ནར་སོན་གྱིན་པའི་བཙན་བྱོལ་གྱི་ལོ་ལྔ་བཅུའི་མང་གཙོ།

འོས་འཕེན་སྐབས་ཀྱི་མི་མང་གིས་འཚང་ཁ་དང་དོ་སྣང་སོགས་ཀྱི་རྣམ་པ་འདི་མཐོང་ན་དགའ་འོས་པ་ཤིག་རེད།
འོན་ཀྱང་འདིའི་ནང་དུ་ད་དུང་མི་གཙང་བའི་དྲི་ངན་ཞིག་བྲོ་གིན་འདུག་
ངའི་འདི་འདྲ་ཞིག་ཚོལ་སོང་། མི་ཆེན་དང་རྒྱུ་ཆེན་ད་དུང་བླ་མ་དང་དགེ་རྒན་སོགས་ཀྱི་བཀའ་འོག་ལས་རང་ཉིད་ཀྱི་དཔྱོད་ཤེས་བ་འམ་ཡང་ན་རང་ཉིད་ཀྱི་རང་དབང་ཐོག་འོས་ཏག་ཏག་ཞིག་བླུག་ཐུབ་མེད་པས་དྲ་ངན་ཞིག་བྲོ་ངའི་རྣ་ལམ་དུ་བྲོ་གིན་འདུག།
འཇུག་བྲལ་ལགས་ཀྱིས་གསུངས་པ་རེ་ཟུང་རེད། དེ་ལས་དྲ་ངན་འདི་ཅུང་རྒྱ་ཆེ་ཚོད་འདུག

འདི་ག་བོད་ཀྱི་དུས་བབ་ཟིན་བྲིས་པ་གྲྭ་འཆམ་ར་དྲི་མེད་རྒྱལ་མཚན་ལགས་ཀྱིས་ཁོང་གིས་ངྷ་སར་འོས་བསྡུའི་སྔོན་འགྲོ་ཉིན་མོའི་མཐོང་ཐོས་སྐོར་རང་གི་ཟིན་བྲིས་སུ་བཀོད་པ་འདིར་དྲངས། གཤམ་ལ་གཟིགས།

རྡ་ས་ནས་འདི་ལྟར་འོས་བླུགས་སོང་།
༈ བཙན་བྱོལ་བོད་ཀྱི་མི་མང་འོས་བསྡུ་ཆེན་མོའི་མཐོང་ཐོས།།

ཉིན་འདི་ནི་དགྲ་གཞུང་གིས་བཙན་བྱོལ་གཞུང་ནི་ད་དུང་བཀའ་བཀོད་བརྒྱུད་འཛིན། བྲལ་རིམ་དབྱེ་འབྱེད་ཀྱི་ལམ་ལུགས་ཐོག་བསྡད་ཡོད་ཟེར་བ་དེར་བདེན་པ་ཡིན་མིན་དང་། བོད་མི་རང་གིས་དོན་དམ་པའི་མང་གཙོའི་ཁེ་དབང་ལོངས་སུ་སྤྱོད་ཐུབ་ཀྱིན་ཡོད་མེད་སོགས་ཀྱི་རྣམ་པ་གསལ་པོ་བསྟན་རྒྱུའི་གོ་སྐབས་ཤིག་ཡིན་ལ། འཛམ་གླིང་མི་མང་གི་སྔུན་ནས་ཏཱ་ལའི་བླ་མས་དབུ་ཁྲིད་པའི་གཞུང་འདི་གོ་ལའི་ངོས་སུ་ཇི་ལྟར་གནས་བཞིན་ཡོད་མེད་ཀྱི་བརྡ་ལན་ཞིག་སྤྲོད་པའི་ཉིན་མོ་ཞིག་ཀྱང་རེད་འདོད།

