མི་ཆིག་འབུམ་གྱིས་བཀའ་ཁྲིའི་ཚོད་ལྟའི་འོས་ལྡུག་གི་རེད།

ངྷ་ས་དབུས་བུད་མེད་ལྷན་ཚོགས་ཀྱི་གོ་སྒྲིག་འོག ༧གོང་ས་མཆོག་གི་སྐུའི་འཁྲུངས་སྐར་ཉིན་བཙན་བྱོལ་གྱི་ས་གནས་ཁག་ཏུ་འབྱུང་འགྱུར་གྱི་བཀའ་བློན་ཁྲི་པའི་སྐོར་ལ་ཚོད་ལྟའི་འོས་བསྡུ་བྱ་རྒྱུ་རེད་ལ། མི་ཆིག་འབུམ་གྱིས་ཚོད་ལྟའི་འོས་བསྡུ་འདིར་ཆ་ཤས་ལེན་རྒྱུར་རེ་བ་རྒྱག་གིན་ཡོད་འདུག

དེ་རིང་ཕྱི་ཚེས་ ༢༡ ཉིན་གྱི་ཞོགས་པའི་ཆུ་ཚོད་ ༩ དང་སྐར་མ་ ༣༠ སྟེང་ངྷ་སྟེང་བོད་ཁྱིམ་གྱི་ཞི་བདེ་གླེང་མོལ་ཁང་དུ། བོད་ཀྱི་དབུས་བུད་མེད་ལྷན་ཚོགས་ཀྱི་གོ་སྒྲིག་འོག ཕྱི་ལོ་ ༢༠༡༡ ལོའི་བཀའ་བློན་ཁྲི་པའི་ཚོད་ལྟའི་འོས་བསྡུ་བྱེད་ཕྱོགས་སྐོར་ལ་ཉིན་གཉིས་རིང་གི་ཟབ་སྦྱོང་ཞིག་སྤྲོད་ཀྱིན་པའི་དངོས་གཞིའི་མཛད་སྒོ་འཚོགས་སོང་ལ། མཛད་སྒོའི་སྐུ་མགྲོན་དུ་ངྷ་ས་བདེ་དོན་ཚེ་རིང་ཕུན་ཚོགས་དང་ངྷ་ས་དབུས་འོས་བསྡུ་ལྷན་ཁང་གི་འགན་འཛིན་འཇམ་དཔལ་ཆོས་བཟང་། བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་ཀིརྟི་སྒྲོལ་དཀར་ལྷ་མོ་བཅས་ཕེབས་ཡོད།

ཐེངས་འདིར་དབུས་བུད་མེད་ལྷན་ཚོགས་ཀྱིས་གོ་སྒྲིག་གནང་བའི་ཉིན་གཉིས་རིང་གི་ཟབ་སྦྱོང་སྟེང་དུ། རྒྱ་གར་དང་བལ་ཡུལ་ཚུད་པའི་ས་གནས་ཁག་ ༣༠ ཙམ་གྱི་ཚོགས་བཅར་བ་ ༦༥ མཉམ་བཞུགས་གནང་ཡོད་པ་དང་། ཉིན་གཉིས་ཀྱི་སྦྱོང་བརྡར་ལས་གཞིའི་ནང་དོན་གཙོ་བོ་ས་གནས་ཁག་ནས་ཕེབས་པའི་རྒྱུན་ལས་འདི་དག ཕྱིར་རང་རང་གི་ས་གནས་ཁག་ཏུ་སོང་ནས་ཚོད་ལྟའི་འོས་བསྡུ་དེར་ལམ་སྟོན་ཇི་ལྟར་བྱེད་དགོས་མིན་གྱི་ཆེད་དུ་ཡིན་འདུག

