ཕ་ཆོས་ཕམ་ཚོང་། – སྤོབས་པ་མཐའ་ཡས།

བཀའ་བསྟན་དབྱིན་བསྒྱུར་དང་ཕ་ཆོས་ཕམ་ཚོང་།

སྤྱིར་ན་སངས་རྒྱས་ཀྱི་ཆོས་ནི་སྐྱེ་བོ་ཐམས་ཅད་ལ་དབང་བ་ཞིག་ཡིན་པས་སྐད་རིགས་གང་ཞིག་ཏུ་བསྒྱུར་ཀྱང་དབུགས་དབྱུངས་གཟེངས་བསྟོད་ཀྱི་འོས་སུ་ཆེ། ལྷག་པར་ཡང་དབྱིན་ཡིག་ལྟ་བུའི་ནང་དུ་བསྒྱུར་ཐུབ་ན་ཀློག་མཁན་ཧ་ཅང་མང་པོས་ལྟ་ཀློག་ཐུབ་པས་ཆོས་ཀྱི་གྲོགས་པོ་ཚང་མས་དགའ་བསུ་ཞུ་བའི་འོས་སུ་གྱུར། ཕན་སེམས་དང་གཞན་དོན་ལ་དམིགས་པའི་ཀུན་སློང་ཡག་པོ་ཞིག་དང་ཆོས་ཕྱིར་དཀའ་སྤྱད་ནུས་པའི་སྙིང་སྟོབས་ཅན་གྱི་ལོ་ཙཱ་བ་རེ་ཡོད་ན་ཕྱག་དང་མཆོད་པའི་འོས་སུ་གྱུར་པ་ཡིན། སྐྱེས་བུ་སྙིང་སྟོབས་ཀྱི་བདག་པོ་དག་གི་བཀའ་དྲིན་ལ་བརྟེན་ནས་རང་ཅག་ལ་ངོམ་ཆོག་པའི་ཕ་ཆོས་ཤིག་ཡོད་པ་འདི་འཛམ་བུ་གླིང་གི་སྐད་ཡིག་བེད་སྤྱོད་ཆེ་གྲས་ཁག་གི་ནང་དུ་བསྒྱུར་ཐབས་བྱ་རྒྱུ་དེ་ནི་གཏིང་ཟབ་པའི་རིག་གཞུང་འདི་རྒྱུན་འཛིན་དར་སྤེལ་གྱི་ཐབས་ལམ་མཆོག་ཏུ་གྱུར་པ་ཞིག་ཀྱང་རེད། ཡིན་ན་ཡང་རླབས་ཆེ་བའི་བྱ་བ་འདི་འདྲ་ཞིག་མགོ་རྩོམ་པའི་དུས་སུ་སྙིང་སྟོབས་ཆུང་བའི་སྐྱེ་བོ་དག་ནི་འཇིགས་པར་འགྱུར། དངངས་བར་འགྱུར། བྲེད་པར་འགྱུར་བ་འགྱུར་པ་ཆོས་ཉིད་ཡིན་སྟབས་ངའི་སེམས་ངོས་སུ་འཇིགས་སྣང་ཆེན་པོ་གཉིས་ཤིག་གིས་བག་ལྷོད་པོར་སྡོད་པའི་སྐབས་མ་དབྱེ་སྟབས་ཆོས་ཀྱི་གྲོགས་པོ་ཚོར་སྙིང་གི་གཏམ་འདི་སྨྲ་བར་འདོད་དོ༎

དང་པོ། ཕ་ཆོས་ཕམ་ཚོང་གི་འཇིགས་པ།

ཤར་ནུབ་ཀྱི་ལུང་གྲུ་མང་པོར་ནང་བསྟན་ཡིག་སྒྱུར་བའི་ཚོགས་སྡེ་མང་པོ་ཞིག་འདུག