གང་ཡིན་ཟེར་ན། ཉིན་འདི་ནི་ཕྱི་ལོ་༢༠༡༠ ཟླ་ ༡༠ ཚེས་ ༣ སྟེ། བཙན་བྱོལ་བོད་མིས་སྐབས་བཅོ་ལྔ་པའི་གྲོས་ཚོགས་གསར་བ་འོས་བསྡུའི་ལམ་ནས་གདམ་པའི་ཉིན་མོ་དང་། སྐབས་གསུམ་པའི་བཀའ་བློན་ཁྲི་བ་མང་མོས་འོས་བསྡུའི་ཐོག་ནས་གདམ་པའི་དུས་ཚོད་ཅིག་ཡིན། དེས་ན་ཉིན་འདིའི་སྔ་དྲོའི་ཆུ་ཚོད་༩ པ་ནས་དབུ་བཙུགས་ཏེ། ཕྱི་དྲོའི་ཆུ་ཚོད་༥ པའི་བར་འོས་འཕེན་རྒྱུའི་དུས་ཚོད་ནི་ས་གནས་མང་ཤོས་ལ་གཅིག་མཚུངས་རེད། དེར་བརྟེན་བཙན་བྱོལ་བོད་ཀྱི་རྒྱལ་ས་ལ་མཚོན་ན། ཉིན་འདིའི་ཞོགས་པ་ཆུ་ཚོད་བདུན་པ་ནས་ཐེག་ཆེན་ཆོས་གླིང་གཙུག་ལག་ཁང་གི་མདུན་ཐང་དུ་མི་མང་འདུ་འཛོམས་དང་། བང་རིམ་སྒྲིག་པ་སོགས་ཚ་ཚ་འུར་འུར་གནང་སོང་། ལས་འགུལ་དངོས་གཞི་འགོ་འཛུགས་པ་ན། འོས་བསྡུའི་ལས་བྱེད་ཅིག་གིས། བོད་མི་བཀྲ་ཤིས་དོན་གྲུབ་ཟེར་མཁན་ཡོད་དམ། འདིར་དང་པོར་ཕེབས་རོགས་གནང་གསུངས་ནས་ཐོག་མའི་འོས་བསྡུའི་རྟེན་འབྲེལ་གྱི་སྒོར་འཕར་ཕྱེས་གནང་སོང་།

འདི་ལོར་དམིགས་བསལ་མི་མང་གིས་དོ་སྣང་གནང་སྟེ། འོས་བསྡུའི་ཆ་ཤས་བླངས་ཡོད་པའི་རྣམ་པ་འདུག་ལ། དེ་ལས་ཀྱང་ཡིག་རྨོངས་ཀྱི་མི་མང་དག་གིས་ཀྱང་རང་རང་གི་ཨམ་ཕྲག་ནང་ཡིག་ལྟེབས་རེར་ཁྱེར་ཏེ། སྔོན་ཚུད་ནས་གྲ་སྒྲིག་ཞུས་གནང་འདུག གཞན་ཡང་གོ་སྒྲིག་པའི་སྟངས་འཛིན་འོག་ནས་ཡིག་རྨོངས་དག་ལ་རོགས་པ་བྱ་མཁན་ཡོད་ན། དེས་མི་གཅིག་ལ་མ་གཏོགས་གཉིས་པ་དང་གསུམ་པ་ལ། འབྲི་རོགས་བྱ་མི་ཆོག་པའི་སྒྲིག་གཞི་ལག་ལེན་བསྟར་ཀྱིན་འདུག་ལ། རང་དབང་ལག་དེབ་དེབ་བསྐྱེལ་བྱས་མེད་པའི་རིགས་ཁ་ཤས་ཀྱང་ཕྱིར་འབུད་གནང་སོང་། གོ་སྒྲིག་ཞུས་སྟངས་ཀྱི་ཆ་ནས་ཐོག་མ་ཆོལ་གསུམ་མི་མང་དཀྱུས་གཅིག་ཏུ་བང་བསྒྲིགས་ཏེ། གསུངས་ཆོས་ར་བའི་ས་ཁུག་གཅིག་རང་ལ་འོས་བསྡུའི་གོ་སྒྲིག་ཞུས་འདུག་པས། མི་ཚོགས་མང་བའི་ཁར་ལྷག་པར་དུ་འཚང་ཁ་ཆེ་བའི་རྐྱེན་རྩར་བཟོས་འདུག དེ་དག་ཀྱང་མཐར་ལྕགས་རའི་ནང་སླེབས་དུས་གཞི་ནས་སོ་སོར་འགྲོ་དགོས་པ་ཞིག་བཟོ་གནང་འདུག་པས། མང་ཚོགས་ཀྱི་གསེབ་ནས་གོ་སྒྲིག་ཞུས་སྟངས་ཀྱི་ཐད་ལ་འདོད་པ་མ་ཁེངས་པའི་རྣམ་འགྱུར་སྟོན་ཀྱིན་འདུག

ཁོང་ཚོས་བཤད་རྒྱུར། མདོ་སྟོད་སྨད་གཉིས་གསུངས་ཆོས་ར་བའི་ནུབ་ཕྱོགས་དང་། དབུས་གཙང་ཆོལ་ཁ་ཤར་ཕྱོགས་སུ་གོ་སྒྲིག་ཞུས་པ་ཡིན་ན་སྟབས་བདེའི་ཁྱད་པ་ཡོང་སྲིད་པའི་བསམ་ཚུལ་ཤོད་ཀྱིན་འདུག དེ་ལྟར་གོ་སྒྲིག་ཞུས་སྟངས་ཀྱི་ཁྱད་པར་ལས་ཡིན་སྲིད། དཔེར་ན་ང་དང་བང་རིམ་མཉམ་པའི་མི་མང་རྣམས། ཆུ་ཚོད་བརྒྱད་པ་ནས་བང་བསྒྲིགས་ཀྱང་། འོས་འཕེན་སའི་ས་གནས་སུ་ཆུ་ཚོད་བཅུ་དང་ཕྱེད་ཀའི་སྟེང་གཞི་ནས་འབྱོར་སོང་། དེ་མིན་ཆུ་ཚོད་དགུ་པ་དང་བཅུ་བའི་སྟེང་བང་སྒྲིག་མཁན་ཞིག་ཡིན་ན། ཆུ་ཚོད་གསུམ་བཞིའི་བར་ལ་བང་གཅིག་པུར་བསྒྲིགས་ནས་དཀའ་བ་སྤྱད་དགོས་པའི་ཚོད་ཅིག་རེད་དྲན།

༼སྤྱིར་ན་ང་རང་སྔ་བོ་ནས་བང་སྒྲིག་པའི་དམིགས་ཡུལ་ནི། དེ་རིང་མང་ཚོགས་གསེང་གི་སྐད་ཆ་རྣམས་ཐོས་ཐུབ་ན་བསམ་པས་ཡིན།༽ངས་མང་ཚོགས་ཀྱི་བར་དུ་ངག་སྒོ་སྡོམ་པའི་ཟོལ་གྱིས་སོང་ཡིན། སྐབས་དེ་དག་ཏུ་ངའི་སྔོན་རྒྱབ་ཏུ་ཡོད་པའི་མང་ཚོགས་ཚོས་རང་རང་གི་ལྷན་དུ་ཡོད་པའི་དགའ་ཉེ་སྤུན་གྲོགས་ཚོར་བཀའ་མོལ་མང་པོ་ཞིག་གནང་གིན་འདུག དེའི་ནང་གི་སྐྱེས་པ་ལོ་ན་ལྔ་བཅུ་ཡན་མན་ཅན་ཁག་ཅིག་གིས། ཨ་ད་དུས་ཚོད་མང་པོ་ཞིག་ཕྱིན་སོང་། དེ་རིང་ཤོ་རྒྱག་རྒྱུའི་དུས་ཚོད་རག་ས་མ་རེད། ཟེར་ནས་རོགས་པ་ཞིག་ལ་བཤད་སོང་། རོགས་པ་དེས། ཁ་སང་ང་སྒོར་ལྔ་བཅུ་ཤོར་སོང་། ཟེར། གཞན་པ་དེས། ཐེངས་མ་རེར་སྒོར་ལྔ་ཅུ་རེད་དམ། ཞེས་དྲིས་སོང་། རེད་རེད། ཟེར།

