བོད་མི་མང་སྤྱི་འཐུས་གྲོས་ཚོཊ་ལ་བསྐྱར་ཞིབ་དགོས་སམ།

ཁ་སང་ཕྱི་ཚེས་ ༡༩ ཉིན་གྱི་སྒྲོན་མེ་རྩོམ་སྒྲིག་ཁང་དང་བཀའ་བློན་ཁྲི་པའི་ཚགས་པར་རྩོམ་སྒྲིག་ཚན་ཆུང་གཉིས་མཉམ་འབྲེལ་ཐོག་མེག་ལོར་ཉིན་སློབ་རྒྱལ་ཡུམ་ཆེན་མོའི་ཚོགས་ཁང་དུ།  ༼ བོད་ཀྱི་གྲོས་ཚོགས་བསྐྱར་ཞིབ་བགྲོ་གླེང་ ༽ ཞེས་པའི་བགྲོ་གླེང་འདུ་འཛོམས་ཞིག་གོ་སྒྲིག་བྱས་ཡོད། བགྲོ་གླེང་དེའི་ཐོག་ཆེད་དུ་གདན་ཞུ་བྱས་པའི་གཏམ་བཤད་མི་སྣ་ ༩ ཙམ་ཡོད་པ་དང་། ཁོང་ཅག་གིས་རང་རང་གི་བརྗོད་གཞིའི་ཐོག་སྐར་མ་ ༦ རེར་གཏམ་བཤད་གནང་རྗེས་དྲི་བ་དྲིས་ལན་དང་ཟུར་ཉན་པ་དག་གིས་སོ་སོའི་བསམ་ཚུལ་བཤད་ཡོད། བགྲོ་གླེང་དེ་ཉིན་རྒྱབ་ཆུ་ཚོད་ ༣ ནས་ཕྱི་དྲོའི་ཆུ་ཚ་ ༦ ཕྱེད་ཀའི་བར་འཚོགས་ཡོད་ལ། བགྲོ་གླེང་གོ་སྒྲིག་པ་རྨེའུ་དཀོན་རྒྱམ་ལགས་ཀྱིས་ངོ་སྤྲོད་གནང་བ་ལྟར། ཐེངས་འདིར་གཏམ་བཤད་གནང་མཁན་མང་ཆེ་བ་མི་རབས་གསར་པ་དང་དུས་རྒྱུན་གཏམ་བཤད་སྡིངས་ཆ་རིགས་སུ་མཐོང་དཀོན་པ་ཁག་ཅིག་ཕེབས་འདུག

བགྲོ་གླེང་གི་ཐོག་མར་དབུ་མའི་ལམ་ཚགས་པར་གྱི་རྩོམ་སྒྲིག་པ་རྨོག་རུ་བསྟན་པ་ལགས་ཀྱིས་༼ དབུ་མའི་ལམ་དང་འབྲེལ་བའི་བོད་མི་མང་གི་སྤྱི་འཐུས་ཇི་ལྟར་འོས་འདེམས་བྱེད་དགོས་སམ ༽ ཞེས་པའི་བརྗོད་གཞིའི་ཐོག་གཏམ་བཤད་གནང་དོན།  ང་རང་ཚོའི་གཞུང་འདི་མང་གཙོའི་གཞུང་ཡིན་པ་དང་། སྤྱི་འཐུས་ཀྱི་ལྟ་གྲུབ་ལ་ཚད་བཀག་མེད་སྟབས། ད་ལྟའི་སྤྱི་འཐུས་ཀྱི་གྲུབ་ཆའི་ནང་ཕྱེད་རང་བཙན་དང་ཕྱེད་དབུ་མའི་ལམ་གྱི་ལྟ་བ་འཛིན་མཁན་ཆགས་ཡོད། ཡིན་ནའང་། ད་ལྟའི་དུས་འདིར་གཞུང་གི་སྲིད་བྱུས་དེ་དབུ་མའི་ལམ་ཆགས་ཡོད་སྟབས། ང་ཚོའི་སྤྱི་འཐུས་དེ་ཡང་དབུ་མའི་ལམ་གྱི་ལྟ་བ་ལངས་ཕྱོགས་དང་མཐུན་དགོས་པ་རེད་དྲན་ཡོད། རྒྱུ་མཚན། ང་ཚོའི་གཞུང་དེ་དབུ་མའི་ལམ་གྱི་སྲིད་བྱུས་གཏན་འབེབས་བྱེད་མཁན་གྱི་གཞུང་ཞིག་ཡིན་པ་ལྟར།  