ཁེར་རྐྱང་གིས་བོད་ཀྱི་ཆེད་དུ་འཛམ་གླིང་སྐོར་བཞིན་པ། སྤོབས་པ་མཐའ་ཡས།

བོད་དོན་འཛམ་གླིང་སྐོར་སྐྱོད་པ་ལྷག་པ་ལགས་འདིར་འབྱོར་སོང་། ངས་ཁོང་གི་བོད་དོན་སྐོར་སྐྱོད་དེའི་སྐོར་སྔ་མོ་ནས་ཐོས་བཞིན་ཡོད་མོད་འདིར་ཕེབས་རྒྱུ་ཡིན་པ་སེམས་ལ་ཡང་འཁོར་མ་མྱོང་། ང་སྡོད་སའི་གྲོང་བརྡལ་གཉིད་དུབ་བེ་བ་དེར་ཞག་གཉིས་བཞུགས་སོང་། ནམ་མཁའ་དྭངས་ཤིང་ཉི་འོད་གསལ་བའི་ཉིན་གུང་ཞིག་ལ་ངས་ཉ་ཤ་དང་ཞོགས་ཁོག་སྣུམ་བརྔོས་མ་ཞིག་མཚོ་རགས་ཀྱི་སྟེང་དུ་ཟོས་ནས་གྲུ་ཁའི་ཁྲོམ་སྲང་ཆུང་ངུ་དེ་ནས་ཡོང་སྐབས་BMWསྦག་སྦག་འཁོར་ལོ་འོད་ལམ་ལམ་ཞོན་མཁན་ཞིག་གིས་ལྟག་རྒྱབ་ཏུ་བོད་ཀྱི་རྒྱལ་དར་ཆེན་པོ་ཞིག་འཕྱར། ཕྱི་ཤེད་དུ་གཟར་བའི་གཡས་གཡོན་གྱི་སྒམ་གཉིས་ཀྱི་སྟེང་དུ་ཡང་བོད་ཀྱི་རྒྱལ་དར་རེ་རེ་སྦྱར། སྟོད་གོས་ཀྱི་ཕུ་དུང་སྟེང་དུ་ཡང་བོད་ཀྱི་རྒྱལ་དར་རེ་སྦྱར་འདུག དབུའི་རྨོག་གི་སྟེང་དུ་ཡང་བོད་ཀྱི་རྒྱལ་དར་སྦྱར་འདུག ཁོང་གི་བཟོ་ལྟ་དེ་ནི་བོད་ཀྱི་གཞི་བདག་རི་སྒང་གི་ལབ་ཙེ་ལྟ་བུ་ཞིག་རེད། དོན་དུ་ཡང་བོད་ཀྱི་དུས་རབས་གསར་བའི་དགྲ་བླ་གཞི་བདག་ངོ་མ་ནི་ཁོང་དང་ཁོང་ལྟ་བུ་ཚོ་ཡིན་སྟབས་གཞི་བདག་ཅིག་གི་ཚོད་དུ་བརྩི་ཆོག་པར་སེམས། ངས་ཐོག་མ་ཁོང་བོད་མི་ཞིག་ཡིན་པ་སེམས་ལ་ཡང་མ་འཁོར། ཕྱི་གླིང་པ་བོད་དང་བོད་མིར་དགའ་མོས་ཡོད་མཁན་ཞིག་ཡིན་པ་གཞིར་བཞག་གིས་ཕར་འགྲམ་དུ་བརྒྱུགས་ནས་སྨྱོན་པ་བཞིན་དུ་རྒྱལ་དར་ལ་མཛུབ་མོ་ཀེར་ནས་འདི་ན་ངའི་རྒྱལ་དར་འདུག་ཅེས་སྐད་ཆེན་པོས་བརྗོད་པ་ཡིན། དེར་ཁོང་གིས་སྦག་སྦག་བཀག་ནས་རྨོག་གི་འོག་ནས་སྐད་ཆ་ལྡབ་ལྡིབ་ཅིག་ལབ་ཀྱིན་འདུག་མོད་འདིར་མཚོའི་རླབས་སྒྲ་དང་རླུང་གི་ཤུར་སྒྲ་ཆེ་སྟབས་ཚིག་འབྲུ་གསལ་པོ་ཞིག་གོ་ཐུབ་ཀྱིན་མི་འདུག དེར་ཁོང་གིས་ཀྱང་ངས་གསལ་པོར་མ་ཐོས་པ་ཤེས་ནས་རྨོག་དེ་མར་ཕུད་ནས་ངའི་མིང་ལ་ལྷག་པ་ཟེར་བ་ཡིན་གསུངས་བྱུང། ངོ་མཚར་དང་དགའ་སྤྲོ་ཆེ་བ་ལ་ཚོད་ཅིག་མ་བྱུང་།