ཚོགས་སྡེ་དེ་ཚོའི་ལས་ཀྱི་སྣེ་མོ་བ་དག་གི་ཚོང་ལས་ལ་དྲན་པ་དགུ་འགྱུར་དུ་སྐྱེན་པའི་ཕྱི་མི་ཁག་གཅིག་རེད། བོད་དང་བོད་ཀྱི་ནང་ཆོས་ལ་དགའ་ཞེན་གྱི་རྣམ་པ་སྟོན་མཁན་ཕལ་མོ་ཆེས་བོད་མི་དང་བོད་ཀྱི་ནང་ཆོས་ཀྱི་སྟེང་ནས་དངུལ་གྱི་ཁེ་བཟང་ཞིག་ལེན་འདོད་ཀྱིས་ཁ་གདངས། མིག་བགྲད། སྡེར་མོ་གཟེངས་ནས་བལྟས་ཡོད་ཡོད་པ་རེད། དེ་ཡང་ཁོང་ཚོ་ཐོག་མར་ལུག་ལྤགས་གྱོན་པའི་སྤྱང་ཀིའི་སྒྲུང་བཞིན་དུ་ནང་ཆོས་ལ་དད་མདོག་གིས་མགོ་སྒུར་སྒུར་དང་། སྒྱིད་པ་ཞ་ཞ། ལྕེ་སྣར་སྣར། མིག་ཟུམ་ཟུམ་བྱས་ནས་དགོན་སྡེ་རེའི་མཐའ་དང་བླ་མ་རེའི་དྲུང་དུ་བཅར། ཆོས་ཞུ་དགོས་སར་ཆོས་ཞུས། དངུལ་ཏོག་ཙམ་རེ་འབུལ་དགོས་སར་དངུལ་ཕུལ། ཐ་ན་སྐྲ་བྲེགས་ནས་གཟན་ཤམ་གྱོན་དགོས་ན་ཡང་གྱོན། དེ་དག་ཕལ་མོ་ཆེ་མགོ་སྐོར་གྱི་ཆེད་རེད། ཆ་རྒྱུས་ལོན་ཚར་བའི་ཉིན་ཞིག་བླ་རྒན་རེ་ཟུང་ལ་དངུལ་ཏོག་ཙམ་རེ་སྤྲད་ནས་ཁོའི་ལས་གཞིའི་བློ་འདོན་པ་དང་ཇུས་འགོད་པའི་མིང་རེ་བཏགས། བོད་ཡིག་ཏུ་ཡོད་པའི་ཡིག་ཆ་དེ་ཚོ་ཕྱི་སྐད་དུ་བསྒྱུར། ཕྱི་སྐད་དུ་བསྒྱུར་བའི་དཔེ་དེབ་ཚོང་བསྒྱུར་གྱི་བདག་དབང་ཆ་ཚང་ཁོ་རང་གིས་བཟུང་། དཔེ་རྒྱུན་དེ་ཚོང་བསྒྱུར་གྱི་ཡོང་སྒོ་ཚང་མ་ཁོ་རང་ཚོས་ཁྱེར། རང་རེའི་བླ་མ་དེ་ཚོར་བློ་འདོན་པ་དང་། ཇུས་འགོད་པ། ཕྱི་སྐད་དུ་བསྒྱུར་ཆོག་པའི་བདག་དབང་གནང་མཁན་ཞེས་པའི་མིང་ཆེན་པོ་རེ་བཏགས་ཡོད་པ་མ་གཏོགས་དཔེ་ཆའི་རིན་འབབ་ཀྱི་བརྒྱ་ཆ་གཅིག་ཀྱང་སྟེར་གྱིན་མེད། ཡིན་ན་ཡང་ང་ཚོའི་བླ་མ་ཚོ་གཅིག་ནས་འདོད་ཆུང་ཆོག་ཤེས་ཡིན་སྟབས་གསུང་རབ་ཀྱི་བླུ་ཡོན་ལེན་འདོད་དེ་ཙམ་མེད་ཐོག་དཔལ་འབྱོར་གྱི་འཁོས་བབ་ཞན་པས་ཕྱི་སྒོར་སྟོང་ཕྲག་ཁ་ཤས་རེ་ཕུལ་བ་དེས་བློ་བདེ་སྟེ་རང་རང་གི་མཚན་གནས་སྐུ་དབང་དེ་ཕྱི་མི་ཚོར་གང་འདོད་འདོད་དུ་བེད་སྤྱོད་བྱེད་འཇུག་གིན་འདུག གལ་སྲིད་ཕྱི་མིའི་ཁྲོད་དུ་སངས་རྒྱས་ཀྱི་བསྟན་པ་སྤེལ་ཆེད་དང་གཞན་ཕན་གྱི་ལས་ཁོ་ནའི་ཆེད་དུ་སྒྱུར་མཁན་ཡོད་ན་བླ་མ་དེ་ཚོས་དམ་དྲག་གནང་དགོས་དོན་མི་འདུག