ཉིན་འདི་འགར་འདི་ལོའི་བོད་ཀྱི་མཛངས་མ་བསྟན་འཛིན་ནོར་འཛོམས་ལགས་ཀྱིས་རྒྱ་གར་ཡུལ་མི་བོད་དོན་རྒྱབ་སྐྱོར་བ་མཱ་ཧེ་ཞ་༲༲( Dr. Mahesh Yadav ) ལགས་དང་མཉམ་དུ། བོད་དོན་གྱི་ལས་འགུལ་སྤེལ་གྱིན་བཞུགས་སྒར་ངྷ་ས་གཙོས་རྒྱ་གར་ནང་གི་བོད་མི་འདུས་སྡོད་ཀྱི་ས་གནས་ཁག་ཅིག་ཏུ་ཕྱོགས་སྐྱོད་བྱེད་བཞིན་པ་དང་། མི་རིང་བར་ཨ་རི་སོགས་སུའང་བསྐྱོད་འཆར་འདུག་ལ། ཕྱི་ཚེས་ ༡༣ ཉིན་འདི་གའི་གསར་འགོད་པས་ཁོ་མོར་སྤྱིར་བཏང་གི་དྲི་བ་འགའ་དྲིས་པར་ཁོ་མོས་ལན་འདེབས་བྱས།
བོད་ཀྱི་དུས་བབ། ཁྱེད་རང་འདི་ལོའི་བོད་ཀྱི་མཛངས་མའི་རྒྱལ་ཁ་ཐོབ་མཁན་དང་། ཉེ་ཆར་ཝར་ཎ་མཐོ་སློབ་ཁང་ནས་ཤཱསྟྲི་ཐོན་མཁན་ཞིག་ཡིན་སྟབས། མ་འོངས་པར་བོད་མིའི་སྤྱི་ཚོགས་ནང་ལས་ཀ་གང་འདྲ་ཞིག་བྱེད་འདུན་ཡོད་དམ། བོད་ཀྱི་མཛངས་མ། བོད་ཀྱི་མཛངས་མའི་འགྲན་བསྡུར་མ་བྱས་གོང་ནས་ངས་བོད་དོན་ཐོག་ལ་གང་ཐུབ་ཐུབ་ཅིག་ཤུགས་རྒྱག་གི་ཡིན་ཞེས་བཤད་མྱོང་ལ། འདི་ལོའི་བོད་ཀྱི་མཛངས་མའི་རྒྱལ་ཁ་ཐོབ་པ་ནས་བཟུང་། བོད་དོན་རྒྱབ་སྐྱོར་བ་མཱ་ཧེ་ཞ་ལགས་དང་མཉམ་དུ་བོད་དོན་ཆེད་ལས་འགུལ་སྤེལ་རྒྱུར་རོགས་རམ་བྱེད་ཀྱིན་ཡོད། ཉེ་ཆར་ང་ཚོས་འཕྲེད་དར་རིང་བོ་ཞིག་གི་སྟེང་དུ་མཚན་རྟགས་བསྡུ་རུབ་ཀྱི་ལས་འགུལ་ཞིག་མགོ་འཛུགས་བྱས་ཡོད་ལ། དེའི་ཐོག་མའི་འཆར་འགོད་པ་ངས་བྱས་པ་དང་འཕྲེད་དར་དེའི་རིང་ཚད་ལ་ཕི་ཊྲི་ ༥༡ ཙམ་ཡོད། འཕྲེད་དར་དེ་མཉམ་འབྲེལ་རྒྱལ་ཚོགས་སུ་འབུལ་འཆར་ཡོད་ལ། ད་ལྟའི་ཆར་ངས་ལས་འགུལ་དེ་ལེགས་འགྲུབ་ཡོང་རྒྱུར་རོགས་རམ་བྱེད་ཀྱིན་ཡོད།
བོད་ཀྱི་དུས་བབ། ཁྱེད་རང་སྒེར་ངོས་ནས་མ་འོངས་པར་བོད་དོན་ཆེད་ལས་འགུལ་འདྲ་སྤེལ་འཆར་ཡོད་དམ།
