༧གོང་ས་མཆོག་གི་ཐུགས་རེ་དང་ང་ཚོའི་གོམ་སྟབས།

འབྲུག་ཐར་རྒྱལ། གོ་པལ་པུར་བོད་ཁྱིམ།

༧སྐྱབས་མགོན་རིན་པོ་ཆེ་མཆོག་ཆབ་སྲིད་ཀྱི་བགྲེས་ཡོལ་ཆ་ཚང་ཕེབས་པའི་གནད་དོན་འདི་ཉེ་ལམ་བོད་དོན་དང་འབྲེལ་བའི་རྒྱལ་སྤྱིའི་གསར་འགྱུར་གལ་གནད་ཆེ་ཤོས་སུ་གྱུར་ཡོད། འདིའི་ཐད་ཤེས་ལྡན་རྩོམ་པ་པོ་དང་བསམ་བློ་བ་མང་དག་ཅིག་གིས་དྲ་རྒྱ་དང་། ཀུན་གླེང་། ཚགས་དཔར། དེབ་སོགས་བརྒྱུད་བསམ་ཚུལ་འདྲ་མིན་སྤེལ་བཞིན་ཡོད། དེ་བས་རང་ཉིད་ཀྱི་ལྟ་ཕྱོགས་ཕྲན་བུ་ཀློག་པ་པོ་རྣམས་ཀྱི་སྤྱན་སྔར་འབུལ་འདུན་བྱུང་།

            ༧སྐྱབས་མགོན་རིན་པོ་ཆེ་མཆོག་སྐུ་ན་ཧ་ཅང་ཕྲ་བའི་དུས་ཏེ་དགུང་ལོ་བཅུ་དྲུག་ཐོག་བོད་ཆོས་སྲིད་ཀྱི་ཐུགས་འགན་བཞེས་དུས་ནས། བོད་འདི་དེང་རབས་ཅན་དང་དམངས་གཙོ་ཚད་ལྡན་ཞིག་ཏུ་བསྒྱུར་རྒྱུའི་འདུན་པ་ཆེན་པོ་ཡོད་ལ།  དཀའ་སྡུག་དང་གཉན་འཕྲང་ཆེ་ལ་མི་རིགས་འདི་འཆི་གསོན་གྱི་མཚམས་སུ་སླེབས་དུས་ཀྱང་། ལེགས་བཅོས་ཚོགས་པ་གསར་འཛུགས་གནང་སྟེ་བོད་གཞུང་གི་ལས་དོན་བྱེད་ཕྱོགས་དང་མི་མང་གི་བདེ་སྡུག་ལ་ཉམས་ཞིབ་གནང་སྟེ། བཅོས་བསྒྱུར་གནང་རྒྱུའི་ཐུགས་ཐག་བཅད་འདུག འོན་ཀྱང་རྒྱ་དམར་པོས་གདུག་རྩུབ་དང་བཙན་གནོན་འོག་ནས་གསར་བཏོད་ཀྱི་ལེའུ་ཐོག་མ་དེ་ལམ་ལྷུང་བྱུང་མེད།

 ཕྱི་ཡུལ་དུ་ཕེབས་མ་ཐག་བོད་གཞུང་དགའ་ལྡན་ཕོ་བྲང་གཞུང་བསྐྱར་འཛུགས་གནང་སྟེ་ཕྲུ་གུ་ཆུང་ཆུང་ཞིག་ཨ་མས་གསོ་སྐྱོང་གནང་བ་ལྟར། ཐོག་མ་ཁ་ལག་བཟའ་སྟངས་དང་གོམ་པ་སྤོ་སྟངས་ཚུན་ནས་རིམ་བཞིན་ཚད་ལྡན་གྱི་མི་བུ་ཞིག་བསྐྲུན་པ་བཞིན། ལོ་གཅིག་གི་མཚམས་འཐུས་མི་བཅུ་གསུམ་ལས་གྲུབ་པའི་སྤྱི་འཐུས་ལྷན་ཚོགས་གསར་འཛུགས་གནང་སྟེ་དམངས་གཙོའི་ཀ་བ་གསུམ་ལྡན་ཞིག་ཏུ་བསྒྱུར་གནང་བ་རེད། སྐབས་དེར་ཡང་བོད་མི་མང་དག་ཅིག་གི་བློ་ངོར་མ་ཤོང་བར་འགོག་རྐྱེན་ཕྲད་ཡོད་ཚུལ་འདུག

