བཀའ་ཁྲིའི་འོས་མི་གསུམ་ལ་དྲི་བ་དྲིས་ལན་གྱི་སྙིང་དོན།

ཕྱི་ཚེས་ ༢ ཉིན་ཨ་རིའི་རླུང་འཕྲིན་ཁང་གི་ཀུན་གླེང་ལས་རིམ་ཐོག བཀའ་ཤག་སྐབས་བཅུ་བཞི་བའི་བཀའ་བློན་ཁྲི་པའི་འོས་མི་གསུམ་སྟེ། ཁྲིམས་ལུགས་ཆེད་མཁས་པ་བློ་བཟང་སེང་གེ་ལགས་དང་། བཀའ་བློན་ཁྲི་ཟུར་བཀྲས་མཐོང་བསྟན་འཛིན་རྣམ་རྒྱལ་ལགས། བཀའ་ཟུར་བཀྲ་ཤིས་དབང་འདུས་ལགས་བཅས་ལ་དྲི་བ་དྲིས་ལན་གནང་བ་ཁག་བསྡུ་སྒྲིག་བྱས་ཡོད།

ཐེངས་འདིའི་དྲི་བ་དྲིས་ལན་དེ་རིམ་པ་ ༣ དུ་བགོས་ཡོད་པ་དང་། སྐོར་ཐེངས་དང་པོར་འོས་མི་གཅིག་གི་དྲིས་ལན་ལ། འོས་མི་གཞན་གཉིས་རེ་རེ་ཡིས་བཀའ་ཤག་གི་ཚབ་བྱས་ཏེ་ལན་འདེབས་གནང་བ། སྐོར་ཐེངས་གཉིས་པར་འོས་མི་གཅིག་གིས་དྲི་བར་ལན་འདེབས་དང་། འོས་མི་གཞན་གཉིས་ཀྱིས་དྲིས་ལན་དེའི་ཐོག་དགོངས་ཚུལ་གསུངས་པ། སྐོར་ཐེངས་གསུམ་པར་དྲི་བ་གཅིག་ལ་འོས་མི་གསུམ་ཆ་ནས་ལན་འདེབས་གནང་བ། སྐོར་ཐེངས་བཞི་བར་མང་ཚོགས་ལ་དྲི་བ་བསྡུས་ཏེ་འོས་མི་གསུམ་རེ་རེ་ཡིས་ལན་འདེབས་གནང་བ་བཅས་རེད།  

ལན། རྒྱ་ནག་གི་དབུ་ཁྲིད་ཚོ་དང་མི་མང་ལ་བོད་ཀྱི་གནད་དོན་ཐོག་བསྐྱར་དུ་ར་སྤྲོད་ཆེན་པོ་ཞིག་བྱ་རྒྱུའི་དུས་སུ་བསླེབས་འདུག་བསམ་གྱི་ཡོད། ལྔ་བཅུ་ང་གྲངས་ནས་བོད་པར་རྒྱ་མིས་ཁྲིམས་འགལ་ཐོག་བཙན་འཛུལ་བྱས་ཏེ་དགོན་སྡེ་ཁག་རྩ་མེད་དང་།བོད་མི་ས་ཡ་གཅིག་ལྷག་དམར་གསོད་བཏང་བ་སོགས་འགྲེལ་བཤད་གསལ་པོ་བརྒྱབ་སྟེ། ཁོང་ཅག་ལ་བོད་དོན་ཐད་ར་སྤྲོད་གསལ་པོ་བྱུང་བ་ཡིན་ན།དྲན་གསོ་དེ་དང་འབྲེལ་ཏེ་རྒྱ་ནག་གི་དཔོན་རིགས་དང་མཁས་པ་ཚོས་བོད་ཀྱི་གནད་དོན་ཐོག་གུ་ཡངས་དགོས་པའི་ཚོར་བ་ཡོང་གི་རེད། དེ་མིན། དེང་སྐབས་རྒྱ་གཞུང་གིས་ག་དུས་ཡིན་རུང་བོད་དོན་ཐོག་འཕྲལ་སེལ་གྱི་གུ་བཤངས་དང་། བོད་ཀྱི་ ཕུགས་རྒྱང་རིང་པོའི་རྩ་དོན་ཐོག་བསམ་ཤེས་མེད་པའི་ཚོར་བ་ཞིག་འདུགདེའི་སྟབས་ཀྱིས་ང་ཚོས་འདས་པའི་ལོ་རྒྱུས་དེ་ཁུངས་དག་པོ་ཞིག་གི་ཐོག་ནས་ར་སྤྲོད་ཅིག་བྱ་དགོས་ཀྱི་འདུག  

བློ་བཟང་སེང་གེ་ལགས་ཀྱི་བཀའ་ཤག་གི་ལན་འདེབས། རྩ་དོན་རྩོད་རྒྱུ་དེ་རྒྱལ་སྤྱིའི་ཁོར་ཡུག་དང་སྐབས་དང་དུས་ལ་བསྟུན་རྒྱུ་གལ་ཆེན་པོ་རེད།བོད་རྒྱ་ཞི་མོལ་འགག་བསྡད་པ་དེ་རྒྱ་ནག་གཞུང་དང་མགོ་ཁྲིད་ཚོས་བོད་དོན་ཐོག་ཐག་མ་ཆོད་པར། སྲིད་བྱུས་གསར་པ་གང་འདྲ་ཞིག་འཛིན་དགོས་མ་ཤེས་པས་འགག་བསྡད་པ་ཞིག་རེད།རྒྱལ་སྤྱི་དང་།ཨེ་ཤ་ཡའི་ནང་། ལྷག་པར་དུ་རྒྱ་ནག་ཏུ་འགྱུར་ལྡོག་ཆེན་པོ་ཞིག་བྱུང་བ་ཡིན་ན།གོ་སྐབས་བཟུང་སྟེ་ཐབས་ལམ་གསར་པ་ཞིག་བརྙེད་ཐུབ་པའི་རེ་བ་ཡོད།ཨེ་ཤ་ཡའི་ནང་ ༢༠༡༡ནས་༢༠༢༡ བར་གྱི་ལོ་བཅུའི་རིང་ཨེ་ཤ་ཡའི་མངའ་ཁུལ་ལ་འགྱུར་ལྡོག་འགྲོ་སྲིད་པ་རེད། སྐབས་དེར་གོ་སྐབས་དམ་འཛིན་བྱ་རྒྱུ་གལ་ཆེན་པོ་རེད།  

བཀྲ་ཤིས་དབང་འདུས་ལགས་ཀྱི་བཀའ་ཤག་གི་ལན་འདེབས། བོད་རྒྱ་ཞི་མོལ་ཐོག་བཀའ་ཤག་གིས་ད་བར་ཐབས་ཤེས་གང་གནང་དགོས་པ་དེ་གནང་ཡོད། འོན་ཀྱང་བོད་ཀྱི་དཀའ་རྙོག་སེལ་ཐུབ་ཡོད་མ་རེད།དེ་ལ་རྒྱུ་མཚན་མང་པོ་ཞིག་ཡོད། ངས་མདོ་བསྡུས་ཤིག་ཞུས་ན། ད་ལྟའི་རྒྱ་ནག་གི་མགོ་ཁྲིད་ཚོར་ཐག་གཅོད་བྱེད་པའི་ཆབ་སྲིད་ཀྱི་ཆོད་སེམས་མེད་པས་རེད། དེར་བརྟེན། རྒྱ་ནག་མི་མང་ལ་དབུ་མའི་ལམ་གྱི་སྲིད་བྱུས་འགྲེལ་བཤད་བརྒྱབ་སྟེ།མང་ཚོགས་ཀྱི་བསམ་བློར་འགྱུར་བ་བཏང་སྟེ་ཆབ་སྲིད་ཀྱི་ནུས་པ་འདོན་རྒྱུ་གལ་ཆེན་པོ་རེད།  

བློ་བཟང་སེང་གེ་ལགས་སུ་དྲི་བ། སྐུ་ཉིད་ཀྱིས་བཀའ་ཁྲིའི་ཕྱག་ལས་གནང་ཕྱོགས་ཐད། རྩ་དོན་གསུམ་ལག་ལེན་བསྟར་དགོས་ཚུལ་གསུངས་ཡོད། ཁྱེད་རང་བཀའ་ཁྲིར་བདམས་ཐོན་བྱུང་བ་ཡིན་ན། རང་མགོ་རང་ཐོན་ཡོང་བར་གསར་གཏོད་ག་རེ་གནང་འཆར་ཡོད་དམ།  

ལན། འཛིན་སྐྱོང་གི་ཐོག་ནས་གསར་གཏོད་བྱ་རྒྱུ་ཡོད་པ་རེད། ལས་བྱེད་ཚོས་ཟླ་ཕོགས་སྤར་ཏེ་གནས་ཐུབ་པ་བྱ་རྒྱུ་དེ་ཕྱོགས་གཅིག་ནས་དཀའ་ལས་ཁག་པོ་རེད། རྒྱལ་ཁབ་གཞན་ལ་འགྲན་ཐབས་ཡོད་པ་མ་རེད། འོན་ཀྱང་། ལས་བྱེད་སུ་ཞིག་འཕྲོད་བསྟེན་ཐོག་སློབ་སྦྱོང་བྱས་ཡོད་ན་འཕྲོད་བསྟེན་ལས་ཁུངས་སུ་བསྐོ་རྒྱུ་དང་། ཤེས་ཡོན་ཐོག་སློབ་སྦྱོང་བྱས་ཡོད་ན་ཤེས་རིག་ལས་ཁུངས་སུ་གོ་སྒྲིག་བྱས་ཏེ། སོ་སོའི་ཆེད་སྦྱོང་དང་འབྲེལ་ཏེ་ལས་ཀ་སྤྲད་པ་ཡིན་ན།བརྟན་པོར་གནས་ཐུབ་པའི་རེ་བ་ཡོད། དཔལ་འབྱོར་ཐད། བཙན་བྱོལ་སྤྱི་ཚོགས་ནང་སུད་འཚོང་རྒྱག་མཁན་འགན་ལེན་ཁག་ཐེག་བྱེད་པ་དང་།གཞིས་ཆགས་ཁག་ཏུ་གཞོན་སྐྱེས་ལས་མེད་ཚོར་ལག་ཤེས་བསླབ་རྒྱུ་དང་།ལམ་ཁའི་བཞི་མདོ་ཁག་ཏུ་ཚོང་ཁང་གསར་རྒྱགདེ་བཞིན། ཕྱི་རྒྱལ་ཁག་གི་བོད་རིགས་སྤྱི་མཐུན་ཚོགས་པ་རེ་རེ་ནས་རྒྱ་བལ་འབྲུག་གསུམ་ནང་གི་གཞིས་ཆགས་རེ་རེར་བདག་པོ་རྒྱག་རྒྱུ་སོགས་བྱ་དགོས། ཤེས་ཡོན་གྱི་ཐོག་ནས་ཚན་རིག་དང་ཨང་རྩིས་ཐོག་འཐུས་ཤོར་འགྲོ་བཞིན་ཡོད་པའི་མཐོང་སྣང་བྱུང་། དེ་དག་ཡར་རྒྱས་སུ་གཏོང་རྒྱུ་དང་། ཤེས་ཡོན་སྲིད་བྱུས་ཀྱི་ཐོག་ནས་བོད་ཡིག་བོད་སྐད་ཡར་རྒྱས་འགྲོ་བ་རེད། གཙོ་བོ་དབྱིན་ཡིག་ཡར་རྒྱས་སུ་གཏོང་དགོས་པ་རེད།

