རོང་བོ་དགོན་པའི་བསྔོ་སྨོན།

ཉེ་ཆར་ཉི་ཧོང་ནང་ས་ཡོམ་དང་མཚོ་འཁྱོམ་གྱི་གནོད་འཚེ་ཚབས་ཆེན་ཐེབས་པ་དང་། ཡུན་ནན་དུ་ས་ཡོམ་བརྒྱབ་སྟེ་མི་རྒྱུ་གཉིས་ཀར་དཀའ་ངལ་འཕྲད་ཡོད་པ་བཅས་ཀྱི་ཆེད་དུ། ཟླ་འདིའི་ཕྱི་ཚེས་ ༡༨ ཉིན་ཨ་མདོ་རེབ་གོང་ཤར་སྐྱབས་མགོན་དབུ་བཞུགས་ཀྱིས་རོང་བོ་གདན་ས་གསུམ་གྱི་བླ་སྤྲུལ་དང་དགེ་འདུན་པ་ ༥༠༠ ལྷག་རོང་བོ་ཐོས་བསམ་གླིང་གི་ཆོས་གྲྭར་དཀྱུས་གཅིག་ཏུ་ཚོགས་ཏེ། ཉི་ཧོང་གི་རང་བྱུང་གོད་ཆག་ཁྲོད་ཚེ་འདས་སུ་སོང་བ་རྣམས་ཀྱི་ཆེད་དུ། མར་མེ་སྟོང་ཕྲག་མང་པོར་སྒྲོན་པ་དང་། དགེ་འདུན་འདུས་མང་གིས་བཟང་བོ་སྤྱོད་པའི་སྨོན་ལམ་དང་། བདེ་བ་ཅན་དུ་སྐྱེ་པའི་སྨོན་ལམ། ལམ་རིམ་སྨོན་ལམ་སོགས་གསུངས་ཏེ་བསྔོ་སྨོན་རྒྱ་ཆེན་མཛད་ཡོད་པ་དང་། རྨས་སྐྱོན་བྱུང་བ་རྣམས་ཀྱི་ཆེད་དུ་སྨན་བླའི་ཆོ་ག་གསུངས་ཏེ་སྲོག་ཉེན་ལས་མགྱོགས་མྱུར་ཐར་ཐུབ་པའི་སྐྱབས་འཇུག་ཞུས་ཡོད་འདུག

  ཐེངས་འདིའི་རེབ་གོང་རོང་བོ་དགོན་པའི་བླ་གྲྭ་ཡོངས་ཀྱི་བསྔོ་སྨོན་མཆོད་འབུལ་རྒྱ་ཆེན་གནང་བ་དང་བསྟུན་ཏེ། ཉི་ཧོང་གཙོས་འཛམ་གླིང་ཡུལ་གྲུ་ཀུན་དུ་ནད་ཡམས་མུ་གེ་འཐབ་རྩོད་འཁྲུག་ལོང་རང་བྱུང་འབྱུང་བཞིའི་གནོད་པ་རྣམས་ཞི་འཇམ་དང་། འཛམ་གླིང་མི་མང་རྣམས་ཞི་བདེ་དཔལ་ལ་ལོངས་སུ་སྤྱོད་ཐུབ་པའི་ཆེད་དུ། སྐྱབས་གནས་བསླུ་བ་མེད་པའི་དཀོན་མཆོག་རྣམ་གསུམ་དང་ཡི་དམ་ཆོས་སྐྱོང་སྲུང་མ་རྣམས་ལ་རྟེན་འབྲེལ་བསླུ་བ་མེད་པའི་བདེན་པ་བདར་ནས་ཐུགས་སྨོན་སྐྱབས་འཇུག་ཞུས་ཡོད་པ་མ་ཟད། གཞན་དུས་སྐབས་དེར་རེབ་གོང་གི་དད་ལྡན་མང་ཚོགས་གཙོས་ཕྱོགས་ཡར་མར་གྱི་འགྲུལ་བ་དང་། སློབ་གྲྭ་ཆུང་འབྲིང་གི་སློབ་མ་རྣམས་ཀྱིས་ཀྱང་གྲྭ་མང་དང་ལྷན་དུ་མ་ཎི་དང་སྐྱབས་འགྲོ་གསོག་སྒྲུབ་ཀྱིས་སྨོན་ལམ་བཏབས་ཡོད་འདུག