ཕྱི་ཟླ་ ༩ པའི་ཚེས་ ༨ ཉིན་རྨ་ཆུ་རྫོང་བོད་ཡིག་སློབ་འབྲིང་གི་སློབ་མ་ཚེ་རིང་དོན་གྲུབ་ལ་ལོ་ ༢ ཀྱི་བཙོན་འཇུག་ཁྲིམས་ཐག་བཅད་འདུག
ནོར་གླིང་དུ་གནས་སྡོད་རྨ་ཆུའི་སྒྲོལ་དཀར་སྐྱབས་ལགས་ཀྱིས་གནས་ཚུལ་འགྲེལ་བརྗོད་བྱས་དོན། ཉེ་ཆར་ཀན་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་རྨ་ཆུ་རྫོང་བོད་ཡིག་སློབ་འབྲིང་གི་སློབ་མ་ཚེ་རིང་དོན་གྲུབ་ལ་ལོ་ ༢ ཀྱི་བཙོན་འཇུག་ཁྲིམས་ཐག་བཅད་འདུག་ལ། ཁོང་འཛིན་བཟུང་བྱེད་དོན་ནི། འདི་ལོའི་ཕྱི་ཟླ་ ༣ པའི་ཚེས་ ༡༤ ཉིན་རྨ་ཆུ་རྫོང་བོད་ཡིག་སློབ་འབྲིང་གི་སློབ་མ་ཚོས་རྫོང་དེའི་ཁྲོམ་གཞུང་དུ་བོད་རང་བཙན་དང་༧གོང་ས་མཆོག་བོད་དུ་ཕེབས་དགོས་པའི་ངོ་རྒོལ་སྐད་འབོད་བྱས་སྟབས། རྒྱ་ནག་ཉེན་རྟོག་པས་འཕྲལ་མར་སློབ་ཕྲུག་རྣམས་འཛིན་བཟུང་གིས་འདྲི་གཅོད་ནན་མོ་བྱས་པར་མ་ཟད། བཙན་དབང་གིས་རྒྱ་ནག་གི་ཁྲིམས་ལུགས་དང་ཆབ་སྲིད་སློབ་གསོའི་སྐོར་གྱི་སྦྱོང་བརྡར་ཡང་བསྟུད་མར་སྤྲད་ཡོད།
གནད་དོན་དེའི་རྐྱེན་པས་རྫོང་དེའི་བོད་རིགས་ཉེན་རྟོག་མགོ་བ་ཞིག་དང་སློབ་འབྲིང་དེའི་སློབ་སྤྱི་སྐྱབས་ཆེན་བདེ་གྲོལ་དང་རྡོ་རེད་གཉིས་ཀྱང་ལས་གནས་ནས་གནས་དབྱུང་བཏང་ཡོད། སྐབས་དེའི་སློབ་མའི་ངོ་རྒོལ་ཁྲོད་དུ་དངུལ་ར་ལྷ་སྡེ་ཚེ་རིང་དོན་གྲུབ་དང་མུ་ར་སྡེ་བའི་ཐུབ་བསྟན་ཉི་མ་གཉིས་ལ་ནག་ཉེས་ཆེ་ཤོས་བཙུགས་ཏེ། ཕྱི་ཟླ་ ༨ པའི་ནང་སློབ་མ་ཐུབ་བསྟན་ཉི་མ་ལ་ལོ་ ༢ ཀྱི་བཙོན་འཇུག་ཁྲིམས་ཐག་བཅད་དེ་ལན་ཀྲིག་གྲོང་ཁྱེར་གྱི་བཙོན་ཁང་ཞིག་ཏུ་བསྐྱལ་ཡོད་ལ། དེ་བཞིན་སློབ་མ་ཚེ་རིང་དོན་གྲུབ་ལའང་ཕྱི་ཟླ་ ༩ པའི་ཚེས་ ༨ ཉིན་ཀན་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་ལོ་ ༢ ཀྱི་ཁྲིམས་ཐག་བཅད་དེ། ཕྱི་ཚེས་ ༡༢ ཉིན་ཀན་སུའུ་ཞིང་ཆེན་ཐན་ཧྲེ་ས་ཁུལ་གྱི་བཙོན་ཁང་དུ་ཞིག་བསྐྱལ་ཡོད་འདུག
ཚེ་རིང་དོན་གྲུབ་ལ་ཁྲིམས་བཤེར་སྐབས་ཁྲིམས་རྩོད་པ་རེག་ཡོད་མེད་ཐད་ཁོང་གིས་བརྗོད་དོན། ཁོང་ཚོར་ཁྲིམས་རྩོད་པ་སུ་ཡང་མི་འདུག དམ་དྲག་ཆེ་བའི་རྒྱ་ནག་གི་སྲིད་ཇུས་དེའི་འོག་ས་གནས་མང་ཚོགས་རྣམས་དངངས་སྐྲག་གིས་ཁེངས་ཏེ་ཁྲིམས་རྩོད་པ་བཙལ་རྒྱུར་སེམས་ལ་དྲན་གྱི་མེད་ལ། ཕྱོགས་གཞན་ཞིག་ནས་ས་གནས་མང་ཚོགས་རྣམས་འབྲོག་པ་ཡིན་སྟབས་ཁོང་ཚོར་ཁྲིམས་རྩོད་ཀྱི་ཐོབ་ཐང་ཡོད་མེད་ཀྱང་ཤེས་ཀྱི་མི་འདུག་ཅེས་བརྗོད་ཡོད།
གསར་འགོད་པ། དཔལ་ལྡན།
ཁྲིམས་གཅོད་བཙོན་འཇུག་ཟིན་པའི་སློབ་ཕྲུག་ཚེ་རིང་དོན་འགྲུབ་དང་
ཐུབ་བསྟན་ཉི་མ་གཉིས་ནི་རྨ་ཆུ་རྫོང་བོད་རིགས་སློབ་འབྲིང་གི་དམའ་འབྲིང་གསུམ་པའི་སློབ་ཕྲུག་ཡིན་ལ།་་་ད་ལོ་རང་ལོ་བཅུ་བདུན་ཡིན།་་་་་གཞན་སློབ་ཁོངས་ནས་ཕྱིར་འབུད་བྱས་པའི་སློབ་ཕྲུག་ངག་དབང་ལྷ་མོ་དང་རབ་བརྟན་རྡོ་རྗེ་གཉིས་རང་ལོ་བཅུ་དྲུག་ཡིན།་་་་་རྒྱ་ནག་གི་ཁྲིམས་ཡིག་ནང་འཁོད་ལྟར་ན་མི་མང་འཛོམས་དང་ངོ་རྒོལ་ཁྲོམ་སྐོར།་་་གྲངས་ཉུང་མི་རིགས་ཀྱི་རང་གི་བདེ་སྡུག་ཞུ་གཏུག་སོགས་བྱེད་ཆོག་མོད།་་་་་དོན་དངོས་ཁྲིམས་ལུགས་ལག་བསྟར་སྐབས་རྒྱལ་ཁབ་ཀྱི་ཁྲིམས་ཡིག་ལས་དམར་ཕྱོགས་ཚོགས་པའི་བཀའ་རྒྱ་ཁོ་ནར་བརྩི་བཀུར་ཞུ་དགོས་པ་ཡིན།་་་་་
སློབ་མ་དེ་གཉིས་ཀྱི་ལོ་ཚད་གང་ལ་སླེབས་ཡོད་མེད་གསལ་པོ་ཞིག་བཀོད་ཐུབས་ན་ཕན་རླབས་ཆེ།
ཡང་གསོན་རྩ་ངོ་མ་ཞིག་ཚར་སོང་།