བཀྲ་ཤིས་དབང་འདུས་ཀྱི་བཀའ་ཤག་གི་ལན་འདེབས།ངས་ཤེས་ཚོད་ལྟར་བྱས་ན། བློ་སེང་ལགས་ཀྱིས་གསུངས་པ་དེ་དག་འདས་པའི་དུས་སུ་བཀའ་ཤག་གིས་གནང་ཡོད་པ་རེད།དགོངས་གཞི་ཡོད་པ་བཞིན་གྲུབ་འབྲས་ཐོན་མེད་པ་བདེན་པ་རེད། གཙོ་བོ་ཞིག་ནི། ལས་དོན་དེ་ཚོར་གཞུང་གིས་ལམ་སྟོན་ལྟར་མཐུན་འགྱུར་རོགས་རམ་གནང་རྒྱུ་དང་། དེ་ལ་མང་ཚོགས་ཀྱིས་མཉམ་རུབ་བྱ་རྒྱུ་གལ་ཆེན་པོ་རེད་སྙམ། འཕྲལ་སེལ་གྱི་དུས་ཚོད་བསྐྱལ་རྒྱུ་ཙམ་མིན་པར་ཕུགས་རྒྱང་རིང་པོར་བཙན་བྱོལ་དུ་འདུག་དགོས་ཚེ་ག་རེ་བྱ་དགོས་མིན་ཐོག སྤྱི་ཚོགས་ནང་བགྲོ་གླེང་དང་བམས་བློ་གཏོང་དགོས་པ་རེད་སྙམ།   

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ཤག་གི་ལན་འདེབས། ང་ཚོའི་སྤྱི་ཚོགས་ནང་ལས་འགན་མང་པོ་ཞིག་ཡོད་པ་དེར་གསར་གཏོད་བྱ་དགོས་ན།བོད་གཞུང་མང་གཉིས་ཀྱིས་བསམ་བློ་གཏོང་སྟངས་གསར་པ་ཞིག་གི་ཐོག་ལ་འགྲོ་དགོས་པ་རེད།སྔོན་མ་ཡིན་ན་ལས་བྱེད་ཚོའི་སེམས་ཤུགས་ཁོ་ན་དང་། ༧གོང་ས་མཆོག་གི་ཞལ་ལ་བལྟས་ཏེ་ཞབས་ཞུ་སྒྲུབ་ཀྱི་ཡོད། ད་ཆར་མི་རབས་གསར་པ་དང་སློབ་སྦྱོང་གསར་པའི་མི་སྣ་བསླེབས་ཡོད་པ་རེད། དེ་ལ་རན་པའི་སེམས་ཤུགས་སྤར་ཕྱོགས་དང་། ལས་དོན་བྱེད་ཕྱོགས་ཐབས་ལམ་གསར་པ་ཞིག་གི་ཐོག་འགྲོ་དགོས་པ་རེད་བསམ་གྱི་འདུག རྙིང་པའི་ཐོག་ལ་ཕུད་བརྒྱབ་པ་ཙམ་གྱིས་ཕན་གྱི་མ་རེད།

བཀྲ་ཤིས་དབང་དུས་ལགས་སུ་དྲི་བ། ཉེ་ལམ་བགྲོ་གླེང་དང་བཅར་འདྲིའི་ལན་དུ་ཉིད་ཀྱིས་བཀའ་ཤག་གིས་བཙན་བྱོལ་སྤྱི་ཚོགས་དང་ཤེས་ཡོན་ཐོག་ཡར་རྒྱས་གཏོང་རྒྱུ་མང་པོ་ཞིག་འདུག་གསུངས་སོང་། སྐུ་ཉིད་ཀྱིས་ཡར་རྒྱས་གཏོང་བའི་ཐབས་ལམ་གང་འདྲ་གཟིགས་ཀྱི་ཡོད་དམ།  

ལན། རྩ་བའི་ཆ་ནས་བཙན་བྱོལ་སྒྲིག་འཛུགས་དང་སྤྱི་ཚོགས་ཕྱོགས་ཡོངས་ནས་ཡག་པོ་ཆགས་ཡོད་པ་རེད། རེ་བ་བཟང་ས་དང་གྲ་སྒྲིག་སྡུག་ས་ཟེར་བ་ལྟར། ང་ཚོས་བོད་ཀྱི་བདེན་མཐའ་གསལ་རྒྱུར་ཤུགས་སྣོན་རྒྱག་དགོས་པ་རེད། འོན་ཀྱང་དུས་ཐུང་ནང་བོད་དོན་འགྲིག་འཇགས་མ་ཡོང་བར། བཙན་བྱོལ་ནས་མི་རབས་ནས་མི་རབས་སུ་སྡོད་དགོས་བྱུང་ཡང་སྒྲིག་འཛུགས་སྲ་བརྟན་དང་། ཕུགས་རྒྱང་རིང་པོའི་དམིགས་ཡུལ་དང་འཆར་གཞི་བསྒྲིག་དགོས་པ་རེད། དེའི་ཐོག་ལ་བགྲོ་གླེང་དང་བསམ་ཞིབ་ཤུགས་ཆེན་གནང་དགོས་པ་རེད། ལྷག་པར་དུ་མ་འོངས་པའི་སྤྱི་འཐུས་ཚོས་ཐུགས་འགན་ཆེན་པོ་བཞེས་དགོས་པ་རེད།

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ཤག་གི་ལན་འདེབས། ལས་དོན་དེ་དག་ཐོག་འདས་པའི་དུས་སུ་གྲུབ་འབྲས་ཐོན་ཡོད་ཀྱང་། དུས་ཚོད་ཀྱི་འགྱུར་བ་དང་བསྟུན་ཏེ་ལས་དོན་གསར་པ་སྤེལ་དགོས་པ་རེད། བཙན་བྱོལ་ནང་བོད་པའི་དཔལ་འབྱོར་གནས་སྟངས་དེ་གལ་ཆེན་པོ་ཞེ་དྲག་རེད། ད་ཆར་བོད་གཞུང་གི་སྲིད་བྱུས་ཐོག་ནས་གཞུང་གི་ཚོང་ལས་སྡེ་ཚན་དག་སྒོ་བརྒྱབ་པ་རེད་དེ། དཔལ་འབྱོར་ཐོག་ཐུགས་འགན་བཞེས་པའི་གོ་སྐབས་མང་པོ་ཡོད་པ་རེད། གཞིས་ཆགས་ཁག་གི་མཉམ་འབྲེལ་ལས་གཞི་དང་།བོད་མི་ཚོས་ཚོང་ལས་རིགས་ཀྱི་ཐོག་ལ། གཞུང་གི་ངོས་ནས་མ་རྩའི་མཐུན་འགྱུར་དང་། སྤྱི་བའི་མ་དངུལ་འཛུགས་པ་སོགས་ལ་དགོངས་པ་བཞེས་པ་ཡིན་ན། ཕན་ཐོགས་ཆེན་པོ་ཡོང་གི་རེད།

བློ་བཟང་སེང་གེ་ལགས་ཀྱི་བཀའ་ཤག་གི་ལན་འདེབས།ལས་གཞི་ཡར་རྒྱས་གཏོང་རྒྱུར་གཞུང་དམངས་གཉིས་ཐོག་ནས་མཉམ་འབྲེལ་བྱ་རྒྱུ་གལ་ཆེན་པོ་རེད།ལྷག་པར་དུ་ཕྱི་རྒྱལ་དུ་ཡོད་པའི་བོད་པ་ཚོར་མཐུན་རྐྱེན་ཡག་པོ་ཡོད་སྟབས། དམིགས་བསལ་གྱི་འགན་ཞིག་ཡོད་པ་རེད།ཕྱི་རྒྱལ་དུ་ཡོད་པའི་བོད་མི་རེ་རེ་ནས་རྒྱ་གར་ནང་ཡོད་པའི་ཕྲུ་གུ་གཅིག་དང་བོད་ནང་གི་ཕྲུ་གུ་གཅིག་ལ་སློབ་ཡོན་སྦྱིན་བདག་གཏོང་ཐུབ་ན་ཕན་ཐོགས་ཆེན་པོ་ཡོང་གི་རེད། དེ་བཞིན། ནེའུ་ཡོག་སྤྱི་མཐུན་ཚོགས་པས་ལ་དྭགས་དང་། ཊོ་རོན་ཊོ་ཡིས་མོན་གྷོ་ཊི། སུད་སི་ཡིས་བདེ་སྐྱིད་གླིང་ལྟ་བུར་བདག་པོ་རྒྱག་ཐུབ་ན། རིམ་པས་རང་མགོ་རང་ཐོན་ཟེར་བ་དེ་ཆགས་རྒྱུར་རེ་བ་ཡོད།

སྐོར་ཐེངས་གཉིས་པ། འོས་མི་གཅིག་གི་དྲིས་ལན་ལ་འོས་མི་གཞན་གཉིས་ཀྱིས་དགོངས་ཚུལ་གསུངས་པ།

བཀྲས་མཐོང་བསྟན་འཛིན་རྣམ་རྒྱལ་ལགས་སུ་དྲི་བ། བོད་ནང་བོད་མིའི་ཆོས་དང་རིག་གཞུང་སྲུང་སྐྱོབ་བྱེད་ཕྱོགས་ཐོག་ལས་ཀ་ག་རེ་བྱ་རྩིས་ཡོད་དམ།