དེ་མ་ཐག་ཏུ་ངས་ཀྱང་མི་དེ་ནི་བོད་དོན་སྐོར་བསྐྱོད་པ་ལྷག་པ་ལགས་ཡིན་པ་དྲན་པས་ཟིན། ཁོང་ནི་གཟུགས་རིང་ཐུང་འབྲིང་ཙམ་སྟེ་བོད་ཀྱི་སྐྱེས་པའི་ཆ་སྙོམ་གྱི་ལུས་ཚད་ཡིན་པ་ལ་ལུས་རྩལ་པའི་ཉམས་སྟོབས་ཀྱང་ཅུང་མངོན་ཡོད་པ་ཞིག་རེད། དེའི་སྟེང་ལ་དབུ་སྐྲ་ཅུང་རིང་པོ་ཞིག་ལྟག་རྒྱབ་ཏུ་ཆུན་པོར་བཅིངས་ནས་གཟར་འདུག བཞིན་རས་གཞི་ནས་དཀར་ན་ཡང་ཡུན་རིང་པོའི་ཉི་འོད་དང་རླུང་ཁྲོད་ཀྱི་འགྲུལ་བཞུད་དེའི་རྐྱེན་གྱིས་འཁུར་ཚོས་དང་སྣ་གདོང་སོགས་དམར་ནག་དུ་གྱུར་འདུག མགོ་སྤུ་ཁ་སྤུ་གདོང་སྤུ་གསུམ༎སྐྱེས་ཕོ་རབ་ཅིག་གི་རྒྱན་ཆ་ཡིན༎ཟེར་བ་བཞིན་ཁོང་གི་དབུ་སྐྲ་དང་། གདོང་མཐའ་ཡོངས་སུ་འཁོར་བའི་རྒྱ། མ་མཐའ་ཡང་བདུན་ཕྲག་ཁ་ཤས་རིང་མ་བཞར་བའི་ཁ་སྤུ་དེས་དེ་ལས་ཀྱང་སྐྱེས་ཕོ་རབ་ཅིག་གི་གཟི་བརྗིད་བསྣན་འདུག རང་རེ་བོད་ཀྱི་སྐྱེས་པ་མང་པོ་ཞིག་གི་གདོང་དབྱིབས་ཉི་ཧོན་པ་དང་མཚུངས་ཆེ་བ་བཞིན་ལྷག་པ་ལགས་ཀྱང་ཉི་ཧོན་དུ་ཕེབས་སྐབས་ཉི་ཧོན་པ་ཚོས་ཉི་ཧོན་གྱི་མི་ཞིག་ཡིན་པར་འཁྲུལ་ནས་ཟས་ཁང་ནང་དུ་ཡང་ཉི་ཡིག་གི་ཟས་ཐོ་སྟེར་གྱིན་འདུག་གསུངས། སྤྱིར་ཁོང་གི་སྐོར་སྐྱོད་ལས་འགུལ་དེ་ངོ་མཚར་ཆེ་ཐོག་དེ་རིང་ངེད་ཚོ་འདིར་ཐུག་སྟངས་དེ་དེ་ལས་ཀྱང་ངོ་མཚར་དང་སྟེས་དབང་ཁྱད་མཚར་ཞིག་རེད། དེར་ཁོང་གིས་ཇ་ཁང་ཞིག་ཏུ་སོང་ནས་འདུག་པའི་དགོངས་འཆར་བཏོན་པ་བཞིན་ངེད་ཚོས་ཉེ་འགྲམ་གྱི་ཇ་ཁང་ཞིག་ལས་ཇ་ཕོར་གང་རེ་བླངས་ནས་ཉི་འོག་འོག་ཏུ་གླེང་མོལ་ཞིག་གིས་མགོ་བཙུགས། ཕྱི་ཉིན་ངེད་ཀྱི་ནང་དུ་གསོལ་ཚིགས་ཤིག་ལ་ཕེབས་པའི་ཞལ་བཞེས་གནང་བྱུང་། ཕྱི་ཉིན་སྔ་དྲོ་ཁོང་མཚོ་རླབས་ཞོན་པའི་སྐྱལ་རྩེད་ལ་ཕེབས་སོང་། དགོང་དྲོ་ངའི་ནང་དུ་ཕེབས་ནས་ལྷོད་བཞུགས་གནང་།

