བྷ་རོ་ཌ་ས་གནས་སུ་མཐོ་རིམ་སློབ་མ་རྣམས་ཀྱིས་མང་གཙོའི་དུས་དྲན་ཐེངས་ ༥༠ སྲུང་གཙི།
མཐོ་རིམ་སློབ་མ་ཨ་ཚོགས་དབང་གྲགས་འབུམ་གྱིས་འདི་གར་བཏང་གནས་ལྟར་ན། ཁ་སང་ཕྱི་ཚེས་ ༢ ཉིན་ཏེ་མང་གཙོའི་དུས་དྲན་ཐེངས་ ༥༠ འཁོར་བའི་ཉིན། བྷ་རོ་ཌ་ས་གནས་མཐོ་རིམ་སློབ་ཕྲུག་ཡོངས་ནས་ (Maharaja Sayajirao University) མཐོ་སློབ་གཙུག་ལག་སློབ་གཉེར་ཁང་གི་ཚོགས་ཁང་དུ་སྔ་དྲོའི་ཆུ་ཚོད་
༩ དང་སྐར་མ་ ༣༠ སྟེང་མང་གཙོའི་དུས་དྲན་ཐེངས་ ༥༠ པ་སྲུང་གཙི་བྱས་འདུག
མཛད་སྒོའི་སྟེང་ལོ་རྒྱུས་ཆེད་ལས་པ་སློབ་ཕྲུག་བསོད་ནམས་སྟོབས་རྒྱལ་གྱིས་མང་གཙོའི་ངོ་སྤྲོད་དང་འཕེལ་རིམ་སྐོར་ལ་གཏམ་བཤད་གནང་བ་དང་། ས་གནས་གཞོན་ནུའི་ཚོགས་གཙོ་བསམ་འགྲུབ་རྡོ་རྗེས་ས་གནས་སློབ་ཕྲུག་མཐུན་ཚོགས་ཀྱི་སྒྲིག་གཞི་དང་དབུས་གཞོན་ནུའི་ཚོགས་ཆེན་ཐེངས་ ༡༤ པའི་གྲོས་ཆོད་གསར་བ་ཁག་གསལ་བསྒྲགས་དང་འབྲེལ་བའི་གཏམ་གཤད་གནང་།
དེའི་རྗེས་ད་ལོར་བཙན་བྱོལ་བོད་གཞུང་མང་དང་དགོན་སྡེ་ཁག སློབ་གྲྭ་ཁག་བཅས་ཚང་མས་མང་གཙོའི་ལས་འགན་དང་ཐོབ་ཐང་བསྒྲུབ་པའི་ཆེད། ཐེངས་འདིའི་བཀའ་ཁྲི་དང་སྤྱི་འཐུས་འོས་འདེམས་ལ་ཆ་ཤེས་ལེན་པ་ཙམ་མ་ཡིིན་པར། འོས་འདེམས་མ་ནོར་བ་བྱ་རྒྱུ་ནི་འོས་འགན་གལ་ཆེ་ཤོས་ཡིན་སྟབས། དེ་རིང་སྔ་དྲོ་ཆུ་ཚོད་ ༡༡།༣༠ ནས་ ༢།༣༠ བར་སློབ་ཕྲུག་ཆ་ཚང་སྡེ་ཚན་བཞི་རུ་ཁག་བགོས་ཀྱིས་རང་མོས་ཐོག བཀའ་བློན་ཁྲི་པར་ཁྱོན་བསྡོམས་འོས་མི་ ༣༠ ཙམ་བཏོན་ཏེ། འོས་མི་རེ་རེའི་ལོ་རྒྱུས་དང་རྒྱབ་ལྗོངས། ལངས་ཕྱོགས། ཁྱད་ཆོས་སོགས་དྲ་རྒྱ་འདྲ་མིན་ནས་འཚོལ་ཞིབ་བརྒྱུད་གྲོས་བསྡུར་ལྷུག་པོར་གནང་བར་མ་ཟད། ཆུ་ཚོད་གསུམ་ཙམ་རིང་སློབ་ཕྲུག་བརྒྱ་ཆ་ ༩༠ ལྷག་གིས་མ་འོངས་པའི་བཀའ་བློན་ཁྲི་པ་དེ་མཁས་དབང་བློ་བཟང་སེངྒེ་ལ་རེ་བ་ཡོད་པའིི་གཏམ་བཤད་དང་བསམ་ཚུལ་བགྲོ་གླེང་ཤུགས་ཆེར་གནང་ཡོད་ཟེར།