ལན། བོད་ནང་གི་བོད་མིའི་སེམས་ཤུགས་མ་ཆགས་པ་དང་བོད་པའི་ཆོས་དང་རིག་གཞུང་།སྐད་ཡིགམི་རིགས་ཀྱི་ངོ་བོ་མ་བརླག་པ་བྱ་ཆེད། བཙན་བྱོལ་སྒྲིག་འཛུགས་ཀྱི་ངོས་ནས་ལམ་སྟོན་དང་རོགས་རམ་གནང་ཐུབ་པ་མང་པོ་ཞིག་རེད་སྙམ། ཕྱི་ལོགས་སུ་ཡོད་པའི་སློབ་གྲྭ་ཁག་གི་བོད་ཡིག་ཐོག་མུ་མཐུད་ཤུགས་རྒྱག་ཐུབ་པ་དང་། དེ་བཞིན་ཕྱི་རྒྱལ་དུ་ཡོད་པའི་བོད་པ་ཚོར་བོད་ཀྱི་སྐད་དང་རིག་གཞུང་།རོལ་ཆ་ཚུན་ནས་དམིགས་བསལ་ཆ་རྐྱེན་བསྐྲུན་ཐུབ་པ་ཡིན་ན།རང་བཞིན་གྱིས་གཞིས་ལུས་མི་མང་གིས་དཔེར་བལྟ་འོས་པ་ཞིག་དང་།བོད་ཀྱི་ས་ཁུལ་དུ་རྩོད་གཞི་བྱ་སའི་གཞི་རྩ་ཞིག་ཆགས་ཏེ།བོད་ནང་གི་རིག་གཞུང་རྒྱུན་འཛིན་ཐད་ནུས་པ་འདོན་ཐུབ་ཀྱི་རེད།

བློ་བཟང་སེང་གེ་ལགས་ཀྱི་དགོངས་ཚུལ། ཕྱིའི་རོགས་ཚོགས་ཁག་མང་པོ་ཞིག་གིས་བོད་ནང་གི་རིག་གཞུང་དང་ཤེས་ཡོན་ཡར་རྒྱས་ཐོག་རོགས་རམ་བྱེད་ཀྱི་ཡོད་པ་ལྟར།མུ་མཐུད་གནང་དགོས་པའི་འབོད་སྐུལ་དགོས་རྒྱུ་དང་།གཙོ་བོ་བོད་ནང་གི་བོད་མི་ཚོས་འགན་འཁུར་རོགས་གནོང་ཞུ་རྒྱུ་ཡིན། སོ་སོ་སྒེར་དང་ཁྱིམ་ཚང་།སྤྱི་ཚོགས་བཅས་ནས་འགན་འཁུར་དགོས་པའི་འབོད་སྐུལ་ཞུ་རྒྱུ་ཡིན། ཆབ་སྲིད་གནད་དོན་གཞིར་བཞག་པའི་ཐོག་བོད་མི་རིགས་གནས་དང་མ་གནས་ཀྱི་ཛ་དྲག་གནས་སྟངས་ལ་ཐུག་ཡོང་བའི་སྐབས་ལ།རྒྱ་ནག་གིས་བོད་མི་རིགས་རྩ་མེད་བཟོ་རྒྱུ་དེ་ཕུགས་ཀྱི་འཆར་གཞི་ཡིན་པ་ཧ་གོ་དགོས་པ་རེད།  

བཀྲ་ཤིས་དབང་འདུས་ཀྱི་དགོངས་ཚུལ། བོད་ནང་གི་གཞིས་ལུས་རྒྱ་ཆེའི་མི་མང་གིས་གང་ཐུབ་ཅི་ཐུབ་གནང་གི་ཡོད་པ་རེད། འདས་པའི་ཟླ་ཤས་གོང་བོད་ནང་གི་སྐད་ཡིག་སློབ་ཚན་ལ་འགྱུར་བ་གཏོང་སྐབས་སློབ་ཕྲུག་ཚོས་ངོ་རྒོལ་རྣམ་འགྱུར་ཤུགས་ཆེན་བསྟན་པ་རེད།བོད་ནང་དུ་བཞུགས་མཁན་ཚོས་གནད་དོན་ཐག་གཅོད་སྐབས། རྒྱ་མིའི་རང་སྐྱོང་གི་ཁྲིམས་དང་སྒྲིག་གཞི་སོགས་སུ་ཐོབ་ཐང་གང་ཡོད་པ་དེ་གཞི་ལ་བཞག་སྟེ་རྩོད་ཐུབ་པ་ཡིན་ན།ནུས་པ་ཆེན་པོ་འཐོན་ཐུབ་པ་རེད།  

བློ་བཟང་སེང་གེ་ལགས་སུ་དྲི་བ། ཏཱ་ལའི་བླ་མ་སྐུ་ཕྲེང་བཅུ་བཞི་པའི་ཡང་སྲིད་ཕེབས་ཕྱོགས་ཐད། དགོངས་འཆར་གང་འདྲ་ཡོད་དམ།

ལན། ངས་བསམ་ཚུལ་ལ་༧གོང་ས་མཆོག་སྐུ་ཚེ་རིང་པོ་བཞུགས་རྒྱུ་དང་། ཁོང་སྐུ་འཚོ་བཞུགས་རིང་བོད་ཀྱི་གནད་དོན་ཐག་གཅོད་ཡོང་བའི་ཡིད་ཆེས་ཡོད།ཡང་སྲིད་ཕེབས་ཕྱོགས་ཐད་འདི་བྱ་དགོས་ཀྱི་འདུག་ཟེར་ནས་ཞུ་རྒྱུ་མེད།ངའི་སེམས་ཁྲལ་ཆེ་ཤོས་ནི།པཎ་ཆེན་རིན་པོ་ཆེ་རྒྱ་མིའི་ལག་ཏུ་ཤོར་བ་བཞིན་༧གོང་ས་མཆོག་སྐུ་ཕྲེང་བཅོ་ལྔ་བ་རྒྱ་མིའི་ལག་པར་ཤོར་གྱི་རེད་བསམ་པའི་སེམས་ཁྲལ་འདུགསྐུ་ཕྲེང་བཅུ་བཞི་པ་འཚོ་བཞུགས་སྐབས། སྐུ་ཕྲེང་བཅོ་ལྔ་བ་ཐུགས་ཐག་ཆོད་པ་ཡིན་ན་ཡག་ཤོས་རེད།ང་ཚོས་སྐུ་ཕྲེང་བཅོ་ལྔ་པ་དེ་སྐུ་ཕྲེང་བཅུ་བཞི་པ་ལྟ་བུ་ཞིག་ཡོང་རྒྱུར་རེ་བ་རྒྱག་གི་ཡོད། ཁོང་འཚོ་བཞུགས་སྐབས་སྐུ་ཕྲེང་བཅོ་ལྔ་བ་ཞིག་བྱུང་ན།ཤེས་ཡོན་དང་ཆབ་སྲིད།ཚན་རིག་སོགས་ཀྱི་ལམ་སྟོན་ཡག་པོ་གནང་ཐུབ་པ་རེད། དེ་ལ་ནང་པའི་རྒྱལ་ཁབ་ཁག་དང་རྒྱལ་སྤྱིའི་སྟེང་ནས་རྒྱབ་སྐྱོར་གནང་དགོས་ན། སྟབས་བདེ་བོ་ཡོད་པ་རེད།

བཀྲ་ཤིས་དབང་འདུས་ལགས་ཀྱི་དགོངས་ཚུལ། བོད་དོན་དེ་༧གོང་ས་མཆོག་སྐུ་འཚོ་བཞུགས་རིང་སེལ་མ་ཐུབ་པ་ཡིན་ན།ཡང་སྲིད་གཉིས་ཡོང་རྒྱུ་ནི་བཤད་མ་དགོས་པ་ཞིག་རེད།གཙོ་བོ་དེ་༧གོང་ས་མཆོག་རང་གི་ཞལ་ནས་བོད་གྱི་དཀའ་རྙོག་མ་སེལ་བར་དུ་ཡང་སྲིད་རྒྱ་ནག་གི་འོག་ཏུ་འཁྲུངས་རྒྱུ་མིན། ཞེས་བཀའ་གསལ་བོ་གནང་ཡོད་པ་དེ་གཞི་རྩར་འཇོག་དགོས་པ་རེད།

བཀྲས་མཐོང་ལགས་ཀྱི་དགོངས་ཚུལ། ༧གོང་ས་མཆོག་གི་ཡང་སྲིད་ཕེབས་ཕྱོགས་ཐོག་སོ་སོས་འདོད་པའི་དབང་དུ་སོང་སྟེ་འགྲེལ་བཤད་བརྒྱབ་ན་ཏག་ཏག་བསྡད་ཡོད་པ་མ་རེད།༧གོང་ས་མཆོག་གིས་མཐའ་མ་བོད་མི་མང་ལ་རག་ལས་ཡོད་གསུངས་ཡོད་སྟབས། ང་རང་གི་བསམ་པར་བོད་མི་མང་གིས་སྔ་མོའི་ལམ་སྲོལ་ཐོག་ནས་ཡང་སྲིད་གདན་ཞུ་གནང་གི་རེད་བསམ་གྱི་འདུག ད་ལྟ་༧གོང་ས་མཆོག་གི་དབུ་ཁྲིད་འོག་བཙན་བྱོལ་བོད་གཞུང་གི་སྒྲིག་འཛུགས་ཤིག་ཡོད་ལ།སྒྲིག་འཛུགས་འདིས་འགན་ཞིག་འཁུར་དགོས་པ་རེད།ཡིན་ནའང་།རྒྱ་ནག་ཕྱོགས་ནས་ཡང་སྲིད་ཚོར་བདག་པོ་རྒྱག་གི་ཡིན་སྐོར་བཤད་ཀྱི་ཡོད་སྟབས། ང་ཚོ་གཞུང་མང་གཉིས་ནས་ཀྱང་ཐབས་ཤེས་བྱས་ཏེ། རྒྱལ་སྤྱིའི་ཁྲིམས་དང་ཆབ་སྲིད་ཀྱི་རྒྱབ་སྐྱོར་ཐོག་ནས་ཡང་སྲིད་རྗེས་མར་རྒྱ་ནག་གི་ལག་པ་འཆིང་མ་ཐུབ་པ་ཞིག་ལ་འབད་བརྩོན་བྱ་དགོས་པ་རེད།