ཡང་ཕོ་གསར་ཁག་གཅིག་གིས། ཨ་ཕྷུ་གྷ་ནི་སི་ཏིན་ལྟ་བུ་ཡིན་ན། འཇིགས་བསྐུལ་རིང་ལུགས་པས་འོས་ཤོག་འཕངས་ན་གསོད་ཀྱི་ཡིན་ཟེར་གི་ཡོད་རེད་དེ། མི་མང་རྣམས་ད་རུང་སྲོག་འབེན་ལ་བཙུགས་ནས་འགྲོ་གིན་ཡོད་རེད། ཡིན་ནའང་བོད་མི་ཁག་ཅིག་ནི་རང་དབང་དང་ཞི་བདེའི་ངང་ནས་ཡོང་ཆོག་མོད་དོ་སྣང་སྤྲོད་ཀྱིན་མི་འདུག་གསུངས་སོང་། ཁོང་གི་རོགས་པ་དེས། སྤྱིར་བཏང་གོ་སྒྲིག་ཞུ་མཁན་གྱིས་ཚོང་རྒྱག་ས་དང་། མཐོ་སློབ་འགྲིམ་མཁན་དག་གི་སར་འོས་འཕེན་སའི་གོ་སྒྲིག་མཐུས་ཚང་ཞིག་བྱེད་ཀྱིན་མི་འདུག་པས་དཀའ་ངལ་འཕྲད་ཀྱིན་ཡོད་རེད་ལབ་སོང་།

ཏོག་རྗེས་དེར་རྨོ་རྨོ་གཉིས་ཀྱིས་གླེང་མོལ་གནང་སོང་། རྨོ་ཞིག་གིས་རང་གི་རོགས་པ་ལ། བཀའ་བློན་ཁྲི་བ་སུ་ཡིན་ཞེས་དྲིས་སོང་། རྨོ་གཞན་པ་དེས་རྒྱ་རི་སྒྲོལ་མས་ཕྱི་རྒྱལ་གཏོང་གི་ཡིན་ཟེར་གྱི་འདུག་ག ཡིན་ནའང་བློ་བཟང་སེང་གེ་ཡག་པོ་ཡོད་རེད་ཟེར་གྱིན་འདུག ད་ངས་སུ་ལ་བླུགས་དགོས་ཡིན་ཧ་གོ་མ་སོང་། ཟེར་ནས་དོགས་པའི་ངང་འགྲོ་བཞིན་པའང་སྣང་། དེ་ནས་རེ་ཞིག་རིང་མདོ་སྨད་ཀྱི་བང་རིམ་ཆད་སོང་། དེའི་སྐབས་མདོ་སྟོད་ཀྱི་བང་རིམ་ཡང་རེ་ཞིག་རྫོགས་ལ་ཁད་རེད་བྱུང་། ཡིན་ནའང་དབུས་གཙང་གི་བང་རིམ་ནི་ཐང་སྟེང་དེར་མཐའ་མི་མངོན་པའི་བང་རིམ་ཞིག་ཏུ་གྱུར་སོང་། སྐབས་དེར། བོད་མི་ཞིག་གིས། བཙན་བྱོལ་བོད་པ་ཟེར་ནའང་དབུས་གཙང་གིས་བཟུང་ཚར་འདུག་ག་ཟེར། གྲྭ་བ་ཞིག་གིས། སྔོན་མ་ཟམ་གདོང་རིན་པོས་བཀའ་བློན་ཁྲི་བ་དབུས་གཙང་གིས་གཞག་གི་རེད་ཅེས་གསུངས་མྱོང་ཡོད་པ་རེད། ཅེས་ལབ་སོང་།

