ངས་ཏཱ་ལའི་རུ་ཚོགས་རྙེད་སྟངས། སྤོབས་པ་མཐའ་ཡས།

བྱེས་འབྱོར་བོད་ཀྱི་རྩོམ་པ་པོ་རྣམས་ལ་ཞུ་རྒྱུ།

དགོངས་མངའ་བཞིན་བོད་ཀྱི་རྩ་དོན་འདས་མ་ད་གསུམ་ལ་རྒྱ་ནག་གིས་འཁྱོག་བཤད་དང་རྫུན་བཟོ། ཆེས་བླ་ན་མ་མཆིས་པའི་གོང་ས་མཆོག་ལ་མཚན་དམོད་སོགས་ལ་ལོ་རྒྱུས་དང་ཆབ་སྲིད། མིང་དོན་མཚུངས་པའི་རྩོམ་ཡིག་གིས་དགག་རྒྱག་གི་ལན་འདེབས་རྒྱུ་ནི་ད་ལྟའི་ཆར་ཁ་ཚ་དགོས་གཏུགས་ཀྱི་ལས་གཞི་ཞིག་ཡིན་ལ། ད་ཐེངས་རྩོམ་པ་པོ་སྤོབས་པ་མཐའ་ཡས་ལགས་ཀྱིས་རྒྱ་ནག་གིས་ནམ་རྒྱུན་དྲིལ་བསྒྲགས་དང་རྩོམ་ཡིག་སོགས་སུ་བྲིས་པའི་ཏཱ་ལའི་རི་ཚོགས་ཟེར་བར་དགའ་རྒྱག་གིས༼ངས་ཏཱ་ལའི་རུ་ཚོགས་རྙེད་སྟངས་སྐོར༽བརྩམས་གནང་་འདུག་པར་ཐུགས་རྗེ་ཆེ་ཞུ་བ་དང་ཆབས་ཅིག་དགའ་སྤོབས་གཉིས་ཀ་སྐྱེས། ཡིན་ཡང༌། རྩོམ་པ་པོ་མི་རེ་ངོ་རེ་ནས་འདི་ལྟ་བུའི་རྒྱ་ནག་གིས་བཏོན་པའི་རྩོམ་ཡིག་ཁག་ལ་ལན་འདེབས་བྱ་རྒྱུ་ནི་བོད་ཀྱི་རྩ་དོན་དང་སོ་སོའི་ཕྲག་སྟེང་ལ་བབ་ཡོད་པའི་ལས་འགན་གལ་ཆེན་ཞིག་ཡིན་པ་དགོངས་འཇགས་ཞུ།།

འདིར་རྩོམ་ཡིག་གི་བཟོ་འདྲ་བོ་ཞིག་ཡོང་གིན་འདུག ཅུང་ཀློག་རིན་ཡོད་ལ་རྒྱ་ཡིག་ཏུ་བསྒྱུར་ནས་རྒྱ་རིགས་ཚོར་བསྟན་ནའང་སྟོན་རིན་ཞིག་འདུག་སྙམ།

གཤམ་གྱི་དྲྭ་གྲོགས་མཆན་འདེབས་པོ་དག་ལ་སྨྲས་པ།

ལུང་ཁུག་འབྲོག་སྐད་ཕྱོགས་ལ་ཞེན་པ་དེ་ཆེ་བས།
ཡུལ་སྐད་ཧྲག་གེ་ལྟ་བུ་བྲི་ཐལ་དེ་མང་ན།
གཅིག་འགྱུར་བརྡ་སྤྲོད་ནུས་པར་ལྟོར་ཞིག་ཏུ་འགྲོ་བས།
དྲང་དབང་རྣམས་པས་བརྡ་སྤྲོད་ཐུགས་དཀྱིལ་དུ་བཟུང་རོགས།