ལན།ང་ཚོས་རྒྱ་ནག་གཞུང་དམངས་གཉིས་ལ་འབྲེལ་བ་བྱས་ཏེ་བོད་རྒྱའི་གནད་དོན་སེལ་ཐབས་བྱ་རྒྱུ་ལས་ཐབས་ལམ་གཞན་ཡོད་པ་མ་རེད། ད་ཆར་རྒྱ་ནག་མགོ་ཁྲིད་ཚོར་བལྟས་ཡོང་ན།༧གོང་ས་མཆོག་དང་བཀའ་མོལ་གནང་རྒྱུ་དང་། ཁོང་སྐུ་འཚོ་བཞུགས་རིང་བོད་རྒྱའི་དཀའ་རྙོག་སེལ་ན་ཡག་པོ་ཡོང་གི་རེད་བསམ་མཁན་ཡོད་པ་རེད། མ་འོངས་མགོ་ཁྲིད་ཚོའི་ནང་དུ་ཡང་བསམ་ཚུལ་གཉིས་ཏན་ཏན་ཡོང་གི་རེད། མི་མང་ལ་ཆ་བཞག་ཀྱང་། ཆབ་སྲིད་གོ་རྟོགས་ཡོད་མཁན་ཚོས་བོད་དོན་ཞི་མོལ་གྱི་ཐོག་ནས་སེལ་དགོས་པའི་བསམ་ཚུལ་འདོན་མཁན་མང་དུ་འགྲོ་བཞིན་ཡོད།ད་ལྟ་རྒྱ་ནག་ཏུ་ཆབ་སྲིད་གུ་ཡངས་ཀྱི་འགྱུར་བ་མང་པོ་ཞིག་འགྲོ་བཞིན་ཡོད། ང་ཚོས་མང་ཚོགས་ལ་བོད་རྒྱ་གཉིས་སྨན་དབུ་མའི་ལམ་གྱི་འགྲེལ་བཤད་བྱས་ཏེ། རྒྱ་ནག་གི་མགོ་ཁྲིད་ཚོས་མི་མང་ལ་མགོ་སྐོར་གཏོང་གི་ཡོད་པ་ཤེས་རྟོགས་བྱུང་བ་ཡིན་ན། བོད་རྒྱའི་དཀའ་ངལ་སེལ་ཐུབ་པ་རེད་བསམ་གྱི་འདུག  

བཀྲས་མཐོང་ལགས་ཀྱི་དགོངས་ཚུལ། ༧གོང་ས་མཆོག་གིས་ལམ་སྟོན་གནང་བའི་དབུ་མའི་སྲིད་བྱུས་ཐོག་བོད་རྒྱ་གཉིས་ཀའི་བསམ་ཚུལ་མཐུན་ཏེ་དཀའ་རྙོག་སེལ་དགོས་ཟེར་བ་དེ་བརྟན་པོར་གནས་རྒྱུ་རེད། ༧གོང་ས་མཆོག་དང་བོད་མི་མང་གིས་རྒྱ་ནག་མི་མང་དང་ཐད་ཀར་འབྲེལ་བ་བྱ་རྒྱུ་དེ་ཕུགས་ཀྱི་ལས་དོན་གལ་ཆེན་ཞིག་ཡིན། ལྷག་པར་དུ་བཙན་བྱོལ་དུ་ཡོད་པའི་བོད་མི་ཚོས་བོད་ཀྱི་བདེན་པའི་འབོད་སྒྲ་སྔར་ལས་སྐད་ཤུགས་ཆེ་རུ་བཏང་བ་ཡིན་ན། ཕན་ཐོགས་ཆེན་པོ་ཡོང་གི་རེད།

བློ་བཟང་སེང་གེ་ལགས་ཀྱི་དགོངས་ཚུལ། ཕྱི་ལོ་ ༢༠༡༢ ལོར་རྒྱ་ནག་གི་མགོ་ཁྲིད་མང་པོ་བརྗེ་བོ་རྒྱག་དགོས་པ་རེད། ཞིས་ཅིན་ཕིན་སྲིད་འཛིན་དང་། ལིས་ཁུ་ཆིང་སྲིད་བློན་ཆགས་རྒྱུ་རེད། དེ་བཞིན།ལོ་དེར་ཐེ་ཝན་སྲིད་འཛིན་མཱ་ཡུན་ཅིག་འོས་གཞིར་ལངས་དགོས་པ་རེད།ཨ་རིའི་སྲིད་འཛིན་ཨོ་བྷ་མ་དང་ཧྥ་རན་སིའི་སྲིད་འཛིན་སར་ཀོ་སི་སོགས་འཛིན་དུ་ལངས་དགོས་པ་རེད།ར་ཤི་ཡའི་འོས་བསྡུ་གནང་དགོས་པ་རེད།རྒྱལ་སྤྱི་དང་རྒྱ་ནག་གི་འགྱུར་བ་དང་བསྟུན་ཏེ།ང་ཚོས་དུས་ཚོད་དམ་འཛིན་བྱ་དགོས་པ་རེད།

སྐོར་ཐེངས་གསུམ་པ། དྲི་བ་གཅིག་ལ་འོས་མི་གསུམ་རེ་རེ་ནས་ལན་འདེབས་གནང་བ།

བཀྲས་མཐོང་ལགས་སུ་དྲི་བ། བཙན་བྱོལ་སྤྱི་ཚོགས་ནང་གི་ཛ་དྲག་གི་དཀའ་ངལ་གཉིས་གང་ལ་ངོས་འཛིན་གནང་གི་ཡོད་པ་དང་། དེ་སེལ་རྒྱུར་ཐབས་ཇུས་གང་འདྲ་ཡོད་དམ།

ལན། བཙན་བྱོལ་སྤྱི་ཚོགས་ཀྱི་དཀའ་ངལ་ཆེ་ཤོས་དེ་གཅིག་ནི། ལོ་གཞོན་མང་པོ་ཞིག་སློབ་སྦྱོང་གོ་སྐབས་ཡག་པོ་སྤྲད་དེ། མཐོ་སློབ་ཐོན་རྗེས་གཞིས་ཆགས་དང་བོད་ཀྱི་སྤྱི་ཚོགས་ནང་གནས་མ་ཐུབ་པར་གྲོང་ཁྱེར་ཆེ་ཁག་དང་ཕྱི་རྒྱལ་དུ་འཐོན་བཞིན་པ་དེ་དཀའ་ངལ་ཞིག་རེད། གཉིས་པ།ང་ཚོའི་གཞིས་ཆགས་མུ་མཐུད་གནས་དགོས་པ་ཡིན་ན། དུས་ཚོད་ཀྱི་འགྱུར་བ་དང་མི་རབས་ཀྱི་འགྱུར་བ་དང་བསྟུན་ཏེ། དཔལ་འབྱོར་སྒྲོམ་གཞི་གསར་པ་ཞིག་བཟོ་མ་ཐུབ་པ་ཡིན་ན།གཞིས་ཆགས་ཁག་ལ་དཀའ་ངལ་འཕྲད་རྒྱུའི་གནས་སྟངས་ཤིག་ཡོང་གི་ཡོད།ལོ་གཞོན་རྣམས་སྤྱི་ཚོགས་ནང་གནས་དགོས་ན།སློབ་སྦྱོང་ལ་རན་པའི་ལས་དོན་བསྒྲུབ་ཕྱོགས་གོ་སྒྲིག་བྱ་རྒྱུ་དང་། གལ་སྲིད་བོད་པའི་སྤྱི་ཚོགས་ནང་གནས་ཐུབ་ཀྱི་མེད་ཀྱང་།སྤྱི་ཚོགས་དང་འབྲེལ་ལམ་མུ་མཐུད་གནས་ཐུབ་པ་ཞིག་ལ་དགོངས་པ་བཞེས་དགོས་ཀྱི་འདུག

བློ་བཟང་སེང་གེ་ལགས་ཀྱི་བཀའ་ལན། བཙན་བྱོལ་ནང་ཡར་རྒྱས་གཏོང་དགོས་ས་གཙོ་བོ་དེ་ཤེས་ཡོན་རེད། ཤེས་ཡོན་ལ་མ་རྩ་ཕོན་ཆེན་པོ་ཞིག་བཏང་སྟེ། མ་འོངས་པར་བོད་པའི་སྤྱི་ཚོགས་ནང་རིག་གཅིག་རྐང་འཛིན་པ་ཁྲི་ལྷག་བྱུང་བ་ཡིན་ན།རིམ་བཞིན་བོད་གཞུང་དང་ང་ཚོའི་རྩ་དོན་རྩོད་རྒྱུར་ཕན་པ་རེད། དཔེར་ན། ཁྱད་ལས་པ་ཁྲི་གཅིག་ཡོད་པའི་དབང་དུ་བཏང་ན། མི་གཅིག་རེ་ཡིས་ཨ་སྒོར་ཆིག་སྟོང་རེའི་ཞལ་འདེབས་གནང་ན།བོད་གཞུང་ལ་ཨ་སྒོར་ས་ཡ་༡༠འཐོབ་ཐུབ་ཀྱི་ཡོད།ད་ལྟའི་བོད་གཞུང་འགྲོ་གྲོན་དེ་ས་ཡ་བདུན་ནས་བརྒྱད་རེད།རྒྱ་བལ་འབྲུག་གསུམ་དང་ཕྱི་རྒྱལ་དུ་ཡོད་པའི་བོད་རིགས་གཞོན་སྐྱེས་ཚོར་བོད་གཞུང་ལ་ལྷག་བསམ་དང་སེམས་ཤུགས་ཆེན་པོ་ཡོད་པ་རེད། ཁོང་ཚོར་གོ་སྐབས་སྤྲོད་དགོས་པ་རེད། ཟམ་གདོང་རིན་པོ་ཆེ་བཀའ་ཁྲི་སྐབས་དང་པོའི་རིང་། བོད་གཞུང་གི་ལས་བྱེད་རྩ་དགོངས་ལ་འགྲོ་མཁན་བརྒྱ་ཆ་༥༠ཙམ་བྱུང་འདུག སྐབས་གཉིས་པར་ཕལ་ཆེར་བརྒྱ་ཆ་༧༠ ལྷག་ཡིན་བསམ་སོང་། བོད་གཞུང་གིས་གཞོན་སྐྱེས་ཚོར་རང་རང་གིོ་འདོད་མོས་ཡོད་པའི་ལས་ཀ་གོ་སྒྲིག་བྱ་ཐུབ་པ་ཡིན་ན། གཞུང་གི་སྒྲིག་འཛུགས་སྲ་བརྟན་རྒྱུན་གནས་ཐུབ་པར་ཕན་ཐོགས་ཆེན་པོ་ཡོང་གི་རེད།  