ཁྲིམས་བཟོ་ལྷན་ཚོགས་ཀྱང་གཞུང་གི་ལྟ་བ་ལངས་ཕྱོགས་དང་མཐུན་པོ་བྱུང་ན། ཕྱི་གླིང་བ་དང་རྒྱ་མིའི་ལྟ་སྟངས་ལ་ཡག་པོ་ཡོད་པ་རེད། འོན་ཀྱང་། སྤྱི་འཐུས་ཀྱི་ཡག་སྡུག་དང་སྤུས་ཀ་སོགས་ལ་གཞུང་ངོས་ནས་ཚོད་འཛིན་དང་བཀག་རྒྱ་མེད་སྟབས། ལྟ་གྲུབ་དང་ལངས་ཕྱོགས་གང་འདྲ་ཞིག་ཡོང་མིན་དེ་རྒྱ་ཆེའི་མི་མང་ལ་རག་ལས་ཡོད་པ་རེད། ཅེས་བརྗོད་བྱུང་ལ།

བོད་ཀྱི་བང་ཆེན་ཚགས་པར་རྩོམ་སྒྲིག་ལས་རོགས་ཆོས་ཉིད་འོད་ཟེར་ལགས་ཀྱིས་༼ སྤྱི་འཐུས་དང་འབྲེལ་བའི་གསར་འགྱུར་ལེགས་ཉེས་ཀྱིས་སྤྱི་ཚོགས་ལ་ཤུགས་རྐྱེན་གང་གི་ཆེ་མིན་གྱི་རྒྱབ་ལྗོངས་ལ་གཞིགས་ཏེ་འོས་འདེམས་ཇི་ལྟར་བྱ་དགོས ༽ ཞེས་པའི་བརྗོད་གཞིའི་ཐོག སྤྱིར་ང་ཚོ་འཐབ་རྩོད་པ་ཞིག་ཡིན་པའི་ཆ་ནས་གསར་འགོད་པ་ཚོས་ཀྱང་། བོད་ཕྱི་ནང་དང་མི་མང་གི་བསམ་ཚུལ་སོགས་འཐབ་རྩོད་ཀྱི་ངོ་བོར་རྩོད་ལེན་བྱས་ཏེ་མི་མང་ལ་ངོ་འཕྲོད་བྱེད་ཀྱིན་ཡོད་ལ། མི་མང་དང་གཞུང་གཉིས་བར་གྱི་གནས་ཚུལ་དང་བསམ་ཚུལ། སྤྱི་ཚོགས་དང་ཆབ་སྲིད་ཀྱི་གནས་སྟངས་སོགས་མི་མང་ལ་དུས་ཐོག་ཏུ་མཁོ་གཏོང་བྱ་རྒྱུར་འབད་བརྩོན་བྱེད་ཀྱི་ཡོད། སྤྱིར་དམངས་གཙོའི་སྤྱི་ཚོགས་ཆེན་པོའི་ནང་འཐབ་རྩོད་རང་ལ་དམིགས་ཏེ་གསར་འགྱུར་བརྒྱུད་ལམ་བཟོས་ཡོད་པ་དེ་འདྲ་ཡོད་ཀྱང་། ང་ཚོའི་སྤྱི་ཚོགས་ནང་དེ་འདྲ་མེད་སྟབས་གསར་འགོད་པ་ཚོས་རང་ཉིད་འཐབ་རྩོད་པ་ཡིན་པའི་འགན་འཁྲི་དང་རྒྱལ་སྤྱིའི་ཁྲིམས་སྒྲིག་གཞིར་བཟུང་ཐོག མི་མང་ལ་གནས་ཚུལ་གྱི་ཤུགས་རྐྱེན་ཡག་པོ་སླེབས་ཐུབ་པའི་སྒང་ལ་ནུས་ཤུགས་སྤུངས་པ་ཡིན་ན་ཕན་ཐོགས་ཆེན་པོ་ཡོད་པ་རེད་བསམ་ཡོད། ཅེས་བརྗོད་བྱུང་།

