རྒྱ་ནག་གི་སྲིད་བློན་ཝུན་ཅ་པའོ་འདི་ཟླའི་ཚེས་ ༡༥ ནས་ ༡༧ བར་ཉིན་གསུམ་རིང་རྒྱ་གར་ལ་གཟིགས་སྐོར་དུ་བསླེབས་ཡོད་ཅིང་། ཐེངས་འདིར་ཁོང་གི་ལས་དོན་གཙོ་བོ་རྒྱལ་ཁབ་གཉིས་བར་གྱི་ཚོང་འབྲེལ་ཡིན་ཡང་། རྒྱ་གར་ཕྱོགས་ནས་ཚོང་འབྲེལ་དང་ཆབ་སྲིད་གཉིས་ཀའི་ཐོག་བཀའ་བསྡུར་ཡོང་རྒྱུར་རེ་བ་བརྒྱབ་ཡོད། རྒྱ་ནག་གི་སྲིད་བློན་གྱིས་ཐོག་མའི་དམིགས་ཡུལ་ལས་བརྒལ་མེད་པར་ཚོང་འབྲེལ་སྐོར་ལ་གྲོས་མོལ་བྱས་ཏེ། མཉམ་མཐུན་ཡིག་ཆ་ཁག་ཅིག་ལ་ཕྱོགས་གཉིས་ཀྱི་འབྲེལ་ཡོད་བློན་ཆེན་ཚོས་མཚན་རྟགས་བསྐྱོན་ཡོད། དེ་མིན་གནད་དོན་གཞན་ས་མཚམས་དང༌། རྒྱ་གཞུང་ནས་ཀཱ་ཤི་མིར་མི་མང་ལ་དམིགས་བསལ་ཐོངས་མཆན་སྤྲོད་བཞིན་པའི་སྲིད་བྱུས། རྒྱ་གར་མཉམ་འབྲེལ་རྒྱལ་ཚོགས་ཀྱི་བརྟན་འཇགས་ལྷན་ཚོགས་ནང་ཞབས་སྟེགས་ཐོབ་རྒྱུར་རྒྱབ་སྐྱོར་གནང་ཕྱོགས། པ་ཀི་སི་ཐན་བརྒྱུད་རྒྱ་གར་ནང་འཇིགས་སྐུལ་རིང་ལུགས་ཀྱི་དྲག་སྤྱོད་པ་ཡོང་ཉེན་ལ་ཁ་གཏད་གཅོག་སྟངས། དེ་བཞིན། བོད་ཡུལ་བརྒྱུད་དེ་རྒྱ་གར་ནང་འབབ་བཞིན་པའི་ཆུ་བོ་དག་ལ་རྒྱ་གཞུང་གིས་ཆུ་མཛོད་སྣ་ཚོགས་བཟོས་ཏེ། རྒྱ་གར་ནང་ཆུའི་དཀའ་ངལ་འཕྲད་བཞིན་པའི་གནད་དོན་སོགས་ཀྱི་ཐད་བཀའ་མོལ་ཕྱོགས་མགོ་རེ་ལས་གླེང་ཐུབ་མེད་སྟབས་རྒྱ་གར་གྱི་རེ་བ་དེ་འགྲུབ་མེད་ལ། རྒྱལ་ཁབ་གཉིས་ཀྱི་སྲིད་བློན་ཐུན་མོང་ཐོག་གསར་འགོད་ལྷན་ཚོགས་དང་མཉམ་འབྲེལ་སྤྱི་བསྒྲགས་ཀྱི་ཡིག་ཆ་དོན་ལྡན་གང་ཡང་འཇོག་ཐུབ་མེད།
ཡིན་ནའང་སྲིད་བློན་གཉིས་བར་གནད་དོན་ཁག་ཅིག་གི་ཐོག་ཕན་ཚུན་བཀའ་མོལ་བྱུང་བའི་སྙན་ཐོ་ལྟ་བུ་ཤིག་རྒྱ་གར་ཕྱི་སྲིད་དྲུང་ཆེ་བརྒྱུད་དེ། ཕྱི་ཚེས་ ༡༦ ཉིན་ཕྱི་ནང་གི་གསར་འགོད་པ་ཚོར་གསལ་བསྒྲགས་བསྐྱངས་ཡོད། རྒྱ་གར་གྱི་དཔལ་འབྱོར་རིག་པ་བ་དང་ཚོང་འབྲེལ་ཉམས་ཞིབ་པ། དེ་བཞིན། ཆབ་སྲིད་དཔྱད་བརྗོད་པ་མང་པོ་ཞིག་གིས། ད་བར་གྱི་རྒྱ་དཀར་ནག་གི་ཚོང་འབྲེལ་དག་ཏུ་རྒྱ་ནག་གིས་ཁེ་སྤོག་ཆེན་པོ་བླངས་ཡོད་ལ། ཐེངས་འདིར་རྒྱ་དཀར་ནག་གཉིས་བར་ཆབ་སྲིད་དང་ས་མཚམས་སྐོར་ལ་དོན་ཕན་ལྡན་པའི་གྲུབ་འབྲས་ཤིག་བྱུང་མེད་པ་མ་ཟད། ཚོང་འབྲེལ་གྱི་ཡིག་ཆ་དག་ཀྱང་ཆ་སྙོམས་ཤིག་བྱུང་ཐུབ་མེད་སྐོར་བརྗོད་ཡོད་ལ། དེའི་རྒྱུ་མཚན་གཙོ་བོ་ཞིག་ནི་རྒྱ་གར་ནང་རྒྱ་ནག་གི་ཚོང་ཟོག་དངོས་རིགས་ཕོན་ཆེན་བླངས་བ་དང༌། རྒྱ་གར་གྱི་ཚོང་ཟོག་དངོས་རིགས་རྒྱ་ནག་ནང་ཉུང་ཤས་ལས་གཏོང་ཐུབ་མེད་པ་འདི་དག་ལས་མཚོན་ཐུབ་ཟེར།
ལྷག་པར་དུ་རྒྱ་ནག་གི་དངོས་ཟོག་རིགས་རྒྱ་གར་ནང་བསླེབ་རྒྱུ་མང་དྲགས་པའི་དབང་གིས་རྒྱ་གར་གྱི་བཟོ་གྲྭ་ཆུང་ཚགས་དག་གི་ཐོན་རྫས་ཉོ་མཁན་ཇེ་ཉུང་དུ་འགྲོ་བཞིན་ཡོད་པ་མ་ཟད། བཟོ་ཚོང་ཆུང་བའི་རིགས་མང་དག་ཅིག་སྒོ་རྒྱག་དགོས་པའི་གནས་ཚུལ་ཡང་འབྱུང་བཞིན་ཡོད། རྒྱུ་མཚན་འདི་ལ་བརྟེན་ཏེ། གར་ནང་ལས་མེད་ཇེ་མང་དུ་འགྲོ་བཞིན་པའི་དཀའ་ངལ་འཕར་མ་ཞིག་ཀྱང་ཡོང་གི་ཡོད་པ་དང་། རྒྱ་གར་བཟོ་ཚོང་ཆུང་བ་ཁག་གི་སྦྱིན་བདག་རྣམས་དང་ལས་བཟོ་བ་རྣམས་ཀྱིས་རྒྱ་དཀར་ནག་བར་གྱི་མཐོ་རིམ་ཚོང་འབྲེལ་སྲིད་བྱུས་ལ་འདོད་པ་མེད་པའི་རྣམ་འགྱུར་དང་ངོ་རྒོལ་བྱེད་ཀྱིན་ཡོད་ལ། ལྷག་པར་རྒྱ་ནག་གཞུང་གིས་ཨ་སྒོར་ཐེར་འབུམ་ ༡༤༠ ཙམ་གྱིས་རྒྱ་གར་དང་ཚོང་འབྲེལ་བྱེད་བཞིན་ཡོད་ཀྱང་། རྒྱ་གར་གཞུང་གིས་ཨ་སྒོར་ས་ཡ་ ༥༢ ཙམ་གྱི་ཚོང་འབྲེལ་ལས་བྱེད་ཐུབ་ཀྱི་མེད་སྟབས། འདི་ནི་ཕན་ཚུན་བར་ཚོང་འབྲེལ་ཆ་སྙོམས་བྱུང་མེད་པའི་རྩ་གནད་དེ་ཆགས་ཡོད། གཞན། རྒྱ་གར་ནས་རྒྱ་ནག་ལ་ལྕགས་རིགས་འབོར་ཆེན་བཙོང་བའི་རྐྱེན་གྱིས་རྒྱ་ནག་གཞུང་གིས་བོད་མཐོ་སྒང་བརྒྱུད་དེ། བལ་ཡུལ་དང་རྒྱ་གར་ས་མཚམས་བར་མེ་འཁོར་ལྕགས་ལམ་བཟོ་རྒྱུའི་གོ་སྐབས་སྐྲུན་བཞིན་ཡོད་པ་དང་། དེ་བཞིན་བོད་ནང་རྒྱ་མིའི་དམག་མི་ཕོན་ཆེན་གཏོང་བ་དང་དམག་ཆས་རིགས་སྐྱེལ་འདྲེན་ལ་སྟབས་བདེ་ཆེན་པོ་བཟོ་བཞིན་ཡོད།
