུང་སྦྱང་མཁན་ཞིག་ཡིན་པའི་ཆ་ནས་༧གོང་ས་མཆོག་གི་དགོངས་དོན་བཞིན་དེ་གར་བོད་ཀྱི་སྐད་ཡིག་བསླབ་ཐུབ་ན་བསྐལ་བ་བཟང་པོ་རེད་བསམ་གྱི་ཡོད། ལྷག་པར་དུ་དེ་གའི་དགོན་པ་ཁག་དང་ཡུལ་མིས་བོད་ཡིག་འབྲི་ཀློག་ཐུབ་སོང་ན་༧གོང་ས་མཆོག་གི་བཀའ་སློབ་གསན་རྒྱུར་ཡང་དཀའ་ངལ་ཡོད་མ་རེད་ཟེར། དེང་ཕྱིན་ཡུལ་དེར་དུས་ཡུན་ཅི་ཙམ་རིང་ཞབས་ཞུ་རྒྱུ་ཡིན་མིན་སྐོར་དྲིས་སྐབས་ཁོང་གིས། རང་གི་འཇོན་ཚོད་དཔག་ཚོད་ཀྱིས་ད་དུང་ལོ་དུ་མ་ཞིག་ལ་དགེ་རྒན་བྱ་འདོད་ཡོད་ཅེས་བརྗོད་སོང་།

ནོར་གླིང་མཐོ་སློབ་ནི་ནོར་གླིང་བོད་ཀྱི་རིག་གཞུང་གཅེས་སྐྱོང་གི་ཡན་ལག་སྡེ་ཚན་ཞིག་ཡིན་ལ། དེ་ནི་ཕྱི་ལོ་ ༡༩༩༧ ལོར་༧གོང་ས་མཆོག་གི་ལམ་སྟོན་འོག་གསར་འཛུགས་གནང་བ་ཞིག་ཡིན། མཐོ་སློབ་འདིར་ད་ལྟའི་བར་སློབ་མ་གྲངས་ ༢༠༠ ཙམ་སློབ་མཐར་ཕྱིན་ཡོད་ལ། སློབ་ཕྲུག་དེ་དག་གིས་ད་ལྟ་བོད་ཀྱི་སྤྱི་ཚོགས་ལས་རིགས་ཁག་ཏུ་ཕྱག་ལས་གནང་བཞིན་ཡོད།

ད་ལོར་མཐོ་སློབ་འདིར་སློབ་མ་གྲངས་ ༡༤ སློབ་མཐར་ཕྱིན་ཡོད་འདུག
 
གསར་འགོད་པ། དཔལ་ལྡན་རྒྱ་མཚོ།