དུས་བབ་ཚགས་པར་གྱི་རྩོམ་སྒྲིག་ལས་རོགས་དོན་འགྲུབ་བཀྲ་ཤིས་ལགས་ཀྱིས་༼ བོད་མི་མང་གི་འཐུས་ཚབ་ཚད་ལྡན་ཞིག་ཡོང་ཐབས་སུ་གསར་འགྱུར་བརྒྱུད་ལམ་ཁག་གིས་འགན་ལེན་གང་འདྲ་བྱེད་དགོས་སམ ༽ ཞེས་པའི་བརྗོད་གཞིའི་ཐོག དེ་རིང་གི་གླེང་གཞི་འདི་ཧ་ཅང་གལ་གནད་ཆེན་པོ་དང་དུས་སུ་བབ་པ་ཞིག་རེད། འོན་ཀྱང་། ང་ཚོས་བརྗོད་གཞི་འདི་གླེང་དགོས་ན་མ་མཐར་ཡང་ ༡༩༦༠ ལོའི་ཟླ་ ༩ པའི་ཚེས་  ༢ ཉིན་སྤྱི་འཐུས་ལྷན་ཚོགས་ཐོག་མར་དབུ་བརྙེས་ཏེ། ད་ལོའི་ཕྱི་ཟླ་ ༩ ཚེས་ ༢ ཉིན་དམངས་གཙོའི་དུས་དྲན་ཐེངས་ ༥༠ བ་སྲུང་གཙི་བྱས་པའི་བར་གྱི་དགེ་སྐྱོན་ལེགས་ཉེས་ལ་རགས་ལྟ་ཞིག་བྱས་ཏེ། སྐབས་བཅོ་ལྔ་བའི་སྤྱི་འཐུས་འོས་འདེམས་ལ་གྲ་སྒྲིག་བྱ་དགོས་པ་རེད་དྲན་ཡོད། གཉིས་པ་ང་རང་གི་བརྗོད་གཞིའི་ཐོག་བཤད་རྒྱུ་མང་པོ་མེད། ད་ཆར་རྐུབ་སྟེགས་བཟུང་བསྡད་ཡོད་མཁན་དང་། གསར་དུ་རྐུབ་སྟེགས་སྟེང་འཛེག་ཡོང་མཁན་མགོ་བདེ་བོ་དག་གི་མགོ་སྐོར་འོག་མ་ཚུད་པ་བྱ་རྒྱུ་དང་། མང་ཚོགས་ཀྱི་ངོས་ནས་གསར་ལམ་ཁག་ཏུ་སླེབས་ཚད་ལ་མགོ་མི་འཁོར་བར་ཞིབ་འཇུག་བྱ་རྒྱུ་གལ་ཆེན་པོ་རེད་དྲན་ཡོད། ད་ཡོད་སྤྱི་འཐུས་ཁག་ཅིག་གི་བྱེད་སྟངས་ལ་བལྟས་ན། མང་ཚོགས་ཀྱི་ངོས་ནས་སྐབས་བཅོ་ལྔ་བའི་སྤྱི་འཐུས་གཟབ་ནན་ཐོག་མ་བདམས་པ་ཡིན་ན། མ་འོངས་པར་འདི་དག་སྐུ་དྲག་གསར་མ་མི་ཆགས་པའི་ངེས་པ་མི་འདུག ཅེས་བརྗོད་བྱུང་།