ཕ་ཡུལ་བོད་ནུབ་ཕྱོགས་ཕག་རི་ནས་ཡིན་པའི་སྐུ་ཞབས་ལྷག་པ་ལགས་ཀྱི་ཟླ་བ་བརྒྱད་ཀྱི་རིང་ལ་ཡུལ་གྲུ་ཉི་ཤུ་རྩ་གཉིས་ཙམ་ལ་སྐོར་སྐྱོད་བྱ་རྒྱུའི་བོད་རང་དབང་གི་ཆེད་དུ་འཛམ་གླིང་གི་སྐོར་སྐྱོད་དེ་ཉུའུ་ཡོག་གྲོང་ཁྱེར་དུ་ཡོད་པའི་རྒྱལ་ཚོགས་མཉམ་འབྲེལ་གྱི་ལས་ཁུངས་མདུན་དུ་གསུམ་བཅུ་དུས་དྲན་ཉིན་ནས་མགོ་བཙུགས་ཤིང་ད་ལོའི་ལོ་མཇུག་ཏུ་བཞུགས་སྒར་རྡ་རམ་ཤ་ལར་མཇུག་དྲིལ་རྒྱུ་རེད། དེ་ཡང་རྒྱ་གར་དུ་ཆར་དུས་མཇུག་རྫོགས་ཙམ་ལ་རྒྱ་གར་ལྷོ་ཕྱོགས་ཀྱི་གྲོང་ཁྱེར་ཆེན་པོ་ཅེན་ནེ་ནས་མགོ་བཙུགས་ཏེ་རྒྱ་གར་ནང་ལ་སྐོར་སྐྱོད་བྱ་རྒྱུའི་འཆར་གཞི་འདུག

ལྷག་པ་ལགས་ཀྱིས་བཀའ་མོལ་གནང་སྐབས་ལྷོད་ཤ་ཡོད་པ་དང་སྐད་གདངས་དམའ་མོས་གསུངས་ཀྱིན་འདུག ཡིན་ན་ཡང་ཚིག་བེད་སྤྱོད་བྱེད་སྟངས་ཀྱི་ཆ་ནས་གནད་འདུས་དང་། ཁ་གསལ་བ། གནད་དོན་ཆེ་ཕྲ་མང་པོ་རྩད་ཞིབ་གནང་མཁན། ཁ་ཐུག་ཏུ་བཤད་མཁན། དེ་བཞིན་ཚིག་རྣོན་པོ་བེད་སྤྱོད་དང་གནད་དོན་གཏིང་ཟབ་དང་འབྲེལ་ནས་གསུངས་མཁན་ཞིག་རེད། འབྱུང་ལ་ཉེ་བའི་བཀའ་བློན་ཁྲི་པའི་སྐོར་ལ་ཁོང་གིས་བློ་བཟང་སེང་གེ་མཆོག་ལ་རེ་བ་དང་ཡིད་ཆེས་ཆེན་པོ་གནང་གིན་འདུག དེ་ཡང་མདོར་བསྡུས་ན་ན་གཞོན་དང་། དེང་རབས་ཤེས་ཡོན་ཅན། གྲྭ་བ་མིན་མཁན་ཞིག་སླེབས་པར་འདོད་མོས་ཡོད་གསུངས་གི་འདུག དེ་བཞིན་དུ་ད་ལྟའི་ཆར་བོད་མི་མང་པོས་བོད་རང་སྐྱོང་ལྗོངས་ཡོང་བའི་རེ་འདུན་ལ་ཡིད་ཆད་ནས་དེ་ལས་ལྡོག་སྟེ་རང་བཙན་རང་ལ་ཤུགས་རྒྱག་དགོས་པའི་བསམ་འཆར་ཡོང་བ་དེ་ལ་རྒྱུ་མཚན་ཡོད་པ་རེད་གསུངས། ཡིན་ན་ཡང་ཁོང་རང་ཉིད་ཀྱིས་རང་སྐྱོང་དང་རང་བཙན་གང་ཞིག་ལ་བསྐྱོད་དགོས་པའི་འདོད་མོས་ཡོད་སྐོར་ཁ་གསལ་ཞིག་གསུངས་མ་སོང་། གྲྭ་བཙུན་ཚོར་འོས་ཤོག་གཉིས་ཀྱི་ཐོབ་ཐང་ཐོབ་ཐང་ཡོད་པ་དེར་ཡང་དགའ་མོས་གནང་གིན་མི་འདུག