ཡིན་ན་ཡང་། ཕྱི་མིའི་ལག་ཏུ་ཤོར་ཚར་རྗེས་ཚོང་བསྒྱུར་དང་དཔར་སྐྲུན་བདག་དབང་མི་འཛིན་མཁན་ཞིག་མི་འདུག་པས་ང་ཚོའི་ཕ་ཆོས་བཀའ་བསྟན་རིན་པོ་ཆེ་འདིའི་ཚོང་བསྒྱུར་བདག་དབང་དེ་ཕྱི་མིའི་ལག་ཏུ་མི་ཤོར་བར་ཆོས་སྦྱིན་ཁོ་ནའི་ཆེད་དུ་འགྲོ་ཐུབ་པ་ཞིག་དང་གལ་སྲིད་བླུ་ཡོན་ཁེ་སྤོགས་ལེན་དགོས་བྱུང་ན་དེ་ཁེ་དངུལ་དེ་སངས་རྒྱས་བསྟན་པ་དར་སྤེལ་གྱི་རྒྱུ་རུ་སྨིན་པ་ཞིག་ལ་ཐོག་མ་ནས་ཐུགས་བསམ་ཐོངས་པ་གལ་ཆེན་རེད།

ཉེ་ཆར་གསང་སྔགས་རྙིང་མའི་ཆོས་དཔེ་ཧ་ཅང་འབོར་ཆེན་ཞིག་ཕྱི་སྐད་དུ་བསྒྱུར་ཚུལ་གྱི་ཁྱབ་བསྒྲགས་འབྱོར་ཡོང་གིན་འདུག དཔེར་ན། བལ་ཡུལ་དུ་རྒྱུན་སྡོད་བླ་མ་ཁྲོ་ནེ་ཟེར་བ་སོགས་ཀྱིས་རྙིང་མའི་སྔགས་སྐོར་མང་པོ་ཞིག་བསྒྱུར་ནས་ཁྲོམ་རར་བཀྲམ་རྒྱུ་ཡིན་པའི་གསལ་བསྒྲགས་དེར་གཞིག་ན་བླུ་ཡོན་ཡང་ཚད་ལས་འདས་པའི་ཆེན་པོ་རེད་འདུག དཔེ་དེབ་ཀྱི་ཁ་ཤོག་ལ་བླ་ཆེན་ཆེ་གེ་མོ་དང་ཅིག་ཅིག་ཅིག་གི་སློབ་སྟོན་དང་ཇུས་འགོད་བཞིན་བསྒྱུར་ཚུལ་བཤད་ཡོད་མོད་ཚོང་བསྒྱུར་གྱི་རིན་འབབ་དེ་སྤྱིར་སངས་རྒྱས་ཀྱི་བསྟན་པའི་ཆེད་དུ་སྨིན་པ་ལྟ་ཞོག ཕྱི་སྐད་དུ་བསྒྱུར་བའི་བདག་དབང་གནང་མཁན་གྱི་བོད་ཀྱི་བླ་གྲྭ་དེ་ཚོར་བརྒྱ་ཆ་གཅིག་ཀྱང་འབབ་གི་མི་འདུག རྒྱུ་མཚན་དེ་དག་ལ་བརྟེན་ནས་འདིའི་སྐོར་ལ་སེམས་འཚབ་ཅིག་སྔོན་མ་ནས་སླེབས་མྱོང་།

གཉིས་པ། བཀའ་བསྟན་ཆ་ཚང་སྒྱུར་ཤེས་མཁན་ཞིག་ཡོད་དམ།

