ཤེས་ཡོན་འཐུས་ཤོར་ལས་བོད་སྐད་ཡིག་སློབ་གསོའི་སྐོར་གྱི་ཁག་གཉིས་བ།)
ཤེས་རབ་དགའ་ཚལ་གླིང༌།
བཙན་བྱོལ་དུ་འབྱོར་ནས་མི་ལོ་ལྔ་བཅུའི་རིང་དོན་ཐོག་ལ་མ་འཁྱོལ་བའི་ལས་དོན་གཅིག་ནི་བོད་སྐད་ཡིག་སློབ་གསོའི་ལས་དོན་དུ་གསུངས་པ་ནས་བཟུང༌། གཞུང་སྒེར་གཉིས་ནས་ཚོགས་འདུ་དང་བགྲོ་གླེང༌། བསམ་འཆར་སོགས་གང་མང་ཞིག་བྱུང་དང་འབྱུང་བཞིན་ཡོད་ལ། རང་ཉིད་ལ་མཚོན་ནའང་ཉིན་རེའི་ལས་ཀའི་ཁྲོད་ནས་ཉམས་མྱོང་མང་པོ་ཞིག་བླངས་ཏེ། དེ་སྔོན་<<བགེགས་བར་ཆད་གཅིག་>>ཅེས་པའི་བསམ་འཆར་ཐོར་བུ་ཞིག་སྤེལ་བ་དང༌། ཐེངས་འདིར་ཉེ་ཆར་བོད་ཀྱི་དུས་བབ་སྤྱིའི་འདོན་ཐེངས་(༤༩༩)པའི་ཐོག་གི་<<བསམ་ཤོག་ལེ་ཚན་>>དུ་<<བཙན་བྱོལ་བོད་མིའི་ཤེས་ཡོན་འཐུས་ཤོར་ལ་གཏོང་མཁན་གཙོ་བོ་ཁྱེད་ཀྱིས་གང་ལ་ངོས་འཛིན་བྱེད་ཀྱི་ཡོད་>>ཅེས་པ་ཞིག་བཀོད་ཡོད་པ་དེར་ཁ་གསབ་དང་ཆད་ལྷག་བྱུང་བའི་སྐོར་གྱི་བསམ་ཚུལ་རེ་འགའ་གླེང་བ་ལ། སྐབས་དེར་བོད་གཞུང་དང༌། སློབ་གྲྭ། དགེ་རྒན། ཕ་མ། སློབ་ཕྲུག གཞན་བཅས་ལ་ཡོངས་ཁྱབ་ཀྱིས་བསམ་ཤོག་འཕངས་ཤིང༌། བསམ་ཤོག་གི་གྲངས་ཀ་མང་ཤོས་དགེ་རྒན་ལ་ཐོབ་པ་ནི་སྤྱི་སྙོམ་གྱི་ངོས་འཛིན་ཞིག་ཡིན་ཆོག་མོད། ཐག་ཆོད་འདིར་ཡང་ཕྱི་བལྟས་ཀྱི་ཤས་ཧ་ཅང་ཆེ་བར་འདོད་ལ། ཕྱི་ཚུལ་གྱི་ཐིགས་ཚད་འདིའི་སྟེང་ནས་བཙན་བྱོལ་གྱི་ཤེས་ཡོན་འཐུས་ཤོར་གྱི་རྒྱུ་རྐྱེན་གཙོ་བོ་དགེ་རྒན་རེད་ཟེར་ཆོག་ཆོག་ཡིན་ཏེ། བཙན་བྱོལ་གྱི་དགེ་རྒན་སྤྱིའི་ཤེས་ཡོན་དང་བསམ་བློ། ལྷག་པར་དུ་བོད་རིག་གནས་བསམ་བློ་དང་ངོས་འཛིན་གྱི་ཚད་གཞི་ནི་ཉེ་ཆར་དགེ་རྒན་འཇམ་མགོན་ལགས་ཀྱིས་བོད་ཀྱི་དུས་བབ་དྲ་ངོས་སུ་རྩོམ་ཡིག་ཅིག་སྤེལ་བ་ལས་ཕལ་ཆེར་གསལ་བོར་མཚོན་ཡོད་ལ། སྐབས་དོན་བདག་གི་གླེང་གཞིར་གྱུར་བའི་འདས་བའི་མི་ལོ་ལྔ་བཅུའི་རིང་གི་བོད་ཡིག་དགེ་རྒན་དག་ནི་ཕལ་ཆེར་རང་གི་བསླབ་གཞིའི་སྐད་ཡིག་གི་གནད་དོན་ཡང་ཐག་གཅོད་དཀའ་བའི་གནས་སུ་གྱར་འདུག་པས། བོད་སྐད་ཡིག་སློབ་གསོ་འཐུས་ཤོར་དུ་སོང་བ་རྒྱུ་འབྲས་ཆོས་ཉིད་རེད།
ང་ཚོས་བོད་དགེ་དག་ལ་རྩིས་ཤིག་བརྒྱབས་ན། དགེ་རྒན་ཚོའི་ཁྲོད་དུ་གྲྭ་བ་དང་བླ་མ་མི་ཉུང་བ་ཞིག་ཡོད་ལ། ཁོང་ཚོ་ཕལ་ཆེ་བས་སྐད་ཡིག་ཆེད་སྦྱོང་མ་གནང་པས་སྐད་ཡིག་གི་བློ་སྦྱོང་མ་ཐོབ་པ་དང༌། ཁོང་ཚོས་རྩོམ་རིག་གི་རྨང་གཞིའི་ཤེས་བྱ་ཙམ་ཡང་སྦྱངས་པ་མ་གནང་པས་སྐད་ཡིག་གི་ལག་རྩལ་ཆེས་ཞན་པ་ཐག་ཆོད་རེད། དེས་ན། སྐད་ཡིག་སློབ་ཁྲིད་ལ་མེད་དུ་མི་རུང་བའི་ཆ་རྐྱེན་གྱིས་ཀུན་ནས་དབུལ་བའི་མི་ཞིག་སྐད་ཡིག་དགེ་རྒན་དུ་སྤྱིར་མི་འོས་ལ། སྐད་ཡིག་གི་རྨང་གཞི་སྦྱོང་མཁན་སློབ་ཕྲུག་ཆུང་ཆུང་དག་གི་དམའ་རིམ་དགེ་རྒན་དུ་མི་འདི་དག་དེ་བས་ཀྱང་ཉེན་ཁ་ཆེའོ།།