བཀྲ་ཤིས་དབང་འདུས་ལགས་ཀྱི་བཀའ་ལན། ཤེས་ཡོན་ཐོག་ཤུགས་རྒྱག་རྒྱུ་དེ་གལ་ཆེན་པོ་རེད།དམའ་རིམ་ཤེས་ཡོན་ནས་བསྐྱར་བཅོས་བྱ་དགོས་པ་མང་པོ་འདུག གཙོ་བོ་དགེ་རྒན་གྱི་གནས་ཚད་ཡར་རྒྱས་སུ་གཏོང་དགོས་ཀྱི་འདུག གཉིས་པ།བོད་མི་ཆིག་འབུམ་ལྔ་ཁྲི་ཙམ་འཛམ་གླིང་གར་སར་ཁྱབ་བསྡད་ཡོད་པ་རེད། དེ་དག་ཕུགས་རྒྱང་རིང་པོར་འབྲེལ་བ་མ་བརླག་པར་གནས་ཐུབ་རྒྱུར་དགོངས་པ་བཞེས་པ་རེད།  

བློ་བཟང་སེང་གེ་ལགས་སུ་དྲི་བ། བོད་ནང་གི་ཛ་དྲག་གི་དཀའ་ངལ་གསུམ་གང་དག་ལ་ངོས་འཛིན་གནང་གི་ཡོད་པ་དང་། དེ་དག་ཛ་དྲག་ཏུ་ངོས་འཛིན་གནང་བའི་རྒྱུ་མཚན་གང་ཡིན་ནམ།

ལན། བོད་ཡུལ་རྒྱ་ནག་གི་མི་སེར་སྤེལ་ལམ་ལུགས་འོག་ཡོད་པ་དེ་གཅིག་རེད།གཉིས་པ།བོད་པའི་ཆོས་དང་རིག་གཞུང་།སྐད་ཡིག་དང་བཅས་པ་རྒྱ་གཞུང་གིས་རྩ་མེད་དུ་གཏོང་གི་ཡོད་པ་དེ་རེད།གསུམ་པ། བོད་ནང་གཏེར་ཁ་སྔོན་འདོན་བྱས་ཏེ་ཁོར་ཡུག་ལ་གཏོར་བཅོམ་གཏོང་གི་ཡོད་པ་བཅས་རེད། ཏང་གི་ལས་བྱེད་ནས་དམའ་རིམ་བར་རྒྱ་རིགས་མང་ཏུ་འགྲོ་བཞིན་ཡོད་པའི་མི་སེར་སྤེལ་ཡུལ་མཚོན་རྟགས་ཆེ་ཤོས་རེད། གཏེར་ཁ་སྔོག་འདོན་ཡང་ས་གནས་མི་མང་ལ་ཁེ་ཕན་གང་ཡང་མེད་པའི་ཐོག་ནས་ཁོར་ཡུག་གཏོར་བཅོམ་བྱེད་ཀྱི་ཡོད་པ། རིག་གཞུང་རྩ་མེད་བཟོ་བཞིན་ཡོད་པའི་ཐད་ཆོས་དད་རང་དབང་མེད་པ་དང་དགོན་པར་ཞུགས་ཆོག་གི་མེད་པ། ཐ་ན་གོང་ས་མཆོག་གི་སྐུ་པར་ཙམ་ནང་ཉར་འཇུག་གི་མེད་པ་སོགས་རྒྱལ་སྤྱིའི་ཁྲིམས་ལུགས་གཞིར་བཞག་ཐོག་ཁྱབ་བསྒྲགས་བྱ་རྒྱུ་གལ་ཆེན་རེད།

བཀྲ་ཤིས་དབང་འདུས་ལགས་ཀྱི་བཀའ་ལན། དབུ་མའི་ལམ་གྱི་སྲིད་བྱུས་གཞིར་བཞག་སྟེ།རྒྱ་གཞུང་ལ་བོད་རིགས་ལ་ཡོངས་མིང་དོན་མཚུངས་པའི་རང་སྐྱོང་ཡོང་ཐབས་ཀྱི་གྲོས་འཆར་ཞིག་བཏོན་ཡོད་པ་རེད། དེ་ནི་རྒྱ་ནག་གཞུང་གི་རྩ་ཁྲིམས་དང་མི་རིགས་ས་གནས་བཅའ་ཁྲིམས་གཉིས་ལ་ཁུངས་གཏུག་བྱས་ཡོད་སྟབས། གྲོས་འཆར་དེ་གཞིར་བཟུང་ཐོག་བོད་ནང་བཞུགས་མཁན་ཚོས་བརྩོན་ལེན་བྱ་དགོས་པ་རེད། རྒྱལ་སྤྱིའི་སྡིངས་ཆའི་ཐོག་མུ་མཐུད་དུ། རྒྱ་གཞུང་གིས་ཁ་ནས་བཤད་པ་དང་ལག་ལེན་བསྟར་བ་གཉིས་ཐོ་མི་ཐུག་པ་གསལ་སྟོན་བྱ་རྒྱུའི་ཐོག་ལ་ཤུགས་རྒྱག་རྒྱུ་གལ་ཆེན་པོ་རེད།

བཀྲས་མཐོང་ལགས་ཀྱི་བཀའ་ལན། བོད་ཀྱི་གནད་དོན་ཛ་དྲག་ཡིན་པ་དང་ཆབ་སྲིད་ཀྱི་གནད་དོན་ཡིན་པ་ང་ཚོས་ར་སྤྲོད་གསལ་པོ་བྱ་དགོས་པ་རེད། འགའ་ཤས་ཀྱིས་ཆོས་རིག་གི་དཀའ་ངལ་དེ་སེལ་རྒྱུ་དང་།ཆབ་སྲིད་བཙོན་པ་ཁག་ཅིག་ཀློད་གྲོལ་གཏོང་རྒྱུ། ཡང་ན་ཁོར་ཡུག་ཐོག་དོ་སྣང་བྱས་ན་ཕན་གྱི་རེད་བསམ་པ་ཡིན་ན། བོད་ཀྱི་རྩ་དོན་ལྟེ་བ་དེ་ལྷག་གི་ཡོད་པ་འདྲ། བོད་ནང་གི་དཀའ་ངལ་ཚང་མ་ཆབ་སྲིད་དང་འབྲེལ་བ་ཡོད་པ་དེ་བོད་མི་ཚང་མས་གསལ་བོ་ཤེས་དགོས་པ་མ་ཟད། ཕྱིའི་རོགས་སྐྱོར་ཚོགས་པ་ཁག་ལ་ཡང་འགྲེལ་བཤད་གསལ་པོ་བཟོ་དགོས་པ་རེད།ཆབ་སྲིད་ཀྱི་གནད་དོན་ཡིན་པ་དེ་གསལ་པོ་མ་བཟོས་ན་བོད་ཀྱི་གནད་དོན་དེ་སེལ་ཐུབ་ཀྱི་ཁག་པོ་རེད།

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། བཙན་བྱོལ་བོད་གཞུང་གིས་བོད་ནས་གསར་དུ་འབྱོར་བའི་གཞོན་སྐྱེས་མང་པོ་ཞིག་ལ་ལས་ཀ་དང་སློབ་སྦྱོང་གི་གོ་སྐབས་གནང་གི་ཡོད་ཀྱང་དཀའ་ངལ་འདི་མུ་མཐུད་གནས་ཡོད་སྟབས།གཞུང་གིས་དམིགས་བསལ་འཆར་གཞི་ཡོད་པའི་ཐོག་ནས་གཟིགས་དགོས་པའི་གནས་སྟངས་ཤིག་རེད། གསར་དུ་འབྱོར་བའི་གཞོན་སྐྱེས་ཁོ་རང་ཚོའི་ངོས་ནས་གཞིས་ཆགས་རྒྱུ་དང་། སློབ་སྦྱོང་བྱ་རྒྱའི་བསམ་འཆར་ག་རེ་ཡོད་པ་དེ་བོད་གཞུང་ལ་ཞུ་ཐུབ་པ་ཡིན་ན།ཕན་ཐོགས་ཆེན་པོ་འབྱུང་གི་རེད་བསམ།དེ་མིན་པར་བོད་གཞུང་གིས་དངུལ་ཁུག་སྟོང་པ་ཆགས་རྒྱུ་མེད་པ་ལྟར། མི་སུ་བསླེབས་ཀྱང་ཚང་མར་ལས་ཀ་སྤྲོད་ཐུབ་དགོས་པ་དེ་དངོས་ཡོད་གནས་ཚུལ་གྱི་ཐོག་ནས་དཀའ་ངལ་ཆེན་པོ་རེད།

བློ་བཟང་སེང་གེ་ལགས་ཀྱི་བཀའ་ལན། བོད་ནས་གསར་དུ་འབྱོར་མཁན་ཚོར་དཀའ་ངལ་ཡོད་པ་ཤེས་ཀྱིན་ཡོད་ལ།བོད་གཞུང་གི་ངོས་ནས་དམིགས་བསལ་གནང་དགོས་པ་གང་འདུག་ཟེར་ན།གསར་དུ་འབྱོར་མཁན་ཚོ་སློབ་གྲྭ་མཐར་ཕྱིན་པ་ཡིན་ན་རིམ་གྱིས་རང་མགོ་འཐོན་པ་ཆགས་ཡོང་གི་འདུག གསོག་སྒར་སློབ་གྲྭ་དང་སློབ་གྲྭ་གཞན་ནས་མཐར་མ་འཁྱོལ་བར་སློབ་གྲྭ་གཡུག་བཞག་པ་ཡིན་ན། དཀའ་ངལ་ཆེན་པོ་འཕྲད་ཀྱིན་འདུག དེའི་ཐད་བོད་གཞུང་གིས་ལག་ཤེས་དང་ཟབ་སྦྱོང་། ལམ་སྟོན་སོགས་ཀྱི་ཐད་ནས་གང་ཐུབ་ཅི་ཐུབ་བྱ་རྒྱུ་གལ་ཆེན་པོ་རེད།