            དེ་ནས་རིམ་བཞིན་ཆོལ་ཁ་རེ་རེ་ནས་འཐུས་མི་བཅུ་རེ་དང་ཆོས་བརྒྱུད་ཁག་ནས་འཐུས་མི་གཉིས་རེ་བསྐོ་བཞག་གནང་དོན་ཡང་བོད་ཆོལ་ཁ་གསུམ་གཅིག་སྒྲིལ་གྱི་ངོ་བོ་མཚོན་བྱེད་ཡིན་པ་དང་། རིམ་བཞིན་ཁོང་གི་ཐད་བསྐོས་འཐུས་མི་ཉུང་དུ་བཏང་བ་དང་མཐའ་མ་མེད་པར་བཟོས།  ཐོག་མ་བཙན་བྱོལ་བོད་གཞུང་གི་ལས་དོན་ཆེ་ཕྲ་ཆུང་གསུམ་ཀུན་ལ་མཉམ་ཞུགས་དང་། བཀའ་སློབ་ལམ་སྟོན། མཛུབ་སྟོན་གནང་གི་ཡོད་ནའང་རིམ་པས་འགན་འཁྲི་དེ་དག་མི་མང་གིས་འོས་འདེམས་བྱས་པའི་འཐུས་མི་རྣམས་ལ་རྩིས་སྤྲོད་གནང་ཡོད།

            ཕྱི་ལོ་༢༠༠༡ ལོ་ནི་བོད་ཀྱི་ལོ་རྒྱུས་ཀྱི་དཀར་ཆག་ངོས་སུ་ཤིན་ཏུ་གཟི་བརྗིད་ལྡན་པའི་ལོ་ཚིགས་ཤིག་སྟེ།  གཞུང་ས་དགའ་ལྡན་ཕོ་བྲང་ནས་དམངས་གཙོ་ཚད་ལྡན་ཞིག་གི་ལམ་དུ་བསྐྱོད་པའི་དུས་ཚིགས་ཤིག་ཡིན་པར་༧གོང་ས་མཆོག་གིས་ངོས་འཛིན་གནང་ཡོད། དུས་དེ་ནས་བཟུང་ཁོང་ཕྱེད་འགྲེས་ཡོལ་གནང་སྟེ་གཞུང་གི་ལས་དོན་མང་དག་ཅིག་མི་མང་གི་འོས་འདེམས་བྱུང་བའི་བཀའ་ཁྲི་མཆོག་གིས་བཏང་འཛིན་གནང་གིན་ཡོད།

            ཕྱེད་བགྲེས་ཡོལ་ཏུ་ཕེབས་ནས་ལོ་ངོ་བཅུ་ཧྲིལ་བོར་འཁོར་བའི་དེ་རིང་ཁོང་གིས་མཚན་གནས་རྗེས་འབྲེལ་ཆབ་སྲིད་ཀྱི་ལས་དོན་ཡོངས་སུ་དོར་ནས་ཚད་ལྡན་གྱི་དམངས་གཙོའི་ཕྱོགས་སུ་ཁ་ལོ་བསྒྱུར་བ་དང་མདུན་མཆོངས་ཆེན་པོ་ཞིག་གནང་བ་རེད། འདི་ཁོང་གི་དམངས་གཙོའི་རིན་ཐང་གི་རྩ་གནད་དང་བོད་མི་རིགས་སྤྱི་དང་ལྷག་པར་མི་རབས་གསར་པ་རྣམས་ལ་ཡིད་རྟོན་ཆེན་པོས་མར་བསྩལ་བའམ།  ཐུགས་ཐག་འདི་ཡང་རེ་སྐུལ་དང་ཨུ་ཚུགས་ཟུང་ལྡན་ངང་གནང་འདུག  འདི་ལ་ནམ་ཡང་འགྱུར་ལྡོག་དང་ཕྱི་ཤོལ་མེད་ཅེས་ཐག་གཅོད་གནང་།