རྩོམ་ཡིོག་གི་ཁ་བྱང་མཐོང་བ་ཙམ་ཀྱིས། ད་ཡང་བོད་ཀྱི་དགོན་པ་དང་གྲྭ་པའི་སྐོར་ལ་ཟུར་ཟའི་རྩོམ་ཡིག་ཅིག་སླེབས་འདུག་ཨང་བསམ་བཞིན་ཀློག་པ་ཡིན་མོད། དེ་ལས་ལྡོག་སྟེ་ཁ་ཕར་མ་སྐོར་བར་རང་ཉིད་ལ་སྐོར་ཏེ་བྲིས་པའི་རྩོམ་ཡིག་བློ་འབབ་ཅིག་རེད། རྒྱ་གཞུང་གིས་ཏཱ་ལའི་རུ་ཚོགས་ཞེས་སྐྱོན་འདོགས་དང་སྡིག་དམོད་བྱས་བྱས་ཉིད་ཀྱིས། མིང་ཚིག་འདི་མཐོང་དུས་བདེ་པོ་ཞེ་དྲག་མ་བྱུང༌། ག་ལེར་རྩོམ་ཡིག་འདི་ཀློག་པས་དེ་ཡང་ཧ་ཅང་སྙན་པོ་དང་བདེ་བདེ་འདྲ་ཞིག་འདུག མུ་མཐུད་དུ་འདི་ལྟའི་རྩོམ་ཡིག་སྤེལ་རོགས་གནང༌། ཁྱོད་ཀྱི་གདམ་ཀ་དེ་ནི་ངོ་མ་རླབས་ཆེན་གྱི་ཆོད་སེམས་ཤིག་དང༌། ཕུལ་དུ་བྱུང་བའི་སྙིང་སྟོབས་ཤིག དྭངས་གཙང་གི་ལ་རྒྱ་ཞིག་ཀྱང་རེད་ལ། ཁྱོད་ཀྱི་མི་ཚེའི་གཟི་བརྗོད་དུ་ཡང་ངོ་མ་བརྩི་རུང་བ་ཞིག་རེད། ཅེས་ངས་ཀྱང་བསྔགས་བརྗོད་དང་གུས་བརྩི་ཞུ་བཞིན་ཡོད།

ཐུགས་རྗེ་ཆེ། དོན་དང་ལྡན་པའི་རྩོམ་ཞིག་བྲིས་འདུག
____ཏཱ་ལའི་རུ་ཚོགས་པ་ཡོངས་ཀྱིས་ཚབ་བྱས་ནས་ཏཱ་ལའི་རུ་ཚོགས་ཀྱི་བུ་རྒོད་སྤོབས་པ་མཐའ་ཡས་ཁྱོད་ལ་ཐུགརྗེ་ཆེ་ཞུ།

ཧ་ཧ། ཁ་སང་སྐུ་ཉིད་ཀྱིས་ཆོས་ཉིད་ཀྱིས་སྒོ་རྡུང་ཞེས་བ་མཆན་བཀོད་སྐབས་ཕྲན་སེམས་སུ་ཉིད་ལ་རྩོམ་ཡིག་ཀློག་པའི་ཤེས་ཚད་མི་འདུག་སྙམ་ནས་བསྐྱར་འགྲེལ་ཡང་འགྲེལ་བྱས་ཀྱང་། ད་ལྟའི་རྩོམ་འདི་མཐོང་བས་དེ་ནི་ངལ་བའི་རྒྱུ་ཞིག་ཡིན་པ་གཞི་ནས་རྟོགས། གོ་བ་ལོག་པ་དགོངས་དག་ཞུ། རྩོམ་བཟང་གནང་བ་ཐུགས་རྗེ་ཆེ།

ཆ་ཚང་བཀླགས་པ་ཡིན། ཡག་རབས་བརྒྱན་རབས་ཚང་མས་བཤད་ཟིན་པས། གཤིས་ཀི་ཧྲ་གི་འདི་མ་གཏོགས། ངས་ཁ་སྣོན་ཅང་རྒྱག་ཤེས་མ་སོང་།

གཏམ་བཟང་ཡོད་གཏམ་བཟང་སེང་རྡོར་དྲ་རྒྱ་འདས་ལོག་འཁྲུངས་འདུག་ http://www.sangdhor.com/

