བློ་བཟང་སེང་གེའི་སྐོར་སྐྱོད།

དྲ་གྲོགས་མང་པོ་ཞིག་གི་རྒྱལ་སྤྱིའི་ཁྲིམས་ལུགས་མཁས་དབང་བློ་བཟང་སེང་གེའི་སྐོར་ལ་གླེང་སློང་མང་པོ་བྱུང་བཞིན་འདུག་པ་འདིར་དགའ་བསུ་དང་ང་ཡང་འདིར་མཉམ་ཞུགས་ཆོག་པར་འཚལ། འདིར་དྲ་གྲོགས་ཉུང་ཤས་ཞིག་གིས་མཁས་དབང་བློ་བཟང་སེང་གེ་ལ་ཉམས་མྱོང་མེད་ཚུལ་བཤད་འདུག འདིར་གུས་པའི་བསམ་ཚུལ་ཐུང་ངུ་ཞིག་ཞུས་ན་དེ་ནི་ཞེན་ཁོག་དང་རྨོངས་པ་ཁོ་ན་ལ་རྟེན་ནས་བྱུང་ཞིག་ཡིན་པར་བདག་གི་ངོས་འཛིན་བྱེད་བཞིན་ཡོད།བོད་ཀྱི་གནས་སྟང་ཉག་ཕྲ་བའི་སྐབས་འདིར་འཛམ་གླིང་རྒྱལ་སྤྱའི་ཁྲིམས་ལུགས་མཁས་དབང་ཁོང་ཉིད་ང་ཚོའི་བཙན་བྱོལ་སྤྱི་ཚོགས་ནང་བྱུང་མ་མྱོང་བའི་ཆོས་སྲིད་གཉིས་ལྡན་དང་ལྷག་པར་དུ་བོད་ཀྱི་ཆབ་སྲིད་ཀྱི་ཐད་ལ་མཁྱེན་རྒྱ་ཡངས་པའི་གཞོན་སྐྱེས་མཁས་དབང་ཞིག་ཡིན་པས་བོད་མི་རིགས་ལ་ཤ་ཞེན་དང་ལྷག་བསམ་ལྡན་མཁན་ཞིག་ཡིན་ན་༢༠༡༡ བཀའ་ཁྲིར་ཁོང་ཉིད་ལས་མ་འཆིས་སོ། གཞན་ཁོང་ལྟ་བུའི་མཁས་དབང་མ་འོང་བར་ཨ་རིའི་སྲིད་འཛིན་གྱི་ཆ་རྐྱེན་ལྡན་མཁན་ཞིག་ལ་ང་ཚོའི་བཙན་བྱོལ་ནང་གཞུང་འཛིན་གྱིས་ཉམས་མྱོང་མི་འདུག་ཟེར་ན་ཀླེན་གཏམ་ལས་གཞན་མ་མཐོང། གང་ཡིན་ཟེར་ན་ཁོང་ནི་ལོ་ལྟར་རྡ་སར་བཀའ་སྤྱི་གཉིས་ལ་ཟབ་སྦྱོང་སྤྲོད་ས་ཕེབས་བཞིན་ཡོད་པ་མ་ཟད་ཚོགས་པ་ཁག་དང་སློབ་གྲྭ་སོགས་ལ་བཀའ་སློབ་ལམ་སྟོན་དང་དྲི་བ་དྲས་ལན་གྲངས་ལས་འདས་པ་བྱེད་མྱོང་ཡོད་འདུག