དབུས་གཞོན་ནུའི་ཚོགས་གཞོན་དོན་འགྲུབ་ལྷ་དར་ལགས་ཀྱིས་༼ རང་བཙན་དང་འབྲེལ་བའི་བོད་མི་མང་སྤྱི་འཐུས་འདེམས་སྒྲིག་ཇི་ལྟར་བྱ་དགོས ༽ ཞེས་པའི་བརྗོད་གཞིའི་ཐོག ༡༩༥༩ ལོར་ང་ཚོ་བཙན་བྱོལ་ཏུ་འབྱོར་བའི་ལོ་རྒྱུས་ཀྱི་རྒྱབ་ལྗོངས་ཐོག་མ་བོད་རང་བཙན་རེད། རང་བཙན་ངའི་ལྟ་བ་ཡིན་ཟེར་བ་ཞིག་ལོ་རྒྱུས་དང་འཐབ་རྩོད་ཀྱི་གནས་བབ་གང་གི་ཆ་ནས་ཀྱང་ཡོད་པ་མ་རེད། དེར་བརྟེན་སྤྱི་འཐུས་མི་རེ་ངོ་རེར་རང་བཙན་དང་འབྲེལ་བ་ཡོད་པར་མ་ཟད་རང་བཙན་གླེང་བའི་འགན་དབང་ཡོད། ཡིན་ནའང་། ད་ལྟ་སྤྱི་ཚོགས་ནང་མ་འོངས་པར་གྲོས་ཚོགས་ནང་རང་བཙན་གྱི་ལྟ་བ་འཁུར་མཁན་སླེབས་ན་འགྲིག་གི་མེད་པའི་གླེང་གཞི་ཞིག་ཡོང་གི་ཡོད་པ་རེད། དེའི་ཐད་གསལ་བོར་ཞུ་འདོད་པ་ནི། ལྷག་བསམ་རྣམ་དག་གིས་དབུ་མའི་ལམ་གྱི་སྲིད་བྱུས་འཛིན་མཁན་དང་སོ་སོར་ཡིད་ཆེས་ཡོད་པའི་ཐོག་འབད་བརྩོན་བྱེད་པ་ཡིན་ན། གཞོན་ལྷན་སྒྲིག་འཛུགས་ཀྱི་ངོས་ནས་གུས་བཀུར་ཞུ་པ་དང་ཆབས་ཅིག སྤྱི་འཐུས་གྲོས་ཚོགས་དེ་བོད་མི་ས་ཡ་དྲུག་གི་འཐུས་ཚབ་ཀྱི་ར་བ་ཞིག་ཡིན་སྟབས། རང་བཙན་གླེང་བའི་སྡིངས་ཆ་ཞིག་ཀྱང་ངེས་པར་དུ་དགོས་པ་རེད། ཅེས་བརྗོད་བྱུང་།

རྩོམ་པ་པོ་བོན་རྒྱ་བསྟན་འཛིན་རབ་རྒྱས་ལགས་ཀྱིས་༼ ཆོས་བརྒྱུད་ཁག་གི་སྤྱི་འཐུས་མི་དགོས་པའི་རྒྱབ་ལྗོངས་བཙན་པོ་གང་ཞིག་ཡོད་དམ་ཞེས ༽ ཞེས་པའི་བརྗོད་གཞིའི་ཐོག ང་རང་གིས་སྔོན་མ་ཆོས་རྒྱུད་སྤྱི་འཐུས་མི་དགོས་པའི་སྐོར་ལ་རྩོམ་ཡིག་སྔ་ཕྱི་གཉིས་སྤེལ་བ་ཡིན། ཆོས་བརྒྱུད་སྤྱི་འཐུས་ཟེར་བ་འདི་འདས་མ་འོངས་ད་ལྟ་གསུམ་དང་། འཕྲལ་ཕུགས་རྒྱང་གསུམ་གང་ནས་བལྟས་ཀྱང་དགོས་མཁོ་མེད་པ་གསལ་བོ་གསལ་རྐྱང་རེད། ཆོས་བརྒྱུད་སྤྱི་འཐུས་འདི་ལ་དབང་སྒྱུར་གྱི་དྲི་མ་ཞིག་ཡོད་པ་མ་ཟད། ཆོས་བརྒྱད་སྤྱི་འཐུས་འདེམས་སྟངས་དང་སོགས་དམངས་གཙོའི་ལྟ་གྲུབ་དང་འགལ་གྱིན་ཡོད། ཆོས་བརྒྱུད་སྤྱི་འཐུས་འདི་བདམས་པ་ལ་བརྟེན་ཏེ་ཆོས་ལུགས་པ་དང་ཆོས་ལུགས་ལ་བཀྲུས་ན་མི་དག་པ་དང་བཀྲ་མི་ཤིས་པའི་གནས་ཚུལ་མང་པོ་ཡོང་གི་ཡོད། དེ་བཞིན་ད་ལྟ་ཡོད་བཞིན་པའི་ཆོས་བརྒྱུད་སྤྱི་འཐུས་འདི་དག་དང་། ཡོང་རྒྱུ་བསྡད་པའི་ཆོས་བརྒྱུད་སྤྱི་འཐུས་དེ་དག་ལྟ་བུ་མ་གཏོགས། མ་འོངས་པར་ཆོས་བརྒྱུད་སྤྱི་འཐུས་ལ་བཟོ་བཅོས་རྒྱག་རྒྱུ་མེད་པ་དང་རྒྱག་སྟངས་མེད་པ་འདི་ཆོས་བརྒྱུད་སྤྱི་འཐུས་རྦད་དེ་དགོས་ཀྱི་མི་འདུག་ཟེར་བའི་རྒྱབ་ལྗོངས་བཙན་པོ་ཡིན། ཞེས་བརྗོད་བྱུང་།

སྒྱུ་རྩལ་པ་མགོ་ལོག་ཟླ་བྷེ་ལགས་ཀྱིས་༼ གཞིས་བཞུགས་བོད་རྒྱ་ཆེའི་མི་མང་གི་རེ་འདུན་དང་འཚམ་པའི་སྤྱི་འཐུས་ཇི་ལྟར་འཚོལ་དགོས ༽ ཞེས་པའི་བརྗོད་གཞིའི་ཐོག གཞིས་བཞུགས་བོད་མིའི་ཚབ་མཚོན་ཐུབ་པའི་སྤྱི་འཐུས་དེ་༸གོང་ས་མཆོག་གི་ཅི་གསུངས་བསྒྲུབ་ཐུབ་མཁན་དེ་རེད་བསམ་ལ།  དེ་བཞིན་གཞིས་བཞུགས་བོད་མིིའི་གནས་ཚུལ་ཡང་དག་ཤེས་མཁན་ཞིག་དང་། བོད་ནང་གི་གནས་སྟངས་དངོས་ལ་རྒྱུས་ཡོད་མཁན་བརྒྱུད་མྱོང་མཁན་ཞིག་ཡིན་ཚེ་གཞིས་ལུས་མི་མང་གི་ཚབ་མཚོན་ཐུབ་ཀྱི་རེད་དྲན་ཡོད། ལྷག་བསམ་དགོས་པ་གལ་ཆེན་པོ་ཡིན་ཡང་། རང་ཕྱོགས་ཆོལ་ཁ་དང་ཆོས་ལུགས་ལ་ཞེན་ཁོག་འཐེན་འཁྱེར་བྱེད་མཁན་གྱི་ལྷག་བསམ་དེ་མ་ཡིན་པར། གཟུ་བོར་གནས་པའི་ལྷག་བསམ་དེ་དགོས་པ་གལ་ཆེན་པོ་རེད། དེ་བཞིན། ད་ཡོད་ཆོས་བརྒྱུད་ཁག་གི་སྤྱི་འཐུས་དེ་མུ་མཐུད་ཡོང་དགོས་པ་གལ་ཆེན་པོ་ཡིན་པ་ལྟར། ད་སྔ་སྤྱི་འཐུས་ཀྱི་ཐོབ་ཐང་རག་མེད་པའི་ཆོས་བརྒྱུད་ཁག་ལ་ཡང་བོད་མི་མང་སྤྱི་འཐུས་ཀྱི་ཐོབ་ཐང་དགོས་ཀྱི་འདུག ཅེས་འབོད་སྐུལ་དང་རེ་བ་ཞུ་རྒྱུ་ཡིན་ཟེར།  