དེ་ནས་ལོ་སྔོན་མར་ལྦར་ཎ་གཙུག་ལག་སློབ་གྲྭ་ཆེན་མོ་རུ་བཙན་བྱོལ་གྱི་འབྲིང་རིམ་བོད་དགེ་དག་གི་ཟབ་སྦྱོང་ཞིག་ཚོགས་པའི་གྲངས་འབོར་གཞིར་བཞག་ན། འདས་བའི་མི་ལོ་ལྔ་བཅུའི་རིང་གི་བོད་དགེ་མང་ཆེ་ཤོས་གཙུག་ལག་སློབ་གྲྭ་དེ་ག་ནས་ཐོན་པའི་སློབ་མ་ཚོ་ཆགས་འདུག་ཟེར། སྤྱིར་སློབ་གྲྭ་འདིའི་སློབ་ཐོན་སློབ་མ་ཚོའི་རྒྱུད་ཀྱི་ཤེས་བྱའི་སྒྲིག་གཞི་སྣ་ཚོགས་པ་དང་གོ་རིམ་ལྡན་པ་ཞིག་ཡིན་ངེས་ཅན་རེད་མོད། བོད་སྐད་ཡིག་དགེ་རྒན་གྱི་ཐད་ནས་ཁོང་ཚོ་ཡང་གོང་གི་བླ་གྲྭ་ཚོ་ཇི་བཞིན་ཉེན་ཁ་ཧ་ཅང་ཆེ། ཁོང་ཚོའི་སྐད་ཡིག་གི་སློབ་སྦྱོང་དེ་ནི་བརྡ་སྤྲོད་ཀྱི་གཞུང་ལུགས་འགའ་ཀློག་འགྲེལ་བྱས་པ་དེ་ཡིན་ལ། བརྡ་སྤྲོད་གཅིག་པོའི་ཐོག་ནས་སྐད་ཡིག་མཐར་ཕྱིན་མི་ཐུབ་པ་ནི་འཛམ་གླིང་སྐད་ཡིག་གི་རྒྱུན་ཤེས་སུ་འཁུམས། ཁོང་ཚོའི་སྙན་ངག་གི་སློབ་སྦྱོང་དེའང་རྩོམ་འབྲི་སྦྱོང་བརྡར་ཟེར་དུས་སྙན་ངག་མེ་ལོང་མ་སྦྱོང་དགོས་པར་འདོད་པའི་བོད་ཀྱི་སྲོལ་རྒྱུན་གྱི་ནད་ཡམས་དེས་ཟིན་ཡོད་དེ། ལྦར་ཎའི་རྩོམ་རིག་སློབ་སྦྱོང་གི་མགོ་སྙན་ངག་མེ་ལོང་མ་ནས་བཙུགས་ཏེ། མཇུག་མེ་ལོང་མ་ནས་བསྡུས་དང་བསྡུ་བཞིན་པས་སོ། དེས་ན། མཚམས་འདིར་ཡང་ཁོ་བོས་མགྲིན་པ་གཟེངས་སུ་བཏེགས་ནས་སྨྲ་བ་ལ། དེ་སྔའི་ལྦར་ཎའི་སློབ་ཐོན་སློབ་མ་དེ་དག་ཀྱང་སློབ་གྲྭ་ཁག་གི་མཐོ་རིམ་འཛིན་གྲྭའི་ཆོས་འབྱུང་དང་ནང་ཆོས་ཀྱི་དགེ་རྒན་བྱས་ན་མ་གཏོགས། ཁོང་ཚོ་སྐད་ཡིག་དགེ་རྒན་བྱེད་མཁན་གྱི་མི་མ་རེད་ལ། ལྷག་པར་དུ་དམའ་རིམ་དང་འབྲིང་རིམ་གྱི་བོད་སྐད་ཡིག་དགེ་རྒན་བྱེད་མཁན་གྱི་མི་དེ་བས་ཀྱང་མ་རེད། དེ་སྔའི་བོད་སྐད་ཡིག་སློབ་གསོའི་ལས་དོན་ཁྲོད་ནོར་འཆུགས་འདི་ལྟ་བུ་བྱུང་པས་ད་ལྟ་ད་དུང་སྐྱ་ཐག་ཐག་གི་མདུན་ལམ་ཞིག་ལས་མེད་སོང་བ་རེད་ཅེས་པ་འདིའོ།།
གཞན་ཐེངས་འདིའི་བསམ་ཤོག་ལེ་ཚན་གྱི་གདམ་བྱའི་ཁྲོད་དུ་ཤེས་ཡོན་སློབ་གསོའི་སྒོ་ཆེན་ལྟ་བུའི་སློབ་དེབ་མ་བཞག་པ་ནི་བསམ་ཤོག་ལེ་ཚན་གྱི་ཆད་ལྷག་ཅིག་ཏུ་ཁོ་བོས་འདོད་དེ། སློབ་གསོའི་ལས་དོན་ཁྲོད་སློབ་དེབ་ནི་ལག་ཆ་གཙོ་ཆེ་ཤོས་ཤིག་ཏུ་གདའ་བས། སློབ་གསོའི་དར་རྒུད་གང་ཞིག་གནད་དུ་བཟུང་ཡང་སློབ་དེབ་ནི་གླེང་གཞི་གཙོ་བོ་ཞིག་ཏུ་ངང་གིས་གྲུབ་ཡོད། དེ་བས། སྤྱིར་སློབ་གསོའི་ལས་དོན་སྐོར་གླེང་དུས་སློབ་དེབ་གླེང་རྒྱུ་གལ་ཆེ་ལ། ལྷག་པར་དུ་བཙན་བྱོལ་གྱི་འདས་བའི་མི་ལོ་ལྔ་བཅུའི་རིང་གི་བོད་སྐད་ཡིག་སློབ་གསོའི་འཐུས་ཤོར་ཐད་ནས་སློབ་དེབ་ཀྱི་འཐུས་ཤོར་ནི་གཞི་རྩ་ཆེན་པོ་ཆགས་ཡོད་པས། དེ་སྔོན་ཁོ་བོས་སློབ་དེབ་རྩོམ་སྒྲིག་བྱེད་མཁན་དང་སློབ་དེབ་ཁག་ལ་རྩིས་བཤེར་བརྒྱབ་པ་ཡིན་ལ། འདིར་ཡང་ཤེས་ཡོན་འཐུས་ཤོར་གྱི་སྐོར་ལ་ཡོངས་ཁྱབ་བསམ་ཤོག་བསྡུ་བའི་ལས་རིམ་ཁྲོད་དུའང་སློབ་དེབ་ཀྱི་རིན་ཐང་ལ་ཚད་གཞལ་དགོས་པ་ནི་འཐུས་ཚང་གི་ཆ་རྐྱེན་ངེས་ཅན་དུ་གྲུབ་པར་སྨྲ་བ་དང་འབྲེལ། འདས་བའི་མི་ལོ་ལྔ་བཅུའི་རིང་གི་སློབ་དེབ་སྐོར་མདོ་ཙམ་གླེང་བའི་དགོས་པ་མཐོང༌།