ལྷག་པར་དུ་འདི་ལོ་ལྷོ་གཞིས་ཁག་ལྔ་ལ་གཟིགས་སྐོར་ཕེབས་སྐབས་ཆོས་སྲིད་གཉིས་གང་གི་ཐད་དྲི་བ་བཏང་ནའང་གནད་དུ་ཁལ་བའི་ལན་སྤྲོད་ཀྱི་འདུག དོན་ངོ་མར་བཤད་ན་མཁས་དབང་ཁོང་ཆོས་སྲིད་གཉིས་ཀྱི་ཐད་བོད་མི་རིགས་ཀྱི་ལོ་རྒྱུས་ནང་བྱུང་མ་མྱོང་བའི་མཁས་དབང་ཁོང་ནི་སྐྱེ་བོ་ཀུན་གྱི་མཐོང་ཆོས་སུ་གྱུར་ཡོད། དེ་མིན་མི་ཁ་ཤས་ཀྱི་ཉམས་མྱོང་བསོག་ཆེད་སྤྱི་མཐུས་ནང་འགྲོ་དགོས་རེད་ཟེར་བ་དེ་ནི་དེ་བས་ཀྱང་དགོས་པ་མ་མཐོང་གང་ཡིན་ཟེར་ན་སྤྱི་མཐུས་ནང་ཆོལ་ཁའི་ཞེན་ཁོག་བྱེད་རྒྱུ་ལས་ཕེན་ཐོག་རྒྱ་ཆེན་མེད། ཁོང་ད་ལྟའི་སྐབས་སུ་ཆོལ་ཁ་ཆོས་ལུགས་ཀྱི་ཞེན་ཁོག་མེད་པ་བོད་སྤྱིའི་མི་ལྟ་བུ་ཞིག་ཆག་སྡོད་ཡོད་པའི་མཁས་དབང་ཁོང་ལྟ་བུ་ལ་ཕྲུ་གུར་ཀ་ཁ་སློབ་པ་ནང་བཞིན་སློབ་མི་དགོས་པར་བཙན་བྱོལ་སྤྱི་ཚོགས་ཀྱི་གནས་བབ་དང་ལས་ཀ་བྱེད་ཕྱོགས་དེ་ནི་ཁོང་གི་ལྟ་བ་དང་ཐོས་པ་ཙམ་ལས་མི་དགོས་སྙམ། གཞན་ཉམས་མྱོང་བསག་ཆེད་སྤྱི་མཐུས་དང་བཀའ་བློན་སོགས་མུ་མཐུད་ནས་རིམ་བཞིན་འགྲིམས་དགོས་ན་ལོ་དྲུག་བཅུ་བདུན་བཅུ་ལས་འགལ་འགྲོ་བས་༸གོང་ས་མཆོག་གི་དགོང་གཞི་དང་མཐུན་པའི་གཞོན་སྐྱེ་ཤེས་ཡོན་ལྡན་མཁན་ཞིག་རྙེད་ཐབས་བྲལ། བོད་མི་རིགས་ལ་ཤ་ཞེན་དང་ལྷག་བསམ་ཡོད་མཁན་ཞིག་ཡིན་ན་༸གོང་ས་མཆོག་གི་ཅི་གསུང་བཀའ་སྒྲུབ་བྱེད་མཁན་གཞོན་སྐྱེ་ཤེས་ཡོན་ལྡན་པ་ཞིག་ངེས་པར་དུ་འཚོལ་དགོས་པར་མཐོང་ངོ།