ད་ལྟ་རང་རེའི་བཀའ་བསྟན་ནི་ལུང་རྒྱུན་རེ་སྤེལ་བ་དང་། རིམ་གྲོར་ཀློག་འདོན། དད་རྟེན་དུ་ཉར་བ། མཁས་པ་ལ་ལས་ཞིབ་འཇུག་གི་ཆེད་དུ་གང་དགོས་ས་དེར་དཔེ་གཟིགས་རེ་མཛད་སྲོལ་ཙམ་ལས་ཕལ་མོ་ཆེར་སློབ་གཉེར་བྱེད་སྲོལ་མེད་ཐོག་ཁྲིད་རྒྱུན་ཡང་མེད་པས་སྒྱུར་ཤེས་ཁག་པོ་ཡིན་སྲིད། ལྷག་པར་ཡང་རྒྱུད་ཀྱི་སྐོར་དེ་དག་ནི་མཐའ་དྲུག་གི་འཆིངས་བས་བཅིངས་པའི་རང་བཞིན་དུ་གནས་ཡོད་སྟབས་ཚིག་དོན་ཅི་བཞིན་ཤེས་དཀའ་བས་རྗོད་ཚིག་ཡག་པོ་མ་བྱུང་ན་ཉེན་ཁ་ཆེ་སྟབས་སྔོན་ཆོས་རྒྱལ་གྱི་སྐབས་སུ་ཡང་སྔགས་མ་རྒྱུད་སྒྱུར་མི་ཆོག་པའི་ཁྲིམས་བཅའ་དགོས་བྱུང་བ་སོགས་ལ་ཡང་བསམ་གཞིག་བྱ་དགོས་པ་ཞིག་རེད། བོད་དུ་རྒྱལ་ཁྲིམས་ཞིག་རྗེས་སུ་པཎ་ཌི་ཏ་ཤམ་ཐབས་སྔོན་པོ་ཅན་སོགས་ཀྱིས་སྔགས་མ་རྒྱུད་ཀྱི་ཚིག་དོན་ཇི་བཞིན་མ་ཤེས་པས་བོད་དུ་ཆོས་ལུགས་པའི་སྤྱོད་པ་ལ་འཆོལ་ཉོག་ཆེན་པོ་བྱུང་བ་ལྟ་བུ་རེད།

བསྟན་འགྱུར་གྱི་ནང་དུ་སྙན་ངག་མེ་ལོང་མ་དང་རང་རེའི་སུམ་རྟགས་རྩ་བ་ལྟ་བུ་ནང་ཆོས་འབྲེལ་བ་མེད་པ་ཡང་ཡོད་ཐོག བཀའ་འགྱུར་དུ་ཡང་རྒྱུད་སྡེ་གོང་མའི་སྐབས་སུ་ཚིག་གི་ཆ་ནས་དད་ལོག་སྐྱེ་བའི་ཉེན་ཁ་ཅན་མང་དུ་སྣང་བ་དང་། རྒྱུད་སྡེ་འོག་མའི་སྐབས་སུ་དོན་གྱི་ཆ་ནས་ཀྱང་ཐུན་མོང་གི་དངོས་གྲུབ་སྒྲུབ་པའི་ཆ་ལག་རོ་ལངས་གསེར་སྒྲུབ་དང་གནོད་སྦྱིན་མོ་ལ་འདོད་པ་སྤྱོད་སྟངས་༼རང་རེའི་བཀའ་བསྟན་བསྒྱུར་མགོ་ཚུགས་ནས་ལོ་༡༣༠༠ལྷག་གི་རིང་ལ་གནོད་སྦྱིན་མོ་དགའ་རོགས་སུ་བརྟེན་ཐུབ་མཁན་སུ་དང་སུ་བྱུང་ཡོད་དམ། ཀུ་རེ་ཡིན༽སོགས་དེང་སང་གི་མིའི་བློ་ངོར་དགོས་ནུས་ཆེར་མེད་པ་དེ་རྙེད་ཅིག་འདུག་པས་དེ་ཚོ་བསྒྱུར་སྟངས་མ་གཟབ་ན་བསྟན་པ་ལ་དད་པ་སྐྱེ་བ་ལས་ལྡོག་སྟེ་དད་ལོག་སྐྱེ་བའི་ཆ་རྐྱེན་དུ་ཡང་འགྱུར་མི་སྲིད་པ་མ་རེད། དེ་བཞིན་དུ་སྔོན་གྱི་ལོ་ཙཱ་བ་བ་རྣམས་ནི་སྐད་སྒྱུར་ཤེས་པ་ཙམ་དུ་མ་ཟད་རང་རང་གིས་གང་བསྒྱུར་བའི་རྒྱུད་སྡེ་དེ་དང་དེ་དག་གི་ཁྲིད་རྒྱུན་དང་ཉམས་ལེན་མཐིལ་དུ་བྱས་ནས་བསྒྱུར་བ་རེད། དཔེར་ན་བེ་རོ་ཙཱ་ནས་རྫོགས་ཆེན་བསྒྱུར་བ་དང་། འབྲོག་མིས་ཀྱེ་རྡོར་སྐོར་བསྒྱུར་བ། ལོ་ཆེན་རིན་ཆེན་བཟང་པོ་དང་རྗེ་མར་པས་གསང་འདུས་བསྒྱུར་སྤེལ་བྱས་པ་ལྟ་བུ་རེད། རབ་བྱུང་ན་སྐབས་འདིའི་བཀའ་བསྟན་དབྱིན་བསྒྱུར་ཀྱང་གསུང་རབ་ཀྱི་ཆེ་བ་མཚོན་པ་དང་སྔོིན་གྱི་སྲོལ་རྒྱུན་བཟང་པོའི་རྗེས་སུ་འབྲངས་བའི་ཆེད་དུ་ཁྲལ་འཁྱོལ་གྱི་ཡིག་སྒྱུར་ཙམ་མ་ཡིན་པར་མདོ་རྒྱུད་གང་དང་གང་ཡིན་ཡང་དེ་དང་དེ་ལ་ཉམས་ལེན་དང་སློབ་གཉེར་གང་འཚམས་ཡོད་པའི་ལོ་ཙཱ་བ་བརྙེད་དགོས་པ་གལ་ཆེན་རེད།

རང་རེའི་བཀའ་བསྟན་བྱུང་བའི་ལོ་རྒྱུས་ལ་བསམ་ན་ཡང་ཚོགས་པ་ཆེན་པོ་ཞིག་བཙུགས་ནས་སྡེབས་གཅིག་ཏུ་ཚོང་ཁྲོམ་བཤམ་པ་བཞིན་བྱུང་བ་ཞིག་མ་རེད། མི་ལོ་བརྒྱ་ཕྲག་མང་པོའི་རིང་ལ་ཆོས་ཚན་རེ་རེ་བཞིན་དམིགས་བསལ་གྱིས་ཆོས་གཞུང་དེ་དང་དེ་ལ་མཁས་པའི་སློབ་དཔོན་རེ་རེའི་དྲུང་ནས་སློབ་མ་རང་རང་གིས་སློབ་གཉེར་བྱས། ཚིག་དང་ཚིག་ཟུར་རེ་རེ་བཞིན་སྒྲོ་འདོགས་བཅད།  སྐབས་དེའི་གདུལ་བྱའི་བློ་དང་འཚམས་མིན་བལྟས། དབང་ལུང་ཁྲིད་རྒྱུན་གྱི་རིམ་པ་གང་ཐད་ནས་ཆོས་ལུགས་རང་གི་ཆོ་ག་ཕྱག་བཞེས་མ་ཉམས་པ་གནང་བར་བརྟེན་ཁུངས་བཙུན་པོ་ཞིག་བྱུང་བ་ཞིག་ཡིན། ད་ཡོད་ང་ཚོའི་བཀའ་བསྟན་གཉིས་པོའིི་ནང་གི་ཆོས་ཚན་ཚང་མ་རེ་རེ་བཞིན་ཆེད་དུ་མཁས་པའི་སློབ་དཔོན་ཡོད་དམ་མེད། ཚིག་དོན་གང་ཐད་ནས་ལྷག་ཆད་ནོར་བ་མེད་པར་བསྒྱུར་ཐུབ་པའི་འགན་ལེན་ཐུབ་དང་མི་ཐུབ། ད་ཡོད་བོད་ཀྱི་ཆོས་རྒྱུད་སོ་སོར་རང་རང་ལ་བཀའ་བབ་པའི་མདོ་རྒྱུད་ཀྱི་རྣམ་གྲངས་རེ་རེ་བགྲང་རྒྱུ་ཡོད་པ་དེ་ཚོའི་ཚིག་དོན་ལ་སྒྲོ་འདོགས་གཅོད་ནུས་མཁན་གྱི་ཆེད་མཁས་པ་ཡོད་པའི་དབང་དུ་ཐོངས། ཡིན་ན་ཡང་། རང་རེས་ཐོས་བསམ་སློབ་གཉེར་བྱ་སྲོལ་མེད་པའི་ཆོས་གཞུང་དེ་ཚོའི་ཚིག་དོན་མ་ནོར་བར་བསྒྱུར་ནུས་པ་ལ་ཐོག་མར་ཆོས་གཞུང་དེ་ཚོའི་ཁྲིད་རྒྱུན་སླར་གསོ་བྱེད་ཐུབ་དགོས།

