ཕྱི་ཚེས་ ༡༥ ཉིན་ཅིས་ནན་མེན་ཧའོ་སློབ་འབྲིང་གི་སྒོ་ཁར་སློབ་མ་དམར་གསོད་ཀྱི་བྱ་སྤྱོད་སྤེལ་དེ་སློབ་མ་ ༡༡ ལ་ཚད་མི་འདྲ་བའི་རྨས་སྐྱོན་ཕོགས་འདུག དེའི་ཁྲོད་མིང་ལ་མཱ་ཆང་ཟེར་བའི་ལོ་ ༡༥ ཅན་གྱི་འཛིན་གྲྭ་བརྒྱད་པའི་སློབ་མ་ཞིག་ལ་རྨས་ལྕི་མོ་ཕོགས་ཡོད་པ་དང་། ད་ལྟ་ཁོ་ཧྲན་ཏ་སྨན་ཁང་གཉིས་པ་ནས་ཅི་ནན་དམག་ཁུལ་གྱི་མཁའ་དམག་ཨང་ ༤༥༦ པའི་སྨན་ཁང་དུ་བསྐྱལ་ཏེ་མྱུར་སྐྱོབ་བྱུང་ཡོད་ནའང་། ད་དུང་ཁོའི་རྐང་ལག་ཞ་འཁུམ་དུ་འགྲོ་རྒྱུའི་ཉེན་ཁ་ལྷག་ཡོད་འདུག སློབ་གྲྭ་དེ་གའི་སློབ་མ་ཞིག་གིས་དོན་རྐྱེན་དེའི་སྐོར་གསར་ལམ་ཁག་ཏུ་འགྲེལ་བརྗོད་བྱས་དོན། ཉིན་གུང་གི་སློབ་ཐུན་བར་གསེང་ངལ་གསོའི་སྐབས་སུ་འཛིན་རིམ་བརྒྱད་པའི་སློབ་མ་ ༡༡ ལ་འཛིན་རིམ་གཅིག་པ་ཡིན་པའི་ཞའོ་ཝེ་ཟེར་བའི་སློབ་མ་ཞིག་གིས་བརྡ་བཏང་བ་ལྟར་ཁོ་ཚོ་སློབ་གྲྭའི་སྒོ་ཁར་བུད་དེ་གོམ་པ་ཉི་ཤུ་ཙམ་བརྒལ་མ་ཐག གློ་བུར་དུ་ཆ་རྒྱུས་མེད་པའི་མི་དར་མ་ ༢༠ ཙམ་གྱིས་སློབ་མ་རྣམས་བསྐོར་ཏེ་གྲི་དང་རྒྱུགས་པ་སོགས་ཀྱིས་གང་བྱུང་རུབ་རྡུང་བྱས་ཡོད་པ་རེད།
ད་ལྟ་མྱུར་སྐྱོབ་བྱ་བཞིན་པའི་མཱ་ཆང་གི་ཨ་མས་གསར་འགོད་པར་བཤད་རྒྱུར། བྱིས་པའི་གཟུགས་གཞི་བདེ་ཐང་འབྱུང་མིན་དང་། མ་འོངས་པར་ཁོའི་སེམས་ཁམས་ལ་ཤུགས་རྐྱེན་འབྱུང་མིན་ཐད་སེམས་ཁུར་ཆེན་པོ་འདུག ངའི་རེ་བར་རང་ཉིད་ཀྱི་ཕྲུ་གུའི་སྟེང་བྱུང་བའི་ཡིད་སྐྱོ་བའི་གནས་ཚུལ་འདིའི་རིགས། རྗེས་ཕྱོགས་ཡང་བསྐྱར་ཕྲུ་གུ་གཞན་པའི་སྟེང་མི་འབྱུང་བའི་རེ་སྐུལ་ཞུ་གི་ཡོད་ཞེས་བརྗོད་ཡོད་པ་རེད།
རྒྱ་ནག་གཞུང་གིས་ལྷོ་ཆུ་བྱང་འདྲེན་གྱི་ལས་འཆར་འདྲ་མིན་མང་པོ་ཞིག་གཏོང་བཞིན་ཡོད་པའི་ཁྲོད་ནས། ཧི་ནན་ཞིང་ཁུལ་གྱི་ལྷོ་ཆུ་བྱང་འདྲེན་གྱི་དབུས་ཐིག་ལས་གཞི་ད་ལྟ་སྒྲུབ་མགོ་བརྩམས་ཡོད་འདུག
ལས་གཞི་དེའི་ཆུའི་མགོ་ཁུངས་གཙོ་བོ་ནི་ཧི་ནན་ཞིང་ཆེན་ཞི་ཁྲོན་རྫོང་ཡིན་པ་དང་། ལས་འཆར་ཁྲོད་ཁུལ་དེའི་མི་གྲངས་ ༡༦༢༠༠༠ ལྷག་གནས་སྤོར་བྱ་འཆར་ཡོད་འདུག ཁུལ་དེའི་ཞིང་གྲོང་ ༡༠ ལྷག་གི་མི་གྲངས་ ༦༤༩༠༠ ལྷག་གནས་སྤོར་གྱི་ལས་གཞི་ཐེངས་དང་པོ་དེ་ཕྱི་ཚེས་ ༡༧ ཉིན་ནས་མགོ་བཙུགས་ཡོད་པ་དང་། མི་འགྱངས་པའི་ཟླ་གསུམ་གྱི་རིང་གནས་སྤོ་མཇུག་སྒྲིལ་རྒྱུ་ཡིན་འདུག རྫོང་འདིར་ས་ཁྱོན་མུའུ་ཁྲི་ ༢༣ དང་། ས་གནས་གྲོང་རྡལ་ ༣ ། བཟོ་གྲྭ་ ༣༦ ལྷག་ཡོད། ལྷོ་ཆུ་བྱང་འདྲེན་གྱི་དབུས་ཐིག་ལས་གཞི་དེ་ནི་ཏཱན་གཙང་པོའི་ཆུ་མཛོད་ཀྱི་ཁ་བསྒྱུར་ཏེ་པེ་ཅིན་དང་ཐེན་ཅིན་བཅས་སུ་འབབ་རྒྱུན་སྤྱི་ལེ་ ༡༢༧༧ རིང་ཚད་དུ་འདྲེན་རྒྱུ་ཡིན་པ་དང་། ལས་གཞི་དེའི་རྐྱེན་པས་ཧི་ནན་དང་ཧུ་པེ་ཞིང་ཆེན་གཉིས་ནས་བསྡོམས་པའི་མི་གྲངས་ ༣༣༠༠༠༠ ལྷག་གནས་སྤོ་བྱ་དགོས་བྱུང་ཡོད།
ཆུ་བེད་ཆེད་མཁས་པ་ཝང་ཝེ་ལོའུ་ཡིས་བརྗོད་རྒྱུར། ལྷོ་ཆུ་བྱང་འདྲེན་དང་ལྷག་པར་དུ་དབུས་ཐིག་ལས་གཞི་དེ་ནི་ལྷོ་ཆུ་བྱང་དུ་འདྲེན་པའི་ལམ་ཐིག་གཙོ་བོ་ཞིག་རེད། རྒྱ་ནག་གི་རང་བྱུང་ཆུ་བོ་ཕལ་ཆེ་བ་ཤར་ནས་ནུབ་ཏུ་འབབ་ཀྱིན་ཡོད། ཆུ་འདྲེན་ལམ་ཐིག་འདིས་ཆུ་ཕྲན་ ༧༠༠ ལྷག་འཕྲེད་གཅོད་བྱ་རྒྱུ་ཡིན་པ་དང་། རང་བྱུང་ཁོར་ཡུག་གི་གནས་བབས་ལ་ཤུགས་རྐྱེན་ཆེན་པོ་ཐེབས་ངེས། རང་བྱུང་ཆོས་ཉིད་དང་འགལ་བའི་བསྒྱུར་བཀོལ་འདིས་རིགས་ཀྱིས་མ་འོངས་པར་བྱེ་འགྱུར་ཐན་སྐྱོན་སོགས་བློ་ཡིད་ལ་མི་ཤོངས་པའི་གནོད་འཚེ་བྱུང་སྲིད་པ་རེད་ཟེར།
ཤིན་ཅང་དུ་ ༧་༥ ངོ་རྒོལ་ཡར་ལངས་ཀྱི་དུས་དྲན་སླེབས་ལ་ཉེ་བའི་སྐབས་འདིར། རྒྱ་ནག་གཞུང་གིས་ཕྱོགས་ཡོངས་ནས་དམ་དྲག་བྱེད་མགོ་ཚུགས་ཡོད་འདུག ཉེ་བའི་གཟའ་འཁོར་ནས་བཟུང་ཝུ་རུ་མུའུ་ཆི་གཙོས་པའི་ཤིན་ཅང་གི་ས་ཁུལ་སོ་སོར་ཆུ་ཚོད་ ༢༤ རིང་དམ་དྲག་ལྟ་རྟོག་གི་ལས་འགུལ་མགོ་ཚུགས་ཡོད་པ་དང་། དམ་དྲག་ལས་གཞི་དེ་ཕྱི་ཟླ་ ༧ པའི་ཚེས་ ༢༠ བར་སྤེལ་རྒྱུ་ཡིན་པར་མ་ཟད། ཟླ་འདིའི་ཚེས་ ༢༥ ཉིན་ནས་བཟུང་ཝུ་རུ་མུའུ་ཆི་གྲོར་ཁྱེར་དུ་དྲག་ཆས་ཉེན་རྟོག་པ་ ༡༠༠༠ ལྷག་ཁ་སྣོན་བྱེད་རྒྱུ་ཡིན་འདུག