དོན་གྲུབ་ཀྱིས་བཤད་པ་བདེན། དོན་ངོ་མས་གཞོན་སྐྱེས་ཚོས་ཀྱང་བློ་བཟང་སེང་གེ་ཡང་སྙིང་མི་ཇི་འདྲ་ཞིག་ཡིན་པ་རྒྱུས་ལོན་མེད་ཚོད། རྟ་གསར་རྒྱུག་ལ་དགའ་བ་དཔེ་རེད།

གུས་པས་བསམ་ན། བཀའ་ཁྲིར་འོས་བསྡུར་ནང་ཞུགས་འདོད་ཡོད་རིགས་ལ། དྲྭ་ཐོག་དུ་ཀུན་གྱིས་དྲི་བ་དྲི་ལན་བྱེད་པའི་གོ་སྐབས་ཤིག་རེད་ན། ཁོང་ལ་ཉམས་མྱོང་ཡོད་དང་མེད། ཤེས་འཇོན་ལྡན་དང་མི་ལྡན་ཕྱོགས་ཕྱོགས་ཁ་གསལ་གཏིང་གསལ་ཆགས་ཀྱི་རེད།
བསམ་ཆར་འདོན་མཁན་ཀུན་གྱིས་སོ་སོས་བསམ་ཆར་བཏོན་པ་ལ་ཡིད་རངས་ཞུ། བློ་བཟང་སེང་གེ་ཁྲིམས་ལ་མཁས་ཀྱང་། དེ་སྔོན་ལག་ལེན་བསྟར་བའི་ཉམས་མེད་ན། གསོ་བ་རིག་པའི་དགེ་རྒན་ཞིག་དེ་སྔོན་བཤའ་བཅོས་བྱེད་པའི་སྦྱོང་བརྡར་གཏན་ནས་མེད་བཞིན་བཤའ་བཅོས་བྱེད་པའི་ལམ་དུ་ཞུགས་པ་དང་མཚུངས།
སྒྲིགས་འཛུགས་ལ་ཉམས་མྱོངས་མེད་ན། སྒྲིགས་འཛུགས་ཀྱི་གནས་སྟངས་ཤེས་པས་ཕན་གྱི་མེད་པ་མངོན་གསལ་རེད། བོད་ཀྱི་རྩ་བའི་ལང་ཕྱོགས་གང་ཡིན་མིན་དང་། སོ་སོའི་ལག་ལེན་གང་སྟར་ཉིན་ཤས་བསམ་གནོ་འདོན་ནས་འདྲ་ཆགས་པོ་བཤད་ཐུབ་ཀྱང་། བཙན་བྱོལ་གཞུང་གི། དཔལ་འབྱོར། ཤེས་ཡོན། ཆབ་སྲིད་ལོངས་ཕྱོགས་ཤེས་པ་དང་ཉམས་མྱོང་གཉིས་ཆར་མེད་ན་ལག་ལེན་བསྟར་སྐབས་ཁག་ཙམ་ཡོད་འགྲོ།

མཁས་དབང་བློ་བཟང་སེང་གེ་མཆོག་གདན་འདྲེན་ཞུས་ཏེ་ལྷོ་གཞིས་ཁག་ཏུ་བོད་དོན་ཆབ་སྲིད་ཀྱི་གོ་རྟོགས་ལས་འགུལ་སྤེལ་བ་འདི་བཙན་བྱོར་བོད་པའི་སྤྱི་ཚོགས་ཀྱི་གནས་བབ་ལ་ལྟས་ནའང་འོས་འཚམ་དང་དགོས་མཁོ་ཞིག་ཁ་བཀང་ཐུབ་པ་རེད་སྙམ། དོན་དངོས་ཐོག་མཁས་དབང་ཁོང་ཆོས་སྲིད་གཉིས་ཀྱི་ཐད་བོད་མི་རིགས་ལོ་རྒྱུས་ནང་བྱུང་མ་མྱོང་བའི་མཁས་དབང་ཟམ་གདོང་རིན་པོ་ཆེ་མཆོག་ལ་འགྲན་ཟླ་མེད་པར་མིག་ལྡན་ཀུན་གྱིས་མཐོང་ཆོས་སུ་ཡོད་པ་ཞིག་རེད་མོད་། དེང་རབས་ཀྱི་ལམ་གསོར་དང་མཐུན་པའི་རྒྱལ་སྤྱིའི་གནས་བབ་ཐོག་ནས་ལྟས་ན་ཁོང་བོད་རིགས་ཀྱི་ལོ་རྒྱུས་ནང་མཁས་དབང་ཐོག་མ་རེད་ཟེར་ཆོག། དེ་ཡང་ད་ཐེངས་ལས་འགུལ་དེར་སོ་སོའི་བསམ་འཆར་སྙིང་སྡུས་ཅིག་ཞུས་ན་སྤྱིར་ཚོགས་པ་སུ་འདྲ་ཞིག་ཡིན་ན་རྩ་དོན་གཏེར་བ་དང་དམིགས་ཡུལ་ལམ་ཕྱོགས་ཅིག་ཡོད་དགོས་ངེས་རེད་ལ་དེ་ཡང་དེ་སྔོན་ཀྱི་ཆབས་སྲིད་ཚོགས་པ་མང་པོའི་ལོ་རྒྱུས་ནང་ཡོད་པ་གཞི་བཟུང་དགྲ་མཁའ་ནང་ལ་མ་གཏད་བར་བོད་མི་ཡོངས་དང་ཅིག་གྱུར་དུ་དགྲ་བོ་རྒྱ་ནག་སྲིད་གཞུང་ལ་ཁ་བཏད་ལང་བའི་རེ་བ་ཡོད། ཅིག་སྒྲིགས་ཡོངས་བར་ཤོག

