ཁ་སང་ཕྱི་ཚེས་ ༡ ཉིན་གོང་ས་མཆོག་གིས་འབྲས་སྤུངས་བླ་སྤྱིའི་འདུ་ཁང་དུ་དད་ལྡན་སེར་སྐྱ་ ༡༢༠༠༠ ཙམ་ལ་སྒྲོལ་མའི་རྗེས་གནང་དང་རྩ་ཤེ་ཊི་ཀའི་ཟིན་བྲིས་ཀྱི་ཆོས་འབྲེལ་མགོ་འཛུགས་གནང་འདུག
སྐབས་དེར་༧གོང་ས་མཆོག་གིས། ང་ཐེངས་འདིར་འབྲས་སྤུངས་དང་དགའ་ལྡན་ལ་བཅར་དགོས་དོན་གཙོ་བོ་ནི། ལོ་རྒྱུས་ལྡན་པའི་བཤད་གྲྭ་ཆེན་པོ་འདི་གཉིས་ཀྱི་ཕྱིའི་མཐུན་རྐྱེན་ཇེ་བཟང་དང་ནང་གི་རྣམ་གཡེང་ཇེ་ཆེར་འགྲོ་བཞིན་ཡོད་པ་གོ་རྒྱུ་འདུག སློབ་གཉེར་ལ་འཐུས་ཤོར་ཕྱིན་པ་མངོན་གསལ་དོད་པོ་མིན་ཡང་། རིམ་གྱིས་ལོ་ནས་ལོ་བསྟུད་དེ་འཐུས་ཤོར་ཕྱིན་ན་སླར་གསོ་བྱ་རྒྱུ་དཀའ་ལས་ཁག་པོ་ཡིན། ཞེས་དང་གསུངས་འདུག
ཁོང་གིས་སོག་རིགས་གྲྭ་རྒྱུན་ཚོར་དམིགས་ཏེ་བཀའ་གནང་དོན། དེ་རིང་འདིར་སོག་པོ་གཞུང་གི་ཕྱི་སྲིད་བློན་ཆེན་ཡང་ཕེབས་ཡོད། ཁོང་འདིར་ཕེབས་པར་ཐུགས་རྗེ་ཆེ་ཞུ་རྒྱུ་ཡིན། སོག་པོ་དང་བོད་གཉིས་བར་ལོ་ངོ་བརྒྱ་ཕྲག་མང་པོའི་འབྲེལ་བ་ཡོད། སོག་པོའི་གྲྭ་རྒྱུན་ཚོ་སྒོ་མང་གྲྭ་ཚང་དང་དམིགས་བསལ་གྱི་འབྲེལ་བ་ཡོད། ངོས་ལ་རྒྱལ་བ་རིན་པོ་ཆེའི་མིང་ཡོད་པའི་ཆ་ནས་གྲྭ་ས་འདི་ཞེས་དམིགས་སུ་བཀར་ནས་བཤད་རྒྱུ་མེད། འོན་ཀྱང་ང་རང་སྐྱེས་ཡུལ་གྱི་ཆ་ནས་བཤད་ན་ཨ་མདོ་བ་ཡིན། རྗེ་རིན་པོ་ཆེ་དང་ཕ་ཡུལ་གཅིག་པ་རེད། སྤྱིར་བཏང་འབྲས་སྤུངས་ལ་ཆ་བཞག་ན་སྒོ་མང་དེའི་ནང་ནས་སྟག་འཚེར་རིན་པོ་ཆེ་གཙང་པ་ཁང་ཚན་རེད། དེར་བརྟེན། གཙང་པ་ཁང་ཚན་གྱི་གྲྭ་རྒྱུན་ཞིག་ཡིན། ཞེས་གསུངས་འདུག
ཡང་ཁོང་གིས་བོད་ནས་གསར་དུ་ཕེབས་པ་ཚོར་གཟིགས་ཏེ། དེང་སྐབས་དཔལ་འབྱོར་ཡར་རྒྱས་འགྲོ་བ་དང་། ཕྱིའི་འཕྲུལ་རིགས་དང་ཚན་རྩལ་དར་རྒྱས་འགྲོ་བཞིན་ཡོད་པའི་སྐབས་འདིར་ནང་སེམས་འདུལ་སྦྱོང་དང་། བསམ་བློ་གཏོང་ཤེས་པ་ཞིག་དགོས་གལ་ཆེ་སྐོར་ཡང་ནན་གྱིས་གསུངས་འདུག