བཀྲ་ཤིས་དབང་འདུས་ལགས་ཀྱི་བཀའ་ལན། སྤྱིར་བཏང་བོད་ནས་གསར་དུ་འབྱོར་བའི་རིགས་ལ་བོད་གཞུང་གིས་གང་ཡང་ཅི་ཡང་གནང་ཡོད་པ་རེད། དེ་ལས་ལྷག་ཅིག་གནང་ཐུབ་པ་ཞིག་མཐོང་གི་མེད། གཞོན་ནུ་ལས་མེད་ཀྱི་སྐོར་ལ། ཁོང་ཚོར་ལས་ཀ་མེད་པར་ལས་མེད་རེད་དམ།ལས་ཀ་ཡོད་བཞིན་དུ་གདམ་ཀ་བྱས་ཏེ་ལས་མེད་ཆགས་པ་རེད།གནས་ཚུལ་དེའི་ཐོག་ལ་ཞིབ་འཇུག་བྱ་རྒྱུ་གལ་ཆེན་པོ་རེད།གནད་དོན་འདི་བོད་པ་གཅིག་པུ་མ་རེད་འཛམ་གླིང་ཡོང་ལ་དཀའ་ངལ་དེ་ཡོད་པ་ཞིག་རེད།

དྲི་བ། ང་ཚོས་ཐོག་མར་རང་བཙན་དང་། དེ་ནས་ཚད་མཐོ་བའི་རང་སྲིད་རིང་སྐྱོང་། ད་ལྟ་རྒྱ་ནག་གི་རྩ་ཁྲིམས་འོག་གི་རང་སྐྱོང་བརྩད་ཡོད་ཀྱང་གྲུབ་འབྲས་ཐོན་མེད། གྲུབ་འབྲས་མ་ཐོན་པའི་རྒྱུ་རྐྱེན་གང་ལ་ངོས་འཛིན་གནང་གི་ཡོད་དམ།  

བློ་བཟང་སེང་གེ་ལགས་ཀྱི་བཀའ་ལན། རྒྱ་ནག་གཞུང་ལྟ་བ་མཁྲེགས་དྲགས་པ་དང་རྒྱ་མིའི་མགོ་ཁྲིད་ནང་ཁུལ་ནས་བོད་དོན་དེ་མི་སེར་སྤེལ་སྤེལ་ཡུལ་ལམ་ལུགས་འོག་ནས་མི་རིགས་གཞན་པ་དབང་སྒྱུར་གྱི་ནུས་ཤུགས་ཆེ་དྲགས་པའི་དབང་གིས་རྒྱལ་སྤྱིའི་ཐོག་ནས་གནོན་ཤུགས་ག་ཚོད་སྤྲད་ཀྱང་འགུལ་དཀྱོག་མ་བརྒྱབ་པ་རེད། དེ་འགྱུར་བ་གཏོང་བར་རྒྱལ་སྤྱིའི་ཁོར་ཡུག་དང་རྒྱ་ནག་གི་ཁོར་ཡུག་འགྱུར་བ་འགྲོ་དགོས་ཀྱི་ཡོད་པ་རེད་ལ། ང་ཚོའི་ངོས་ནས་འབད་བརྩོན་བྱ་རྒྱུ་ཏན་ཏན་ཡོད་ཀྱང་། ཕར་ཕྱོགས་ནས་འགྱུར་བ་མང་བཏང་བར་དུ་ང་ཚོར་ཞེ་དྲག་བྱ་རྒྱུ་ཡོད་པ་མ་རེད། སྐབས་དང་དུས་ཤིག་ཏན་ཏན་ཤར་ཡོང་གི་རེད་བསམ་གྱི་འདུག  

བཀྲ་ཤིས་དབང་འདུས་ལགས་ཀྱི་བཀའ་ལན། བོད་རྒྱ་ཞི་མོལ་གྱི་ལས་རིམ་དེ་འགག་པའི་རྒྱུ་མཚན་གཙོ་བོ།ད་ལྟའི་མགོ་ཁྲིད་ཚོར་ཆབ་སྲིད་ཀྱི་བློ་སྟོབས་མེད་པ་དང་། བོད་ཀྱི་གནད་དོན་དེ་རྒྱ་ནག་གཞུང་གིས་ཁ་བྲལ་གྱི་གནས་ཚུལ་ཞིག་ལ་ཉར་ཏེ། ཁོ་རང་ཚོའི་ཆབ་སྲིད་ཀྱི་གནས་སྟངས་ཤིག་སྲུང་སྐྱོབ་བྱ་རྒྱུ་དང་། རྒྱ་ནག་མི་མང་ལ་མགོ་སྐོར་གཏོང་ཆེད་རེད། ང་ཚོའི་ངོས་ནས་རྒྱ་ནག་མི་མང་ལ་ག་ཚོད་ཐུབ་ཐུབ་ཀྱིས་གསལ་བོ་བཟོ་བའི་བརྒྱུད་ལམ་མི་འདུག་བསམ་པའི་འདུ་ཤེས་དེ་རྒྱ་ནག་གི་མགོ་ཁྲིད་ཚོའི་བསམ་བློའི་ནང་བསླེབས་པ་ཡིན་ན། ཁོང་ཚོའི་ངོས་ནས་བོད་རྒྱ་ཞི་མོལ་ཡོང་བའི་ཐོག་ལ་བསམ་བློ་གཏོང་ངེས་པའི་ཡིད་ཆེས་གཙང་མ་བྱེད་ཀྱི་ཡོད།

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། གནད་དོན་འདིའི་གཞི་རྩ་རྒྱ་མིའི་ངོས་ནས་གུས་ཞབས་མེད་པ་དེ་རེད་ལ། འཛམ་གླིང་གི་ཁོར་ཡུག་དང་རྒྱ་ནག་གི་ཁོར་ཡུག་འགྱུར་བ་འགྲོ་དགོས་པ་དེ་ཡང་དངོས་ཡོད་གནས་ཚུལ་རེད། ག་དུས་ཡིན་ནའང་རྩ་ཆེ་ཤོས་དང་རིན་ཐང་ཆ་ཤོས་དེ་བོད་མིའི་ངོས་ནས་ང་ཚོར་བདེན་པ་ཡོད། ཅེས་ལབ་ཀྱི་ཡོད་ན་བདེན་པ་དེ་ཤུགས་ཆེན་པོའི་ཐོག་ནས་རྩོད་དགོས་པ་རེད། བོད་ཀྱི་འདས་པའི་ལོ་རྒྱུས་ཀྱི་ར་སྤྲོད་ཡིན་ན་འདྲ་ལ། ང་ཚོའི་ཐོབ་ཐང་གི་སྐོར་ཡིན་ནའང་འདྲ། རྩོད་གཞི་དེ་རྒྱ་མིར་ཐད་ཀར་རྩོད་ཀྱི་ཡོད་ན་འདྲ་ལ། བརྒྱུད་ནས་རྩོད་ཀྱི་ཡོད་ནའང་འདྲ། ང་ཚོས་འཛམ་གླིང་སྡིངས་ཆ་གང་དག་ཏུ་ཤུགས་ཆེན་པོས་རྩོད་དགོས་པ་རེད།

དྲི་བ། ད་ཆར་ང་ཚོས་ཞི་མོལ་གྱི་ཐོག་ནས་བོད་རིགས་ཡོངས་ལ་རང་སྲིད་རང་སྐྱོང་རྩོད་ཀྱི་ཡོད་པ་རེད། འདི་ལ་གྲུབ་འབྲས་མ་སོན་པ་ཡིན་ན་ཐབས་ལམ་གསར་པ་གང་འདྲ་ཡོད་དམ།

བཀྲ་ཤིས་དབང་འདུས་ལགས་ཀྱི་བཀའ་ལན། ང་རང་ངོས་ནས་ད་ལྟའི་ཆར་བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་དེ་ལས་ལྷག་པའི་ཐབས་ལམ་གཞན་པ་ཞིག་མཐོང་གི་མེད། ཐད་ཀར་ཞུས་པ་ཡིན་ན་ཐབས་ལམ་དེ་ལས་ལྷག་པའི་ཐབས་ལམ་གཞན་པ་ཞིག་ཡོད་པ་མ་རེད་ཅེས་ཞུ་རྒྱུ་ཡིན།    

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། ཐབས་ལམ་གྱི་ཐད་ནས་སྔོན་ལ་ཞུས་ཟིན་པ་ལྟར། དབུ་མའི་ལམ་གྱི་སྲིད་བྱུས་དེ་གཙོ་བོ་རྒྱ་བོད་གཉིས་འདོད་པ་མཐུན་ཏེ་དཀའ་ངལ་སེལ་དགོས་སྟབས། ཐབས་ལམ་དེ་གཞི་རྩ་ཞིག་རེད་བསམ་གྱི་ཡོད། ཡིན་ནའང་ཐབས་ཤེས་འདྲ་མིན་གྱིས་ལམ་ནས་ནུས་པ་ཆེ་རུ་གཏོང་དགོས་པའི་དུས་ཚོད་ཅིག་རེད་བསམ་གྱི་འདུག 

བློ་བཟང་སེང་གེ་ལགས་ཀྱི་བཀའ་ལན། ཞི་བའི་ལམ་གྱི་ཐོག་ནས་རྩ་དོན་རྩོད་མཁན་གང་འདྲ་ཞིག་ཡིན་ཡང་། གཞུང་ལ་གདོང་ལེན་དང་མི་མང་དང་མཉམ་དུ་བཀའ་མོལ་གནང་རྒྱུ་དེ་གྷན་ངྷི་གཙོས་མར་ཊིར་ལི་ཐིར་ཁེན། ནཱན་སི་མན་ཌ་ལཱ་བཅས་རྣམ་པ་ཚང་མས་ལམ་དེ་བེད་སྤྱོད་བཏང་བ་རེད། ང་ཚོ་ཡང་ཐབས་ལམ་དེ་བརྒྱུད་དེ་འགྲོ་གྱིན་ཡོད་པ་རེད། དེ་ལ་ཡང་གཞུང་མང་གཉིས་ཀས་འབད་བརྩོན་བྱ་རྒྱུ་ཞིག་ཏན་ཏན་ཡོད་པ་རེད་བསམ་གྱི་འདུག ང་ཚོའི་རྒྱལ་སྤྱིའི་ཁྲིམས་དང་འགྲོ་བ་མིའི་ཐོབ་ཐང་། ཁོར་ཡུག་བཅས་ཀྱི་ཐོག་ནས་ཤུགས་ཆེ་རུ་གཏོང་རྒྱུ་དང་། བོད་པ་ནང་ཁུལ་དུ་ལས་འགུལ་སྤེལ་ཕྱོགས་ཀྱི་ཐད་ནས་ཀྱང་ཆིག་སྒྲིལ་དང་འཆར་གཞི་ལྡན་པའི་གྷན་ངྷིའི་ཚ་ལེན་པའི་གོམ་བགྲོད་ཀྱི་ལས་འགུལ་ལྟ་བུའི་ཡར་རྒྱས་གཏོང་རྒྱུ་མང་པོ་ཡོད།