ཟླ་རྗེས་མའི་ཕྱི་ཚེས་ ༦ ཉིན་ཏེ་༧གོང་ས་མཆོག་དགུང་ལོ་ ༧༥ ཕེབས་པའི་སྐུའི་འཁྲུངས་སྐར་ཉིན་དབུས་ས་གཉིས་ཀྱི་བུད་མེད་ཚོགས་པའི་ཡན་ལག་ ༤༠ ནང་བཀའ་ཁྲིའི་ཚོད་ལྟའི་འོས་བསྡུའི་ལས་གཞི་དངོས་སུ་མགོ་འཛུགས་རྒྱུ་ཡིན་པ་དང་། བུད་མེད་ཚོགས་པས་སྔོན་དཔག་ལྟར་ན། མི་ཆིག་འབུམ་ལྷག་གིས་འོས་བསྡུའི་ཚོད་ལྟ་འདིར་མཉམ་ཞུགས་བྱ་རྒྱུར་རེ་བ་རྒྱག་གིན་ཡོད་འདུག
བུད་མེད་ལྷན་ཚོགས་ཀྱིས་བཀའ་བློན་ཁྲི་པའི་ཚོད་ལྟའི་འོས་འདེམས་ཀྱི་བརྒྱུད་རིམ་དེ་དག་ཕྱོགས་ལྷུང་དུ་མི་འགྲོ་བའི་ཆེད་དུ། འོས་མི་དམིགས་འཛུགས་བྱེད་ཀྱི་མིན་ལ་ཟུར་འདོན་ཡང་བྱ་རྒྱུ་མིན། གཙོ་བོ་འོས་འཕེན་པས་རང་མོས་ལྟར་འོས་ཤོག་ལྡུག་གི་རེད་ཅེས་དང་། བུད་མེད་ཀྱི་འགན་ལྷན་ཐེངས་ ༡༠ ༼ ཟླ་ ༧ ཚེས་ ༡༦ ནས་ ༢༢ བར་ ༽ སྐབས་ས་གནས་སོ་སོར་འོས་ཤོག་ཕྱི་གསལ་ནང་གསལ་ཐོག་གྲངས་བཤེར་བྱ་རྒྱུ་ཡིན་ཟེར།

ཉིན་དེར་ངྷ་ས་དབུས་འོས་བསྡུ་ལྷན་ཁང་གི་འགན་འཛིན་འཇམ་དཔལ་ཆོས་བཟང་ལགས་ཀྱིས། མ་འོངས་པར་བཀའ་བློན་ཁྲི་པར་སུ་ཕེབས་ཀྱིན་ཡོད་ནའང་། མཁྱེན་ཡོན་གྱི་ཐད་ནས་མཁས་དབང་ཟམ་གདོང་རིན་པོ་ཆེ་ཁོང་ལས་འགྲན་ཟླ་བྲལ་བ་ཧ་ལམ་མེད། བཀའ་ཁྲི་སྐབས་གཉིས་ལ་གནང་མྱོང་བའི་མཁས་དབང་ཟམ་གདོང་རིན་པོ་ཆེར་མཚོན་ན་ནང་ཆོས་དང་དེང་དུས་ཀྱི་འགྲོ་སྟངས། རྒྱ་གར་སྐད་དང་ལེགས་སྦྱར་སྐད། དབྱིན་སྐད་སོགས་མཁྱེན་གི་ཡོད་པས་མང་གཙོའི་འགྲོ་སྟངས་ལྟར། མི་མང་ནང་བཀའ་བློན་ཁྲི་པ་སྐབས་གསུམ་རིང་བཞུགས་རྒྱུར་བཅའ་ཁྲིམས་དང་སྒྲིག་གཞིར་བསྒྱུར་བ་གཏོང་དགོས་ཀྱི་འདུག་ཟེར་མཁན་ཡོད།

འོན་ཀྱང་། བོད་ཀྱི་སྤྱི་ཚོགས་ཆུང་ཆུང་འདི་ཙམ་མིན་པར་རྒྱ་ཆེ་སར་བསམ་བློ་བཏང་སྟེ་དམིགས་རྒྱང་རིང་དུ་གཏོང་དགོས་པ་གལ་ཆེན་པོ་རེད། འཛམ་གླིང་གི་མང་གཙོའི་འགྲོ་སྟངས་ལ་བལྟས་ན་ཨ་རི་དཔེ་འཇོག་ས་ཆགས་ཡོད་མོད། ཨ་རིས་ཀྱང་ཨ་རིའི་སྲིད་འཛིན་ལ་བསྟུད་མར་ཐེངས་གཉིས་ལྷག་འདེམས་ཆོག་གི་མེད། དེ་ནི་རྩ་ཁྲིམས་དང་སྒྲིག་གཞི་ལས་བརྒལ་གྱིན་ཡོད་སྟབས་ཡིན། རྒྱུ་མཚན་ནི་མི་གཅིག་གིས་རང་གི་ནུས་པ་དང་ཤེས་འཇོན་དེ་ལོ་བཅུའི་ནང་དུ་འདོན་མ་ཐུབ་པ་མེད་པས་རེད་ཅེས་གསུངས།

ཁོང་གིས་བཀའ་བློན་ཁྲི་པ་ལས་ཀྱང་གལ་ཆེ་ཤོས་ནི་བོད་མི་མང་སྤྱི་འཐུས་རེད་ལ། བཀའ་བློན་ཁྲི་པ་དང་༧གོང་ས་མཆོག་རྣམ་གཉིས་ཀྱིས་གསང་རྒྱ་དམ་པོ་མཛད་དགོས་རིགས་ཡིན་ཚེ་གནས་ཚུལ་ཐ་དད་ཡིན་པ་མ་གཏོགས། བཀའ་བློན་ཁྲི་པར་སུ་ཕེབས་པ་དང་། ཁོས་བོད་གཞིས་བྱེས་གཉིས་ཀྱི་ཆེད་དུ་བཏོན་པའི་སྲིད་ཇུས་གང་འདྲ་ཞིག་ཡིན་རུང་། བོད་མི་མང་སྤྱི་འཐུས་བརྒྱུད་ནས་འགྲོ་དགོས། དེར་བརྟེན་བོད་མི་མང་སྤྱི་འཐུས་ནང་ཤེས་འཇོན་ཅན་དང་ཆོལ་ཁ་དང་ཆོས་ལུགས་ཀྱི་ཞེན་ཁོག་མེད་མཁན། ངེས་པ་དོན་གྱིས་བོད་སྤྱིའི་དོན་དུ་དགོངས་པ་བཞེས་ཐུབ་མཁན་ཞིག་དགོས་པ་གལ་ཆེན་པོ་རེད་ཅེས། སྐབས་གསུམ་པའི་བཀའ་བློན་ཁྲི་པ་གལ་ཆེར་བརྩི་བ་ལྟར་སྐབས་བཅོ་ལྔ་བའི་བོད་མི་མང་སྤྱི་འཐུས་ཀྱང་དེ་མཚུངས་ཀྱིས་གལ་ཆེན་དུ་གྱུར་ཡོད་སྐོར་གསུངས་ཡོད།

ཉིན་དེར་འདི་གའི་གསར་འགོད་པས་ས་གནས་ཁག་ནས་ཕེབས་པའི་བུད་མེད་གསུམ་ལ། ཁོང་ཚོ་རང་སྟེང་ནས་མ་འོངས་པའི་བཀའ་བློན་ཁྲི་པའི་འོས་ལྡུག་རྒྱུར་གལ་གནད་ཇི་མཐོང་གི་སྐོར་དྲིས་པར། བལ་ཡུལ་ནས་ཕེབས་པའི་བསོད་ནམས་མཚོ་མོ་ལགས་ཀྱིས། མ་འོངས་པའི་བཀའ་བློན་ཁྲི་པ་ནི་ད་ལྟའི་བོད་ཛ་དྲག་གི་གནས་སྐབས་འདིར། ༧གོང་ས་མཆོག་གི་དབུ་འོག་དཔུང་འདེགས་ཀྱི་ལས་འགན་བསྒྲུབ་མཁན་ཞིག་སླེབས་དགོས་དུས། འོས་ལྡུག་སྐབས་འོས་མི་མ་ནོར་བ་ཞིག་གདམ་རྒྱུ་གལ་ཆེན་དུ་མཐོང་གི་ཡོད་ཅེས་དང་། བྷན་ཏ་ར་གཞིས་ཆགས་ནས་ཕེབས་པའི་ལྷ་མོ་ནོར་འཛོམས་ལགས་ཀྱིས། མ་འོངས་པའི་བཀའ་བློན་ཁྲི་པ་གདམ་ཕྱོགས་སྐོར་ལ་སྒེར་ངོས་ནས་སེམས་ཁྲལ་ཆེན་པོ་འདུག ནམ་རྒྱུན་ང་ཚོ་ནང་ཁུལ་འཛོམས་སྐབས་ཀྱང་མ་འོངས་པའི་བཀའ་བློན་ཁྲི་པར་སུ་འོས་མིན་གྱི་སྐད་ཆ་བཤད་རེས་བྱེད་ཀྱིན་ཡོད། སྤྱིར་དེ་རིང་འོས་བསྡུའི་འགན་འཛིན་གྱིས་གསུངས་པ་ལྟར། མཁྱེན་ཡོན་གྱི་ཐད་ནས་བཀའ་བློན་ཁྲི་པ་ཟམ་གདོང་རིན་པོ་ཆེ་ལྟ་བུ་ཞིག་ཡོང་མི་སྲིད་ཀྱང་། གཙོ་བོ་ལྷག་བསམ་རྣམ་དག་གིས་བོད་སྤྱི་པའི་རྩ་དོན་ཆེད་དུ་ཕྱག་ལས་གནང་མཁན་ཞིག་དང་། ༧གོང་ས་མཆོག་གི་བཀའ་དགོངས་ཇི་བཞིན་བསྒྲུབས་མཁན་ཞིག་དགོས་ཀྱི་འདུག་ཅེས་གསུངས།