མདའ་འཕངས་ས་དེ་ལ་ཕོག་གི་ཡོད་ས་རེད། དོན་འགྲུབ་བཀྲ་ཤིས་ཀྱིས་རྣམ་པ་ཇི་ལྟ་བ་བཞིན་དུ་བྲིས་ཡོད་པ། ཤར་ཕྱོགས་ཁུག་རྟ་མིང་ཅན་གྱིས་དེ་ལྟ་བ་ཉིད་དུ་གོ་འདུག ཧ་ཧ་ཧ་ཧ་་་་་་་་་་་་་་
རྩོམ་སྒྲིག་པ་ལགས། གསར་འགྱུར་འགོད་དུས་ཉམས་འཇོག་བྱ་རྒྱུ་གལ་ཆེ། ཁ་སང་གསར་འགྱུར་ཞིག་གི་ནང་དུ་༸གོང་ས་མཆོག་གིས་འབྲས་སྤུངས་ཀྱི་འདུ་ཁང་གསར་བ་དབུ་འབྱེད་གནང་ཚུལ་ཞིག་བཀོད་འདུག་ལ། གོང་འཁོད་གསར་འགྱུར་འདིའི་ནང་དུའང་༼སྤྱིར་བཏང་འབྲས་སྤུངས་ལ་ཆ་བཞག་ན་སྒོ་མང་དེའི་ནང་ནས་སྟག་འཚེར་རིན་པོ་ཆེ་གཙང་པ་ཁང་ཚན་རེད། དེར་བརྟེན། གཙང་པ་ཁང་ཚན་གྱི་གྲྭ་རྒྱུན་ཞིག་ཡིན།༽ཞེས་བཀོད་པ་ནི་ནོར་བ་རེད། འབྲས་སྤུངས་ཀྱི་འདུ་ཁང་གསར་བ་ཞིག་དབུ་འབྱེད་གནང་བ་མིན་པར་ར་སྟོད་གྲྭ་ཚང་གི་འདུ་ཁང་དབུ་འབྱེད་གནང་བ་རེད། འབྲས་སྤུངས་སྒོ་མང་ལ་ཁམས་ཚན་བཅུ་དྲུག་ཡོད་པའི་ཁོངས་སུ་གཙང་པ་ཁམས་ཚན་ཟེར་བ་ཞིག་མེད་པས་དེའང་འགོད་ནོར་ཐེབས་འདུག ཁོང་གིས་སྟག་འཚེར་རིན་པོ་ཆེ་བསམ་བློ་ཁམས་ཚན་རེད། དེར་བརྟེན་ང་ཡང་བསམ་བློ་ཁམས་ཚན་གྱི་གྲྭ་རྒྱུན་ཞིག་ཡིན་ཞེས་གསུངས་པ་རེད།
ཞིབ་རྒྱས་དོན་གྲུབ་བཀྲ་ཤིས་ཀྱི་གསུངས་མི་འདུག་ག ཧཧཧཧཧ མཎྟལ་ལྗགས་བཟོ་བཤད་ཡིད་ལ་དྲན་ནི་ཟིག་རེད
དྲ་གྲོགས་ཤེལ་དཀར་བློ་བཟང་ལགས། ཉིད་ཀྱིས་གསུངས་པ་ལྟར། ༧གོང་ས་མཆོག་གི་བཀའ་གསུང་ནི་རྒྱ་མཚོ་ལྟར་གཏིང་ཟབ་ཅིང་། ནམ་མཁའ་ལྟར་རྒྱ་ཆེ་ན་ཡང་། ང་རང་ཚུད་པའི་སྙིགས་མ་ལྔ་བདོའི་མི་སྲིན་སྐྱེས་པོའི་ཚོགས་རྣམས་ལ། ལེ་ལོ་དང་རྣམ་གཡེང་། སྒྱིད་ལུག་བཅས་ཀྱི་དབང་གིས་སྤྱན་རས་གཟིགས་དབང་མི་ཡི་རྣམ་གར་རོལ་བ་༧གོང་ས་ལྷ་མིའི་རྣམ་འདྲེན་མཆོག་གི་ཟབ་གསལ་གསུང་གི་བདུད་རྩིར་རོལ་བ་བསོད་ནམས་ཀྱིས་བསྐལ་བར་གྱུར་བས་ན། འདི་ལྟར་ཚིག་ཉུང་ཞིང་དོན་འདུ་བ། ཁ་གསལ་ཞིང་ཀློག་བདེ་བའི་ཚུལ་དུ་བཀོད་པ་ལེགས་ན། དེ་དོན་གྱིས་གུ་ཡངས་དང་དགོངས་བཞེས་གནང་རོགས།
འོན་ཀྱང་སྐུ་ཉིད་ཀྱིས་རྒྱས་པར་གཟིགས་འདོད་ན་བོད་གཞུང་དྲ་རྒྱ་སོགས་སུ་ཕེབས་དང་། དེ་ཀར་ཧ་ཅང་ཞིབ་རྒྱས་སུ་ལྷུག་འདུག
བརྩེ་ཆེན་ཕ་མས་བུ་ལ་རྗེས་གདམ་བཞིན། །དེང་འདིར་མགོན་པོ་མཆོག་གི་གསུང་གྲོལ་རྣམས། །སྙིང་དང་རྣ་བའི་བདུད་རྩི་ཞུན་མ་དག །གངས་ཅན་རབ་བྱུང་རྣམས་ཀྱིས་ཅིས་མི་ཉན། །སྐུ་ཚེ་གང་པོར་གངས་ཅན་པའི་དོན་དུ། །ངལ་བ་ཀུན་སྤངས་མཛད་པའི་ཁུར་ཁྱེར་བ། །མགོན་པོ་ཆེན་པོ་མིག་མི་འཛུམ་པ་གང། །ཇི་སྲིད་ནམ་མཁའ་གནས་བར་ཞབས་བརྟན་གསོལ། །ཁ་དང་ཚིག་ཙམ་གསོལ་བ་མ་ཡིན་པར། །གཞིས་བྱས་གངས་ཅན་ཡོངས་ཀྱི་མགོན་པོ་ཁྱེད། །དུས་ཀྱི་གཉན་འཕྲང་འདི་ལས་མ་བརྒལ་བར། །གངས་ཅན་གདུལ་བྱའི་རེ་བ་མི་བཏང་གསོལ། །གཞིས་བྱེས་ཡོངས་ཀྱི་སྙིང་གི་འདོད་པའི་དོན། །མགོན་ཁྱེད་ཞལ་མཇལ་གསུང་ཐོས་ལས་ལྷག་པའི། །སྒྲུབ་བྱ་གཞན་དུ་འཚོལ་བ་མེད་པ་འདི། །མགོན་པོ་ཁྱེད་ཀྱི་ནམ་ཡང་མི་འདོར་གསོལ། །ནགས་ཕྱོགས་ཀླ་ཀློའི་མཐུ་དཔུང་ཕྱིར་གཞིལ་ནས། །ཆོས་ལྡན་པོ་ཏ་ལ་ཡི་གྷནྡོ་ལར། །གཞིས་བྱེས་ལྷན་དུ་འཛོམ་པའི་སྐལ་བཟང་འབུམ། །རང་དབང་རྫོགས་ལྡན་གསར་པ་མྱུར་འཁྲུངས་སྨོན།
གསར་འགོད་པ་ལགས།
༸གོང་ས་མཆོག་གི་གསུང་ནི་ཟབ་ཅིང་རྒྱ་ཆེ་བ་ཞིག་དང་ཀུན་ལ་ཕན་པའི་རང་བཞིན་ཅན་ཞིག་ཡིན་པས་འདི་ལས་རྒྱས་ཙམ་འདོན་སྤེལ་གནང་ཐུབ་ན་ཡག་པོ་འདུག
ས་བཅད་མ་སྟོང་ཙམ་ཞིག་སྤེལ་པས་ཕན་ཐོག་དེ་ཙམ་མི་འདུག