ད་ཡིན་ན། མི་ཚང་མས་སེམས་ཁྲལ་བྱེད་ཀྱིན་པ་དེ་ཐོན་ཤག འདི་ལྟར་ཡོང་བ་ཞིག་ཡིད་ལའང་ཤར་མེད། ཡིན་ནའི་ཡག་པོ་རེད། དོན་ལ་རྒྱ་ནག་གཞུང་གི་ཁྲིམས་ཐོག་ཏུ༼ཏཱ་ལའི་རུ་ཚོགས་ནི་བོད་ལྗོངས་ཀྱི་མཐོ་རིམ་ལོགས་སྤྱོད་པ་ཆེས་ཉུང་ཤས་ཤིག་གིས་ཀྲུང་གོ་གསར་པས་ཁྱེར་ཡོང་བའི་རང་དབང་དང་བདེ་སྐྱིད་ལ་དང་ལེན་མ་བྱས་ཤིང་སྤྱི་ཚོགས་རྙིང་པར་བསྐྱར་ལོག་བྱེད་ཆེད་དྲག་པོའི་ངོ་ལོག་བསླངས་པ་ལ་ཀྲུང་གོའི་མི་རིགས་ཁག་གིས་རྒོལ་རྡུང་ཕོག་ནས་ཕམ་ཉེས་སུ་སོང་རྗེས་རྒྱ་གར་དུ་བྲོས་སོང་བ་ཞིག་རེད་ཅེས་པ་དེ་རེད། ༽ལ་འགྱུར་བ་གང་ཡང་སོང་མེད། དེའི་སྟབས་ཀྱིས་རྩ་ཁྲིམས་འོག་ཏུ་རྗེས་ཀྱི་བཤད་སྟངས་འདི་རིགས་མེད་ལ། འདི་ནི་ཟིན་བྲིས་པ་ཁ་ཤས་ཤིག་གི་རང་གཞན་གཉིས་ཀའི་མགོ་བསྐོར་བྱེད་ཀྱི་འགྲེལ་སྟངས་ཤིག་རེད། འོག་གི་དྲི་བ་འདི་དག་ལ་གྲོས་བསྡུར་མི་བྱེད་ག་མེད་རེད་འདོད།
༡ ཏཱ་ལའི་རུ་ཚོགས་དང་ཡུལ་གྱར་སྒྲིག་འཛུགས་གཅིག་པ་རེད་དམ།
༢ རུ་གཙོ་མེད་ཉིན་རུ་ཚོགས་འཐོར་བའི་ཁྱབ་བམ།
༣ བོད་ལ་རུ་ཚོགས་ག་ཚད་ཅིག་ཡོང་ཉེན་ཡོད་དམ།
༤ རུ་ཚོགས་གང་གིས་བོད་ཀྱི་ཚབ་བྱེད་ཀྱི་རེད་དམ།

སྤོབས་པས་བཙལ་ཅིང་རྙེད་པའི་རུ་ཚོགས་དང་།།
རྒྱ་ཡིས་ཧོལ་གྱིས་སྨྲས་པའི་རུ་ཚོགས་གཉིས།།
དམིགས་ས་གཅིག་ཀྱང་གོ་ཚུལ་མི་འདྲ་སྟེ།།
རྙེད་སྟངས་ཞིབ་པར་བརྗོད་པར་ཅིས་མི་བསྟོད།།

ལུང་རིགས་རྒྱལ་གྱིས་གསུང་བ་བཞིན་དགྱ་ནག་ཁོ་རང་ཚང་རང་མ་གཏོགས་གཞན་དག་ནི་ཏཱ་ལའི་རུ་ཚོགས་ཡིན།

མདོར་བསྡུས་ན་ཏཱ་ལའི་རུ་ཚོགས་ཀྱིས་ས་སྟེང་ཁྱབ་ཡོད།

བཀུར་འོས་སྤོབས་པ་མཐའ་ཡས་ལགས།

རྩོམ་འདི་བཀླགས་པ་ཡིན། ཉིད་ཀྱི་དཔྱད་སྟོབས་དང་རྩོམ་རྩལ་ལ་རྗེས་སུ་ཡི་རང་དང་བཅས་ཏེ་ཡོད། འདིར་རང་ཉིད་ཀྱི་བསམ་ཚུལ་ཞིག་ཀྱང་སྣོན་འདེབས་སུ་འབུལ་འདོད་བྱུང། དེ་ནི་གཤམ་གྱི་འདི་ལགས།