མཇུག་བསྡུ་བ། ཆོས་ལུགས་ཁྱབ་སྤེལ་དང་དཔལ་འབྱོར་ཚོང་བསྒྱུར་གང་ཐད་ནས་བསམ་བློ་བཏང་ན་རང་རེའི་བླ་མ་ཁག་གཅིག་གི་བཀའ་བསྟན་དབྱིན་བསྒྱུར་གྱི་ཇུས་གཞི་དེ་ནི་སྟག་ལ་ཞོན་པ་ལྟ་བུའི་ཁེ་ཉེན་ཆེན་པོ་ཞིག་རེད། སྟབས་ཡག་ན་དཔལ་འབྱོར་ཚོང་བསྒྱུར་ལ་བསམ་པ་ཡིན་ན་དཔེ་རྒྱུན་དེ་ཚོང་འགྲེམ་གྱི་རྒྱུན་མ་རྫོགས་ཀྱི་བར་དུ་ཁེ་དངུལ་རྒྱུན་མ་ཆད་དུ་འབྱུང་བས་གྲྭ་ཚང་གསོ་བའི་དཀའ་ངལ་གྱི་ཁུར་པོ་ཡང་ཆུང་དུ་འགྲོ་བ། ཆོས་སྦྱིན་ལ་རིན་མེད་དུ་སྤེལ་བསམ་མཁན་ཞིག་ཡིན་ན་དད་པ་ཡོད་མེད་ལ་མ་ལྟོས་པའི་མི་སྣ་དུང་ཕྱུར་མང་པོས་རང་གི་སྐད་ཡིག་ཏུ་ཀློག་ནུས་པས་ཆོས་སྤེལ་བའི་གོ་སྐབས་སྔར་ལས་མང་པོ་ཞིག་ཐོབ་རྒྱུ་དེ་རེད། སྟབས་ཉེས་ན་ཚོང་སྒྱུར་གྱི་བྲེལ་བ་ཆེ། སྐད་ཡིག་ལ་བྱང་ཆ་ཆུང་། ཟབ་མོའི་ནང་དོན་ལ་གོ་བ་ཞན་པས་ཡིག་སྒྱུར་དེ་ཡང་ཁྲལ་སོད་མགོ་སྐོར་ཙམ་དུ་གྱུར་ནས་ཇི་སྲིད་བར་དུ་དོག་སློང་དང་ཡིད་འགྱོད་ཀྱི་ཡུལ་དུ་གྱུར། ཕྱི་མི་མགོ་བདེ་བ་དང་དཔར་སྐྲུན་ཁང་ཧམ་པ་ཅན་ཞིག་ཞིག་གི་ལག་ལ་དབང་ཆ་ཡོངས་སུ་རྫོགས་པ་ཤོར། ཁེ་དངུལ་གྱི་འཁོར་རྒྱུགས་ཚང་མ་ཁོ་རང་ཚོར་དབང་། དད་ལྡན་ཚོས་བླུ་ཡོན་ཚད་ལས་འདས་པ་རེ་ཤོར། ངེད་ཚོའི་བླ་རྒན་ཚོའི་མིང་སྐམ་པོ་དེ་བཀའ་བསྟན་དབྱིན་འགྱུར་མའི་ཤོག་ངོས་ཕྱི་ནང་རེར་འཁོད་པ་ཙམ་ལས་དོན་དུ་ཕྱི་མི་ཚོང་ལས་པ་མ་རབ་ཁག་གཅིག་གི་གཡོག་པོ་གཡོག་ནག་ཏུ་གྱུར། ལག་སྟོང་མཆན་དུ་བཅུག་ནས་ལྷ་སྐུ་ཁ་ཤས་ཤིག་གི་དྲུང་དུ་མཆོད་མེ་ཁ་ཤས་རེ་བསྲུང་ནས་སྐུ་ཚེ་ལྷག་མ་སྐྱེལ་དགོས་ཐུག་གི་རེད། །