བོད་ཁྱིམ་སློབ་གྲྭ་རུ་ལུས་སེམས་གཉིས་ཀ་འཚར་ལོངས་བྱུང་ཞིང་དགུང་ལོ་༤༡ལ་སོན་པ་སྐུ་ཞབས་ལྷག་པ་ཚེ་རིང་ལགས་ཀྱིས་ཁོང་གི་ད་ལྟའི་འགྲུལ་བཞུད་ཀྱི་སྐོར་ནས་གསུངས་སྐབས་ཁོང་ལོ་ན་གཞོན་དུས་ཤིག་ནས་འཛམ་གླིང་ཡོངས་རྫོགས་ལ་སྐོར་སྐྱོད་ཅིག་བྱ་འདོད་ཡོད་ཅིང་དེ་ཡང་སྤྲོ་མཚར་གཅིག་པོའི་ཆེད་དུ་མིན་པར་བོད་དོན་འཐབ་རྩོད་ཀྱི་ཆ་ཤས་ཤིག་ལ་བསྒྱུར་འདོད་ཡོད་འདུག། འགྲུལ་བཞུད་དེའི་ཆེད་དུ་ལོ་གཉིས་ཀྱི་རིང་ལ་དངུལ་བསགས་པ་ཚང་མས་འདངས་ལ་མི་འདངས་བར་གྱུར་ཡོད་མོད་འདི་ནི་དེ་ཙམ་བློས་བཏང་བྱེད་ཆོག་ས་ཞིག་ཡིན་སྟབས་ཡིད་ཚིམ་བཞིན་ཡོད་གསུངས། ཁོང་གི་སྐོར་སྐྱོད་དེ་ལ་བརྟེན་ནས་འཛམ་གླིང་གང་སའི་མི་ཧ་ཅང་མང་པོ་ཞིག་དང་ཐུག་འཕྲད་བྱུང་ཞིང་ཁོང་གིས་འཁུར་ཡོད་པའི་བོད་ཀྱི་རྒྱལ་དར་ཆེན་པོ་དེའི་ངོས་སུ་བོད་དོན་རྒྱབ་སྐྱོར་མཚོན་པའི་མིང་རྟགས་ཀྱི་ཁེངས་བཞིན་ཡོད་པ་འདི་ཤིན་དུ་དགའ་འོས་པ་ཞིག་རེད་གསུངས། ཁོང་གིས་སྐུ་ཟླ་དང་། ལོ་ངོ་བཞི་དང་ཕྱེད་ལ་སོན་པའི་བུ་མོ། མགྲོན་གཉེར་གྱི་ལས་ཀ་སོགས་རྒྱབ་དུ་བཞག་ནས་འདི་ལྟ་བུའི་འགྲུལ་བཞུད་རིང་པོ་ཞིག་བྱེད་དགོས་དོན་དེ་ནི་བོད་ནང་དུ་ཡོད་པའི་བོད་མི་ཚོའི་ཆེད་དུ་སྐད་སྒྲ་ཞིག་འདོན་དགོས་ཀྱིན་ཡོད་པ་རེད། ད་ལྟའི་འགྲུལ་སྐྱོད་འདི་ལ་བརྟེན་ནས་ངས་ཀྱང་བོད་ནང་གི་བོད་མི་ཚོའི་ཆེད་དུ་སྐད་སྒྲ་ཞིག་འདོན་ཐུབ་པའི་རེ་བ་ཡོད་གསུངས། དེ་བཞིན་བོད་ནང་གི་བོད་མི་ཚོར་ང་ཚོ་འཛམ་གླིང་ཕྱོགས་མཐའ་གང་སར་ཡོད་པའི་བོད་མི་ཚང་མ་ཡང་བོད་ནང་གི་སྤུན་ཟླ་བོད་མི་ཚོའི་ཕྱོགས་སུ་ལངས་ཡོད་པ་ཤེས་སུ་འཇུག་འདོད་ཡོད་གསུངས།

