ཉེ་ཆར་ལ་དྭགས་སུ་ཆུ་ལོགས་བྱུང་རྗེས་མི་ ༤༠ ཡས་མས་ཤིག་སེང་གེ་ཁ་འབབ་ཀྱིས་ཁུར་ཏེ་པ་ཀི་སི་ཐན་ཕྱོགས་སུ་བཞུར་འདུག
ཟླ་འདིའི་ཚེས་ ༢༡ ཉིན་རྒྱ་གར་དུས་བབ་གསར་འགོད་པ་ཨ་ཇའེ་སོ་ར་ལ་དྭགས་སུ་ཆེད་བསྐྱོད་ཀྱིས་གནས་ཚུལ་ཕྱོགས་བསྡོམས་བྱས་པ་ལྟར་ན། འདས་པའི་ལ་དྭགས་ལ་ཆུ་ལོག་གི་གནོད་སྐྱོན་བྱུང་པའི་ཉིན་བཅུ་གཅིག་གི་རིང་། རྐྱེན་ལམ་དུ་ཕྱིན་པའི་མི་ ༢༠༠ ཉེ་བ་དང་། མི་ ༤༠༠ ཙམ་རྙེད་སོན་མ་བྱུང་ཞིང་། མི་ ༤༠ ཡས་མས་ཤིག་སེང་གེ་ཁ་འབབ་ཀྱིས་ཁུར་ཏེ་པ་ཀི་སི་ཐན་ཕྱོགས་སུ་བཞུར་འདུག
ཁོང་གིས་གནས་ཚུལ་སྤེལ་བ་ལྟར་ན། ཡུལ་སྐོར་སྤྲོ་འཆམ་ཏུ་སྐྱོད་སའི་སྔར་གྱི་ཡིད་འོང་གི་ལ་དྭགས་ས་ཁུལ་དེ་ད་ལྟ་འདམ་ཉོག་གིས་གཡོགས་ཤིང་ཁང་ཁྱིམ་ཕལ་ཆེ་བའི་ཐོག་བརྩེགས་དང་པོ་ལས་ས་ངོས་ཀྱི་ཁང་ཁྱིམ་རྣམས་བྱེ་འདམ་གྱིས་ཁེངས་ཏེ་མཐོང་མི་ཐུབ་པའི་གནས་སུ་གྱུར་ཡོད་ཅིང་། ཆུ་ལོག་གིས་གནོད་སྐྱོན་ཐེབས་པའི་ས་ཁུལ་ཁག་གི་རྨང་གཞིའི་ཁང་ཁྱིམ་དང་འཛུགས་སྐྲུན་གྱི་བརྒྱ་ཆའི་བརྒྱད་ཅུར་གཏོར་སྐྱོན་ཕོག་ཡོད་པར་བརྗོད་འདུག
གསར་འགོད་པ་ཨ་ཇའེ་ལགས་ཀྱིས་མུ་མཐུད་གནས་ཚུལ་དེའི་སྐོར་གྱི་མཐོང་སྣང་ལས་བརྗོད་པར། མྱུར་སྐྱོབ་པའི་ལས་མཚམས་མ་བཞག་པའི་དུས་བབ་འདི་འདྲ་ཞིག་གི་འོག་ཏུ་མི་མང་གིས་བློ་རྩ་བརྟན་པོས་སྨོན་ལམ་ཞལ་འདོད་གྱེར་བཞིན། བདེ་འཇགས་ཀྱི་འཚོ་བ་ཞིག་ལ་རེ་བས་སྨོན་མུས་སུ་མཆིས་ཞེས་བཀོད་འདུག
གསར་འགོད་པ། བནྟེ་སྐྱབས།
