ལི་ཕིན་གྱི་ཉིན་ཐོའི་དཔེ་དེབ་དེ་སྤྱིར་ཡིན་ན་དེ་རིང་འགྲེམ་སྤེལ་བྱ་རྩིས་བྱས་ཡོད་ཀྱང་། རྒྱུ་རྐྱེན་སྣ་ཚོགས་ཀྱི་དབང་གིས་དཔེ་སྐྲུན་ཁང་དེས་འགྲེམ་སྤེལ་བྱ་རྒྱུ་མིན་པའི་ཐག་གཅོད་བྱས་ཡོད་འདུག
ཧོང་ཀོང་གི་དུས་རབས་གསར་པའི་དཔེ་སྐྲུན་ཁང་ཞེས་པ་དེས་ཕྱི་ཚེས་ ༡༨ ཉིན་གློ་བུར་དུ་ལི་ཕིན་གྱི་དཔེ་དེབ་དེ་འགྲེམ་སྤེལ་བྱ་རྒྱུ་མིན་པའི་ཐག་གཅོད་བྱས་པ་དེས་མང་པོ་ཞིག་ཧང་སང་བར་བྱས་ཡོད་པ་དང་། ཐག་གཅོད་དེའི་ནང་དུ་རྒྱ་ནག་གཞུང་གི་དབང་ཤུགས་ཅི་ཙམ་ཞིག་བསླེབས་ཡོད་པའི་ཐོག་དོགས་ཟོན་བྱེད་ཀྱིན་ཡོད་པ་རེད།
ལི་ཕིན་གྱིས་གནམ་བདེ་སྒོ་མོ་ཆེའི་དྲུག་བཞིའི་དོན་རྐྱེན་སྐོར་བྲིས་པའི་ཉིན་ཐོ་ཕྱོགས་བསྡུས་ཀྱི་དེབ་དེ་ཉེ་ཆར་ཧོང་ཀོང་གི་དུས་རབས་གསར་པའི་དཔེ་སྐྲུན་ཁང་གིས་འགྲེམ་སྤེལ་བྱ་རྒྱུ་ཐག་གཅོད་བྱས་ཡོད་ལ། འཆར་གཞི་ལྟར་ན་དེ་རིང་ཕྱི་ཚེས་ ༢༢ ཉིན་འགྲེམ་འཚོང་ཐོག་མ་བྱ་འཆར་ཡོད་པ་རེད། ད་ཆ་དེབ་དེ་འགྲེམ་སྤེལ་བྱ་རྒྱུ་མིན་པའི་ཐག་གཅོད་བྱས་ཡོད་ལ། དཔེ་སྐྲུན་ཁང་དེའི་འགན་འཛིན་པའོ་ཕུ་ཞེས་པས་ཁོང་ལ་དེབ་དེ་འགྲེམ་སྤེལ་བྱ་རྒྱུར་ལི་ཕིན་གྱི་ཆོག་མཆན་ཐོབ་མ་བྱུང་ཞེས་བཤད་ཡོད་པ་རེད།
ཕྱི་ཚེས་ ༢༡ ཉིན་པའོ་ཕུ་ཡིས་རྒྱ་ནག་གི་དུས་ཐོག་གསར་སྤེལ་ཞེས་པའི་དྲི་བར་ལན་འདེབས་བྱས་དོན། འདས་པའི་བདུན་ཕྲག་འགའ་ཤས་རིང་ཁོ་རང་དེབ་དེ་འགྲེམ་སྤེལ་བྱ་ཕྱོགས་ཐད་རྒྱ་ནག་སྐམ་ས་ཆེན་མོའི་དཔོན་རིགས་ཚོའི་མཉམ་དུ་སྐད་ཆ་མང་པོ་བྱུང་ཞེས་བཤད་ཡོད་པ་རེད། ཡིན་ཡང་། དཔེ་དེབ་འགྲེམ་སྤེལ་མ་བྱས་པའི་རྒྱུ་མཚན་ལྟེ་བ་ནི་དཔར་དབང་གི་གནད་དོན་ཡིན་ལ། དེ་མ་ཡིན་པའི་རྒྱུ་མཚན་ཡང་གང་འཚམ་ཞིག་ཡོད་ཅེས་བཤད་འདུག