རྒྱ་ནག་གཞུང་འདིས། ལོ་ལྔ་བཅུ་ང་གཅིག་གི་རིང་ལ། ཏཱ་ལའི་རུ་ཚོགས་ལ་དགག་རྒྱག་ཚོགས་འདུ་ཟེར་བ་འཚོགས་ཡོད། ཏཱ་ལའི་རུ་ཚོགས་དམིགས་འབེན་དུ་བཟུང་བའི་ཁ་གཏད་གྲ་སྒྲིག་ཟེར་བ་བྱས་ཡོད། ཏཱ་ལའི་རུ་ཚོགས་ཀྱི་ངན་སྐུལ་ཟིང་སློང་ལ་དམ་དྲག་ལས་འགུལ་ཟེར་བ་སྤེལ་ཡོད། འདི་འདྲའི་བྱ་འགུལ་དག་གི་གཟས་སྒོ་མདོར་བསྡུས་ན། སྤོབས་པ་མཐའ་ཡས་ལགས་ཉིད་ཀྱིས་བསྟན་པའི་འདུས་མདོ་སྟེ། ལོག་སྤྱོད་ཕྱོགས་ཁག་ཅེས་པའི་མིང་ཐོག་ནས་ང་དགུ་ལོའི་ཡུལ་བྱོལ་མང་ཚོགས་དང་། དེ་ནས་རིམ་པས་བོད་མི་ས་ཡ་དྲུག ད་ཆར་རྒྱལ་སྤྱིའི་རྒྱ་རྒོལ་སྟོབས་ཤུགས་ཟེར་བའི་བར་དུ་ཁྱབ་པའི་དྲང་བདེན་ལ་འཇུག་མཁན་ཡོངས། དྲང་བདེན་གཙིགས་སུ་བྱེད་པ་རྒྱ་རིགས་ཤེས་ཡོན་ཅན་སྟོང་ཕྲག་མང་པོ་བཅས་ལ་ད་ཆར་ཏཱ་ལའི་རུ་ཚོགས་སུ་བལྟ་ཡི་ཡོད།

ཏཱ་ལའི་རུ་ཚོགས་ཀྱི་སྟོབས་ཤུགས་དང་ཁྱབ་ཁོངས་ལ་རྒོལ་བའི་སྒྲིག་འཛུགས་ཀྱི་དབང་དུ་བྱས་ན། རྒྱ་ནག་གཞུང་གི་དམག་སྒར་ཆེ་ཁག་གསུམ་གྱི་ཁ་གཏད་བྱ་ཡུལ་གཙོ་བོ་དེ་བོད་ཆོལ་ཁ་གསུམ་ཆགས་ཡོད། ལྗོངས་དང་ཞིང་ཆེན། ཁུལ་དང་རྫོང་། ཡུལ་ཚོ་གང་སར་རྒྱ་དམག་གི་དམག་སྒར་ཆེ་ཆུང་སྣ་ཚོགས་ཀྱིས་གཡས་བསྐོར་གཡོན་བསྐོར་གྱི་ཚུལ་དུ་ཡོད། ཡིན་ནའང་། ཏཱ་ལའི་རུ་ཚོགས་ཀྱི་ཆ་ཤས་གཅིག་དེ་འཛམ་གླིང་ལ་ཁ་བཀྲམས་ནས་ཡོད་ཅིང་། ཁོང་ཚོའི་སྟོབས་ཤུགས་ཉིན་རེ་བཞིན་རྒྱས་ཀྱིན་ཡོད། བོད་པ་ཚོར་མཚོན་ན། ཏཱ་ལའི་བླ་མ་དང་ཏཱ་ལའི་རུ་ཚོགས་ཀྱི་སྟོབས་ཤུགས་ཅི་ཙམ་གྱིས་རྒྱས་པ་དེ་ཙམ་གྱིས་སེམས་ནང་བག་བྲོ་བའི་ཚོར་བ་ཞིག་ཡོང་གི་ཡོད། ཉིས་སྟོང་བརྒྱད་ལོའི་ཞི་རྒོལ་སྐབས་ཀྱི་རྣམ་འགྱུར་དང་སེམས་འདུན་དག་ནི་ལོ་རྒྱུས་དང་གནས་སྟངས་གཉིས་ཀའི་འགྱུར་མཚམས་གསལ་སྟོན་བྱུང་བའི་མཚམས་ཚིགས་ཤིག་དང་། ཉེ་སྔོན་སྐྱེ་རྒུ་མདོའི་ས་ཡོམ་གྱི་གོད་ཆག་སྐབས་ཚེ་སྲོག་ཤོར་བའི་བེམ་པོ་དུར་སྲེག་གི་རྣམ་པ་དེ་ནི་འཇིགས་ཡེར་བ་ཞིག་ཡིན། དེ་དུས་བུད་མེད་ཅིག་གིས། རྒྱལ་བ་བསྟན་འཛིན་རྒྱ་མཚོ་མཁྱེན། ཞེས་སེམས་གཏིང་གི་རེ་འབོད་དེ་ཏཱ་ལའི་བླ་མའི་ཕྱོགས་སུ་བསྲིངས། རྒྱ་གུང་ཁྲན་མཁྱེན་ཞེས་སུ་གང་གིས་དེ་ཕྱོགས་སུ་རེ་འདུན་བསྲིངས་མ་སོང་། འགག་ལ་ཐུག་ན། ཏཱ་ལའི་རུ་ཚོགས་ལས་གཞན་གྱི་རེ་ཡུལ་ཞིག་བོད་མིའི་སེམས་ཁོང་ན་མེད།