སློབ་དེབ་ཀྱི་འཐུས་ཤོར་དེ་ཕྱོགས་ངོས་མང་པོ་ནས་གླེང་དགོས་ངེས་རེད་དེ། ཁོ་བོའི་སྐད་ཡིག་སློབ་དེབ་ཀྱི་རྩོམ་འབྲིའི་ཤེས་བྱའི་ཆད་ལྷག་དང་བཀོད་སྒྲིག་གི་ངོས་གཉིས་ནས་བགྲོ། དེ་སྔ་ང་ཚོའི་སློབ་གྲྭ་ཁག་གི་སློབ་དེབ་ནི་དགེ་རྒན་ཚོར་མཚོན་ནའང་འབྲུ་འབྲེལ་དོན་འབྲེལ་དང་གནད་བཤད་གསེལ་འགྲོལ་ཡག་པོ་ཞིག་མི་ཐུབ་པའི་ཚུལ་དུ་ལྷག་ཡོད་ལ། དེ་ནི་དགེ་རྒན་གྱི་ཤེས་ཚད་དང་སློབ་དེབ་རྩོམ་སྒྲིག་གཉིས་ཐད་ནས་བྱུང་བ་དང༌། དེའང་དེ་སྔའི་དམའ་རིམ་སློབ་དེབ་དང་མཐོ་རིམ་སློབ་དེབ་ཀྱི་ནང་དོན་ལ་མཐོ་དམན་གྱི་ཁྱད་པར་དེ་ཙམ་མེད་པས་ཡིན་ཞིང༌། སྤྱིར་རྩོམ་འབྲིའི་ཤེས་བྱ་ནི་སྐད་ཡིག་སློབ་ཁྲིད་ཀྱི་གལ་ཆེའི་གྲུབ་ཆ་ཞིག་དང༌། སློབ་ཚན་གཞན་གྱིས་ཚབ་བྱེད་མི་ཐུབ་པའི་སྐད་ཡིག་གི་ཚད་གཞི་མཚོན་པའི་གལ་ཆེའི་གྲུབ་ཆ་ཞིག ལྷག་པར་དུ་རྩོམ་འབྲིའི་རྨང་གཞིའི་ཤེས་བྱ་ནི་སྐད་ཡིག་སྦྱོང་བརྡར་བྱེད་པའི་ལམ་རིམ་དང་པོ་ཡིན་མོད། ང་ཚོའི་སློབ་དེབ་ཁག་གི་ནང་ལད་འབྲི་སྦྱོང་བརྡར་བྱེད་ཚུལ་དང༌། དོན་རྐྱེན་འབྲི་ཚུལ། བྱ་འགུལ་འབྲི་ཚུལ་ཞེས་པ་ལྟ་བུའི་ཤེས་བྱ་འདི་དག་འཇུག་མ་ཐུབ་པ་ནི་སྐད་ཡིག་སློབ་དེབ་ལ་ཆད་ལྷག་བྱུང་བའི་གནས་ཚུལ་ཡིན་ལ། སློབ་དེབ་ཁག་གི་ཤོག་ངོས་རེ་གཉིས་ཙམ་ལས་མེད་པའི་<<གཏོང་ཡིག་འབྲི་དཔེ་>>(འཛིན་གྲྭ་ལྔ་པའི་སློབ་དེབ་ཏུ་འཁོད།)དང་<<རྩོམ་ཡིག་ཇི་ལྟར་འབྲི་དགོས་སམ།>>དང་<<དགོངས་ཤོག་འབྲི་སྟངས།>>(འཛིན་གྲྭ་དྲུག་པའི་སྐད་ཡིག་སློབ་དེབ་ནང་འཁོད།) <<ཇི་བཞིན་བརྗོད་པའི་རྩོམ་འབྲིའི་ཤེས་བྱ།>>དང་<<རྒྱུན་སྤྱོད་ཡིག་རིགས།>>(འཛིན་གྲྭ་བདུན་པའི་སྐད་ཡིག་སློབ་དེབ་ནང་འཁོད།)བཅས་སློབ་དེབ་ནང་བཀོད་སྒྲིག་བྱེད་སྟངས་ཀྱི་ཐད་ནས་ནོར་འཛོལ་བྱུང་ཡོད་དེ། སློབ་ཚན་འདི་དག་སྤྱི་བེམ་པའི་སྟེང་ན་ལུས་འདུག་པ་དེའོ།།
སློབ་ཚན་འདི་དག་བྱེ་བྲག་དང་ཆ་ཤས་ཀྱིས་གསལ་བོར་མ་བཀོད་པ་ནི་སྐབས་དེའི་དགེ་རྒན་ཚོའི་སློབ་ཁྲིད་ནུས་ཚད་ལས་བརྒལ་སོང་བ་ལགས་ན། ལོ་ཆུང་སློབ་མ་དག་གི་བློ་གྲོས་ཀྱི་མེ་རོ་ཆུང་ཆུང་དེས་བཞུ་ག་ལ་ཐུབ། སློབ་དེབ་ཁག་གི་ནང་སློབ་ཚན་འདི་ལྟར་བཀོད་སྒྲིག་བྱས་པ་དགེ་རྒན་ཚོས་སློབ་མའི་མོས་ཁམས་ལ་འཇོག་མ་ཐུབ་རྐྱེན། ཕྲུ་གུ་ཚོས་བོད་ཡིག་ནི་མཁྲེགས་པོ་ཞིག་དང་ནམ་ཡང་ཤེས་རྒྱུ་མེད་པ་ཞིག་ཏུ་མཐོང་སོང་བ་རེད། སློབ་མ་ཚོའི་རྒྱུད་ལ་སྐད་ཡིག་གི་རྨང་རྡོ་འཇོག་མ་བཏུབ་པ་རེད། འཛིན་གྲྭ་བརྒྱད་པའི་སྐད་ཡིག་སློབ་དེབ་ནང་འཁོད་པའི་<<རྒྱུན་སྤྱོད་ཡིག་རིགས་>>དང་<<སྙན་ངག་གི་སྤྱི་ཁོག>> <<རང་བཞིན་བརྗོད་པའི་རྒྱན།>> <<དཔེ་རྒྱན།>> <<གཟུགས་རྒྱན་>>བཅས་ལྟོས་བཅས་ཀྱིས་ཁ་གྲངས་མང་དུ་སོང་ཡོད་མོད། དེ་དག་ཀྱང་བྱེ་བྲག་གི་མཚན་ཉིད་དང་མཚན་གཞི། དཔེ་འཇོག་ལྷག་མ། དཔེ་མཚོན་རྩོམ་ཡིག་བཅས་ཀྱི་སྟེང་དུ་མ་བབས་པས་གོང་གི་བཀོད་སྒྲིག་གི་སྐྱོན་གྱི་ར་བ་ལས་མི་འདའ་བར་སྙམ་ཞིང༌། དགེ་རྒན་གྱིས་ཀློག་འགྲེལ་བྱེད་དགོས་པའི་སློབ་ཚན་རྐྱང་ལས་སློབ་མས་ལྟ་ཀློག་བྱེད་དགོས་པའི་སློབ་ཚན་མེད་པས། སྤྱི་ཡོངས་ནས་སློབ་དེབ་ལ་སྟོང་ཆ་ཞིག་ལྷག་ཏུ་བཅུག་པ་མ་ཟད། ས་འདིར་སྐབས་དེར་སློབ་ཕྲུག་ཚོ་ལ་རང་ཉིད་ཀྱི་བློ་ཁ་དང་འཚམ་པའི་དཔེ་དེབ་བམ་ཕྲུ་གུའི་རྩོམ་དཔེ་དེ་འདྲ་ཅི་བས་དཀོན་པའི་གནས་སྟངས་ལ་བསམ་ན་དེ་བས་ཀྱང་ཉེན་ཁ་རུ་གྱུར་ཡོད་ལ། དགེ་རྒན་གྱིས་ཀློག་འབྲེལ་བྱེད་དགོས་པའི་སློབ་ཚན་དག་ཀྱང་ལྷུ་ལག་གྲོལ་ནས་དབྱེ་ཞིབ་ཀྱི་དཔེ་མཚོན་གཅིག་ཀྱང་མེད་པར། འཆིང་སྡོམ་གྱི་རྒྱ་ལས་གྲོལ་མེད་པས། དགེ་རྒན་ཚོའི་སློབ་ཁྲིད་ནུས་ཚད་ལས་བརྒལ་ཡོད་དེ། དཔེར་ན། འཛིན་གྲྭ་བརྒྱད་པའི་སློབ་དེབ་རྙིང་པའི་ནང་ཧཕ་རིན་སིའི་རྩོམ་པ་པོ་གྲགས་ཅན་<<ཨར་ཧཕིན་སི་ཏུའི་>>རྩོམ་ཡིག་གྲགས་ཅན་<<མཇུག་མཐའི་སློབ་ཐུན་གཅིག་>>འཁོད་ཡོད་ལ། སྤྱིར་སློབ་ཚན་རང་ངོས་ནས་སློབ་གསོའི་ནང་དོན་ཕུན་སུམ་ཚོགས་པ་ཞིག་ལྡན་ཡོད་པ་རེད་མོད། དགེ་རྒན་ཚོས་རྩོམ་ཡིག་དེ་བཤིག་ནས་གྲོལ་ནས་སློབ་མར་ཁྲིད་སྟོན་བྱ་རྒྱུ་ཧ་ཅང་དཀའ་བའི་གནས་སུ་གྱུར་ཡོད་པ་ལྟ་བུ་རེད། ང་ཚོས་རྩོམ་ཡིག་འདི་དག་སློབ་མ་ཚོའི་རྒྱུད་ལ་འཇོག་མ་ཐུབ་པས་སློབ་མའི་སློབ་སྦྱོང་ལ་འཐུས་ཤོར་ཕྱིན་པ་རེད་ལ། དེང་སྐབས་སྤྱི་ཚོགས་ཁྲོད་ཀྱི་བླ་མ་དགེ་བཤེས་འགའ་དང་འགོ་ཁྲིད་འགའ། སློབ་གྲྭ་ཁག་གི་འགན་འཛིན་གཙོས་དགེ་ལས་འགའ་བཅས་ཀྱིས་ྋགོང་ས་མཆོག་གི་རིགས་ལམ་སྦྱོང་དགོས་པར་གདམས་པའི་ལམ་སྟོན་བཀའ་སློབ་ལ་ངེས་ཤེས་ཟབ་མོ་བརྙེད་ཡོད་མདོག་གིས་སློབ་གྲྭ་ཁག་གི་ནང་རིགས་ལམ་སློབ་ཁྲིད་ལ་ཅལ་འདྲོགས་བྱེད་ཀྱིན་འདུག་ འོན་ཀྱང༌། ངས་ཁོང་ཚོའི་བྱེད་སྟངས་འདི་ཤེས་རྟོགས་དང་ལག་ལེན་གྱི་རྒྱུ་འབྲས་ཀྱིས་གྲུབ་ཡོད་མེད་དོགས་པ་ཟ་བཞིན་ཡོད་ལ། ངས་ནི་ཇི་བཞིན་བརྗོད་པའི་རྩོམ་ཡིག་འབྲི་ཐབས་དང༌། གསལ་བཤད་རྩོམ་ཡིག་འབྲི་ཐབས། དགག་སྒྲུབ་རྩོམ་ཡིག་འབྲི་ཐབས་བཅས་ཀྱི་སློབ་ཚན་བཀོད་སྒྲིག་དང་སློབ་ཁྲིད་ཀྱི་རྩ་དོན་དོན་འཁྱོལ་བྱ་ཐུབ་ཚེ། སློབ་མའི་བློ་རིག་པ་འགྲོལ་བཏུབ་པ་མ་ཟད། བོད་སྐད་ཡིག་གི་རྨང་རྡོའང་བརྟན་པོ་ཞིག་བརྩིག་ཐུབ་ངེས་སྙམ།
དེ་བས། ང་ཚོས་སློབ་གྲྭ་ཁག་ལ་སློབ་དེབ་མེད་པའི་རིགས་ཡོད་པར་བྱེད་པ་དང་ཡོད་པ་དག་ཀྱང་ཕྱི་ནང་གཉིས་ཐད་ནས་འཐུས་འཚང་དུ་གཏང་རྒྱུ་ནི་བོད་སྐད་ཡིག་སློབ་གསོའི་ལས་དོན་དང་ཤེས་ཡོན་འཐུས་ཤོར་གྱི་ལས་དོན་གལ་ཆེན་དུ་འཛིན་དགོས་ཞེས་སྨྲ་བ་འདིའོ།།