རྒྱ་ནག་སྲིད་བློན་ཕྱིར་ལོག་རྗེས་རྒྱ་དཀར་ནག་བར་གྱི་ས་མཚམས་ལ་ཀི་ལོ་མི་ཌར་ ༢༠༠༠ ལས་ལྷག་མེད་པའི་གནས་ཚུལ་ཐོག་བསྒྲགས་ཡོད་པ་དེས་རྒྱ་གར་གཞུང་མང་གཉིས་ལ་ཁོང་ཁྲོ་ཆེན་པོ་བསླངས་ཡོད། དོན་དངོས་ཐོག་ད་ཆར་རྒྱ་དཀར་ནག་གི་རྩོད་རྙོག་ཆགས་ཡོད་པའི་བོད་དང་རྒྱ་གར་བར་གྱི་ས་མཚམས་ལ་ཀི་ལོ་མི་ཌར་ ༤༠༠༠ ལྷག་ཡོད་ཀྱང་། རྒྱ་གཞུང་གིས་ལྟ་ཚུལ་འདི་ལ་མོས་མཐུན་མེད་པའི་རྣམ་འགྱུར་བསྟན་ཡོད། དེར་མ་ཟད་རྒྱ་ནག་གི་གཞུང་ཚབ་གསར་རྙིང་དག་གིས་གསར་ལམ་ཁག་ཏུ་རྒྱ་གར་གྱི་སྲིད་བྱུས་ལ་ཡིད་མོས་མེད་པའི་བསྒྲགས་གཏམ་སྤེལ་ཡོད་པ་དེ་ནི། ཁོང་ཅག་གིས་རྒྱལ་ཁབ་གཉིས་བར་གྱི་སྲིད་བྱུས་ཐོག་འགན་ཁུར་མ་བླངས་བའི་རྟགས་ཤིག་ཆགས་ཡོད། གཞུང་ཚབ་པའི་བསྒྲགས་གཏམ་དེ་ནི་རྒྱ་གཞུང་གིས་ཆེད་བཟོ་བྱས་པ་ཞིག་ཡིན་ལ། རྒྱ་དཀར་ནག་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་བཞིན་ཡོད་པ་ཡང་རྒྱ་ནག་གི་མངོན་ལྐོག་གཉིས་ཀྱི་བྱེད་སྟབས་འདི་དང་འབྲེལ་བ་ཡོད། རྒྱུན་མཚན་ནི་རྒྱ་ནག་གི་མཐོ་རིམ་དཔོན་རིགས་ཚོ་རྒྱ་གར་ལ་དེ་ཙམ་ཡིད་ཆེས་མེད།
ཐེངས་འདིར་རྒྱ་ནག་གི་སྲིད་བློན་རྒྱ་གར་ནང་འཚམས་གཟིགས་སྐོར་སྐྱོད་སྐབས། ཚོང་དོན་ཙམ་ལས་གནད་དོན་གཞན་ལ་བཀའ་བསྡུར་མ་བྱུང་བ་དང་། རྒྱ་གར་གྱིས་དེ་སྔོན་རེ་བ་བརྒྱབ་པའི་དོན་གནད་ཁག་ལེགས་འགྲུབ་མ་བྱུང་བའི་རྒྱུ་རྐྱེན་གཞན་ཞིག་ཡོད་པ་ནི། ད་ལོ་རྒྱ་གར་ནང་ཕྱིའི་རྒྱལ་ཁབ་ཁག་གི་སྲིད་འཛིན་དང་སྲིད་བློན། གཞན་ཡང་ཆེས་མཐོའི་མི་སྣ་མང་དག་ཞིག་འཚམས་གཟིགས་སུ་ཕེབས་ཡོད་ཀྱང་། རྒྱ་ནག་གི་སྲིད་བློན་གྱིས་རྒྱ་གར་ནང་གི་གཟིགས་སྐོར་གྲུབ་མཚམས་པ་ཀི་སི་ཐན་དུ་ཚོང་འབྲེལ་དང་། དམག་དོན་མཉམ་ལས་ཆེད་འཚམས་གཟིགས་ཀྱི་ལས་རིམ་ཡོད་སྟབས། རྒྱ་གར་ནང་ཚོང་འབྲེལ་འཚམས་གཟིགས་སྐབས་པ་ཀི་སི་ཐན་ལ་གནོད་པའི་ཆབ་སྲིད་ཀྱི་ལས་དོན་གང་ཡང་མི་འབྱུང་རྒྱུར་འབད་བརྩོན་བྱས་ཡོད།
སྤྱི་འཐུས་ཨཅརྱ་ཡེ་ཤེས་ཕུན་ཚོགས་ནས་ཕྱི་ལོ་ ༢༠༡༠ ཟླ་ ༡༢ ཚེས་ ༢༠ ཉིན་ལ།
སྲིད་དོན་ཚན་རིག་པའི་མཚན་གནས་བཞེས་ཀྱང་སྐད་ཆ་མི་འདུག་ལ།སྤྱི་འཐུས་རྣམ་པ་ཁ་ཤས་ལ་སྐུ་བརྗིད་བག་དང་བཅས་བཞུགས་འདུག་མི་ཉན་པའི་སྐུལ་མ་བྱས་འདུགབསྟོད་བསྔགས་ཡོད།ཨོ།ངས་སྔོན་མ་གྲོས་ལ་དབང་བའི་སྐབས་སུ་ཡི་གེ་འཁྱོང་མི་འཁྱོང་གི་དོགས་སློང་བྱས་པ་དེ།སྲིད་དོན་ཚན་རིག་པའི་དགོངས་པ་བཞེས་འདུགཐུགས་རྗེ་ཆེ།
དྲ་གྲོགས་བཙན་བྱོལ་བ་ལགས། གོང་དུ་བསེ་རུ་ལགས་ཀྱིས་རྩོམ་ཡིག་གི་ཁ་བྱང་ལ་དག་ཐེར་བྱས་པ་དངོས་ཡོད་རེད་ལགས། རྩོམ་སྒྲིག་པའི་གོང་རྩོམ་སྤེལ་མ་ཐག་ཁ་བྱང་ཟུར་གྱི་རྩོམ་པ་པོ་མིང་ལ་གཏག་ནོར་ཤོར་འདུག
བསེ་རུ་ལགས་ ཁྱེད་ཀྱིས་ཡག་པོ་གཟིགས་རོགས་ ངས་ལྟས་ན་མིང་བྲིས་ནོར་རེད་མི་འདུག་ ཕལ་ཆེར་ཁྱེད་ཀྱི་མིག་ཟུངས་ཉམས་ཡོད་པ་འདྲ་ ཨ་ཙི་སྐུ་རྩེད་ཡིན་
ཨཅརྱ་ཡེ་ཤེས་ཕུན་ཚོགས་ལགས་ལ་རྩོམ་ཡིག་འདི་ལྟར་སྤེལ་བ་ལ་བསྔགས་བརྗོད་ཡོད་ མུ་མཐུད་རྩོམ་ཡིག་སྤེལ་རོགས་ ཁྱེད་ཀྱི་ཉམས་མྱོང་ཤེས་ཚད་དེ་ང་ཚོ་བོད་པ་ཚང་ལ་སྟོན་ན་འདོད་
“ཨཅརྱ་ཤེས་ཡེས་ཕུན་ཚོཊ། ”
རྩོམ་ཡིག་འདི་འབྲི་བ་པོ་ངའི་མིག་ལམ་དུ་མངོན་ཞིང་རྣ་བས་གོ་མྱོང་བའི་བོད་མི་མང་སྤྱི་འཐུས་ཨཙརྱ་ཡེ་ཤེས་ཕུན་ཚོགས་ལགས་ཡིན་ན་ནི། གོང་དུ་བཀོད་པའི་མཚན་དེ་ཇི་ལྟར་བྱས་ཏེ་བྲིས་ནོར་ཤོར་བ་རེད་དམ།
ཅི་སྟེ། “ཨཅརྱ་ཤེས་ཡེས་ཕུན་ཚོཊ། “ཞེས་པ་གང་ཟག་གཞན་ཞིག་ཡིན་ན་ནི་གཤམ་དུ། “སྤྱི་འཐུས་ཨཅརྱ་ཡེ་ཤེས་ཕུན་ཚོགས་ནས་ཕྱི་ལོ་ ༢༠༡༠ ཟླ་ ༡༢ ཚེས་ ༢༠ ཉིན་ལ།”ཞེས་བཀོད་འདུག
ད་ཡིན་ན་ང་ལྟ་བུའི་ཀློག་པ་པོ་མང་པོ་ཞིག་ཡང་མགོ་བོ་འཐོམས་ཡོད་སྲིད།།