ཉེ་ལམ་ལྷ་ས་གྲོང་ཁྱེར་ཀླུ་སྒུག་གསོལ་མགྲོན་ཁང་དུ་དབུས་གཙང་ཡར་སྐུལ་ཚོགས་པའི་གོ་སྒྲིག་འོག་༼ ངས་གདམ་པའི་ལམ་བུ༽ཞེས་པའི་རིག་གཞུང་བགྲོ་གླེང་ཚོགས་འདུ་ཞིག་བསྡུས་ཡོད་འདུག བགྲོ་གླེང་དེར་དབུས་གཙང་ཁུལ་གྱི་སྒེར་གཉེར་བོད་ཡིག་དུས་དེབ་དང་ཚགས་པར། དྲ་ཚིགས་བཅས་ཀྱི་རྩོམ་སྒྲིག་པ་དང་གསར་འགོད་པ། དཔྱད་གཏམ་པ་དང་བཅས་མཉམ་ཞུགས་གནང་སྟེ། ད་ལྟའི་བོད་ཀྱི་སྐད་ཡིག་གི་ཉམས་ཉེས་དང་མ་འོངས་པའི་འཕེལ་ཕྱོགས། ལྷག་པར་དུ་དེང་གི་འཁྲུག་ཆ་ཆེ་བའི་སྤྱི་ཚོགས་འགྱུར་འགྲོས་ལས་བོད་ཀྱི་རྩོམ་རིག་གི་འཕེལ་འགྲིབ་དང་། བོད་པའི་དུས་དེབ་དང་ཚགས་པར། དྲ་ཚིགས་སོགས་སུ་གནས་བའི་ཞན་ཆ་འགལ་རྐྱེན། འབྱུང་འགྱུར་ལེགས་བཅོས་གཏོང་སྟངས་དང་གསར་བརྗེ་བྱ་ཕྱོགས་བཅས་ལ་བགྲོ་གླེང་བྱས་ཡོད་འདུག
བགྲོ་གླེང་དེའི་སྟེང་༼ཉིན་བྱེད་སྣང་བ༽དུས་དེབ་ཀྱི་རྩོམ་སྒྲིག་པ་འབྲི་གུང་དཀོན་མཆོག་དོན་གྲུབ་དང་༼ཤེས་རིག་དགའ་ཚལ༽ དུས་དེབ་ཀྱི་རྩོམ་སྒྲིག་པ་སྨིན་གླིང་འགྱུར་མེད།༼ཞུ་རོང་གཙང་ཆུའི་རླབས་སྒྲ༽དུས་དེབ་ཀྱི་རྩོམ་སྒྲིག་པ་སོག་རུ་མགོན་པོ་རྡོ་རྗེ། ༼མེས་པོའི་མཆོད་སྤྲིན༽ དུས་དེབ་ཀྱི་རྩོམ་སྒྲིག་པ་ས་སྐྱ་འཇམ་དབྱངས། ༼འཕྲིན་ལས་འོད་སྣང༽ དུས་དེབ་ཀྱི་རྩོམ་སྒྲིག་པ་གངས་ཆབ་དབོ་ངན། ༼བྲག་ཅ༽ ཚགས་པར་གྱི་རྩོམ་སྒྲིག་པ་ཚེ་རྡོར་དང་གཡུ་ལེགས། ༼ཆོས་གྲོགས༽ དྲ་བའི་རྩོམ་སྒྲིག་པ་ཚེ་རྣམ་དང་གཡུ་རྒྱལ། དེ་བཞིན། གསར་འགོད་པ་ཤེས་རབ་དང་། དཔྱད་གཏམ་པ་བཀྲ་ཤིས་བཅས་ཚོགས་ཞུགས་གནང་ཡོད་འདུག དེ་མིན་ལྷ་ས་གྲོང་ཁྱེར་གྱི་ཤེས་ཡོན་སྡེ་ཚན་ཁག་ཅིག་གི་མི་སྣ་དང་། བོད་ལྗོངས་སློབ་གྲྭ་ཆེན་མོ་དང་གསོ་རིག་སློབ་གླིང་། དུང་དཀར་སློབ་གྲྭ་བཅས་ཀྱི་སློབ་མ་མང་པོ་ཞིག་ཟུར་ཞུགས་གནང་ཡོད་འདུག