སྐལ་བཟང་ཉི་མ་ལགས། ཁྱེད་ཀྱིས་བྲིས་པའི་ཟིན་བྲིས་ངས་བཀླགས་པ་ཡིན། གནས་ཚུལ་རེ་འགར་མཐུན་མིན་འཇུག་ཀྱང་ཕྱོགས་ཡོངས་ནས་ངས་ཀྱང་རང་གི་ཟིན་བྲིར་རྩོྩོམ་ཡིག་གི་ཐོག་མར་བཙན་བྱོལ་གཞུང་གི་བོད་ཡིག་ཕམ་ཁའི་སྐོར་གླེང་ནས་ཡོད་པས། དུས་ཀྱིས་ཁོམ་ན་དེར་ཞིབ་གཟིགས་གནང་དང་བསམ་ཚུལ་མཐུན་ངེས་པ་ཞིག་ཏུ་མཐོང་། ད་དུང་མི་རབས་ཀྱི་དཀའ་ཁག་གི་དུས་འདིར་སྐྱོན་བརྗོད་ལས་ཐབས་ལམ་མང་ཙམ་བྲིས་ཐུབ་ན་དགེ་མཚན་གནད་སྨིན་ཡོང་ངེས་རེད། བཀྲིས་བདེ་ལེགས། སྐུ་ཁམས་བཟང་།
གྲོགས་པོ་ལགས། གང་བྲིས་པ་དེ་ལེགས་པོ་འདུག མུ་མཐུད་དེའི་ཐད་ཞིབ་འཇུག་ཡོད་པ་བགྱི།
གྲོགས་པོ་ལགས། ངས་ཁྱེད་རྩོམ་ཡིག་ཚང་མ་བཀླགས་ཟིན་པ་ཡིན། ཧ་ཅང་ལེགས་པོ་བྲིས་འདུག
རེད་ཡ་ དྲ་ཚིགས་འདིའི་ནང་གི་དྲ་བ་མང་ཆེ་བས་བཙན་བྱོལ་ནང་འཚར་ལོང་བྱུང་བའི་སློབ་མ་རྣམས་ཀྱི་སློབ་གསོའི་སྐོར་ལ་མི་འགྲིག་པ་རྐྱང་རྐྱང་རེད་འདུག་ གཅིག་བྱས་ན་བསམ་འཆར་འདོན་མཁན་གྱི་རྣམ་རྟོག་ལ་འཆར་ཚད་བདེན་པ་ཡིན་པའི་ངེས་པ་མེད་ འོན་ཀྱང་འཐུས་ཤོར་ནི་ཕྱོགས་མང་པོ་ནས་ཡོང་གིན་ཡོད་ གཙོ་བོ་ནི་ཁོར་ཡུག་གི་དབང་གིས་ཡིན་པར་སྙམ་ དགེ་རྒན་ལ་མཚོན་ན་ཝ་རཱ་ན་སི་མཐོ་སློབ་ནས་ཐོན་པ་རྣམས་མི་འགྲིག་པ་མེད་ ཁོང་རྣམས་ནི་དེང་སང་མྱུག་ཐོགས་པ་མང་ཆེ་བ་ནང་བཞིན་སྙན་ངག་གིས་ཚིག་སྙན་པོ་དེ་འདྲ་རང་མེད་ཀྱང་ནང་དོན་ལ་བོད་ཀྱི་རིག་གཞུང་ཕྱུག་པོ་ལྡན་ཡོད་ དེ་ཙམ་མ་ཟད་ ཁོང་ཚོའི་ཤེས་ཚད་དེ་རང་མི་རིགས་ཀྱི་རིག་གཞུང་ཙམ་མ་ཡིན་པར་གཙོ་བོ་ང་ཚོའི་སྐད་ཡིག་གི་འབྱུང་ཁུངས་ལེགས་སྦྱར་གྱི་སྐད་དང་འགྲན་བཟོད་པ་ཞིག་ཡོད་པས་བོད་མི་རིགས་ཞིག་ཡིན་པའི་ཆ་ནས་སྤོབས་པ་སྐྱེས་འོས་པ་ཡིན་
དྲ་གྲོགས་སྐལ་བཟང་ཉི་མ་ལགས། ཁྱེད་ཀྱིས་གང་གསུངས་པ་དེར་རྒྱབ་སྐྱོར་བརྒྱ་ཆ་བརྒྱ་ཐམ་པ་ཡོད།
བཙན་༼བྱོམ་༽ཞེས་གཏགས་ནོར་གྱིས་ཕྱིན་སོང་། དེ་བཙན་༼བྱོལ༽ཞེས་སུ་བཅོས་གནང་རོགས། དེ་རིང་ལམ་ཞོར་དུ་དྲ་ཁང་ཞིག་ནང་འཛུལ་ནས་འདི་ཙམ་དྲན་པ་དེ་ཞུས་པ་ལགས། ནམ་རྒྱུན་ལྟར་ལྷོད་སྡོད་ཀྱི་སྐབས་ཤིག་ལ། འདི་འབྲེལ་གྱི་གླེང་སློང་ལ་སྣོན་འདེབས་རྒྱས་པ་ཞིག་ཞུ་སྙིང་འདོད་དེ་ཡོད་ལགས་ཞེས་ཀྱང་ཞུའོ།།
བཙན་བྱོམ་ནང་འདིར། བཙན་བྱོལ་བོད་ཀྱི་སློབ་གྲྭ་ཁག་གི་ནང་འདིར། བོད་ཀྱི་སྐད་ཡིག་གི་གནས་ཚད་སྐྱོ་བོ་ཆགས་པའི་རྒྱུ་རྐྱེན་གཙོ་ཆེ་བ་གསུམ་ནི། འཛིན་སྐྱོང་། དགེ་རྒན། སློབ་དེབ་བཅས་ལ་ཐུག་ཡོད་པར་བདག་འདོད།