བོད་ཀྱི་མཛངས་མ། སྒེར་ངོས་ནས་བཤད་ན། ད་ལྟ་ང་ད་དུང་སློབ་ཕྲུག་རེད། ངས་ད་དུང་གཙུག་ལག་རབ་འབྱམས་པའི་ཐོག་སློབ་སྦྱོང་བྱེད་དགོས་པ་རེད་ལ། ལོ་གཉིས་རིང་བསྐྱར་དུ་སློབ་སྦྱོང་བྱ་རྒྱུར་ལྷག་ཡོད། ད་ལྟའི་དམིགས་འདུན་ལྟར་ན་སློབ་ཞོར་དུ་བོད་དོན་རྒྱབ་སྐྱོར་བ་མཱ་ཧེ་ཞ་ཁོང་ལ་རྒྱབ་སྐྱོར་གྱི་ལས་འགུལ་སྤེལ་རྒྱུ་དང་། ཤེས་ཡོན་གཞན་པའི་སྟེང་དུ་སློབ་སྦྱོང་བྱས་ཏེ་རང་ཉིད་ཀྱི་ཤེས་ཡོན་གནས་ཚུལ་གོང་མཐོར་གཏོང་རྩིས་ཡོད།
བོད་ཀྱི་དུས་བབ། བོད་ཀྱི་མཛངས་མ་ཞེས་པའི་མིང་དེ་ཐོགས་པ་ནས་བཟུང་། ནམ་རྒྱུན་གྱི་མི་ཞིག་གི་གནས་བབ་ལས་ཡར་བུད་ཡོད། ཁྱེད་རང་སྟེང་ནས་བོད་ཀྱི་མཛངས་མའི་མིང་དེ་ཐོབ་པ་ནས་བཟུང་ད་ལྟའི་བར་དུ་སྔར་དང་མ་འདྲ་བ་ག་རེ་མཐོང་གིན་འདུག
བོད་ཀྱི་མཛངས་མ། བོད་ཀྱི་མཛངས་མའི་འགྲན་བསྡུར་གྱི་རྒྱལ་ཁ་མ་ཐོབ་གོང་དུ་ང་ནམ་རྒྱུན་གྱི་མི་དཀྱུས་མ་རང་རེད། ད་ལྟ་སྤྱི་ཚོགས་ནང་ཡར་མར་འགྲོ་དུས་མི་ཚང་མས་ངོ་ཤེས་ཀྱི་ཡོད་ལ་བལྟས་ཀྱང་བསྡད་ཡོད་སྟབས། ང་རང་ཉིད་ཀྱིས་གང་ཐུབ་ཐུབ་བྱེད་ཀྱིན་ཡོད། སྤྱིར་བཏང་ནས་མཛངས་མའི་འགྲན་བསྡུར་ལས་རྒྱལ་ཁ་ཐོབ་རྗེས་ང་རང་ཉིད་ལའང་འགྱུར་བ་མང་བོ་ཞིག་ཕྱིན་སོང་།
བོད་ཀྱི་དུས་བབ། ཁྱེད་ཀྱིས་བསམ་ན་མི་ཞིག་བྱེད་པར་གཞི་རྩའི་ཆ་རྐྱེན་གང་འདྲ་ཞིག་ཚང་ན། ད་གཟོད་མི་ཟེར་བ་དེ་བྱེད་ཐུབ་ཀྱི་ཡོད་དམ།
བོད་ཀྱི་མཛངས་མ། གཙོ་བོ་སེམས་པ་བཟང་པོ་དང་སློབ་སྦྱོང་རེད། ངས་སློབ་སྦྱོང་དེ་གལ་ཆེན་པོར་མཐོང་གི་འདུག སློབ་སྦྱོང་ཡོད་པར་མ་ཟད་དེ་བཀོལ་སྤྱོད་ལེགས་པོ་བྱེད་ཐུབ་མཁན་ཞིག་ཡིན་ན། ཚད་ལྡན་གྱི་མི་ཞིག་ཏུ་མཐོང་གི་ཡོད།
