བཅའ་ཁྲིམས་ཀྱི་རྔོན་པ། རྩོམ་སྒྲིག་པའི་གཏམ།

བོད་ཀྱི་དུས་བབ་གསར་འགོད་པས་ཤུགས་གང་ཡོད་ཀྱི་མི་དམངས་མང་ཚོགས་ལ་ཐད་ཀར་བསམ་བློ་དབྱེ་ཞིབ་ཀྱིས་གོ་སྐབས་མང་པོ་སྤྲོད་རྒྱུ་ཡོད་པ་མ་ཟད།
མི་དམངས་མང་ཚོགས་ཀྱི་དོ་སྣང་དེ་ཙམ་མེད་ཀྱང་གསར་འགོད་གསར་བསྒྲགས་དེ་ཚོ་མིག་གིས་མཐོང་མ་ཐག་སེམས་ཤུགས་སྐྱེས་དགོས་པ་ཞིག་ངང་གིས་ཆགས་འོང་གི་འདུག དེ་ནི་གསར་འགོད་པས་རང་རིགས་མི་དམངས་ལ་ལྷག་བསམ་རྣམ་དག་གིས་སྐུལ་མ་ཤུགས་ཆེན་བཏང་པའི་འབྲས་བུ་རྣལ་མ་ལས་གཞན་གང་ནས་ཡིན།

རྒྱུན་མཚན་དེ་དག་ལ་བརྟེན་ནས་གསར་འགོད་པ་སྤྱི་ཡོངས་ལ་ངས་སྙིང་ཐག་ནས་ཐུགས་རྗེ་ཆེ་ཞུ་རྒྱུ་ཡིན། དགོས་མཚན་ལྡན་པའི་ཆ་ཤས་གཅིག་བཤད་ན་འདི་འདྲ་རེད། དུས་བབ་དྲ་ཚིགས་ནང་ནས་བཀའ་བློན་ཁྲི་བའི་འོས་མི་ཚང་མའི་གནས་ཡུལ་དང་། ཆུ་ཚད་གང་འདྲ་ཡིན་མིན། སྔོན་ཆད་ཕྱག་ལས་གང་འདྲ་གནང་ཡོད་མེད། གནང་ནས་ཀྱང་གཞུང་སྒེར་ཚང་མར་ཕན་ཐོགས་གང་བྱུང་ཡོད་མེད་སོགས་ཐད་ལ་ཞིབ་ཚགས་ཀྱི་ཁྱབ་བསྒྲགས་བྱེད་རྒྱུ་འདུག དེ་ཚོ་དངོས་ནས་བོད་མིའི་སྤྱི་ཚོགས་ལ་དགོས་མཁོ་ཤིན་ཏུ་ཆེ་པའི་གཏམ་རིན་ཆེན་རིལ་བུ་རང་ལས་གཞན་གང་ཡིན་ཟེར་ནས་ངས་སྐད་གསེངས་མཐོན་པོས་བརྗོད་འདོད་འདུག་ལ་ད་དུང་ཡིན་ན་འང་མུ་མཐུད་ནས་བརྗོད་ངེས་ཡིན་ཞེས་གཏམ་བཅའ་བཞགས་པ་ཡིན།

དེང་སང་བལ་ཡུལ་གྱི་ནང་ན་བཀའ་བློན་ཁྲི་བའི་འོས་གཞིའི་སྟེང་དུ་དམིགས་བསལ་ཟི་ཟི་ལང་ལོང་བྱེད་རྒྱུ་འདུག ཡིན་ནའང་ཟི་ཟི་ལང་ལོང་དེ་ནི་བཟང་ཕྱོགས་ཀྱི་ཟང་ཟིང་མ་ཡིན་པར་སྡུག་ཕྱོགས་ཀྱི་ཟིང་ཟིང་རེད་བསམ་གྱི་འདུག གང་ཡིན་ཟེར་ན་མང་པོ་ཞིག་གིས་ཆོལ་ག་དང་ཆོས་ལུགས་ས་གནས་བཅས་ཀྱི་དབྱེ་འབྱེད་ཁོ་ནའི་ཐོག་ནས་བཀའ་བློན་ཡིན་ན་འང་འདྲ་སྤྱི་འཐུས་ཡིན་ནའང་འདྲ་ཚང་མས་ཕྱོགས་ཞེན་གྱི་ཐོག་ནས་གསར་བསྒྲགས་དང་ཡིག་ཆ་འགྲེམས་སྤེལ་བྱེད་པའི་དུས་ཟིང་གི་སྐབས་ལ་སླེབས་འདུག