གང་གིས་ན། འཛིན་སྐྱོང་གི་བྱེད་པོ་རིམ་བྱོན་དག་གིས་འཕྲལ་ཕུགས་གཉིས་ལས་འཕྲལ་གྱི་ཉི་མ་འཁྱོལ་ཐབས་གཙོ་འདོན་གྱིས་དུས་ཚོད་ཟད་དུ་བཅུག་པ་དང་། དགེ་རྒན་མང་ཆེ་བའི་ཤེས་ཡོན་ཆུ་ཚད་དམའ་ཁར། འཛིན་ཁང་གི་ཁོར་ཡུག་ཙམ་དུ་ལས། དེ་ལས་བརྒལ་བའི་འགན་ཁུར་ལེན་སྲོལ་ཕལ་ཆེར་མེད་སོང་བ། སློབ་མའི་བློ་ཁ་དང་འཚམ་པའི་སློབ་དེབ་རྩོམ་སྒྲིག་གི་གནད་འགག་ལ་གཙིགས་ཆེན་མ་གནང་བ་བཅས་རེད། འདི་གསུམ་མེད་པར་གྱུར་པས་ན། གོང་ས་མཆོག་གིས་ཡང་ནས་ཡང་དུ་བཀའ་སློབ་ལམ་སྟོན་གནང་བ་དང་། ད་ལྟའི་གྲུབ་འབྲས་གཉིས་དེ་ཁ་ཕྱོགས་མ་འདྲ་བ་གཉིས་ཆགས་པ་འདི་བྱུང་བར་ཡང་བདག་འདོད།
འཛིན་སྐྱོང་བྱེད་པོ་རིམ་བྱུང་སྟེ། ཤེས་རིག་གི་བཀའ་བློན་གནང་མྱོང་མཁན་དག་དང་། ཤེས་རིག་ལས་ཁུངས་ཀྱི་དྲུང་ཆེ་གནང་མྱོང་མཁན་ཕལ་མོ་ཆེ་བས། སོ་སོའི་ལས་ཡུན་འཁྱོལ་ཐབས་ཙམ་ལས་བོད་ཀྱི་ཤེས་རིག་ཡར་རྒྱས་ཀྱི་ཕྱོགས་ལ་དེ་ཙམ་གྱི་དགོངས་པ་མ་བཞེས་པ། དེ་བཞིན་སློབ་གྲྭ་ཁག་གི་འཛིན་སྐྱོང་བྱེད་པོ་དག་ཀྱང་མཐོ་རིམ་པ་དེ་དག་གི་རྗེས་སུ་འབྲངས་ཤུགས་ཆེ་ཐལ་དུ་གྱུར་པ་དེ་གནད་དོན་གྱི་ཐུག་ས་དང་པོ་རེད།
དེ་ནས་དགེ་རྒན་ཡོངས་རྫོགས་ཀྱི་ཤེས་ཚད་དང་དེའི་ནང་ནས་ཀྱང་བོད་ཡིག་དགེ་རྒན་ཚོའི་ཤེས་ཚད་གཉོམ་པའི་དབང་གིས། སློབ་མ་ཚོའི་སེམས་ངོར་བོད་ཡིག་སྦྱོང་བའི་སྤྲོ་སྣང་བསྐྱེད་ཐུབ་རྒྱུ་ཕར་ཟད། ཉོབ་སྣང་གི་སྣ་འདྲེན་བྱེད་ཐལ་དུ་སོང་བ་དེ་ནི་གནད་དོན་གྱི་ཐུག་ས་གཉིས་པ་རེད། ད་ལྟ་སློབ་གྲྭ་ཁག་ན་བོད་ཡིག་དགེ་རྒན་ཤེས་ཡོན་ཚད་ལོངས་ཡོད་མཁན་མེད་པའི་དཀའ་ངལ་དེ་སློབ་མ་ཚོས་ཉིན་རྟག་པར་གླེང་གིན་ཡོད་པ་ནི་ཤེས་བྱེད་གསལ་ཤོས་གཅིག་རེད།
སློབ་དེབ་ཀྱི་ཚད་གཞི་ནི། སྤྱིའི་དབང་དུ་བྱས་པ་ཡིན་ན། བོད་ཀྱི་ཆོས་དང་རིག་གཞུང་དར་སྤེལ་རྒྱུན་འཛིན་ལ་ཆེད་དུ་དམིགས་པ་ཞིག་ཆགས་ཡོད་ནའང་། ད་ལྟའི་ང་ཚོར་མཚོན་ན། སློབ་དེབ་དང་དགེ་རྒན་དོ་མི་མཉམ། སློབ་དེབ་དང་སློབ་མ་དོ་མི་མཉམ་པའི་དཀའ་ངལ་ཆགས་ཡོད་སྟབས། ད་ཡོད་བོད་ཡིག་གི་སློབ་དེབ་འདི་དག་ནི་དགེ་རྒན་གྱི་ཤེས་ཚད་དང་མི་འཚམ་པའི་ཁར། སློབ་མའི་བོད་ཡིག་གནས་ཚད་དང་ཡང་མི་འཚམ་པ་ཞིག་ཆགས་ཡོད། སློབ་དེབ་ངོས་ཀྱི་སློབ་ཚན་དེ་དག་དང་དགེ་རྒན་ཚོའི་ཤེས་ཚད། སློབ་མའི་དོ་སྣང་འདྲེན་ཤུགས་བཅས་ལ་བསམ་པས། གཟོད་ང་ཚོའི་སློབ་དེབ་འདི་ནི་ཡར་སྣེར་མ་སླེབས་མར་སྣེར་མ་སླེབས་པའི་ཚད་དུ་ཡོད། གནད་འགག་གི་ཐུག་ས་ནི་འདི་འདྲ་དག་ན་ཡོད་པར་འདོད་ཅེས་ཞུའོ།།
ང་རང་དགེ་རྒན་ཞིག་གི་མིང་ཁྱེར་ཡོད་པས་ངོ་མ་བཤད་ན་འདི་ལྟར་བཤད་མི་འོས་པ་ལྟ་བུ་ཡིན་མོད། ཁྱེད་ཀྱིས་གསུངས་པ་མང་ཆེ་བར་ཁོ་བོས་དེ་ལྟར་དྲན་བཞིན་ཡོད། ངས་ནི་ཁྱེད་ཀྱི་དགོངས་ཚུལ་མ་མོས་མཐུན་བརྒྱ་ཆ་རྒྱ་ཡོད།
སྐལ་བཟང་ཉི་མ་ལགས།
ཁྱེད་ཀྱིས་བྲིས་པའི་གནད་དོན་དག་ལ་རྒྱབ་སྐྱོར་གྱི་ཚུལ་དུ་ཚིག་འགའ་ཞུ་ན་འདོད།