བོད་ཀྱི་དུས་བབ། མ་འོངས་པར་རང་ལ་ཁྱོ་ག་གང་འདྲ་ཞིག་འཚོལ་དགོས་བསམ་གྱིན་འདུག
བོད་ཀྱི་མཛངས་མ། དེ་གཅིག་ནས་སོ་སོའི་ལས་རེད། དེ་མིན་སེམས་བཟང་པོ་ཞིག་དང་རང་ཉིད་ལ་ལྟ་སྐྱོང་ལེགས་པོ་བྱེད་མཁན་ཞིག གལ་ཆེ་ཤོས་ངས་ལས་ཀ་གང་འདྲ་ཞིག་བྱེད་ཀྱིན་ཡོད་ནའང་། ང་ལ་རྒྱབ་སྐྱོར་བྱེད་མཁན་ཞིག་དགོས་ཀྱིན་འདུག
བོད་ཀྱི་དུས་བབ། བཙན་བྱོལ་བུད་མེད་ཀྱི་ཐོབ་ཐང་དེ་ཚད་གང་འདྲ་ཞིག་ལ་ངོས་འཛིན་བྱེད་ཀྱིན་ཡོད།
བོད་ཀྱི་མཛངས་མ། སྤྱིར་བཏང་ནས་ང་ཚོ་བོད་མིའི་གཤིས་ཀར་ངོ་ཚ་རྒྱུར་དགའ་བའི་གཤིས་ཀ་ཞིག་ཡོད་ལ། དོན་དངོས་ཐོག་ནས་ཀྱང་བུད་མེད་ཚོ་ངོ་ཚ་སར་ཚ་དགོས་པ་རེད། ང་རང་ཉིད་ཀྱང་ནམ་རྒྱུན་ངོ་ཚ་སྨིན་པོ་ཅན་ཞིག་ཡིན། ཡིན་ནའང་། བོད་ཀྱི་མཛངས་མའི་འགྲན་བསྡུར་ལྟ་བུའི་ནང་འཛུལ་དུས། ངོ་ཚ་དང་མི་ཚ་གི་སྐད་ཆ་གང་ཡང་མིན་དུས་ངས་བུད་མེད་ཚོར་ངོ་ཚ་དགོས་སར་ཚ་དགོས་པ་དང་། ཡང་མགོ་བོ་ཡར་བཀྱགས་ནས་འགྲོ་དགོས་སར་དེ་ལྟར་འགྲོ་ཐུབ་པ་བྱུང་ན་ཡག་པོ་འདུག་སྙམ།
བོད་ཀྱི་དུས་བབ། གོ་སྐབས་འདི་བརྒྱུད་ནས་བཤད་འདོད་པ་འདྲ་འདུག་གམ།
བོད་ཀྱི་མཛངས་མ། གཞོན་སྐྱེས་ཚོར་སྤྱིར་བཏང་སློབ་སྦྱོང་ལ་ཤུགས་རྒྱག་རྒྱུ་དང་། བོད་རིགས་ནང་ཁུལ་དང་རྒྱ་གར་ཡུལ་མི་སོགས་ལ་མཐུན་ལམ་ཡག་པོ་བྱ་རྒྱུ་ལས་འཁྲུག་འཛིང་མི་ཡོང་བའི་རེ་སྐུལ་ཞུ་རྒྱུ་དང་། ལྷག་པར་དུ་བུད་མེད་རྣམས་ལ་བོད་ཀྱི་མཛངས་མའི་འགྲན་བསྡུར་ནང་ཞུགས་ཐུབ་ཚེ། ཧ་ཅང་གི་ཡག་པོ་འདུག དེ་ནི་མི་ཚེ་གཅིག་གི་མདུན་ལམ་ལའང་ཐད་ཀར་འབྲེལ་བ་འདུག་ཅེས་ངས་རང་གི་ཉམས་མྱོང་ཐོག་ནས་བཤད་རྒྱུ་ཡིན།