ཡང་ཉིན་གུང་ཆུ་ཚོད་ ༢།༣༠ ནས་སློབ་ཕྲུག་ཆ་ཚང་སོ་སོའི་ཆོལ་ཁ་ཁག་ཏུ་འཛོམས་ཏེ་སྤྱི་འཐུས་འོས་མིའི་སྐོར་བགྲོ་གླེང་བྱས་ནས་ཆོལ་ཁ་རེ་ནས་སྤྱི་འཐུས་འོས་མི་ ༢༠ ཙམ་བཏོན་རྗེས། དྲ་རྒྱ་ཁག་བཅུ་ཙམ་ནང་འོས་མི་རེ་རེའི་ལོ་རྒྱུས་དང་རྒྱབ་ལྗོངས། ལངས་ཕྱོགས། ཁྱད་ཆོད་སོགས་འཚོལ་ཞིབ་དང་གྲོས་བསྡུར། བགྲོ་གླེང་ལྷུག་པོར་གནང་།
དེའི་རྗེས་བོད་ཀྱི་ཁོར་ཡུག་གི་ཛ་དྲག་དང་འབྲེལ་བའི་གློག་བརྙན་ ༼ བོད་བཞུ་བ ༽ Meltdown in Tibet ཟེར་བ་ཞིག་སྤྱན་འབུལ་འོག བོད་ནང་གི་ཁོར་ཡུག་གི་ཛ་དྲག་གནས་སྟངས་སྐོར་གཏམ་བཤད་གནང་བཅས་ཐེངས་འདིའི་མང་གཙོའི་དུས་དྲན་ཐེངས་ ༥༠ པ་གཟབ་རྒྱས་ངང་སྲུང་གཙི་བྱས་ཡོད་འདུག
བྷ་རོ་ཌ་ས་གནས་སུ་ཁྱོན་བསྡོམས་བོད་པའི་སློབ་ཕྲུག་ ༡༣༠ ཙམ་ཡོད་པ་དང་། རབ་འབྱམས་པ་ (Bachelor) བརྒྱ་ལ་ཉེ་བ་ཙམ་དང་གཙུག་ལག་རབ་འབྱམས་པ་ (Master) ༣༠ ཙམ་ཡོད། གནས་འདི་ནི་མོས་པོ་དམ་པ་གྷན་ངྷུ་་རྗེའི་འཁྲུངས་ཡུལ་ཡིན་པ་དང་ས་གནས་གཞོན་ནུའི་འཛིན་སྐྱོང་ཚོགས་པས་སྣེ་ཁྲིད་འོག བོད་དོན་དྲིལ་བསྒྲགས་དང་འབྲེལ་བའི་ལས་འགུལ་ཤུགས་ཆེན་སྤེལ་བཞིན་ཡོད་ལ་བོད་པའི་དུས་ཆེན་ཁག་ཚང་མ་དུས་རྟག་ཏུ་སྲུང་གཙི་བྱེད་ཀྱིན་ཡོད་ཅེས་འགྲེལ་བརྗོད་གནང་ཡོད།
གསར་འགོད་པ། ཨ་རིག་འགྱུར་མེད།
རེད་ཡ། མཐོ་རིམ་སློབ་མ་ཡིན་ན་ཤེས་ཡོན་པའི་སྡེ་ཡིན་པས། དེ་ལ་དེ་བསྟུན་གྱི་བྱ་ལུགས་དང་བྱེད་ལུགས་ཤིག་དགོས་པ་རེད། ཁྱེད་རྣམས་ལ་འཚམས་འདྲིའི་བཀྲ་ཤིས་བདེ་ལེགས་ཡོད།
རྡ་སར་དམངས་གཙོའི་དུས་དྲན་སྲུང་གཙི་བྱེད་ལུགས་དང་རྣམ་པ་མི་འདྲ་བ་ཞིག་རེད་འདུག དཔེར་ན།
༡༽མང་གཙོའི་ངོ་སྤྲོད་དང་འཕེལ་རིམ་སྐོར་ལ་གཏམ་བཤད་གནང་བ།
༢༽འབྱུང་འགྱུར་བཀའ་བློན་ཁྲི་པའི་སྐོར་ལ་གྲོས་བསྡུར་གནང་བ།
༣༽སློབ་ཕྲུག་ཆ་ཚང་སོ་སོའི་ཆོལ་ཁ་ཁག་ཏུ་འཛོམས་ཏེ་སྤྱི་འཐུས་འོས་མིའི་སྐོར་བགྲོ་གླེང་གནང་བ་སོགས་ནི་ཤེས་ཡོན་ལྡན་པའི་མི་སྣ་ཚོས་དུས་དྲན་སྲུང་གཙི་བྱེད་ཕྱོགས་རེད་སྙམ།