ད་ཆར། རྒྱ་ནག་གིས་འབད་བརྩོན་ཆེན་པོས་བྲིས་པའི་འཁྱོག་བཤད་ལོ་རྒྱུས་དང་རྩོམ་ཡིག་དག་ན་གསལ་བའི་ཏཱ་ལའི་རུ་ཚོགས་ཟེར་བའི་ཐ་སྙད་དེ་ཚོ་དང་། ད་ལྟ་འབྲི་བཞིན་པའི་ཐ་སྙད་དག་གིས་ཏཱ་ལའི་རུ་ཚོགས་ཀྱི་སྟོབས་ཤུགས་ཤིག་ཁས་ལེན་གྱིན་ཡོད། ཏཱ་ལའི་རུ་ཚོགས་ཀྱི་འཕེལ་རྒྱས་ཤིག་ཁས་ལེན་གྱི་ཡོད་པ་རེད། ཏཱ་ལའི་རུ་ཚོགས་ཀྱི་དར་ཆ་འདི་བོད་མི་ས་ཡ་དྲུག་གི་སེམས་པའི་རེ་རྩེ་ན་ལྷབ་ལྷུབ་ཏུ་གཡོ་ཞིང་ཡོད་པ་སྟོན་གྱི་ཡོད་པ་རེད།

རྒྱ་ནག་གཞུང་གིས་ཏཱ་ལའི་རུ་ཚོགས་ལ་དམག་ཤུགས་བཀོལ་ནས་ཁ་གཏད་གཅོག་གིན་ཡོད། མདོར་ན། ཁོང་ཚོས། ཏཱ་ལའི་རུ་ཚོགས་དང་ང་ཚོའི་བར་གྱི་འགལ་བ་ནི། ཁྱོད་ཤི་ང་གསོན་གྱི་འགལ་བ་ཞིག་ཡིན་ཞེས་ཁ་ན་ན་བར་བཤད། ལག་ན་ན་བར་འབྲི་བཞིན་ཡོད། ཏཱ་ལའི་རུ་ཚོགས་ལ་མཚོན་ན། ལྷག་པར་དུ་གཞིས་བཞུགས་པ་དག་ལ་མཚོན་ན། སེམས་ཀྱི་ཟུར་ནའང་། རང་ཉིད་རྒྱ་ནག་གི་མི་སེར་ཡིན་པའི་ཚོར་བ་དེ་རྩ་བ་ནས་མི་འདུག་ཅེས། རྒྱ་རིགས་མཁས་པ་དང་ཁྲིམས་དཔོན་ཁག་ཅིག་གིས་ཉིས་སྟོང་བརྒྱད་ལོའི་ཞི་རྒོལ་ལ་བལྟས་པའི་སྙན་ཐོར་བཀོད་དེ་འདུག

རྒྱ་ནག་གཞུང་གིས་ཏཱ་ལའི་རུ་ཚོགས་ཀྱི་གནས་ཡུལ་དུ་བལྟ་ཡུལ་ནི། དགོན་པ། སློབ་གྲྭ། ལས་ཁུངས། འབྲོག་སྡེ། རོང་སྡེ། གྲོང་ཁྱེར་ཁག་རེད། བོད་ཁུལ་ན་ཏཱ་ལའི་རུ་ཚོགས་ཀྱི་རྗེས་ཞུགས་པ་མེད་ས་ཞིག་མེད་པར་བལྟ་ཡི་ཡོད། མཐོ་བ་བླ་དཔོན། དམའ་བ་ཞིང་འབྲོག་མི་དམངས་ཀྱི་བར། རྒྱ་གཞུང་གིས་ཡིད་ཆེས་བློས་འགེལ་བྱ་ཡུལ་གྱི་བོད་མི་ཞིག་ལོ་ལྔ་བཅུའི་རིང་འདིར་རྙེད་མེད།

