བོད་ཀྱི་བུད་མེད་སྒེར་ལངས།

བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག དེ་རིང་ཕྱི་ཚེས་ ༡༢ ཉིན་གྱི་ཞོགས་པའི་ཆུ་ཚོད་དགུ་དང་ཕྱེད་ཀའི་སྟེང་། ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་བུད་མེད་ཚོས་རྒྱ་གཞུང་གི་ཁྲིམས་འགལ་སྲིད་བྱུས་ལ་ངོ་རྒོལ་སྒེར་ལངས་བྱས་ཏེ་མི་ལོ་ཧྲིལ་པོ་ ༥༢ འཁོར་བའི་དུས་དྲན་སྲུང་གཙི་བྱས་ཡོད་ཅིང་། མཛད་སྒོའི་སྟེང་བཀའ་ཟུར་རིན་ཆེན་མཁའ་འགྲོ་མཆོག་དང་བོད་མི་མང་སྤྱི་འཐུས་རྒྱུན་ལས་ཁག དེ་བཞིན་བཞུགས་སྒར་ཁུལ་གྱི་མི་མང་མཉམ་ཞུགས་གནང་སྟེ་མེག་གྷན་ནས་ཀ་ཅ་རི་བར་གོམ་བགྲོད་སྐད་འབོད་བྱས་སོང་།

སྐབས་དེར་དབུས་བུད་མེད་ལྷན་ཚོགས་ཀྱི་ཟུང་དྲུང་མཆོག་གིས་བུད་མེད་སྟེར་ལངས་དུས་དྲན་ཐེངས་ ༥༢ པའི་བསྒྲགས་གཏམ་སྒྲོག་སྦྱང་གནང་དོན། ང་དགུ་ལོ་ནས་རྒྱ་གཞུང་གིས་བོད་ནང་དྲང་བདེན་མིན་པ་དང་ཁྲིམས་འགལ་གྱི་དྲག་སྤྱོད། གདུག་རྩུབ་བཙན་གནོན་དང་བཙོན་འཇུག་སྣ་ཚོགས་བྱས་དང་བྱེད་བཞིན་པར། བོད་ཀྱི་བུད་མེད་ཚོའི་ངོས་ནས་མི་ལོ་ ༥༢ རིང་འཚེ་མེད་ཞི་བའི་ལྟ་སྤྱོད་ཡང་དག་པའི་འོག་དྲང་བདེན། ཁྲིམས་མཐུན་བཅས་ཀྱི་སྒོ་ནས་འབད་བརྩོན་བྱེད་ཀྱིན་ཡོད། ཅེས་དང་། ༢༠༠༨ ནས་ ༢༠༡༠ ལོའི་བར་རྒྱལ་སྤྱིའི་འགྲོ་བ་མིའི་ཐོབ་ཐང་སྙན་ཐོའི་ནང་། བོད་ནང་གི་བོད་མི་ཚོས་འཚེ་མེད་ཞི་བའི་ལས་འགུལ་སྤེལ་བཞིན་པར། རྒྱ་གཞུང་གིས་དམག་མི་ཕོན་ཆེན་བོད་ནང་ཆེད་གཏོང་གིས་མནར་གཅོད་གཏོང་བཞིན་ཡོད་ལ། བོད་ནང་གི་འགྲོ་བ་མིའི་ཐོབ་ཐང་གི་རྐྱེན་པས། པཎ་ཆེན་སྐུ་ཕྲེང་བཅུ་གཅིག་པ་མཆོག་དང་སྤྲུལ་སྐུ་བསྟན་འཛིན་བདེ་ལེགས། ཀརྨ་བསམ་འགྲུབ་དང་དོན་གྲུབ་དབང་ཆེན། རོང་རྒྱས་ཨ་གྲགས་སོགས་ཆབ་སྲིད་བཙོན་པ་ ༨༠༠ ཙམ་ལ་ཁྲིམས་མཐུན་མིན་པར་དུས་བཀག་བཙོན་འཇུག་བྱས་ཏེ། མང་གཙོའི་དགོས་དོན་དང་ཆབ་སྲིད་རང་དབང་། སྨྲ་བརྗོད་རང་དབང་སོགས་རྡོག་རོལ་དུ་བཏང་ཡོད། ཅེས་བཀོད་འདུག

༢༠༠༨ ལོའི་ས་བྱི་ཞི་རྒོལ་ཆེན་མོའི་རྗེས། བོད་རིགས་རྩོམ་པ་པོ་དང་མཁས་དབང་། རི་མོ་བ་སོགས་ཀྱིས་མི་རིགས་ཀྱི་ངོ་བོ་དང་ལ་རྒྱ་དག་རིག་གཞུང་གསར་བརྗེའི་འཕེལ་རིམ་མི་འདྲ་བའི་ཐོག་རྒྱལ་སྤྱིའི་སྟེང་མངོན་ཐུབ་ཡོད་ལ། ལྷག་པར་དུ་བོད་ནང་གི་བུད་མེད་མཁས་དབང་དང་རྩོམ་པ་པོ། སྙན་ངག་པ་ཚོས་མི་རིགས་ལ་རྒྱབ་སྐྱོར་མཚོན་པའི་རྩོམ་ཡིག་གང་མང་ཞིག་བྲིས་ཡོད། བོད་རིགས་བུད་མེད་རྩོམ་པ་པོ་ཚེ་རིང་འོད་ཟེར་དང་འཇམ་དབྱངས་སྐྱིད་གཉིས་ཀྱིས། རྒྱ་གཞུང་གིས་འཇིགས་སྐུལ་ཇི་ལྟར་བྱས་མིན་ལ་མ་ལྟོས་པར་རྩོམ་ཡིག་མང་པོ་བྲིས་ཡོད་ལ་ད་ལྟའང་མུ་མཐུད་འབྲི་བཞིན་ཡོད། བུད་མེད་ལྷན་ཚོགས་ཀྱི་ངོས་ནས། རྩོམ་པ་པོ་འཇམ་དབྱངས་སྐྱིད་ལགས་ཀྱིས་བརྩམས་པའི་༼མནར་གཅོད་ཀྱི་གོ་རིམ་ཞིག༽ ཞེས་པ་རྒྱ་ཡིག་དང་དབྱིན་ཡིག་གཉིས་སུ་བསྒྱུར་ཏེ། དེ་རིང་མཛད་སྒོ་དང་སྟབས་བསྟུན་ཏེ་དངོས་སུ་པར་འགྲེམས་དབུ་འབྱེད་བྱས་པ་ཡིན། འདིར་ང་ཚོས་ཁོང་རྣམ་པའི་སྙིང་སྟོབས་ལ་བསྔགས་བརྗོད་དང་རྗེས་སུ་ཡི་རངས་ཞུ་བཞིན་ཡོད་ཅེས། བཀོད་འདུག