ཡང་བར་གསེང་ཞིག་ནས་བོད་མི་ཞིག་བྲེལ་འཚུབ་ཀྱིས་སླེབས་བྱུང་། ཁོས་ང་གང་ལ་འགྲོ་དགོས་ཡིན་ན་ཟེར་ཀྱིན་འདུག གཞན་དག་ཅིག་གིས་ཁྱོད་གང་ནས་ཡིན། འདིར་མདོ་སྟོད་དང་། ཕར་ཕྱོགས་དེ་མདོ་སྨད་རེད་ཅེས་ལམ་སྟོན་བྱས་སོང་། འོན་ཀྱང་ཁོས་ད་འདིར་སོང་ན་འགྲིག་གི་ཡོད་འགྲོ སྐུ་མཁྱེན་འདི་བལྟ་རོགས་དང་། ང་གང་ནས་རེད་འདུག་ཟེར་ཀྱིན་རང་དབང་ལག་དེབ་དེ་མི་ཞིག་ལ་བསྟན་སོང་། ཧཧཧ གཞན་དག་དེས་ངས་ཧ་མི་གོ འོས་བསྡུ་ལས་ཁུངས་ལ་དྲི་མཁན་རྒྱུག་བྱས་སོང་།

ང་རང་ཆོལ་ཁའི་འགེངས་ཤོག་བླངས་ནས་ཆོས་བརྒྱུད་ཀྱི་འགེངས་ཤོག་ལེན་མཁན་ཕྱིན་ཡིན། སྐབས་དེར། ངའི་འགྲམ་ནས་ཕོ་གསར་ཞིག་གིས་དགེ་ལུགས་ཆོས་བརྒྱུད་ཀྱི་འགེངས་ཤོག་ཅིག་བླངས་ནས་ཕྱིན་སོང་། ང་ཧང་སངས་བྱུང་། ངས་དྲན་ན། ཁོས་གྲྭ་བ་ཚོ་དང་ཐོࢠ

མཚམས་འདི་ནས་ཁོང་གི་ཟིན་བྲིས་ནང་ཤོང་མི་འདུག

འཚང་ཁ་ཤིག་ཤིག་གིས་འོས་འཕེན་གནང་སྟངས་ལ་བལྟས་ན། དངོས་གནས་དགའ་དགོས་པ་ཞིག་དང༌། བོད་བྱོལ་མི་མང་ཚོའང་དེ་སྔོན་དང་མི་འདྲ་བར་གོ་རྟོགས་བསད་པའི་བརྡ་ཞིག་བསྟན་འདུག མང་གཙོ་ཡར་རྒྱས་ཀྱི་རྣམ་པ་དེར་དུས་ནམ་ཡང་ཡི་རང་ཞུ།་ མི་མང་རྣམས་ཐུགས་རྗེ་ཆེ།
འོན་ཀྱང་མི་མང་སུ་དང་སུ་ཡིན་རུང་བྱ་བ་ཆུང་ངུ་ཞིག་ལ་དོ་སྣང་ཆེན་པོ་ཞིག་སྤྲོད་དགོས་པ་དེ་ནི། བོད་པའི་གོམས་གཤིས་ངན་པ་འཚང་ཁ་རྒྱག་ཀྱིན་པ་དེ་རེད། དུས་ནམ་ཡང་འཚང་ཁ་མེད་པའི་ལས་ཀ་ཞིག་ལ་ང་ཚོ་ཚང་མས་བརྩོན་ཐུབ་ན་ཅི་མ་རུང༌།

ཉེ་ཆར་དུས་བབ་དྲ་རྒྱའི་ནང་དུ་བཙན་བྱོལ་བོད་གཞུང་མང་གཙོ་མ་རེད། སྐུ་དྲག་རིང་ལུགས་རེད་ཟེར་མཁན་མང་དག་ཅིག་བྱུང་བ་རེད། མི་དེ་དག་གིས་མང་གཙོ་ཟེར་བ་གང་འདྲ་ཞིག་ལ་ངོས་འཛིན་བྱེད་ཀྱི་ཡོད་མེད་མི་ཤེས་ཀྱང། འོས་འཕེན་གྱི་སྣང་ཚུལ་འདིས་དེ་དག་ལ་ལན་གསལ་ཐག་ཆོད་ཅིག་བརྒྱབ་འདུག ཡིིན་ནའང་མགོ་འཚོས་མཁན་ཞིག་གིས་མགོ་འཚོས་ཀྱི་རེད་སྙམ།