དྲི་བ། བོད་ནང་ཆབ་སྲིད་བཙོན་པ་རྣམས་ཀློད་གྲོལ་ཡོང་རྒྱུར་ཐབས་ལམ་གང་འདྲ་ཡོད་དམ།  

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། འདིའི་ཐད་དེ་སྔ་ཐབས་ཤེས་མང་པོ་བྱས་ཏེ་ཆབ་སྲིད་བཙོན་པ་མང་པོ་ཀློད་ཐུབ་པ་བྱུང་ཡོད། ད་དུང་མུ་མཐུད་ད་རྒྱལ་ཁབ་ཁག་གི་གཞུང་དང་ཚོགས་པ་འདྲ་མིན་ལ་འབོད་སྐུལ་ཞུ་རྒྱུ་དང་། བོད་མི་ཚོས་ས་གནས་ས་ཐོག་ཏུ་རྒྱ་མིས་བྱ་སྤྱོད་འདྲ་མིན་སྤེལ་བར་སྐྱོན་བརྗོད་དང་། རྒྱལ་ཁབ་འདྲ་མིན་དང་ས་གནས་འདྲ་མིན་དུ་སྐད་འབོད་ཁྲོམ་བསྐོར་བྱས་ན་ཕན་ཐོགས་ཡོང་གི་རེད་བསམ་ཡོད། གཞན་པའི་ཐབས་ཤེས་གསར་བ་ཨེ་ཡོད་བསམ་གྱི་འདུག

བློ་བཟང་སེང་གེ་ལགས་ཀྱི་བཀའ་ལན། ད་ལྟའི་བར་རྒྱལ་སྤྱིའི་ཚོགས་པ་ཁག་བརྒྱུད་དེ་ཆབ་སྲིད་བཙོན་པ་གང་འཚམ་ཞིག་ཀློད་ཐུབ་པ་བྱུང་ཡོད་པ་རེད་ལ། གཉིས་ནས་བོད་ནང་ཡོད་པའི་ཁྲིམས་རྩོད་པ་མང་པོ་ཞིག་གིས་རྒྱ་ནག་གི་ཁྲིམས་ཤེས་པའི་ཐོག་ནས་ཆབ་སྲིད་བཙོན་པ་ཉེན་ཁ་ཆེ་བའི་རིགས་ཀློད་གྲོལ་གཏོང་མ་ཐུབ་ཀྱང་། ཆུང་ཚགས་རིགས་ལ་ཁ་མཆུ་བརྒྱབ་སྟེ་ཁྲིམས་རྩོད་བྱས་ན་ཕན་ཐོགས་ཡོང་གི་རེད། དཔེར་ན། པེ་ཅིན་དུ་ཡོད་པའི་ཁྲིམས་རྩོད་པ་ཁ་ཤས་ཤིག་གིས་འབད་བརྩོན་བརྒྱུད་དེ། ཨ་མདོ་ཁུལ་གྱི་བཙོན་པ་ཁག་ཅིག་ཀློད་གློལ་ཐུབ་པ་བྱུང་ཡོད་པ་རེད།

བཀྲ་ཤིས་དབང་འདུས་ལགས་ཀྱི་བཀའ་ལན།  གཙོ་བོ་རྒྱལ་སྤྱིའི་སྡིངས་ཆའི་ཐོག་བོད་ནང་གི་འགྲོ་བ་མིའི་ཐོབ་ཐང་གི་དཀའ་ངལ་རིགས་བསྐྱལ་ཏེ། རྒྱལ་སྤྱིའི་གནོན་ཤུགས་འོག་སེལ་རྒྱུ་དེ་གལ་ཆེན་པོ་རེད། རྒྱ་ནག་གཞུང་ལ་མཚོན་ན། རྒྱལ་སྤྱིའི་གནོན་ཤུགས་ཡོང་གི་མེད་པའི་བསམ་ཚུལ་ཡོད་ཀྱང་། རྒྱ་ནག་གཞུང་ལ་རྒྱལ་སྤྱིའི་ཆེ་མཐོང་ཞིག་དགོས་ཀྱི་ཡོད་སྟབས། རྒྱལ་སྤྱིའི་ནང་བོད་ནང་གི་འགྲོ་བ་མིའི་ཐོབ་ཐང་སྐོར་གླེང་སློང་བྱེད་ཐུབ་པ་ཡིན་ན། ཕན་ཐོགས་ཡོང་གི་རེད་བསམ་གྱི་འདུག

དྲི་བ། བཀའ་བློན་ཁྲི་པར་བདམས་ཐོན་བྱུང་རྗེས། ཕྱག་རོགས་བཀའ་བློན་ལྷན་ཚོགས་དེ་ཆོལ་ཁ་ཆོས་ལུགས་རིས་མེད་འདེམ་རྒྱུ་ཡིན་མན། ཕོ་མོ་དབྱེར་མེད་འདེམ་རྒྱུ་ཡིན།

བློ་བཟང་སེང་གེ་ལགས་ཀྱི་བཀའ་ལན། གཙོ་བོ་བཀའ་བློན་སུ་བདམས་པ་ཡིན་ཡང་། ལྷག་བསམ་དང་སེམས་ཤུགས། འཇོན་ཐང་ཡོད་པ་ཞིག་འདེམ་རྒྱུ་གལ་ཆེན་པོ་ཞེ་དྲག་རེད། དེའི་སྒང་ལ་ང་རང་གིས་བཀའ་བློན་རྒན་པ་ ༣ དང་གཞོན་པ་ ༤ འདེམ་རྒྱུ་ཡིན་ཟེར་གྱིན་ཡོད། དེའི་ཁྲོད་ད་ལྟའི་བཀའ་ཤག་ནང་ནས་བཀའ་བློན་བསྐོ་རྒྱུ་ཡིན། ཟམ་གདོང་རིན་པོ་ཆེ་མཆོག་ལ་སློབ་སྟོན་ཞུ་རྒྱུ་ཡིན། དེ་ལས་གཞན། ང་རང་གི་བསམ་པར་ཆོལ་ཁ་རེ་ལ་འཇོན་ཐང་ཅན་ཏན་ཏན་ཡོད་པ་རེད། ང་ཚོ་ཚང་མ་འགྲོ་བ་མིའི་ཐོབ་ཐང་དང་བུད་མེད་ཀྱི་ཐོབ་ཐང་རྩོད་མཁན་ཡིན་སྟབས། བུད་མེད་ཀྱང་བསྐོ་རྒྱུ་ཡིན།  

བཀྲ་ཤིས་དབང་འདུས་ལགས་ཀྱི་བཀའ་ལན། བཀའ་བློན་དེ་ལས་ཁུངས་སོ་སོའི་ནང་ཕྱག་ལས་གནང་ཐུབ་མཁན་ཞིག་དགོས་ཀྱི་ཡོད་པ་རེད། ང་ཚོའི་སྤྱི་ཚོགས་ནང་མི་མྱོང་རྒྱུས་ཅན་དེ་འདྲ་མང་པོ་ཡོད་པ་རེད། ལས་ཁུངས་གང་ཡིན་ཡང་ལས་ཁུངས་དེའི་ལས་འགན་དང་འབྲེལ་བའི་ཐོག་ལ་མྱོང་རྒྱུས་ཅན་ཞིག་བསྐོ་རྒྱུ་གལ་ཆེན་པོ་རེད་སྙམ།  

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། བཀའ་ཤག་ནང་ཕེབས་མཁན་གྱི་མི་དེ་ཆོལ་ཁ་ཆོས་ལུགས་དང་ཕོ་མོ། རྒན་གཞོན། སློབ་སྟོན་པ་དགོས་པའི་སྐོར་སོགས་ད་ལྟ་ནས་བཤད་པའི་དུས་ཚོད་ཏག་ཏག་ཅིག་རེད་བསམ་གྱི་མེད། གང་ཡིན་ཞེ་ན། ཆོལ་ཁ་ཆོས་ལུགས་དང་རྒན་གཞོན། ཕོ་མོ་ཚང་དགོས་པ་དེ་ཚོ་སྤྱི་འཐུས་ལྷན་ཚོགས་ནང་ཚང་བསྡད་ཡོད་པ་རེད། བཀའ་ཤག་ནང་ཕེབས་མཁན་ཚོ་སྤྱི་བའི་ལས་དོན་སྒྲུབ་མཁན་རེད། ལྷན་ཁང་རེ་རེའི་ནང་ཉམས་མྱོང་དང་འཇོན་ཐང་། ལས་དོན་བསྒྲུབ་ཐུབ་མཁན་གྱི་མི་དགོས་པ་རེད། མཚན་ཉིད་དེ་དག་ཚང་བའི་རྗེས་ལ་ཆོལ་ཁ་ཆོས་ལུགས་དང་ཕོ་མོའི་མཚན་ཉིད་ཚང་བ་ཡིན་ན་རྒྱན་རེད།  

དྲི་བ། མ་འོངས་པར་བོད་པའི་རྩ་དོན་འཐབ་རྩོད་ཐོག་ནུས་པ་གཅིག་ཏུ་སྤུངས་ཏེ། མཐུན་ལམ་རྡོག་རྩ་གཅིག་བསྒྲིལ་ཡོང་རྒྱུར་ཐབས་ལམ་གང་འདྲ་ཡོད་དམ།  

བཀྲ་ཤིས་དབང་འདུས་ལགས་ཀྱི་བཀའ་ལན། རྩ་དོན་འཐབ་རྩོད་ཀྱི་ནུས་པ་ཆིག་བསྒྲིལ་ཡོང་ཐབས་གཙོ་བོ་ཕྱི་གསལ་ནང་གསལ་གནང་རྒྱུ་དེ་གལ་ཆེན་པོ་རེད་དྲན་ཡོད།  

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། སྤྱི་བའི་ལས་དོན་བསྒྲུབ་དགོས་དུས་སྐད་ཆ་མང་པོ་བཤད་པ་ལས། དངོས་སུ་ལས་དོན་ཐོག་ལ་གྲུབ་འབྲས་སྟོན་དགོས་པ་རེད། ལས་དོན་གྱི་ཐོག་ནས་དྲང་པོ་དྲང་བཞག་བྱས་པ་ཡིན་ན། གོང་བུ་གཅིག་གྱུར་ཡོང་གི་རེད