ཁོས་བཤད་དོན། ངས་དཔེ་དེབ་དེ་འགྲེམ་སྤེལ་བྱ་མ་ཐུབ་པའི་རྒྱུ་མཚན་གཙོ་བོ་ནི་དཔར་དབང་གི་ཕྱོགས་ནས་རེད། འདི་ཧོང་ཀོང་གི་ཁྲིམས་རེད། རྒྱུ་མཚན་འདི་གཅིག་པུར་ཐུག་པ་ཡང་མ་རེད། ཁྱོད་ཚོས་ངའི་ངོས་ནས་དེབ་འདི་ཐོག་མར་ག་རེ་བྱས་ནས་འདོན་རྩིས་བྱས་པར་གོ་རྟོགས་ཐུབ་པ་ཡིན་ན། ངས་འདི་འགྲེམ་སྤེལ་མཚམས་འཇོག་བྱས་པའི་རྒྱུ་མཚན་ཡང་ཤེས་གི་རེད་ཅེས་བཤད་འདུག
གསར་འགྱུར་སྤེལ་མཁན། ལུང་རིགས་རྒྱལ།
ལི་ཕིན་གྱི་གནམ་བདེ་སྒོ་མོ་ཆེའི་དྲུག་བཞིའི་དོན་རྐྱེན་སྐོར་གྱི་ཟིན་ཐོ་སྙིང་པ་ཞིག་སྔོན་ཆད་སྤེལ་མྱོང་བ་དང་། འོན་ཀྱང་དེ་འདྲའི་གནད་འགག་ཅན་གྱི་ཟིན་ཐོ་གཅིག་ཡིན་པ་བདག་གིས་མཐོང་མ་སོང་། ཡིན་ཡང་ངའི་སློབ་གྲོགས་ཁ་ཤས་ཤིག་གིས་ཀྱང་ཟིན་ཐོ་དེ་མཐོང་མྱོང་བ་དང་། དེབ་དེའི་རྒྱབ་ཤོག་དཀར་པོ་དཀར་རྐྱང་ཡིན་པ་དང་། མདུན་ཤོག་གི་ངོ་ལ་ཡིག་འབྲུ་གཅིག་ཀྱང་མེད་པའི་དེབ་ཞིག་ཡིན། སྔོན་ཆད་ཕྲན་རྒྱ་ནག་གི་བཙོན་ཁང་དུ་ལོ་ངོ་གསུམ་བཀག་མྱོང་བ་དང་དེ་དུས་སུ་བཙོན་སྲུང་ཉེན་རྟོགས་མི་སྣ་ཚོས་ཡང་དེབ་དེ་བལྟ་བཞིན་འདུག དེ་འདྲའི་གནད་འགག་ཅན་གྱི་དེབ་ཞིག་མིན་པ་མ་ཟད། བོད་རྒྱའི་དཀའ་རྙོག་དང་རྒྱལ་སྤྱིའི་སྤྱི་ཚོགས་ཁྲོད་དེ་ལས་ཀྱང་དགོས་མཁོ་ཅན་དང་སྤྲོ་བ་ཅན་གྱི་དེབ་ཞིག་མིན་བསམ་སོང་། ཡིན་ཡང་ངས་མཐོང་བའི་དེབ་དེ་དང་ད་ལྟའི་འགྲེམས་སྤེལ་མ་བྱས་པ་དེ་གཉིས་ལ་ཁྱད་པར་ཡོད་མེད་གསལ་བོ་མི་ཤེས།
བློ་ཕམ་ཚད་མེད་བསྐྱེད་བྱུང༌། ང་ཚོད་རྩོད་མི་དགོས་པ་ཤ་སྟག་བརྩད་པ་ལས་དོན་དངོས་ཐོག་གནད་འགག་ཅན་གྱི་བྱ་བ་མང་པོ་མཐུད་ཤོར་འགྲོ་གི་འདུག
ལི་ཕིང་གི་ཉིན་ཐོའི་དཔེ་དེབ་དེ་སྤྱི་ཚོགས་ཐོག་ཡོངས་བསྒྲགས་ཟིན་པར་བརྟེན་ཉིན་གཅིག་ཏན་ཏན་འགྲེམ་སྤེལ་བྱེད་ཐུབ་པའི་རེ་བ་ཡོད།