ཕྱོགས་གཅིག་ནས་ལྟོས་ནས་དགའ་དགོས་པ་ཞིག་དང་། ཕྱོགས་གཅིག་ནས་ལྟོས་ནས་སེམས་པ་སྐྱོ་དགོས་པའི་གནད་དོན་ཞིག་རེད་བསམ་གྱིན་འདུག གང་ཡིན་ཟེར་ན་ང་ཚོ་བཙན་བྱོལ་བ་ཆགས་ནས་ལོ་ངོ་ལྔ་བཅུ་ལྷག་ཕྱིན་ཟིན་པ་རེད། དེང་རབས་ཀྱི་སྤྱི་ཚོགས་ནང་ནས་བསྡད་དེ་ལོ་ངོ་དེ་དག་འདས་ཟིན་པ་རེད།
ད་དུང་བསམ་བློ་རྙིང་ཞེན་གྱི་ཚིལ་དྲགས་ཆགས་པ་དེ་ཚོ་བསྒྱུར་མ་ཐུབ་པར་སྔར་གཞིན་གནས་བསྡད་པ་ཡིན་ན་དེ་ཚོ་ཡིད་སྐྱོ་དགོས་པའི་གནས་ཤིག་མ་རེད་དམ་ཞེས་དྲི་ཚིག་ཅིག་ཀྱང་ངང་གིས་སླེབས་འོང་གི་འདུག

མང་པོ་ཞིག་གིས་ལྷག་བསམ་རྣམ་དག་གི་ཐོག་ནས་གཞུང་ལ་བློ་སེམས་དཀར་པོའི་ཐོག་ནས་ཞབས་ཞུ་ཞུ་གི་ཡོད་པ་དེ་འང་ང་ཚོས་གསལ་བོར་ཤེས་གལས་རེད། ཡང་མང་པོ་ཞིག་གིས་བསམ་བློ་གང་འདྲ་ཞིག་བཏང་ཡོད་ངས་ཀྱང་ཤེས་མ་སོང་གང་ཡིན་ཟེར་ན་ཚ་ཚ་འུར་འུར་གྱི་ཕྱོགས་ཞེན་གྱི་གསར་བསྒྲགས་མང་པོ་བྱས་པ་དེས་ཀྱང་གང་ཞིག་མཚོན་གི་ཡོད་མེད་ངས་ཀྱང་བཤད་ཤེས་མ་སོང་།

རབས་ཡིན་ན་བོད་རིགས་ཚང་མས་དཔུང་པ་མཉམ་འདེགས་དང་། སེམས་པ་གཅིག་མཐུན་གྱི་རྡོག་རྩེ་ཟད་པོ་དེ་མདུན་དུ་བསྐྱོད་པའི་རེ་བ་སྙིང་ཐེག་ནས་ཞུ་རྒྱུ་ཡིན།་ འདི་ནི་རྒན་པོའི་སེམས་པ་འདུག་མ་ཐུབ་པའི་ནང་སྙིང་ཕྱི་ལ་བྱོ་བ་ཡིན་ཟེར་ན་མི་ཆོག་པ་མེད།

དྲ་གྲོགས་ཚོ་ཕྱི་ལོ་ 2010 ཟླ 9 ཚེས་ 26 རེས་གཟའ་ཉི་མའི་ཉིན་གྱི་ཕྱི་དྲོ་དུས་ཚོད་གཅིག་དང་ཕྱེད་ཀའི་སྟེང་བོད་གཞུང་ཟློས་གར་ཁང་དུ་སཱ་ར་མཐོ་སློབ་དང་། ནོར་གླིང་མཐོ་སློབ། སྨན་རྩིས་ཁང་མཐོ་སློབ་བཅས་ཀྱི་དང་བླངས་སློབ་མ་ཁག་གིས་མི་རབས་གསར་པའི་བཀའ་ཁྲིའི་བགྲོ་གླེང་ཞེས་པ་ཞིག་བཀོད་བསྒྲིགས་བྱས་འདུག་པས་ངེས་པར་དུ་ཕེབས་རོགས་ཞུ། ཞིབ་ཕྲའི་གནས་ཚུལ་ཤེས་འདོད་ན་གུས་པས་ཟིན་བྲིས་སུ་ཕེབས་པར་ཞུ། ཟིན་བྲིས་ཁ་བྱང་https://tibettimes.net/wordpress/blogs.php?id=305&post_id=11689