བློ་བཟང་སེང་གེ་༢༠༡༡་བཀའ་ཁྲིར་རྒྱབ་སྐྱོར་བྱེད་མཁན་དེ་ཚོ་བོད་པའི་ཆབ་སྲིད་ཀྱི་གནས་སྟངས་དང།་་སྐད་ཡིག་རིག་གཞུང།་བཙན་བྱོལ་བོད་གཞུང་གི་འཛིན་སྐྱོང།་གྲོས་ཚོགས་ལམ་ལུགས།་བོད་རྒྱ་ཞི་མོལ་སོགས་ལ་མཐོང་རྒྱ་ཆུང་བའི་སྐྱོན་ཞིག་ཡིན་པ་མངོན་རྟགས་ཤིག་དང།་གལ་སྲིད་དེ་ལྟར་མིན་ན་སྤྲས་ལེ་རང་ཡིན་པ་མངོན་གསལ་རེད།་གཞན་ད་ལྟའི་སྐབས་སུ་ཁོང་བཀའ་ཁྲིར་རྩ་བ་ནས་འོས་བབས་ཡོད་པ་མ་རེད།་མ་འོངས་ལོ་ལྔ་དང་བཅུའི་ནང་བཙན་བྱོལ་གཞུང་གི་གྲོས་ཚོགས་དང་འཛིན་སྐྱོང་སྐོར་ལ་ལས་ཀ་འདྲ་བྱས་ན་དེའི་རྗེས་བལྟ་ཆོག་གི་རེད།་་བཙན་བྱོལ་གཞུང་གི་འབྲེལ་ཡོད་ལས་དོན་སྐོར་ལ་ལས་ཁུངས་ནང་ཉིན་གཅིག་ལས་ཀ་བྱེད་མྱོང་མེད་མཁན་ཞིག་བཀའ་བློན་ཁྲི་པར་བསྐོ་ན་ཁོས་ལས་དོན་ཚགས་ཚུད་པོ་བྱེད་ཐུབ་ཀྱི་རེད་དམ།་་དཔེ་རང་ལ་ཞོགས་ཏེ་གཞན་གྱི་བྱེད་ཕྱོགས་ལ་བསམ་བློ་གཏོང་དགོས།་་དཔེར་ན་ཁྱེད་རང་ཆ་རྒྱུས་མེད་པའི་ས་ཆ་ཞིག་ལ་སླེབས་ན་ལམ་ནོར་ཤོར་བ་ཡོང་གི་འདུག་ཧ་དེ་དང་གཅིག་མཚུངས་རེད།་་ལྐུག་པའི་ཞན་ཁོག་མ་བྱེད་དང།་བཀའ་བློན་ཁྲི་པའི་ཞབས་ཀྱག་འདི་ཉམས་མྱོང་གསོག་ས་དང་བལྟ་ཚོད་བལྟ་ས་མ་རེད་དྭ།་དེ་བོད་གཞིས་བྱེས་གཉིས་ཀྱི་འབྱུང་འགྱུར་ལས་དབང་ལ་ཐག་གཅོད་བྱེད་མཁན་དབུ་འཁྲིད་མཁན་ཞིག་རེད།་བསམ་བློ་ཞིབ་མོར་ཐོང།

འབྲོག་ཕྲུག་རང་སྐྱ་བ་ལགས་ཁྱེད་ཀྱི་བློ་བཟང་སེང་གེ་ལ་བོད་དམགས་གཙོ་ལམ་ཏུ་བསྒྱུར་རོགས་ལབ་ཀྱི་འདུག དེགང་ཡིན་ཟེར་དགོས་རེད།བོད་དམགས་གཙོའི་ལན་ལ་འགྲོ་བཞིན་པ་རེད། སྐད་ཆ་བཤད་དུས་གཟབ་དགོས།

