ལམ་སྟོན་གསེར་གྱི་ཐུར་མ། དབྱངས་བུ།

བཀའ་སྤྱིའི་འོས་འདེམས་དང་འབྲེལ་བའི་ ༧རྒྱལ་བའི་བཀའ་སློབ་ཟུར་འདོན་ཞུས་པ་དགེའོ།།

གལ་ཆེ་ཤོས་མིའི་ངོ་བོ་དེ་དངོས་གནས་ལས་དོན་གྱི་ཐོག་ལ་རན་པ་དང། འཇུག་པོ་ཡོང་བ་དེར་བསམ་བློ་གཏོང་དགོས། དེའི་ཞོར་ལ་དཔལ་དང་རྒྱན། ཕུན་སུམ་ཚོགས་པའི་ཡན་ལག་ཆོལ་ཁ་ཚང་མའི་མི་སླེབས་ཐུབ་པ་བྱུང་ན་ཨང་ཀི་དང་པོ་རེད། དཔེར་ན། ཨ་མདོ་མི་ཉུང་ཉུང་རེད། ཨ་མདོའི་ནང་ལ་བཀའ་བློན་འོས་པའི་མི་གཅིག་ཁྱོན་ནས་རྙེད་ཀྱི་མི་འདུག་ན། བྱེད་ཐབས་ཡོད་པ་མ་རེད། ང་སྒེར་གྱི་ཐོག་ནས་བཤད་ན་ང་ཨ་མདོ་རེད། ཁྱེད་རང་ཚོས་ང་ལ་བློ་བཞག་ན་འགྲིག་གི་རེད། ཨ་མདོ་བ་རག་གི་མི་འདུག་ན་ཨུ་ཚུགས་རྒྱག་མི་རུང། ཨ་མདོ་གང་ཡང་མི་ཤེས་མཁན་གཅིག་ལ་ཁོས་ཚོང་རྒྱག་རྒྱུ་མ་གཏོགས་གང་ཡང་ཤེས་ཀྱི་མ་རེད་དེ། ཡིན་ནའང་བཀའ་བློན་ལ་བཞག་ན་མ་གཏོགས་འགྲིག་གི་མ་རེད་ཟེར་ལབ་ན་ཤིན་ཏུ་ནོར་འཁྲུལ་རེད།
 
བཀའ་བློན་བྱེད་མཁན་གྱི་མི་དེ་ལ་ལྷག་བསམ་དང་ཤེས་ཡོན་དགོས་ཀྱི་ཡོད་པ་རེད། འགོ་འཁྲིད་མཁན་ཞིག་ཡིན་པར་བརྟེན་ཉིན་རེའི་ལས་ཀ་ཙག་ཙིག་ཐོག་ཚགས་ཚུད་པོ་ཡོང་གི་ཡོད་རུང་མེད་རུང། རྩ་བའི་བསམ་བློ་མང་པོ་འཁོར་ཐུབ་མཁན་ཞིག་དང། གསར་གཏོད་ཀྱི་བསམ་བློ་བཏང་ཐུབ་མཁན་དེ་གལ་ཆེན་པོ་ཡིན། བཀའ་བློན་ཟེར་བ་ནི་ནུས་པ་དང། དབང་ཚད་མཐོ་ཤོས་ཀྱི་མི་གཅིག་ཡིན། དེའི་དབང་ཚད་བེད་སྤྱོད་ཡོང་བ་ལ་མི་དེར་སྤྱི་མོས་ཡོད་དགོས། སྤྱི་མོས་མེད་ན་དབང་ཚད་བེད་སྤྱོད་ཐུབ་པ་དཀའ། ང་རང་ཚོ་སོ་སོའི་ལུང་པའི་ནང་ལ་ཡོད་པ་དང། སྒྲིག་འཛུགས་དཀྱུས་གཅིག་གི་སྒང་ལ་གནས་ཡོད་ན་མིས་སྤྱི་མོས་མེད་ནའང་དབང་ཚད་བེད་སྤྱོད་བྱེད་ཐུབ་ཀྱི་ཡོད་པ་རེད། དེང་སང་ཕྱོགས་གཅིག་ནས་ང་ཚོ་མང་གཙོའི་སྒང་ལ་འགྲོ་གི་ཡོད། གཉིས་ནས་ང་ཚོ་བཙན་བྱོལ་བ་བྱས་ནས་བསྡད་ཡོད་པས་བཀའ་ཤག་ལ་མི་མང་གིས་བརྩི་བཀུར་ཡོང་བ་ལ་བཀའ་བློན་རྣམས་ལ་མང་མོས་ཡོད་པ་དང། སྤྱི་མོས་ཡོད་པ་ཞིག་དགོས་ཀྱི་ཡོད་པ་རེད། སྤྱི་མོས་ཡོང་དང་མ་ཡོང་གི་ཆ་རྐྱེན་གཙོ་བོ་ནི་མི་དྲང་པོ་བྱེད་རྒྱུ་དེ་ཡིན། སུ་ཡིན་ནའང་མི་དྲང་པོ་ཞིག་དང། ལྷག་བསམ་རྣམ་དག མི་བརྟན་པོ་བྱེད་མཁན་ཞིག་ཡོད་ན་དེ་ལ་མང་ཚོགས་ནས་རང་བཞིན་གྱིས་དགའ་མོས་བྱེད་ཀྱི་ཡོད་པ་རེད། འབྱོན་ཐང་ཡོད་པ་གཅིག་པུ་ལ་དགའ་མོས་ཡོང་མིན་སྣ་ཚོགས་རེད། བཀའ་ཤག་ནི་ང་རང་ཚོ་བཙན་བྱོལ་གཞུང་གི་ལས་ཁུངས་མཐོ་ཤོས་ཡིན་པས་དེ་ལ་ལས་བྱེད་མང་ཚོགས་དང་བཅས་པས་བརྩི་བཀུར་ཡག་པོ་ཞིག་ཡོང་བ་ལ་མི་དེ་ཤེས་ཡོན་ཡོད་པ་དང། འབྱོན་ཐང་ཡོད་པ་གཅིག་པུས་མི་འགྲིགས་པར་མི་དེའི་རང་བཞིན་དྲང་པོ་ཡོད་པ། སྐད་ཆ་ངོ་ལྐོག་དང་རྒྱབ་མདུན་བཤད་མཁན་མ་ཡིན་པ་དེ་ཆ་རྐྱེན་གཙོ་བོ་རེད། དེ་གལ་ཆེན་པོ་འདུག
 