དང་པོ། བོད་ཡིག་དགེ་རྒན་གྱི་ཆུ་ཚད་མི་འདང་བ་དངོས་ཡོད་གནས་ཚུལ་རེད། དགེ་རྒན་གྱི་ཤེས་ཚད་དམན་པའི་ཐོག་ཁྲིད་གཞིའི་ཇུས་འགོད་དང་གྲ་སྒྲིག་མེད་པ། བོད་ཡིག་འདི་དགའ་སྣང་གི་ཐོག་ནས་མི་ཁྲིད་པར་ཁྲལ་ཙམ་ཁྲིད་པ། ང་རང་བཙན་བྱོལ་དུ་འབྱོར་ནས་ལོ་གཉིས་འགོར་པའི་སྐབས་ཤིག་ལ་བོད་ཡིག་དགེ་རྒན་ཞིག་གིས་རྣམ་དབྱེ་གཉིས་བཞིའི་གཉིས་ཀྱི་དཔེ་བརྗོད་ཀྱི་དབྱེ་བ་ཡག་པོ་འབྱེད་མ་ཐུབ་པ་ལ་སློབ་ཕྲུག་གིས་དྲི་བ་ཡང་ཡང་བཏང་མཐར་ངུ་དངངས་ཀྱིས་འཛིན་ཁང་ནས་ཐོན་པའི་དོན་དག་ཡང་བྱུང་མྱོང་ཡོད།
གཉིས་པ། ཀློག་དེབ་ཀྱི་སྐོར་དེ་ཡིན། གནད་ལ་འཁེལ་འདུག ང་རང་འཛིན་རིམ་བཅུ་གཉིས་སླེབས་དུས་འཆར་ཅན་ལྟར་གུས་པར་སུམ་རྟགས་གཉིས་ཐེངས་གསུམ་ལ་ཁྲིད་ཚར་འདུག རང་ཉིད་ཀྱིས་ཤེས་ཡོད་པ་ནི་ཐོག་མ་ནས་ཤེས་ཡོད་པ་དེ་རེད། ཡ་མཚན་པ་ཞིག་ནི་སུམ་རྟགས་ཐེངས་གཉིས་སམ་གསུམ་ལ་སྦྱངས་ཚར་བའི་འཛིན་རིམ་བཅུ་གཉིས་ཀྱི་མཐར་ཕྱིན་སློབ་མའི་ཁྲོད་ན་སྙན་ཞུ་སྤུས་དག་ཅིག་འབྲི་ཐུབ་མཁན་གྱི་སློབ་ཕྲུག་མཛུབ་རྩེར་བགྲང་ཆོག་པ་དེ་རེད། གང་ལྟར་ད་ལྟའི་ཀློག་དེབ་ཀྱི་བཀོད་སྒྲིག་འདིས་སློབ་ཕྲུག་ལ་བོད་ཡིག་སློབ་པའི་དགའ་སྣང་ཁྱོན་ནས་སློང་ཐུབ་ཀྱི་མི་འདུག
སློབ་མ་ཞིག་ལ་བོད་ཡིག་གི་རྨང་གཞི་བརྟན་པོ་དགོས་ན་དང་པོ་མིང་ཚིགས་བརྡ་དག་གི་རྐང་ཚིགས་པ་ཞིག་སློབ་དགོས། དེ་ནས་སུམ་རྟགས་སྙན་ངག་སོགས་སློབ་ན་བོད་ཡིག་ཡར་རྒྱས་ཡོང་ཐུབ། བརྡ་དག་མ་སློབ་པར་སུམ་རྟགས་སྙན་ངག་སློབ་ན་དོན་མེད་རེད། གུང་ཐང་བསླབས་བྱ་ནང་དོན་གྱི་རྒན་པོ་ཚིག་གི་མཁར་བ་ལ་བསྟེན་ནས་ཅེས་གསུངས་ཡོད།
གོང་གི་བསམ་ཚུལ་འདི་ལ་དམིགས་བསལ་གྱིས་ཐུགས་རྗེ་ཆེ་ཞུ་བ་དང་ཆབས་ཅིག སྔོན་བྱོན་མཁས་དབང་རྣམས་ཀྱི་རྩོམ་སྟངས་རིག་པ་ནི་སྲོལ་རྒྱུན་རྩོམ་རིག་སྟེ་སྙན་ངག་མེ་ལོང་མ་དང་སུམ་རྟགས་ཀྱི་གཞུང་གཉིས་ལ་བརྟེན་ནས་བོད་ཀྱི་རིག་གནས་མཐའ་དག་འཕེལ་རྒྱས་སུ་བཏང་ཡོད་ནའང་དུས་རབས་ཀྱི་འགྱུར་ལྡོག་དང་བསྟུན་ནས་ད་ལྟའི་བོད་ཀྱི་སྤྱི་ཚོགས་ཀྱི་ནང་དུ་སྙན་རྩོམ་དང་སུམ་རྟགས་ཁོ་ནས་བོད་ཀྱི་དགོས་མཁོ་མཐའ་དག་སྐོང་མི་ཐུབ་པར་བརྟེན། རང་རེའི་བཙན་བྱོལ་གྱི་སློབ་གྲྭ་ཁག་གི་ནང་དུ་ན་གཞོན་སློབ་ཕྲུག་ཚོ་ལ་ཚན་རིག་དང་མཐུན་པའི་རྩོམ་སྟངས་རིག་པ་སློབ་ཁྲིད་བྱས་ཏེ་བོད་ཀྱི་སྐད་ཡིག་གི་ཐོག་ནས་ཆབ་སྲིད་དང་། དཔལ་འབྱོར། རིག་གནས་བཅས་ཀྱི་ལས་དོན་མཚོན་པའི་དེང་རབས་ཀྱི་རྩོམ་འབྲིའི་རིག་པ་སྣ་ཚོགས་ངེས་པར་དུ་དར་སྤེལ་གཏོང་དགོས།
བཀླགས་ཟིན་པ་ཡིན། བདེན་ཁ་སྟེར་དགོས་ས་མང་དག་ཅིག་འདུག མུ་མཐུད་དུ་ཕྲིས་དང་མུ་མཐུད་དུ་ཀློག་ངེས་ལགས།