སྒང་ཏོག་ནས་ཕེབས་པའི་ཨམ་ལྕི་གཡང་སྒྲོན་ལགས་ཀྱིས་ང་རང་སྒེར་ནས་མ་འོངས་པའི་བཀའ་བློན་ཁྲི་པའི་འོས་ལྡུག་རྒྱུར་ཧ་ཅང་གལ་ཆེན་དུ་མཐོང་གི་འདུག ༢༠༠༠ ལོ་ནས་བཀའ་བློན་ཁྲི་པ་མི་མང་རང་གིས་ཐད་ཀར་འོས་འདེམས་བྱེད་དགོས་དུས། མི་མང་ཁག་ཅིག་གིས་མི་སུ་འདེམས་དགོས་ཤེས་རྟོགས་ཐུབ་ཀྱི་མེད། ཡང་ཁག་ཅིག་གིས་དེའི་གལ་གནད་ཤེས་ནའང་དོ་སྣང་མ་བྱེད་པ་དང་། རེ་ཟུང་གིས་གནས་ལུགས་རྒྱུ་མཚན་ཤེས་བཞིན་དུ་ཕྱོགས་ཞེན་གྱི་དབང་དུ་སོང་བ་ལྟ་བུ་ཡོང་གི་འདུག དེར་བརྟེན་ཐེངས་འདིའི་ཟབ་སྦྱོང་གི་དགོངས་དོན་རྣམས་ཕར་ས་གནས་སུ་འབྱོར་མཚམས། མི་མང་ལ་གསལ་འགྲེལ་བྱས་ཚེ་ཏན་ཏན་ཕན་ཐོགས་ཡོང་གི་རེད་བསམ་གྱིན་འདུག་ཅེས་གསུངས།

ཁོང་ཚོ་གསུམ་པོས་མ་འོངས་པའི་བཀའ་ཁྲིར་མི་སུ་འདྲ་ཞིག་སླེབས་རུང་། ༧གོང་ས་མཆོག་གི་བཀའ་དགོངས་བཞིན་ཁོང་ལ་དབུ་འོག་དཔུང་འདེགས་བྱེད་ཐུབ་མཁན་ཞིག་ལ་རེ་བ་བརྒྱབ་འདུག

དབུས་བུད་མེད་ཀྱིས་ཟླ་ ༧ ཚེས་ ༦ ཉིན་གྱི་ཚོད་ལྟའི་འོས་བསྡུ་བྱས་རྗེས། དེའི་ནང་མི་མང་ཅི་ཙམ་གྱིས་མཉམ་ཞུགས་བྱས་མིན་ཐད་སྙན་ཐོ་འདོན་རྒྱུ་དང་། སྙན་ཐོའི་ནང་གཙོ་བོ་ཚོད་ལྟའི་འོས་བསྡུའི་སྐབས་བཀའ་བློན་ཁྲི་པའི་འོས་མི་སུ་སུ་ཡིན་མིན་གྱི་མིང་གཞུང་ཡང་གསལ་འདོན་བྱ་རྒྱུ་ཡིན་ཞེས་དང་། གསར་དུ་བདམས་པའི་འོས་མི་རྣམས་ལ་བགྲོ་གླེང་གཏམ་བཤད་ཀྱི་གོ་སྐབས་ཤིག་ཀྱང་བསྐྲུན་རྒྱུ་ཡིན་ཟེར།

གསར་འགོད་པ། ཨ་རིག་འགྱུར་མེད།