ཏཱ་ལའི་རུ་ཚོགས་ཀྱི་སྟོབས་ཤུགས་རྒྱས་པ་ཡིན་ན། དེ་ནི་རྒྱ་གཞུང་གིས་ཆེས་མི་འདོད་ས་དེ་ཆགས་ཡོད། ལྟ་སྟངས་འདི་ནི། བོད་མི་ས་ཡ་དྲུག་གི་སྟོབས་ཤུགས་འདི། རྒྱ་ནག་གཞུང་ཆེས་མི་དགའ་ས་དེ་ཡིན་པའི་ཕྱི་ནང་དང་ཕྱོགས་ངོས་དག་རེད།

གྲོགས་སྤོབས་པ་ལགས། རྒྱ་ནག་གིས་གང་ཞིག་བཤད་ཀྱང་ཁོ་ཚོ་ལ་ཡོད་སའི་རྨ་ཁ་དེ་དེ་ཚོད་ཀྱི་གཟེས་ནས་ན་ཟུག་རྒྱག་བཞིན་ཡོད་མོད། ང་ཚོའི་རྒྱ་ཁྱབ་དང་རྒྱལ་སྤྱིའི་གདེང་འཇོག་དེ་བས་ཆེ་རུ་འགྲོ་བཞིན་འདུག རྒྱ་ནག་གིས་༸གོང་ས་མཆོག་ལ་ཇི་ལྟར་དམའ་འབེབས་དང་འཇིགས་སྐུལ་བྱས་རུང་ཀུན་གྱིས་གུས་བརྩི་དང་། དད་འདུན་དེ་བས་ཆེ་རུ་འགྲོ་བཞིན་འདུག ཁོ་ཚོས་ཏཱ་ལའི་རུ་ཚོགས་ཤེས་ཟབ་ས་ཞིག་ན་བརྗོད་བཞིན་ཡོད་མོད་འཛམ་གླིང་ཧྲིལ་བོའི་དེ་ཚོད་ཀྱི་ཏཱ་ལའི་རུ་ཚོགས་གོང་བཀུར་དང་། བརྩི་མཐོང་བྱེད་བཞིན་ཡོད། དེ་ནི་རྒྱ་ནག་གིས་སྒྲོགས་བཞིན་པ་དག་རྫུན་སྒྲིག་དང་ཁུངས་མེད་གཞི་མེད་ཞིག་ལ་རྩིས་པས་ཡིན། དཔེ་མཚོན་ཙམ་བཤད་ན་རྒྱལ་སྤྱིའི་འཇིགས་སྐུལ་རིང་ལུགས་པར་རྒོལ་རྡུང་དང་རྡུང་འདེག་ཚ་ནན་གཏོང་སྐབས། རྒྱ་གཞུང་གིས་གོ་སྐབས་ཤིག་བླངས་ནས་༸གོང་ས་མཆོག་དང་ཁོའི་རྗེས་འབྲངས་བ་རྣམས་འཇིགས་སྐུལ་རིང་ལུགས་ཡིན་པའི་བྱས་ཉེས་སྒྲོགས་ཁུལ་བྱས་མོད། འཛམ་གླིང་ཧྲིལ་བོའི་མི་དམངས་དང་གཞུང་བཅས་ནས་དེ་ནི་རྒྱ་ནག་གིས་ངན་བཤད་ཞིག་དང་། གཞི་མེད་འཁྱོག་བརྗོད་ཞིག་རེད་ཞེས་ཁ་རྡུང་བཏང་ཡོད་ལ། རྒྱ་ནག་གི་རང་མཚང་རང་གིས་དོན་པ་ལ་གནོངས་འགྱོད་དང་། ཁ་སྐྱེངས་དགོས་པ་ཆགས་པ་རེད། དེའི་སྟབས་ཀྱིས་དེང་རྒྱ་ནག་ལ་ཡིད་ཆེས་ཀྱི་བློ་ཞིག་སྲིད་འཛིན་དང་མི་དམངས་སུ་ལའང་མེད་པ་རེད། དེ་བས་རྒྱ་ནག་གིས་༸གོང་ས་མཆོག་ལ་ག་ཚོད་ངན་སྨོས་བྱས་ན་ང་ཚོད་ལ་དེ་ཚོད་ཀྱི་བློ་བསྐྱེད་དང་རྒྱལ་སྤྱིའི་གདེང་འཇོག་ཀྱང་དེ་ཚོད་ཀྱི་ཆེ་བ་འདུག དེ་བས་ཉིད་ཀྱི་བརྗོད་པ་རྣམས་ཀྱང་དེ་བཞིན་རེད། ཤིན་ཏུ་ལེགས།