བློ་བཟང་སེང་གེ་ལགས་ཀྱི་བཀའ་ལན། ང་རང་གི་ལྟ་གྲུབ་གསུམ་ལས་ཆིག་སྒྲིལ་དང་པོར་བཞག་ཡོད་ལ། ཆིག་སྒྲིལ་གལ་ཆེན་དུ་རྩིས་ཏེ། བཀྲས་མཐོང་བསྟན་འཛིན་རྣམ་རྒྱལ་དང་བཀྲ་ཤིས་དབང་འདུས་རྣམ་གཉིས་ཀྱི་ལྷག་བསམ་དང་སེམས་ཤུགས། འདས་པའི་ལོ་མང་རིང་གི་བྱ་བའི་ཉམས་མྱོང་དང་ལས་དོན་གྲུབ་འབྲས་སོགས་ཡིག་ངག་གཉིས་ཐོག་ནས་ཞུས་བསྡད་པ་ཡིན། ང་ཚོ་འོས་མི་ཡིན་པའི་སྐབས་ནས་ང་ཚོ་གསུམ་ཆིག་སྒྲིལ་ཡོད་པའི་རྣམ་པ་སྟོན་རྒྱུ་གལ་ཆེན་པོ་ཡིན་སྟབས། ཁོང་རྣམ་པ་གཉིས་ལ་བསྟོད་བསྔགས་བྱས་བསྡད་པ་ཡིན་ལ། མ་འོངས་པའི་ལས་ཀ་བྱེད་ཕྱོགས་ཀྱི་ཐོག་ནས་ཀྱང་ཆིག་སྒྲིལ་གཙོ་བོར་བཞག་ཏེ་ཆོལ་ཁ་དབྱེར་མེད་དང་ཆོས་ལུགས་རིས་མེད། ཕོ་མོ་འདྲ་མཉམ་གྱི་ཕྱག་ལས་གནང་རྒྱུ་ཡིན།  

དྲི་བ། བཙན་བྱོལ་བོད་མིའི་མི་འབོར་འཕེལ་རྒྱས་གཏོང་ཕྱོགས་ཐད་འཆར་གཞི་གང་འདྲ་ཡོད་དམ།

བཀྲ་ཤིས་དབང་འདུས་ལགས་ཀྱི་བཀའ་ལན། སྔོན་མ་གསར་སྐྱེས་ཉུང་དུ་འགྲོ་བའི་ཐད་དགོངས་འཆར་མང་པོ་བྱུང་བ་རེད་ལ། ཕྲུ་གུ་མང་པོའི་རིགས་ལ་གཞུང་ནས་སློབ་ཡོན་གནང་རྒྱུའི་ལས་འཆར་བཟོས་པ་རེད། ང་རང་གི་བསམ་ན་ད་ལྟའི་ཆར་མི་འབོར་ཉུང་རུ་འགྲོ་བ་དེ་ཕ་མས་གསོ་སྐྱོང་མ་ཐུབ་པ་ལ་བརྟེན་ནས་བྱུང་བ་ཞིག་ལ་ངོས་འཛིན་བྱེད་ཀྱིན་མེད་པར། སྤྱི་ཚོགས་དང་ཁོར་ཡུག་འགྱུར་བ་ཕྱིན་པ་ཞིག་ཡིན་སྟབས། ཐབས་ལམ་འདི་འདྲ་ཞིག་གི་སྟེང་ནས་སེལ་དགོས་ཞེས་བཤད་དཀའ་ཡང་། གོ་བསྡུར་གནང་བ་དང་བསྐྱར་ཞིབ་བྱ་རྒྱུ་གལ་ཆེན་པོ་རེད་བསམ་གྱི་འདུག

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། མི་འབོར་འཕེལ་དགོས་ན་བུད་མེད་ཚོ་ཆང་ས་རྒྱག་དགོས་པ་རེད། ཆང་ས་སྔ་མོར་བརྒྱབ་ན་ཕྲུ་གུ་མང་པོ་སྐྱེ་ཐུབ་པ་རེད། ལོ་གཞོན་མང་པོ་དགོན་པ་ཁག་ཏུ་འགྲོ་བཞིན་པ་དེ་ཡང་ཉུང་དུ་གཏོང་དགོས་པ་རེད། གཞུང་གི་ངོས་ནས་ཕྲུ་གུའི་སློབ་སྦྱོང་གི་མཐུན་འགྱུར་ཐོག་དགོངས་པ་བཞེས་དགོས་པ་རེད།

བློ་བཟང་སེང་གེ་ལགས་ཀྱི་བཀའ་ལན། གཞིས་ཆགས་ཁུལ་མང་ཆེ་བར་བསྐོར་བ་བརྒྱབ་པ་ཡིན། གཞིས་ཆགས་གཅིག་གི་ནང་མི་འབོར་འཕེལ་རྒྱས་ཆེན་པོ་འགྲོ་གི་འདུག གཞིས་ཆགས་དེ་མེའོ་གཞིས་ཆགས་རེད། མི་ཚང་རེར་ཕྲུ་གུ་བདུན་བརྒྱད་ཡོད་མཁན་མང་པོ་འདུག བོད་གཞུང་གིས་གཞིས་ཆགས་དེར་ཞིབ་འཇུག་བྱ་དགོས་པ་རེད། ཤེས་ཡོན་དང་འཕྲོད་བསྟེན། སྤྱི་ཚོགས་ཀྱི་མཐུན་རྐྱེན་སོགས་ཀྱིས་མ་འདང་བ་ཡིན་ན། བོད་གཞུང་གི་ངོས་ནས་མཐུན་འགྱུར་གནང་དགོས་པ་རེད།

དྲི་བ། བལ་ཡུལ་ནང་གི་བོད་མི་ཚོར་འཕྲལ་ཕུགས་ཀྱི་དཀའ་ངལ་མང་པོ་ཞིག་ཡོང་གི་ཡོད་པ་དེ་སེལ་རྒྱུར་དགོངས་འཆར་གང་འདྲ་ཡོད་དམ།  

བཀྲས་མཐོང་བསྟན་འཛིན་རྣམ་རྒྱལ་ལགས་ཀྱི་བཀའ་ལན། བལ་ཡུལ་ཁོ་རང་ཚོའི་ཆབ་སྲིད་གཏན་མ་འཁེལ་བར། བོད་མི་ཚོར་དམིགས་བསལ་བྱ་ཐུབ་པ་གང་ཡང་ཡོད་པ་མ་རེད་བསམ་གྱི་འདུག འོན་ཀྱང་། ང་ཚོས་ཕྱོགས་ཡོངས་ནས་འབྲེལ་བ་བྱས་ཏེ། རྒྱ་གར་དང་ཨ་རིའི་གཞུང་ལ་སྐྱབས་བཅོལ་ཏེ་བལ་ཡུལ་བོད་མི་ཚོར་དམིགས་བསལ་གྱི་དཀའ་ངལ་དང་གདུག་རྩུབ་མི་ཡོང་བའི་འབོད་སྐུལ་ཞུ་དགོས་པ་རེད། དེ་མིན། ད་ཆར་བལ་ཡུལ་རང་གི་ཆབ་སྲིད་བརྟན་པོ་མེད་པ་དང་། ལྷག་པར་དུ་རྒྱ་གཞུང་གིས་ནུས་པ་འདྲ་མོན་འདོན་གྱི་ཡོད་སྟབས། ང་ཚོས་ཐད་ཀར་བལ་ཡུལ་ནང་གི་གནས་ཚུལ་ལ་འགྱུར་བ་གཏོང་རྒྱུའི་ཆ་རྐྱེན་ཚང་ཡོད་པ་མ་རེད།

བློ་བཟང་སེང་གེ་ལགས་ཀྱི་བཀའ་ལན། གཅིག་བལ་ཡུལ་གཞུང་ནང་ཡོད་པའི་གནད་ཡོད་མི་སྣ་དང་ཐད་ཀར་འབྲེལ་བ་བྱས་ཏེ་བཀའ་མོལ་གནང་རྒྱུ་དང་། གཉིས་པ། རྒྱ་གར་གཞུང་དང་། གསུམ་པ་ཨ་རིའི་གཞུང་བཅས་ལ་འབོད་སྐུལ་ཞུ་རྒྱུ་གལ་ཆེན་པོ་རེད་བསམ་གྱི་འདུག དེ་བཞིན་བལ་ཡུལ་ནས་ཨ་རིར་གཏོང་བའི་ལས་གཞི་དེའི་ཐོག་ལ་ཡང་མུ་མཐུད་དུ་ནུས་པ་བཏོན་པ་ཡིན་ན་གྲུབ་འབྲས་འཐོན་ཐུབ་པ་ཞིག་རེད།

བཀྲ་ཤིས་དབང་འདུས་ལགས་ཀྱི་བཀའ་ལན། ང་རང་གི་བསམ་པར། བལ་ཡུལ་གཞུང་གི་ཆབ་སྲིད་བརྟན་པོ་མ་ཡོང་བའི་དབང་གིས་བོད་པ་ཚོར་ཞོར་དུ་དཀའ་ངལ་བྱུང་བ་རེད་མ་གཏོགས། བལ་ཡུལ་མི་མང་གི་ངོས་ནས་བོད་པའི་ཐོག་ལ་མ་དགའ་བ་དེ་འདྲ་ཡོད་པ་མ་རེད་བསམ་གྱི་འདུག ང་ཚོས་བལ་ཡུལ་མགོ་ཁྲིད་ཚོར་འབྲེལ་བ་བྱ་རྒྱུ་དང་མི་མང་ལ་འབྲེལ་བ་བྱ་རྒྱུ། དེ་བཞིན། བལ་ཡུལ་ལ་རོགས་སྐྱོར་གནང་མཁན་རྒྱལ་ཁབ་ཁག་ལ་འབོད་སྐུལ་ཞུ་དང་། བོད་གཞུང་ལ་དེ་སྔ་ནས་དགོངས་གཞི་ཡོད་པ་ལྟར། ཕྱི་རྒྱལ་ཁག་ལ་སྐྱབས་བཅོལ་དུ་ལེན་རྒྱུ་བཅས་ཕྱོགས་གཉིས་ཀར་འབད་པ་བྱ་དགོས་པ་རེད།