ཟིན་བྲིས་པ་དང་མཆན་འགོད་པ་ཚང་མས་བསམ་བློ་ཡག་པོ་བཏང་འདུག ཐུགས་རྗེ་ཆེ། ད་དུང་མུ་མཐུད་དཔྱད་ཞིབ་ཀྱིས་བསམ་ཚུལ་གསུངས་རོགས། འབྲེལ་ཡོད་ལ་དགོངས་པ་བཞེས་རྒྱུར་ཁྱད་པར་ཡོང་ངེས། རྩ་བའི་རྩོམ་བྲིས་ནང་འཁོད་པ་ལྟར་གྱི་སྐྱོན་དེ་རྣམས་ཡོད་ཐག་ཆོད་རེད། རྒྱུ་རྐྱེན་གཞན་ཞིག་ནི་བཙན་བྱོལ་གྱི་གནས་སྐབས་སུ་བོད་ཡིག་གི་སྤྱོད་ཡུལ་ཞན་པ་དང་དེས་འཚོ་བའི་ལས་ཀ་མི་རག་པས་རེད་སྙམ། དེས་ན་རང་ཡུལ་རང་ལག་ཏུ་དགོས་པ་རེད། དེ་བྱུང་ན་རང་མི་རིགས་ཀྱི་སྐད་ཡིག་བེད་སྤྱོད་ཀྱིས་མི་ཉམས་རྒྱུན་འཛིན་དར་སྤེལ་ཐུབ་ངེས། ང་ཚོ་ཚང་མས་སྐད་ཡིག་ལ་བདག་གཅེས་དང་མཉམ་དུ་སོ་སོའི་ལུང་པར་རང་དབང་ཡོང་ཐབས་ལ་ཤུགས་སྣོན་རྒྱག་གལ།
བཙན་བྱོལ་གྱི་སློབ་གསོའི་མགོ་ཨ་མ་ནས་བཟུང་སྟེ་མཇུག་སློབ་མའི་བར་ཏུ་ནོར་ཡོད་པ་རེད། ད་དུང་དགེ་རྒན་དང་འཛིན་སྐྱོང་། སློབ་དེབ་སོགས་ཀྱང་ཆར་བ་ཆུ་གྲོགས་ཀྱི་ཚུལ་དུ་སོང་ཡོད་པ་གསལ་བོ་རེད།
ཁྱེད་ཀྱི་རྩོམ་ཡིག་འདི་བམ་ཀློག་ཅིག་བྱས་པ་ཡིན་ཏེ། བདེན་བདེན་ཆབ་སྲིད་པའི་ཁ་ལྟ་བུ་དང་། འགྲིག་འགྲིག་བུད་མེད་ཀྱི་འོག་ལྟ་བུ་ཞིག་གི་ཚོར་བ་སྤྲད་སོང་།
ཁ་དྲོ་བཀྲ་ཤེས་ཁྱོད་ཀྱིས་བདེན་བདེན་འདྲ་ཞིག་བཤད་འདུག་་་་་་རྩོམ་ཡིག་འདི་ལ་རྒྱབ་སྐྱོར་ཡོད་དང་ཡོད།
བཙན་བྱོལ་སྤྱི་ཚོགས་ནང་ཤེས་ཡོན་འཐུས་ཤོར་ཕྱིན་པའི་རྒྱ་རྒྐྱེན་ནི། ཕྱོགས་བཞི་མཚམས་བརྒྱད་ལ་ཐུག་པའི་སྐོར་མང་པོ་ཞིག་གིས་གླེང་གིན་འདུག་ཀྱང་།
ངས་བློ་མིག་ཁབ་མིག་ལས་ཆུང་བའི་ནང་ནས་མཐོང་བ་དང་ངེས་ཤེས་རྙེད་པའི་དོན་དག་ཆུང་ཆུང་ཞིག་སྟེ། དེ་ནི་སྐད་ཡིག་གི་རྩལ་བཞི་དོ་མ་མཉམ་པའི་རྒྱུ་རྐྱེན་དེ་ལ་བརྟེན་ནས་བྱུང་འདུག་སྙམ། སྐད་ཡིག་གི་རྩལ་བཞི་ནི། འབྲི་རྩལ། ཀློག་རྩལ། བཤད་རྩལ། ཉན་རྩལ་བཅས་ཡིན་ཞིང་། ང་ཚོའི་སློབ་གྲྭའི་ཁོར་ཡུག་གི་འཛིན་ཁང་ནང་དགེ་རྒན་གྱིས་ཁྲིད། སློབ་མས་ཉན། ཁྲིད། ཉན། ཁྲིད། ཉན། དེ་འདྲའི་ངང་དུ་དུས་ཚོད་མང་པོ་ཞིག་སོང་བ་རེད། སྐད་ཡིག་གི་ཤེས་ཚད་མཐོར་འདེགས་གཏོང་དགོས་ན། གོང་གི་རྩལ་བཞི་པོ་དོ་མཉམ་དགོས་པ་ཡིན། མདོར་ན་རྩལ་བཞི་པོ་དོ་མཉམ་མེད་སྟབས། དཀའ་ངལ་འདི་དག་ཡོང་གི་ཡོད་པ་རེད། དཔེར་ན། འབྲི་བ་དང་ཀློག་པ་ནི། བཤད་པ་དང་ཉན་པ་ལས་ཀྱང་གལ་ཆེ་ནའང་ང་ཚོའི་སློབ་ཕྲུག་ཚོ་འབྲི་རྒྱུར་དཀའ་ངལ་ཆེ་ལ། ཀློག་རྒྱུར་ཡང་དེ་བས་དཀའ་ངལ་ཆེ། མདོར་ན། དགེ་རྒན་ཚོས་སློབ་ཁྲིད་གནང་བ་ཙམ་མ་ཡིན་པར། སློབ་མའི་འབྲི་ཀློག་གི་ནུས་པ་མཐོར་འདེགས་གཏོང་རྒྱུར་ཐབས་ཤེས་ཡོད་རྒུ་རྩལ་སྤྲུགས་གནང་རྒྱུ་ནི་གལ་ཆེ་དོན་ཆེ་ཞིག་ཏུ་མཐོང་།
དགེ་རྒན་གྱི་སློབ་ཁྲིད་ཐབས་ལམ་ཐོག་ཡིད་གཟབ་གནང་གལ་ཆེ།
འདི་ནི་དྲ་ཐོག་ནས་ཐད་ཀར་ཐལ་བས་དཔྱད་ཞིབ་ཀྱི་རྣམ་པ་ཅི་ཡང་མེད། དེ་ནི་མྱོང་ཚོར་ཙམ་ཞིག་ཡིན།
གོང་དུ་སྐལ་བཟང་ཉི་མ་ལགས་ཀྱིས་གནད་དོན་མང་པོ་ཞིག་གནད་ལ་འཁེལ་བ་གླེང་འདུག དེ་ནི་ཆུ་བརྒལ་རྗེས་ཆུ་ཡི་གཏིང་ཚད་ལོན་པ་ཞིག་རེད།
ཡག་པོ་བྲིས་འདུག་ཐུགས་རྗེ་ཆེ།
དེ་ལས་ལེགས་པ་སློབ་ཚན་ཐབས་ཀྱི་ཐབས་ལམ་ཞིག་གསུངས་ན་ཅི་མ་རུང།