བོད་དོན་ལས་འགུལ་བ་བསྟན་འཛིན་བསོད་ནམས་ལགས་དང་། རི་ཏུ་ས་རིན་གཉིས་ཀྱིས་ཕབ་སྐྲུན་བྱས་པའི་བོད་པའི་རྩ་དོན་འཐབ་རྩོད་དང་འབྲེལ་བའི་གློག་བརྙན་༼ སྤྲིན་པའི་རྒྱབ་ཀྱི་ཉི་མ ༽ ཞེས་པ་དེ་དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ཟླ་འདིའི་ཕྱི་ཚེས་ ༢༥ ཉིན་གྱི་ཕྱི་དྲོའི་ཆུ་ཚོད་ ༤ པའི་སྟེང་བོད་གཞུང་ཟློས་གར་ཚོགས་ཁང་དུ་མང་ཚོགས་ལ་གཟིགས་འབུལ་ཞུས་ཡོད་ཅིང་། གློག་བརྙན་མགོ་འཛུགས་མ་བྱས་གོང་གཞོན་ནུའི་ཚོགས་གཞོན་དོན་གྲུབ་ལྷ་དར་ལགས་ཀྱིས་ངོ་སྤྲོད་བྱས་དོན། སྤྲིན་པའི་རྒྱབ་ཀྱི་ཉི་མ་ཞེས་པའི་གློག་བརྙན་འདི་བསྟན་འཛིན་བསོད་ནམས་ཁྱོ་ཤུག་གཉིས་ཀྱིས་རིན་གོང་ཆུང་ངུའི་ཐོག་གཞོན་ནུ་ལྷན་ཚོགས་ལ་བཙོང་བ་ཞིག་ཡིན་སྟབས། གཞོན་ལྷན་གྱིས་བོད་དོན་ལ་སྔར་ལས་དྲིལ་བསྒྲགས་ཡོང་སླད་མང་ཚོགས་ནང་ཅི་ཐུབ་ཀྱིས་གཟིགས་འབུལ་ཞུ་རྒྱུ་ཡིན་ཞེས་དང་། ཡང་ཁོང་གིས་ལྟད་མོ་བར་འབོད་སྐུལ་ཞུས་དོན། ཁྱེད་ཚོ་ཚང་མས་གློག་བརྙན་འདིར་གཟིགས་རྗེས་བོད་རང་བཙན་གྱི་ལངས་ཕྱོགས་ལ་རྒྱབ་སྐྱོར་བྱེད་པའི་རེ་བ་ཡོད་ཅེས་བརྗོད་བྱུང་།
གློག་བརྙན་དེ་སྟོན་ཐེངས་གཉིས་བྱས་ཡོད་པ་ལས་དང་པོ་ཕྱི་དྲོའི་ཆུ་ཚོད་ ༤ པའི་སྟེང་དབྱིན་སྐད་ནང་ཕྱི་རྒྱལ་མི་རིགས་ཚོར་གཟིགས་འབུལ་ཞུས་ཡོད་པ་དང་། གཉིས་པ་ཆུ་ཚོད་ ༦ པའི་སྟེང་བོད་སྐད་ནང་བོད་རིགས་མང་ཚོགས་ལ་གཟིགས་འབུལ་ཞུས་ཡོད། སྤྱིར་གློག་བརྙན་དེ་དབྱིན་སྐད་ནང་བཟོས་པ་ཞིག་ཡིན་ནའང་བོད་རིགས་མང་ཚོགས་ལ་གཟིགས་བདེ་ཡོང་ཆེད་གཞོན་ལྷན་གྱིས་བོད་བསྒྱུར་བྱས་འདུག གློག་བརྙན་གཟིགས་འབུལ་གྱི་མཛད་སྒོར་རྒྱ་གར་ཕྱི་སྲིད་ལྷན་ཁང་གི་སྐུ་ཚབ་དང་། གཞོན་ནུ་ལྷན་ཚོགས་ཀྱི་ཚོགས་གཙོ་དང་རྒྱུན་ལས་ཟུར་པ་སོགས་ཁྱོན་མི་ ༡༠༠ ཙམ་ཞུགས་འདུག་ལ། གློག་བརྙན་དེའི་བརྗོད་བྱ་གཙོ་བོ། ཕྱི་ལོ་ ༢༠༠༨ ལོའི་བོད་ནང་གི་བོད་མི་ཚོའི་ཞི་རྒོལ་གྱི་གནས་སྟངས་དང་། བཙན་བྱོལ་བོད་གཞུང་གི་དབུ་མའི་ལམ་གྱི་སྲིད་བྱུས། བོད་རྒྱ་འབྲེལ་མོལ་གྱི་རིམ་པ། གཞོན་ནུ་ལྷན་ཚོགས་ཀྱི་བོད་རང་བཙན་གྱི་ལས་འགུལ་སྤེལ་ཕྱོགས་བཅས་གསལ་པོར་བསྟན་ཡོད་ཅིང་། གློག་བརྙན་འདི་ལ་རྒྱལ་སྤྱིའི་ཚོགས་སྡེ་ཁག་ནས་ཆེ་བསྟོད་གཟེངས་རྟགས་ཀྱང་ཐོབ་མྱོང་ཡོད་འདུག
གསར་འགོད་པ། དཔལ་ལྡན།