དབུས་གཞོན་ནུའི་རྒྱུན་ལས་བསྟན་འཛིན་དབྱངས་འཛོམས་ལགས་ཀྱིས་༼ བུད་མེད་ཀྱི་ནུས་པ་དང་ཆེ་མཐོང་ལ་འབྲེལ་བའི་བུད་མེད་སྤྱི་འཐུས་འོས་འདེམས་གང་འདྲ་ཞིག་བྱས་ན་ལེགས་སམ༽ ཞེས་པའི་བརྗོད་གཞིའི་ཐོག རྒྱལ་སྤྱིའི་སྤྱི་ཚོགས་ཁྲོད་བུད་མེད་ཀྱི་ནུས་པ་དང་ཆེ་མཐོང་ཡར་རྒྱས་སུ་ཕྱིན་པར་བརྟེན་ཏེ། བཙན་བྱོལ་སྤྱི་ཚོགས་ཁྲོད་ཀྱི་བུད་མེད་ཚོས་ཆབ་སྲིད་ཐད་འགན་བཞེས་སྟངས་ཀྱང་གང་འཚམ་ཡར་རྒྱས་ཕྱིན་ཡོད། ང་ཚོའི་གྲོས་ཚོགས་ནང་ད་སྔ་བུད་མེད་ལ་དམིགས་བསལ་སྤྱི་འཐུས་གཉིས་ཀྱི་ཐོབ་ཐང་ཡོད་པ་རེད། དེ་བཞིན། ད་ཆར་ཆོས་རྒྱུད་ཀྱི་སྤྱི་འཐུས་ཡོད་ཀྱང་བཙུན་མ་གཅིག་ཀྱང་སླེབས་ཐུབ་མེད་སྟབས། མ་འོངས་པའི་སྐབས་བཅོ་ལྔ་བའི་ཆོས་བརྒྱུད་སྤྱི་འཐུས་ནང་། བཙུན་མའི་སྤྱི་འཐུས་ཞིག་ངེས་པར་དུ་འདེམས་དགོས་ཀྱི་འདུག་ལ། མ་འོངས་པར་བཅའ་ཁྲིམས་རང་བཞིན་གྱི་ཐོག་ནས་བཙུན་མའི་སྤྱི་འཐུས་ཀྱི་ལམ་ཁ་ཞིག་བཟོ་དགོས་ཀྱི་འདུག ཅེས་བརྗོད་སོང་།

རྒྱལ་སྤྱིའི་བོད་དོན་རྒྱབ་སྐོར་འབྲེལ་མཐུད་པ་ཚེ་རིང་ཆོས་གྲུབ་ལགས་ཀྱིས་༼ བོད་དོན་རྒྱབ་སྐྱོར་དང་འབྲེལ་བའི་སྤྱི་འཐུས་ཇི་ལྟར་འཚོལ་དགོས་པ་དང་། བྱང་ཨ་རི་དང་ཡུ་རོབ། ཨེ་ཤ་ཡ་བཅས་ཀྱི་བོད་མིའི་གྲངས་འབོར་ལ་གཞིགས་ཏེ་སྤྱི་འཐུས་ཇེ་མང་དུ་གཏོང་དགོས་སམ་ ༽ ཞེས་པའི་བརྗོད་གཞིའི་ཐོག བར་ལམ་ཞིག་ནས་བོད་གཞུང་དང་མི་མང་བར་ལ་བར་ཁྱད་ཆེ་རུ་འགྲོ་བཞིན་ཡོད་པའི་བསམ་ཚུལ་ཞིག་སྤྱི་ཚོགས་ནང་ཡོང་གི་འདུག