འདི་ལོའི་བོད་ཀྱི་མཛངས་མ་བསྟན་འཛིན་ནོར་འཛོམས་ནི་ཕྱི་ལོ་ ༢༠༡༠ དང་བོད་ཀྱི་མཛངས་མ་ཐེངས་ ༩ པ་དེ་ཡིན་ལ། ཁོ་མོ་ཧོང་སུར་གཞས་ཆགས་ནས་ཡིན་ཞིང་ཝར་ཎ་མཐོ་སློབ་ཁང་ནས་ལོ་བདུན་ལ་སློབ་སྦྱོང་བྱས་ཏེ། ཉེ་ཆར་མཐོ་སློབ་ཁང་དེ་ནས་ཤཱསྟྲི་སློབ་ཐོན་བྱུང་། ཁོ་མོས་འདི་ལོའི་བོད་ཀྱི་མཛངས་མའི་རྒྱལ་ཁ་ཐོབ་པའི་དགོང་མོ་དེར་འདི་གའི་གསར་འགོད་པའི་བཅར་འདྲི་དང་ལེན་སྐབས། དང་ཐོག་རང་ཉིད་ཀྱི་སློབ་སྦྱོང་ཡག་པོ་བྱ་རྒྱུ་དང་། དེའི་རྗེས་བོད་མི་སློབ་སྦྱོང་སྐྱོ་བོ་ཅན་དག་ལ་སློབ་གསོའི་ཐད་ནས་རོགས་སྐྱོར་བྱ་རྒྱུ་ནི་རང་གི་མི་ཚེའི་དམིགས་བྱ་གལ་ཆེན་ཞིག་ཡིན་ཞེས་གསུངས་ཡོད།
གསར་འགོད་པ། ཨ་རིག་འགྱུར་མེད།
བོད་ཀྱི་དུས་བབ། ཁྱེད་རང་འདི་ལོའི་བོད་ཀྱི་མཛངས་མའི་རྒྱལ་ཁ་ཐོབ་མཁན་དང་། ཉེ་ཆར་ཝར་ཎ་མཐོ་སློབ་ཁང་ནས་ཤཱསྟྲི་ཐོན་མཁན་ཞིག་ཡིན་སྟབས། མ་འོངས་པར་བོད་མིའི་སྤྱི་ཚོགས་ནང་ལས་ཀ་གང་འདྲ་ཞིག་བྱེད་འདུན་ཡོད་དམ། 
བོད་ཀྱི་དུས་བབ། བོད་ཀྱི་མཛངས་མ་ཞེས་པའི་མིང་དེ་ཐོགས་པ་ནས་བཟུང་། ནམ་རྒྱུན་གྱི་མི་ཞིག་གི་གནས་བབ་ལས་ཡར་བུད་ཡོད། ཁྱེད་རང་སྟེང་ནས་བོད་ཀྱི་མཛངས་མའི་མིང་དེ་ཐོབ་པ་ནས་བཟུང་ད་ལྟའི་བར་དུ་སྔར་དང་མ་འདྲ་བ་ག་རེ་མཐོང་གིན་འདུག 
བོད་ཀྱི་དུས་བབ། བཙན་བྱོལ་བུད་མེད་ཀྱི་ཐོབ་ཐང་དེ་ཚད་གང་འདྲ་ཞིག་ལ་ངོས་འཛིན་བྱེད་ཀྱིན་ཡོད། 
བཀའ་ཁྲི་ཟམ་གདོང་རིན་པོ་ཆེ་མཆོག་གི་གསུང་དོན་་་་་་་་་་་བོད་ཀྱི་མཛེས་མའི་འགྲན་བསྡུར་དེ་ནི་བཀྲ་ཤིས་པའི་རྟགས་གཅིག་མ་རེད་་་་ཅེས་གསུངས་ཡོད། དེ་དག་གི་རྒྱུན་མཚན་ནི་ང་རང་ཚོ་བོད་ཀྱི་མཛེས་མ་རྣམས་རྒྱལ་ཁ་ཐོབ་རྗེས་སུ་རང་ཉིད་ཀྱི་ལུས་པོ་ཚོང་ལས་བྱེད་ཀྱི་ཡོད་པ་མཁྱེན་ཡིན་པ་འདྲ།