གངས་ལྗོངས་རང་བདེན་རྩོད་ལེན་མཐུན་ཚོགས་ཀྱིས་བློ་བཟང་སེང་གེ་གདན་ཞུས་ཀྱིས་ཆབ་སྲིད་གོ་རྟོགས་སྤེལ་བར་སྙིང་ནས་དགའ། འོན་ཀྱང་འདི་དམིགས་ཡུལ་གཅིག་རང་གཅིག་བཟུང་ནས་བྱས་པ་ཁ་གསལ་གཏིང་གསལ་ཞིག་མ་རེད་དམ། དམིགས་ཡུལ་དེ་ཉིས་སྟོང་༡༡ལོའི་བཀའ་ཁྲིར་དམིགས་པ་ཁོ་ན་ལས། བཙན་བྱོལ་བོད་མིའི་ཆབ་སྲིད་གོ་རྟོགས་སྤེལ་ཆེད་བ་ཟེར་དེ་ཁ་གཡར་ས་ཙམ་ཡིན་པ་བྱིས་པས་ཤེས་པ་ཡིན་ཨང་། འདི་ལྟ་རྐྱང་བྱས་པས་བོད་མིའི་ལས་དོན་དེར་ནམ་ཡང་ཕན་མི་སྲིད་དོ།།

ཡག་པོ་འདུག་མི་མང་གི་མདུན་སར་ཐོན་ནས་མ་འོངས་པའི་ལེགས་འཆར་དང་ཆབ་སྲིད་ཀྱི་ལངས་ཕྱོགས་གསལ་སྟོན་གནང་བ་ཡིན་ན་མི་མང་ནས་ཀྱང་འོས་ཤོག་འཕེན་དུས་བློ་བདེ་བ་ཡོང་ངེས། འོན་ཀྱང་ཆུ་མེད་སར་ཟམ་པ་དང་སྒོ་ཕྱུགས་མེད་ས་རྩྭ་ར་འཛུག་བསྐྲུན་ལྟ་བུའི་གཏམ་བཤད་ལྟ་བུ་ནི་བཤད་པ་ལས་མ་བཤད་ན་ལེགས་པ་ཡོད།

གངས་ལྗོངས་རང་བདེན་རྩོད་ལེན་ཚོགས་ཆུང་གི་མི་དམངས་ནང་ཆབ་སྲིད་ཀྱི་གོ་རྟོགས་སྤེལ་པ་ཐུགས་ཆེ་གནང་། ལས་འགུལ་ཡག་པོ་རེད།
ཡིན་ནའང་དེ་རིང་སེང་ཉིན་མི་འདི་འདྲ་མང་བོ་བྱུང་དང་བྱུང་བཞིན་པའི་དུས་སྐབས་ཡིན་དུས་ཚང་མའི་གཟབ་གཟབ་གནང་དགོས་པ་གལ།
ཁ་བདེ་པོ་དང་ཚིག་སྙན་པོ་རེ་ཟུང་བཤད་ནས་དེའི་མགོ་སྐོར་འོག་ཚུལ་སྙམ་ཆེ།
མཁས་དབང་ཡིན་མིན་ཐོག་རྩོད་གཞི་དང་སྐབས་བབ་གལ་ཆེན་རེ་མི་འདུག

རྒྱལ་སྤྱིའི་ཁྲིམས་ལུགས་མཁས་དབང་སྐུ་ཞབས་བློ་བཟང་སེང་གེ་ལགས་ཀྱིས་གསར་བརྗེའི་ལས་འགུལ་སྤེལ་བ་སྙིང་ཐག་པ་ནས་རྗེས་སུ་ཡི་རངས་ཞུ་རྒྱུ་ཡིན།

ཁོང་གིས་བོད་གཞིས་ཁག་ལ་སྐོར་བསྐྱོད་ཀྱིས་མང་ཚོགས་ལ་ཆབ་སྲིད་ཀྱི་གོ་རྟོགས་གནང་བ་འདི་སྐབས་གསུམ་པའི་བཀའ་ཁྲིའི་འོས་མིའི་འགྲན་རྩོད་དངོས་ནང་ཞུགས་པ་ལྟ་བུའི་མྱོང་ཚོར་བྱུང༌། འདི་ནི་གསར་བརྗེ་ཞིག་ཡིན་ངེས།