དེ་ནས་ང་ཚོ་བཙན་བྱོལ་བ་བྱས་ནས་བསྡད་པའི་རིང་ལ་མཐར་ཐུག་གི་འགན་དེ་ངས་འཁྱེར་བསྡད་ཡོད། ཁྱེད་རང་ཚོ་སྤྱི་འཐུས་ཚོས་ད་ནས་ལོ་ཤས་རིང་ལ་༸རྒྱལ་བ་རིན་པོ་ཆེའི་འཁྲིས་འདིར་རྐང་འགན་འཁྱེར་ནས་སྡོད་དགོས་པས། ཁྱེད་ཚོར་རྟག་པར་རྫ་ཙི་དང། སྒྲོག་འཐུད་རྒྱག་མ་དགོས་པ་ཞིག་བྱེད་དགོས། ཁྱེད་རང་ཚོས་སྔོན་ལ་མི་གཅིག་བཙུགས་བཞག་ན་རྙོག་གྲ་བྱུང་ན་༸རྒྱལ་བ་རིན་པོ་ཆེས་མགོ་ཐག་སངས་ཀྱི་རེད་བསམ་པ་བྱས་ན་ནོར་འཁྲུལ་རེད། ང་ཚོ་བཙན་བྱོལ་བྱས་ནས་སྡོད་པའི་རིང་ལ་༸རྒྱལ་བ་རིན་པོ་ཆེའི་འཁྲིས་འདིར་ལས་དོན་བྱེད་མཁན་བཀའ་བློན་རྣམས་ཀྱང་དེ་བཞིན་དུ་མང་ཚོགས་ཀྱི་སྤྱི་མོས་ཡོད་པ། སྐད་ཆ་རྒྱབ་མདུན་ངོ་ལྐོག་མི་བཤད་མཁན། དངོས་གནས་ལྷག་བསམ་རྣམ་དག་གི་ཐོག་ནས་བོད་སྤྱི་པའི་དོན་དག་ལ་ཕྱོགས་སུ་མ་ལྷུང་བའི་ཐོག་ནས་ལས་ཀ་བྱེད་དགོས། ༸རྒྱལ་བ་རིན་པོ་ཆེ་རིམ་པས་སྤོ་བོ་ཆགས་ཡོང་གི་ཡོད། སྤོ་བོ་ལ་རྙོག་གྲ་ཚ་བོ་མི་བཟོ་མཁན་ཞིག་བྱེད་དགོས། དཀའ་ངལ་གང་ཡང་འཕྲད་ཀྱི་མི་འདུག དོན་དག་ཆེ་བ་གང་ཡང་མེད་མཁན། བྱ་བ་ཁྱོན་ནས་མེད་མཁན་ཆུང་ཙག་གི་ཐོག་ནས་རྙོག་གྲ་བཟོས་ཡོང་དུས་དངོས་གནས་སྐབས་རེ་སྦུག་སྲུབ་དོག་གི་འདུག སྐབས་རེ་ཐང་ཆད་ཀྱི་འདུག བཀའ་བློན་འོས་འདེམས་བྱེད་སྟངས་དེའི་ཐོག་ནས་ཁྱེད་རང་ཚོས་བསམ་བློའི་འཁྱེར་སོ་དེ་བོད་སྤྱི་པའི་དོན་དག་ཚགས་ཚུད་པོ་ཡོང་བ་ཞིག་དང། མ་འོངས་པར་སྤྱི་མོས་དང་ནུས་པ་ཡག་པོ་ཞིག་ཡོང་ཐུབ་པའི་བསམ་བློ་གཏོང་དགོས།། །།
 
བཀའ་སྤྱིའི་འོས་འདེམས་སླེབས་ན་ཉེ་བས། ཚོགས་པ་སྒྲིག་འཛུགས་ཁག་དང། ཆོལ་ཁའི་མིང་ཐོག་ནས་བཀའ་སྤྱིའི་འོས་དམིགས་རང་རང་སོ་སོའི་ཁོངས་གཏོགས་ནས་འདོན་སྤེལ་བྱེད་མཁན་མི་ཉུང་བ་ཞིག་དྷ་སའི་ཁུལ་ལ་མཐོང་ཐོས་ཅི་རིགས་ཡོད་པར་དམིགས་ཏེ། དབྱངས་བུས་ཕྱི་ལོ་་༡༩༩༡ ཟླ་ ༧ ཚེས་ ༤་ཉིན་སྤྱི་འཐུས་སྐབས་བཅུ་གཅིག་པའི་ཚོགས་གཙོ་གཞོན་གཉིས་དམ་འབུལ་སྐབས་སྩལ་བའི་བཀའ་སློབ་ལས་ཟུར་འདོན་དང་། འགྲེམས་སྤེལ་བྱས་པ་དགེའོ།།