ངེད་ཚོའི་ས་གནས་འདིའི་གསར་ཤོག་འགོད་མཁན་ཡང་ངོ་མཚར་ཆེན་པོས་ཆེད་དུ་བཅར་ཞིང་ཕྱི་ཉིན་གྱི་ཚགས་ཤོག་གི་མདུན་ངོས་སུ་ཁོང་དང་ཁོང་གིས་བོད་ཀྱི་གནད་དོན་འགྲེལ་བཤད་རྩོམ་ཡིག་རིང་ཙམ་བཀོད་འདུག རྩོམ་ཡིག་དེའི་ཁ་བྱང་ལ། གཅེས་པའི་ཕ་ཡུལ་བོད་སྐྱོབ་པའི་ཆེད་དུ་འཛམ་གླིང་རིལ་བོར་ཁེར་རྐྱང་གི་འགྲུལ་སྐྱོད་པ། ཅེས་བྲིས་འདུག ང་ཚོའི་གྲོང་བརྡལ་དེ་ནི་གཉིད་དུབ་བེ་བ་དང་ཁུ་སིམ་མེ་བ་ཞིག་ཡིན་སྟབས་སྐུ་ཞབས་ལྷག་པ་ལགས་ཀྱི་སྐོར་དེ་ཧ་ཅང་ངོ་མཚར་དང་འཁྲུག་ཆ་ཡོད་པའི་རྩོམ་ཡིག་ཅིག་ཏུ་གྱུར་འདུག དེར་བརྟེན་ང་ཚོར་ཚུར་ཐུགས་རྗེ་ཆེ་མ་ཞུས་ན་ཡང་ཕར་ཞུ་དགོས་ཆེར་མ་མཆིས་མོད། ཁོང་གི་ལས་འགུལ་འདིར་རྒྱབ་སྐྱོར་ཡོད་པ་མཚོན་ཆེད་དུ་ང་དང་འབྲེལ་ཡོད་ཁ་ཤས་རེས་ཚགས་ཤོག་ཁང་དེ་ལ་ཐུགས་རྗེ་ཆེ་ཞུ་བའི་ཁ་པར་ཡང་གཏོང་ཁུལ་བྱས།

ཁོང་གི་ཁྱིམ་ཚང་གི་སྐོར་ནས་གསུངས་སྐབས་མཆེད་ཁུངས་ར་ཤི་ཡ་ནས་ཡིན་པའི་ཁོང་གི་སྐུ་ཟླ་དང་ཁོང་གཉིས་ལ་བུ་མོ་ལོ་བཞི་དང་ཕྱེད་ལ་སོན་པ་ཞིག་ཡོད་ཅིང་། ་མེ་རི་ཁའི་ཡུལ་དུ་འབྱོར་འབྲིང་གྲལ་རིམ་གྱི་ཁྱིམ་ཚང་ཚོར་ལྟ་སྐྱོང་རོགས་སྐྱོར་ཡག་པོ་མེད་སྟབས་བྱིས་པ་གཉོར་སྐྱོང་དེ་དཀའ་ངལ་ཆེན་པོ་ཡིན་གསུངས། ཁོང་གི་ཁྱིམ་ཚང་ལ་ཡང་བུ་མོ་ཆུང་ཆུང་དེ་སྐྱེས་པའི་སྔ་རྗེས་སུ་ལོ་གཉིས་དང་ཕྱེད་ཙམ་ལ་སྐུ་ཟླ་ལས་ཀར་འགྲོ་ཐུབ་མེད་ཅིང་ཁོང་གཅིག་པོའི་ཡོང་སྒོ་དེ་ཁྱིམ་ཚང་གང་གི་འཚོ་རྟེན་བྱེད་དགོས་བྱུང་སོང་གསུངས། ལྷག་པ་ལགས་ཀྱི་བོད་ཅེས་པ་འདི་གསོན་གནས་ཀྱི་ཐབས་ལམ་ངོ་མ་ནི་བོད་ཀྱི་སྐད་ཡིག་འདི་ལ་ངོས་འཛིན་ཞིང་དེ་ཡང་ཁྱིམ་ཚང་གི་ཁོར་ཡུག་ནས་རྩ་བ་ཚུགས་དགོས་པ་ཞིག་ལ་ངོས་འཛིན་གནང་། ཁོང་གི་བཟའ་ཟླས་བོད་སྐད་མི་ཤེས་ན་ཡང་ཁོང་གིས་རང་གི་བུ་མོ་ལ་བོད་སྐད་ཀྱི་སྟེང་ནས་གོ་བརྡ་ཅི་འཕྲོད་གང་འཕྲོད་བྱེད་ཀྱིན་ཡོད་གསུངས། ལྷག་པར་ད་ལྟའི་ཆར་ཁོང་ལ་བོད་མི་ཁྱིམ་མཚེས་ཤིག་ཡོད་པ་དེ་བཟའ་ཚང་གང་བོས་བོད་སྐད་རྒྱག་གིན་ཡོད་སྟབས་དེས་ཁོང་གི་བུ་མོའི་བོད་སྐད་ཀྱི་རྨང་གཞི་ཅུང་བརྟན་པོ་ཡོང་པར་ཕན་ཐོགས་ཆེན་པོ་འདུག་གསུངས་ནས་དགྱེས་ཚོར་ཆེན་པོ་གནང་གིན་འདུག

ཁོང་གིས་ཨ་མེ་རི་ཁའི་ཡུལ་གྱི་སྤྱི་ཚོགས་དང་འཚོ་བའི་སྐོར་ནས་གླེང་སྐབས་ཡུལ་དེར་འབྱོར་ལྡན་དང་། འཇོན་ཐང་ཅན། ཤེས་ཡོན་ཅན་སོགས་ལ་མདུན་ལམ་ཡོད་ས་ཞིག་དང་མི་སེར་བྱིངས་ལ་དཔལ་འབྱོར་གྱི་ཕྱོགས་ནས་ཁེ་ཕན་དེ་ཙམ་མི་ཆེ་ས་ཞིག་དང་། ལྷག་པར་ཡང་འབྱོར་འབྲིང་གྲལ་རིམ་གྱི་ཁྱིམ་ཚང་ཚོར་གཞུང་ངོས་ནས་ཡར་ཁྲལ་བསྡུ་བ་མ་གཏོགས་མར་ལྟ་རྟོག་དེ་ཙམ་མེད་སྟབས་དཀའ་ངལ་སེམས་ཁྲལ་ཆེ་ས་ཞིག་ཡིན་སྐོར་གསུངས་བྱུང་། དེ་ནི་ཁོང་གིས་ཡུ་རོབ་སོགས་ཀྱི་འབྱོར་ལྡན་ཡུལ་གྲུ་གཞན་དང་བསྡུར་ནས་གསུང་གིན་ཡོད་པ་རེད། སྲིད་འཛིན་སྔོན་མ་བྷུ་ཤིའི་དམག་འཁྲུགས་བསླངས་པ་དང་འཛིན་སྐྱོང་བྱེད་སྟངས་དེས་ཡུལ་དེར་གནོད་སྐྱོན་ཆེན་པོ་སོང་ཡོད་གསུངས་བྱུང་། དེང་དུས་སུ་སྲིད་འཛིན་བྷི་རག་་ཨོ་བྷ་མ་ལགས་ཀྱིས་འཕྲོད་རྟེན་ལྟ་སྐྱོང་སོགས་འཆར་གཞི་ཡག་པོ་ཡོད་ཀྱང་ལག་ལེན་དངོས་སུ་བསྟར་སྐབས་དེ་ཡང་སྲིད་འཛིན་རང་གིས་ཐུགས་མོས་གནང་བ་ལྟ་བུའི་ཕན་ཐོགས་ཡོད་པ་ཞིག་ཡོང་ཐུབ་ཀྱིན་མི་འདུག་ཚུལ་གསུངས་བྱུང་།