བོད་པ་ཚང་གི་ངོ་ཚ་འབེལ་པོ་དང༌། ཁེངས་སྐྱུངས་བྱེད་པའི་ངན་གོམས་རྣམས་ད་ལན་ཁོང་གིས་གཙབ་བཤགས་བཏང་སྟེ་མདུན་ནས་མདུན་དུ་ཐོན་དགོས་པའི་བསླབ་བྱ་ཐེངས་གཅིག་སྤྲད་པ་རེད་འདོད། ཁོང་གིས་མུ་མཐུད་ནས་བསླེབ་ལ་ཉེ་བའི་བཀའ་ཁྲིའི་འོས་ཁོངས་སུ་ཞུགས་ཏེ་ཨ་རི་སྲིད་འཛིན་གྱི་འགྲན་རྩོད་ནང་བཞིན་ལག་བསྟར་ཐུབ་པ་ཞིག་བྱུང་ན་དེ་ནི་བོད་པ་ཚང་གི་ལོ་རྒྱུས་ནང་འབྱུང་མྱོང་མེད་པའི་གསར་བརྗེའི་བྱ་འགུལ་ཐེངས་དང་པོ་དེ་ཆགས་པ་རེད་ལ། ཁོང་ཡང་བཙན་བྱོལ་ནང་གི་བོད་མི་གསར་བརྗེ་བ་ཐོག་མ་དེ་ཆགས་འགྲོ་བ་རེད་སྙམ།

བློ་བཟང་སེང་གེ་ལ་གཉིས་སྟོང་བཅུ་གཅིག་གི་གྲ་སྒྲིགས་ག་རེ་ཡོད་རེད། བཀའ་ཁྲིའི་འོས་དམིགས་ལ་ཡོད་རེད་ཟེར་ན་ནི་དེ་སོ་སོས་བླུག་མ་བླུག་འདོད་པ་ཡིན་ཙམ་མ་བླུག་ན་ཡང་ངོ་རྒོལ་སུས་ཀྱང་བྱེད་མི་ཐུག ཁོང་གི་ཆུ་སྒང་ནང་ཁུལ་དུ་ཕོང་བཀྲུག་རྒྱབ་པ་དེ་ཚང་མའི་ཤེས་གསལ་རེད་དེས་ན་ཚང་མའི་གཟབ་གཟབ་གནང་དགོས།

བློ་བཟང་སེང་གེ་ལགས་ལ་མཁས་དབང་རང་ཐད་ཁར་འབོད་ན་ཅུང་མི་འགྲིག་པ་འདྲ་པོ་མཐོང་གི་འདུག གང་ཡིན་ཟེར་ན་ཁོང་རིག་པའི་གནས་ཐམས་ཅད་མཁས་པ་གང་ཡང་མ་རེད་ང་ཚོ་ཚང་མས་ཧ་གོ་གོ་པ་རེད། ཨ་ཤི་ཡའི་ཁྲིམས་སྐོར་ལ་འབུམ་རམས་པའི་སློབ་མཐར་ཕྱིན་ཏེ་ད་ལྟའི་ཆར་ཞིབ་འཇུག་གི་ལས་དོན་བྱེད་མུས་རེད། གལ་སྲིད་མཁས་དབང་འབོད་དགོས་ཡོད་ན་ཨ་ཤི་ཡའི་ཁྲིམས་ལུགས་མཁས་དབང་འབོད་ན་ཅུང་སྟབས་བདེ་བ་ཡོད་པ་རེད་མ་གཏོགས། གཞན་མ་འོངས་པར་མཁས་དབང་ཟེར་བའི་ཐ་སྙད་འདི་ལ་རིན་ཐང་མེད་པ་ཆགས་རྒྱུའི་ཉེན་ཁ་འདུག ང་ཚོའི་བཙན་བྱོལ་སྤྱི་ཚོགས་ནང་ཕྱི་ནང་གི་རིག་པའི་གནས་ཐམས་ཅད་ལ་མཁས་པ་ཕུར་དུ་བྱུང་བ་ཞིག་ཡོད་པ་ནི་ཟམ་གདོང་རིན་པོ་ཆེ་མཆོག་རེད་ཁོང་ལ་ད་ལྟའི་སྐབས་སུ་རིགས་གཅིག་གིས་མཁས་དབང་ཟེར་འབོད་འདོད་ཡོད་པ་རེད། བློ་བཟང་སེང་གེ་ལྟ་བུ་ལ་མཁས་དབང་འབོད་ན་རིན་པོ་ཆེ་ལ་དེ་བས་མཁས་དབང་འབོད་དགོས་ངེས་དང་འོས་བབས་རང་བཞིན་ཡོད་པ་མིག་ལྡན་ཀུན་གྱིས་མཐོང་ཆོས་སུ་ཡོད་པ་དེ་རེད།