བཀའ་ཁྲི་ཟམ་གདོང་བཀའ་བློན་ཁྲི་བའི་ཁྲི་ཐོག་ལ་ཡག་པོ་བསྡད་སོང་། ཕོ་གསར་རྫིག་པོའི་ཚོའི་མཉམ་དུ་མོ་ཌའི་ནང་ནས་ཡང་ཡར་མར་ལ་མང་པོ་འགྲོ་སོང་། ལས་ཀ་ཡང་ཡག་ཐག་ཆོད་བྱས་ཡོད་པ་རེད་འདོད། ཡིན་ན་ཡང་ལོ་ངོ་འདི་དག་གི་རྗེས་ནས་འགྲོ་ཡ་རང་རེད། མི་ཁ་ཤས་དང་ཚོགས་པ་རེ་ཟུང་གིས་ཟམ་གདོང་བླ་མ་ཡང་བསྐྱར་བཀའ་ཁྲིར་འདུག་རྒྱུའི་རེ་བ་བཏོན་པ་དེ་སྤྲིན་པ་མེད་པར་ཆར་བ་རེ་བ་དང་གཅིག་ཚང་རེད། བཀའ་ཁྲི་ཁོ་རང་གིས་གནས་སྟངས་དེ་ལ་ལན་གསལ་བོ་མ་བརྒྱབ་པ་དེ་གནས་ཚུལ་སྐྱོ་བོ་རེད། ཡང་མིན་ན་བཀའ་ཁྲི་ཟམ་གདོང་ཆོག་གིས་བཙན་བྱོལ་བོད་གཞུང་ཁྱེར་ནས་དམྱལ་བ་འགྲོ་འདོད་ཡིན་རྒྱུ་རེད།

རྩོམ་སྒྲིག་པས་གསུངས་པ་བདེན་པ་རེད། དེང་དུས་ཀྱི་སྤྱི་ཚོགས་འདིར་ཆབ་སྲིད་པའི་སྐད་ཆ་ཕལ་མོ་ཆེ་སྣང་གནས་མི་མཐུན་པ་ཤ་སྟག་རེད་འདུག
མི་དམངས་ཀྱི་མངོན་འདོད་ཡིན་ཁུལ་གྱི་བཅའ་ཁྲིམས་རིན་པོ་ཆེར་འགྱུར་བ་གཏོང་ཐབས་བྱེད་པ་ནི་ངོ་མ་བསམ་བཞིན་བསམ་བཞིན་དྭོགས་པ་ཆེ་རུ་ཆེ་རུ་དང་། གཏིང་ཟབ་ཏུ་ཟབ་ཏུ་འགྲོ་ཡི་འདུག མི་མང་གི་འདོད་པ་ཡིན་ན་བོད་མི་བརྒྱ་ཆ་ག་ཚོད་ཀྱིས་མངོན་འདོད་ཡིན་མིན་གསལ་ཁ་མེད་པ་དང་གཅིག གཉིས་ནས་དུས་ད་ལྟ་བར་དུ་གྲོས་ཚོགས་ནང་བགྲོ་གླེང་མ་བསླེབས་པ་གང་ཡིན་ནམ། ཚོགས་དུས་སྔ་མ་རྣམས་སུ་སྤྱི་འཐུས་རྣམ་པས་མི་མང་གི་མངོན་འདོད་གང་ཡིན་མི་ཤེས་པ་ཡིན་ནམ། ཡང་ན་དོ་སྣང་མ་བྱས་པ་རེད།
གང་ལྟར་ང་ཚོ་ཚང་མས་སོ་སོའི་རྣམ་དཔྱོད་བཏོན་པ་ལས་གཞན་གྱིས་ཟེར་ཟློས་ཀྱི་རྗེས་སུ་འབྲངས་ན་ཉེན་ཁ་འདུག

རྩོམ་སྒྲིག་པའི་སྐད་ཆ་ལ་རྒྱབ་སྐྱོར་གཙང་མ་ཡོད་། གཞན་གྲོས་འཆར་སྟོན་མཁན་དེ་དག་གིས་གྲོས་འཆར་འདི་འདྲ་སྟོན་པ་དེ་ཟམ་འདོང་རིན་པོ་ཆེའི་ཆེད་དུ་མིན། མ་འོངས་བཀའ་བློན་ཁྲི་པ་དེ་དག་གིས་ཆེད་ཡིན་ཚུལ་བཤད་འདུག། དེ་ནི་དངོས་གནས་རྒོད་དྲོ་བ་ཞིག་ཏེ་མ་འོངས་བཀའ་བློན་ཁྲི་པ་དེ་དག་གི་ཁྲོད་གཏུད་མ་ལོ་གསུམ་སྡོད་ན་བཟང་དང་ངན་ཅི་རིགས་ཡོད་པས་སུའི་ཆེད་ཡིན། མ་གཞི་རྒྱ་དམར་གྱིས་རྒྱུན་དུ་བཙན་བྱོལ་གཞུང་ལ་མང་གཙོ་ཡང་དག་ཡོད་མ་རེད་ཞེས་སྐྱོན་བརྗོད་བྱེད་བཞིན་པ་དེ་ལ་ཡང་ལན་འདེབས་བྱེད་རྒྱུའི་ཚབ་ཏུ་རོག་པ་ཞིག་མི་ཆག་བའི་ངེས་པ་མེད་པས་སོ།