            འདི་ནི་འཛམ་གླིང་གི་འདས་པའི་ལོ་རྒྱུས་ལ་ཕྱིར་མིག་ཅིག་བལྟས་ཏེ་དམངས་གཙོ་དང་འདྲ་མཉམ། འགྲོ་བ་མིའི་ཐོབ་ཐང་། དྲང་བདེན་སོགས་མི་མང་གི་ཁྲག་དང་རྣག་གི་འཐབ་རྩོད་བྱས་དང་བྱེད་བཞིན་པ་རེད་ལ། སྒེར་གཅོད་རིང་ལུགས་པ་རྣམས་ནི་མི་མང་གི་ངོ་རྒོལ་ཁྲོད་ཕམ་ཉེས་བྱུང་སྟེ་སྲིད་སྟེགས་ལས་འབབ་ཀྱིན་ཡོད། དེ་ཡང་ཅི་ལིའི་དང་པོ་ལིན་གྱི་མང་གཙོའི་འཐབ་རྩོད་པ་རྣམས་རྣམ་པར་རྒྱལ་ཏེ་དམངས་གཙོའི་གཞུང་གསར་བ་དབུ་ཚུགས།  གནམ་སྡེ་སྒོ་མོ་ཆེའི་དྲུག་བཞིའི་དོན་རྐྱེན་སྐབས་དམངས་གཙོ་དོན་གཉེར་བ་སྟོང་ཕྲག་མང་པོ་འཆི་ལམ་དུ་བརྫངས་ཟིན་ནའང་ད་དུང་གཉའ་གནོན་འོག་ལུས་པ་དང་། དེང་སྐབས་དམངས་གཙོའི་གསར་བརྗེ་ཆེན་མོ་བཞི་པ་སྟེ་ཁ་ཆེའི་རྒྱལ་ཁབ་ཁག་གི་ནང་ལ་མཆེད་པའི་དམངས་གཙོ་གསར་བརྗེ་ལས་འགུལ་དག་ལས་མི་མང་སྟོང་ཕྲག་མང་པོའི་ཚེ་སྲོག་ཤོར་བ་དང་། ཁག་ཅིག་ཕྱི་ཡུལ་དུ་བཙན་བྱོལ་ལ་གྱར་ནས་དཀའ་སྡུག་མྱོང་བཞིན་ཡོད།

            འདི་ནི་མི་མང་གི་འགོ་འཁྲིད་སྒེར་གཅོད་པ་རྣམས་ལ་འཐབ་འཛིང་གི་བརྒྱུད་རིམ་ཞིག་སྟེ། འདིའི་དམིགས་ཡུལ་ནི་སྒེར་གཅོད་པ་དག་ཕམ་ཉེས་བཏང་སྟེ་མཐའ་མ་དམངས་གཙོའི་གཞུང་གསར་བ་ཞིག་འཛུགས་རྒྱུ་དེ་རེད། འོན་ཀྱང་ང་ཚོ་བོད་ཀྱི་དམངས་གཙོ་ནི་དེ་ལས་ལྡོག་སྟེ། དབུ་འཁྲིད་ཀྱིས་མི་མང་ལ་གདམ་ག་མེད་པར་ཨུ་ཚུགས་ངང་མི་གནང་ཐབས་མེད་བྱུང་བ་དང་། མི་མང་གིས་དང་ལེན་བྱེད་མ་ཐུབ་པར་ཡང་ནས་བསྐྱར་དུ་དབུ་འཁྲིད་ལ་གསོལ་བ་ཕུར་ཚུགས་སུ་འདེབས་བཞིན་ཡོད།  གོང་གི་སྒེར་སྤྱོད་པ་དག་མི་མང་གི་ངོ་རྒོལ་ཁྲོད་ངོ་ཚ་ཉོ་བཞིན་སྲིད་སྟེགས་ནས་འབབ་ཀྱིན་ཡོད་ནའང་། ང་ཚོའི་དབུ་འཁྲིད་ཀྱི་སྤོབས་སེམས་དང་ཡིད་རྟོན། འཕྲལ་དང་ཕུགས་དུས་དང་སྐབས་མང་པོ་ཞིག་ལ་རྒྱང་གཟིགས་ཀྱིས་དགོངས་བཞེད་རྒྱ་ཆེན་པོས་ངང་རྒྱལ་ཁ་དང་ལྷན་ཏུ་ཆབ་སྲིད་ཀྱི་འགན་ཡོངས་རྫོགས་མི་མང་ལ་རྩིས་སྤྲོད་ཀྱིན་ཡོད་པས་འདི་ལྟར་ང་ཚོའི་དམངས་གཙོ་དང་གཞན་དག་གི་དམངས་གཙོའི་བར་ཁྱད་པར་ཆེན་པོ་མངོན།

            བརྒྱུད་རིམ་དེའི་ཁྲོད་རྒྱལ་སྤྱིའི་སྟེང་གླེང་སློང་མང་པོ་བྱུང་ཡོད་པ་མ་ཟད། རྒྱ་ནག་དམར་པོའི་གཞུང་གི་འགོ་འཁྲིད་ཚོས་༧གོང་ས་མཆོག་གི་ཆབ་སྲིད་ཀྱི་གཡོ་བྱུས་ཡིན་པར་ངོས་འཛིན་དང་སྐད་ངན་ཤོར་ཡོད།  འདི་ནི་༧སྐྱབས་མགོན་རིན་པོ་ཆེའི་ལོ་ངོ་བཞི་བཅུ་ལྔ་བཅུའི་ཡར་སྔོན་གྱི་ཐུགས་རེ་ཡོངས་སུ་འགྲུབ་པ་དང་། བོད་མི་མང་གིས་ཚམ་ཚོམ་མེད་པར་ལག་བསྟར་བྱ་རྒྱུའི་དུས་ལ་བབས་ཡོད་པས་སོ།།