མཁས་དབང་ཁག་ཅིག་གིས་བར་ཁྱད་འདི་ཁ་སྐོང་བྱ་རྒྱུར་སྤྱི་འཐུས་གལ་ཆེན་ཡིན་ཚུལ་བརྗོད་ཀྱི་ཡོད་སྟབས། སྤྱི་འཐུས་ཚད་ལྡན་དང་ཡག་པོ་ཞིག་གདམ་རྒྱུ་དེ་ང་ཚོའི་ལས་འགན་ཆགས་ཡོད་པ་རེད། ད་ཆར་བོད་མི་མང་པོ་ཕྱི་རྒྱལ་ཁག་ཏུ་འགྲོ་བཞིན་ཡོད་སྟབས། ཨ་རི་གཙོས་ཡུ་རོབ་དང་ཨེ་ཤ་ཡའི་ནང་དུའང་སྤྱི་འཐུས་ཀྱི་ཐོབ་ཐང་སྤྲོད་རྒྱུར་དགོངས་པ་བཞེས་དགོས་ཀྱི་འདུག་ལ། ལུང་པ་འདི་དག་ནས་འཐུས་མི་རེ་སླེབས་པ་ཡིན་ན། བོད་དོན་འཐབ་རྩོད་ཀྱིས་མཚོན་པའི་ཆབ་སྲིད་ཀྱི་གནད་འགག་གལ་ཆེན་པོ་ཞིག་འགྲུབ་ཀྱི་ཡོད་པ་རེད། ཅེས་བརྗོད་བྱུང་།

མཐའ་མར་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་༼ སྙིང་རྗེ་གསར་གཏོད་ཀྱི་སྒོ་ནས་བོད་མི་མང་གི་འཐུས་མི་རྣམས་ཇི་ལྟར་འདེམས་སྒྲིག་བྱ་དགོས ༽ ཞེས་པའི་བརྗོད་གཞིའི་ཐོག སྤྱི་འཐུས་ཞེས་པ་དེ་སྤྱི་བའི་འཐུས་མི་ཞིག་ཡིན་སྟབས། བོད་མི་མང་གི་སྐུ་ཚབ་བྱས་ཏེ་སྤྱི་ཚོགས་ནང་གི་དཀའ་ངལ་རིགས་གཞུང་ལ་བསྐྱལ་ཐུབ་དགོས་པ་རེད། ཁོ་རང་ཚོའི་ཁེ་ཕན་གཅིག་པུ་མི་བསམ་པར་མི་མང་གི་འཐུས་མི་ཞིག་ཡིན་སྙམ་པའི་བསལ་བློ་འཛིན་མཁན་ཞིག་ཡིན་དགོས་པ་རེད། སྔར་ཡག་པོ་མེད་པ་ཞིག་མ་འོངས་པར་ཡག་པོ་བཟོ་དགོས་ན་ང་ཚོ་འོས་ཤོག་ལྡུག་མཁན་གྱི་ངོས་ནས་འགྱུར་བ་གཏོང་དགོས་པ་རེད། འོས་བླུགས་ཚར་བའི་རྗེས་ལ་ཡང་རང་དབང་སྤྲད་འཇོག་རྒྱུ་མ་ཡིན་པར་དུས་རྒྱུན་དོ་སྣང་དང་ཞིབ་འཇུག་བྱས་ཏེ། གསར་ལམ་ཁག་ནས་ཐེར་འདོན་བྱ་དགོས་པ་རེད།  མ་འོངས་པར་ཆོལ་ཁ་དང་ཆོས་བརྒྱུད། རང་བཙན་དང་དབུ་མའི་ལམ་གང་ཡིན་ཡང་མི་མང་གི་ལག་ཏུ་ཡོད་སྟབས། བོད་སྤྱི་བའི་ལས་དོན་ལ་སྲིད་ཞུ་སྒྲུབ་མཁན་གྱི་མི་སྣ་ཞིག་འདེམས་པར་ཐོག་མར་འོས་ལྡུག་མཁན་སོ་སོའི་ངོས་ནས་དྲང་པོ་དྲང་བཞག་བྱ་དགོས་པ་རེད། ཅེས་བརྗོད་བྱུང་།

གསར་འགོད་པ། དོན་གོ