ངས་ཁོང་དང་འཕྲད་པའི་སྐོར་གྱི་ཕྱིར་དྲན་འདི་འདི་འབྲི་སྐབས་ངའི་སེམས་ངོས་སུ་སྐུ་ཞབས་ལྷག་པ་ལགས་ཀྱི་འགྲུལ་བཞུད་ཀྱི་རྣམ་པ་ཞིག་ཤར་ཡོང་གིན་འདུག བོད་མི་རེ་ངོ་རེའི་སེམས་ཁོངས་ན་གཟི་བྱིན་ལམ་ལམ་དུ་གཡོ་བཞིན་པའི་གངས་སེང་དར་ཆ་ཆེན་པོ་དེ་ཡང་ཁོང་གི་ལ་རྒྱ་བརྟན་པོ་དང་ཆོད་སེམས་ཆེན་པོ་དེ་དང་འགྲོགས་ནས་སྦག་སྦག་འཁོར་ལོའི་རྒྱབ་ཏུ་བསྐྱོད་བཞིན་རི་མཐོན་པོ་དང་། ལ་གཟར་བོ། ཐང་ཆེན་པོ་ཇི་སྙེད་ཅིག་བརྒྱུད་ནས་ལམ་ཆེ་འབྲིང་ཆུང་གསུམ་དང་རིང་ཐུང་བར་མ་སྣ་ཚོགས་ཤིག་རྡོག་འོག་ཏུ་མནན། མི་རིགས་ཀྱི་ལ་རྒྱ་དང་ཕ་ཡུལ་གྱི་ཞེན་པ་ལྕི་མོ་ཞིག་གིས་མདུན་ནས་མདུན་དུ་དྲངས་ཏེ་ཚ་གདུག་དང་། ཆར་ཞོད། རླུང་འཚུབ་གང་གིས་ཀྱང་མ་ཁོགས་པར་འཛམ་གླིང་རིལ་བོའི་ཆེ་ཆུང་གཞལ། ཕྱི་མི་དང་བོད་མི། དགྲ་ཕྱོགས་དང་རང་ཕྱོགས། སེམས་ཁུར་ཡོད་མེད་ཀྱི་མི་སྣ་ཆེས་མང་པོ་ཞིག་གིས་ཁོང་གི་སྣང་བརྙན་དེ་བརྒྱུད་ནས་འཛམ་གླིང་གི་ཡང་རྩེའི་བོད་ཀྱི་རྒྱལ་ཁབ་ཆེན་པོ་དེའི་ལས་དབང་ལ་བསམ་གཞིག་རེ་དབང་མེད་བྱུང་ཡོད་ངེས།

མཐའ་དོན། ཁོང་གིས་སྐུ་གཟུགས་བདེ་ཐང་དང་བྱ་བ་ལམ་ལྷོངས་ཡོང་བར་སྨོན་པ་དང་ཆབ་ཅིག། ཁོང་གང་དུ་ཕེབས་པའི་སར་གནས་པའི་བོད་མི་ཚོས་གང་ནུས་ཀྱིས་མཐུན་འགྱུར་རོགས་རམ་ཞུ་བ་དང་། བཞུགས་སྒར་རྡ་རམ་ས་ལར་ཕེབས་འབྱོར་སྐབས་སུ་སྤྱི་སྒེར་ཚོགས་པ་ཚོས་ཀྱང་ཐུགས་རྗེ་ལེགས་གསོལ་སྣེ་ལེན་ལེགས་པོ་ཞིག་བྱེད་པའི་རེ་སྐུལ་ཞུ་རྒྱུ་ཡིན། དེ་བཞིན་དུ་མ་འོངས་པར་ཡང་བོད་མི་སུ་ཞིག་གིས་ཀྱང་འདི་ལྟར་འཛམ་སྐོར་སྐྱོད་སོགས་བྱ་ནུས་ན་དེ་ཡང་སྒེར་ངོས་ནས་ས་ཆོད་ཆེ་བའི་ལས་འགུལ་སྤེལ་སྟངས་ཤིག་རེད་འདུག་པས་འཛམ་གླིང་གི་ས་གནས་གང་སར་འཁོད་པའི་བོད་མི་ཚོས་གང་ནུས་ཀྱི་རོགས་ཕན་རེ་ཞུ་དགོས་པར་སེམས།

 ཁོང་ས་གནས་གང་སར་བསྐྱོད་པའི་སྒེར་གྱིས་ཟིན་ཐོ་སོགས་གཟིགས་འདོད་མཁན་ཚོར་ཁོང་གི་དྲ་བྱང་འདི་རེད། www.freetibetworldtour.com