བོད་ཀྱི་མཛེས་མའི་འགྲན་བསྡུར་འདི་མགོ་འཛུགས་སྐབས་མི་དབང་དཔལ་ལྡན་བཀའ་ཁྲི་ཟམ་གདོང་རིན་པོ་ཆེ་མཆོག་ལ་བཅའ་འདྲི་གཅིག་གནང་སྐབས་ཁོང་གིས་གསུངས་དོན་་་་་ བོད་ཀྱི་མཛེས་མའི་འགྲན་བསྡུར་དེ་ནི་བཀྲ་ཤིས་པའི་རྟགས་གཅིག་མ་རེད་་་་ཅེས་གསུངས་ཡོད།
རྒྱལ་ཁབ་དང་མི་རིགས་གཅིག་ཁ་ལོར་བསྒྱུར་མཁན་གྱི་རླབས་ཆེན་གྱི་མཁས་དབང་དང་། གྲགས་ཅན་གྱི་མི་སྣ་ཁོང་གིས་དེ་ནི་བཀྲིས་པའི་རྟགས་གཅིག་མ་རེད་ཅེས་ཚིག་ཐག་ཆོད་པོས་ལན་སདེབས་གཅིག་གནང་ཡོད་པ་དེའི་རྒྱབ་ལྗོངས་ཀྱི་གནད་དོན་ངོ་མ་དེ་གང་ལ་ཐུག་ཡོད་མེད་དེ་ད་ལྟའང་སྤྱི་ཚོགས་ཁྲོད་མི་དམངས་ཀྱིས་ངོས་འཛིན་གསལ་པོ་ཐུབ་ཀྱི་མེད།
བོད་ཀྱི་མཛངས་མ་་ལ་བསམ་ཚུལ་ཡག་པོ་འདུག་ད།
སྤྱི་ལ་ཕན་པའི་ལས་འགུལ་ཆེ་ཆུང་གང་འདྲ་ཞིག་ཡིན་རུང་སྙིང་ནས་ཐུགས་རྗེ་ཆེ་ཞུ་རྒྱུ་ཡིན།
བོད་ཀྱི་མཛངས་མ་ཞེས་པའི་མཛེས་མའི་འགྲན་རྩོད་འདི་ནི་སྤྱིར་གལ་ཆེན་ཞིག་ཡིན།གང་ཡིན་ཟེར་ན་དེས་མི་རིགས་ཀྱི་ངོ་བོ་དང་ཁྱད་ཆོས།དེ་བཞིན་རིགས་གཞུང་སོགས་རྒྱལ་སྤྱིའི་ནང་སྟོན་ཐུབ་པ་དང་མི་རིགས་འདི་མི་རིགས་གཞན་དང་མཚུངས་བའི་རང་དབང་ལྡན་པའི་རྒྱལ་ཁབ་ཞིག་ཡིན་པ་ར་སྤྲོད་བྱ་ཐུབ།འོན་ཀྱང་ད་ལྟའི་འཆར་ནུས་པ་དེ་ཙམ་དང་སྤྱི་ཚོགས་ནང་མཐོང་ཆེན་དེ་ཙམ་མེད་པ་ནི་འཆར་འགོས་དང་འཛིན་སྐྱོངས་ཀྱི་ནུས་པ་ཞན་པས་སྤྱི་ཚོགས་ནང་མཛངས་མའི་འགྲན་སྡུར་འདི་མཐོང་ཆེན་བསྐྲུན་ཐུབ་ཀྱི་མེད།འོ་ན།ཕྱིས་བྱུང་ཇི་ལྟར་བྱ་དགོས་ཞེས་ན།འཛིན་སྐྱོངས་དང་འཆར་འགོས་ཀྱི་ཚད་གཞི་གོང་མཐོར་གཏོང་དགོས་ལ་འཛིན་སྐྱོངས་ཀྱི་འགན་འཁུར་བའང་སྐྱེ་བོ་མཉམ་མྱོང་ཅན་ཞིག་དང་དམངས་ཀྱིས་བརྩེ་བཀུར་བྱ་འོས་པ་ཞིག་ངེས་པར་དུ་དགོས་པ་ཡིན།ད་ལྟའི་འགན་འཛིན་ཁོང་རང་ཉིད་ཀྱིས་གསར་འཛུགས་གནང་བར་དགག་པ་མེད་ལ་དེ་ལྟར་བརྩུགས་གནང་བར་ཐུགས་རྗེ་ཆེ་ཞུ།
ཕྱོགས་གཅིག་ནས་བསམ་བློ་བཏང་ན་བོད་དོན་སྐོར་ལ་ཕན་ཐོག་ཆེན་པོ་འདུག་བསམ་བསམ་འདྲའ་བོ། ཕྱོགས་གཅིག་ནས་བལྟས་ན་མཁས་དབང་ཟམ་གདོང་མ་གསུང་ལ་བལྟས་ན་དགེ་མཚན་མེད་པའི་བཟོ་འདྲ་བོ། བཤད་མི་ཤིས་ཁུ་ཡ། གང་ལྟར་གྱང་མོ་རང་མཛེས་ཉམ་ཨག་ཙམ་འདུག
བཀྲ་ཤེས་བདེ་ལེགས་ཞུ། བྱ་བ་ལམ་འགྲོ་ཡོང་བ་ཤོགས།
དྲ་གྲོགས་བསྟན་འཇམ་གྱི་ཡི་གེ་འདི་ཚོ་ཅི་ཞིག་རེད།་་་་་་་་་འཛངས་མ་དང་་་་་་་་་སྟེང་ཆ་་་་་་ཡང་སྐྱར་་་་་ངོ་མ་འདི་ཚོ་ནི་དགོད་རྒྱུ་ཡོང་ནི་ཞིག་རེད། མཆན་བུ་འདི་འདྲ་ཞིག་གི་ནང་ལ་ཡི་གེ་འདི་འདྲ་ཞིག་ངོ་མ་དགོད་རྒྱུ་ཡོང་གི་ཡ།
བོད་ཀྱི་མཛངས་མའི་སློབ་སྦྱོང་ཕྱོགས་ནས་ཤཱསྟྲི་སློབ་ཐོན་བྱུང་བ་ལ་བཀྲ་ཤིས་བདེ་ལགས་ཡོད། དེ་མིན་མ་འོངས་པར་ཡང་གཙུག་ལག་རབ་འབྱམས་པའི་ཐོག་སློབ་སྦྱོང་བྱེད་དགོས་དུས་ཁྱེད་ལ་བྱ་བ་ལམ་འགྲོ་ཡོང་བའི་བཀྲ་ཤིས་བདེ་ལགས་བསྐྱར་དུ་ཞུ་འདོད་བྱུང། ཨ་བུ་རྒོད་མ་འདི་ལྟར་བོད་ཀྱི་མཛངས་མའི་མཛེས་ཉམས་ཕྱི་ལ་བསྟན་དགོས། ཕ་བཟང་བུ་མོ། རེམ་ཡ་རེམ་ཁྱོད་ཀྱི་ཕུགས་བསམ་འདི་ངོ་ནས་ལེགས་པ་འདུག་བཀའ་དྲིན་ཞུ་འོས་པ་ཞིག་རེད། སྤྱིར་བཏང་བོད་རིགས་སུ་དང་སུ་ཡིན་ན་འདི་ལྟར་སློབ་སྦྱོང་གི་ཕྱོགས་ལ་འབད་དགོས་པ་ནི་ལོ་རྒྱུས་དང་དུས་རབས་ཀྱིས་ང་ཚོ་ལ་འབོད་བཞིན་ཡོད་པའི་བརྡ་ལན་རེད། ང་ཚོ་ཚང་མ་ཡར་ལ་འགྲོ་་་་་་ཁོ་མོ་ལྟར་ཡར་ལ་འགྲོ་་་་་་་སྤུན་ཟླ་ཚོ།