ད་ལྟ་ཤིན་ཅང་ས་ཁུལ་གྱི་གྲོང་ཁྱེར་སོ་སོའི་མི་མང་འདུ་འཛོམས་བྱ་སའི་གནད་ཡོད་ས་ཚུགས་ཁག་ཏུ་སྐོར་གཡེང་བྱེད་མཁན་གྱི་དྲག་ཆས་ཉེན་རྟོག་པས་ཁེངས་ཡོད་པར་མ་ཟད། གཞུང་འབྲེལ་ལས་ཁུངས་སོ་སོའི་ལས་བྱེད་རྣམས་ཀྱང་རྩ་འཛུགས་བྱས་ཏེ་སྲང་གྲོང་ཁག་ཏུ་མཚན་སྲུང་གི་ལས་རེས་སྒྲུབ་བཞིན་ཡོད་པ་རེད། ལྷག་པར་དུ་ཝུ་རུ་མུའུ་ཆི་མཐོ་རིམ་སློབ་གྲྭ་ཁག་ཏུ་དམ་སྲུང་ནན་མོ་བྱས་ཏེ། ཤིན་ཅང་མི་རིགས་ཡིན་པའི་སློབ་ཕྲུག་དག་མཉམ་དུ་འདུ་འཛོམས་བྱེད་པར་ལྟ་རྟོག་བྱེད་བཞིན་ཡོད་པ་རེད། ཤིན་ཅང་མི་རིགས་ཡིན་པའི་པེ་ཅིན་དབུས་མི་རིགས་སློབ་གྲྭ་ཆེན་མོའི་དགེ་རྒན་ཡིས་ལིས་ཧ་མུའུ་ཐུའུ་ཧི་ཡིས་བརྗོད་པ་ལྟར་ན། པེ་ཅིན་གྱི་སློབ་གྲྭ་ཁག་ཏུའང་ཤིན་ཅང་མི་རིགས་ཀྱི་སློབ་མ་རྣམས་ལ་ལྟ་རྟོག་བྱེད་བཞིན་འདུག་ཟེར། ཤིན་ཅང་གི་འགྲོ་བ་མིའི་ཐོབ་ཐང་དོན་གཉེར་མཁན་ཧའོ་ཅོན་གྱིས་བརྗོད་རྒྱུར། སྒྲིག་གཞི་ལམ་ལུགས་གང་རུང་ཞིག་ལ་འགྱུར་བཅོས་གཏོང་ཆེད་མང་ཚོགས་ཕན་ཚུན་བར་གདོང་ཐུག་གི་འཐབ་རྩོད་སྤེལ་རྒྱུ་དེ་ནི་རྒྱ་ནག་དཔོན་རིགས་ཚོའི་བྱེད་ཐབས་ཉག་གཅིག་སྟེ་རིག་གནས་གསར་བརྗེ་ནང་བཞིན་རེད། དོན་གྱིས་ ༧་༥ དོན་རྐྱེན་དེ་ནི་རྒྱ་དང་ཤིན་ཅང་མི་རིགས་བར་གྱི་འགལ་བ་ཞིག་དང་། ཡང་ན་རྒྱ་ཤིན་མི་རིགས་གཉིས་དང་དྲག་ཆས་ཉེན་རྟོག་པའི་བར་གྱི་འཁྲུག་འཛིངས་ཤིག་ཡིན་མིན་བསྐྱར་ཞིབ་དང་མནོ་བསམ་གཏོང་དགོས་པ་ཞིག་རེད་ཅེས་བརྗོད་ཡོད་འདུག
གསར་འགྱུར་བསྡུ་སྒྲིག་པ། ཚེ་རིང་རྒྱལ།
གསར་འགྱུར་བསྡུ་སྒྲིག་པ་ཚེ་རིང་རྒྱལ་ལགས་ལ་ཐུགས་རྗེ་ཆེ་ཞེས་ཞུ།
རྒྱ་ནག་གིས་ཉེས་པ་གཡོག་ཏེ་བཙོན་འཇུག་བྱེད་བཞིན་ཡོད་འདུག ཉེ་འཆར་དབྱིན་ཇི་བུ་མོ་ཞིག་རྒྱ་ནག་ཏུ་སྡོད་སྐབས། རྒྱ་ནག་གི་ཉེན་རྟོག་པས་ཁོ་མོར་ཞིབ་གཤེར་བྱས་ཡོད་འདུག དེ་དུས་ཁོ་མོར་བོད་ཀྱི་རྒྱལ་དར་དང་། རྒྱལ་བ་རིན་པོ་ཆེའི་སྐུ་པར་བཅས་ཅི་ཡང་མེད་ཟེར། འོན་ཀྱང་བསམ་ཡུལ་ལས་འདས་པ་ཞིག་ལ་རྒྱ་ནག་གི་ཉེན་རྟོག་པས་བོད་ཀྱི་རྒྱལ་དར་དང་། སྐུ་པར་ཁོ་མོར་ཅ་ལག་ཏུ་བཞག་སྟེ་སྐྱོན་འཛུགས་བྱས་ཏེ་སོ་སོའི་རྒྱལ་ཁབ་ཏུ་ཕྱིར་ཕུད་བཏང་འདུག