ཉེ་ཆར་རྒྱལ་སྤྱིའི་ཡུལ་སྐོར་སྤྲོ་འཆམ་ཚོགས་པས་གནས་ཚུལ་སྤེལ་བ་ལྟར་ན། འདས་པའི་ལོ་འགའི་ནང་སི་པན་ལ་དཔལ་འབྱོར་ཉམ་ཉེས་ཆེན་པོ་བྱུང་བ་དེས་རྒྱ་ནག་འཛམ་གླིང་ནང་གི་ཡུལ་སྐོར་སྤྲོ་འཆམ་པ་འགྲོ་ཡུལ་གྲངས་མང་ཤོས་ཨང་གསུམ་པར་བསླེབས་བཅུག་ཡོད་འདུག ༢༠༡༠ ལོར་སི་པན་ནང་ཡུལ་སྐོར་སྤྲོ་འཆམ་པ་ས་ཡ་ ༥༢།༢ ཙམ་བསླེབས་ཡོད་པ་དེར་གྲངས་ཚད་བརྒྱ་ཆ་གཅིག་ལས་འཕར་མེད་ཅིང་། རྒྱ་ནག་ལ་ ༢༠༡༠ ལོའི་ཡུལ་སྐོར་སྤྲོ་འཆམ་པའི་གྲངས་ཚད་ས་ཡ་༥༥།༧ ཙམ་ལ་བསླེབས་ཏེ་བརྒྱ་ཆ་ ༩།༤ འཕར་ཡོད་འདུག
ལོ་ལྟར་འཛམ་གླིང་གི་ཡུལ་སྐོར་སྤྲོ་འཆམ་པ་འགྲོ་མཁན་ཆེས་མང་ཤོས་ཨང་དང་པོ་ཨ་རི་ཡིན་ཞིང་། ལོ་འདི་འགར་ཡུལ་སྐོར་སྤྲོ་འཆམ་པ་ས་ཡ་ ༧༨།༩༥ ཙམ་བྱུང་ཡོད་སྟབས། སྔར་བཞིན་ཨང་དང་པོའི་གོ་གནས་ཟིན་ཡོད་པ་དང་། ཨང་གཉིས་པ་ཧྥ་རན་སིར་ཡུལ་སྐོར་བ་ས་ཡ་ ༦༠།༨༨ ཙམ་འབྱོར་ཡོད་འདུག འོན་ཀྱང་དེ་སྔོན་གྱི་ཡུལ་སྐོར་སྤྲོ་འཆམ་པའི་ལྟེ་གནས་ཨང་གསུམ་པ་སི་པན་མར་ཆག་སྟེ་ཨང་བཞི་བར་ཟེགས་ཡོད་པ་དང་། རྒྱ་ནག་གི་ཡུལ་སྐོར་སྤྲོ་འཆམ་པའི་ལས་རིགས་འཕེལ་རྒྱས་སུ་སོང་སྟེ་ཨང་གསུམ་པར་བསླེབས་ཡོད་འདུག
འཛམ་གླིང་གི་ཡུལ་སྐོར་སྤྲོ་འཆམ་པ་མང་ཤོས་འགྲོ་ཡུལ་གྱི་རྒྱལ་ཁབ་ ༥༠ ཙམ་ཡོད་པའི་ནང་། རྒྱ་གར་ནི་ཨང་ ༤༡ པ་དེ་ཡིན་ཞིང་། འདས་ལོའི་ནང་ཡུལ་སྐོར་བ་ས་ཡ་ ༥།༦ ཙམ་ལས་བྱུང་མི་འདུག འཛམ་གླིང་གི་ཡུལ་སྐོར་བ་མང་ཤོས་ཨང་རིམ་བཅུ་བའི་ནང་ཚུད་ཡོད་པའི་ཨེ་ཤ་ཡའི་རྒྱལ་ཁབ་གཞན་ཞིག་ནི་མཱ་ལེ་ཤེ་ཡཱ་ (Malaysia )ཡིན་ཞིང་། འདས་ལོར་མཱ་ལེ་ཤེ་ཡཱའི་ནང་ཡུལ་སྐོར་སྤྲོ་འཆམ་པ་ས་ཡ་ ༢༤།༦ ཙམ་བྱུང་ཡོད་འདུག
འཛམ་གླིང་གི་ཚོགས་པ་རྒྱ་ཆེས་ཤོས་དང་དཔལ་འབྱོར་འདུ་འགོད་འཁྲུག་ཤོས་དེ་རྒྱལ་སྤྱིའི་ཡུལ་སྐོར་སྤྲོ་འཆམ་ཚོགས་པ་ཆགས་ཡོད་ཅིང་། ཡུལ་སྐོར་སྤྲོ་འཆམ་པའི་གྲངས་ཚད་ཟིན་ཐོ་ལས་རྒྱལ་ཁབ་སོ་སོའི་དཔལ་འབྱོར་གྱི་གནས་བབ་དང་དར་རྒུད་གསལ་བོར་མངོན་ཡོད།
གསར་འགོད་པ། བནྡེ་སྐྱབས།