ཡག་པོ་འདུག་༢༠༡༡ལོའི་བོད་ཀྱི་མཛམས་མའི་འགྲན་བསྡུའི་གར་སྟེབས་དེར་ཁོ་བོ་ཡང་འཛག་འཆར་ཡོད་ད། ཧཧཧཧཧཧཧཧཧཧཧ
ནང་དོན་ཆེར་མི་འདུག བསམ་ཚུལ་ཞུས་ཡ་ཀྱང་ལྷག་མ་སོང་།
ན་ཆུང་བུ་མོ་ཚོ།སྤྱིར་ང་ཚོ་ཚང་མ་ཨ་མའི་མངལ་ནས་ཐོན་པའི་ཉིན་དང་པོ་ནས་བཟུང་ཕོ་མོ་འདྲ་མཉམ་མ་རེད་ཞེས་བཀོད་མེད་ལ།ང་མཆོག་ཁྱོད་དམན་གྱི་འདུ་ཤེས་ཡོངས་རྫོགས་དོར་ཏེ་འདུན་དུ་སྐྱོད་དང།སྤྱི་ཚོགས་འདིའི་གར་སྟེགས་གང་འདྲ་ཞིག་ལ་ལངས་ཐུབ་པ་ནི་རང་ཉིད་ཀྱི་འཇོན་ཐང་མ་ཡིན་ནམ།
ཁྱེད་ཀྱིས་བསམ་ན་མི་ཞིག་བྱེད་པར་གཞི་རྩའི་ཆ་རྐྱེན་གང་འདྲ་ཞིག་ཚང་ན། ད་གཟོད་མི་ཟེར་བ་དེ་བྱེད་ཐུབ་ཀྱི་ཡོད་དམ།
འདྲི་བ་འདིར་དགོད་རྒྱུ་འོང་བ་མ་ཟད།
བཙན་གྱི་བཏབ་པའི་ལན་འདི་ལའང་དགོད་རྒྱུ་ཡོང་གི
གཙོ་བོ་སེམས་པ་བཟང་པོ་དང་སློབ་སྦྱོང་རེད། ངས་སློབ་སྦྱོང་དེ་གལ་ཆེན་པོར་མཐོང་གི་འདུག སློབ་སྦྱོང་ཡོད་པར་མ་ཟད་དེ་བཀོལ་སྤྱོད་ལེགས་པོ་བྱེད་ཐུབ་མཁན་ཞིག་ཡིན་ན། ཚད་ལྡན་གྱི་མི་ཞིག་ཏུ་མཐོང་གི་ཡོད།
འདི་ལོའི་བོད་ཀྱི་མཛངས་མ་བསྟན་འཛིན་ནོར་འཛོམས་ལགས་སློབ་སྦྱོང་ལ་དོ་སྣང་དང་དགའ་མོས་ཡོད་མཁན་ཞིག་རེད་འདུག དེའི་ཐོག་ནས་བོད་མི་རིགས་ལ་ཕན་ཐོག་གནང་ཐུབ་པའི་རེ་བ་དང་ཡིད་ཆེས་ཡོད།
བོད་ཀྱི་འཛངས་མའི་སྐད་ཆ་བཤད་སྟངས་ལ་བསམ་ཚུལ་མེད་ཀྱང་། འཛངས་མའི་མིང་ཐོག་ནས་བྱ་འགུལ་དེ་འཛངས་མའི་མིང་བྱང་དངལྷན་སྤྱར་བའི་ཁོ་མོ་འང་ ། སྐད་གྲགས་ཀྱི་སྟེང་ཆ་ཞིག་ཡང་སྐྱར་གོ་སྐབས་འཚོལ་འདུག
དྲི་བ་དང་དྲིས་ལན་ལ་བསམ་ཚུལ་ཅང་བཤད་རྒྱུ་མེད། ཐུགས་རྗེ་ཞུ།